حقل غاز ظهر .. حاجة حلوة ولا حاجة وحشة (الجزء الثاني)

اللي حنتكلم عنه النهارده هو حقل ظهر للغاز الطبيعي واللي فتحنا سيرته قبل كده في مقالة هنا لو حبيت تقراها .. النهارده حابين بس نراجع شوية الموضوع عشان ميتنساش ونفضل فاكرين والنهارده حنراجع تاني إجابة السؤال اللي سألناه في المقالة الأولانية: دلوقتي إحنا إكتشفنا حقل ظهر ده في 2015 و وقتها إتقال إن الحقل ده هو الحل لكل مشاكل مصر بتاعة الطاقة طب ليه بقي مضينا الإتفاق مع إسرائيل إننا نستورد منهم غاز طبيعي؟

الكلام اللي علي الورق الرسمي و اللي لو سألت أي حد من الحكومة المصرية حتلاقيه حافظه صم هو إن يوم 19 فبراير 2018 شركة قطاع خاص مصرية إسمها دولفينوس القابضة Dolphinus Holdings مضت عقد مع شركة أميريكية إسمها نوبل إينيرجي Nobel Energy عشان تشتري منهم غاز طبيعي جاي من حقلين Offshore يعني جوه مياه البحر المتوسط تحت سيطرة إسرائيل اللي هم حقلي تامار Tamar و ليفايثان Leviathan .. برده أي حد في الحكومة المصرية حتلاقيه حافظ القصيدة بتاعة إن مشاكل مصر في الطاقة قديمة من أيام 2006 لما كان (سامح فهمي) ماسك وزارة البترول وحتلاقيه بيرصلك النقط المحفوظة لتاريخ مشكلة الطاقة في مصر:

• المشكلة وقتها إن البنزين و السولار و الغاز الطبيعي كانت الحكومة بتبيعه مدعوم بسعر أقل من سعر السوق فشركات البترول راحت إشتكت إن أرباحها بتقل لحد ما وصلنا إن في 2011 لما قامت ثورة يناير و الإستثمارات في قطاع البترول ماتت خالص.
• لو تفتكر مصر وقتها كانت بتصدر غاز طبيعي لإسرائيل و الأردن بس كان كل شوية بعد الثورة يحصل تفجير في خط الأنابيب اللي ماشي جوه شبه جزيرة سيناء لحد ما مصر في الأخر زهقت و بطلت تصدر غاز خالص للإتنين .. كمان مصر كان حيلتها محطتين إسالة غاز طبيعي LNG واحدة في إدكو عملتها شركة BG اللي هي دلوقتي شركة Shell الهولندية و الثانية في دمياط عملتها شركة Eni الإيطالية و الإتنين وصل بيهم الحال بعد الثورة إنهم بطلوا شغل.

حط كل ده جنب بعضه تلاقي نفسك لما بتسمع الكلام ده زي ما يكون إتعملك غسيل مخ و بقيت بتقول أيوه يبقي خلال الفترة من 2011 لحد 2013 الثورة و فترة حكم (محمد مرسي) الله يرحمه هم السبب في كل مشاكل الطاقة في مصر و إن هم السبب في الإنقطاع المستمر للكهرباء اللي كان بيحصل و هو السبب إن البلد كانت مضطرة تشتري بترول من بره وده سبب عبء إضافي علي ميزانية الدولة .. برده الإخوة بتوع الحكومة عارفين باقي القصيدة و حافظينها كويس واللي برده لما بتسمع كلامهم بتلاقيه منطقي جداً و في الأخر بيخلوك تقنع نفسك بالإستنتاج اللي هو انت متقدرش تنكر إن لما الرئيس (عبدالفتاح السيسي) مسك الحكم فهو قدر يسيطر علي مشكلة قطع الكهرباء.

بس في نفس الوقت متقدرش تنكر إن الحكومة في عهده وافقت علي إنها ترفع السعر اللي هي مستعده تشتري به الغاز الطبيعي اللي حيستخرج من أي حقل  من الإكتشافات الجديدة اللي حتلاقيها مملوكة لشركات التنقيب الأجنبية عشان تحفز شركات البترول الأجنبية إنها تيجي تستثمر فلوسها في التنقيب عن إكتشافات غاز جديد .. متقدرش تنكر برده إن في عهده بدأت عجلة رفع الدعم عن الطاقة تشتغل و النقطة دي بالذات خلت إن الفلوس الزيادة اللي بتاخدها الحكومة من رفع سعر البنزين و السولار بتروح إنهم يستوردوا بيها غاز طبيعي مسال LNG عشان يسدوا به العجز في الطاقة في مصر واللي بسببه انت شايف إن الكهرباء مبتقطعش .. المشكلة إن الLNG اللي إحنا بنستورده من بره غالي مش رخيص .. انت خلال السنة المالية 2015-2016 البلد دفعت 3.55 مليار دولار عشان تشتري غاز طبيعي من بره ودي حصة محترمة من ال18.7 مليار دولار اللي هم إجمالي العجز في الموازنة بتاعتنا.

