لينك التسجيل الصوتي للمقالة علي Sound Cloud:
https://soundcloud.com/user-112011687-312727988/zvztjpxyieli
سنة 2007 ألمانيا صدمت العالم بأكبر هبدة في التاريخ لما قالت إن لما إن شاء الله سنة 2020 تيجي فنصيب ألمانيا من الGreenhouse Gases أو الغازات اللي بتولد مشكلة الإحتباس الحراري يعني بنتكلم بشكل أساسي عن أول و ثاني أكسيد الكربون حيقلوا بنسبة 40% .. ليه بقول إن العالم شاف كلام ألمانيا علي إنه هبد؟ .. الفكرة إن ألمانيا دولة صناعية و مش بس دولة صناعية .. دي دولة صناعية جاحدة فاللي بتقوله ألمانيا ده مستحيل .. طبعاً الناس بتوع البيئة هيصوا و زقططوا و وجهة نظرهم إن لو ألمانيا عملتها يبقي عيب أوي إن باقي الدول الصناعية الكبري تفضل واقفه بتتفرج .. جري الشريط لحد سنة 2018 يعني خلاص فاضل سنتين علي Deadline اللي هم حطوه لنفسهم و بعد ما ألمانيا صرفت 580 مليار دولار عشان تحول إقتصادها إنه يعتمد بشكل شبه كلي علي الطاقة المتجددة Renewable Energy زي الطاقة الشمسية و طاقة الرياح فحزر فزر ألمانيا قللت نسبة الGreenhouse Gases اللي هي بتنتجها بنسبة قد إيه؟ .. الإجابة 27.7% .. متفهمنيش غلط أنا مش شمتان فيهم .. بالعكس اللي عملته ألمانيا ده إنجاز جبار تستحق إن كلنا ننحني ليها إحتراماً عشانه .. اللي حتكلم عنه النهاردة هو ليه؟ .. ليه ألمانيا مقدرتش تحقق هدفها؟ .. مبدأياً للناس الشمتانة الموضوع ملوش علاقة إطلاقاً بإن الطاقة الشمسية فيها مشاكل أو إن طاقة الرياح مش قد كده .. الموضوع سببه حاجة واحدة بس و هي العربيات.
سنة 2010 الإخوة بتوع NASA طلعولنا دراسة تتاقل وزنها دهب قالت إن أكبر Net Contributor للإحتباس الحراري هو العربيات و خلي بالك أوي من كلمة Net Contributor يعني مساهم صافي .. كلمة Net لما تتحط علي أي حاجة بتدي معني صافي .. حضرتك بتاخد مرتب مثلاً 3000 جنيه و ده بيتقال عليه Gross Salary أو مرتب إجمالي فبيتخصم منك ضرايب و تأمينات و خلافه و في الأخر بيتبقالك 2000 جنيه و ده بيتقال عليه Net Salary أو صافي مرتبك .. في الإحتباس الحراري فيه نفس الفكرة .. العربيات و الأوتوبيسات و الترلات بتطلع غازات زي أول و ثاني أكسيد الكربون و دي غازات بتسبب ظاهرة الإحتباس الحراري و في نفس الوقت عوادم العربيات مبيبقاش فيها Aerosols أو غازات طيارة زي الكحول مثلاً اللي بتقلل شوية من تأثير أول و ثاني أكسيد الكربون .. يعني بإختصار الNet بتاع عوادم العربيات عالي أوي لإن مبيتخصمش منه حاجة .. علي الناحية الثانية المصانع بتنتج كمية غازات أول و ثاني أكسيد الكربون تعتبر أضعاف اللي بتنتجه العربيات .. بس في نفس الوقت المصانع دي بتنتج وسط العوادم بتاعتها كبريتات أو Sulfates و Aerosols يعني غازات طيارة فبتبرد شوية الجو .. بإختصار برده الGross بتاع المصانع عالي أوي بس هي بيتخصم منها كتير فبتلاقي إن الNet بتاعها أقل من الNet بتاع العربيات.
تعالي ناخد مثال حي بدولة صناعية كبيرة زي أميركا .. بناء علي كلام جهة إسمها إتحاد علماء أميركا المهتمين بالبيئة Union of Concerned Scientists فالعربيات و الأوتوبيسات و الترلات مسئولة عن 20% من كل الإنبعاثات الضارة بالبيئة اللي بتطلعها أميركا .. لو دخلت في حسبتك القطارات و الطيارات و السفن فحتلاقي الرقم نط معاك ل30% من إجمالي الإنبعاثات الضارة بالبيئة اللي بتطلعها أميركا لوحدها .. بناء علي كلام منظمة تانية إسمها مجموعة روديوم Rhodium Group فالعربيات بقالها سنتين هي أكبر مصدر للغازات الضارة بالبيئة في أميركا .. الكلام اللي يمشي علي أميركا يمشي علي ألمانيا و هي دي المصيبة و خليني أفهمك يعني إيه.
