لو أنا جيت سألتك إزاي تحكم علي حد إذا كان غني أو لا فأغلب الناس حتجاوب بإنك تشوف مرتبه .. لو والله مرتبه عالي يبقي ده شخص غني .. المرتب الكبير معناه إنك تقدر تشتري حاجات كتير .. اللي بيمشي علي الأفراد بيمشي علي الدول .. يعني برده عشان تعرف هل دولة ما غنية أو لا فإنت بتبص علي مرتبها اللي هو ترجمته في الإقتصاد حاجة إسمها Gross Domestic Product أو الناتج القومي الإجمالي وده إختصاراً بيتعرف بإسم GDP .. الGDP ده هو إجمالي الفلوس اللي بتخش للبلد بعد ما تبيع كل اللي المنتجات اللي هي بتصنعها وبعد ما تخشلها كل الفلوس اللي قصاد الخدمات الل هي بتقدمها .. اللي هو بإختصار المرتب اللي بيخش جيب البلد كلها.
لسنين وسنين والناس بتوع الإقتصاد بيستخدموا الGDP ده كمقياس لغني الدول بس إنت محتاج تفهم حاجة .. إنت لما بتبص لمرتب حد وتشوفه قد إيه هو كبير وتقول Wow ده بياخد مثلاً 15,000 جنيه فإنت فعلياً متعرفش المرتب ده بيتصرف إزاي لإن ممكن الرجل يكون داخل في جمعية قاسمة وسطه ومخلياه مش عارف يستفيد إلا بنسبة صغيرة أوي من المبلغ اللي بيدخله كل شهر .. وفي نفس الوقت إنت متعرفش يمكن الشخص نفسه أو حد في عيلته يكون مريض وبيصرف أغلب مرتبه علي العلاج وساعتها برده المرتب الكبير ده مش بيعبر فعلاً عن غني البني أدم .. دي مشكلة الGDP .. هو بيوريك قد إيه البلد بيخشلها فلوس بس عمره ما بيقولك هي الفلوس دي بتتصرف إزاي؟ أو علي إيه؟
عشان كده فيه فريق شغال مع البنك الدولي طلعلنا تقرير إسمه The Changing Wealth of Nations أو التغير في ثروة الأمم قالوا إن فيه مقياس جديد نقيس عليه مدي غني الدول وإنت تقدر تقرأ التقرير ده بنفسك لو حابب هنا .. الناس دي رموا فكرة الGDP في الزبالة وبدأوا يبصوا لحاجة إسمها Wealth أو ثراء البلد .. يعني إيه الكلام ده؟ .. الناس جابت الحالة الإقتصادية ل141 دولة حول العالم وبدأوا يتفرجوا علي إيه اللي حصل في الدول دي من الفترة من 1995 لحد 2014 يعني علي مدي 19 سنة عشان في الأخر يطلعولنا بشوية نتايج:
- زي ما إنت كبني أدم ثروتك مش بس مرتبك .. ثروتك هي عربيتك وشقتك ولو عندك حتة أرض وتعليمك ولو ليك معارف مهمين يعرفوا يخلصولك مصالحك ولو إنت من سعداء الحظ اللي معاهم جنسية تانية .. الدول هي كمان ثروتها مش بس الGDP بتاعها إنما بتخش معاك هو المواطن المصري خلال سنة كاملة مثلاً بيدّخل للبلد فلوس قد إيه؟ .. يعني إنت كبني أدم المفروض إنك ثروة البلد لازم تحافظ عليها .. حقول النفط والغاز والمناجم والأراضي الزراعية وكل اللي بتنتجه البلد من سلع بتتصدر وحتي الإستثمارات الأجنبية .. كل ده علي بعضه بيشكل مدي ثراء أو Wealth البلد .. المشكلة إن ده بيبقي صعب أوي إنه يتقاس.
- طول ما إنت بتقيس مدي غني البلد بGDP بس فإنت كده بتضحك علي نفسك .. ممكن الحكومة تبيعلها شوية أراضي وتخصخص شوية شركات وتاخدلها كام قرض وده حيخلي الفلوس اللي بتدخلها خلال فترة معينة (اللي هو المرتب اللي بيدخل للبلد) كبير أوي وساعتها الأخوة بتوع الإقتصاد حيبصوا علي GDP ويقولك إقتصاد البلد دي فلة شمعة منورة مع إن ده مش حقيقي .. قدام كمان كام سنة حيبان حجم الكارثة اللي البلد وقعت فيها لما يجي معاد سداد الديون بالفوايد بتاعتهم وعشان كده جه الوقت إن قياس قوه الإقتصاد ميبقاش مبني علي هو البلد مرتبها كام أو الGDP بتاعها كام.
