لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-3
تاريخ البشر مليان بحروب ومجازر تخليك تحس إن البشر دول لو إدتلهم الفرصة حيبقوا أبشع من الشياطين .. الحرب العالمية الأولي والثانية مثال صارخ لده .. تاريخ الصراع العربي الإسرائيلي مليان بمجازر إرتكبها الصهاينة تخليك تقول لنفسك مستحيل دول يكونوا بشر .. بس يمكن لإننا عايشين في العالم العربي فإحنا متخيلين إن التاريخ مفيهوش غيرنا .. الحقيقة إن الحرب اللي فعلاً بيتقال عليها أبشع حرب وأكثرها تدميراً في التاريخ المعاصر للبشر لا حصلت لا في عالمنا العربي ولا في أسيا ولا حتي في أوروبا .. إنما حصلت في أميركا الجنوبية .. عارفها إنت القارة اللي مش بنهتم بأي حاجة بتحصل فيها إلا لما تتلعب بطولة كوبا أميركا .. زمان كانت دول البرازيل والأرجنتين وأوروجواي وباراجواي بيحاربوا بعض في ماتش تلاتة علي واحد قعد 6 سنين كاملة .. عشان بس أديلك حتة تدوق بيها قد إيه الحرب دي جابت عليها واطيها عايزك تعرف إن يوم 28 فبراير 1870 كان رئيس باراجواي (فرانشيسكو سولانو لوبيز Francisco Solano Lopez) عارف إن خلاص بلده حتخسر الحرب لإنه كان متحاصر من القوات البرازيلية فجاب ورقة وقلم وكتب قرار إعدام أمه وإخواته البنات بس قبل ما يمضي القرار القوات البرازيلية هاجمت المعسكر بتاعه وهو شخصياً إتصاب جامد في الهجوم .. البرازيليين عرضوا عليه الإستسلام بس هو رد عليهم وهو بيموت إنه حيموت مع بلده .. الحرب دي تتلخص بإن رئيس قرر إنه مستعد يضحي بكل عسكري في جيشه وبأهل بيته كمان لحد ما يموت هو شخصياً بس محدش يجبره يمضي علي قرار الإستسلام .. الحرب دي خلال 6 سنين إنتهت بموت 60% من إجمالي تعداد سكان باراجواي ومقتل 90% من رجالتها .. بدأت تستوعب حجم المجازر اللي كانت بتحصل في الحرب دي؟
الحرب دي فيه ناس بتسميها حرب التحالف الثلاثي War of the Triple Alliance وفيه ناس بتسميها الحرب الباراجواينية Paraguayan War .. أيا كان إسمها إنت محتاج تفهم هي الحرب دي قامت ليه أساساً؟ .. علي إيدك اليمين حتلاقي البرازيل والأرجنتين .. في الوقت ده البرازيل كانت أقرب ما تكون لمصر أيام الملك (فاروق) الله يرحمه يعني دولة ملكية قايمة علي إن فيه طبقة غنية أوفر من الناس اللي إما بينتموا للعائلة المالكة أو المقربين منها وباقي الشعب مش لاقي ياكل بس كانت البرازيل في الوقت ده أقوي دولة في أميركا الجنوبية بلا منازع .. الأرجنتين كان حالها ميفرقش كتير عن البرازيل يعني بلد بيحكمها شوية ناس بيملكوا أغلب الأرض وباقي الشعب برده مش لاقي ياكل .. علي إيدك الشمال حتلاقي باراجواي اللي هي أساساً دولة حبيسة يعني مش بتطل علي أي بحر أو محيط و ممكن ده أثر شوية علي طريقة تفكير الناس اللي عايشين فيها لإن طول عمرهم عايشين في حالهم وإنطوائيين ملهمش علاقة بحد لحد ما بدأت واحدة واحدة تبقي دولة صحيح رئاسية يعني بيحكمها رئيس مش ملك بس كان بيبقي رئيس ديكتاتور معندوش يا أما إرحميني وكان اللي بيحكم باراجواي وقتها (فرانشيسكو سولانو لوبيز) زي ما قلت .. المشكلة بدأت تظهر لما البرازيل قررت تحتل أوروجواي سنة 1864 اللي هي كانت دولة صغيرة في حالها وملهاش ظهر يحميها .. متفهمش ليه (فرانشيسكو سولانو لوبيز) قرر إنه يقف للبرازيل وقالها لو قربتوا من أوروجواي أنا مش حقف ساكت؟ ومتفهمش ليه برده البرازيليين كملوا في إحتلالهم لأوروجواي ولا كأنهم سامعينه؟ .. يمكن لإن بتوع باراجواي زي ما قلتلك طول عمرهم في حالهم ملهمش حس فالبرازيليين تخيليوا إن (فرانشيسكو سولانو لوبيز) بيهوش وخلاص بس الحقيقة كانت غير كده.
