انا من الناس المقتنعه جدا بان الفلوس هي اهم حاجه في الدنيا خصوصا في الحروب .. عشان تخش حرب و تكسبها فانت اهم سؤال تساله لنفسك هو مش انا عندي كام طياره ولا عندي كام عسكري .. اهم سؤال هو هل انا اقدر اتحمل تكاليف الحرب دي؟ .. عارف ان فيه ناس حتعترض علي كلامي و تقولي ازاي يا عم الحاج فيه حاجات اهم زي العقيده القتاليه او التسليح او التحالفات السياسيه .. انت محتاج تفهم اني مش بقول ان العوامل دي مش مهمه .. انت محتاج تفهم اني بقول الفلوس هي اهم عامل بيحسم قدره اي بلد انها تكسب اي حرب و خليني اثبتلك وجهه نظري باني اخد اشرس حرب اتحاربت في تاريخ البشر الحديث .. الحرب العالميه الثانيه .. الانترنت مليان بابحاث و مقالات و فيديوهات عن معارك الحرب دي .. ازاي بيرل هاربور هي اهم غاره جويه في التاريخ .. ازاي عمليه الانزال البري للامريكان في نورماندي كانت تحفه فنيه في التخطيط و التنفيذ .. ازاي ستالينجراد كانت تجسيد لصلابه اراده العسكري قصاد المحتل الغاشم .. كل ده علي عيني وعلي راسي .. بس برده اللي انا عايز اوصله ليك ان اليابانيين ضربوا بيرل هاربور عشان الفلوس .. الالمان دخلوا روسيا عشان الفلوس .. الانجليز كسبوا معركه بريطانيا بسبب الفلوس .. وخليني ابقي دقيق اكتر واقولك ان اهم عنصر بيخليك تكسب او تخسر اي حرب هو الموارد Resources .. كلمه موارد بتشمل حاجات كتير اوي .. عندك كام فلوس كاش تصرفهم .. عندك كام مصنع و بيصنعولك ايه .. عندك مناجم و ابار بترول و اراضي زراعيه تكفي اكلك و شربك ولا لا .. اول حاجه بتحصل في اي حرب و خصوصا لو بتتكلم عن حرب عالميه هو انك تنسي حاجه اسمها تجاره .. مفيش حاجه اسمها استيراد و تصدير .. لما بتحصل حرب عالميه فانت تقدر تقول You are on your own .. انت حتشيل شيلتك .. فخليني اعيد صياغه كلامي بشكل ادق شويه واقولك ان اليابانيين ضربوا بيرل هاربور بسبب الموارد .. الالمان ضموا النمسا و تشيكوسلوفاكيا و نص بولندا و مضوا اتفاقيه عدم اعتداء مع السوفييت عشان خاطر الموارد .. الانجليز كسبوا معركه بريطانيا عشان خاطر الموارد .. عشان الصوره توضحلك اكتر فانا محتاج معاك اجاوب علي كذا سؤال:
- ايه كان الوضع الاقتصادي للدول اللي دخلت الحرب العالميه الثانيه قبل ما تنضرب اول طلقه في الحرب؟
- ازاي الاقتصاد هو اللي رسم معالم خطط المعارك خصوصا للالمان؟
- ازاي الاقتصاد هو اللي السبب في كل قرارات اليابان علي الاقل في بدايه الحرب؟
- ازاي اميركا قلبت الطرابيزه علي الكل في الحرب العالميه الثانيه .. مش بسبب جيشها انما بسبب اقتصادها؟
خليني ابدا معاك بالسؤال الاول .. اقتصاديا ايه كان وضع الدول اللي دخلت الحرب العالميه الثانيه؟
