عشان تفهم العنوان اللي إلي حد ما غريب حاول تحط نفسك مكان اللي ماسك شركة المراعي السعودية .. شركة المراعي تعتبر من أكبر شركات صناعة الأغذية في العالم و كتير من منتجاتها مبينزلش مصر فخلينا حتي نفترض يا سيدي إن الشركة دي مش بتبيع غير علب لبن و زبادي فعشان تجيب كمية اللبن الرهيبة دي لازم يبقي عندك مزارع مواشي كتير و بتربي فيها بقر كتير .. عشان بس أكون دقيق شركة المراعي تحت إيدها 93,000 بقرة .. حلو .. البقر ده محتاج ياكل و أكتر أكل بيحبه البقر هو البرسيم و خصوصاً نوع برسيم إسمه البرسيم الحجازي أو اللي بالإنجليزي بيتسمي AlfAlfa .. حلو أوي .. مشكلة البرسيم الحجازي أو أي نوع برسيم عموماً إنه بيستهلك كمية مياه كبيرة و لإن السعودية زي ما أنتوا عارفين بلد صحراوية فزراعة البرسيم بيهلك التربة و بيخلص علي موارد المياه اللي هي أساساً مش مكفية إحتياجات الناس من الشرب .. عشان كده بداية من سنة 2016 و الحكومة السعودية منعت خالص زراعة البرسيم .. يبقي السؤال اللي كان حياكل دماغ الناس اللي ماسكة شركة المراعي: نأكل ال93,000 بقرة دول إزاي؟
الحل اللي شركة المراعي فكرت فيه هو ليه لا نشتري أرض زراعية في أي بلد بسعر رخيص و نخلي الفلاحين اللي في البلد دي يزرعوا برسيم و ناخده منهم؟ .. سنة 2012 شركة المراعي إشترت 30,000 فدان في الأرجنتين .. سنة 2014 خدوا حتة أرض في ولاية أريزونا الأميريكية .. سنة 2015 بقي أشتروا 1700 فدان في حتة إسمها بلايث Blythe و دي تبقي أرض صحراوية علي نهر إسمه كولورادو و يدوبك علي بعد سفرية 4 ساعات بالعربية من مدينة لوس أنجيليس .. حالياً شركة المراعي بتملك 15,000 فدان في بلايث و ده بيمثل 16% من إجمالي الأرض الزراعية في المنطقة مش مزروع فيهم محصول إلا البرسيم الحجازي عشان كل شهر المحصول ده يتحط في حاويات و يسافر لحد ميناء مدينة الملك (عبدالله) علي البحر الأحمر عشان يروح لمزارع شركة المراعي .. إسم المراعي مش هو الإسم اللي موجود علي عقد بيع الأرض خلي بالك .. هم تحت منهم شركة أميريكية إسمها مزارع فوندومونتي Fondomonte Farms مملوكة للمراعي و هي اللي إسمها علي المزارع و هي اللي إسمها علي عقد بيع حتة الأرض.
اللي أنا عايز أتكلم عنه دلوقتي هو إشمعني بلايث Blythe؟ ليه شركة المراعي إختارت الحتة دي بالذات دونا عن باقي الأراضي الزراعية في أميركا عشان تروح تشتري فيها أرض تزرع عليها برسيم؟ .. الإجابة عن السؤال ده حتخليني أرجعك بالزمن لسنة 1877 .. في الوقت ده كان فيه واحد إسمه (توماس بلايث Thomas Blythe) شاف بعينه و الناس عماله تروح تدور علي الذهب في كل حتة في غرب أميركا فراح يدور معاهم .. عينه لقطت الحتة دي من الصحراء علي ضفاف نهر كولورادو و اللي محدش مهتم بيها ولا حد عايز يقرب منها فخدها تقدر تقول كده وضع يد و إتسمت علي إسمه و قدم طلب إتوافق عليه من الحكومة الفيدرالية الأميريكية بحيث أهل الحتة اللي هو خدها ياخدوا أي كمية مياه هم عايزينها للشرب أو الزراعة من نهر كولورادو و محدش يقدر يقولهم تلت التلاتة كام.
