الصين .. وتلك الأيام نداولها بين الناس.

لينك التسجيل الصوتي علي ساوند كلاود:
https://on.soundcloud.com/FaWDp

فيه في حياتنا اليومية اليومين دول بالذات شوية ثوابت صعب يتغيروا .. من ضمنها مثلاً إنك حتفطر فول من علي عربية الفول اللي أول شارع الشغل رغم إنك كل يوم بتقول إنك النهاردة حتغير وحتقضيها عيش وجبنة عشان تريح قولونك شوية من الفول .. من ضمنها برده إن الأهلي حياخد الدوري .. بس يمكن الثابت اللي أنا عايز أتكلم عنه النهاردة إنك لو مشيت في الشارع بنسبة كبيرة حتلاقي ناس كتير شايفه إن المستقبل صيني .. فيه شبه إجماع إن كمان كام سنة الصين حتبقي هي القوة العظمي الأولي في العالم .. النهاردة أنا عايز أحاول أجاوب علي سؤالين الأولاني مفهوم والتاني انت حتستغربه جداً:

• هي الناس اللي بتقول الصين حتبقي النامبر وان في العالم جابت الكلام ده منين؟
• ليه أنا بقول إن الناس دي غلطانة وإن الصين حتقع علي جدور رقبتها قريب؟

ليه الصين حتبقي النامبر وان؟

الأرقام لوحدها مرعبة .. في الاقتصاد فيه حاجة بتتسمي الناتج الوطني الإجمالي Gross Domestic Product واللي بيسموه GDP والبتاع ده عشان تفهمه تخيل إن بلد جابت كل الفلوس اللي بتخشلها كل سنة من الضرايب والتصدير وبيع الخدمات وأي مورد اقتصادي ربنا خلقه فيها والرقم ده بيتسمي الناتج الوطني الإجمالي قبل بقي ما تشيل منه مصاريفك ومرتبات موظفينك وميزانيتك العسكرية وكل النكد ده .. المهم إن من سنة 1978 لحد دلوقتي الGDP بتاع الصين زاد 400% .. انت متخيل يا مان؟ .. الصين عندها أكبر احتياطي نقدي في العالم .. عندها أكبر قوات بحرية من حيث عدد القطع البحرية علي مستوي العالم .. بس دي الصين اللي انت عارفها دلوقتي .. دي الصين اللي انت اتولدت لقيتها في وشك بس محدش حكالك عن الصين مش حقولك من زمان بس علي الأقل الفترة اللي قبل ما الزهر يلعب معاها.

طول عمر لعنة الصين هي موقعها الجغرافي .. بسبب مكانها فكل من هب ودب بيجي يلطشها كفين ويمشي .. تاريخ الصين الحديث من أول حرب الأفيون الأولي سنة 1839 لحد نهاية الحرب الأهلية سنة 1949 وهو مجرد سلسلة مش بتخلص من الدم والفقر والسرقة المستمرة لثرواتها من الاستعمار الخارجي اللي هو مرة بريطانيا ومرة اليابان .. حتي لما الصين توحدت لأول مرة من سنين سنة 1949 لقت نفسها لا الأمريكان عايزين يتكلموا معاها ولا السوفييت عايزين يسلموا عليهم .. فضل الحال زي الزفت كده لحد سنة 1971 لما العلاقات الصينية الأميريكية رجعت لمجاريها وقت ما اللي كان (ريتشارد نيكسون Richard Nixon) بيحكم أميركا.

مش عايزك تاخد كلامي إني بقول إن أميركا هي اللي عملت الصين لإن ده مش حقيقي بس خلينا نتفق أنا و انت إن بعد سنين من الحرب والدم والعُزلة الصين بقي ليها صاحب والصاحب ده كان قوة عظمي قدرت تحميها من الإتحاد السوفيتي وخدتها من إيدها حطتها علي أول الطريق خصوصاً لو حطيت في اعتبارك التوقيت .. بداية من 1971 لحد 2007 حجم التجارة العالمية نط 600% بس برده أرجع وأقولك إن صحيح أميركا هي اللي حطت الصين علي عتبة إنها تبقي دولة فشيخة بس الصين هي اللي عدت من الباب لوحدها ودي حاجة انت محتاج تكون مستوعبها كويس أوي خصوصاً إن فيه شوية نقاط أو قرارات اتعملوا وقتها هم كانوا الأساس اللي المعجزة الاقتصادية الصينية اتبنت عليها:

• أول حاجة كان قرار الحزب الشيوعي الصيني إنهم يحطوا سقف لفترة حكم رئيس الحزب .. القرار ده سببه أو خليني أقول جه من فكرة إن الرئيس الأمريكي مثلاً أخره هو فترتين رئاسيتين وبعد كده لازم يمشي .. الفكرة في التجديد .. انت عايز كل فترة دم جديد وفكر جديد يجي يحكم البلد.
• الحزب ساب الولايات بتاعته إنها تسيب الناس تفتح البيزنس بتاعها براحتها .. كان زمان الحزب بيقولك تشتغل إيه وتبيع إيه ولمين وبسعر إيه .. ده بدأ يختلف وبسبب كده فالفلوس جريت في إيد المواطن الصيني البسيط.
• مش بس المواطن الغلبان اللي اتقاله افتح البيزنس بتاعك براحتك لإن كمان اتفتحت مناطق حرة كتير في حتت مختلفة من الصين والمناطق الحرة دي جت فيها شركات أجنبية عملت مصانع وفتحت شغل .. سنة 2001 الصين انضمت لمنظمة التجارة العالمية وقبل ما تنضم هي عملت عمرة كاملة لنظام الضرائب.
• بس يمكن أهم عامل هي إن بسبب الحروب الكتير والمجاعة والناس الكتير اللي ماتت في الحروب دي في الصين قبل انفتحاها علي العالم سنة 1971 فالحكومة الصينية كانت بتشجع الستات تخلف .. في 30 سنة بس تعداد سكان الصين زاد 80% وعشان كده لما الدنيا اتفتحت والشركات الأجنبية جت الصين وحبت تفتح مصانع فيها هم لقوا مجتمع فيه حاجة غريبة جداً وهي إن قصاد كل مواطن علي المعاش فيه 10 شباب في سن العمل .. دي نسبة خزعبلية لإن في أغلب الدول الصناعية النسبة هي إن كل مواطن علي المعاش قصاده 5 شباب في سن العمل .. ده خلي إن في التسعينات مفيش بلد في العالم عندها القدرة إنها تنافس الصين.

ليه الصين مصيرها حيبقي مصير التيلفون الأرضي؟

عشان تفهم ليه أنا بقول إن الصين مش حتبقي القوة العظمي في العالم خليني أوريك ده بإني أقولك فاكر الأربع نقاط اللي أنا رصيتهم ليك باعتبارهم الأسباب اللي خلت الصين تنط النطة الفشيخة دي؟ اتفرج عليا وأنا بعكسهملك دلوقتي:

• فاكر قرار الحزب الشيوعي إنهم يحطوا سقف لفترات حكم رئيس الحزب؟ .. أهو القرار ده لغاه الرئيس الصيني (جي جينبينج Xi Jinping) عشان يرجع الصين تاني للمربع الأولاني خالص زي ما يكون بيلعب السلم والثعبان بس بمصير بلد.
• فاكر لما قلتلك إن الحزب ساب الناس تشتغل في البيزنس اللي هم عايزينه طالما بيجيبوا فلوس؟ .. أهو بسبب إن البلد كلها مبقتش بتفكر في حاجة غير إنها تجيب فلوس فده كان له نتائج كارثية علي البيئة .. 50% من أنهار الصين جفت و 60% من المياه الجوفية بتاعتهم حسب التقديرات الحكومية بقت غير صالحة للاستهلاك الأدمي بسبب التلوث .. 40% من الأراضي الزراعية الصينية باظت بسبب سوء الاستخدام وده خلي الصين بقت أكبر مستورد للمحاصيل الزراعية علي مستوي العالم .. بسبب التلوث ده فالحكومة الصينية لقت نفسها محتاجة تصرف 3 أضعاف اللي كانت بتصرفه كاستثمارات مباشرة عشان تحقق نسبة نمو 1% زيادة.
• فاكر لما قلتلك إن عشان الحكومة كانت بتشجع الستات تخلف وعدد السكان زاد فده ساعد علي إن الصين تلاقي ناس تشتغل وتحقق نسب النمو الخزعبلية اللي هم عملوها دي؟ أهو في أواخر السبعينات الصين طبقت سياسة الطفل الواحد واللي بسببها فخلال الفترة من 2020-2035 الصين حتخسر 70 مليون شاب في سن العمل وحتلاقي نفسها مسئولة عن 130 مليون مواطن علي المعاش .. انت متخيل ده معناه إيه؟ .. معناه إن الصين خسرت قد تعداد سكان فرنسا من الشباب اللي كان ممكن يشتغلوا ويدفعوا ضرايب ويستهلكوا بضاعة قصاد إنها اتحط علي كتافها مسئولية رعاية ناس عددها قد تعداد سكان اليابان .. كل ده خلال 15 سنة بس .. علي فكرة السواد مخلصش .. خلال الفترة من 2035-2050 الصين حتخسر 105 مليون شاب في سن العمل قصاد إنها حيترمي عليها حمل 64 مليون مواطن علي المعاش.