انا ليه بسال السؤال ده من الاساس؟ .. اهم 3 دول في مرحله ما قبل الحرب العالميه الثانيه تبدأ كانوا بريطانيا و فرنسا و المانيا .. الالمان قبل الحرب ما تبدا يعني بتتكلم ما قبل سنه 1939 كانوا خرجوا مفشوخين من الحرب العالميه الاولي .. خسروا كل جيشهم و كل مستعمراتهم لا و كمان بيدفعوا تعويضات لاوروبا و رغم كل ده سنه 1939 كانت القوات المسلحه الالمانيه بتعيش فتره تحديث و تطوير محصلتش في تاريخ المانيا كله .. كل ده بفلوس .. السلاح ده كله بفلوس .. الالمان جابوا الفلوس دي كلها منين؟ .. الفرنسين من ناحيتهم صرفوا دم قلبهم علي خط ماجينو وده خط دفاعي شبه خط بارليف كده اللي الاسرائيليين بنوه علي طول قناه السويس وده اكيد متكلف فلوس .. الانجليز من ناحيتهم كلفوا جامد علي تطوير قواتهم البحريه .. برده كل ده بفلوس .. عشان تقيم اقتصاديات الدول الثلاثه فانت محتاج تفهم 4 حاجات بالعدد:
- الناتج الوطني الاجمالي Gross Domestic Product او GDP .. ده رقم لما تعرفه تقدر تقيم مدي قوه الاقتصاد .. قد ايه قدره الاقتصاد علي الانتاج .. كل ما الرقم ده زاد كل ما قدره الاقتصاد علي انتاج الدبابات و البنادق و المدافع حتزيد.
- عدد السكان ودي حاجه منطقيه .. كل ما عدد السكان زاد كل ما تعداد القوات المسلحه حيزيد .. لما البلد تخش حرب فهل عدد السكان حيكفي ان حبه منهم يروحوا يشتغلوا في المصانع الحربيه و الباقي يروح يزرع عشان يوفر الاكل للناس اللي بتحارب و للي شغالين في المصانع؟ .. كل ما سنين الحرب زادت كل ما عدد السكان بيبان انه حاجه مهمه فشخ في حسم هل البلد تقدر تكسب الحرب او لا.
- حاجه اسمها Territorial Extent اللي هي مساحه البلد و في نفس الوقت هي البلد فيها موارد تكفيها او لا .. هل عندها ابار بترول تكفي استهلاكها وقت الحرب؟ هل مساحتك صغيره لدرجه ان لو البلد اللي بتحاربها خدت حته منها فانت لازم تستلم؟ هل انت برده بلدك مساحتها كبيره لدرجه انك متبقاش عارف تدافع عنها ازاي؟
- دخل الفرد او Per Capita Income .. كل ما دخل الفرد زاد كل ما اقتصاد البلد بقي اقوي .. كل ما اقتصاد البلد زاد كل ما قدره البلد علي احتمال ضغط الحرب بيزيد .. انتي بلد قويه لدرجه اني لو دمرتلك مثلا مدينه صناعيه فانتي عندك غيرها كتير .. كل ما اقتصاد البلد بقي اقوي كل ما بقي عندها مهندسين و علماء يقدروا يطوروا افكار او يصنعوا منتجات بديله لموارد طبيعيه زي مثلا المطاط الصناعي .. كل ما اقتصاد البلد بقي اقوي كل ما شبكه الطرق الداخليه بقت احسن .. ده فعليا اهم حاجه في الاربع حاجات اللي بتخليك تحكم علي اي اقتصاد لان بسببه الصين انهارت في الحرب العالميه الثانيه لان دخل الفرد قليل و بالتالي اقتصادها علي قد حاله .. ده كان السبب في ان ايطاليا استسلمت بدري اوي عن المانيا .. ده كان السبب ان السوفييت قدروا يقلبوا الطرابيزه علي الالمان.
