تابعونا

اسلحه و جيوش

الطيارة F-22 Raptor .. (ميسي) الطيرات المقاتلة.

خد بالك بقي .. واضح إن الفئة اللي تهمنا هي الطيارات المخصصة للعمليات القتالية و اللي مش معني إنهم 123 طيارة إن كل الطيارات دي ينفع تخش حرب بكره الصبح .. بناء علي أرقام سلاح الجو الأميريكي لسنة 2018 فدرجة الإستعداد القتالي لطيارات F-22 Raptor هي 52% .. ده معناه إن من ال123 طيارة دول فيه منهم 64 بس جاهزين يخشوا حرب .. يعني فعلياً عدد طيارات F-22 Raptor اللي جاهزة تبقي في الجو في أي لحظة هم 21 طيارة بس.

20 أغسطس، 2020 2.5 ألف

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/f-22-raptor

عارف لما يبقي معاك عربية و يجي حد يسألك هو إنت رأيك فيها إيه؟ .. تبدأ تسرح بخيالك و تفتكر أيامكوا سوا .. الناس اللي بتحب العربيات و بتحب السواقة علاقتها بالعربية بتاعتها بتبقي أعمق و أقوي من مجرد علاقة بين بني أدم و حاجة بتوصله من حتة لحتة .. الناس دي علاقتها بالعربية بتاعتها بتكون شبه علاقته بواحدة بيحبها بيبقي فاكر الأيام الحلوة و الوحشة اللي عدوا عليهم سوا .. بيبقي فاكر اليوم اللي هو داس علي موتور عربيته عشان يسابق حد و العربية سعفته .. بيبقي فاكر اليوم اللي عطلت منه في وسط الطريق .. بالنسبة ليك الإجابة عن سؤال إيه رأيك في العربية مش بتكون إجابته هي حلوة ولا وحشة .. بالنسبة ليك الإجابة بتكون ذكريات .. ده اللي أنا عايز أعمله لما أجي أتكلم النهاردة عن الطيارة F-22 Raptor .. أنا مش عايز أمسك Data Sheet بتاع الطيارة و أفضل أقولك دي بتطلع كام حصان و أقارنهالك بالطيارة F-16 Falcon .. لا أنا مش حعمل كده .. كلامي عن الطيارة دي بالذات حيبقي عن أيام محددة في تاريخ الطيارة دي هي اللي خلتها تبقي ليها مكانة كبيرة أوي في سلاح الجو الأمريكاني و دلوقتي بقت في وضع زي الزفت .. حنحاول نغطي ليه الطيارة دي فيه ناس شايفاها أحسن طيارة مقاتلة في التاريخ و في نفس الوقت أميركا معندهاش منها دلوقتي إلا يدوبك 33 طيارة ينفعوا يخشوا حرب بكره الصبح؟ .. غريبة مش كده؟

إبريل 1991 .. ميلاد مشروع الطيارة:

في الشهر ده أعلن (دونالد رايس Donald Rice) سكرتير سلاح الجو الأميريكي عن بداية مشروع F-22 Raptor .. هو المشروع أعلن بدايته  للناس في 1991 بس هو فعلياً بدأ في أوائل الثمانينات تحت إسم Advanced Tactical Fighter أو ATF إختصاراً يعني المقاتلة التكتيكية المتقدمة .. التارجيت كان إن إحنا عايزين يبقي عندنا طيارة فشيخة أحسن من F-15 Eagle و من F-16 Falcon .. طب أنتوا عايزين الطيارة دي ليه؟ أو إيه اللي جد يعني عشان تطلبوا الطلب ده؟ .. قالك أصل الروس عملوا طيارتين الأولانية هي MiG-29 Fulcrum و الثانية إسمها Su-27 Flanker و الإتنين قدراتهم علي المناورة أعلي بكتير من الطيارات الأمريكاني اللي في الخدمة .. جميل .. إتعملت مناقصة و دخلها فريقين .. الفريق الأولاني كان من 3 شركات اللي هم لوكهيد مارتن Lockheed Martin و بوينج Boeing و جينرال ديناميكس General Dynamics .. الفريق الثاني كان من شركتين هم نورثروب جرومان Northrup Grumman و ماكدونيل دوجلاس McDonnell Douglas .. أربع سنين و الفريقين شغالين لحد ما في الأخر كل فريق قدم النموذج الأولي Prototype بتاعه .. الفريق الأولاني سماه YF-22 و الفريق الثاني سماه YF-23 و صدقني إن الفرق بين التصميمين هو بالضبط شبه الفرق بين F-22 Raptor و بين F-35 Lighting II دلوقتي .. الطيارة YF-22 إتصممت عشان تبقي فشيخة في الإشتباكات الجوية أو Dogfighting و ليها قدرة علي المناورة تنافس أجدعها طيارة روسي .. علي الناحية الثانية الطيارة YF-23 إتعملت عشان تطير من غير ما الرادارات تلقطها أو زي ما إحنا عارفين التكنولوجيا دي دلوقتي بإسم Stealth و كمان إهتموا أوي بحاجة إسمها Supercruise و هي إن الطيارة تطير بسرعة أعلي من سرعة الصوت لفترات طويلة من غير ما الطيار يضطر يشغل Afterburners بتاعته و دي بتحرق بنزين زيادة عشان تخلي الطيارة تطير أسرع من الصوت بس بمجرد ما بيشغلها خاصية Stealth بتروح.

