لينك التسجيل الصوتي علي ساوند كلاود:
https://on.soundcloud.com/XoyQi
خلينا نكون صرحاء مع بعض إن السمعة المتاخدة عن السويد مش إنها بلد بتعرف تصنع سلاح .. السويدين شاطرين أوي في الموبيليا .. دول الناس اللي عاملين شركة أيكيا IKEA .. السويدين برده شاطرين في العربيات وعندهم شركة فولفو Volvo .. بس السلاح؟ .. زي ما قلتلك هي سمعة متاخدة بس ده مش معناه إن ده حقيقي واللي يثبتلك كده إن أخواتك في القوات البحرية السويدية يوم 30 يونيو 2022 خلصوا بناء غواصة جديدة لانج إسمها A26 بتتحط تحت مظلة فئة من الغواصات بيسموها بليكينج كلاس Blekinge-Class .. الغواصة دي من تصنيع شركة سويدي معرفش إسمها عدي عليك قبل كده ولا لا اللي هو ساب Saab والصدفة الغريبة إن معاد إنتهاء بناء الغواصة ماشي مع المفاوضات اللي مستمرة بقالها فترة حول إنضمام السويد لحلف شمال الأطلسي NATO بس ده مش موضوعنا دلوقتي .. اللي عايزين نتكلم فيه هو قصة الحب الغريبة بين السويد والغواصات واللي زي ما قلتلك عكس خالص السمعة المتاخدة عنها.
يمكن من المعلومات اللي حتخليك تهرش في شعرك إن القوات البحرية السويدية محلتهاش غير 5 غواصات بس .. 5 غواصات مش رقم يخليك تقول علي قوات بحرية لأي دولة إنها حاجة جامدة زحليقة بس في نفس الوقت الفكرة إن الخمس غواصات دول السويد هي اللي بانياهم بنفسها .. إنك يبقي عندك خمس غواصات إنت اللي عاملهم أحسن بكتير من يبقي عندك عشرين بس شاريهم من بره .. زي أي قصة حب فالعلاقة بين السويد والغواصات مرت بمراحل كتير وخليني دلوقتي بسرعة أوي أخدك في الTimeline أو تاريخ العلاقة بينهم وإمتي السويد قالت لنفسها أنا لازم أتعلم أعمل غواصات في البيت؟
المرحلة الأولي .. إنت بتتعلم مش بس إنك تقع .. لما تشوف غيرك بيقع:
الحرب العالمية الثانية كانت فترة غريبة أوي في حياة السويديين .. السويد ربنا حطها في وضع صعب إنها محشورة بين ألمانيا النازية وبين الإتحاد السوفيتي ويمكن عشان كده السويديين من الأول خالص وقفوا علي الحياد .. هم قدام الناس رافعين شعار يا نحلة لا تقرصيني ولا عايز عسل منك بس في نفس الوقت القيادة العسكرية السويدية كانت ماسكة إزازة البيبسي وطبق الفشار وعمالة تتفرج وتتعلم .. هم عجبهم أوي الأفكار المطرقعة اللي النازيين والإنجليز حطوها في الغواصات بتاعتهم وحتي الأمريكان .. واحدة من الحاجات اللي عايزك تبقي عارفها إن أغلب الإختراعات اللي إنت بتشوفها وبتستخدمها في حياتك اليومية هي نتيجة مباشرة أو غير مباشرة لحاجة من إتنين .. حرب أو مشروع فضاء .. يعني مثلاً .. الحلة التيفال اللي إنت بتقلي فيها البيض دي عملوها أصلاً عشان تبقي الطبقة الخارجية لمكوك الفضاء وهو بيخترق الغلاف الجوي للأرض .. ببرونة الأطفال اللي بيرضعوا بيها العيال الصغيرة إتعملت أساساً لما المهندسين بتوع NASA كانت بيدوروا علي طريقة إن رواد الفضاء تشرب في بيئة من غير جاذبية أرضية .. لو دخلت أي مستشفي وعملت أشعة سينية فهي إتعملت وقت الحرب العالمية الأولي واللي صممت مكنة الأشعة السينية تبقي (ماري كوري) .. الحرب العالمية الثانية كانت رغم بشاعتها كنز للمهندسين إحنا عايشين علي خيره لحد دلوقتي.