(توماس بلايث) مات و دلوقتي الإتفاق اللي هو مضاه مع الحكومة مملوك لشركة مياه مقاطعة بالو فيردي Palo Verde Irrigation District .. ده معناه إن شركة المياه دي مينفعش مثلاً إن شركة Nestle تروح تشتري منهم مياه .. قانوناً ده مينفعش .. بس اللي بيحصل إن لو أنا فلاح عايش في بلايث فأنا بدفع كل سنة 77 دولار علي الفدان اللي بملكه ثمن مياه الري و مش حتفرق بقي أنا ببعزق المياه بتاعتي إزاي .. عادة في أي حتة تانية في أميركا إنت كفلاح بتتحاسب علي المياه زي ما إنت بتتحاسب علي إستهلاك المياه في شقتك .. بيبقي فيه عداد بيحسب إنت سحبت كام متر مكعب مياه و بيحاسبك عليهم .. عشان كده الفلاح في أميركا من مصلحته إنه يحط في فلوسه في تكنولوجيا الري بالتنقيط و أي تكنولوجيا تانية بتوفرله في إستهلاك المياه لإن المياه دي بفلوس .. الوضع مش كده في بلايث .. لو أنا فلاح هناك فأنا حزرع اللي أزرعه و أروي اللي أرويه و محدش له حاجة عندي إلا ال77 دولار اللي كل سنة اللي بدفعهم .. عشان كده شركة المراعي إختارت بلايث عشان تشتري فيها أرض زراعية يتزرع عليها برسيم.
بس ده مش معناه إن الدنيا زبادي خلاط بالنسبة لشركة للمراعي و شركة مزارع فوندومونتي Fondomonte Farms اللي مملوكة ليها .. بسبب سوء حالة الجفاف اللي ضربت ولاية كاليفورنيا من أكتر من 20 سنة و لسه مفيش أي ملامح إن موجة الجفاف دي حتقل فاللي حصل من 3 سنين الحكومة حطت قرار حيتطبق لمدة 30 سنة و القرار ده بيقول إن كل فلاح عنده حتة أرض فهو مش حيزرعها كلها إنما حيفضل جزء من أرضه ميتزرعش عشان ميستهلكش مياه زيادة و المياه اللي إتوفرت دي حتروح للمدن الكبيرة سواء لوس أنجيليس أو دنفر أو فينيكس لسد إحتياجات الناس من مياه الشرب .. طبعاً القرار ده مخلي شركة مزارع فوندومونتي كل يوم في خناقة مع الولاية لإنهم عايزين يزرعوا كل متر مربع يقدروا يزرعوه بالبرسيم عشان البهايم بتاعة شركة المراعي في السعودية تاكل .. بس إذا كانت العلاقة بين شركة مزارع فوندومونتي و بين الحكومة متوترة فالعلاقة بينهم و بين أهل بلايث زي العلاقة بين الكنافة و النوتيلا كده.
مهم تكون فاهم إن بلايث دي منطقة بتتعامل نفس معاملة الحكومة لأي قرية بسيطة في الريف عندنا في مصر .. إذا كان علي مستوي أميركا كلها 12% من السكان عايشين تحت خط الفقر ففي بلايث الرقم ده بينط 23% .. دي قرية عايش فيها 21,000 بني أدم منهم 6000 محبوسين في واحد من السجنين اللي في الولاية .. بالنسبة لأهل بلايث فشركة مزارع فوندومونتي دي هي الأمل الوحيد ليهم .. دي شركة مشغلة 100 بني أدم بتديلهم مرتب و موفرالهم تأمين صحي .. مش بس كده .. كتير من الفلاحين اللي عندهم الأرض بتاعتهم بيزرعوا برسيم مخصوص عشان الشركة تشتريه منهم.