ركز بقي معايا .. الكلام ده فضل من 2013 لحد 2015 اللي هي السنة بتاعة إكتشاف حقل ظهر و إكتشفت فيها شوية حقول غاز تانية علي إيد شركات Eni الإيطالية و BP البريطانية .. قول يا سيدي إنك محتاج علي الأقل سنتين ونص عشان تحول حقل ظهر ده من حقل مكتشف لحقل انت تقدر تستخرج منه غاز طبيعي فانت فعلياً بتتكلم إن حقل ظهر ده حيبدأ يشتغل معاك من سنة 2017 و عشان خاطري خليها 2018 .. يعني الكلام علي إن مصر فعلياً مش حتبقي محتاجه تستورد LNG خالص بداية من السنة اللي إحنا فيها .. مش كده وبس .. الكلام كان إن المفروض مصر تبدأ تصدر غاز طبيعي بداية من سنة 2019 فاظن السؤال دلوقتي هو انت ليه رايح تشتري غاز طبيعي من إسرائيل؟ و ليه عمال ترفع من سعر البنزين و السولار في مصر؟ وصدقني لو قلتلك إن الموضوع ملوش علاقة بيك خالص كمواطن.

• نقطة أولانية هي إن البلد دي مش رايحه في سكة Renewable Energy و حتي فكرة المفاعل النووي اللي روسيا حتعمله  في الضبعة تحس إن البلد بتاخد في السكة دي خطوة و ترجع خطوتين تلاتة .. انت بتسمع إن البلد ناوية تعمل محطة طاقة شمسية بس محطة واحدة عمرها ما حتكفي إنها تلبي إحتياجات مصر من الطاقة وعشان كده البلد دي لسه ماشيه في سكة إنها تعمل محطات إنتاج كهرباء بالغاز الطبيعي و المحطات دي حوت غاز .. الخوف إن لو إحنا مستوردناش غاز و إكتفينا بالغاز اللي بيطلع من ظهر و غير ظهر فإحنا علي سنة 2021 الغاز اللي بننتجه يدوبك حيكفي إحتياجاتنا ومش حنلاقي غاز نصدره.

• فيه هسهس في رأس الناس بتاعة الحكومة إسمه إن مصر عايزه تبقي Gas Hub اللي هو بمنتهي البساطة تبقي سوق الجملة بتاع الغاز الطبيعي في منطقة شرق البحر المتوسط .. انت عايز الغاز الطبيعي بتاع قبرص و إسرائيل و الأردن يجيلك تقوم مسيله و مصدره و اللي عايز يجي يشتري منك اللي هو نفس مفهوم سوق الجملة بالضبط بس حط في إعتبارك إن الحقول اللي انت بتتكلم عنها كلها جوه المياه .. المشكلة في حاجة .. الأتراك متخانقين مع القبارصة و الإسرائيليين متخانقين مع اللبنانيين و مع الأتراك والأتراك متخانقين مع الإسرائيليين ومع القبارصة ومع اليونانيين وده معناه إن مفيش شركة زي Eni أو BP مجنونة عشان تحط فلوسها في حقل زي تامار الإسرائيلي عشان تاني يوم تقوم حرب بين إسرائيل و حزب الله وهوبا الحقل يتقفل بحجة تأمينه .. السؤال دلوقتي .. انت إزاي تعمل خطوط أنابيب توصلك الغاز بتاع الحقول دي كلها لحد عندك؟ ويا تري حتعرف تأمنها؟ ومين حيدفع تمن الأنابيب دي كلها؟ .. لو انت عايز تبقي سمسار و تخدم حكومات الدول اللي حوليك إزاي تقدر تعمل كده والدول دي أساساً مش عايزه الخير لبعض؟