كده انت بعد ما فهمت انا لما حقارن بين اقتصاد المانيا و فرنسا و انجلترا فانا حعمل كده علي اساس ايه فدلوقتي يلا نقارن:
- انجلترا: عدد سكانها 47.5 مليون بني ادم .. الناس دي عايشه علي مساحه 245,000 كيلومتر مربع .. بينتجوا GDP بيتقدر بحوالي 248 مليار دولار .. دخل للفرد بيوصل 5,983 دولار في السنه .. مش بس كده .. زود عليهم مستعمرات انجلترا حول العالم .. عدد سكان حينط يبقي 483.8 مليون بني ادم عايشين علي مساحه فشيخه 34,170,000 كيلومتر مربع .. الامبراطوريه البريطانيه كلها علي بعضها شاكب راكب بنتنتح GDP بيتقدر بحوالي 391 مليار دولار .. ورغم كل ده دخل للفرد بيوصل 663 دولار .. خدت بالك ان دخل الفرد اللي قلتلك انه اهم عنصر لتقييم اقتصاد البلد لما تيجي تبص للامبراطوريه البريطانيه كلها علي بعض تلاقيه بيقع ازاي.
- المانيا: عدد سكانها 68.6 مليون بني ادم عايشيت علي مساحه 470,000 كيلومتر مربع .. بينتجوا GDP بيتقدر بحوالي 351.4 مليار دولار .. دخل للفرد بيوصل 5,126 دولار في السنه.
- فرنسا: عدد سكانها 42 مليون بني ادم .. علي مساحه 551,000 كيلومتر مربع .. بينتجوا GDP بيتقدر بحوالي 185.6 مليار دولار .. دخل للفرد بيوصل 4,424 دولار في السنه.
انا فاهم والله ان غالبا مخك ساح من كتر الارقام و شويه و حتقفل المقاله و متكملهاش بس خليني افهمك انا معني الارقام دي كلها .. الارقام دي بتقولك ان المانيا كانت لازم تحسم الحرب بدري .. اقتصاد المانيا قوي بس مش حيستحمل يقف قصاد اقتصاد الامبراطوريه البريطانيه كلها .. في نفس الوقت الامبراطوريه البريطانيه اهم عامل في اقتصادها اللي هو دخل الفرد كان واقع فده معناه ان المستعمرات البريطانيه المتوزعه في كل حته في العالم اقتصاديا مش حتستحمل تخش حرب وهنا يجي دور الاقتصاد .. الاقتصاد في الحرب العالميه الثانيه مكنش مجرد ارقام و رسومات بيانيه .. الاقتصاد هو اللي قال لقياده المسلحه الالمانيه تحارب ازاي و تحارب مين و امتي.
ازاي الاقتصاد هو اللي رسم معالم خطط المعارك خصوصا للالمان؟
استراتيجيه الالمان في الحرب كانت حاجه اتسمت بليتز كريج Blitz Krieg ودي كلمه المانيه معناه الحرب الخاطفه ومن اسمها فهي باين انها اسلوب جديد في المعارك بيعتمد علي انك بسرعه اوي تضرب العدو بتاعك و تشل حركته لان مش من مصلحتك ان المعركه وقتها يفضل يطول .. الفكره اساسا جت للالمان بسبب الاقتصاد .. الالمان حسبوا الحسبه اللي انا حسبتها قدامك و لقوا ان املهم الوحيد عشان يهزموا بريطانيا هو الوقت .. في وقت قليل انت محتاج تضرب الانجليز و الفرنسيين ضربات توجعهم و تجبرهم علي الاستسلام قبل ما هم يفهموا هو فيه ايه او ايه اللي حصل .. في نفس الوقت الالمان فهموا ان الامبراطوريه البريطانيه رغم انها واسعه فشخ و عدد سكانها كتير فشخ و مواردها كتير فشخ بس لما تيجي تتكلم عن اهم عنصر اللي هو دخل الفرد تلاقيها امبراطوريه اقتصاديا تعبانه اوي .. ده معناه ان رغم الهند مثلا تحت سيطره الانجليز و رغم ان الهند فيها بشر كتير عايشين فيها بس انت متقدرش تستخدم العدد ده كله في الحرب .. ليه؟ .. عشان انت معكش تكاليف تسليحه و اكله و شربه و ذخيرته و انتقالاته .. اللي الالمان فهموه كويس هو انهم لو محققوش اكبر قدر ممكن من المكاسب في اسرع وقت ولو مسيطروش علي اكبر كم من الموارد خلال السنه الاولي من الحرب فالمانيا معندهاش امل تخرج منتصره ومن هنا اتولدت استراتيجيه Blitz Krieg.
