لينك التسجيل الصوتي علي ساوند كلاود:
https://soundcloud.com/user-112011687-312727988/q8oee4ukzq9w?si=a7884aabbe2a4a758640614d7acf7fd2&utm_source=clipboard&utm_medium=text&utm_campaign=social_sharing
إذا كنت إنت في مصر ربنا كارمك ببلد فيها حتت كتير تتراح في المصيف فإخواتك في أميركا معندوهمش .. في مصر إنت عندك الساحل والسخنة ومطروح ودهب .. كل اللي إنت حتعمله حتخش علي Booking تحجز الفندق وتحجز باص يا إما Go Bus أو Blue Bus وحتقضيلك كام يوم في مصيف ومراتك تتبسط والعيال يغيروا جو وإنت تتفشخ مصاريف وكله يبقي فرحان وسعيد .. في أميركا الوضع مش كده .. أولاً هي بلد واسعة وعشان لو أنا عايش جوه أميركا أروح أصيف في ولاية ساحلية فأنا حدفع تكاليف رحلات طيران رايح جاي وده غير مصاريف الفندق والفسحة .. ده خلق فرصة لبيزنس كبير أوي اللي هو Cruise Ships .. فكر فيها من وجهة نظر رجل أميريكي متجوز وعنده عيال .. أنا ممكن أودي العيلة كلها دهب أو شرم الشيخ وحيروحوا يغطسوا ويعملوا سنوركلينج بس أنا رايح بلد إسلامية مفيهاش بارات ومينفعش أمشي في الشارع وأشرب خمرة .. مفيهاش نوادي قمار حتي .. ده اللي بتوفرهولك أي Cruise Ship .. إنت طالع رحلة عشان تطفي دماغك .. لو علي العيال إنت حترميهم في Kids Area يهيصوا فيها بالأيام .. لو رايح تشرب خمرة في الروقان حتلاقي .. لو رايح تلعبلك دورين قمار مع شلة حلوة حتلاقي .. يمكن الفئة الوحيدة اللي مش حيلاقوا حاجة يعملوها مختلفة في Cruise Ship هم المسلمين .. حتي الأكل حتضطر تسأل هو ده معمول من إيه عشان متاكلش حاجة حرام .. بيزنس Cruise Ships مناسب جداً لأي أسرة متوسطة في أميركا أو أوروبا لإن رحلة 7 أيام Full Board بتتكلف 1560 دولار للفرد وده مبلغ مناسب جداً لأي أسرة في أميركا أو في أوروبا .. لو حتحول الفلوس دي لجنيه حتلاقي إن الرحلة بتقف علي الفرد الواحد داخل في 25,000 جنيه (ده قبل التعويم طبعاً) ورغم كده أنا أعتقد إن فيه ناس مش حتشوفها غالية ودي ناس ملناش دعوة بيها يا محيي إحنا ماشيين بعلاج.
من وسط الصور حتشوف كم Activities اللي ممكن إنت تعملها في Cruise Ship وحتلاقي نفسك بتقول يا سلام والله تستاهل كل جنيه يتدفع فيها .. تخيل نفسك قاعد في فندق فيه 23 حمام سباحة و20 مطعم و Aqua Park وملاهي زي بتاعة دريم لاند وحلبة سباق عربيات صغيرة اللي هي بتتسمي Go-Kart اللي عيالك بيعلبوا بيها في الملاهي بس بدل ما هي بالكهرباء بيتحطلها موتور بنزين وبتتسابقوا بيها .. وفوق ده كلها قاعد 7 أيام في عرض البحر Full Board .. إنت متخيل يا مان .. بتتكلم عن سفينة 5 أضعاف حجم التيتانيك بتشيل 6,600 مسافر بيخدم عليهم 2,200 من طاقم السفينة .. أظن إنت لحد دلوقتي بتسأل نفسك طب هو أنا إخترت أتكلم عن الموضوع ده ليه؟ .. عايز تقهر قلبنا يعني وتقولنا السياحة لمصر مش راجعة تاني ولا عايز تقولنا إحنا فقراء أوي؟ .. الحقيقة لا .. أنا عايز أكلمك عن Cruise Ships والبيزنس بتاعها لإن ده بينزس سوري في الكلمة بيفشخ البيئة وبيدمر حياة ناس وعشان تفهم هل أنا بفتري علي الناس اللي شغالة في البيزنس ده أو إن أنا عندي حق تعالي أخدك من إيدك وأدخلك في جولة جوه البيزنس ده وخليني أبدأ بإني أعرفك علي الكبار اللي فيه.
