موضوعنا النهاردة اللي حنتكلم عنه هو القوات المسلحة القطرية و حنركز كلامنا أوي علي صفقات السلاح الكتير و الضخمة اللي قطر مضتها مع شركات سلاح عالمية بشكل يخليك تسأل نفسك هو مين حيشتغل علي الأسلحة دي كلها؟ .. بناء علي تقديرات معهد أستكهولم لدراسات السلام الدولي SIPRI فصفقات السلاح القطرية زادت بنسبة 245% ما بين سنة 2007 لحد سنة 2011 و الرقم ده مش غلطة مطبعية و مفيش علامة عشرية أنا نسيتها بالغلط .. أيوه زي ما قريت كده .. صفقات السلاح القطرية زادت بنسبة 245% خلال 5 سنين بس .. لكن رغم كل ده فالفلوس و السلاح اللي قطر إشترته ميجيش حاجة جنب السلاح و الفلوس اللي السعودية و الإمارات دفعوها خلال نفس الفترة و ده سببه هو إن القوات المسلحة القطرية صغيرة مش كبيرة مقارنة بالقوات المسلحة الإماراتية أو السعودية.
خليني أديك مثال .. حتعرف كمان شوية بالتفصيل إن قطر قررت تشتري 24 مقاتله Typhoon الأوروبية اللي من تصنيع شركة BAE Systems .. الصفقة دي تعتبر أضخم صفقة تمضيها الشركة الأوروبية من حوالي 10 سنين .. إنت من حقك تبص لعدد المقاتلات و تقول لنفسك إيه البذخ ده؟ ما طبعاً القطريين معاهم فلوس مش عارفين يودوها فين .. بس الحقيقة إن أضخم صفقة شراء لمقاتلات Typhoon كانت من نصيب السعودية اللي إشترت 72 مقاتلة سنة 2006 و الكويت بعدها إشترت 28 مقاتلة .. فالمشكلة مش إن قطر إشترت سلاح كتير .. هو متهيألك إنه كتير لإن حجم القوات المسلحة القطرية صغير.
يوم 10 ديسمبر اللي فات أعلنت بريطانيا إنها مضت عقد مع قطر عشان تبيعلها 24 مقاتلة من طراز تايفون Typhoon بالإضافة لتوفير الأسلحة و برامج التدريب و وزير الدفاع البريطاني (جافين وليامسون Gavin Williamson) شخصياً هو اللي مضي العقد في الدوحة مع نظيره القطري (خالد بن محمود العطيه) مقابل حوالي 8 مليار دولار منهم 5 مليار دولار بس دول ثمن التسليح و برامج التدريب و الصيانة .. القطريين إتفقوا علي إنهم حيشتروا صواريخ Brimstone 2 من تصنيع شركة MBDA و دي صواريخ جو-أرض و صواريخ Meteor و دي صواريخ جو-جو بيقدر الطيار يضربها من غير ما يكون شايف الطيارة المعادية و كمان قنابل موجهة بالليزر من طراز Paveway IV من تصنيع شركة Raytheon بحيث أول دفعة من المقاتلات دي حتستلمها قطر سنة 2022.
