لينك التسجيل الصوتي للمقالة علي Sound Cloud:
https://soundcloud.com/user-112011687-312727988/3vnxazyjqkwd?si=352527f02fd94a6b968a5f7558850ecc&utm_source=clipboard&utm_medium=text&utm_campaign=social_sharing
(عقبة بن نافع) .. ضربة المعلم اللي عملها (معاوية بن أبي سفيان):
الفتنة الكبري كنا إتكلمنا عنها قبل كده وهي تقدر تقسمها لمرحلتين .. المرحلة الأولي هي الفتنة الأولي وبدأت سنة 656 لما أُستشهد الخليفة سيدنا (عثمان بن عفان) رضي الله عنه واللي الحقيقة إن سبب إغتياله عليه خناقة كبيرة بين المؤرخين .. ناس قالت إن السبب هو السياسات الإقتصادية اللي تقدر تقول عليها رأسمالية شوية للدولة وإن الحكومة مبقتش تلعب دورها الرقابي الصارم اللي كانت بتعمله وقت الخليفة سيدنا (عمر بن الخطاب) رضي الله عنه .. ناس تانية قالت إن السبب هو السياسات المتسامحة أوي لسيدنا (عثمان) .. أصحاب الرأي ده بيقولوا إن المشكلة إن سيدنا (عثمان) كان طيب لدرجة إن العداوات القديمة بين القبائل بدأت ترجع تاني وهو معملش حاجة عشان يدي الناس دي فوق دماغها .. رأي ثالث بيقول إن سيدنا (عثمان) إتعود إن دايرة المقربين منه ومستشارينه تبقي من قرايبه من بني أمية .. أيا كان رأيك وأيا كان إنت شايف أنهي سبب هو اللي صح بس خلينا نتفق إن الوضع الداخلي للبلد كان مولع لدرجة إن سنة 655 سيدنا (عثمان) طلع دعوة عامة لأي حد عايز يتكلم معاه ويعترض علي أي سياسات أو قرارات هو طلعها.
رغم الخطوة دي إلا إن الدنيا مهدتش لإن اللي حصل إن شوية ناس من مصر كانوا متضايقين جداً من سياسات سيدنا (عثمان) خدوا بعضهم وإتحركوا علي المدينة المنورة .. اللي حصل ده إسمه عصيان مدني بس اللي نقدر برده نبقي متفقين عليه إن سيدنا (عثمان) لما عرف قال إنه مستعد يسمع شكاوي المصريين اللي جم دول وينفذلهم كل طلباتهم إذا ما هم رجعوا تاني مصر بهدوء .. واضح إن الثوار المصريين إقتنعوا بكلام سيدنا (عثمان) لإنهم فعلاً خدوا بعضهم ورجعوا تاني علي مصر .. الحتة اللي جاية دي هي اللي مهمة .. يُقال إن الثوار المصريين وهم راجعين مصر قابلوا رسول طالع من المدينة المنورة برده ورايح مصر ولقوا معاه رسالة مختومة من سيدنا (عثمان) بيأمر فيها والي مصر إنه يعدم الثوار المصريين بمجرد ما يرجعوا.
طبعاً الثوار خدوا الرسالة دي ورجعوا تاني للمدينة المنورة .. سيدنا (عثمان) حلفلهم إنه مش هو اللي بعت الرسالة بس مكنش فيه فايدة .. الثوار حاصروا بيت سيدنا (عثمان) وفي الوقت ده كانت فيه محاولات صلح كتير قام بيها سيدنا (علي بن أبي طالب) رضي الله عنه بس كل المحاولات دي فشلت لحد ما في 20 يوليو 656 سيدنا (عثمان) أُستشهد علي إيد الثوار المصريين .. بعد إغتيال سيدنا (عثمان) المسلمين إختاروا سيدنا (علي) عشان يبقي هو الخليفة الراشد الرابع .. عشان مطولش عليك الأحداث قامت خناقة بين سيدنا (علي) وبين بنو أمية اللي كان كبيرهم هو سيدنا (معاوية بن أبي سفيان) رضي الله عنه اللي غير إنه يبقي إبن عم سيدنا (عثمان) إلا إنه كمان والي الشام والخناقة كانت علي قضية القصاص من قتلة سيدنا (عثمان) والخناقة دي تجسدت في موقعة الجمل ووراها معركة صفين .. تقدر تقول مجازاً إن الفتنة الكبري الأولي خلصت سنة 661 لما أُستشهد سيدنا (علي) والصحابة في المدينة المنورة إختاروا سيدنا (الحسن بن علي بن أبي طالب) رضي الله عنه يبقي هو الخليفة الخامس بس سيدنا (الحسن) وصل لإتفاق سلام بينه وبين سيدنا (معاوية بن أبي سفيان) بيقول إن يا (معاوية) لو إنت حتموت علي الكرسي ونفسك تحكم فمفيش مشكلة أحكم إنت وربنا يديك طولة العمر طبعاً بس لما ربنا يتوفاك الي رحمته تتعمل مبايعة جديدة والمسلمين يختاروا حاكم جديد .. سيدنا (معاوية) قال أمين علي الكلام ده.