أكتر من 80% من بيزنس Cruise Ships تحت إيد 3 شركات بس اللي هم كارنيفال Carnival ورويال كاريبيان Royal Caribbean ونوريجين كروز لاين Norwegian Cruise Line وده سوق لو شفت كم الفلوس اللي بيجيبها كل سنة حتلاقيك بتتكلم في 50 مليار دولار في السنة ومتوقع له إنه يفضل يكبر .. متوقع إن السنة الجاية إن شاء الله يعني سنة 2020 حيبقي فيه أكتر من 30 مليون زبون علي مستوي العالم بيروحوا يقضوا أجازتهم علي Cruise Ship .. حلو .. إيه برده مشكلة البيزنس ده؟
مشكلة رقم واحد .. البيئة بتتفشخ علي إيد السفن دي:
عارف إنت لما تطلع أجازة مصيف إنت وعيلتك وتكونوا مثلاً 10 من عيلة مأجرين فيلا في الساحل مثلاً .. عارف إنت بترموا كام كيس زبالة في الأسبوع ده؟ .. عارف بتخشوا الحمام كام مرة؟ … عارف أنتوا بتصرفوا كام علي الأكل بس؟ .. أهو تخيل إنت سفينة عايش فيها 9000 بني أدم بياكلوا ويشربوا ويخشوا الحمام يعملوا بيبي ويرموا زبالة .. قانوناً مينفعش Cruise Ship ترمي بواقي أكل أو منظفات كيماوية أو أحشاء حيوانات في البحر بس طبعاً مفيش Cruise Ship مبتعملش كده .. مش بس بواقي الأكل والزبالة والبيبي .. لو جيت تحسب كم غاز ثاني أكسيد الكربون اللي بتطلعه أي Cruise Ship وقسمته علي عدد الركاب تلاقي إنك لما بتركب واحدة من السفن دي بتبقي مسئول عن إنتاج 4 أضعاف كمية غاز ثاني أكسيد الكربون اللي إنت بتبقي مسئول عنها لما بتركب طيارة .. بلاش دي .. عارف حضرتك إن شركة واحدة من الشركات التلاتة اللي مسيطرة علي البيزنس ده اللي هي شركة كارنيفال Carnival إتوجه ليها إتهام إن السفن بتاعتها بتطلع كمية غاز ثاني أكسيد الكبريت واللي هو واحد من أكتر الملوثات اللي بتدمر البيئة أكتر من ال260 مليون عربية اللي بيمشوا في قارة أوروبا كلها .. يعني تيجي إنت تشتري عربية فولكسفاجن باسات ويطلع عين اللي خلفوك عشان تشتريلها علبة بيئة في الجاكمان عشان قال إيه حماية البيئة وتيجي سفينة واحدة تفشخ البيئة ومحدش بيقولها فين علبة البيئة بتاعتك.
مشكلة رقم إتنين .. لو إنت متخيل إن Facebook و Google بيسرقوا خصوصيتك تبقي أهبل:
لو إنت حجزت علي Cruise Ship تبع شركة كارنيفال Carnival مثلاً فإنت بتستلم تذكرة بيتكتب عليها ملاحظة كده إن من حق طاقم السفينة إنه يخش الأوضة بتاعتك يفتشها في أي وقت ومينفعش تفتح بقك تعترض .. طب بلاش كارنيفال أنا رجل مسلم مراتي محجبة مينفعش تتكشف علي رجاله .. حتروح مثلاً شركة زي رويال كاريبيان Royal Caribbean تلاقي إن تذكرتك مكتوب عليها إن من حق طاقم السفينة إنه يحبسك إنت وعيلتك في الأوضة بتاعتكوا لو إتقال إنكوا مصدر إزعاج لباقي الزباين .. شركة نوريجين كروز لاين Norwegian Cruise Line لما بتحجز معاهم بيدولك تذكرة مكتوب عليها إن الشركة مش مسئولة عن أي أضرار تحصل في حالة إن حصلت ثورة أو تمرد من طاقم السفينة علي الزباين أو أي مشكلة ممكن تحصل في البحر.