الخبر ده جه بعد ما إتأكدنا من الأخبار اللي بتقول إن قطر فعلاً مضت عقد مع أميركا عشان تشتري 36 مقاتلة F-15QA من تصنيع شركة بوينج Boeing مقابل 12 مليار دولار و كمان قطر مضت عقد مع فرنسا لشراء 12 مقاتلة رافال Rafale من تصنيع شركة داسولت Dassault و بناء علي كلام جريدة لو موند الفرنسية فالصفقة دي ثمنها حيبقي 1.3 مليار دولار و بكده قطر حيبقي عندها 36 مقاتلة Rafale بس مقاتلات Rafale اللي حتتباع لقطر مش حيبقي ليها القدرة علي حمل رؤوس نووية و كمان مش حيبقي فيها أنظمة الإتصالات اللي بتتركب لدول حلف شمال الأطلسي NATO .. فكر فيها كده .. القوات الجوية القطرية لحد دلوقتي بتتكون من حوالي 12 مقاتلة قديمة من طراز ميراج Mirage-2000 الفرنسية اللي خلاص حتطلع بره الخدمة و بعد الصفقات دي كلها القوات الجوية القطرية حيبقي عندها 96 مقاتلة من 3 موديلات مقاتلات يعتبروا أحدث مقاتلات متاحة في السوق دلوقتي .. ده يخلينا نرجع نسأل نفسنا السؤال اللي سألناه في البداية: هل القوات الجوية القطرية عندها الإمكانيات البشرية اللي تخليها تقدر تشغل و تصين و تطير 3 موديلات مقاتلات متطورة زي Rafale و Typhoon و F-15QA؟ ولا هل قيادة القوات الجوية القطرية حتلاقي نفسها في وضع إنها بقي لازم تدور علي عمالة أجنبية عشان تشغل الأسراب الجديدة اللي حتشتريها؟
المشكلة بتبدأ تظهر بمجرد بصة سريعة علي الأرقام بتاعة تعداد القوات المسلحة القطرية .. القوات المسلحة القطرية كلها علي بعضها بتتكون من 27,500 فرد منهم 2,500 بس شغالين في سلاح الجو .. مش عايزك تبص للي بتعمله قطر و تتريق عليها أو تسخر منها لإن الحقيقة إن اللي عملته قطر ميفرقش كتير عن اللي بتعمله أي دولة من دول مجلس التعاون الخليجي .. الدول دي لسنين و سنين بتصرف مليارات الدولارات عشان تشتري سلاح أميريكي و أوروبي بناء علي إتفاق مش مكتوب بس كلنا عارفين إنه متطبق و الإتفاق ده بيقول إن صفقات السلاح الخليجية دي دورها إنها تخلي خطوط الإنتاج بتاعة شركات السلاح الأميريكية و الأوروبية شغالة و مش بتقف في مقابل إن الغرب يوفر لدول الخليج الحماية من أي إعتداء خارجي .. الموضوع ده أحياناً بيوصل لمرحلة إنه بيحرق دم اللي بيتابع صفقات السلاح دي .. عندك مثلاً المقاتلة Typhoon اللي قطر حتشتري منها 24 مقاتلة دفعة واحدة.
دي مقاتلة أوروبية من تصنيع 3 شركات هم BAE Systems البريطانية و Airbus الفرنسية و Leonardo الإيطالية و دي مقاتلة ملهاش زباين و واقفة علي الشركة بخسارة ولو سألت أي خبير عسكري هل قطر تشتري المقاتلة دي ولا تشتري مقاتلة زي F-16 Fighting Falcon اللي سعرها أرخص بكتير من Typhoon و بنفس الإمكانيات حيقولك من غير ما يفكر روح إشتري الF-16 Fighting Falcon .. بس عشان قطر تكسب رصيد عند دول الإتحاد الأوروبي راحت إشترت الTyphoon و اللي الصفقة دي تعتبر قبلة الحياة لخط الإنتاج بتاعها اللي كان خلاص قرب يقف و كتير من مهندسي الشركة و فنيينها كانوا حيمشوا لإن مفيش شغل .. صفقة ال24 مقاتلة دي ممكن تخلي خط الإنتاج بتاع Typhoon يفضل شغال لمدة 10 سنين علي الأقل يعني لحد سنة 2024 علي أقل تقدير مع العلم إن شهر أكتوبر اللي فات شركة BAE Systems كانت أعلنت إنها حتمشي 2000 موظف من مصانعها في بريطانيا.
المصادر:
- مقالة بعنوان A huge military buildup is underway in Qatar. But who will man the systems? و ده لينك المقالة الأصلية:
https://www.defensenews.com/global/mideast-africa/2017/12/15/a-huge-military-buildup-is-underway-in-qatar-but-who-will-man-the-systems/ - مقالة بعنوان Qatar inks deal with UK for 24 Typhoon jets, training package و ده لينك المقالة الأصلية:
https://www.defensenews.com/training-sim/2017/12/11/qatar-inks-deal-with-uk-for-24-typhoon-jets-training-package/
