لينك التسجيل الصوتي للمقالة علي Sound Cloud:
https://soundcloud.com/user-112011687-312727988/universal-basic-income?si=79d31f545e654dc69e7f83d17fefaedd&utm_source=clipboard&utm_medium=text&utm_campaign=social_sharing
تخيل معايا كده وإنت شحط كبير بتتشغل والمفروض يعني إنك مؤهل تفتح بيت إن أبوك يقولك أنا حديلك مصروف في إيدك كل أول شهر .. المصروف ده مش مربوط بإنك تساعد في شغل البيت ولا مربوط بإنك توصل أختك للكلية كل يوم الصبح قبل ما تروح الشغل .. أبوك حيديك المصروف ده من غير أي شروط .. تفتكر إنت وقتها حتحس بإيه؟ .. حتتصرف إزاي؟ .. حتصرف الفلوس اللي جايالك دي في إيه؟ .. حتبعزقها علي حاجات ملهاش لازمة ولا حتخش بيها جمعية؟ .. هو ده بإختصار مفهوم حاجة إسمها Universal Basic Income أو المرتب الأساسي اللي البلد تقرر إنها تديهولك بغض النظر معاليك بتشتغل أو لا واللي بيسموه إختصاراً UBI .. نفس فكرة المصروف اللي أبوك قرر يديهولك .. عارف إني إتكلمت عن الفكرة دي علي إنها واحدة من الأعمدة اللي الإشتراكية الجديدة بانيه الريمونتادا بتاعتها عليها بس مجرد إنك تقعد وسط ناس بتفهم في الإقتصاد وترميلهم في وسط كلامك إنك مع فكرة Universal Basic Income دي كفيلة إنها تخليهم يمسكوا في خناق بعض لإن فعلياً الفكرة رغم إنها سهل تتفهم ومفيش أبسط من شرحها إلا إنك لما تيجي تفكر فيها شوية حتلاقي مخك بيسخن من كتر الأسئلة اللي إنت بتسألها لنفسك ومش لاقي ليها إجابة.
يعني مثلاً .. هو المرتب ده حيبقي كام؟ .. مين اللي حياخده؟ .. هل فيه سن معين تبدأ تاخد المرتب ده عنده؟ .. هل المرتب ده ثابت علي البلد كلها أيا كان أنا عايش في أنهي محافظة؟ .. أسئلة كتير بس يمكن أهم سؤال هو هل بالصلاة علي النبي الفكرة دي أصلاً بتجيب نتيجة؟ وده السؤال اللي أنا عايز أجاوب عليه النهاردة وعشان نجاوب عليه عايزين ناخد حالتين إتطبقت فيهم تجربة Universal Basic Income والحقيقة إنهم حالتين أو تجربتين عكس بعض في كل حاجة اللي هم تجربة كينيا وتجربة فنلندا .. الأولانية بلد اللي عايشين فيها متداس علي وشهم من الفقر والثانية أهلها مش عارفين يودوا فلوسهم فين ومن غير ما أطول عليك خليني أخش في تفاصيل التجربتين عشان نعرف الإجابة عن سؤال هل Universal Basic Income ده هو أحسن إختراع بعد الشويبس جولد ولا مكانها مزبلة التاريخ زي شويبس رمان؟
تجربة كينيا مع Universal Basic Income .. الفلوس بتجيب فلوس:
كينيا بلد فقيرة ودي معلومة تقريباً مفيش حد مش عارفها بس جوه كينيا فيه مقاطعة إسمها سيايا Siaya الناس اللي عايشين فيها فعلياً حالهم يصعب علي الكافر .. إذا كان خط الفقر اللي الحكومة الكينية حاطاه هو 16 دولار في الشهر يعني بتتكلم عن 832 جنية في الشهر اللي هو 70 جنية في اليوم فالناس اللي عايشين في المقاطعة دي فعلياً دخلهم أقل من كده .. أغلب أهل المقاطعة دي شغالين في الزراعة وعايشين في بيوت من الخوص .. الناس دي متداس علي وشها بكل ما تحمله الكلمة من معني .. اللي حصل إن سنة 2014 فيه فريق من علماء الإقتصاد من 5 جامعات اللي هم بيركيلي وبرينستون وكاليفورنيا وسان دييجو ومعاهم معهد ماساسوشتس للتكنولوجيا MIT إتعاونوا مع جمعية خيرية إسمها جيف- دايركتلي GiveDirectly عشان يعرفوا هو إيه اللي يحصل لو إدينا لأهل المقاطعة دي فلوس كاش في إيدهم؟
التجربة كانت إننا حنوزع 10 مليون دولار علي 328 قرية بحيث إننا حننقي 10,500 أسرة والأساس اللي حننقي الأسر دي عليه إن لو الأسرة عايشة في بيت من الخوص فهي كده حتبقي مؤهلة إنها تاخد 1000 دولار علي 3 مراحل .. عشان بس تكون فاهم .. اللي حصل ده بيسموه Fiscal Shock أو صدمة مالية .. بمعني .. دي ناس فقيرة الفلوس مش بتجري في إيدها فلما مرة واحدة تديهم فلوس تعادل 15% من إجمالي الفلوس اللي هم بيعملوها في السنة ففعلياً الله أعلم الناس دي ممكن تعمل إيه بالفلوس؟ .. إنك تدي الناس الفلوس ده كان الجزء السهل .. الجزء الصعب إنك تدرس تأثير الفلوس دي علي حياة الأسر اللي خدت الفلوس واللي مخدتش الفلوس وعلي السوق .. التجربة دي استمرت سنتين ونص وخلال السنتين ونص دول الإقتصاديين اللي عملوا التجربة درسوا 61 سوق في المنطقة كلها منتشرين علي 653 قرية والنتايج اللي هم وصلولها تخليك فعلاً مش مصدق نفسك هل النتايج دي حقيقة ولا مضروبة؟
بإختصار شديد إنت كل دولار دفعته رجعلك 2.6 دولار وده في الإقتصاد بيسموه Local Fiscal Multiplier وده معناه إن فعلياً إنت مش محتاج تدي المصروف الشهري ده لكل مواطن في البلد .. لا خالص .. مجرد إنك تديه لناس اه وناس لا كفيل إنه يحفز إقتصاد البلد بما يكفي إن كله يستفاد .. بس في المقابل الدراسة دي فتحت عينينا علي حاجتين:
- أول حاجة إن الناس اللي عملوا الدراسة إختاروا إن اللي ياخد المصروف هم العائلات الأكثر فقراً اللي أساساً مش عايشين في بيوت إنما عايشين في عشش من الخوص .. لكن .. الناس دي لما خدت الفلوس راحوا أشتروا بيها حاجات والتجار اللي الفلوس دي راحت ليهم هم الفئة اللي مش حقول غنية بس الأقل فقراً من اللي استلموا المصروف .. ده معناه إن فعلياً اللي استفاد أكتر هم الناس اللي مخدتش المصروف اللي الفلوس راحت لهم بطريقة مش مباشرة .. من الأخر مش معني إنك تدي الفقراء فلوس كاش في إيدهم إن بقدرة قادر الفجوة في الثروة بين الأغنياء والفقراء حتقل بالعكس دي بتزيد.
- ثاني حاجة إن الفلوس الكاش في إيد الفقراء مش بيبقي ليها تأثير أوي علي تحسين الظروف الصحية ليهم وكمان استقلالية المرأة في المجتمع مش بيحصلها أي تأثير يُذكر .. ودي نقطة مهمة تحطها في وش أي حد يقولك إننا لو طبقنا فكرة Universal Basic Income حالات الطلاق حتنط لإن الفلوس حتجري في إيد الستات اللي ساعتها حتقول لنفسها أنا مش مضطرة إني استحمل اللي أنا متجوزاه.
