لينك التسجيل الصوتي للمقالة علي Sound Cloud:
https://soundcloud.com/user-112011687-312727988/29-50a?si=cb47a574ab0749e0b04f597d0f7cc378
موضوعنا النهاردة اللي حنتكلم عنه هو المقاتلة الروسية MiG-29 Fulcrum .. سبب إننا حنتكلم عن المقاتلة دي بالذات هو خبر أنا معرفش إنت قريته أو لا بخصوص إن مصر قررت تشتري 50 مقاتلة من الطراز ده .. هو الحقيقة هو ده مش قرار قد ما هو فعل حصل فعلاً .. يوم 27 إبريل 2017 أعلن نائب وزير الدفاع المصري (محمد الكشكي) إن مصر إستلمت فعلاً عدد من المقاتلات دي مع العلم إن المفروض إن الخمسين مقاتلة يكونوا وصلوا مصر كلهم علي أخر سنة 2020 .. عشان كده إحنا حابين نكتب المقالة دي .. إننا نحاول نفهم هو إحنا إشترينا إيه بالضبط.
مبدأياً كده لازم تكون فاهم إن المقاتلة MiG-29 Fulcrum دي تبقي أول مقاتلة من اللي بيتقال عليهم مقاتلات الجيل الرابع Fourth-Generation Fighter تصنعها روسيا .. اللي عمله الروس إنهم جابوا كل التصميمات بتاعة مقاتلاتهم اللي كانت بتتصنع أيام الإتحاد السوفيتي ورموها في الزبالة وقالوا لنفسهم يلا نبدأ تصميم علي نظافة .. الحقيقة إنهم فعلاً خرجوا بتصميم محترم والأهم من إنه محترم فهو تقدر تقول عليه Sexy أوي .. بغض النظر عن أي حاجة تانية ففعلاً شكل المقاتلة MiG-29 Fulcrum حلو أوي .. ولإن الشكل مش كل حاجة ولإن الجمال جمال الروح فالمقاتلة دي كسرعة فهي تقدر تنافس أي مقاتلة أميريكية حضرتك تختارها .. كتسليح حضرتك المقاتلة دي فيها أحدث الصواريخ المتاحة في العالم .. علي الورق إنت بتتكلم عن المقاتلة المثالية .. علي الورق المقاتلة MiG-29 Fulcrum فعلياً مفيهاش غلطة .. بس لاحظ إني قلتلك علي الورق .. لإن علي أرض الواقع إنت عندك مع المقاتلة دي مشكلة كبيرة .. هي من بره تحسسك إنها موبايل iPhone 8 Plus من شكلها الخارجي الوهم .. بس لو فتحت الكبوت زي ما بنقول وبصيت عليها من جوه تحس إنك بتتفرج علي موبايل Nokia 3310.
إنت تقدر تلخص مشكلة المقاتلة MiG-29 Fulcrum في 3 حاجات:
- أي حاجة ماشية علي دايرة كهربا فيها أو زي ما بتتسمي في الهندسة Electronics فهي مبنية علي تكنولوجيا قديمة أوي .. سواء كنت بتتكلم عن الشاشات اللي قدام الطيار أو أنظمة التحكم أو أنظمة Fly-by-Wire Avionics ودي بالضبط عاملة زي الPower Steering بتاع دريكسيون عربيتك .. حتي الحساسات Sensors كانت أي كلام .. يا رجل ده حتي الرادار بتاعها اللي المفروض إنه N019 Phazotron Pulse-Doppler Radar واللي فكك خالص من إسمه بس عايزك تعرف إن مدي الدقة بتاعه أقل ب60 كيلومتر من مدي الدقة بتاع الرادارات اللي بتتركب علي الصواريخ بتاعه المقاتلة .. يعني رادار الصواريخ أعفي من رادار الطيارة.
- هي مش مقاتلة إتصنعت عشان تعيش والعيب ده بيسموه Short Service Life .. يعني دي مش مقاتلة تعمر معاك سنين وسنين ومتعملش حسابك علي كده .. هي أخرها معاك 2500 ساعة طيران في حين إن أي مقاتلة أميريكية سواء F-16 Fighting Falcon أو F-15 Strike Eagle بتقدر تكمل لحد 6000 ساعة طيران .. بعد حاجز ال2500 ساعة طيران حتضطر تعملها عمرات كاملة علي كل حاجة .. من الشاسيه للمحركات .. أقرب مثال علي المشكلة دي إن القوات الجوية الماليزية لقت نفسها مضطرة تدفع 5 مليون دولار سنوياً علي المقاتلة الواحدة لمجرد إنها تنفع تطير بعد ما تعدي حاجز ال2500 ساعة طيران.