في نفس السنة اللي هي 661 واللي أُستشهد فيها سيدنا (علي) هي برده نفس السنة اللي أُعلن فيها سيدنا (معاوية) خليفة المسلمين .. الحقيقة إن سيدنا (معاوية) كان عارف إن محدش في المدينة المنورة طايقه لدرجة إن مراسم تنصيبه كخليفة للمسلمين إتعملت في القدس الشريف مش في المدينة المنورة .. ومش بس كده .. هو نقل العاصمة بتاعته من المدينة المنورة لدمشق .. في نفس الوقت بعد ما الفتوحات الإسلامية إتحطت في الفريزر وقت القتنة الكبري فسيدنا (معاوية) هو اللي طلعها تفك وحطها في الميكروييف عشان تسخن بسرعة .. سنة 664 المسلمين دخلوا مدينة كابول اللي هي دلوقتي عاصمة أفغانستان .. سنة 674 كان بيحلم إنه ياخد القسطنطينية وكلف إبنه (يزيد) إنه يقود الجيش اللي حاصر المدينة فعلاً بس العملية فشلت .. اللي يهمنا هنا دلوقتي هي إننا نكمل كلامنا عن الطريق إلي المغرب .. سنة 670 إتعين قائد جديد للقوات الإسلامية اللي إتحطلها التارجت بتاع الوصول للمحيط الأطلنطي والقائد ده كان (عقبة بن نافع).
(عقبة بن نافع) من الشخصيات اللي شبه لما تبقي عندك شركة ويجيلك مشروع تقيل بس إنت مش لاقي اللي يمسك المشروع ده ويخلصهولك بس الست والدتك تبقي داعيالك وتقولك ربنا يوقفلك ولاد الحلال وتعين حد زي (عقبة) يخلصلك الليلة كلها .. (عقبة) خد قواته وطلع من مصر وخد ليبيا لحد ما وصل تونس .. أسس مدينة القيروان اللي يدوبك جنوب مدينة قرطاج سنة 670 عشان تقوم هي بدور مصر بحيث تبقي المنط اللي تطلع منه الفتوحات الإسلامية للمغرب .. حاول تبقي فاهم إن مشكلة الفتح الإسلامي للمغرب كانت خطوط الإمداد عشان كده مدينة القيروان إتأسست .. سنة 682 (عقبة بن نافع) قفل اللعبة .. فعلياً هو وصل لحد ساحل المغرب علي المحيط الأطلنطي .. يُقال إنه لما وصل بحصانة للشط بكي زي ما (الإسكندر الأكبر) بكي لما دخل الهند لإنه كان متخيل إنه خلاص كده مبقاش في العالم مكان تاني ينفع يفتحه .. بس فضل البربر مشكلة .. زي ما قلتلك البربر دول ناس دماغهم ناشفة بشكل إنت لا تتخيله .. مش معني إن قواتك هزمتهم في كام معركة وإنك طردت البيزنطيين من المغرب يبقي إنت كده خلاص كلمتك حتمشي عليهم .. سنة 682 (عقبة) كان راجع القيروان هو وجيشه لما إتعمله كمين في حتة إسمها السوس في المغرب وأُستشهد هو وأغلب رجالته .. المفروض إن إستشهاد (عقبة) وخسارة الجيش بتاعه متعديش بالساهل كده بس إنت محتاج تفهم إن سنة 680 يعني حتي قبل إستشهاد (عقبة) بسنتين كانت الدولة حطت الفتوحات الإسلامية في الفريزر تاني .. والسبب؟ .. الفتنة الكبري الثانية.