لما البرازيليين ركبوا دماغهم وإجتاحوا أوروجواي كان رد باراجواي إنها إستولت علي سفينة برازيلية كانت ماشية في نهر جوه الأراضي بتاعة باراجواي ودي كانت الشرارة اللي بدأت الحرب .. ومن هنا بدأت أغرب سلسلة قرارات عسكرية تخليك تقول لنفسك هو المشير (عبدالحكيم عامر) الله يرحمه كان هو اللي ماسك الجيش بتاع باراجواي ولا إيه؟ .. لو بصيت علي الخريطة حتلاحظ إن أوروجواي تحت خالص جنوب البرازيل يعني القوات البرازيلية كانت ماشية لتحت ناحية أوروجواي .. ده معناه إن أنا لو مكان باراجواي وكان هدفي إني أحمي أوروجواي فقواتي حتتحرك هي كمان لتحت ناحية الجنوب بس ده محصلش .. في الوقت اللي البرازيليين كملوا سكتهم ناحية أوروجواي ودخلوا العاصمة مونتيفديو وشالوا الرئيس وحطوا مكانه رئيس تبعهم إسمه (فينانشيو فلوريس Venancio Flores) كان (فرانشيسكو سولانو لوبيز) أوائل سنة 1865 بكل سلامة نية راح كلم الأرجنتينيين إن والنبي سيبوا قواتي تعدي جوه أراضيكوا عشان أروح أعترض طريق البرازيليين وهم رايحين أوروجواي مع إنه كان ممكن ميعملش كده بس طبعاً الأرجنتينيين قالوله روح إتلهي قام (فرانشيسكو سولانو لوبيز) أعلن الحرب علي الأرجنتيين .. قبل يدوبك أول سنة ما تعدي في الحرب بدل ما كانت باراجواي بتحارب البرازيل بس بقت باراجواي بتحارب البرازيل والأرجنتين وأوروجواي بعد ما البرازيل إحتلتها وعشان كده الحرب بتتسمي بحرب التحالف الثلاثي.
بعد أول سنة من الحرب دي ما عدت إنت تقدر تقسم الحرب دي ل3 حتت:
- أول مرحلة إن بتوع باراجواي عملوا فيها مية راجل في بعض وشنوا سلسلة هجمات علي البرازيل والأرجنتين بسم الله ما شاء الله أنتهوا كلهم بخساير فادحة للقوات بتاعة باراجواي ودي كانت من 1865 لحد 1866 يعني يدوبك هي سنة كانت قوات باراجواي إتداس علي وشها فعلياً.
- ثاني مرحلة إستمرت من 1866 لحد 1868 .. سنتين وقوات التحالف الثلاثي بتتقدم تقدم السلحفاة جوه الأراضي بتاعة باراجواي .. سنتين كاملين محصلش إلا مرة واحدة يتيمة إن باراجواي حققت نصر في معركة كانت معركة إسمها كيوريو- باياتي Curupayaty .. غير كده قوات التحالف بتتقدم ببطء شديد سببه الأساسي هو إن اللي كان ماسك قيادة القوات بتاعة البرازيل والأرجنتين ناس أقل ما يقال عنهم مبيفهموش لإن أنتوا قواتكوا أكتر بكتير من قوات باراجواي ورغم كده مش عارفين تحسموا الحرب.
- ثالث مرحلة هي حرب عصابات بدأت من ساعة ما البرازيليين دخلوا العاصمة بتاعة باراجواي اللي هي أسونسيون .. المرحلة دي إستمرت من سنة 1868 لحد وفاة (فرانشيسكو سولانو لوبيز) سنة 1870.
سبب أساسي إن الحرب كملت كل الوقت ده راجع لعند الباراجوايين .. الناس دي كانت عنيدة عند واحدة من برج الجوزاء بتتخانق مع جوزها ومش راضية تقتنع بإنها غلط ومستعدة تخرب البيت كله لمجرد ما تطلعش غلطانة .. أنتوا يا بتوع باراجواي بقيتوا متحاصرين والبرازيليين والأرجنتينيين بقوا جوه أرضكوا .. خلاص أقبلوا الهزيمة وأمضوا إتفاق السلام وكفي الله المؤمنين شر القتال .. بس لا تقول إيه .. الناس بتوع باراجواي كان عندهم إستعداد يحاربوا لحد ما أخر عسكري فيهم يموت .. فيه ناس بتسمي ده شجاعة وفيه ناس بتسميه عند وفيه ناس بتسميه غباء .. سميه زي ما تسميه ده رأيك وإنت حر فيه .. بس العند ده خلق عند البرازيليين حالة إنهم مبقاش فارق معاهم يعدموا الأسري لمجرد إنهم يكسروا إرادة بتوع باراجواي .. عساكر كتير برازيليين كانوا ضد ده بس الأوامر اللي كانت جايالهم إن مفيش حاجة إسمها أسير حرب .. الوضع وصل إن مبقاش فيه حد بيتفاهم أو يتكلم .. حرب بقت دموية بشكل إنت ممكن متقدرش تتخيله .. ضحايا الحرب من باراجواي كانوا بالملايين زي ما قلتلك .. 60% من إجمالي سكان البلد ماتوا .. ده غير حاجة جوه دماغ أهل باراجواي .. إنت بتشوف ده لحد دلوقتي في ماتشات كوبا أميركا .. ماتش البرازيل وباراجواي بيبقي ماتش مشحون كأن مثلاً مصر بتلاعب إسرائيل .. مش بس باراجواي اللي دفعت ثمن الحرب .. سنة 1889 يعني يدوبك بعد الحرب ب19 سنة حصل إنقلاب عسكري في البرازيل أطاح بحكم الملك (بيدرو الثاني Pedro II) ومن ساعتها والعلاقة بين المؤسسة العسكرية البرازيلية وبين الرئيس المنتخب علاقة متوترة أوي شبه العلاقة بين المؤسسة العسكرية في مصر ومؤسسة الرئاسة أيام الرئيس (محمد مرسي) الله يرحمه لو تفتكر .. العلاقة دي سبب أساسي فيها هو السم اللي إتزرع في جسم البرازيل بسبب المجازر اللي هم عملوها في باراجواي.
المصدر:
- مقالة بعنوان The modern era’s most destructive war took place in Paraguay .. أكثر حروب العصر الحديث تدميراً حصلت في باراجواي .. نشرت في موقع إسمه OZY.com وده لينك المقالة الأصلية:
ttps://www.ozy.com/flashback/the-modern-eras-most-destructive-war-took-place-in-paraguay/76683