• فكك من الحكومات يا سيدي .. حتي شركات البترول اللي شغاله في البحر المتوسط عندهم إستعداد يسببوا خساير لبعض علي إنهم يفيدوك انت شخصياً .. عندك شركة زي Eni الإيطالية اللي إكتشفت حقل ظهر و اللي إكتشفت برده حقل تاني في قبرص إسمه كاليبسو تقريباً بنفس سعة حقل ظهر وطبعاً Eni أحسنلها إن خط الأنابيب اللي هي عملته عشان تطور حقل ظهر تستخدمه هو هو عشان تجيب به الغاز اللي حيطلع من حقل كاليبسو و توديهم لمحطة الإسالة اللي هي عملتها في دمياط .. ده معناه إن Eni مش محتاجه ومش من مصلحتها إنها تروح تشتري الغاز بتاع شركة Nobel اللي ماسكة حقل تامار الإسرائيلي ولا حتي إنها تروح تشتري غاز من قبرص من حقل أفروديتي واللي ماسكاه شركة Nobel برده بالتعاون مع Shell .. ده السبب اللي خلي Nobel تقبل من الأساس إنها تبيع الغاز بتاعها لمصر بسعر مخفض لشركة دولفينوس مع إن كان ممكن مصر تشتري الغاز من Eni اللي هي أساساً ماسكه حقل ظهر.

أظن السؤال اللي انا بحاول أفهمه و بحاول أجاوب عليه ومش عارف هو إزاي إحنا ناويين نبقي Gas Hub و إحنا ملناش علاقات كويسة لا مع كل دول شرق البحر المتوسط ولا حتي مع كل شركات البترول اللي شغاله فيه وده اللي انت محتاج تكون حاطه في دماغك لما تبص علي الإتفاق اللي عملته شركة دولفينوس القابضة بالنيابة عن الحكومة .. دلوقتي محطتين LNG بتوعنا في إدكو و دمياط عندهم القدرة لو إشتغلوا بأقصي طاقتهم إنهم يصدروا 7.5 مليار متر مكعب غاز طبيعي في السنة .. الإتفاق اللي دولفينوس القابضة مضته مع Nobel Energy بيقول إن مصر حيجيلها 64 مليار متر مكعب غاز إسرائيلي علي مدي 10 سنين يعني بتتكلم عن 6.4 مليار متر مكعب غاز في السنة .. الفكرة إن حتي لو الغاز ده مدخلش مصر للإستهلاك المحلي فالغاز ده كفيل إنه يشغل المحطتين Full Capacity لمدة 10 سنين .. زود علي كده إن لما ان شاء الله Eni تبدأ تضخ الغاز من حقل كاليبسوا القبرصي لمحطة الإسالة في دمياط فإحنا نقدر نفضل نصدر غاز طبيعي حتي لو إحنا إستهلاكنا المحلي نط جامد.

فكرة تانية هي و إن السعوديين هبت في دماغهم يعملوا مدينة صناعية إسمها نيوم حيعملوها علي خليج العقبة بين السعودية و الأردن و مصر و حتكون مدينة حسب كلامهم يعني ماشية بالRobots  اللي هو انا مش فاهم ده معناه إيه أوي بس علي الأقل اللي انا متؤكد منه إن المدينة دي حتحتاج مصدر طاقة كبير .. المشكلة إن السعودية رغم إن عندها إحتياطي نفط كبير بس هي معندهاش حقول غاز طبيعي فانت ممكن تخليهم يخشوا اللعبة بإنهم يستوردوا غاز طبيعي مسال منك.

بص انا عارف إن انا لخبطتك و مدتكش عقاد نافع بس هي دي طبيعة الBusiness و الإقتصاد عموما .. من ناحية انا فاهم إن علي الورق و الحسابات فكرة إنك تاخد الغاز بتاع إسرائيل مفيدة ليك بس بشرط إنك تاخده تسيله و تبيعه بالنيابة عنهم و تاخد نسبتك من الأرباح .. انا عارف إن فيه ناس (وانا منهم) شايفين إننا نجوع ولا إننا نفيد الإسرائيليين في مليم يخش جيبهم بس خليني أتكلم بصفتي محامي الشيطان دلوقتي .. اللي انا مش قادر أفهمه هو ليه انا أدفع فلوس للإسرائيليين عشان أخد منهم الغاز ده؟ وليه أساساً أشارك ولو بجنيه في وضع الInfrastructure بتاعة المشروع؟

المصدر:
 مقالة بعنوان Importing Israeli natural gas makes sense for Egypt نشرت في مجلة Bloomberg وده لينك المقالة الأصلية:
https://www.bloomberg.com/view/articles/2018-03-19/egypt-israel-natural-gas-deal-could-reshape-middle-east-energy