موضوعنا النهاردة حاجة محدش بيتكلم عنها في مصر لإن بصراحة محدش يعرف إنها موجودة ولا حتي حد مهتم بيها .. الموضوع اللي حنتكلم عنه هو مبادرة حزام واحد طريق واحد أو One Belt One Road وإختصاراً بتتسمي OBOR .. المبادرة دي أعلنها سنة 2013 الرئيس الصيني (جي جينبينج Xi Jinping) وفكرتها بمنتهي البساطة زي ما الخرايط اللي عندك في الصور بتقول إنها تربط قارات أسيا وأوروبا وأفريقيا إقتصادياً وده عن طريق إنك تعمل شبكة طرق عملاقة بين القارات الثلاثة وبمجرد ما إنت ربطهم ببعض إقتصادياً فإنت تقدر تربطهم ببعض سياسياً وثقافياً .. زي ما قلتلك الهدف من مبادرة OBOR دي أساساً إنها تشجع التجارة بين القارات الثلاثة بإنك تبني شبكة طرق سواء بقي بتتكلم عن طرق سريعة أو سكك حديدية أو موانيء أو خطوط أنابيب غاز طبيعي أو شبكات إتصالات ومناطق تجارة حرة.
الجهة اللي المفروض تشرف علي تنفيذ المبادرة دي حاجة إسمها لجنة التطوير الوطني والإصلاح ودي وكالة حكومية صينية وهي المسئولة عن تنفيذ المبادرة وحل أي مشاكل تطلع قدامها .. التمويل بتاع المبادرة دي بيتولاه بنك إسمه بنك الإستثمار في البنية التحتية الأسيوي Asian Infrastructure Investment Bank وده بنك عملته الصين سنة 2015 عشان يمول مشاريع بنية تحتية عملاقة في أسيا .. الوكالة دي اللي هي لجنة التطوير الوطني والإصلاح شغالة في سكتين:
- السكة الأولي إنها تعمل طرق برية تربط بين أسيا وأوروبا بحيث تقطع وسط أسيا بالعرض.
- السكة الثانية إنهم يعملوا مجموعة طرق بحرية تاخدك من بحر الصين الجنوبي تعدي بيك علي المحيط الهندي ومنه عن طريق مضيق باب المندب لحد البحر الأحمر ومن قناة السويس لحد البحر الأبيض المتوسط.
فيه دول كتير قبلت إنها تنضم للمبادرة دي .. بالضبط هم 64 دولة .. فيه منهم دول حتي تستغرب إنها وافقت زي مثلاً هونج كونج .. مشكلة هونج كونج مع الصين إنها تبع الصين بس في نفس الوقت مش تبع الصين .. هي كانت مستعمرة بريطانية لحد ما الصين إستعادتها بس هي ليها حق الحكم الذاتي .. يعني هي بلد قدام الناس مستقلة بس في نفس الوقت هي مجرد قمر بيدور حول كوكب الصين .. شباب كتير في هونج كونج بيحلموا بالإستقلال التام بس حكومتهم لعبة في إيد الصين وده خالق حالة توتر رهيبة جوه البلد .. وسط كل التوتر ده لما تطلع الحاكمة التنفيذية لهونج كونج (كاري لام تشينج يويت نجور Carrie Lam Cheng Yuet-ngor) ومعلش في إسمها اللي أطول من الليلة السودا ده في أول خطاب ليها في أكتوبر 2017 بعد ما إستلمت الحكم إن هونج كونج حتنضم للمبادرة فده يوريك قد إيه المبادرة دي بتكبر و شغالة وناس مؤمنة بيها وحتتنفذ.