تجربة فنلندا مع Universal Basic Income .. العلو$%^ مسئولية:
الأخوة في فنلندا جربوا فكرة Universal Basic Income بشكل مختلف شوية .. أولاً لو إنت بتشتغل فإنت مش حتاخد مصروف .. المصروف ده للي مش لاقي شغل عشان يقدر يقف علي رجله .. حلو .. إحنا حنديلك 630 دولار في الشهر مصروف إيدك وحنشوف لمدة سنتين إيه تأثير ده علي صحة الناس وتعرضهم للضغط النفسي وعلي معدلات البطالة .. حلو أوي .. بعد سنتين الأخوة بتوع البلد اللي طلعلتنا نوكيا إكتشفوا إن فعلياً مفيش أي تغيير حصل في معدلات البطالة .. اللي خد المصروف إتبسط به ومدورش علي شغل .. يا دي النيلة .. بس عموماً يعني مستوي المعيشة في البلد زاد وإحساس الفنلنديين بإنهم مش مضغوطين نفسياً إتحسن اللي هو تحسك عايز تقولهم ياختي كميلة عثولة إنتي متدلعة معندكيش مشاكل ومش متداس علي وشكوا زيينا.
أنا بس حابب أختم بإني أكلمك جد شوية عن هو لو إحنا بكره الصبح قررنا نطبق فكرة Universal Basic Income في مصر حنعملها إزاي؟ .. غالباً اللي ضد الفكرة أصلاً بانيين رأيهم علي حاجتين: الحاجة الأولانية هي هو إحنا بالصلاة علي النبي حنجيب الفلوس دي كلها منين؟ إنت عشان تدي فلوس كاش للناس كلها فإنت كده حتفشخ ميزانية البلد .. الحاجة الثانية وهي إنك مجرد تقول إن ده Universal يعني حيتطبق علي الكل بيخلي منظرك أهبل لإن معلش يعني إزاي إنت عايز تقنعني إن حد زي (نجيب ساويرس) ولا (محمد رمضان) ياخد الفلوس الكاش دي في إيده؟ .. يبان من بره إن الناس اللي ضد الفكرة لما تيجي تتكلم معاهم تحسهم بيتريقوا بس الحقيقة إن الناس دي عندها حق جداً واسمحلي إني أصدعك شوية بإني أكلمك بسرعة أوي عن أكتر حاجة إنت لو اتكلمت فيها مع بنت في قعدة تعارف حتقفلها منك .. الضرائب.
دلوقتي إنت عشان تدي الناس فلوس فإنت مش حتزرع الأرض تطلعلك دولارات .. إنت حتاخد فلوس من ناس عشان تديها لناس تانية .. مجرد إني أطبق Universal Basic Income في مصر معناه بشكل أساسي إني حزود الضرائب علي الناس .. مش كده وبس .. أنا كمان حنسفلك الفلوس اللي إنت بتاخدها Overtime وده اللي بتوع الإقتصاد بيسموه Inflation of Marginal Tax Rate .. عارف إن قلبك بيدق جامد بس متقلقش حفهمك .. تخيل معايا إنك شغال في وظيفة بتاخد فيها مثلاً 1,500 جنيه واتزنقتوا في شغل واضطريت تشتغل أوفرتايم يعني الساعة بساعة ونص مثلاً ولنفترض إن ساعة الأوفر تايم بتاعتك بعشرة جنيه .. في ظل قانون الضرائب العادي فإنت حتروح بيتكوا بستة جنيه مش بالعشرة كاملين .. لو أنا جيت طبقت Universal Basic Income فزيادة الضرائب علي الدخل حتخليك بدل ما كنت بتروح بستة جنيه أوفر تايم حتروح بتلاتة جنيه بس .. ساعتها إنت حتقول يولع Universal Basic Income مش عايزه .. الحل إنك تطبق نفس الفكرة اللي طبقها الخلفاء الراشدين لما عملوا الإختراع اللي في رأيي فعلاً أحسن إختراع بعد الشويبس جولد .. بيت مال المسلمين.
