لينك التسجيل الصوتي للمقالة علي Sound Cloud:
https://soundcloud.com/user-112011687-312727988/iron-dome-m4a?si=5007523d70df45e18d9cf65baad48692&utm_source=clipboard&utm_medium=text&utm_campaign=social_sharing
الإسرائيليين بيحبوا فكرة إنهم محاوطين نفسهم بسور .. في الضفة الغربية هم عاملين الجدار العازل .. أيام حرب أكتوبر كانوا عاملين خط بارليف .. هو معتقد في دماغهم مخليهم مقتنعين إن الحاجة الوحيدة اللي حتحميهم هي السور أو الحصن اللي هم قاعدين جواه .. ده حيخلينا نتكلم عن منظومة القبة الحديدية أو Iron Dome و ده عبارة عن نظام كامل للدفاع الجوي يعني Air Defense System عاملاه إسرائيل عشان يبقي زي الناموسية اللي إحنا بنحطها فوق الطفل الصغير و هو نايم .. الإسرائيليين شايفين إن Iron Dome دي هي أحسن إختراع إتعمل في تاريخ الدفاع الجوي و عشان كده أنا حتكلم النهاردة عن البتاعة دي .. السؤال اللي أنا ححاول أجاوب عليه النهاردة بمنتهي البساطة هو هل فعلاً Iron Dome دي هي الشويبس جولد بتاعة الدفاع الجوي ولا هي أخرها إنك تقول عليها سيناكولا اللي محدش بيشربها و معرفش لحد دلوقتي هي بتنزل في السوق ليه؟
بداية إن الإسرائيليين يصدعونا بIron Dome كانت سنة 2011 .. عشان بس تكون فاهم Iron Dome دي عبارة عن حتت كل حتة بتتكون من 3 حاجات اللي هم رادار و كومبيوتر و شوية منصات إطلاق .. كل حتة بتغطي مسافة بنص قطر معين .. جمّع إنت كل الحتت دي مع بعض تلاقيهم عاملين مع بعض زي ما تكون ناموسية فوق إسرائيل .. الفكرة بمنتهي البساطة إن لو أنا مثلاً ضربت صاروخ علي إسرائيل فأول خطوة إن الرادار يلقط الصاروخ و هو جاي .. بعد كده الكومبيوتر بيبدأ يحسب هو الصاروخ ده حيقع فين؟ و هل المكان اللي حيقع فيه ده جواه مكان حيوي عايش فيه ناس ولا حتة مقطوعة مفيهاش صريخ إبن يومين؟ .. تالت خطوة إن الكومبيوتر يوجه منصات الإطلاق إنها تطلق قذائف صغيرة عشان تعترض الصاروخ و هو لسه في الجو و ده في حالة إن الكومبيوتر قال إن الصاروخ اللي جاي فعلاً بيهدد هدف حيوي .. منظومة Iron Dome عشان تتصنع و تتركب و تشتغل و تتصين الإسرائيليين بيصرفوا عليها مليارات الدولارات .. أميركا لوحدها متكفلة ب1.3 مليار دولار منهم ده غير إن خلال السنين الجاية هي تعهدت إنها حتدي إسرائيل كام مليون دولار زيادة مخصوص عشان البتاعة دي.
زي ما قلتلك الإسرائيليين ركبوا Iron Dome سنة 2011 .. بعديها بسنة علي طول قال يعني بيختبروها إسرائيل شنت حربها علي قطاع غزة و اللي الإسرائيليين بيحبوا يسموها عملية أعمدة الدفاع Operation Pillars of Defense و حاول تحفظ أسامي العمليات دي لإنها حتبقي مهمة إنك تقيم أداء المنظومة دي في الأخر .. خلال الحرب دي إسرائيل قالت إن Iron Dome أسقطت 421 صاروخ ضربتهم حماس علي إسرائيل يعني إنت بتتكلم عن إن 85% من إجمالي الصواريخ اللي ضربتها حماس علي إسرائيل في الحرب دي منظومة Iron Dome إعترضتها .. أه نسيت أقولك في الحرب دي فيه 5 وحدات بس من Iron Dome هم اللي شاركوا في العمليات العسكرية .. سنة 2014 شنت إسرائيل حربها التانية علي القطاع و الحرب دي الإسرائيليين بيحبوا يسموها عملية الحد الحامي Operation Protective Edge .. المهم إن في الحرب دي فيه 9 وحدات من Iron Dome شاركت في إسقاط 735 صاروخ و قذيفة هاون ضربتها حماس بإتجاه إسرائيل يعني بتتكلم عن نسبة نجاح عدت 92%.