وفيه دول تانية مترددة وفيه دول بتسعي إنها تخرب المبادرة دي و متخليهاش تقوم .. دول زي كوريا الجنوبية واليابان وتايوان لحد دلوقتي هم رافضين ينضموا للمبادرة وإن كان كوريا الجنوبية عضوة في بنك الإستثمار في البنية التحتية الأسيوي Asian Infrastructure Investment Bank واللي بفكرك دوره إنه يمول المشاريع اللي حتتعمل لصالح المبادرة .. دولة زي تايوان كانت عايزه تبقي من المؤسسين للبنك بس بسبب خلافاتها التاريخية مع الصين فالصين رفضت وجود تايوان ضمن المؤسسين للبنك .. بس إذا كانت تايوان مش في دماغها أوي مبادرة OBOR فاليابان زي ما تقول حالفة مية يمين إنها تخلي المبادرة دي تفشل .. الطريقة اللي اليابان بتحاول تبوظ بيها المبادرة إنها تنافس الصين في الفوز بمشاريع بنية تحتية عملاقة في دول أسيوية المفروض إنها وافقت تنضم لمبادرة OBOR .. يعني مثلاً .. اليابان خدت عقود بناء خطوط سكة حديدية سريعة High Speed Rail في دول زي الهند وأندونيسيا وتايلاند .. ده غير إن اليابان عملت صندوق تمويل خاص بيها عشان تمول مشاريع بنية تحتية في دول وسط أسيا اللي الصين بتحاول تضمها لOBOR.
الحقيقة اللي إنت حتكتشفها كل ما تغوط شوية في موضوع OBOR إن دي خناقة بين الصين واليابان علي مين يفرض نفوذه وسيطرته علي دول أسيا .. تقدر تقول إن دي حرب باردة جديدة بين أكبر قوتين إقتصاديتين في أسيا بس الفرق إن المعركة الأساسية في الحرب دي مش سباق تسلح قد ما هي سباق هندسي وتجاري وخصوصاً في تكنولوجيا هندسة السكك الحديدية السريعة High Speed Rail وعشان تفهم النقطة دي كويس خلينا ناخد مثال علي الأرض هو تايوان.
تايوان دولة تقدر تعتبرها حالة تقيس عليها هل مبادرة OBOR حتنجح أو لا .. دي دولة بينها وبين الصين خناقة كبيرة وتاريخ طويل من الصراع .. دي جزيرة الصين بتقول إنها جزء من أرضها وتايوان بتقول إنها جزيرة مستقلة ومش تبع الصين .. الصين متقدرش تحتل تايوان لإن أميركا ليها وجود عسكري في تايوان بس في نفس الوقت أميركا مش عايزة تعترف بإستقلال تايوان عشان متزعلش الصين .. فالطبيعي إن لما الصين تعمل مبادرة عايزة بيها إنها تخلي دول أسيا كلها تبقي زي الكواكب اللي بتدور حول الشمس بحيث إن في الحالة دي الشمس حتبقي هي الصين فتايوان حترفض .. المنطق بيقول كده .. إزاي أبقي أنا متخانق مع الصين والصين مستنية اللحظة اللي تحتلني فيها أقوم أنا أوافق علي إني أنضم لمبادرة بتخلي الصينيين يتحكموا في إقتصادي؟
تايوان لما حبت تعمل High Speed Rail يربط الجزيرة كلها ببعضها بحيث إن الخط يبدأ من العاصمة تايبيه في الشمال لحد مدينة كواشيونج في الجنوب راحت لليابان عشان تبقي تايوان أول دولة أسيوية تشتري من اليابان تكنولوجيا شينكانسين Shinkansen Technology ودي كلمة يابانية معناها القطر الطلقة أو Bullet Train وفعلاً الخط بدأ يشتغل سنة 2007 .. فكده كأن تايوان كانت بتقول للصين أنا مش محتاجه منك حاجة لإن ليا صحاب يقدروا يساعدوني .. علي الناحية الثانية الصين دخلت مجال High Speed Rail متأخر بس قدرت خلال 10 سنين بس إنها تبقي من أكبر دول العالم في الصناعة دي .. دلوقتي الصين ليها خط سكة حديد سريع طوله الإجمالي 20,000 كيلومتر بيربط كل المدن الصينية الكبيرة ببعضها .. عايزك تعرف إن الصين عندها خط سكة حديد سريع لو قست طوله حتلاقيه أكبر من إجمالي مجموع مسافات خطوط الHigh Speed Rail في العالم كله .. هونج كونج عملت خط High Speed Rail بيربطها بالصين وحيبدأ يخش الخدمة سنة 2018 .. والصين بتحلم باليوم اللي تعمل خط High Speed Rail يربط بينها وبين تايوان بس تايوان رافضة الفكرة لأسباب سياسية وعسكرية اللي هي الخوف من أي غزو صيني محتمل.