(عبدالملك من مروان) .. إعمل ريستارت للفتوحات الإسلامية:
سنة 680 توفي سيدنا (معاوية) والمفروض إني أفكرك بالإتفاق اللي كان إتعمل بينه وبين سيدنا (الحسن بن علي) .. الإتفاق كان إن أحكم إنت يا (معاوية) بس لما تموت نعمل مبايعة جديدة .. لما سيدنا (معاوية) إستلم الحكم بعدها بكام سنة مات سيدنا (الحسن) .. قبل ما سيدنا (معاوية) يموت علي طول أعلن إن إبنه (يزيد) هو ولي العهد بتاعه وبالتالي هو الخليفة الجديد وبالتالي الإتفاق اللي كان بينه وبين سيدنا (الحسن) ولا كإنه إتعمل .. هنا سيدنا (الحسين) أخو سيدنا (الحسن) أعلن ثورته .. تاني .. الفكرة مش إن (يزيد) بني أدم وحش .. لا خالص .. الفكرة في حاجتين .. أول حاجة إن كان فيه إتفاق .. ثاني حاجة إن مفيش في الإسلام حاجة إسمها وراثية الحكم .. يعني إيه بني أدم يحكم لمجرد إنه إبن الخليفة؟ .. ده لا في شرع ربنا ولا سيدنا النبي (عليه الصلاة و السلام) أقره .. المهم إن سنة 680 سيدنا (الحسين) ومعاه 150 من رجالته بيتقتلوا في مجزرة كربلاء علي إيد قوات تبع (يزيد بن معاوية) .. لحد هنا وأقف بقي شوية.
شوف يا إبن الحلال .. أنا أقدر أفهم يعني إن طبيعة البشر الوسخة بتطلع كلها في الحروب الأهلية .. تاريخ البشر مليان بوساخة وبلاوي كتير عملها البشر في بعض بس إنك تقتل حفيد سيدنا النبي دي كانت صدمة .. ده كان الشرخ اللي بسببه المسلمين بقوا سُنة وشيعة .. 12 سنة والحرب الأهلية مش عايزة تهدي لحد ما في الأخر سنة 692 الخليفة الأموي (عبدالملك بن مروان) حاصر مكة المكرمة وضرب الكعبة بالمنجنيق وهدها عشان زي ما بنقول في السياسة كده يدبح القطة للمعارضين والثوار اللي ضده .. (عبدالملك بن مروان) أو خلينا نقول الدراع اليمين بتاعه (الحجاج بن يوسف الثقفي) زي ما تقول كده عمل زي شخصية المعلم (زرزور) في فيلم إبراهيم الأبيض لما قال حد له شوق في حاجة؟ .. أه أنا ضربت الكعبة بالمنجنيق واللي عنده حاجة يقولها.
(عبدالملك) كان الخليفة الأموي الخامس وإنت تقدر تقول عليه إنه كان مفتري .. تقدر تقول عليه إنه ساب الحبل علي الغارب لوزير داخليته (الحجاج بن يوسف الثقفي) .. ممكن تقول عليه حتي إنه مجرم حرب .. بس في نفس الوقت متقدرش تنكر إن الرجل ده هو اللي أنشأ خدمة مكاتب البريد .. هو اللي صك أول عملة موحدة للدولة .. هو اللي بدأ فكرة كسوة الكعبة .. هو اللي بني قبة الصخرة اللي بقي رمز القدس الشريف لحد دلوقتي .. بس الأهم من كل ده عشان ده محور كلامنا هو اللي عمل Restart للفتوحات الإسلامية في المغرب .. زي ما جده الكبير (معاوية بن أبي سفيان) عين (عقبة بن نافع) عشان هو اللي يمسك الليلة فبرده (عبدالملك) إختار رجل إسمه (حسن بن النعمان الغساني) .. (حسن) كان من الشخصيات اللي مش بتنام .. عارف إنت الشخصيات دي اللي ممكن تقابلها في شغلك اللي لو عنده تسليمة تلاقيه بايت في الشغل مش بيروح .. الشغل عنده زيه زي الأكل والشرب .. أكل وشرب إيه ده ممكن مياكلش وميشربش بس ميبطلش شغل .. (حسن) إتحط تحت إيده 40,000 مقاتل قدر إنه يطلع بيهم من مصر لحد القيروان وكمان خد مدينة قرطاج .. اللي حصل إن بعد إستشهاد (عقبة) إن البيزنطيين بعتوا قوات سيطرت علي مدينة قرطاج وطبعاً (حسن) كان حالف لا يرميهم كلهم في البحر .. سنة 698 (حسن) دخل المدينة وولع فيها كلها.