مشكلة رقم تلاتة .. لا إستني بس .. يعني إيه تمرد طاقم السفينة؟ .. هو أنتوا بتعملوا إيه في الناس دي؟
لو إنت شايف إنك طالع عينك في شغلك فمعلش سوري في الكلمة إنت متعرفش ومشوفتش حاجة .. عايز تجرب يعني إيه الدنيا تدوس علي وشك روح إشتغل ضمن طاقم أي Cruise Ship .. إنت بتشتغل 90 ساعة في الأسبوع يعني بمعدل 13 ساعة شغل كل يوم كحد أدني ومفيش أجازات ومن غير أوفر تايم ومرتبك أخره بيبقي 500 دولار في الشهر يعني بيتدفعلك 1.8 دولار في الساعة .. عشان أقربهالك .. تخيل إنك بتشتغل شغلانة 13 ساعة في اليوم قابلين للزيادة علي حسب ضغط الشغل ومفيش أجازات ومرتبك 8000 جنيه في الشهر (ده برده قبل التعويم) .. لو إنت موافق علي ظروف الشغل دي فإستني لسه التقيل ورا .. أكتر من 30% من أطقم سفن Cruise Ships سبحان الله يعني بيكونوا من الفلبين .. مش لإن الموظف الفلبيني شعلة نشاط وشمعة تحترق من أجل الأخرين .. لا خالص .. الفكرة إن الحكومة الفلبينية بتقول إن لو إنت مواطن فلبيني شغال علي سفينة مملوكة لشركة أجنبية فإنت مينفعش ترفع عليهم قضية .. طب إفرض أنا شغال في سفينة وحصلتلي حادثة المطلوب مني أعمل إيه؟
حضرتك بتاخد تعويض مادي علي حسب أنهي حتة من جسمك إتعورت .. يعني لو لا قدر الله ودانك مثلاً إتقطعت حتاخد في إيدك 5,225 دولار تعويض .. لو إتقطع صباع من صوابع إيدك بيتدفعلك 3,360 دولار .. لو جالك شلل سفلي بيتدفعلك 60,000 دولار .. طبعاً فيه كتير منكوا بيسألوا دلوقتي هو يا تري عضوي الذكري بكام؟ .. للإجابة عن سؤالك اللي لو إنت سألته يبقي فيه حاجة فيك غلط هو إن ثمن نصك التحتاني 20,900 دولار واللي في رأي مراتك ده لو عرفت تستخدمه .. مش كده وبس .. بناء علي تقرير فرقعلي نفوخي من مركز مكافحة الأمراض والأوبئة Center for Disease Control أو CDC في أميركا إتنشر في يوليو 2013 فكتير من Cruise Ships بيخزنوا الأكل المنتهي الصلاحية في أوض أطقم السفن عشان المفتشين بتوع الجودة ميشوفوهاش وتتقدم للزباين عادي بعد كده .. يعني بتتفشخ شغل ومبتاخدش مرتب يرضي ربنا لا وكمان بينيموك في أوضة مع الأكل المعفن.
هل ده جديد؟ لا .. هل اللي أنا بقوله ده محدش بره عارفه؟ لا فيه ناس كتير عارفاه .. طب الشركات دي مكمله إزاي؟ عشان الشركات دي بتلعب في حتة من القانون اسمها القانون البحري وهنا إنت محتاج تفتحلي مخك شوية ولو فصلت روح إعملك كوباية قهوة أو نسكافيه لإن الحتة اللي جايه محتاجه تركيز .. إنت ممكن تكون إسكندراني ومعاك بطاقة بتقول إنك إسكندراني بس لما جيت تشتري عربية لقيت عربية مستعملة حلوة أوي بس رخصتها متسجلة علي مدينة نصر في القاهرة مع إنك دلوقتي شغال في شركة مقاولات بتعمل شغل في أسيوط .. نفس الكلام مع Cruise Ship .. إنت ممكن شركة أمريكاني شغالة من مواني أميريكية وأغلب زباينك أمريكان بس السفن بتاعتك واخدة رخصة بلد تانية زي بنما مثلاً وطول ما هي في البحر شايلة علم بنما وهي دي النقطة .. القانون البحري فيه حتة بتتسمي Flying a Flag of Convenience بتقول إن من حق أي شركة إنها تختار أنهي بلد هي عايزة تسجل رخصة السفينة بتاعتها عليها وبعد كده الشركة دي بتتحاسب بناء علي قوانين الضرائب والسلامة والعمالة بتاعة البلد دي .. ده معناه إن شركة زي نوريجين كروز لاين Norwegian Cruise Line اللي اتسمت علي اسم النرويج ومقرها في مدينة ميامي الأميريكية الرخص بتاعة كل السفن بتاعتها متسجلة علي بلد جزر البهاماز زيها زي شركة Royal Caribbean بس شركة Carnival مسجلة رخص السفن بتاعتها علي بنما.
فكرة إنك تبقي شركة أميريكية بس مسجلة السفن بتاعتك علي رخصة دولة تانية بتوفر عليك فلوس كتير فشخ كمرتبات وضرائب .. خد شركة زي Carnival .. سنة 2018 دخلها أرباح صافية 3.2 مليار دولار ودفعت عليهم ضرائب 1.8% .. لحد دلوقتي إنت ممكن تبص لده وتقول طب وأنا مالي .. أنا رايح دافع فلوس عشان أتبسط .. يفرق معايا إيه بقي الشركات دي بتدفع ضرائب كام؟ .. الحقيقة إن إنت عندك حق لكن الحتة بتاعة Flying a Flag of Convenience مش بس الشركات دي بتستخدمها عشان تدفع ضرائب أقل إنما كمان بتستخدمها عشان تهرب من المسئولية لو حصلك إنت أو عيلتك حاجة في البحر .. مش فاهم أنا عارف.