المفروض بقي كده إحنا نلم ورقنا و جبرت يا جدعان الIron Dome شغالة زي الفل و إسرائيل رجعت تاني الجيش الذي لا يُقهر و لا يكلف الله نفسا إلا وسعها .. بس الحقيقة إن أنا إيش عرفني إن الإسرائيليين أصلاً كلامهم صح؟ .. أصعب حاجة في الدنيا إنك تقولي إن منظومة صواريخ دفاع جوي تقدر تعترض الصواريخ بنجاح لإن بمنتهي البساطة مفيش طريقة تثبتلي بيها إنت بتتكلم صح ولا بتفتي .. خليني أديلك مثال بسيط .. مش عارف إنت تفتكر ولا لا بس أول السنة القوات الأميريكية شنت غارة ب105 صاروخ كروز بعيد المدي علي أهداف تبع النظام السوري بتاع (بشار الأسد) بسبب إنه إستخدم الأسلحة الكيماوية لو تفتكر .. المهم إن اللي إحنا عارفينه و متؤكدين منه إن الأمريكان ضربوا 105 صاروخ و السوريين أطلقوا 40 صاروخ مضاد .. اللي إحنا مش عارفينه بقي هو كام صاروخ وقع كام صاروخ؟ و هل الصواريخ الأمريكاني أصابت أهدافها أو لا؟ .. الأمريكان حالفين مية يمين إن ال105 صاروخ أصابوا أهدافهم و السوريين راسهم و ألف سيف إن ال40 صاروخ بتوعهم إعترضوا الصواريخ الأميريكية و إن 65 صاروخ أميريكي بس اللي نزلوا علي أهداف سورية .. هل فيه حد فيهم قدر يثبت للعالم إن التاني كداب؟ لا .. هل فيه طريقة نتأكد مين صح و مين غلط؟ برده لا .. مش المثال ده بس علي فكرة اللي يوريك قد إيه صعب إنك تتأكد من فعالية أنظمة الدفاع الجوي .. لا إحنا عارفين نتأكد إن منظومة صواريخ PATRIOT الأميريكية قدرت فعلاً تصد هجوم صواريخ كروز اللي ضربها (صدام حسين) الله يرحمه علي الكويت أيام حرب الخليج الثانية سنة 1991 ولا إحنا حتي عارفين نتأكد إن برده منظومة صواريخ PATRIOT دي عارفة تحمي السعودية من صواريخ الحوثيين.
ده حيرجعنا تاني للكلام عن Iron Dome .. هل هي فعلاً منظومة ناجحة؟ .. بسبب إن الفيديوهات اللي بتنشرها إسرائيل علي النت لحالات إعتراض ناجحة عملتها منظومة Iron Dome ضد صواريخ حماس مفيهاش أي تفاصيل تثبت صحة الفيديو ففيه ناس كتير بتقول إن نسبة نجاح المنظومة مش 92% زي ما الإسرائيليين بيقولوا إنما أخرها تبقي 30-40% و فيه تقديرات تانية بتقول إنها يدوبك تقدر توقع 10% بس من الصواريخ اللي بتضرب علي إسرائيل .. طب الحقيقة فين؟
علي إيدك اليمين الناس اللي بتقول إن Iron Dome ناجحة و شغالة زي الفل:
الناس دي بيقولوا طب ما تبصوا علي متوسط تدمير الممتلكات أو Average Property Damage اللي بيحصل في كل مرة إسرائيل بتخش فيها حرب .. خلينا نمشي وراهم لحد الأخر .. فيه رسم بياني عندك بيوريك متوسط حجم الدمار لكل صاروخ كان بينزل علي إسرائيل خلال 3 حروب اللي هم حرب لبنان الثانية سنة 2006 و حرب قطاع غزة سنه 2012 و حرب القطاع سنه 2014 .. المنطق بتاع الناس دي بيقول إن لما إسرائيل دخلت في حربها ضد حزب الله سنة 2006 مكنتش لسه منظومة Iron Dome إتعملت و عشان كده في المتوسط كل صاروخ كان بيضربه حزب الله علي إسرائيل بيسبب أضرار بنسبة 6.7% .. سنة 2012 في عملية Operation Pillars of Defense الرقم ده قل ل2.9% .. و سنة 2014 في عملية Operation Protective Edge الرقم قل جامد ل1.2% .. مش ده دليل علي نجاح Iron Dome يا متعلمين يا بتوع المدارس؟
علي إيدك الشمال ناس تانية بتقول إن ده إسمه فتي منظم:
منطق الناس دي إنك لما تحسب مدي نجاح Iron Dome بناء علي متوسط نسبة الأضرار اللي بيسببها كل صاروخ بيخليك تقع في غلطتين:
- الغلطة الأولانية إن المنطق ده بيخلي الإسرائيليين يتعمدوا ميجيبوش سيرة حرب صغيرة كده شنتها إسرائيل برده علي قطاع غزة سنة 2008 و العملية العسكرية دي الإسرائيليين بيحيبوا يسموها عملية الرصاص المصبوب Operation Cast Lead .. سبب إن الإسرائيليين مبيحبوش يجيبوا سيرتها إنك لو جيت حسبت متوسط الدمار اللي بيسببه كل صاروخ بيطلق علي إسرائيل حتلاقيه 2.4% ده معناه إن لما Iron Dome دخلت الخدمة سنة 2011 و كان متوسط حجم الدمار لكل صاروخ 2.9% فده معناه إن Iron Dome بوظت الدنيا مصلحتهاش .. عشان كده زي ما قلتلك المنطق ده بيخلي الإسرائيليين يستهبلوا و يتناسوا إن عملية Cast Lead دي حصلت من الأساس عشان ميبقاش منظر Iron Dome وحش.
