لينك التسجيل الصوتي علي ساوند كلاود:
https://on.soundcloud.com/bgUQ8
الحرب العالمية الثانية مليانه أسئلة محدش لحد دلوقتي عرف يجاوب عليها .. ليه اليابانيين ضربوا بيرل هاربور؟ .. ليه الألمان مدمروش الجيش البريطاني في دانكيرك؟ .. إيه اللي خلي الألمان يصروا علي دخول ستالينجراد؟ طب إيه اللي خلي الألمان يدخلوا روسيا أصلاً؟ .. بس يمكن من أكتر الأسئلة اللي فعلاً محدش عارف إجابتها هو ليه بالصلاة علي النبي محدش من الحلفاء سواء الإنجليز أو الأمريكان أو الروس كلف نفسه إنه يتعب شوية و يضرب معسكر أشويتز Auschwitz اللي كان يعتبر أكبر معسكر إعتقال لليهود في ألمانيا أو علي الأقل يضربوا خط السكة الحديد اللي العساكر الألمان كانوا بينقلوا عليه اليهود من ألمانيا و رومانيا و المجر للمعسكر عشان يتعدموا يا إما في أوض الغاز أو بالمحرقة؟
السؤال خلي بالك مش إن هل الحلفاء سواء زي ما قلت الإنجليز أو الأمريكان أو الروس كانوا عارفين أصلاً باللي بيحصل في اليهود؟ .. في المرحلة دي من الحرب يعني بتتكلم عن سنة 1944 و إن خلاص الأمريكان نزلوا بقواتهم في فرنسا و بدأت عملية تحرير أوروبا من الإحتلال النازي فكانت أمة سيدنا محمد عليه الصلاة و السلام كلها عارفه بإن الألمان بيعملوا عمليات إبادة جماعية لليهود في معسكر أشويتز .. تاني .. الحلفاء كانوا عارفين باللي بيحصل في أشويتز بس إختاروا إنهم ميضربهوش بالطيران .. النهاردة حنحاول نفهم ليه؟
الConcept اللي الحلفاء كانوا ماشيين عليه إن عدد الطيارات و الطيارين اللي تحت إيدينا يدوبك يكفي العمليات العسكرية لهزيمة ألمانيا في أوروبا .. يعني لو القيادة السياسية راحت للقوات المسلحة قالولها إن عايزين شوية طيارات عشان تنفذ عملية إنسانية زي إجلاء حد أو إنقاذ حد حيتقالهم أطبخي يا جارية كلف يا سيدي .. عشان كده المؤسسة العسكرية كانت ضد أي إقتراح بتوجيه ضربة جوية لمعسكرات إعتقال اليهود في أشويتز .. فيه ناس كتير حاولت تقنع المؤسسة العسكرية الأميريكية إنها تضرب أشويتز زي (جون بيهل John Pehle) المدير التنفيذي لمجلس لاجيء الحرب اللي بعت جوابات بالهبل يترجي فيها (جون مكلوي John McCloy) مساعد وزير الدفاع الأميريكي إنه يبعت سرب طيارات بس يضرب المعسكر و كان دايماً الرد هو سوري مش حينفع أصل حرام نضحي بالطيارين اللي حيلتنا في مهمة إنسانية زي دي .. أخر مرة (جون بيهل) حاول يترجي المؤسسة العسكرية الأميريكية إنها تتصرف كان في نوفمبر 1944 و في الشهر ده كانت الحرب وصلت لمرحلة حرجة أوي لدرجة إن قيادة القوات المسلحة الألمانية أمرت بقفل غرف الغاز في معسكر أشويتز.
نقطة تانية و هي إن لما كان حد وقتها بيسأل المؤسسة العسكرية للحلفاء هو أنتوا ليه مضربتوش أشويتز؟ كان دايماً الرد هو إذا أنتوا أصلاً كيهود بينكوا و بين بعض مختلفين في النقطة دي و الحقيقة إن الناس كان عندها حق .. اليهود فعلاً كانوا مقسومين نصين .. نص بيقوده حد زي (حاييم وايزمان Chaim Weizmann) كبير اليهود في بريطانيا و اللي كان في رأيه إن أشويتز لازم يتسوي بالأرض رغم إنه كان عارف إن الخطوة دي لا حتزود ولا حتأخر في هزيمة ألمانيا .. نص تاني بيقوده الناس بتوع الوكالة اليهودية في فلسطين و اللي كانوا ضد أي خطوة يترتب عليها موت أي حد من اليهود المعتقلين في أشويتز.
