لما لعبة PUBG نزلت زي ما تكون نيمت جيل كامل مغناطيسياً .. أنا فاكر زمان و أنا في الكلية لما كنا بنلعب Call of Duty Modern Warfare 2 أول ما نزلت لما كنا أنا و صحابي بنتكلم عنها و نفضل نتخانق علي أنهي مرحلة من اللعبة أحلي كان لو جنبنا شلة بنات بياخدوا بعضهم و يمشوا بعيد زي ما يكون عرفوا إن مثلاً عندنا إيبولا و خافوا يتعدوا .. إنك تكون ولد و بتلعب Video Game فده معناه إن في 99.9% من الحالات إنت سنجل في الكلية و مش مصاحب بنات و إلا كنت الساعات اللي إنت بتلعب فيها كنت كلمتها علي موبايل .. عشان كده PUBG سببتلي صدمة نفسية .. دي أول لعبة تتصنف بإنها لعبة عسكرية بس بنات كتير بتلعبها .. ده فيه ناس كانت بتخش تشقط في اللعبة دي .. اللي يصدمك بقي إنك تسمع بنت تقولك إنها مستنية النسخة بتاعة Call of Duty اللي حتنزل علي الموبايلات و تحس إنك عايز تقولها الله يرحم أيام زمان لما كنتوا بتبصولنا إحنا معشر الGamers زي ما يكون عندنا جذام .. ده اللي أنا عايز أتكلم عنه النهاردة .. الVideo Games و مهم تكون فاهم إنVideo Games ده مش موضوع تافه ولا ملوش لازمة لسببين.
السبب الأول إن جيلنا دلوقتي ثقافته هي الVideo Games .. زمان أيام ما كنا عشان نتسلي بنروح نشتري كورة و نروح نأجر ملعب و بنفسنا نجري و إحنا برجلينا اللي نشوط الكورة عشان تخش جون بس دلوقتي أنا إيه اللي يخليني أروح ألعب كورة لما ممكن بدراع البلاي ستيشن أخلي (محمد صلاح) يرقص و يجيب جون بالنيابة عني .. السبب الثاني هو الفلوس و هنا أنا محتاج أركز شوية في كلامي لإن بيزنس Video Games بيجيب فلوس كتير فشخ .. لما تطلع شركة زي Netflix تقول إن في رأيها Video Game زي Fortnite أخطر علي البيزنس بتاعها من شركة منافسة ليها زي HBO لإن الشاب من جيلنا أحسنله في رأيه إنه بدل ما يدفع فلوس عشان يشترك في Netflix يروح يشتري لعبة Fortnite و يلعب .. لما لعبة زي Red Dead Redemption 2 تجيب في أول إسبوع من نزولها في السوق 700 مليون دولار يبقي إنت لازم تبص للبيزنس ده و تفهم إنه بيجيب فلوس أكتر من تجارة الحشيش.
ده بيزنيس بيجب في السنة 139 مليار دولار .. عارف دول قد إيه؟ .. هات إنت 42 مليار دولار بتوع أرباح بيزنس الأفلام الأميريكية و إجمعهم علي ال19 مليار دولار أرباح مبيعات الأغاني و الموسيقي اللي بيجيبها المغنيين الأمريكان و معلش زود عليهم ال15 مليار دولار أرباح بيزنس كرة القدم الأميريكية اللي تعتبر اللعبة الشعبية الأولي في أميركا و لسه إنت رحت فين زود عليهم ال10 مليار دولار بتوع بيزنس كرة السلة الأميريكية للمحترفين NBA و أرباح بيزنس دوري البيسبول و هوكي الجليد في أميركا .. إجمع كل دول علي بعض يطلعوا 99 مليار دولار قصاد ال139 مليار بتوع بيزنس Video Games .. الموضوع لسه تافه بالنسبة ليك؟
سر نجاح أي بيزنس هو إنك تهتم بالزبون .. حسس الزبون إنه مهم و حيجيلك تاني و تالت و يجيب صحابه و عيلته معاه .. عشان كده سبب إن بيزنس Video Games إتفتح علي البحري كده هو حاجة إسمها Live Streaming إنك إنت و صاحبك مثلاً بتلعبوا FIFA 20 علي البلاي ستيشن و تصوروا نفسكوا فيديو و ترفعوا الفيديو ده Live علي الإنترنت و غالباً بتتحط علي موقع إسمه Twitch و ده موقع بيدخله يومياً 15 مليون بني أدم و موقع زي ده هو السبب في إنتشار ألعاب زي Fortnite و PUBG و كل لعبة بقي ليها بطولات دولية زي بطولات العالم في الكورة كده .. حالياً فيه 2.4 مليار بني أدم بيلعبوا Video Games علي مستوي العالم و الرقم ده عمال يزيد .. ده معناه إن المفروض ده بيزنس عمال يعين في ناس تشتغل و بيخلق وظايف بالملايين بس ده مبيحصلش .. شركات زي Electronic Arts و Zynga و Activision من ضمن شركات كتير كل شوية تطلع تقول إنها حتمشي ناس .. لو إنت بتلعب PUBG عشان تطفي دماغك من قرف يوم طويل في الشغل فخلي بالك إن اللعبة دي مبنية علي تعب و شقي مهندسين برمجة بيطلع عين اللي جابوهم في الشغل ودي نقطة محتاجة تبقي مشروحة كويس.