فعلياً قيادة سلاح الجو مكانتش عارفة تختار مين  .. الطيارة YF-23 كانت أسرع و ليها قدرة Stealth أعلي بس مشاكلها كتير قصاد إن طيارة YF-22 قدرتها علي المناورة صدمت أي حد يتفرج عليها .. الحيرة فضلت سيدة القرار لحد الإختبار اللي حسم الإختيار .. الطيارتين كانت الصواريخ و القنابل بتاعتهم بتتحط في بطن الطيارة و بيتقفل عليها و كان المطلوب إن كل طيارة تطلع تطير و تضرب هدفين الأولاني بصاروخ AIM-9 Sidewinder و الثاني بصاروخ AIM-120 AMRAAM .. واحد صاروخ جو-جو قصير المدي و الثاني أخوه بس طويل المدي .. الطيارة YF-22 نجحت في إنها تضرب الصاروخين بس أختها YF-23 معرفتش تضرب ولا صاروخ.

صحيح النموذج بتاع الفريق الأولاني اللي كان بيتكون من Lockheed Martin و Boeing و  General Dynamics هو اللي كسب بس في المرحلة اللي قبل ما الطيارة تخش خط الإنتاج إتعملت تعديلات كتير علي التصميم بتاع YF-22 عشان يبقي شبه YF-23 .. المهندسين اللي عملوا YF-22 كانوا عارفين إنهم ممكن يسرقوا شوية أفكار من YF-23 عشان يحسنوا من قدرات الطيارة بتاعتهم .. يعني مثلاً .. الVertical Stabilizers اللي هم الزعنفتين الراسيتين اللي بيتركبوا في الديل ورا حجمهم صغر بحوالي 20% عشان يزود من قدرة Stealth بتاعة الطيارة .. قمرة الطيار و فتحات دخول الهواء للمحركات إتنقلت لورا عشان الطيار يعرف يشوف أحسن .. الحقيقة إن الفريق بتاع لوكهيد مارتن و بوينج و جينرال داينامكس عملوا شغل حلو أوي عشان يستفيدوا قدر الإمكان من الحاجات الكويسة اللي كانت في النموذج YF-23 و يحطوها في F-22 Raptor و في الأخر طلعت الطيارة تصميمها فيه كذا حاجة كانت تعتبر نقلة نوعية في تصميم الطيارات وقتها:

تصميم الطيارة F-22 Raptor من حيث شكل قمرة القيادة و مكان فتحتي دخول الهواء و حتي حجم الVertical Stabilizers إنت تقدر تقول إنهم مسروقين من تصميم YF-23 و دي الطيارة اللي كانت داخلة ضد تصميم F-22 Raptor في المناقصة بتاعة مشروع المقاتلة ATF.