لحد كده أنا أقدر أفهم موقف المؤسسة العسكرية للحلفاء .. إحنا يدوبك عندنا عدد طيارات و طيارين علي قدنا و مش حنضحي بيهم عشان ننقذ شوية معتقلين أيا كان عددهم كام أو هم مين أو إتعمل فيهم إيه .. بصوا للصورة الكبيرة .. معاناة اليهود حتخلص لو عرفنا نهزم ألمانيا .. بس في نفس الوقت فيه سؤال بيتوجه للمؤسسة العسكرية للحلفاء .. هو أنتوا مش بالصلاة علي النبي في أغسطس 1944 بعتوا طيارات ترمي أكل و أدوية و سلاح للمقاومة البولندية اللي كانت وقتها بدأت حاجة إتسمت في التاريخ بثورة وارسو الكبري و وارسو دي تبقي عاصمة بولندا علي فكرة .. طب ما أنتوا شاطرين أهو و بتعرفوا تودوا طيارات تعمل مهمات إنسانية و ترمي أكل و أدوية طب ليه مكلفتوش نفسكوا و ضربتوا أشويتز؟
سؤال منطقي صح؟ .. رد المؤسسة العسكرية للحلفاء إن أولاً عملية بولندا دي تمت بالغصب .. قيادة القوات الجوية البريطانية و الأميريكية كانت ضد الخطوة بس الطيارات طلعت بعد ضغط رهيب من رئيس الوزراء البريطاني (وينستون تشرشل Winston Churchill) و الرئيس الأميريكي (فرانكلين رووزفيلت Franklin Roosevelt) و السبب في إنهم ضغطوا علي قيادة القوات الجوية بتاعتهم هو إن البولنديين كلوا وشهم .. رغم إن في الأيام الأولي للحرب العالمية الثانية بولندا إتقسمت نصين مابين ألمانيا و الأتحاد السوفيتي لإن ده كان الإتفاق اللي إتعمل قبل الحرب بين (أدولف هتلر Adolf Hitler) و (جوزيف ستالين Joseph Stalin) إلا إن و رغم إن بولندا كانت محتلة من دولتين بس حكومة بولندا في المنفي هي اللي بعتت عساكر بولنديين يحاربوا مع البريطانيين في شمال أفريقيا و إيطاليا و كانوا ضمن القوات اللي نزلت في نورماندي .. طيارين بولنديين كتير شاركوا في معركة بريطانيا الجوية ضد القوات الجوية الألمانية .. عساكر و طيارين بولنديين ضحوا بحياتهم عشان يحاربوا الألمان .. اليهود بقي عملوا إيه؟ .. دي كانت دماغ الحلفاء .. مينفعش نسيب البولنديين يحاربوا لوحدهم بعد ما وقفوا معانا طول السنين اللي فاتت .. مش مهم إن الحلفاء خسروا 31 طيارة في العملية بتاعة إنزال المساعدات الإنسانية فوق بولندا .. وبعدين تعالوا هنا .. هو أنتوا بتلومونا ليه؟ .. أقرب ناس لأشويتز مكانوش إحنا كانوا الروس .. هو ليه محدش راح سأل (ستالين) ليه رفض يبعت طياراته تضرب المعسكر؟ ليه محدش سأله لما الأمريكان عرضوا عليه إنهم يبعتوا سرب طيارات بطياريهم جوه روسيا و إن الطيارين يطلعوا من مطارات روسية عشان يضربوا المعسكر و (ستالين) رفض ليه هو رفض؟
وسط الخناقة بتاعة إضربوا أشويتز .. لا متضربوش أشويتز .. حصلت حاجة غريبة جداً .. في أواخر يونيو 1944 الرئيس الأميريكي (روزفيلت) بعت رسالة للحكومة المجرية اللي كانت وقتها متحالفة مع ألمانيا قالهم يا توقفوا خطوط النقل اللي أنتوا عاملينها عشان توصلوا اليهود لأشويتز و إلا لما الحرب تخلص و هي قربت تخلص فعلاً حنعتبركوا مجرمين حرب و حيكون مصيركوا هو نفس مصير حكومة ألمانيا اللي هو الإعدام .. طبعاً المجريين وقتها كانوا بيخافوا من (هتلر) أكتر ما كانوا بيخافوا من (روزفيلت) و اللي عشان يوريهم العين الحمرا أمر القوات الجوية الأميريكية إنها تضرب العاصمة بودابست و اللي أحياء كاملة فيها إتسوت بالأرض في يوم و ليلة .. بعدها بأسبوع كانت حكومة المجر أمرت بوقف خطوط النقل دي بعد ما كانت فعلياً نقلت 440,000 يهودي من المجر لحد أشويتز عشان يتعدموا و كان فيه خطة لنقل 250,000 تانيين بس الغارات الجوية الأميريكية اللي أجبرت الحكومة المجرية تغير رأيها أنقذتهم من الموت.