لو إنت مهندس و إشتغلت في شركة بتعمل Video Games فإنت و إنت بتمضي العقد بتمضي علي إتفاقية سرية أو Non-Disclosure Agreement و إختصاراً بتتسمي NDA و دي بتخليك تحط جزمة في بقك و متتكلمش عن أي حاجة حصلت في الشغل حتي لو كانت جريمة يعاقب عليها القانون .. خليني أديلك مثال بسيط بشركة زي Telltale و دي الشركة اللي عملت لعبة The Walking Dead المبنية علي المسلسل اللي بنفس الإسم لو إنت بتتفرج عليه .. المهم في يوم الCEO بتاع الشركة قال أنا عايز أعمل إجتماع مع الناس كلها اللي شغالة في الشركة و فعلاً إتلموا كلهم في أوضة الإجتماعات الكبيرة و في الأول قعد يهزر معاهم و يقولهم نكت .. شوية و قالهم يا جماعة إحنا رحلتنا مع بعض إنتهت .. و زي أي باد بوي بيقطع علاقته ببنت قالهم إن مش حيبقي فيه أي تعويضات مادية و التأمين الصحي بتاعكوا حيخلص أخر الإسبوع و قدامكوا نص ساعة تلموا حاجتكوا من الشركة .. و هي دي المشكلة .. كل شركات Video Games اللي في السوق و أغلبها في أميركا بالمناسبة عامله زي شلة باد بويز بيشقطوا البنت من دول و يفضلوا يملوا دماغها بكلام زي إنتي مراتي يا بنت و انا خايف عليكي و ملكيش غيري في الدنيا و بمجرد ما ياخد اللي هو عايزه يرميها و يقولها مش إنتي اللي تنفع تبقي أم عيالي.
لو إنت إشتغلت في شركة Video Games فإنت فعلياً حتتفشخ .. مش بس إنت ممكن تمشي في أي وقت .. إنت كإنك شغال في دار الهندسة تروح الصبح تلاقي جواب Termination مستنيك في المكتب .. ECG بتصبح عليكوا يا دار .. كمان ساعات الشغل فشيخة .. إنت بتشتغل 7 أيام في الإسبوع بمعدل 16 ساعة في اليوم و مفيش أوفرتايم .. لو قررت إنك متقعدش في الشغل أكتر من 8 ساعات الرسمية بتوعك الHR حيقدم فيك شكوي و حتتفصل .. نيجي بقي لمواعيد التسيلمات .. قبل 3 شهور من معاد التسليم اللي هو معاد طرح اللعبة في السوق حضرتك بتفضل بايت في الشركة مبتروحش .. لو إنت متجوز فإنت ممكن تجيب مراتك تقعد معاك في الشركة شوية و أنا و المصحف ما بهزر .. الشركة بتتعامل معاك كأنك مسجون مسموحلك بساعات خلوة شرعية .. مفيش شركة Video Games مش بتعمل كده و الحكاية دي بتتسمي كرانش Crunch .. سنة 2017 إتعملت إحصائية قالت إن 95% من المصممين اللي شغالين في بيزنس Video Games فضلوا بايتين في شغلهم بالشهور قبل معاد التسليم و إن 80% منهم مخدوش فلوس الأوفر تايم .. إنت مش متخيل كم الضغط النفسي و اللي بيترجم لمشاكل صحية بتيجي للمهندسين اللي الشركة بتجبرهم يعملوا Crunch .. فيه منهم جاله PTSD و ده مرض نفسي إختصار Post-Traumatic Stress Disorder و ده عادة بيجي للي بيعملوا حادثة أو اللي بيخشوا حروب .. فيه منهم جاله فقدان ذاكرة و فيه منهم اللي جاله فتاق خلاهم يكحوا دم .. و هنا أنا محتاج أكلمك شوية عن أهم Video Game في السوق دلوقتي .. Fortnite.
