اللي حنتكلم عنه النهاردة هو السيدة الفاضلة اللي قدامك في الصورة دي .. السيدة دي إسمها (زهو كونفي Zhou Qunfei) و دي في حالة إنك بتسأل نفسك تبقي بنت مين في البلد فهي عندها 47 سنة و دي تبقي مؤسسة و المديرة التنفيذية CEO لشركة إسمها Lens Technology و دي شركة شغالة في تصنيع الشاشات الزجاجية بتاعه الSmartphones و من ضمن زباينها شركة Apple .. المهم إن بناء علي كلام مؤسسة بلومبيرج Bloomberg فالسيدة دي تبقي أغني مليارديرة عصامية في العالم يعني عملت ثروتها بنفسها .. التقديرات بتقول إن ثروة السيدة دي تقدر بحوالي 9 مليار دولار .. ده بيخلي (زهو كونفي) أصغر مليارديرة في العالم عموما سواء بقي عصامية عملت فلوسها بنفسها أو ورثت فلوسها عن أبوها .. بإختصار دي أغني و أصغر مليارديرة في العالم .. إنبهرت ولا لسه؟
بناء علي Website إسمه Hurun متخصص في متابعة أخبار أغنياء الصين فالسيدة دي تبقي واحدة من ضمن جيل كامل في الصين من الناس اللي قدروا يعملوا Business لنفسهم و يبقوا مليارديرات بسبب الطريقة اللي الصين ماشية بيها .. علي فكرة دولة شيوعية بس مش إشتراكية .. الصين دولة بيحكمها حزب واحد بس اللي هو الحزب الشيوعي لكن نظام الحكم بدأ يتحول ببطء من النظام الإشتراكي للنظام الرأسمالي .. الفرق إن يمكن الصين طبقت الرأسمالية بحيث متتكرش الأخطاء اللي وقعت فيها الدول الغربية بإنها عملت نظام يضمن تساوي الفرص بين الرجال و النساء .. ده فتح الباب قدام نساء كتير في الصين إنها تعمل Business بتاعها و تكبر و تكسب فلوس و يبقوا مليارديرات مش بس مليونيرات.
السيدة (زهو كونفي) إتولدت في مزرعة يعني فلاحة زي ما بنقول عندنا في مصر .. و هي عندها 16 سنة سابت التعليم عشان تروح تشتغل في مصنع بيعمل عدسات الشاشات بتاعة الساعات .. و هي بتكبر شافت بنفسها إزاي الصين بتتحول للنظام الرأسمالي و شافت سياسة الإنفتاح و هي بتطبق عندها .. بس الصين طبقت الإنفتاح بشكل مختلف خالص عن الإنفتاح بتاعنا في مصر .. لما كان عندها 22 سنة و الكلام ده سنة 1993 كانت حوشت كام ألف دولار من سنين شغلها و قدرت إنها تؤسس شركتها الخاصة.
تخيل معايا للحظة إن دولة تفتح الباب قدام الناس اللي عندها طموح إنهم حتي لو سنهم صغير ياخدوا الRisk و يعملوا شركاتهم الخاصة و مش في مجال الأكل و المطاعم إنما في مجال معقد زي شاشات الموبايلات و الSmartphones .. سنة 2015 مجلة Time الأميريكية عملت معاها Interview حكت فيه (زهو كونفي) إزاي خدت قرار إنها تعمل شركتها الخاصة و قالت:
“في القرية اللي انا إتولدت فيها بنات كتير مكنش في إيدهم قرار هل يكملوا تعليمهم ولا لا .. ممكن البنت أهلها يجبروها تتخطب و تتجوز و تقعد في البيت و تقضي طول حياتها في القرية اللي هي إتولدت فيها .. انا كان في إيدي إني أقرر و قررت إني أعمل الBusiness بتاعي و عمري ما ندمت علي قراري ده”
لمدة 10 سنين كاملة من 1993 لحد 2003 و شركتها بتكبر ببطء لحد ما في يوم جالها تليفون غير حياتها من شركة Motorola الأميريكية .. الشركة كانت عايزه تعمل شاشات مضادة للخدش عشان يركبوها علي موبايل Razr V3 .. بتحكي (زهو كونفي) إن الشركة لما كلمتها قالولها إنهم عايزين إجابة بأه أو لا .. و هي قررت في لحظتها أه .. فجأة إسم شركتها بدأ يسمع في العالم و بقي بيجيلها طلبات من شركات HTC و Nokia و Samsung لحد ما في سنة 2007 شركة Apple كلموها و كانت وقتها بتحضر إنها تطلع للعالم أول موبايل iPhone.
بالفلوس اللي بتاخدها بدأت (زهو كونفي) إنها تستثمر فلوس في إنها تعين فنيين و مهندسين مستواهم عالي أوي و خلال 5 سنين بس يعني مع سنة 2012 كانت بتحضر إنها تفتح 3 مصانع في الصين في 3 مدن مختلفة .. دلوقتي شركة Lens Technology بتاعتها قيمتها في السوق 11 مليار دولار و مؤسسة Bloomberg بتقدر ثروة (زهو كونفي) بحوالي 9.2 مليار دولار .. دلوقتي سنة 2017 الشركة ليها علي الأقل 32 مصنع في 7 أماكن مختلفة و شغال فيها 90,0 موظف.
شايفك يا اللي بتقول أكيد واحدة زيها متجوزتش أصل أكيد سيدة زي دي مش حتنجح النجاح ده كله و هي متجوزة .. أحب أقولك إنها إتجوزت مرتين و عندها طفلين واحد منهم من جوازتها الأولانية و بتشتغل 18 ساعة في اليوم و لإنها مليارديرة و مش شغالة عند حد فهي عندها شقة ملحقة بمكتبها .. لإنها سيدة أعمال فلبسها لازم يبقي في أغلبه Formal و هي بتحب أوي البدل الحريمي من ماركة Christian Dior .. هو محدش عارف أوي بالتفصيل هي بتصرف فلوسها إزاي بس اللي أقدر أقوله ليك إن كل التحليلات الصحفية اللي إتعملت عليها بتقول إنها سيدة بتهتم جداً بالتفاصيل و بتحب تكون عارفة كل حاجة .. يمكن ده سببه إنها إتولدت في بيئة فقيرة في الأرياف و كمان والدها كان أعمي و بالتالي البيت كله كان لازم يتنظم بحيث ميخبطش في حاجة و يعور نفسه .. في نفس الوقت بسبب إنها إتولدت في بيئة فقيرة في كل اللي إشتغلوا معاها بيلاحظوا إنها متواضعة جداً.
المصدر:
مقالة بعنوان Meet the High School Dropout Who is Now the Richest Self-Made Woman on Earth نشرت في مجلة Time و ده لينك المقالة الأصلية:
http://time.com/money/4853109/billionaires-zhou-qunfei-youngest-self-made-woman-tech/