الالمان فهموا ان خلال الشهور الاولي من الحرب مخزونهم من الالمونيوم و الحديد و البترول حيخلص ومن هنا اتولدت فكره اتفاقيه مولوتوف- ريبينتروب Molotov-Ribbentrop Pact ودي الاتفاقيه اللي مضتها المانيا مع الاتحاد السوفيتي قبل الحرب .. ناس كتير لما بتجيب سيره الاتفاقيه دي قدامها كل اللي بتفكر فيه ان دي اتفاقيه عدم الاعتداء اللي امنت ظهر المانيا في السنين الاولي من الحرب و اللي خلتهم متؤكدين ان وهم بيدوسوا علي وش فرنسا فالسوفييت مش حيضربوهم في ظهرهم .. ناس تانيه كل ما تجيب سيره الاتفاقيه دي قدامهم يجي في دماغهم خطه تقسيم بولندا بين المانيا و روسيا .. بس الاتفاقيه دي اتكتب فيها بالتفصيل الممل ازاي الاتحاد السوفيتي حيوفر كل احتياجات المانيا من البترول .. بسبب الالمونيوم الالمان قرروا غزو النرويج اللي مش بس فيها مصانع المونيوم بس كمان فتحت سكه ليهم انهم يبقوا جيران السويد اللي كانت اكتر بلد بتصدر حديد لالمانيا .. حتي قرار الالمان غزو فرنسا كان سببه الاقتصاد .. فرنسا بلد تعتبر من اكثر دول اوروبا اللي فيها ارض زراعيه خصبه و الاراضي الزراعيه دي كلها هي اللي حتاكل جيوش الرايخ الثالث .. اللي انا عايز اوريهولك ان اختيارات المانيا في الدول اللي تغزوها و الدول اللي تمضي معاها اتفاقات كان مبني اولا و اخيرا علي الموارد .. انا محتاج ايه و ايه البلد اللي عندها موارد انا عايزها فيا احتلها يا امضي معاها اتفاقيه .. من اول سنه 1939 لحد سنه 1941 و ده كان الاساس اللي المانيا ماشيه عليه .. المشكله كانت في البترول .. صحيح الالمان ماضيين اتفاقيه مع السوفييت .. صحيح المانيا سيطرت علي رومانيا و حقول النفط الرومانيه بقت تحت سيطرتهم .. بس كل ده مش مكفي .. استهلاك المجهود الحربي من البترول طلع ازيد ب25% من توقع الالمان قبل الحرب .. طب والحل؟ .. فيه جنرالات جوه قياده القوات المسلحه الالمانيه قالوا طب ما احنا لينا قوات في شمال افريقيا .. ليبيا فيها بترول .. الجزائر فيها بترول .. بس (هتلر) اصر علي غزو الاتحاد السوفيتي .. يمكن عشان روسيا عايش فيها يهود كتير .. يمكن عشان هو كان بيكره الشيوعيين .. بس لما الدنيا خربت بعد معركه ستالينجراد الالمان حاولوا يعوضوا احتياجاتهم من البترول بانهم ياخدوا بترول من شمال افريقيا بس في المرحله دي من الحرب كان اغلب احتياطي المانيا من البترول استهلك في الجبهه السوفيتيه و اللي فعلا قتل اي امل لالمانيا انها تعمل الريمونتادا علي السوفييت هو ان مكنش فيه بنزين.