أي طلمبة أو Chiller تكييف بيتركب علي قاعدة خرسانة عشان تمتص الإهتزازات أو Vibration .. أهي الفكرة دي أصلاً إتطبقت لأول مرة في الغواصات عشان المولد Generator اللي فيها لما يشتغل ميطلعش Vibrations جامدة وده حيخلي الغواصة تتلقط بسهولة .. في كتير من المباني الجديدة يتقالك إن الحيطة دي Anti-acoustic يعني بتعزل الصوت .. دي برده فكرة بدأت في الغواصات في الحرب العالمية الثانية .. فكرة إن يبقي عندك مادة طلاء أو دهان تدهن بيها جسم أي حاجة عشان تمتص أشعة الرادار برده بدأت في الغواصات وقت الحرب العالمية الثانية .. السويديين بقوا بيبصوا علي كل ده وفي إيدهم ورقة وقلم وبيتعلموا .. يا مؤمن ده وصل بيهم الفُجر إنهم في أخر الحرب سرقوا غواصة نازية وفكوها عشان يتعلموا هي بتتعمل إزاي لحد ما الأمريكان أجبروهم يسلموهم الغواصة .. مستوي المهندسين السويديين في التصميم كانت وصلت لمرحلة خزعبلية .. يقال إن في الستينات المهندسين السويديين عملوا تصميمات كاملة لغواصات نووية وقت ما كان محدش بيعرف يصنع النوع ده من الغواصات غير الأمريكان والسوفييت .. بس هي الفكرة كلها في كلمة تصميم دي .. هم أه شاطرين في الرسم بس محدش كان مسموحله إنه يحول الرسم ده لحاجة بتعوم في المياه.
المرحلة الثانية .. السوفييت كانوا الدبور اللي زن علي خراب عشه:
في السبعينات السويد زيها زي دول كتير جيران للإتحاد السوفيتي كانوا بيشتكوا إن البحرية السوفيتية بتخش عليهم من غير لا إحم ولا دستور .. القوات البحرية السويدية كانت علي الأقل مرة أو مرتين في السنة تلقط غواصة سوفيتية بتخترق المياه الإقليمية السويدية من غير أي سبب منطقي .. هي رخامة كده وخلاص .. في الثمانينات معدل قلة الأدب ده ضرب في السما .. بعد ما كانت القوات البحرية السويدية بتلقط ده مرة أو مرتين في السنة بقت بتشوفه بيحصل في المتوسط يعني 63 مرة في السنة يعني تقريباً خمس مرات كل شهر .. بس يمكن قلة الأدب جابت أخرها يوم 30 سبتمبر 1982 لما القوات البحرية السويدية صحيت الصبح لقت غواصة نووية سوفيتية علي بعد 10 كيلومتر بس من ساحل البلد ويمكن دي الحادثة اللي إتعرفت بعد كده بإسم حادثة ويسكي بثلج Whisky on the Rocks وإتسمت كده عشان الغواصة السوفيتية اللي عملت المصيبة دي كانت من طراز ويسكي Whisky-Class .. الحادثة دي كانت قلم ونزل علي وش السويديين .. مش حتفرق إن عشان الإتحاد السوفيتي يصالح السويد قدملها إعتذار رسمي وسمحلها إن فريق من المخابرات والقوات البحرية السويدية يطلع علي الغواصة السوفيتية يتأكدوا من القرايات بتاعة الرادار وأجهزة الملاحة والقرايات دي أثبتت إن القبطان بتاع الغواصة السوفيتية متاهش ودخل بالغلط جوه المياه الإقليمية السويدية إنما كان قاصد وفاهم كويس هو بيعمل إيه .. وشوف يا أخي رغم كل ده الغرب كان بيمعلش السويد ويقولها معلش بقي يا سويد حنعمل إيه.