دلوقتي الأمريكان مقسومين نصين .. نص بيقول فكك من المراعي و فكك من السعودية خالص .. دلوقتي محصول البرسيم الحجازي ده هو ثالث أكتر منتج بتنتجه أميركا .. ده حقيقي بالمناسبة .. بس 4% من إجمالي المحصول اللي أميركا بتنتجه بيتصدر .. حلو فين المشكلة بقي؟ .. لو جيت تبص علي الولايات الموجودة غرب أميركا تلاقيها هي أكتر ولايات بتصدر البرسيم اللي هي بتحصده عشان الولايات دي قريبة من الموانيء الأميريكية علي المحيط الهاديء اللي بتاخد البرسيم ده تشحنه لدول زي الصين و اليابان و السعودية .. 15% من إجمالي البرسيم اللي الولايات الغربية بتزرعه بيتصدر .. طب برده انا مفهمتش المشكلة فين؟ .. المشكلة إن الولايات دي بقالها أكتر 20 سنة بتعاني من موجة جفاف و المشكلة إن محصول البرسيم لوحده من أكتر المحاصيل الزراعية اللي بتحتاج مياه فانت زي ما تقول كده السعودية بتشتري المياه اللي كان ممكن الأمريكان يستخدموها للشرب عشان تخلي الفلاحين الأمريكان يزرعولها برسيم تاخده هي تأكله للبهايم بتوع شركة المراعي .. النص الثاني بقي بيقول إيه الهبد اللي أنتوا بتقولوه ده .. طب ما تبصوا لمحصول اللوز اللي هو كمان محصول بيستهلك كمية مياه كبيرة و عندك ولاية زي كاليفورنيا بتصدر 70% من إجمالي محصول اللوز بتاعها .. ولا أنتوا يعني بتتكلموا علي إن مشكلة البرسيم إنه محصول البشر مش بياكلوه .. طب هو مش البرسيم ده بيروح للبهايم .. و البهايم دي بناخد منها لبن .. و اللبن ده بنتنيل نعمل منه زبادي و أيس كريم.
فدلوقتي عشان بس ألخلصلك الدنيا .. انت بتتكلم عن حتة صحيح إنها صحراوية بس عايشة علي ضفاف نهر كولورادو اللي بيشرب منه 40 مليون بني ادم و بيروي 4 مليون فدان .. ده نهر عمال يتسحب منه مياه بسبب الزيادة السكانية في المدن الكبيرة اللي إتبنت علي ضفافه زي دينفر و لوس أنجيليس و فوينكس .. ده نهر كمية المياه اللي فيه عماله تقل يوم عن يوم بسبب ظاهرة التغييرات المناخية .. ده نهر في منطقة بقالها أكتر من 20 سنة ربنا مبتليها بموجة جفاف مش عايزة تخلص بس بسبب ثغرة قانونية بسيطة الفلاحين الأمريكان راضيين إنهم ياخدوا فلوس عشان يزرعوا برسيم و البرسيم ده يتصدر للسعودية عشان شركة المراعي تاخده تأكله للبقر بتوعها .. بمنتهي البساطة سبب إن فيه كتير من الأمريكان مش عاجبهم ده لا له علاقة بالإحتباس الحراري ولا له علاقة بمحصول البرسيم نفسه .. الموضوع له علاقة إن السعودية هي اللي بتاخد البرسيم ده .. عارف لو دولة تانية .. ولا كان حد فتح بقه.
المصدر:
- مقالة بعنوان Who Keeps Buying California’s Scarce Water? Saudi Arabia .. نشرت في جريدة The Guardian و ده لينك المقالة الأصلية:
/www.theguardian.com/us-news/2019/mar/25/california-water-drought-scarce-saudi-arabia