ازاي الاقتصاد هو اللي السبب في كل قرارات اليابان علي الاقل في بدايه الحرب؟
نفس الحسبه دي هي هي اليابانيين لقوا نفسهم قدامها .. توسع اليابان في المحيط الهاديء محتاج موارد بس اي توسع حيخلي الامريكان يتخانقوا مع اليابانيين .. طب ايه المشكله؟ .. المشكله ان اكبر شريك تجاري لليابان حزر فزر هو مين .. صح اميركا .. ده خلي اليابانيين قصاد مشكله زي بتاعه هو مين جه الاول الفرخه ولا الكتكوت .. نتوسع في المحيط الهاديء و نبقي دخلنا في خناقه مع الامريكان .. ولا منتوسعش في المحيط الهاديء اصلا و نتفادي خناقه مع الامريكان .. دي كانت الخناقه اللي قسمت قياده القوات المسلحه اليابانيه نصين:
- القوات البريه كانت مع استراتيجيه سموها هوكوشين-رون Hokushin-Ron ودي كانت ليه نروح المحيط الهاديء و نتخانق مع الامريكان لما احنا ممكن نشق طريقنا جوه الصين لحد ما نوصل لسيبيريا .. وجهه نظر القوات البريه كانت انهم اولا يقدروا من سيطرتهم علي سيبيريا ياخدوا خير حقول البترول اللي فيها .. كمان حيقدروا يعجزوا الاتحاد السوفيتي انه يفكر حتي يهاجم اليابان وده كان كابوس اليابان فضلت خايفه منه طول الحرب .. الاهم زي ما قلتلك اننا بكده مش حنزعل الامريكان و حنفضل معاهم حبايب.
- القوات البحريه كانت واقفه مع استراتيجيه سموها نانشين-رون Nanshin-Ron ودي كانت احنا نتوسع في جزر المحيط الهاديء ولما يجي دور اميركا حنخلص منها عادي جدا.
في بدايه الحرب العالميه الثانيه اليابان جربت تمشي بدماغ القوات البريه و طبقوا هوكوشين-رون و احتلوا الصين و بداوا يدخلوا منغوليا عشان في الاخر يوصلوا لسيبريا بس الاتحاد السوفيتي قدر يصد الهجوم الياباني .. اكتر من 100,000 عسكري ياباني اترموا علي الجبهه و كتير منهم مرجعوش .. عجز اليابان انها تكسر اراده السوفييت خلاها ترمي هوكوشين-رون في الزباله و تبدا تطبق نانشين-رون .. تاني .. زي ما الالمان فهموا ان الحرب العالميه الثانيه هي سباق سرعه ضد الوقت فبرده اليابان فهمت ده كويس اوي .. من الايام الاولي للحرب و حكومات اميركا و بريطانيا و الصين و هولندا قطعت علاقاتها التجاريه مع اليابان .. ده كان معناه ان خلال الشهور الاولي من الحرب لازم اليابان تسيطر علي اكبر عدد ممكن من الجزر في المحيط الهاديء ومش بس كده .. ينقوا الجزر اللي فيها اكبر قدر من الموارد الطبيعيه زي المعادن و البترول عشان يوفروا احتياجات اليابان من البترول بمجرد ما اميركا تدخل الحرب وده حيحصل اجلا ام عاجلا .. قائد القوات البحريه اليابانيه (ياماموتو Yamamoto) واللي حكيت ازاي الامريكان اغتالوه في مقاله قبل كده كان وصل لاستنتاج ان خلال 6 شهور من دخول اميركا الحرب هو يقدر يحقق انتصارات متتاليه ومحدش حيقدر يقف قدامه بس لو ال6 شهور دول عدوا و اليابان مأجبرتش اميركا علي الاستسلام فاليابان حتخسر الحرب .. اليابانيين حسبوها بالورقه و القلم .. اكبر تهديد لتوسع اليابان كان الصين .. الصين كعدد بني ادمين اكتر بكتير من اليابان .. الصين كGDP اعلي بكتير من اليابان .. بس تاني متنساش اهم عنصر .. دخل الفرد .. دخل الفرد في اليابان عالي فشخ عن الصين وبالتالي اي حرب تقليديه بين الاتنين فاليابان حتكسبها بس اي محاوله من اليابان لاحتلال الصين حتفرفع في وشهم.