سنين والسويد بتشتكي ومحدش بيسمع .. حتي الأمريكان اللي كانوا طابقين في زمارة رقبة السوفييت في كل حتة في العالم كانوا بيسمعوا شكوي السويديين من ودن ويطلعوها من الودن التانية لحد ما في سنة 1990 مؤسسة راند RAND Corporation ودي تبقي واحدة من أهم المؤسسات البحثية في أميركا نشرت تقرير مرعب .. التقرير قال إن حوادث إختراق الغواصات السوفيتية للمياه الإقليمية السويدية مكنتش حوادث فردية وغير مقصودة .. لا خالص .. السوفييت إستخدموا كل أنواع الغواصات اللي تتخيلها ومتتخيلهاش عشان تعمل مهمات من كل صنف ولون .. استطلاع ماشي .. عمليات خاصة تلاقي .. إنزال ضفادع بشرية موجود .. سحب جواسيس وماله .. يا رجل ده طلع إن المخابرات العامة السوفيتية KGB عاملة خطة كاملة لإغتيال كل أفراد قيادة القوات المسلحة السويدية في بيوتهم عن طريق فرق قوات خاصة حيتم إنزالها بالغواصات علي شواطيء السويد وده في حالة إن قامت حرب بين السويد والإتحاد السوفيتي.
اللي إنت محتاج تبقي عارفه إن السويد زمان كانت زي أوكرانيا دلوقتي في نظر روسيا .. زمان وقت ما كان فيه إتحاد سوفيتي وأوكرانيا كانت جزء من التراب السوفيتي فكانت السويد هي المادة العازلة بين الشرق والغرب .. الكابوس اللي السوفييت بيصحوا مفجوعين من النوم بسببه هو إن السويد تنضم لحلف شمال الأطلسي .. عشان كده السوفييت كانوا بيعملوا اللي يقدروا عليه عشان أولاً يخوفوا السويد وثانياً لو الفاس وقعت في الراس يقدروا في ظرف ساعات يسيطروا علي البلد كلها .. ده كان الخوف السوفيتي .. علي الناحية الثانية السويديين ملقوش حل يدافعوا بيه عن نفسهم غير الغواصات.
المرحلة الثالثة .. السويديين غلبوا الأمريكان في لعبتهم:
الحاجة اللي نقلت صناعة الغواصات السويدية سنين قدام كانت حاجة إسمها Air-Independent Propulsion (AIP) .. الغواصات نوعين .. يا إما غواصات نووية بتقدر تعوم تحت المياه بالشهور لإنها ماشية بمفاعل نووي أو غواصات تقليدية .. الغواصة التقليدية دي لو هي غطسانة تحت المياه فهي بتمشي ببطاريات ومجرد ما البطاريات تفضي بتقوم الغواصة طالعة علي وش المياه أو تبقي يدوبك تحت وش المياه علي طول وتطلع حاجة إسمها سنوركيل عشان تشفط هواء .. ليه بتشفط هواء؟ .. دلوقتي إنت عشان تشحن البطاريات بيبقي عندك موتور ديزل بتركبه علي مولد Generator عشان تشحن البطاريات .. موتور الديزل زيه زي موتور عربيتك عشان يشتغل بيحتاج سولار وهواء .. ده معناه إن أي غواصة تقليدية في الدنيا أخرها تفضل غطسانة تحت المياه عدد أيام يتعدوا علي الصوابع ودي الأيام اللي بتقدر البطاريات تشتغلها .. لحد هنا الفكرة سهلة .. إيه بقي اللي ضافته تكنولوجيا AIP؟
تعالي إنت حط في الغواصة إسطوانات أكسجين مسال وخلي الأكسجين المسال ده يعدي علي حاجة إسمها محرك ستيرلينج Sterling Engine عشان يحول الأكسجين من صورته السائلة لصورته الغازية ودخله يا سيدي علي موتور الديزل .. ساعتها إنت خليت الغواصة التقليدية تفضل غطسانة تحت المياه لعدد أيام تقريباً هي هي الأيام بتاعة الغواصات النووية لإنك بقيت بتقدر تشحن بطارياتها تحت المياه.
