خليني أبدأ معاك من الأول .. فيه إختراع لطيف عملاه الصين أو بلاش أعمم كلامي .. هي مبادرة عاملها الرئيس الصيني (جي جينبين Xi Jinping) من حوالي 5 سنين إسمها مبادرة حزام واحد طريق واحد أو One Belt-One Road وإختصاراً بتتسمي OBOR فكرتها إن بمنتهي البساطة الصين بتصنع منتجات كتير أوي ومش لاقيه حد يشتريها من أول سلاكات الودان لحد المكونات بتاعة الصواريخ بس يمكن الصين مبتصنعش حاجة مش بتتباع قد الأسمنت والصلب .. الحل زي ما الصينيين فكروا إنك تحط مليارات الدولارات كإستثمارات في مشاريع بنية تحتية أو Infrastructure عشان تعمل شبكة طرق تربط بينك وبين أوروبا بحيث إن طرق التجارة دي تقطع قارة أسيا كلها بالعرض .. ولإن الإفتكاسة دي شبه إفتكاسة طريق الحرير أو Silk Road بتاعة زمان أوي فالصينيين بيحبوا يسموا المبادرة دي New Silk Road أو طريق الحرير الجديد .. لحد دلوقتي الكلام زي الفل .. الطموح حلو مفيش كلام بس أنا عندي سؤال .. لو أنا دولة بنتج ملايين الأطنان من حديد التسليح ومش لاقي حد يشتريه فقررت إني انقله أوروبا عشان يتباع فإيه أحسن طريقة لنقل كم ضخم من البضاعة بالشكل ده؟ .. بصوت واحد مع بعض واحد إتنين تلاتة حتلاقوا الإجابة هي سفن الشحن .. ليه بقي الصينيين والروس دافعين دم قلبهم عشان يعملوا شبكة سكة حديد عملاقة عشان تربط بين الصين وأوروبا؟
لإن إحنا مدرسناش جغرافيا أسيا وأوروبا بشكل عميق في منهج الدراسات في إبتدائي فأحب أقولك إن سنة 1916 في عز الحرب العالميه الأولي ما كانت مولعة إتعمل خط سكة حديد إسمه Trans-Siberian Railway والخط ده عبارة عن 3 خطوط سكة حديد في بعض .. ده خط سكة حديد كان معمول للمجهود الحربي بس من بعد الحرب العالمية الثانية وخط السكة الحديد ده مستخدم علي إنه قطر بضاعة عشان ينقل المنتجات الصينية والروسية لجوه أوروبا .. بسبب دعم الصين وروسيا لرجال الأعمال إنهم يستخدموا الطريقة دي لنقل بضاعتهم لجوه أوروبا فخلال سنة 2017 كم البضاعة اللي إتنقل زاد ل278,000 TEU في حين إن سنة 2014 كانوا 43,900 TEU بس .. للناس اللي مش عارفه يعني إيه TEU؟ فدي إختصار Twenty-Foot-Equivalent Units ودي معناها بإختصار شديد عندنا مشكلة إن الحاويات Containers ملهاش إرتفاع ثابت .. الثابت هو طول الحاوية اللي بيكون يا إما 20 قدم (6.058 متر) أو 40 قدم (12.192 متر) والثابت كمان بيكون عرضها اللي بيبقي 8 قدم (2.44 متر) بس إرتفاعها بيتراوح ما بين 1.3 متر لحد 2.9 متر .. صحيح إن شركات ملاحة بتوحد إرتفاع الحاويات بتاعتها ل2.59 متر بحيث عشان تحاول تسهل علي نفسها الدنيا بإنهم بدل ما يحسبوا حجم الحاوية بإنك تضرب الطول في العرض في الإرتفاع وساعتها مفيش حاويتين حيبقي ليهم نفس الرقم فهم عملوا إختراع لطيف أوي هو الTEU .. بنفترض إن فيه عندك صندوق طول ضلعه 6.1 متر (20 قدم) والصندوق ده بيكون حجمه بدل ما تقول 226.981 متر مكعب بتقول واحد TEU بحيث إن الحاوية الواحدة بالحب كده بتبقي 2 TEU وهكذا.