لحد دلوقتي انا مجبتش سيره اميركا و اظن جه الوقت .. غالبا الافلام بتاعه هوليوود لما بتيجي تتكلم عن الحرب العالميه الثانيه سواء بتتكلم عن Saving Private Ryan او Hacksaw Ridge بتشوفها بتوريك ازاي العسكري الامريكاني الشجاع اللي ضد كل الظروف بيقدر يرفع علم الديموقراطيه و الحريه مرفرفا عاليا فوق حطام الديكتاتوريه .. اللي الافلام بتوريهولك هو الوش الثاني من الشريط .. الوش الاولاني ده اللي انت محتاج تفهمه و اللي بيبدأ بانك تتعرف علي حاجه انت غالبا مسمعتش عنها قبل كده .. سياسه سلف و اجر Lend-Lease.
تطلع ايه بقي سياسه سلف و اجر دي اللي خلت اميركا تقلب الطرابيزه علي الكل؟
في الثلاثينات الكونجرس الاميريكي اقر قانون اسمه قانون الحياد Neutrality Act .. القانون ده مش بس قال ان لو حصلت اي حرب في اي حته في العالم فاميركا ان مش حتتدخل .. القانون قال كمان ان اميركا مش حتبيع سلاح اي طرف من الطرفين .. سنه 1938 رئيس اميركا وقتها (فرانكلين ديلانو روزفلت Franklin D. Roosevelt) و الرجل ده شاف ازاي الالمان بلعوا تشيكوسلوفاكيا و كان شويه و حيترجي الكونجرس انهم يعطلوا العمل بقانون الحياد و اتعمل تصويت و الكونجرس باغلبيه ساحقه رفض .. منطقهم كان ملناش دعوه يا (محيي) .. شويه و الالمان و السوفييت قسموا بولندا بينهم .. ساعتها بس الكونجرس يوم 5 نوفمبر 1939 وافق علي تفعيل فقره في قانون الحياد اسمها Cash and Carry اللي ادفع و تعالي استلم .. بمعني ان القانون ده بيسمح لاميركا انها مثلا تدي بريطانيا شحنه دبابات بس علي شرط .. بريطانيا تدفع كاش و مش بس كده .. سفن بريطانيه هي اللي تيجي لحد اميركا تشيل شحنه الدبابات و تتوكل بيها ع الله لبلدها .. الفكره ان مفيش سفينه شايله علم اميركا تخش ميدان معركه .. في الاول سياسه Cash and Carry كانت ماشيه بس مع الوقت الانجليز اتفشخوا .. فرنسا وقعت في 1941 .. معركه الدفاع عن بريطانيا فلست الميزانيه .. جبهه شمال افريقيا ضد الالمان كانت حوت فلوس .. فعليا الانجليز مبقاش معاهم فلوس يدفعوها للامريكان عشان يشتروا بيها سلاح وحتي اسطولهم مبقاش فيه سفن فاضيه انها تروح اميركا تشيل السلاح ده و ترجع.