دي لعبة عملتها شركة إسمها Epic Games و كسرت الدنيا .. حالياً فيه 250 مليون بني أدم بيلعبوا اللعبة دي علي مستوي العالم و جابت أرباح وصلت 3.9 مليار دولار بس مش دي القضية .. لعبة زي Fortnite جابت فكرة Crunch و ضربتها في الخلاط مع فيلم Saw .. اللعبة دي مبنية علي فكرة إسمها Micro-transaction Model .. يعني إيه البتاعة دي؟ .. بص يا سيدي .. إنت بتنزل اللعبة ببلاش و بتلعبها ببلاش بس بتدفع فلوس علي الإضافات زي الرقصات و اللبس و الأسلحة .. دي حاجة زي الفل لو إنت Gamer لإن معلش 5 دولار دي ولا حاجة عشان تجيب سلاح يخليك تكسب .. بس السلاح ده عشان يتصمم فيه مهندسين بيتفشخوا .. إذا كان زمان لعبة زي Call of Duty Black Ops عشان تنزل السوق فالمهندسين اللي بيصمموها بيخشوا في مود الCrunch قبل التسليم بكام شهر فدلوقتي لو إنت شغال علي لعبة Fortnite فإنت كل يوم عندك تسليمة .. الCrunch مبقاش 3 شهور في السنة ده بقي 12 شهر في السنة .. حضرتك لو بتصنف نفسك Gamer عايز اللعبة الجرافيك فيها يبقي أحسن و عايز ينزلك كل يوم رقصات جديدة و لبس جديد و أسلحة جديدة و كله بمبدأ بفلوسي يا كلاب .. أنا بشوف تعليقات الناس علي لعبة زي FIFA 20 و اللي يقولك أصل الGame Play فيها مش حلو أو إن الجرافيك فيها عايز يتضبط و بقول لنفسي إن فيه جيش من المهندسين و المبرمجين بيطلع ميتينهم عشان اللعبة تنزل و لما بتنزل الشركة بتمشي الموظفين بتوعها من غير ما تدفعلهم أوفر تايم .. بإختصار شديد شركات Video Games بتتعامل مع موظفيها زي ما إحنا إتعاملنا مع (حكيم) .. شوية كانت شعبيته أعلي من شعبية (عمرو دياب) و دلوقتي مبقاش حد يسمعه.
دلوقتي أنا عايز أختم بنقطة أنا جبت سيرتها في أول فقرة .. البنات .. زي ما قلتلك ألعاب زي PUBG و Fortnite خلت إن حالياً 48% من الGamers علي مستوي العالم بنات و دي نقلة كبيرة عن زمان بس في نفس الوقت لو بصيت علي اللي شغالين في بيزنس Video Games حتلاقي إن نسبة البنات فيهم 26% بس .. دلوقتي ده بيزنس أغلب اللي شغالين فيه ولاد و دي حاجة ممكن نبلعها لإن أساساً الهندسة شغلانة أغلب اللي شغالين فيها رجاله بس لإن المبرمجين اللي بيصمموا الألعاب رجاله فإنت حتلاقي حاجة غريبة أوي .. شخصيات البنات في الVideo Games لو بصيت عليها حتلاقيها كلها بنات كيرفي و لبسهم عريان و مبينيين نص صدرها .. بيزنس Video Games لو إنتي كبنت قررتي تشتغلي فيه فإعملي حسابك إن الولاد الللي شغالين معاكي حيقلوا أدبهم عليكي و لو مش مصدقاني يا باشمهندسة إتفرجي علي اللي بيحصل في شركة Riot Games و دي الشركة اللي عملت لعبة League of Legends .. دي شركة إترفع عليها 5 قواضي من بنات كانوا شغالين فيها بتهم إن البنات إترفض ترقيتهم و إتعرضوا لتحرش جنسي .. شركة Riot Games زيها زي شركات كتير في البيزنس الوسخ ده.
شوف أنا عارف إن فيه ناس حتقرأ الكلام ده و تقول و أنا مالي يا لمبي و صدقني أنا متفهم قصدك جداً .. إنت كGamer مش حتبطل تلعب ولا حتهتم بطبيعة شغل الناس اللي بتتفحت عشان اللعبة تنزل .. بس يمكن أملي إنك تقدر تشغلهم و المقالة دي إعتبرها إني بفتح عنيك علي بيزنس ضخم جداً إنت زبون فيه و قبل ما تشتكي إن FFIA 20 الجرافيك فيها وحش إفتكر حال الناس اللي عملته.
المصدر:
حلقة من برنامج Patriot Act with Hassan Minhaj إتعرضت علي قناة Netflix و ده لينك الحلقة كاملة علي YouTube لو حبيت تشوفها:
ps://www.youtube.com/watch?v=pLAi_cmly6Q&t=248s