(حسن بن النعمان الغساني) كان رجل شاطر بس مشكلته إنه معندوش أي قدرة علي التخيل عشان كده هو مقدرش يتوقع اللي حصله .. البربر إتوحدوا تحت قيادة واحدة ست إسمها (كاهينا Kahina) المصادر العربية بتقول عليها إنها ساحرة بس مش دي قضيتنا دلوقتي .. المهم إن البربر قدروا يهزموا قوات (حسن) ويجبروه إنه يرجع تاني لحد مصر .. حاول تتخيل إنك بتلعب السلم والثعبان وبعد ما خلاص قربت تخلص تلاقي نفسك لبست في الثعبان ووقعت علي جدور رقبتك عشان تعيد اللعبة من الأول .. سنة 702 (حسن) عشان هو رجل معندوش مشكلة يفضل مطبق في الشغل ميروحش فمكنش عنده مشكلة إنه يعيد كل حاجة من الأول ثاني .. هو قدر يجمع جيش ويهزم (كاهينا) في معركة طبرق .. المشكلة إن إذا كان (حسن) بني أدم معندوش ملكة التخيل ف(عبدالملك) كان رجل دماغه توزن بلد .. (عبدالملك) كان عارف إن السيطرة علي شمال أفريقيا محتاجة مدير صايع مش بس مجتهد .. سنة 704 (عبدالملك بن مروان) بيعمل زي ما جده عمل وبيضرب ضربة معلم بتعيين واحد إسمه (موسي بن نصير) كقائد للقوات الإسلامية في شمال أفريقيا.
(موسي بن نصير) ده أسطورة .. ده رجل شاطر وصايع لدرجة إنه عمل حاجات إنت لو إتقالتلك حتقول ده إيه الهبد ده .. سنة 633 لما سيدنا (سعد بن أبي وقاص) رضي الله عنه دخل إيران أبو (موسي) إتاخد كعبد بس خلي بالك .. اللي إشتراه كان (عبدالعزيز بن مروان بن الحكم) .. في حالة إنك بتشبه علي الإسم ف(عبدالعزيز بن مروان) يبقي إبن (مروان بن الحكم) ثالث خلفاء الأمويين واللي هو شخصياً كان والي مصر .. (عبدالعزيز بن مروان) عطي لأبو (موسي) حريته وهو اللي دفع مصاريف تعليم (موسي) من جيبه لحد ما (موسي) إتعين مستشار والي العراق .. وهو في العراق دخل في مشكلة إنه إتداين لحد بس معرفش يسدد الفلوس اللي عليه .. الحقيقة إن (عبدالعزيز) كان شايف حاجة في (موسي) لإن هو اللي دفع الفلوس اللي (موسي) مديون بيها وجابه مصر تاني عشان يقود عملية فتح المغرب .. يُقال إن (موسي) في فتحه للمغرب عرف يأسر 300,000 مقاتل .. في أربع سنين بس كان سيطر علي المغرب العربي كله .. بس في نفس الوقت (موسي) كان شخصية مرنة جداً .. (موسي) مكنتش دماغه ناشفة .. لا خالص .. يقعد مع الناس ويسمعها ويقبلهم زي ما هم كده .. عشان كده البربر حبوه أوي .. البربر اللي طلعوا عين (عقبة بن نافع) و(حسن بن النعمان الغساني) سبحان الله بقوا بيموتوا في (موسي بن نصير) .. لمجرد إنه بقي يقبلهم زي ما هم كده .. يقعد معاهم .. ياكل من أكلهم .. يتعلم لغتهم الأمازيغية .. بسبب سياسات (موسي) فالبربر بقوا بيخشوا في الإسلام بأرقام مهولة وبالتالي بقوا يتطوعوا عشان يخدموا في القوات المسلحة مش بس كعساكر إنما كضباط كمان.
زي ما (عبدالعزيز بن مروان) كان شايف حاجة في (موسي بن نصير) وفضل وراه وساعده وعلمه ووقف جنبه لحد ما وصل لمكانته دي فبرده (موسي) كان شايف حاجة في واحد من البربر إسمه (طارق بن زياد) .. (موسي) خد (طارق) تحت جناحه .. سنة 708 دراعه اليمين (طارق بن زياد) كان سيطر علي مدينة طنجة .. سنة 710 ليبيا وتونس والجزائر والمغرب وموريتانيا بقوا تحت سيطرة المسلمين.