(روزفلت) رئيس اميركا وقتها مضي اتفاقيه مع الانجليز سنه 1941 بحيث ان اميركا تسلف انجلترا سفن عشان تشيل السلاح في مقابل ان انجلترا تتنازل عن شويه مستعمرات ليها حول العالم لاميركا .. الاتفاقيه دي فعليا كانت اخر حاجه يقدر (روزفلت) يقدمها للانجليز لان قانون الحياد مكتفه .. حتي لما المعارضه في الكونجرس اتكلمت كان رد (روزفلت) ان انا مش بدي السلاح و السفن لانجلترا ببلاش انا في مقابلها باخد منهم مستعمراتهم .. مهم تكون فاهم ان وقتها مكنش فيه حد في اميركا كلها مقتنع بان الانجليز حيقدروا يصمدوا قدام الالمان .. لما (روزفلت) حاول يقنع حكومته و مساعدينه بانه لازم يلغي قانون الحياد قالوله وليه ترمي نفسك في معركه خسرانه .. انت احتمال بكره الصبح تسمع خبر استسلام بريطانيا .. اللي حصل بعدها لا كان علي الخاطر ولا كان في النيه .. الانجليز كسبوا معركه بريطانيا .. الالمان رموا من دماغهم فكره احتلال بريطانيا .. هنا الامريكان لقوا نفسهم مضطرين يلاقوا حاجه يساعدوا بيها الانجليز علي المدي الطويل و من هنا جت فكره سياسه سلف و اجر.
الفكره بسيطه .. المصانع الحربيه الاميريكيه حتصنع كل اللي الجيوش الانجليزيه و السوفيتيه و الفرنسيه محتاجاه .. سلاح .. ذخيره .. مطاط .. ادويه .. اكل .. شرب .. هدوم .. عربيات .. اكتر من 2000 عفريته قطر و 11,000 عربيه قطر .. كابلات تليفون .. حنحط البضاعه دي كلها في صناديق و نوصلها ليهم .. بعد الحرب ما تخلص ان شاء الله المفروض انهم حيرجعوا للامريكان كل البضاعه دي تاني .. طبعا البضاعه دي مش حترجع وده طبيعي .. بس حاول تفهم السياسه دي بمنتهي البساطه قالت للانجليز و الفرنساويين و السوفييت و البولنديين ارموا عيالكوا في الحرب يموتوا بس تسليحهم و اكلهم و شربهم و ذخيرتهم علينا .. السياسه دي فعليا هي اللي انقذت اقتصاد اميركا من الكساد .. السياسه دي حولت اميركا لاكبر كيان اقتصادي في العالم ومش بس اقتصاديا علميا كمان .. خليني اديلك مثال بسيط اوي علي ده اللي هو المطاط .. لحد بدايه الحرب العالميه الثانيه كان اكتر من 90% من الانتاج العالمي للمطاط الطبيعي بيجي من جزر في المحيط الهاديء اللي هي بقت وقتها تحت سيطره اليابان .. الامريكان حلوا المصيبه دي بانهم اخترعوا المطاط الصناعي .. ناس كتير فاكره مقوله الادميرال (ياماموتو) بعد غاره بيرل هاربور لما قال اننا صحينا وحش كان نايم .. الحقيقه ان (ياماموتو) كان غلطان .. الوحش كان صاحي من بدري بس مكنش مركز .. لما اميركا قررت تخش الحرب كانت مصانعها فعلا بتنتج سلاح بكميات لا المانيا ولا اليابان كانوا يقدروها ينافسوها .. الحرب العالميه الثانيه بدأت عشان الاقتصاد و اللي اتحكم فيها الاقتصاد و اللي حسمها كان الاقتصاد.
المصادر:
سلسله فيديوهات علي YouTube بعنوان WW2: The Resource War وده لينكهم:
https://www.youtube.com/watch?v=NYv-GC8DgMk&list=PLhyKYa0YJ_5BNTUc1fwlXFuodoGo_u6TH&index=114
https://www.youtube.com/watch?v=N5PTeDe4jTQ&list=PLhyKYa0YJ_5BNTUc1fwlXFuodoGo_u6TH&index=115
https://www.youtube.com/watch?v=OvDsvHNvVZw&list=PLhyKYa0YJ_5BNTUc1fwlXFuodoGo_u6TH&index=116