بيت مال المسلمين ده في الإقتصاد بيسموه Negative Income Tax .. يعني إيه البتاع ده؟ .. المنطق بيقول لو إنت شغال في وظيفة فإنت بتدفع ضرائب بس لنفترض إنك بتشتغل وبتعمل اللي عليك بس مرتبك بيحطك تحت خط الفقر فساعتها إنت مش بس مش حتدفع ضرائب دي الدولة بتديك فلوس لحد ما تطلعك فوق خط الفقر .. اللي هو فكرة بيت مال المسلمين .. الفكرة شبه إن لما تكون بتعمل سنوركلينج في البحر الأحمر وتتسأل هو إنت بتعرف تعوم؟ لو مبتعرفش حنديلك Life Jacket .. أهو Life Jacket في الإقتصاد هي Universal Basic Income اللي هو كلنا كمجتمع بنحط فلوسنا في مكان عشان المكان ده يصرف الفلوس دي بإنه يديها للفقراء والمحتاجين بحيث ميبقاش عايش وسطنا حد فقير أو دخله الشهري بيخليه عايش تحت خط الفقر .. تخيل إنك تقدر بكره الصبح تطلع 32.5% من شعب مصر فوق خط الفقر وعلي فكرة الموضوع مش مكلف خالص .. يُحكي أن فيه 3 علماء إقتصاد أمريكان قعدوا مع بعض يحسبوها بالورقة والقلم هي حتكلف كام إنك تحسب فيه كام مليون بني أدم في أميركا عايشين تحت خط الفقر وتحسب هو كل واحد فيهم محتاج كام دولار عشان نطلعه فوق خط الفقر فإكتشفوا إن أميركا محتاجه شاكب راكب 336 مليار دولار .. علي فكرة ده مش رقم كبير .. ده ميجيش 1% من الناتج الوطني الإجمالي لأميركا .. لو جينا نحسبها في مصر بسرعة كده فالناتج الوطني الإجمالي أو GDP بتاع مصر 235.4 مليار دولار ولو إفترضنا إن نسبة 1% دي هي هي اللي إحنا محتاجينها في مصر فإنت محتاج 2.3 مليار دولار بس وتطلع المصريين كلهم فوق خط الفقر .. مجرد فكر في قد إيه ده رقم صغير .. 2.3 مليار دولار وتخلص من الفقر وبالتالي تخلص من معدلات الجريمة وتلاقي مستوي الصرف علي الصحة عمال يقل .. مجرد تفكر في ده يوريك إزاي الدولة الإسلامية نطت بالشكل ده في وقت قصير جداً وهو إن الفكرة اللي جت لسيدنا (عمر بن الخطاب) رضي الله عنه أنهت الفقر في البلد ولما ده حصل البلد كلها نطت لقدام.
المصادر:
- مقالة بعنوان Here’s what happened when a charity gave $1,000 each to poor households in Kenya نشرت علي موقع المنتدي الإقتصادي العالمي وده لينك المقالة الأصلية:
https://www.weforum.org/agenda/2019/12/universal-basic-income-charity-poverty-kenya/ - دراسة علمية بعنوان General equilibrium effects of cash transfers: experimental evidence from Kenya نشرت في نوفمبر 2019 ود لينك الدراسة:
https://www.givedirectly.org/wp-content/uploads/2019/11/General-Equilibrium-Effects-of-Cash-Transfers.pdf - مقالة بعنوان The results of Finland’s basic income experiment are in. Is it working? نشرت علي موقع المنتدي الإقتصادي العالمي وده لينك المقالة الأصلية:
https://www.weforum.org/agenda/2019/02/the-results-finlands-universal-basic-income-experiment-are-in-is-it-working/ - مقالة بعنوان Don’t Believe in a universal basic income? This is why it would work, and how we can pay for it نشرت علي موقع المنتدي الإقتصادي العالمي وده لينك المقالة الأصلية:
https://www.weforum.org/agenda/2018/05/how-we-make-basic-income-reality-Rutger-Bregman/