الشكل الخارجي:

  • الشكل الخارجي للطيارة كان معمول عشان يضربوا أكتر من عصفور بحجر واحد .. إنت عايز تصميم يقلل مقاومة الهواء أو Drag قدر الإمكان و في نفس الوقت يقلل من البصمة الرادارية للطيارة يعني تبقي صغيرة بما يكفي إن الرادار ميلقطهاش .. حط برده في دماغك نقطة و هي إن لوكهيد مارتن الطيارة F-22 Raptor مكنتش أول مرة هي تشتغل في تكنولوجيا Stealth لإنهم قبل كده عملوا الطيارة F-117 Nighthawk بس لو جيت تبص علي الشكل الخارجي للطيارتين تحسهم ملهمش علاقة ببعض .. الإتنين Stealth بس F-117 سطحها الخارجي عبارة عن حته معدن متشكل بزوايا حادة قصاد إن F-22 حتة معدن برده بس متشكلة بكيرفات بأنصاف أقطار متغيرة.
  • سطح الطيارة الخارجي لما يبقي كله كيرفات بالشكل ده بيكون هدفه إنه يشتت موجات الرادار في كذا إتجاه و ميخليهاش تقدر ترجع تاني للمصدر بتاعها .. أي حاجة بتفتح و تقفل في الطيارة متصممة علي شكل كيرف .. قمرة القيادة .. فتحات العجل عشان الهبوط .. و علي فكرة كل ده غير الطلاء الخارجي اللي برده دوره إنه يمتص موجات الرادار.
  • جسم الطيارة نفسه إتبني من مادة متشكلة يعني Composite و دي مادة صنعها البشر عن طريق إنهم حطوا كذا مادة مع بعض في الخلاط عشان في الأخر تطلع مادة جديدة لانج .. صحيح إن أهم مادة من المواد اللي دخلت في تصنيع جسم الطيارة هي التيتانيوم بس مش هي المادة الوحيدة.
  • لو خدت بالك من شكل الجناحين حتلاقيهم واخدين شكل دلتا بس زي ما تقول كده جبنا مقص و قصقصنا الطرف بتاع الدلتا  ولو خدت بالك برده من الزعانف اللي ورا في الديل حتلاقيهم طالعين لبرا شوية .. طب إنت عارف هم طالعين لبره ليه؟ .. عشان يحجبوا حرارة المحركات بتاعة الطياره فلو صاروخ مضاد للطيارات حب يجري وراها عن طريق إنه يشمشم ورا حرارة المحرك مش حيعرف.
بص علي شكل الجناحين .. هم ليهم شكل دلتا بس طرف الجناحين زي ما يكونوا إتقصوا بمقص .. شايف برده الزعنفتين اللي ورا خالص في الديل طالعين لبره إزاي .. ده فكرته عشان يحجب حرارة الموتور عن الصواريخ اللي بتجري ورا حرارة المحركات .. جسم الطيارة كله متصنع بكيرفات مش بزوايا حادة و دي ميزة كبيرة أوي سواء في قدرة الطيارة علي المناورة أو في قدرتها علي التخفي من الرادارات.

المحرك:

  • بسم الله ما شاء الله الطياره فيها محركين وحوش F119-PW-100 Afterburner Turbofan من تصنيع شركة برات إند ويتني Pratt & Whitney و دول يعتبروا أقوي محركين موجودين في أي طيارة مقاتلة في العالم بس مش دي القضية .. الفكرة مش المحرك .. الفكرة في حاجة إسمها Two-Dimensional Thrust Vectoring Nozzles و دي تبقي لوحين معدن ورا خالص فوق و تحت الشكمان أو Exhaust Outlet و اللوحين المعدن بيلفوا لفوق و تحت .. اللوحين المعدن اللي لما تبصلهم تحسهم شبه الهواية اللي بيمسكها الحاتي و هو بيشوي اللحمة و هي السبب في إن الطياره دي تعتبر من أحسن الطيارات في Dogfighting في العالم.
  • بسبب اللوحين المعدن دول فالطيارة F-22 Raptor بتوصل أقصي سرعة ليها رسمياً هي ماخ-2 و بتقدر تكسر حاجز الصوت و تطير بسرعة 1.5 ماخ من غير ما الطيار يحتاج يشغل الAfterburner و بالتالي هي بتبقي Stealth و هي كاسرة حاجز الصوت .. تعالي إنت رايح فين .. لو دخلت علي الكاتالوجات بتاعة F-22 Raptor حتلاقي إن أقصي إرتفاع تقدر تطيره هو 15 كيلومتر بس بسبب Two Dimensional Thrust Vectoring Nozzles هي بتقدر تطير علي إرتفاعات أعلي بكتير يقال إنها بتوصل 20 كيلومتر.
منظر الديل بتاع الطيارة F-200 Raptor بمحركيها F119-PW-100 من تصنيع شركة Pratt & Whitney و باين أوي Dimensional Thrust Vectoring Nozzles اللي بتدي الطيارة أفضلية رهيبة في المناورة اللي هم الأربع ألواح معدن اللي بيتحركوا فوق و تحت شبه الهواية بتاعة الشوي.