في التسعينات نظام AIP إتركب في غواصة سويدي إسمها جوتلاند كلاس Gotland-Class والغواصة دي سنة 2005 دخلت في مناورة مع القوات البحرية الأميريكية وقدرت خلال المناورة إنها تغرق حاملة الطائرات يو إس إس رونالد ريجان USS Ronald Reagan مش مرة ولا إتنين إنما 3 مرات وفي كل مرة محدش بيعرف يلقط الغواصة جوتلاند .. جوتلاند وبعدها جت بليجينج كلاس هم غواصات إتصمموا عشان تغرق أساطيل .. إنت مش حتعرف تشوفها ولا تعرف إنها موجودة بس طوربيداتها حتغرق سفنك الحربية وتخليك تندم علي اليوم اللي قررت فيه تحط رجلك علي التراب السويدي ويمكن معاد دخول الغواصة دي للخدمة زي ما قلت في الاول ماشي بشكل مرعب مع الغزو الروسي لأوكرانيا مع المفاوضات المستمرة لإنضمام مش بس السويد إنما فنلندا كمان لحلف شمال الأطلسي.
السويد ناوية تعمل غواصتين من Blekinge-Class أولهم زي ما قلنا هي A26 واللي فعلاً لو مسكت قدراتها تقرأها حتلاقيها مرعبة .. بسم الله الرحمن الرحيم كده هي بتقدر غاطسة تحت المياه 18 يوم وده رقم خزعبلي بالنسبة للغواصات التقليدية اللي مش بتشتغل بمفاعل نووي .. صحيح الغواصة حتبدأ تخش مرحلة الإختبارات ومش حتخش الخدمة قبل سنة 2027 بس هي حرفياً غواصة مخدتش وقت عشان تتعمل .. القوات البحرية قدمت طلب رسمي لشركة Saab عشان تعمل الغواصة سنة 2015 .. سنتين بتتصمم علي الورق وبدأ البناء الفعلي ليها سنة 2017 .. خمس سنين وكانت إتبنت في ترسانة كوكوم Kockum في حتة إسمها كارلسكرونا Karlskrona ودي الترسانة اللي السويد بتبني فيها السفن بتاعتها بقالها أكتر من 300 سنة بتكلفة وصلت 840 مليون دولار عشان تبني الغواصتين اللي حيتعملوا من فئة بليكينج يعني الغواصة الواحدة واقفة عليهم ب420 مليون دولار بس .. يا بلاش.
الغواصات سلاح مهم في إيد أي بلد ربنا رزقها بإنها بتطل علي بحر .. زينا كده .. أبصملك بالعشرة إن الغواصات سلاح بيكلف فلوس كتير أوي وبناءها بيخرب ميزانية أي دولة بس في نفس الوقت هي أكتر سلاح بتصرف عشان تدمره أكتر ما بتصرف عشان تبنيه .. فكر فيها كده .. إنت بتصرف ملايين عشان تشتري طيارة مقاتلة عشان في الأخر توقعها بصاروخ أرض- جو بكام ألف .. الغواصات مش كده .. الغواصة دي العصاية السحرية في إيد أي قوات مسلحة .. بتضرب في أي وقت و من أي مكان ومحدش بيحس بيها غير بعد فوات الأوان .. يبقي السؤال بقي .. تجيب غواصة تقليدية ولا نووية؟ .. تمشي ورا دماغ أميركا وروسيا وتبقي مش شايف حاجة غير إن ربنا خلق الغواصة عشان تبقي نووية .. ولا تجرب تمشي ورا السويديين .. أنهي الصح؟ .. الحقيقة إن أخواتك في أستراليا وقعوا في نفس الحفرة دي ويمكن زي ما السويديين إتعلموا كتير من مجرد الفرجة علي اللي بيحصل في الحرب العالمية الثانية فحتبقي فرصة كويسة إننا كمان نتعلم من الفرجة علي اللي زنقة الكلاب اللي فيها الأستراليين دلوقتي.