بعد قرار حكومة المجر بدأت الدول المتحالفة مع ألمانيا تحس إن خلاص كده الميزان إتقلب و إن ألمانيا حتخسر الحرب .. رومانيا جه عليها الدور و قررت برده وقف توصيل اليهود لأشويتز بعد ما كانت الحكومة الرومانية قتلت 300,000 يهودي .. اللي الحلفاء إكتشفوه إن عشان ينقذوا اليهود في أشويتز مكانوش محتاجين يضربوا أشويتز .. هم كانوا محتاجين يضربوا الديلر .. كانوا محتاجين يضربوا رومانيا و المجر .. بس إذا كانت الغارات الجوية قدرت تغير رأي المجر و رومانيا فالألمان نفسهم دماغهم كانت أنشف من الجرانيت.
مهم تكون فاهم إن (هتلر) باع لشعبه فكرة إن الحرب دي قامت بسبب اليهود وهم صدقوه .. لما الدنيا فرقعت في وشه و الحلفاء بقوا يضربوا المدن الألمانية بالطيران بعد ما كان الألمان هم اللي بيضربوهم ف(هتلر) مش يقول لشعبه إن ده بسبب إن إحنا بنخسر الحرب .. لا خالص .. هو قالهم إن الحلفاء بيضربونا عشان ينتقموا من اللي إحنا بنعمله في اليهود رغم إن فعلياً الحلفاء مكنش فارق معاهم .. الغارات الجوية للحلفاء فوق ألمانيا قتلت أكتر من 400,000 مدني ولا واحد فيهم مات عشان الطيارين الأمريكان أو البريطانيين كانوا بينتقموا من المحرقة ولا للي بيحصل في أشويتز .. أغلبهم مكنش عارف و اللي كان عارف مكنش فارق معاه أوي .. حقد و غل الألمان تجاه اليهود مكنش طبيعي.
زي ما قلتلك الغارات الجوية الأميريكية فوق المجر اللي أجبرت الحكومة المجرية توقف توصيل اليهود لأشويتز كانت في يوليو 1944 .. في نوفمبر كان الألمان قفلوا المعسكر .. في الفترة دي يعني بتتكلم عن خمس شهور بس إتقتل فيهم 150,000 يهودي في أشويتز .. و دول كانوا أساساً جوه المعسكر .. أومال المعسكر كان فيه كام علي كده؟
في الأخر أنا بس حابب أختم بإن مفيش حاجة تقول إنها هي السبب اللي خلي الحلفاء ميضربوش أشويتز .. هي مجموعة أسباب .. بس الأسباب دي مكنش من ضمنها إن اليهود مكنش ليهم دولة .. كتير من اليهود اللي إتقتلوا علي إيد الألمان كانوا روس و وقتها روسيا كانت دولة عظمي .. فيه أكتر من 3 مليون أسير حرب روسي إتقتلوا علي إيد الألمان .. بس لما تبص علي إزاي الألمان كانوا بيعاملوا أسري الحرب الأمريكان أو الإنجليز تستغرب لإنهم كانوا محترمين أوي معاهم متفهمش ليه؟ .. الحلفاء كانوا شايفين إن ضرب أشويتز حيجي عليهم بخسارة لإن ده معناه إنهم حيضحوا بطيارين و طيارات مش حيعرفوا يعوضوهم .. غير كده إن اليهود نفسهم كانوا مختلفين بينهم و بين بعض .. نص شايف إن مينفعش أشويتز تتضرب الطيران لإن ده معناه إن فيه معتقلين يهود حيموتوا في الغارة .. نص تاني من جواه عارف إن ضرب أشويتز لا حيقدم و لا حيأخر بس أهو يبقي حاجة رمزية.
المصدر:
مقالة بعنوان Why America Didn’t Bomb Auschwitz When it Had the Chance .. نشرت في موقع The Daily Beast وده لينك المقالة الأصلية:
http://ww.thedailybeast.com/why-america-didnt-bomb-auschwitz-when-it-had-the-chance?ref=scroll