مدي الطيران و التسليح:

  • الطيارة فيها تانكين بنزين يقدروا يشيلوا 8,200 كيلوجرام بنزين .. دول يقدروا يخلوا الطيارة تطير 3000 كيلومتر مستريح بس لو إنت ناوي تدخل الطيارة في إشتباك جوي فتانك البنزين اللي فيها يقدر يخليها تطير يدوبك 760 كيلومتر و هي في إشتباك جوي و طايرة بسرعة 1.5 ماخ.
  • السلاح الأساسي للطيارة في الإشتباكات الجوية هو مدفع رشاش M614A2 عيار 20 مليمتر و الطيارة بيبقي فيها 480 طلقة.
  • جوه بطن الطيارة إنت تقدر تحط صاروخين AIM-9 و دي صواريخ جو- جو و دي بتجري ورا الهدف بتاعها بالأشعة تحت الحمراء .. تقدر كمان ترص 6 صواريخ جو- جو AIM-120 و دي صواريخ موجهة بالرادار و زي ما حضرتك شايف دول برده للإشتباكات الجوية.
  • لقصف الأهداف الأرضية فالطيارة تقدر تشيل قنبلتين GBU-32 JDAM.
اللي علي اليمين الأبيض الطويل فشخ ده يبقي صاروخ AIM-120 AMRAAM و جنبه اللي لونهم أحمر يبقوا أربع قنابل GBU-39 SBD و الخمسة مترصصين في بطن الطيارة F-22 Raptor.
طيارة F-22 Raptor بتطلق صاروخ AIM-120 AMRAAM في مناورة جوية.

الكهرباء بتاعة الطيارة:

  • أي حد معاه عربية حديثة عارف إن مشاكل الكهربا دي مظلة كبيرة فيه تحت منها أعطال الحساسات و الكومبيوتر بتاعة العربية .. في الطيارات دي بتتسمي Avionics .. إنت زي ما في عربيتك بيقي عندك شوية حساسات Sensors بتبعت قرايات للكومبيوتر .. في حالة F-22 Raptor إانت بتتكلم عن كومبيوتر Dual Integrated Processor .. أهم حساس في الطيارة هو الرادار بتاعها .. الرادار ده إسمه AN/APG-77 Active Electronically Scanned Array و ده من تصنيع شركة نورثروب جرومان Northrop Grumman اللي كانت بتنافس لوكهيد مارتن علي عقد الطيارة من البداية خالص لو تفتكر.
  • الرادار بيوريك كطيار إنت حوليك إيه .. في حالة إن حد ضرب عليك حاجة فإنت ساعتها بتحتاج يبقي معاك تاني أهم حساس في الطيارة و هو نظام الإنذار المبكر AN/ALR-94 من تصنيع شركة BAE Systems الإنجليزية .. طب إفرض إنت محتاج تضرب حد بحاجة؟ .. ساعتها إنت بتحتاج تالت أهم حساس و هو Missile Launch Detector أو MLD .. الMLD اللي متركب علي الطيارة من تصنيع شركة لوكهيد مارتن.

في إبريل 1997 خرجت أول 8 طيارات F-22 Raptor من مصنع شركة لوكهيد مارتن في مدينة مارييتا في ولاية جيورجيا الأميريكية و ال8 طيارات كانوا Development Version يعني الطيارات اللي إتعملت عشان تتفشخ في الإختبارات و كل مشكلة يلاقوها يعالجوها في الطيارات اللي حتطلع من خط الإنتاج بعد كده .. يوم 7 سبتمبر 1997 بتطير أول طيارة F-22 Raptor في أول طلعة تجريبية ليها  .. خط الإنتاج بتاع الطيارات دي فضل شغال 15 سنة بمعدل إنهم كانوا بينتجوا طيارتين في الشهر .. أخر طيارة تطلع من خط الإنتاج كانت في ديسمبر 2011 و دخلت الخدمة يوم 2 مايو 2012.