دلوقتي تايوان قدامها إختيار .. إما إنها تبيع اليابان وتنضم لOBOR أو ترفض تنضم لOBOR وتتحالف مع اليابان .. هنا بقي الكلام يحلو وركز أوي معايا .. دلوقتي مثلاً شركة HTC بتاعة الSmartphones أو شركة زي Acer أو Asus أو Foxconn اللي كلها شركات تايوانية لما تحب مثلاً تودي بضاعتها لأوروبا بتعمل ايه؟ .. بيحملوها علي سفن والسفن دي تاخد سكة طويلة شوية من بحر الصين الجنوبي مروراً بالمحيط الهندي إلي البحر الأحمر وعن طريق قناة السويس تروح للبحر المتوسط ومنه لأوروبا .. دلوقتي لو تايوان وافقت تنضم لOBOR وعملت خط سكة حديد سريع تحت المياه يربطها بالصين .. تقوم مستخدمة خطوط السكة الحديد السريعة اللي الصين بتبنيها دلوقتي عشان تقطع وسط أسيا لحد أوروبا علي طول .. في اللحظة اللي إنت بتقرأ فيها المقالة دي إتعملت فعلاً خطوط سكة حديد شغاله بتربط بين 33 مدينة صينية وبين 32 مدينة أوروبية متوزعين علي 12 دولة في أوروبا .. فكر في حجم الفلوس اللي حتخش جيب تايوان من التجارة لو إتفتحت ليها أسواق وسط أسيا وأسواق أوروبا كلها عن طريق خط السكة الحديد ده؟
ده يجيبنا للكلام عن مصر .. إحنا لازم نفهم إن إيرادات قناة السويس بتقل وحتفضل تقل بسبب OBOR .. اللي عملته الصين بإنها تربط أسيا وأوروبا بخطوط سكك حديد خلي شركات كتير من بره الصين سواء شركات كورية جنوبية أو يابانية أو تايوانية تفكر وتبدأ فعلياً إنها تبطل تستخدم الطريق البحري لأوروبا وتفكها خالص من قناة السويس .. كتير منهم بدأ ينقل بضاعته بالسفن لحد ميناء شنغهاي الصيني ومنه عن طريق خطوط السكك الحديدية بينقلوا البضاعة لأوروبا والعكس .. المصيبة التانية إنهم شغالين علي طريق بحري تاني بس بيمر ببحر الشمال والقطب الشمالي بحيث إن الشركات الأسيوية تستخدمه لنقل بضاعتها لأوروبا بشكل مباشر من غير ما يعدوا من قناة السويس خالص وساعتها أساساً مش حيلجأوا لخطوط السكك الحديد الصينية .. كل دي حلول لتوفير الوقت و الفلوس ولو مخدناش بالنا حنفضل مستنيين إن قناه السويس تشتغل بس الحقيقة إن فيه حد قفل المحبس من هناك خالص وإحنا مش واخدين بالنا.
المصدر:
- مقالة بعنوان Can Taiwan share in China’s one belt, one road? نشرت في Website إسمه The News Lens وده لينك المقالة الأصلية:
https://international.thenewslens.com/article/82464