علي الناحية الثانية بقي .. هو مين كان عايش في إسبانيا؟
أغلب الكلام عن الفتوحات الإسلامية خصوصاً في الأندلس بتركز أوي علي الجانب العربي من القصة .. دايماً تلاقيهم بيتكلموا عن أعمال (طارق بن زياد) وإنتصارات (موسي بن نصير) .. هو أنا معنديش مشكلة طبعاً في ده بس في نفس الوقت إنت محتاج تبص علي النص التاني من القصة .. هم المسلمين كانوا بيحاربوا مين؟ .. مين اللي كان عايش في إسبانيا لما (طارق بن زياد) عبر مضيق جبل طارق؟ .. الجزء ده من المقالة مخصص للناس دي واللي الحقيقة قصتهم لما تيجي تبصلها تكتشف إنها مثال صارخ لمقولة الدنيا زي المرجيحة يوم تحت وفوق .. هل تعلم إن الناس اللي كانوا عايشين في الأندلس وقتها هم أساساً ناس إتولدوا في رومانيا بس نصيبهم وأكل العيش وداهم إسبانيا؟ .. ده حقيقي .. الناس دول إسمهم Visigoth بالإنجليزي بس بالعربي بيتقال عليهم القوط الغربيين أو القوط وخلاص .. القوط دول كانوا شوية فلاحين عايشين في حالهم في أرضهم وسط معيزهم وجواميسهم لحد ما صحيوا الصبح لقوا فيه ناس قتالين قتله إسمهم الهان The Hums طبوا عليهم .. الهان دول زي ما حكيت قصتهم قبل ده كانوا ناس مفتريين لدرجة إن القوط خدوا عيالهم وعبروا نهر الدانوب Danube اللي كان وقتها بداية حدود الإمبراطورية الرومانية .. الرومان هم كمان صحيوا الصبح لقوا الالاف من اللاجئين من شعوب تانية مش بس القوط هربانين من غزو الهان .. في الوقت ده اللي كان بيحكم الإمبراطورية الرومانية كان إسمه (فالينز Valens) والرجل ده كان من الناس اللي دايماً بتحب تبص لنص الكوباية المليان .. هو لقي إن فيه الالاف من اللاجئين اللي جم عنده وطبعاً عايزين ياكلوا ويشربوا ويشتغلوا .. كل ده حمل علي الإقتصاد بتاع بلده .. بس في نفس الوقت اللاجئين دول أكيد فيهم رجالة يقدروا يشيلوا سلاح .. الإمبراطور (فالينز) سمح للقوط إنهم يعيشوا علي أطراف الدولة بتاعته في مقابل إنهم هم اللي يدافعوا عن حدود الدولة.
المشكلة دايماً بتكون في الحاشية اللي حول الحاكم .. البق الحمضان ده هو هو اللي إتقال علي الرئيس (محمد حسني مبارك) الله يرحمه .. إتقال إنه كان كويس بس اللي حوليه كانوا وحشين .. نفس الفكرة برده هنا .. إتقال إن الفكرة بتاعة الإمبراطور (فالينز) حلوة بس رجالته هم اللي بوظوها .. الرومان بقوا يتعاملوا مع القوط كمواطنين درجة تانية .. أي حاجة تتبعالهم يتضرب سعرها في إتنين .. مش معاك تشتري أكل بيع عيل من عيالك في سوق العبيد عشان تعرف تأكل الباقي .. فضل القوط ساكتين ومستحملين الإهانة والذل ده لحد ما جه رجل في الشدة شديد وفي القوة أوي أوي أوي إسمه (فيرتيجيرن Fritigern) .. الرجل ده كان (وليام والاس William Wallace) بتاع القوط .. ثورة مسلحة أجبرت الإمبراطور (فالينز) شخصياً إنه يجي بجيشه عشان يقمع الثوار اللي كانوا كل ما يشوفوا عسكري روماني يفشخوه .. يوم 9 أغسطس 378 بتحصل واحدة من أشهر المعارك في التاريخ إسمها معركة أدرينوبل Battle of Adrianople .. المعركة دي تعتبر درس مهم أوي للعسكريين ولأي مدير الحقيقة في شغله .. الدرس إنك أوعي تمشي وإنت مش شايف إنت فيه إيه قدامك .. أه إمشي في نور الله إدعي وقول يا رب علي عيني وعلي راسي بس تبقي برده شايف إنت رايح فين .. اللي حصل إن (فيرتيجيرن) أمر رجالته إنهم يحرقوا شوية شجر فده عمل سحابة سودا خلت الرومان فعلياً مش شايفين قدامهم .. هوبا الخيالة بتاعة القوط تهاجم جيش الرومان من ناحيتين .. هوبا الرومان يتفجعوا .. هوبا المعركة خلصت.