طيارتين F-22 Raptor في مناورة جوية و الطيارة اللي فوق دي تبقي أول طيارة تطلع من خط الإنتاج بتاع النوع ده من الطيارات و الأمريكان مديينها إسم الدلع Raptor 4001.

مارس 2013 .. كله يروح علي بيته  :

ده كان يوم عادي جداً زيه زي أي يوم من الشهر .. في اليوم ده كان المفروض تطلع طيارة إستطلاع بدون طيار MQ-1 Predator أمريكاني تاخدلها لفة فوق الخليج العربي و تطير فوق المجال الجوي الإيراني .. طلعة عادية إتعملت مليون مرة قبل كده .. بس كان فيه مشكلة صغيرة .. قبلها بشهرين تقريباً كانت طيارة تانية برده بتعمل نفس الشغلانة لما طيارتين سوخوي-25 إيراني طلعوا وراها وحاولوا يوقعوها .. من بعدها و الأمريكان قالوا إن كل طيارة MQ-1 Predator تطلع يكون طاير معاها يا طيارة F/A-18 Hornet طالعة من حاملة الطائرات يو إس إس جون ستينيس USS John Stennis أو يطلع معاها طيارة F-22 Raptor من قاعدة الظفرة الجوية في الإمارات .. في اليوم ده صادف يعني إن اللي طلع يحمي الطيارة MQ-1 Predator كانت طيارة F-22 Raptor و اللي كان طاير بيها عقيد طيار (كيفين ساترفيلد Kevin Sutterfield) اللي إسمه الكودي شوتايم Showtime .. شوية و طيارتين F-4 Phantom إيراني لقطوا الطيارة MQ-1 Predator علي الرادار بتاعها و جريوا وراها و فعلياً بقوا علي بعد 23 كيلومتر منها و الإتنين طيارين الإيرانيين مقررين إن ده اليوم اللي طيارة بدون طيار أمريكاني إنتهكت حرمة المجال الجوي الإيراني حتقع فيه.

الطيار (كيفين ساترفيلد) لقط الطيارتين الإيرانيتين علي الرادار بتاعه بس عشان هو طيارته Stealth فمحدش فيهم لقطه .. الباشا طار تحتهم و شاف بعنيه تسليح الطيارتين عشان يقيم هم الطيارين الإيرانيين ناويين علي إيه .. لما لقاهم شايلين صواريخ فهو قرر يفجعهم و يطلع فجأة يطير بينهم و كلمهم في الراديو قالهم نصاً .. يا رجاله ياريت ترجعوا بيوتكوا تاني.

قصص زي دي توريك قد إيه الطيارة F-22 Raptor ليها معزة خاصة في قلوب الطيارين الأمريكان .. هي أول طيارة جيل خامس تصنعها أميركا .. بسبب الطيارة دي الروس قرروا يعملوا الطيارة Sukhoi PAK-FA و الصينيين عملوا الطيارة Chengdu J-20 .. صحيح إن الكلام دلوقتي علي إن المستقبل هو الطيارة F-35 Lightening II بس لو ده رأيك فإنت محتاج تفهم نقطة مهمة جداً .. عشان أقربهالك حديلك مثال بالكورة .. فاكر فرقة برشلونة 2011 اللي كان ماسكها (بيب جوارديولا Pep Guardiola)؟ .. فاكر هم إزاي كانوا بيكسبوا طوب الأرض؟ .. أهي الطيارة F-35 إتعملت عشان تبقي هي (تشافي Xavi) و (أندريس أنييستا Andreas Iniesta) بتوع برشلونة 2011 .. دي طيارة متعددة المهام معمولة عشان تجمع كل الداتا اللي جايه من كل الأطراف و ترسم هي أحسن حل للتعامل مع العدو و تبدأ تنسق مع الطيارات اللي معاها و القوات اللي علي الأرض .. هي زرقاء اليمامة و الرسام .. هي مش معموله للإشتباك الجوي Dogfighting .. مش معموله عشان تاخد مدافعين الفرقة التانية ترقيص .. دي وظيفة (ليونيل ميسي Lionel Messi) أو الطيارة F-22 Raptor.