لما وصفت قبل كده إن سياسة الطفل الواحد في الصين إنها لبست جيل كامل في الحيط أنا مكنتش ببالغ .. حالياً الإنفاق الحكومي الصيني بيستهلك تقريباً 30% من الGDP بتاع البلد .. جميل .. حاول تستوعب إن سنة 2050 فاتورة رعاية المواطنين اللي علي المعاش لوحدهم حتوصل 30% من GDP يعني كمان 30 سنة الصين حتصرف معاشات ورعاية صحية للمواطنين فوق الستين سنة قد اللي هي بتصرفه دلوقتي علي البلد كلها بتعليمها وتسليحها وعلاجها ومرتباتها.

زي ما قلتلك إن الأرقام لوحدها مرعبة لما وصفت ليه الصين حتبقي النامبر وان فبرده الأرقام لوحدها مرعبة لما تيجي تتكلم عن ليه الصين حيتخرب بيتها .. سنة 2007 معدل النمو في GDP بتاع الصين كان 15% .. عارف سنة 2019 النسبة دي بقت كام؟ 6% بس .. متنساش إن ده في مرحلة ما قبل Covid-19 اللي خلي نسبة النمو بتاع GDP وصلت 2% .. هي المشكلة الحقيقة إن فيه ناس شايفة حتي إن معدلات النمو دي فيها مشكلة لإن السبب فيها مش إن الشركات الصينية بتجيب فلوس قد ما السبب فيها إن الحكومة الصينية شايفه الدنيا بتقع فبتضخ فلوس في السوق .. أصحاب الرأي ده بيقولوا إنك لو بصيت علي نسب الزيادة في الإنتاج بتاعة الصين ما بين 2010-2019 حتلاقيها قلت 10% وده رقم مرعب لسبب لإن دي نفس النسبة اللي عاشها الإتحاد السوفيتي في الثمانينات قبل انهياره.

مسلسل الرعب بتاع الأرقام لسه مخلصش .. إذا كانت الصين عندها مشكلة إن تعداد سكانها من الشباب بيقل قصاد إن العواجيز بيكتروا تلاقي إن دي بلد بانية 50 مدينة سكنية بس محدش عايش فيها .. عشان الخمسين مدينة دول يتبنوا فأكيد اتعملهم شبكة طرق ومواصلات ومترو وليلة كبيرة أوي وعشان الخمسين مدينة دول مش مسكونين فالكلام دلوقتي علي إن حوالي تلتين مشاريع البنية التحتية اللي اتعملت في الصين في العشرين سنة الأخيرة مش حيجيبوا ثمنهم .. وعشان الاقتصاد زيه زي جسم البني أدم ربنا خلقه لو فيه حتة منه تعبت فبتلاقيها بتسمع في كذا حتة كمان فعشان أصل المصيبة هي سياسة الطفل الواحد وعشان البلد بقالها فترة بتعاني إن عدد اللي بيشتغلوا بيقلوا وإن الناس دي اتبنالها مدن عمرها ما حتتسكن فده بيترجم في الأخر في إن الدين اللي علي البلد وصل لمعدلات محدش عارف يستوعبها مش بقولك يحلها .. خلال الفترة من 2008-2019 الدين في الصين زاد 800% .. ده انت شفته في الخبر بتاع انهيار شركة الاستثمارات العقارية الصينية ايفيرجراند Evergrande وصدقني لو قلتلك إن الشركة دي مش حتكون الأخيرة اللي تقع في الصين في السنين الجايه.

