جلوك .. قصة الأيفون بتاع المسدسات.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/glock-m4a

موضوعنا النهاردة عن مسدس جلوك Glock Handgun اللي عشان بس أشبهه ليك بحاجة قريبة منك فخليني أقولك إن ده يبقي الiPhone بتاع المسدسات .. متعملش مسدس أحسن منه ومفيش حد جربه إلا ووقع في غرامه .. الحقيقة إن قصة المسدس ده قصة غريبة أوي إتجمع فيها الحظ علي الرغبة إنك تعمل حاجة جديدة محدش غيرك عملها والأهم إنك تلاقي منتج عليه الطلب وناس بتدور عليه وإنت توفره .. قصة مسدس جلوك قصة فيها دروس كتير خصوصاً للناس اللي ليها Business خاص بيها وعايزة تنميه وتكبره أو حتي الناس اللي نفسها يبقي ليها الBusiness بتاعها .. القصة دي بدأت بعد الحرب العالمية الثانية وفي الفترة دي كان سوق المسدسات وصل لدرجة من التشبع زي سوق الSmartphones دلوقتي كده .. العالم كله إقتنع إن المسدس النص ألي Semi-automatic اللي بيتحطله خزنة رصاصات هو أحسن بكتير من المسدس الساقية أو Revolver عشان بيشيل عدد رصاصات أكثر وينفع تحطله كاتم صوت .. فضلنا علي الحال ده من أول سنة 1945 لحد سنة 1980 .. أكثر من 35 سنة ومفيش حد نزل حاجة جديدة أو تصميم جديد للمسدسات لحد ما طلعلنا مسدس جلوك زي ما كده الiPhone لما نزل خلي الناس كلها عايزه تمسكه وتشتريه .. مسدس جلوك دلوقتي من أكثر المسدسات إنتشاراً علي مستوي العالم وجيوش كتير في العالم بتستخدمه .. حتلاقي عناصر القوات الخاصة الأميريكية شايلاه وعناصر القوات الخاصة البريطانية بتموت فيه.

البداية كانت في فبراير 1980 لما قيادة القوات المسلحة النمساوية قررت إن جه الوقت إنهم يطلعوا مسدس Walther P-38 من الخدمة .. المسدس ده كان في الخدمة من أيام الحرب العالمية الثانية ولو بصيت لصورته حتميزه بإن المسدس ده كان بيستخدموه في الأفلام العربي الأبيض وأسود من أيام أفلام الفنان (اسماعيل يس) الله يرحمه فجه الوقت إنهم يلاقوا مسدس جديد عشان يبقي المسدس الرسمي لعناصر القوات المسلحة النمساوية .. كان فيه واحد إسمه (جاستون جلوك Gaston Glock) كان فاتح Business صغير بيصنع وبيبيع خناجر لحساب القوات المسلحة النمساوية بالصدفة سمع حوار بين إتنين رتب كبيرة في القوات المسلحة رتبهم كولونيل ودي رتبة تعادل عميد في القوات المسلحة المصرية بيتكلموا فيها عن إن الجيش النمساوي بيدور علي مسدس جديد .. (جاستون جلوك) فضلت الفكرة تلعب في دماغه وفي يوم خد بعضه وراح كلم وزير الدفاع النمساوي وده بيوريك إن فيه دول إنك تقابل فيها وزير الدفاع أسهل من إنك تخلص ورقك في شئون الطلبة عندنا عشان يسأله هل لو هو قدم تصميم لمسدس فهل حيقدر يخش المناقصة بتاعة الإختيار فكان رد وزير الدفاع النمساوي هو ليه لا.

الحقيقة اللي مكنش حد عارفها هي إن (جاستون جلوك) ميعرفش حاجة عن المسدسات .. هو عمره ما دخل جيش ولا عمره شال سلاح .. اللي عمله هو إنه إشتري أشهر 4 مسدسات في السوق وقتها:

• مسدس بيريتا Beretta 92F الإيطالي الصنع.
• مسدس سيج ساور Sig Sauer P220 وده مسدس ألماني سويسري الصنع.
• مسدس CZ75 التشيكي.
• مسدس Walther P-38 اللي هو المسدس اللي المفروض يلاقي بديل له.

الأخ (جاستون جلوك) جاب المسدسات الأربعة وروح بيهم بيته وقعد يدرسهم ويفهم هم بيشتغلوا إزاي؟ وإزاي بيتصنعوا؟ وكمان بدأ يتكلم مع خبراء في الأسلحة عشان يسمع وجهة نظرهم إيه هو المسدس المثالي؟ وهم يحبوا يشوفوا إيه في المسدس؟ .. ثاني خطوة إنه بدأ يجيب كراسة الشروط عشان يفهم هو قيادة القوات المسلحة النمساوية عايزه مسدس مواصفاته إيه يعني الSpecs بتاعته إيه؟ واللي كانت الحقيقة شروط صعبة أوي ومش متوافرة في كتير من المسدسات المتاحة في السوق وقتها:

• هم عايزين الخزنة تشيل أكثر من 8 طلقات اللي هم كانوا عدد الطلقات اللي مسدس Walther P-38 بيقدر يشيلها.
• عايزين وزن المسدس ميعديش 793.8 جرام اللي هو برده الوزن بتاع مسدس Walther P-38.
• عايزين تصميمه يبقي متناسق أو Streamlined والزناد يبقي خفيف ومبيعلقش.
• الأهم إن القطع الي بيتكون منها المسدس متزيدش عن 40 قطعة.