- الغلطة الثانية هي إنك بتنسي إن خلال حرب لبنان الثانية سنة 2006 حزب الله إستخدم صواريخ جراد Grad و دي صواريخ تقيلة و مفعولها أقوي بكتير من صواريخ القسام اللي كانت حماس بتعتمد عليها في حربي 2012 و 2014 .. لو عوضت بالحسبة دي ورجعت تاني تحسب متوسط حجم الدمار لكل صاروخ إتضرب علي إسرائيل حتلاقي النسب كالأتي: حرب لبنان 2006 كانت النسبة 4.4% .. في عملية Cast Lead علي القطاع سنة 2008 النسبة كانت 3.9% و بفكرك إن الإتنين دول كانوا قبل ما منظومة Iron Dome تدخل الخدمة .. في عملية Pillars of Defense سنة 2012 النسبة كانت 4.3% يعني دخول Iron Dome في الخدمة خلي النسبة تسوء مش تتحسن .. في عملية Protective Edge سنة 2014 النسبة قلت بقت 1.5%.
طب معناه إيه الكلام ده؟ .. في عملية Pillars of Defense سنة 2012 اللي هي التجربة الأولي لIron Dome قدرت إنها تعترض 32% بس من إجمالي الصواريخ اللي أطلقتها حماس علي أهداف حيوية يعني أهداف عايش فيها بني أدمين .. إستخدامها أدي لإنقاذ حياة إتنين بني أدمين بس من الموت و إنقاذ 110 بني أدم من إصابات و حماية إسرائيل من أضرار في الممتلكات إتقدرت بحوالي 7 مليون دولار .. كلها أرقام ضعيفة متبررش خالص حجم التكاليف اللي إتصرفت عشان Iron Dome تتركب .. في عملية Protective Edge سنة 2014 أرقام Iron Dome إتحسنت كتير .. هي قدرت تعترض ما بين 59-75% من إجمالي الصواريخ بتاعة حماس اللي بفكرك برده إن دي النسبة بتاعة الصواريخ اللي كانت نازلة علي أهداف حيوية و قدرت تحمي إسرائيل من أضرار تكلفتها كانت ممكن توصل ما بين 42 ل86 مليون دولار.
خلاصة الكلام إن إمكانيات Iron Dome مبالغ فيها بشكل كبير الصراحة .. لو هي منظومة دفاع جوي جامدة فشخ زي ما الإسرائيليين بيقولوا كنا شفنا زباين هيموتوا و يشتروها في حين إن الدولة الوحيدة اللي إشترت Iron Dome من إسرائيل كانت أذربيجان و كندا إشترت منهم الرادار بس .. نقطة تانية إن أقصي حاجة إتعرضت ليها Iron Dome كانت صواريخ القسام و دي صواريخ تعبانة خالص يعني و متجربتش قصاد صواريخ حديثة .. Iron Dome دي عاملة بالضبط زي منتخب السعودية بتاع كرة القدم .. جوه أسيا هو منتخب فشيخ من أوائل المنتخبات اللي بتتأهل لكأس العالم و دايماً بيوصل نص نهائي كأس أسيا .. تعالي إنت كده جربه في كأس العالم .. يشيل تمانية صفر من ألمانيا و خمسة صفر من روسيا يخرج من الدور الأول وكان الله بالسر عليم.
المصدر:
مقالة بعنوان As Missiles Fly, a Look at Israel’s Iron Dome Interceptor يعني وسط ما الصواريخ عمالة تطير نظرة لمنظومة صواريخ القبة الحديدية .. نشرت في موقع The Conversation وده لينك المقالة الأصلية:
http://theconversation.com/as-missiles-fly-a-look-at-israels-iron-dome-interceptor-94959