ده حيوديني للكلام علي أهم شخصية في المولد ده كله .. (جي جينبينج) .. ده رجل ديكتاتور زي ما كتاب كيف تكون ديكتاتورا وتودي بلدك في ستين داهية بيقول .. رجل مش فارق معاه البلد تولع طالما أنا أهم بني أدم فيها .. مشكلتي معاه في كذا نقطة .. مبدأياً أنا مش صيني ولا بعرف أتكلم صيني عشان أقول رأيي في الشأن الداخلي الصيني بس أي حد فاهم يعني إيه اقتصاد عارف إن الاقتصاد بيقوم علي كتاف الشركات الصغيرة أو Small Businesses اللي هي Startups لو انت من العيال الكول اللي بتحب تقعد في ستارباكس وهي فاتحة اللابتوب بتاعها .. دلوقتي بسبب السياسة الغشيمة بتاعة مكافحة الفساد اللي هو عملها فالبنوك بقت بتخاف تدي فلوس للشركات الصغيرة علي شكل قروض وبقت بس بتديها للشركات الحكومية الكبيرة لإن محدش عايز يبان أو يتجاب رجله في قضية فساد .. ده قصاد إن الحكومة الصينية دلوقتي وأنا مش بهزر علي فكرة بقت بتفرض علي الشباب عدد ساعات معين يقضوها علي سوشيال ميديا .. النوع ده مش حقول من السيطرة إنما الهوس بالتحكم في عقول الناس مش هو المناخ الصح اللي يخلي بلد بحجم الصين تهرب من المصيبة اللي هي رايحالها بالقطر.

يمكن مشكلتي مع (جي جينبينج) إنه عامل زي شخصية (مسعود) اللي جسدها الممثل (سمير غانم) الله يرحمه في مسرحية المتزوجون لما جيه يضبط الكمام بتاعة البدلة البنطلون ضرب .. هو عنده مشكلة كبيرة بس هو عارف إنه مش حيعرف يحلها لإنه هو السبب فيها فيقوم يعمل إيه؟ يحط مزيل عرق .. هو شايف إن حل أي مشكلة إنه يصرف فلوس علي أي حاجة بتتحط تحت مظلة البحث والتطوير Research & Development اللي هي R&D .. ده يفسرلك ليه ميزانية الإنفاق الحكومي الصيني علي R&D زادت 600% من سنة 2006 لحد دلوقتي وصدقني الأرقام دي حقيقية مش أخطاء إملائية بس في نفس الوقت محدش عايز يصدق إن كل الصرف ده مش حيجيب نتيجة بسبب الخوف .. أرجعك تاني للحملة اللي في رأيي إنها قمعية لمكافحة الفساد اللي عيشت البلد كلها في حالة رعب .. البنوك مبقتش بتسلف فلوس لStartups اللي هم المحرك الأساسي لR&D في أي إقتصاد .. طول ما انت بترمي فلوسك علي عتبة باب الشركات الحكومية فانت مش حتوصل لحاجة جديدة .. ده السبب في إن رغم الحكومة الصينية عايزة تدوس جامد في سكة تصنيع Microchips وصرفت مليارات إلا إنها موصلتش لحاجة .. ليه؟ .. عشان هي لسه بتستورد 80% من المكونات الأساسية لأي Microchip .. ليه؟ .. عشان الStartups اللي هم أكتر ناس مؤهلة إنها تحقق حاجة في المجال ده مش عارفه تشتغل .. يا مؤمن حتي المصل بتاع Covid-19 الصيني مستواه أضعف بكتير من الأمصال اللي نزلت في دول أوروبا وأميركا.

اللي أنا عايز أقوله إن يمكن اللي بيؤيد كلامي إن عادة في تاريخ البشر الإمبراطوريات بتعرف تتعامل بشوية حكمة مع المشاكل اللي بتواجهها طول ما الإمبراطورية مستقرة وشايفه إنها مسيطرة علي الوضع .. أول ما بتشوف إن الفلوس بدأت تقل وإن الدنيا بدأت تقع منها بتلاقي الإمبراطوريات أعصابها  بتفلت علي أقل مشكلة .. تايوان مثال صارخ علي ده .. الصين بقالها سنين ساكتة إشمعني اليومين دول بالذات اللي التوتر بينها وبين تايوان زاد أوي كده .. شوية وحتلاقي ملف التيبيت إتفتح .. شوية وحتلاقي اليابان شدت مع الصين .. ليه كل ده؟ عشان الحكومة الصينية مش غبية هي حاسة بالخطر وعايزة توري العالم كله التنين الصيني يقدر يعمل إيه لما يتنرفز.

المصدر:

• مقالة بعنوان The End of China’s Rise نشرت في مجلة Foreign Policy وده لينك المقالة الأصلية:
  https://www.foreignaffairs.com/articles/china/2021-10-01/end-chinas-rise