- مدي طيرانها ضعيف شوية .. هي يدوبك بتخليك تطير 1350 كيلومتر بس وإلا حتحتاج تهبط بيها في أقرب مطار عشان تفولها التانك لإن مفيهاش القدرة علي إنك تمونها بالوقود وهي في الجو .. ده بيخليها مقاتلة مناسبة جداً للأغراض الدفاعية .. إنت لو ناوي تشتري مقاتلات عشان تدافع عن نفسك بس فإنت ممكن تفكر فيها غير كده تبقي غلطان لو إشتريتها.
طبعاً ده حيخليك تسأل نفسك طب وأنا إيه اللي يخليني أدفع دم قلبي عشان أشتري مقاتلة بالعيوب دي؟ الحقيقة إنك عشان تفهم إنت إيه اللي يخليك تشتري مقاتلة زي دي خليني أديلك مثال بالموبايلات .. إنت عايز موبايل Smartphone .. بس معندكش فلوس تشتري لا iPhone ولا حتي Samsung .. أسعارهم بقت نار دلوقتي في السوق .. ده حيخليك تروح تفكر في الصيني سواء Huawei أو Oppo أو حتي Xiaomi .. إيه اللي يخليك تفكر في الصيني؟ .. الفلوس .. إنت عايز حاجة معينة بس معكش فلوس تشتري ماركة نظيفة فبتروح تشتري حاجة تقضي الغرض بسعر مناسب ليك .. أهي المقاتلة MiG-29 Fulcrum هي الموبايل الصيني .. هي نسبياً رخيصة أوي بالمقارنة لإمكانياتها .. لو معاك فلوس وعايز حاجة إمكانياتها أعلي روح إشتري سوخوي سبعة و عشرين Su-27 .. خصوصاً إن الروس عملوا شوية تعديلات وتطوير في المقاتلة MiG-29 Fulcrum بحيث يعالجوا شوية من عيوبها .. ده بيخليها مقاتلة مثالية جداً لدول العالم الثالث اللي عايزه سلاح متطور بس معهاش فلوس تروح تشتري الأمريكاني ولا الأوروبي.
الروس لما جم يفكروا يصنعوا المقاتلات دي كان في مخيلتهم حاجة تانية خالص علي فكرة .. بداية إن فكرة تصنيع مقاتلات MiG-29 Fulcrum تشعشع في نفوخ المهندسين الروس كانت سنة 1974وفي وقتها الإتحاد السوفيتي كان في عز قوته .. هم كانوا بيفكروا إن مثلاً لو حصل والقوات الأميريكية شنت هجوم كاسح علي الإتحاد السوفيتي من ألمانيا الغربية مثلاً فساعتها الروس حيصدوا الهجوم ده بحاجتين:
- أول حاجة أسراب مقاتلات MiG-29 Fulcrum الخفيفة واللي مش بتحتاج مدرج طيران طويل ويقدروا ينشروها في المطارات الصغيرة في ألمانيا الشرقية عشان تطلع بسرعة تعترض المقاتلات الأميريكية.
- تاني حاجة هي أسراب مقاتلات Su-27 واللي وقتها الروس كانوا بيفكروا فيها برده .. هم كانوا بيفكروا إنهم يخلوا مقاتلات Su-27 أتقل شوية وأقوي من مقاتلات MiG-29 Fulcrum بحيث هي اللي تتولي المهام بعيدة المدي.
عشان أقربهالك أوي .. مقاتلات MiG-29 Fulcrum هي النسخة الروسي من مقاتلات F-16 Fighting Falcon الأميريكية واللي تعتبر العمود الفقري للقوات الجوية المصرية .. مقاتلات Su-27 تعتبر النسخة الروسية من مقاتلات F-15 Strike Eagle الأميريكية ودي معندناش منها في مصر.
الروس قعدوا يصنعوا في مقاتلات MiG-29 Fulcrum من سنة 1974 لحد سنة 1982 يعني بتتكلم عن 8 سنين بس .. حلف شمال الأطلسي NATO سماها فولكروم Fulcrum والروس عجبهم أوي الإسم فقرروا يبقي هو الإسم الرسمي بتاع المقاتلة .. الغرب إترعب من شكل المقاتلة دي والطيارين الأميريكيين والأوروبيين كان نفسهم يطيروا بيها لحد ما في سنة 1990 إنهار الإتحاد السوفيتي وإتوحدت ألمانيا الغربية والشرقية .. كانت ألمانيا الشرقية شارية شوية مقاتلات MiG-29 Fulcrum فالطيارين الألمان والأميريكيين ما صدقوا المقاتلات دي وقعت في إيدهم .. الأمريكان أُعجبوا بيها أوي لدرجة إن بعدها بكام سنة أميركا إشترت 21 مقاتلة منها من دولة مولدوفا .. الحقيقة إنك سهل أوي تقدر ليه الطيارين وقعوا في غرام المقاتلة دي:
- رغم خفة وزنها إلا إن المقاتلات دي فيها محركين RD-33 Turbofan بيدوها سرعة قصوي بتوصل 2.25 ماخ يعني أكثر من ضعفي سرعه الصوت .. عشان المقارنة بس فهي أسرع من المقاتلة F-16 Fighting Falcon عشان فيها محرك واحد ويدوبك أبطيء من المقاتلة F-15 Strike Eagle بحاجة بسيطة لإن فيها محركين.