سنة كاملة و(جاستون جلوك) شغال علي تصميم مسدسه لحد ما في يوم 30 إبريل 1981 قدم علي طلب براءة إختراع لتصميم جديد لمسدسه ويوم 19 مايو 1982 قدم لوزارة الدفاع النمساوية 4 نماذج تجريبية لمسدسه اللي سماه Glock 17 .. لما جت وزارة الدفاع النمساوية تختبر المسدس لقوه بيكتسح المنافسة .. عمرهم ما شافوا مسدس معمول بالجودة ولا بالعبقرية دي ورست المناقصة علي (جاستون جلوك) ومضوا معاه عقد شراء 20,000 مسدس ..  مسدس Glock 17 كان نقلة في صناعة المسدسات .. فيه شوية مميزات لما تحطها جنب بعض بتلاقي نفسك فعلاً بتتكلم عن الiPhone بتاع المسدسات:

• المسدس نصه التحتاني معمول من البلاستيك أو البوليمر بس الMechanism بتاع ضرب النار معمول من الصلب .. النص العلوي من المسدس عبارة عن حتة واحدة من الصلب .. فكرة إن المسدس نصه مصنوع من البلاستيك خلي وزنه يوصل 652 جرام بس في الوقت اللي مسدسات زي Beretta 92F و CZ75 معمولة من الصلب من أولها لأخرها فده بيتقل من وزنها.
• تصميم Glock 17 كان بسيط لدرجة إنه بيتكون من 34 قطعة في حين إن مسدس زي Beretta 92F أجزاءه الداخلية بتوصل 70 قطعة.
• بس يمكن أهم ميزة في Glock 17 هو حاجة بيسموها Pointability ودي كلمة ملهاش ترجمة حرفية بس خليني أشرحهالك بإنك إزاي تصمم مسدس وإنت بتنشن به مبيبقاش صعب في التنسيق بين إيدك وعنيك .. الفكرة إنك تصنع مسدس سهل تنشن به عكس مثلاً مسدس زي Walther P-38 اللي لما تيجي تنشن به بيطلع عينك.
• نقطة كمان ركز عليها (جاستون جلوك) وهو بيصمم Glock 17 هو إنه يعمل مسدس مبيعطلش ومبيحصلوش Jamming إن الطلقة تتحشر جواه لدرجة إن إتعملت مسابقة ضمن المسدسات اللي إتقدمت للمناقصة بتاعة الجيش النمساوي بحيث إن حيجيبوا مسدس مسدس يضربوا به 1000 طلقة ويشوفوا لو المسدس إتحشر فيه طلقة أقل من 20 مرة فده مسدس تصميمه كويس .. لما جم يجربوا Glock 17 لقوا إن من أصل 1000 طلقة إتضربوا المسدس حصله Jamming مرة واحدة بس.
• مسدس Glock 17 بيشيل طلقات كتير .. عندك Beretta 92F بيقدر يشيل 15 طلقة بس هو بيقدر يشيل 17 طلقة عيار 9 مليمتر وده في حد ذاته ضعف عدد الطلقات اللي بيقدر يشيلها مسدس Walther P-38.

لمدة أكثر من 35 سنة ومسدس Glock 17 هو أكثر مسدس مستخدم علي مستوي العالم .. صحيح فيه شركات كتير بدأت تصنع مسدساتها من البلاستيك زيه بس يظل Glock هو المسدس اللي القوات المسلحة لدول كتير بتعتمد عليه .. إنك تلاقي مسدس بتستخدمه القوات المسلحة البريطانية والسويدية والعراقية والإسرائيلية واليمنية وحتي القوات الخاصة الهندية فدي شهادة في حق Glock 17 .. قوات الجوالة الأميريكية US Rangers وقيادة العمليات الخاصة بتاعة قوات مشاة البحرية الأميريكية بيستخدموا النسخة المصغرة من Glock 17 اللي بيسموها Glock 19 بس قوات دلتا فورس Delta Force اللي هي القوات الخاصة بتاعة القوات البرية الأميريكية بتستخدم نسخة خاصة إسمها Glock 22.

في أخر كلامي تفتكر إيه هي الدروس المستفادة من قصة مسدس Glock؟ .. هل حتبقي إزاي شفافية القوات المسلحة النمساوية اللي لما حبت تدور علي مسدس لقواتها سمحت لرجل عمره ما خدم في الجيش ولا عمره شال سلاح إنه يقدم التصميم بتاعه ويتعامل نفس معاملة أي شركة سلاح كبيرة من غير أي واسطة أو محسوبية؟ .. إزاي إن الشفافية دي سمحت لواحد إنه يعمل شركة بقت من أهم اسماء صناعة السلاح في العالم وده كان له أثر إيجابي كبير علي الإقتصاد النمساوي؟ .. الأهم إنك إزاي جاتلك فكرة وسعيت وراها؟ ولإنه مكانش له أي خلفية عن صناعة المسدسات فهو مكنش عنده أي مشكلة إنه يرمي التصميمات القديمة اللي بقالها سنين في الزبالة ويقول لنفسه طب ما نعمل تصميم من أول وجديد .. إزاي إنك لما تيجي تعمل حاجة ركز علي المواصفات اللي إنت عايز تحققها؟ .. لما (جاستون جلوك) صمم Glock 17 مكنش عايز يعمل مسدس يكسر الدنيا هو كان عايز يكسب مناقصة بس صادف إنه عمل حاجة خلت الناس كلها عايزه تشتريها.

المصدر:

مقالة بعنوان How Glock Came to Rule The Handgun Market نشرت في مجلة The National Interest و ده لينك المقالة الأصلية:
https://nationalinterest.org/blog/reboot/how-glock-came-rule-handgun-market-166612