كنا حكينا قبل كده عن أزمة صفقة الغواصات اللي كانت بين أستراليا وفرنسا .. اللي حصل إن البلدين كانوا ماضيين مع بعض إتفاق إن أستراليا حتشتري حبة غواصات تقليدية فرنساوي بس فجأة الإتفاق إتلغي لما إتعرف إن أستراليا في السر مضت إتفاق مع أميركا عشان تاخد منها سر الصنعة بتاع بناء الغواصات النووية وأستراليا بنفسها تبني حوالي 8 غواصات نووية شبه اللي بتعملها أميركا .. المنطق اللي الأستراليين مشوا وراه سهل بالنسبة لي إني أفهمه .. حد يبقي قدامه الفيراري ويرضي بالتويوتا كورولا؟ .. حد يتقاله خد غواصة نووية ويرفض؟ .. بس في نفس الوقت إختراع AIP خلي فعلياً يعني الفروقات بين الغواصات النووية والتقليدية قلت أوي .. دول كتير من ضمنها اليابان وكوريا الجنوبية والنرويج وألمانيا وإسبانيا والبرتغال وطبعأ السويد وحتي إسرائيل اللي هي أساساً بلد عندها تكنولوجيا نووية وتعرف تصنع غواصة نووية لو حبت بس ليه تدفع أكتر طول ما إنت ممكن تدفع أقل .. بحسبة بسيطة إنت تقدر يبقي عندك 20 غواصة تقليدية بتكنولوجيا AIP زي جوتلاند مثلاً ومش بس كده ده إنت حتصنعهم في بلدك يعني مهندسينك وفنيينك حيبقي عندهم الKnow-How والخبرة والعلم بتاع تصنيع غواصات ومش حتدفع أكتر من 30 مليار دولار .. قصاد إن أميركا حتبيع لاستراليا سر الصنعة وحتساعدها تبني 8 غواصات نووية ب171 مليار دلار .. إنت متخيل الفرق؟ .. إنت 171 مليار دولار لو معاك يعني ونفسك تبعزقهم إنت حيبقي معاك بيهم 20 غواصة تقليدية زي ما قلت وسرب طيارات مقاتلة F/A-18 Super Hornet ومعاهم عقد صيانة وتسليح متكلف فوق 40 مليار دولار وحتعرف تشتري أسطول سفن شحن وصفقة صواريخ كروز بعيدة المدي ولو حابب كام طيارة هليكوبتر أباتشي .. تاني .. إنت متخيل الفرق؟
أنا بس حابب أختم بنقطة أخيرة وهي البنزين .. دلوقتي الغواصات النووية الأميريكية بتحرق بنزين عبارة عن يورانيوم نسبة التخصيب بتاعته 93.5% .. هل دي حاجة حلوة ولا وحشة؟ .. المفاعلات النووية السلمية العادية خالص بتستخدم يورانيوم نسبة التخصيب بتاعته ما بين 3-5% .. بلاش دي .. الغواصات النووية الفرنساوي طراز سوفرين Suffren-Class بتستخدم يورانيوم نسبة التخصيب بتاعته 6% .. ده معناه إن أسطول الغواصات النووية الأمريكاني اللي في الخدمة دلوقتي بيحرق في السنة ما يعادل كمية اليورانيوم اللي محطوطة في 100 رأس نووي .. إنت لو ناوي تشتري غواصة نووية أمريكاني حتجيب كمية اليورانيوم دي كلها منين؟ .. ده يفسرلك ليه حتي إسرائيل شالت من دماغها خالص فكرة إنها تعمل أو تشتري غواصة نووية ودول كتير بقت بتقلد السويد عشان هم إكتشفوا النقطة المهمة .. أحياناً بيبقي العادي أحسن من النووي.
المصادر:
- مقالة بعنوان Sweden’s new submarine could shift balance of power in the Baltic Sea نشرت في مجلة New Atlas وده لينك المقالة الأصلية:
https://newatlas.com/military/swedish-blekinge-class-submarine-baltic-sea-balance-of-power/ - مقالة بعنوان Sweden’s new, quiet submarines could give Russia even more headaches نشرت في مجلة Business Insider وده لينك المقالة الأصلية:
https://www.businessinsider.com/sweden-new-blekinge-class-submarines-could-give-russia-headaches-2022-7 - مقالة بعنوان Scott Morrison’s booby trap: Buying US nuclear submarines is a huge mistake نشرت في جريدة The Sidney Morning Herald وده لينك المقالة الأصلية:
https://www.smh.com.au/national/scott-morrison-s-booby-trap-buying-us-nuclear-submarines-is-a-huge-mistake-20221214-p5c6af.html