لو مفهتمش حاجة مش مشكلة إنت مش داخل إنترفيو في شركة شحن .. المهم إن صحيح كم البضاعة اللي بتتنقل بالسكة الحديد خلال الفترة من 2014 لحد 2017 زادت زي ما هو باين بس الزيادة دي متجيش 50% من الزيادة بتاعةكم البضاعة اللي بتنتقل بالسفن خلال نفس الفترة واللي وصلت 480,000 TEU .. اه نسيت أقولك إن دي الزيادة اللي حصلت في الوقت إن الشحن البحري عاش أسوأ أيامه خلال الفترة دي بسبب عمليات القرصنة اللي كان بيقوم بيها القراصنة الصوماليين لو تفتكر .. أظن اللي أنا عايز أساله ليك دلوقتي ليه إنتي يا صين وليه إنتي يا روسيا مهتمين أوي إنكوا تشغلوا خط سكة حديد رغم إن كم البضاعة اللي انتوا نقلتوها لأوروبا بالشحن البحري خلال السنة اللي فاتت بس كان 15.9 مليون TEU؟ .. عشان بس أحطك في الصورة .. إنت عشان توصل للرقم ده بخط سكة حديد إنت محتاج تعمل 60 خط سكة حديد يقطع أسيا كلها بالعرض مش 3 خطوط زي ما هو موجود دلوقتي.
فيه منكوا لسه مش مقتنع أو مش فاهم ليه سفن الشحن هي أكتر طريقة مستخدمة لنقل البضاعة من مكان لمكان في العالم؟ والحقيقة إن السبب بمنتهي البساطة سببه الحساب .. بناء علي حسبة معقدة شوية عملتها شركة شحن إسمها CSX Corp. فإنت عشان تنقل طن بضاعة أيا كانت هي إيه مسافة كيلومتر واحد بالسكة الحديد فالقطر بتاعك بيحرق 15 جرام ديزل والديزل ده نوع من أنواع الوقود اللي القطارات بتستخدمه .. علي الناحية الثانية السفينة عشان تنقل نفس الطن بنفس المسافة اللي هي كيلومتر واحد فهي محتاجة تحرق 8 جرام وقود وأحب أقولك إن سعر وقود السفن أقل حوالي الثلث من سعر الديزل اللي بيستخدم في القطارات .. زود علي كده إن السفينة تقدر تشيل كم متقدرش تحطله سقف من البضاعة في الوقت اللي تلاقي إن القطر سعته وقدرته علي إنه يشيل بضاعة ليها سقف محدد .. بلاش كل ده .. اللي بيفصل بين فرنسا وبريطانيا حاجة إسمها القنال الانجليزي أو بحر المانش .. حاول تتخيل إنها عامله زي قناة السويس كده اللي بتفصل بين الصحراء الشرقية وبين سيناء .. الإنجليز والفرنساويين عاملين نفق إسمه نفق القناة Chanel Tunnel فيه خط سكة حديد إكتشفوا إن سنة 2015 كم البضاعة اللي إتنقلت بخط السكة الحديد ده كان عبارة عن 1.5 مليون حاوية في حين إن عدد الحاويات اللي إتنقلت عن طريق السفن اللي بفكرك إن كل اللي بتعمله إنها يدوبك بتعدي قناة وصل 2.5 مليون حاوية .. وكل ما المسافة زادت كل ما بتكتشف إن النقل البحري أرخص بكتير من السكك الحديد.
علي فكرة أنا لسه مخلصتش .. فاكر لما قلتلك إن Trans-Siberian Railway اللي هو خط السكة الحديد اللي بيربط بين روسيا والصين وأوروبا إتعمل سنة 1916؟ .. للناس اللي مش عارفه تاريخ روسيا فالروس وقتها كانوا عايشين تحت حكم القيصر اللي هي عشان أشبهالك تخيل إن اللي كان بيحكم روسيا وقتها كان الملك (فاروق) الله يرحمه وجم الضباط الأحرار عملوا عليه ثورة عشان يشيلوه بس إذا كانت عندنا بتتسمي ثورة 23 يوليو فالروس بيسموها الثورة البلشفية واللي حكم روسيا بعدها كان الإتحاد السوفيتي .. المهم إن الإتحاد السوفيتي كان عنده هسهس إن حيجي اليوم ودولة عظمي تانية تيجي تحتله وأول حاجة قوات الإحتلال دي حتعملها إنها حتستخدم خطوط السكة الحديد اللي الروس عاملينها .. الحل بقي كان إنهم عملوا خطوط السكة الحديد بتاعتهم عرضها أكبر من العرض الStandard بتاع كل خطوط السكك الحديد سواء في أوروبا أو الصين .. طب ده معناه إيه؟ .. معناه إن لو قطر بضاعة بينقل حاجة من الصين لأوروبا وبيعدي علي روسيا إنت لازم البضاعة دي تتنقل من القطر الصيني للقطر الروسي ولما تعدي حدود روسيا تتنقل تاني لقطر أوروبي .. حوسة ما يعلم بيها إلا ربنا .. فوق ده كله أنا إيه اللي يجبرني أخلي بضاعتي تعدي علي 5 دول وكل واحدة فيهم تفرض جمارك علي البضاعة عشان لما ربنا يفرجها عليا وأوصل للمستهلك أضطر أبيعهاله بضعف ثمنها عشان أعوض الفلوس اللي أنا دفعتها؟ .. أرجع تاني وأسأل هو إيه اللي يخلي الصين وروسيا يسعوا ورا إعادة إحياء النقل بالسكة الحديد؟ .. تفسير ده بمنتهي البساطة تقدر تفهمه في كذا نقطة مع بعض:
- زمان وقت الترانزيت اللي قطر البضاعة بيقفه بين أي دولتين كان بيبقي طويل أوي والوقت ده بفلوس بس دلوقتي الوقت ده بدأ يقل جامد وده وفر فرصة إنك لو بتنقل بضاعة بين مكانين قريبين من بعض بطريق بري فايه اللي يخليك تلف حول نفسك عشان تروح لأقرب ميناء تنقلهم بالسفن لما إنت تقدر تنقلهم بالقطر؟
- فيه شركات تانية حظها إسود إن مصانعها في حتت بعيد عن البحر .. خد عندك شركة زي HP Inc. بتاعة الLaptops .. الشركة دي ليها مصنع كبير أوي في منطقة إسمها تشونج-كينج Chongqing والمصنع ده بينه وبين أقرب ميناء كبير اللي هو ميناء شنغهاي حوالي 1,700 كيلومتر .. فبالعقل كده إيه اللي يخليني أنقل بضاعتي لحد الميناء ومن الميناء عن طريق سفن في رحلة ممكن تاخد 13 يوم لما ممكن أنقل بضاعتي بالقطر وحتوصل أوروبا في ظرف 3 أو 4 ايام؟ .. خصوصاً لو فكرت في الOffer اللي الحكومة الصينية بتديهولك لو قررت تنقل بضاعتك بالقطر .. الحكومة بتقولك إنها حتخصم ما بين 1000 ل 7000دولار علي كل حاوية طولها 40 قدم (12.2 متر) .. ده Offer ولا العروض بتاعة Black Friday في كارفور لإن تكلفة شحن نفس الحاوية بالبحر ممكن توصل 2000 دولار يعني بتتكلم في Sale بيوصل 50%.
بس علي الناحية الثانية البنوك الصينية زي ما تكون بتقول للحكومة عبط إحنا يا عصام؟ .. لو شفت البنوك الصينية إزاي بتحط فلوسها في مبادرة OBOR حتلاقي إن أغلب الفلوس بتروح لمشاريع بنية تحتية في باكستان وماليزيا ومشاريع عملاقة زي سلسلة الموانيء والمطارات اللي بتتبني في سريلانكا وميانمار .. الفلوس اللي بتروح لمشروع خط السكة الحديد متركزة أوي في منطقة خورجوس Khorgos ودي منطقة صناعية علي الحدود بين الصين وكازاخستان والفلوس دي متجيش قطرة في بحر المليارات اللي بتتدفع في دول تانية .. اللي البنوك الصينية كمان عامله حسابها عليه هو إن دلوقتي أطول طريق بحري بين أبعد ميناء فيكي يا صين عن أوروبا بيخليك تقطع مسافة 10,000 ميل بحري خلال 30 يوم .. الفكرة إن دلوقتي ظاهرة الإحتباس الحراري بدأت تدوب في الثلج بتاع القطب الشمالي وده بدأ يفتح سكك ملاحة بحرية جوه الثلج ولو ده حصل فمتوقع أوي إن المسافة والوقت اللي البضاعة الصينية بتحتاجه عشان توصل أوروبا حيقل النص .. فليه أدفع دم قلبي عشان أمول مشروع نقل بضاعة بالقطر لما انا أصبر لحد ما الإحتباس الحراري يدمرلنا الكوكب بتاعنا وبالمرة يفتحلنا طريق تجارة في القطب الشمالي؟ .. يبان تفكير غريب بس هو ده تفكير الناس بتوع الBusiness .. هو مستعد يشوفها بتخرب ويقعد علي تلها لو ده معناه إن حسابه في البنك حيزيد كام ألف دولار.
المصدر:
- مقالة بعنوان Railways put China on a belt and road to nowhere .. السكك الحديد بتلبس مبادرة حزام وطريق في الحيط .. نشرت في مجلة Bloomberg وده لينك المقالة الأصلية:
ttps://www.bloomberg.com/opinion/articles/2018-11-05/trans-asian-rail-puts-china-on-a-belt-and-road-to-nowhere