لنفترض إنك حجزت أجازة علي سفينة تبع شركة Carnival فإنت طول ما إنت ماشي في المياه الدولية إنت قانوناً تبع سلطة دولة بنما .. لنفترض إنك برده طالع أجازة إنت وعيلتك وفيه حد إتحرش بمراتك أو ببنتك وإنت إتخانقت معاه وحلفت مية يمين إنك حتعمل محضر أول ما تنزل من السفينة وصادف مثلاً إن أول ميناء السفينة راحتله كان ميناء برشلونة في إسبانيا فالضابط في قسم أول برشلونة حيقولك إنه ملوش دعوة .. لو عايز تعمل محضر حضرتك تركب طيارة وتروح بنما تعمل محضر في قسم أول بنما .. طب أقولك علي الكبيرة بقي .. لحد سنة 2010 ولا واحد في طاقم السفينة كان مسموحله إنه ينزل معاك يشهد في المحضر بس في السنة دي إتعمل قانون إسمه Cruise Vessel Security and Safety Act بدأ يجبر أطقم السفن دي إنها تبلغ في حالة حدوث واحدة من 6 جرايم اللي هم: القتل العمد .. الموت (في حالة الإشتباه بوقوع جريمة) .. إختفاء مواطن أميريكي .. الإختطاف .. الإعتداء بالضرب .. التحرش والإغتصاب.
خدت بالك من حتة الإشتباه بوقوع جريمة .. لو حصل وحد مات علي سفينة من دول ففعلياً طاقم السفينة بيفضّل إنه يشوف إن الموت ده قضاء وقدر ومحدش بيبلغ .. طب لو حصل وأنا مثلاً ليا حد من عيلتي مات علي Cruise Ship وأنا شايف إنه إتقتل أو شايف إنه مات بسبب إهمال من طاقم السفينة .. ساعتها بناء علي حتة في القانون البحري اسمها DOHSA ودي إختصار Death on the High Seas Act فأنا من حقي أرفع قضية بس لو أنا كسبت القضية فأنا أخري إني أخلي الشركة تدفع ثمن حاجتين: ثمن الجنازة والتعويض المادي وده بيتحسب إنهم بيجيبوا مرتب اللي مات يشوفوا هو كان فاضله كام سنة ويطلع معاش ويدولك الفلوس دي .. لو اللي مات ده طفل أو حد علي المعاش فهو فعلياً ملوش تعويض لإن بناء علي DOHSA حياتك ملهاش أي قيمة إقتصادية .. والنقطة دي بالذات تفسرلك ليه سنة 2017 لوحدها إترفعت 8 قواضي تعويض ضد شركة Norwegian Cruise Line بسبب موت 8 أطفال بالغرق في حمامات السباحة .. السبب بمنتهي البساطة إن الشركى مش معينة أطقم إنقاذ .. لإن حتي لو حد مات غرقان فغالباً هو حيكون طفل وDOHSA بتقول إننا مش حندفعله تعويض .. علي فكرة شركات Cruise Ships الثلاثة لحد دلوقتي مش معينيين أطقم إنقاذ علي حمامات السباحة في السفن بتاعتهم بسبب النقطة دي.
أنا عايز أختم بإني أقولك إن ثمن تذكرة Cruise Ship مش بس ال1500 دولار اللي إنت شايفها ولا حاجة .. ثمنها إن السفن دي بتدمر البيئة وبتحمي شركات من إنها تتحاسب علي إهدار أرواح زباينها .. أنا بس حبيت أكلمكوا عن الموضوع ده لإني كذا مرة أشوف بوستات لناس أعرفها علي Facebook لصور Cruise Ships وكلها بتقول إن يا ريت أجرب أطلع رحلة في واحدة من دول .. أديني بقولك من دلوقتي .. إفتكر إني قلتلك بلاش ولازم كمان لو إنت ناوي تعمل حملة ترويج للسياحة في مصر مش بس إنك تقول مصر حلوة .. إنت لازم تلعب بالمعلومة دي إن Cruise Ships مش حاجة واو وكلها مشاكل وتبدأ تقول للأجانب فككوا منها وتعالوا عندي .. علي الأقل مش حتدمروا البيئة ولو حصل حاجة فيه حد حينقذ عيالكوا من الغرق.
المصدر:
- حلقة من برنامج Patriot Act with Hassan Minhaj بيتعرض علي قناة Netflix و ده لينك الحلقة علي YouTube لو حبيتوا تشوفوها:
ps://www.youtube.com/watch?v=0nCT8h8gO1g&t=1087s