- قدرتها علي المناورة ملهاش مثيل .. حتي المقاتلة F-16 Fighting Falcon متجيش حاجة جنبها .. الطيارين الألمان لما جربوها في المناورات إكتشفوا إنها فعلاً أحسن مقاتلة تقدر تستخدمها في الإشتباك الجوي.
- أي مقاتلة في الدنيا فيها حاجة إسمها Hardpoints ودي النقط اللي في الشاسيه وفي الجناحات اللي قوية بما يكفي إنها تستحمل يتركب عليها صواريخ وقنابل .. مقاتلات MiG-29 Fulcrum فيها 7 Hardpoints تقدر تركب عليها صواريخ R-27 متوسطة المدي أو صواريخ R-60 .. إنت تقدر تعمل شوية تعديلات علي المقاتلات عشان تخليها تقدر تطلق صواريخ R-77 جو-جو ودي صواريخ بعيدة المدي .. رغم إن زي ما قلتلك وزن المقاتلة دي قليل إلا إنها بتقدر تشيل تسليح حمولته 16000 كيلوجرام وده رقم محترم جداً.
- من المميزات الرهيبة فيها إنها بتيجي متركب فيها صواريخ R-73 قصيرة المدي والغرب بيسميها AA-11 Arrow .. المهم إن الصواريخ دي بتتوجه بالأشعة تحت الحمراء والطيار بيقدر ينشنها ويطلقها عن طريق الخوذة بتاعته .. زمان كنت لو إنت طيار مقاتل عشان تُسقط المقاتلة اللي قدامك كنت لازم تطير وراها بالضبط عشان تنشن الصاروخ بتاعك عليها .. اللي حصل إن صواريخ R-73 كانت عشان تسقط المقاتلة اللي قدامك كل اللي هي محتاجاها إنك تبص علي المقاتلة بعنيك بزواية متزيدش عن 60 درجة والرادار بتاع الصاروخ حيلقطها لوحده وحينشن عليها ويجري عليها .. القوات الجوية الأميريكية فضلت معندهاش صواريخ بالإمكانيات الرهيبة دي لحد ما أخيراً صنعوا صواريخ AIM-9X والكلام ده كان سنة 2003.
نيجي بقي للسؤال المهم .. هو إيه اللي مصر إشترته بالضبط؟
بداية من التسعينات والروس نزلوا تعديل جديد سموه MiG-29M وحتلاقي ناس بتسميها MiG-33 فهم الإتنين حاجة واحدة عشان متتسغربش وده اللي حتشتريه مصر .. إنت بتتكلم عن صفقة شراء 50 مقاتلة MiG-29M بقيمة إجمالية 2 مليار دولار يعني المقاتلة الواحدة واقفه علينا ب40 مليون دولار .. الجديد في الجيل الجديد ده إنهم عملوا شوية إضافات ممتازة:
- المحركين بقوا بيتقال عليهم Smokeless Engines يعني مبقوش يطلعوا أي دخان والفكرة في كده إنك تخلي إلتقاطها عن طريق الرادارات المعادية أصعب شوية.
- خزان الوقود كبر شوية عشان يديك مدي طيران بيوصل 1800 كيلومتر بعد ما كان 1350 كيلومتر بس .. إنت في المعتاد فيه خزانين وقود .. فهم زودوا خزان ثالث تقدر ترميه وإنت طاير .. مش كده وبس .. زودوا فيها كمان خاصية إنها تقدر تمونها بالوقود في الجو.
- زمان كان فيها 7 Hardpoints بس لكن الجيل الجديد MiG-29M زودوهم بقوا 9 وبكده أقصي حمولة تسليح تقدر المقاتلة تشيلها زادت بنسبة 50%.
- الرادارات كمان إتعدلت وبقي الرادار الموجود فيها من طراز N010 Zhuk-ME Pulse-Doppler Radar له مدي 112.5 كيلومتر.
في نفس الوقت التعديلات دي عكت الدنيا في حاجات تانية .. أقصي سرعة ليها قلت من 2.25 ماخ بقت 2 ماخ بس وأقصي إرتفاع تحليق ليها قل بقي 50,000 قدم ويمكن السبب في كده إن وزن الجيل ده زاد عن القديم بحوالي 1.25 طن .. زي ما قلتلك النوع ده من الطيارات رخيص بالنظر لإمكانياته وإن شاء الله تبقي إضافة قوية لسلاح الجو بتاعنا.
المصدر:
- مقالة بعنوان Is the MiG-29 simple a paper tiger? نشرت علي Website إسمه Scout وده لينك المقالة الأصلية:
https://scout.com/military/warrior/Article/Is-the-MiG-29-Simply-a-Paper-Tiger-108348975
