يوم 29 يونيو 2010 صحي العالم علي خبر إن الروس بقي عندهم طيارة إسمها T-50 قالوا عليها إنها من طيارات الجيل الخامس و ده في الوقت اللي كانت لسه شركة لوكهيد مارتن Lockheed Martin بتتعارك مع شركة بوينج Boeing علي مين فيهم يرسي عليه مناقصة مشروع الطيارة F-35 .. يعني في الوقت اللي الأمريكان لسه بيقولوا فيه يا رحمن يا رحيم في سكة الطيارات الStealth الروس كانوا بيطلعوا لسانهم للأمريكان .. سنة 2012 قائد القوات الجوية الروسية طلع هبد هبداية عابرة للقارات إن روسيا حتبدأ عملية تشغيل خطوط الإنتاج بتاعة المصانع اللي حتنتج الطيارة T-50 بداية من سنة 2015 .. جت سنة 2015 لقينا إن الهند اللي كانت داخلة مع روسيا شريك في مشروع T-50 خرجت لما إتقالها انتي لازم تحطي فلوس أكتر من كده و لما روسيا رفضت تديها الCode بتاع الOperating Software اللي حيستخدم علي الطيارة.
وقتها ناس كتير فقدت الأمل إن روسيا تخش سوق طيارات الجيل الخامس من بعدها لحد ما الروس في يونيو 2019 غفلونا لما القوات الجوية الروسية مضت عقد مع شركة يونايتد إيركرافت كوروبوريشين United Aircraft Corporation و دي تبقي الشركة الأم اللي بتملك شركة سوخوي ديزاين بيورو Sukhoi Design Bureau اللي بتصمم الطيارة عشان تصنع 76 نسخة بعد ما إتغير إسمها من T-50 و بقي سوخوي-57 أو Su-57 عشان أول دفعة من الطيارات دي تخش الخدمة في القوات الجوية قبل 2020 .. الفكرة إن من زمان من 2010 و الكلام اللي بيتقال إن والله الطيارة Su-57 غالية و الميزانية العسكرية الروسية متستحملش غير إننا نشتري 16 طيارة بس .. جت شركة United Aircraft Corporation قالت إنها قدرت تخفض من سعر الطيارة بنسبة 20% و بناء عليه القوات الجوية الروسية قالت إنها حتشتري 76 طيارة .. السؤال دلوقتي .. أنتوا قللتوا من سعرها إزاي؟
فيه ناس بتقول إن حالياً الروس تحت إيدهم 9 طيارات Su-57 يعتبروا نماذج تجريبية لسه أو Prototypes بس كلهم شغالين بمحركين AL-41FM1 و دي محركات أضغف من الموتور الأساسي اللي كان المفروض طيارات Su-57 كلها حتطير بيه و إسمه Type 30 .. هل معني إن سعر الطيارة نزل إن الموتور Type 30 مش حيتركب و حيكتفوا بالموتور اللي علي قد حاله اللي موجود دلوقتي؟ .. طب لو ده مش حقيقي هل معني كده إن فيه حاجات تانية شلتوها عشان توفروا فلوسها؟ .. فكك من كل ده .. لنفترض إن الطيارة Su-57 فشيخة زي ما الروس بيقولوا .. المشكلة إن سلاح الجو الروسي عدد طيارات الجيل الخامس اللي حتبقي تحت إيده أقل بكتير من اللي في إيد أميركا .. يعني علي سنة 2028 لما الروس يكونوا إستلموا ال76 طيارة Su-57 حيكون سلاح الجو الأمريكاني تحت إيده 187 طيارة F-22 Raptor و 1400 طيارة F-35.
انا بس عايز أختم بإني أفهمك هو يعني إيه طيارة جيل خامس؟ .. لو حد قالك إن دي طيارة جيل خامس فده معناه إن الطيارة دي من خامس جيل للطيارات يتصنع بعد ما الحرب العالمية الثانية خلصت ..لو سمعت كلمة طيارة جيل خامس فأول حاجة تيجي في دماغك إن الطيارة دي ليها القدرة علي التخفي من الرادار أو Stealth .. تاني حاجة تيجي في دماغك إن دي طيارات بتقدر تطير بسرعات بتعدي سرعة الصوت .. تالت حاجة و يمكن أهم حاجة إن الطيارات دي عامله زي راوتر النت في بيتك .. زي ما راوتر النت هو اللي بيدخلك خدمة الإنترنت فبرده الطيارات دي بتعمل شبكة إتصالات بينها و بين الطيارات التانية .. بس اللي بيميز Su-57 فعلاً عن أي طيارات جيل خامس تانية في السوق إنها بتقدر تشيل صواريخ فشيخة إسمها كينجال Kinzhal و دي كلمة روسي معناها الخنجر و الصاروخ ده حضرتك يبقي Hypersonic يعني بيطير بسرعات بتوصل أضعاف سرعة الصوت .. أساساً صواريخ كينجال دي كانت صواريخ باليستية عابرة للقارات لحد ما جم الروس عدلوا فيها شوية و قدروا يخلوها تتركب جوه الطيارة Su-57 بحيث بقي صاروخ بيقدر يطير بسرعة ماخ 10 يعني 10 أضعاف سرعة الصوت و له مدي طيران 1740 كيلومتر.
المصدر:
مقالة بعنوان Ten Years Later, Russia Finally Begins Production of the Su-57 Stealth Fighter نشرت في مجلة Popular Mechanics و ده لينك المقالة الأصلية:
http://popularmechanics.com/military/aviation/a28568277/russia-su-57-production/