أربع مقاتلات F-22 Raptor بيطيروا قبل إنطلاق ماتش نهائي دوري الجامعات لكرة القدم الأميريكية يوم 3 سبتمبر 2016.

15 مايو 2020.. عايزة طيارات يا (إبراهيم):

في اليوم ده تحطمت طيارة تدريب F-22 Raptor علي بعد حوالي 20 كيلومتر من قاعدة إيجلين الجوية في ولاية فلوريدا .. هو يبان خبر عادي .. طيارة و وقعت .. إيه المشكلة يعني؟ .. المشكلة إن بعد تحطم الطيارة دي عدد طيارات F-22 Raptor اللي في الخدمة في سلاح الجو الأميريكي بقوا 185 طيارة .. المفروض إن الطيارة اللي وقعت دي كانت من ضمن 28 طيارة F-22 Raptor مخصصة للتدريب مش للمهام القتالية .. غالباً دماغك بتقولك طب ما المنطق إن كده فعلياً فيه في سلاح الجو 157 طيارة المفروض إنهم جاهزين .. لو ده رأيك هو كلامك منطقي بس مش هو الصح .. الوضع علي الأرض مختلف .. بناء علي أرقام سلاح الجو الأميريكي لسنة 2017 فالناس دي مقسمة عدد طيارات F-22 Raptor بتاعتهم لأربع فئات:

  • الطيارات المخصصة للعمليات القنالية PMAI و دي إختصار Primary Mission Aircraft Inventory و دول حضرتك 123 طيارة.
  • الطيارات المخصصة للتدريب PTAI و دي إختصار Primary Training Aircraft Inventory و دول سيادتك 28 طيارة.
  • الطيارات اللي لسه في مرحلة التطوير أو اللي بيتعملها إصلاحات PDAI و دي إختصار Primary Development Aircraft Inventory ودول معاليك 16 طيارة.
  • الطيارات الإحتياطي BAI و دي إختصار Backup Aircraft Inventory و دول يبقوا 9 طيارات.

خد بالك بقي .. واضح إن الفئة اللي تهمنا هي الطيارات المخصصة للعمليات القتالية و اللي مش معني إنهم 123 طيارة إن كل الطيارات دي ينفع تخش حرب بكره الصبح .. بناء علي أرقام سلاح الجو الأميريكي لسنة 2018 فدرجة الإستعداد القتالي لطيارات F-22 Raptor هي 52% .. ده معناه إن من ال123 طيارة دول فيه منهم 64 بس جاهزين يخشوا حرب .. تعالي إنت رايح فين الدنيا لسه حتسود أكتر .. الكود بتاع العمليات الجوية بيقول إن لو عندك عدد معين من الطيارات جاهز يخش حرب فإنت بتحسبها كالأتي .. تلت العدد من الطيارات بيكون في الجو بينفذ مهمات قتالية .. تلت العدد ده بيستعد إنه يطلع بمجرد عودة التلت الأولاني .. فيه بقي التلت التالت ده في الورش يا بيتصلح يا بيتصين يا بيتزودله بنزين أو بيتحطله صواريخه .. يعني إيه الكلام ده؟ .. يعني فعلياً عدد طيارات F-22 Raptor اللي جاهزة تبقي في الجو في أي لحظة هم 21 طيارة بس .. الحق يتقال إن ممكن في أي لحظة سلاح الجو يقرر يرفع الكفاءة القتالية لإسطول طيارات F-22 Raptor  من 52% يخليه 80% و ساعتها عدد الطيارات اللي تقدر تبقي في الجو في أي لحظة ينط ل33 طيارة مش بس 21 .

واضح إن فيه حاجات لسه متقالتش كتير .. يعني مثلاً أنا محكتش ليه مشروع الطيارة دي وقف؟ .. محكتش إزاي قرر وزير الدفاع وقتها (روبيرت جيتس Robert Gates) إنه يلغي مشروع الطيارة F-22 Raptor عشان يوفر فلوس لمشروع مدرعات MRAP ؟ .. أنا بفتح السكك دي عشان أوريك إن الكلام عن الطيارة و عن المشروع ده مخلصش .. لسه حنتكلم عن هو ليه بيتقال دلوقتي طب ما نرجع المشروع ده يشتغل تاني؟ .. أسئلة كتير و مواضيع كتير لسه حنفتحها و نتكلم فيها.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!