السنة اللي فاتت الألمان جم حسبوا كم الغازات الضارة بالبيئة اللي بلدهم بتطلعها فإكتشفوا إن النسبة قلت عن السنة اللي قبلها بسبب قرار الألمان إنهم يقفلوا أخر محطات إنتاج الكهرباء اللي بتشتغل بالفحم .. لسه حيقولوا هيييييييه إكتشفوا إن الإنبعاثات الضارة بالبيئة اللي جايه من قطاع المواصلات لوحده زادت بنسبة 2.3% .. الإقتصاد الألماني بقي مستريح أوي لدرجة إن كل مواطن في ألمانيا يقدر يشتري بالعربية و العربيتين .. حالياً ألمانيا زيها زي أميركا العربيات فيها هي ثاني أكبر مصدر للغازات المضرة بالبيئة و لو الوضع كمل علي كده فالعربيات حتبقي النامبر وان و إذا كنت بترقص علي أغنية (محمد رمضان) ففي الحالة دي كلنا حنصوت مش حنرقص و صدقني لو قلتلك إن الألمان نفسهم مش عارفين يعملوا إيه .. معلش إزاي تقول لمواطن بلده بتصنع Mercedes Benz و BMW و Volkswagen بطًل تركب عربيات؟ .. دكتور (مصطفي محمود) الله يرحمه له جملة شهيرة أوي إنك لو جيت مسكت المارك اللي هو عملة ألمانيا قبل اليورو و كشطته حتلاقي تحته العلامات التجارية بتاعة الMercedes Benz و BMW و Volkswagen عشان يوريك قد إيه إن الشركات الثلاثة دول هم العمود الفقري للإقتصاد الألماني .. المواطن الألماني بيبص لعربيات بلده علي إنها مصدر فخر و كبرياء .. إزاي تقول لمواطن زي ده بطل تركب عربيات بلدك عشان تنقذ البيئة؟ .. بالورقة و القلم عشان في السنتين الجايين ألمانيا تحقق هدفها و توصل ل40% خفض في نسبة الغازات الضارة بالبيئة اللي هم بينتجوها لازم نص اللي معاهم عربيات في ألمانيا يبطلوا يركبوا عربياتهم و يا إما يركبوا عجل أو يركبوا مواصلات عامة أو إن كل حبة ساكنين جنب بعض يتشاركوا في عربية يروحوا بيها الشغل و يرجعوا بيها.
طب أزيدك من الشعر بيت .. لنفترض إن الحكومة الألمانية قالت لشركات العربيات ياريت يا جماعة تطوروا عربياتكوا بحيث تبقي Fuel Efficient يعني متحرقش بنزين كتير .. فشركات العربيات تكتشف إن خلاص تكنولوجيا Fuel Efficiency جابت أخرها و أي تطوير زيادة فيها حيبقي مكلف جداً فالحل المناسب بالنسبة ليهم إن كل شركة تبدأ تنزل عربيات بتمشي بالكهرباء .. فتيجي تكتشف إن العربيات دي عشان تتشحن إنت محتاج إن كل محطات إنتاج الكهرباء اللي جوا ألمانيا متبقاش شغالة بالوقود و إلا إنت كده محلتش حاجة .. يعني حتي الحل ده محتاج إن كل محطات الطاقة الكهربية جوه ألمانيا تبقي شغالة بالRenewable Energy .. الحل اللي الألمان بيتكلموا عنه هو إنهم حيعملوا كذا حاجة .. مبدأياً حيطلبوا من الشركات بتاعة العربيات إنها تتصرف و تنزل موديلات بFuel Efficiency عالية .. و في نفس الوقت حيشتغلوا علي إنهم يصرفوا شوية علي البنية التحتية للعربيات اللي بالكهرباء يعني في كل محطة بنزين تلاقي فيها مكان تشحن به عربيتك اللي بالكهرباء .. و مع ده كله إن كل ولاية ألمانية تبدأ تشتغل علي إنها تطور من وسائل المواصلات العامة و إنها لو إحتاجت توفر عجل للمواطنين ببلاش بحيث إنهم يوصلوا في الأخر إن الناس تبطل تركب عربياتها.
ألمانيا علي فكرة في كوكب تاني لوحدها .. مفيش في العالم دولة صناعية ماشية في نفس السكة بتاعتهم .. حتي الأمريكان سنة 2012 الرئيس (باراك أوباما Barack Obama) طلع قرار إن لازم كل شركات العربيات الأميريكية تتصرف و تزود Fuel Efficiency بتاعة عربياتهم بنسبة 100% و قدامهم لحد سنة 2025 يشتغلوا علي الموضوع ده .. السنه دي طلعلنا الرئيس (دونالد ترامب Donald Trump) زي الخازوق و قام لاغي القرار.
المصدر:
مقالة بعنوان Germany has proved the modern automobile must die .. ألمانيا أثبتت إن العربيات الحديثة لازم تموت .. نشرت في Website إسمه Wired.com و ده لينك المقالة الأصلية:
https://www.wired.com/story/germany-proves-cars-must-die/