- لما بتبدأ تبص علي أداء إقتصاد الدول من وجهة نظر الGDP ووجهة نظر الWealth تلاقي نفسك قدام حاجة شبه برج الجوزاء كده .. عندك دولة زي تركيا مثلاً .. تركيا الGDP بتاعها عالي أوي وبيخشلها فلوس كتير ما شاء الله يعني بس تركيا دولة مش ثرية .. عدد الأثرياء في تركيا مش كتير لإن الناس مرتبها عالي بس الأسعار هي كمان عالية .. عندك دول الخليج خصوصاً السعودية والكويت عكس تركيا خالص .. الخلايجة أثرياء جداً بس الGDP بتاعهم ضايع لإن الفلوس اللي بتجيلهم من بيع البترول بتروح في الدعم اللي الدولة بتديه لمواطنيها عشان تعيشهم في ترف وتخليهم عايشين مستريحين.
- الدول الغنية زي أوروبا وأميركا تلاقي إن ثراءهم جاي من ثروتهم البشرية .. هناك البني أدم غالي لإنه بيشتغل وبينتج وبيساهم في إقتصاد بلده بشكل كبير بس أوروبا معندهاش لا بترول ولا ثروات معدنية .. العكس في الدول الفقيرة والمتوسطة .. الدول دي ربنا إداها ثروات طبيعية كتير بس البشر بتوعها أحياناً تحس إنهم عبء علي إقتصادها.
- فيه جدول عندك بيوريك أكتر 10 دول في العالم فيهم تعداد سكان .. المشترك بين كل الدول دي إن أكبر مصدر لثروتهم هي البشر .. أنا كمواطن أميريكي قد إيه شغلي وتعليمي والإنتاج اللي أنا بقدمه لإقتصاد بلدي هو اللي بيخلي بلدي غنية .. أكثر من 75% من قيمة ثروة إقتصاد البلاد دي كلها جاي من البشر بتوعها .. في الدول المتقدمة البشر بتوعها بيساهموا بحوالي 70% من إجمالي ثروتها في حين إن الثروات الطبيعية زي البترول والمعادن مش بتشكل غير 3% بس من إجمالي ثروة البلد.
- خلال الفترة من 1995 لحد 2014 العالم علي بعضه بكل دوله بسلطاته ببابا غنوجه الثراء فيه زاد بنسبة 66% لحد ما إجمالي الثروة علي مستوي العالم بقي الرقم ده 1,143 ترليون دولار .. ده مش معناه خالص إن البشر كلهم بيساهموا زي بعض في زيادة الثروة دي .. دول كتير في أفريقيا زي ما قلت تحس إن البشر فيها عبء علي إقتصادياتها وده خلي إن النسبة في الزيادة السكانية كانت أعلي من مساهمة البني أدم الواحد في ثروة بلده.
- خلال ال19 سنة اللي الدراسة إتعملت فيهم نسبة مساهمة الدول الفقيرة في زيادة الثروة علي مستوي العالم مزادتش عن 1% .. كل اللي الدول الفقيرة قدرت تساعد به هو 1% بس مع إن الدول الفقيرة دي علي بعضها نسبتها من تعداد سكان العالم زاد من 6% إلي 8% .. مش بقولك أحياناً تحس إن البشر واقفين علي بلدهم بخسارة.
- عشان تبقي عايش في بلد غنية مش لازم تبقي دولة فيها بترول أو مصدر ثروة طبيعية تاني .. التقرير بيقول إن من أصل 24 دولة متصنفة علي إنها دول فقيرة فيه منهم 12 دولة المفروض إنهم فيهم ثروات طبيعية كتير.
- واحدة من أنجح الطرق إنك تزود من ثروة البلد إنك تقلل الفجوة بين مرتبات الرجاله والستات .. التقرير بتاع البنك الدولي بيقول إن الستات بيساهموا بأقل من 40% من إجمالي ثروة العالم والسبب في كده إن في أغلب دول العالم الستات بتاخد مرتب أقل من الرجاله ده إذا إشتغلوا أصلاً والتقرير بيقول لو الفجوة دي قلت في دولة زي مصر مثلاً فإجمالي ثروة البلد اللي جايه من مساهمة البشر بتوعها في الإقتصاد حتزيد بنسبة 18% علي أقل تقدير.
المصدر:
- مقالة بعنوان An ambitious project to measure the wealth of nations shows how GDP is a deceptive gauge of progress نشرت علي Website اسمه Quartz وده لينك المقالة الأصلية:
https://qz.com/1194051/a-new-world-bank-project-shows-that-wealth-not-gdp-is-the-best-gauge-of-a-countrys-progress/