معركة أدرينوبل إتحطت في لستة أهم المعارك في تاريخ البشر مش لسبب غير إن نتايجها سمعت معانا لأكتر من ألف سنة .. في المعركة دي أُبيد الجيش الروماني .. حتي الإمبراطور (فالينز) مات .. اللي حصل إن الرومان إتعلموا لما يتكلموا بعد كده مع القوط يتكلموا بأدب .. السنة اللي وراها علي طول اللي هي 379 الإمبراطورية الرومانية إتقسمت نصين ومن ساعتها والقوط بقوا زي الطور الهايج اللي محدش عارف يلمه .. سنة 410 القوط بيخشوا روما عاصمة الإمبراطورية ومبيسيبوش بيت إلا ويسرقوه .. دي كانت أول مرة من 800 سنة اللي روما يحصل فيها كده .. إتعمل إتفاق بين الإمبراطور وبين القوط إن إحنا حنديكوا فلوس في مقابل إنكوا تعيشوا في جنوب فرنسا .. يعني القوط بدأوا رحلتهم من رومانيا لإيطاليا ودلوقتي إتقالهم روحوا عيشوا في فرنسا .. المهم شوية والفرنساويين طردوهم بره أرضهم والقوط ملقوش حتة تلمهم غير إسبانيا.
دولة القوط في إسبانيا مهم تفهمها كويس وهي إنك تبقي عارف حاجتين .. أول حاجة إن سياسياً دي دولة كانت شبه العالم بتاع Game of Thrones كده .. الملك بيتم إنتخابه من الأمراء والنبلاء والأغنياء بتوع البلد .. ده معناه إن الملك مش في إيده السلطة المطلقة لإن الملك بيجي مدعوم من ناس معينة وبالتالي بعد ما بيبقي ملك فبيبقي شخشيخة في إيدهم لإنهم هم اللي موصلينه للحكم .. الحكم مكنش وراثي بحيث إننا بنبقي عارفين من الأول مين ولي العهد .. قول علي الحكم الوراثي اللي إنت عايزه بس خلينا متفقين إن مجرد إن الناس عارفه مين حيمسك بعد ما الملك يموت من بدري بتدي نوع من أنواع الإستقرار .. ده خلي مسلسل قتل الملوك في دولة القوط مسلي جداً الصراحة وكله أحداث .. بما إن مفيش إستقرار سياسي فده خلي إسبانيا تحت حكم القوط شبه العالم بتاع فيلم Mad Max كده .. بلد غنية جداً بالموارد خصوصاً الفضة لإن الرومان مثلاً عملوا فلوس زي الفل من التنقيب علي الفضة بس إسبانيا تحت حكم القوط معندهاش الحكومة اللي تقدر تستفيد بالموارد دي .. الزراعة رايحة في داهية .. مفيش إهتمام بالموانيء .. لإن الدولة سياسياً ضعيفة فمفيش أمن وأمان وبالتالي طرق التجارة محدش بيمشي فيها .. كل ده إترجم في الأخر إن إسبانيا بلد مكنش فيها فلوس .. هي بلد فيها خير وخير كتير كمان بس مفيهاش فلوس .. مفيش فلوس يعني مفيش مشاريع بنية تحتية Infrastructure تتعمل .. يعني مفيش لا كباري ولا طرق .. إجتماعياً إسبانيا كانت عاملة زي دبي .. طول ما إنت ماشي حتشوف جنسيات وملل لا حصر لها .. عرب تلاقي .. قرطاجيين تلاقي .. رومان تلاقي .. فرنساويين تلاقي .. مجتمع متنوع جداً في ثقافاته .. فقير جداً إقتصادياً .. ضعيف جداً سياسياً .. كل ده وصل أقصي درجاته سنة 710.
سنة 710 كانت السنة اللي المغرب العربي كان تحت إيد (موسي بن نصير) .. (طارق بن زياد) كان إتعين حاكم طنجة .. الدنيا مستقرة جداً تحت .. فوق بقي الدنيا كانت والعة .. في السنة دي مات ملك القوط وكان إسمه (واتيزيا Witiza) وكان إبنه هو المرشح الأول إنه يُنتخب ورا أبوه .. وزي ما فيه ناس بتركب الموجة قبل ما أي حد تاني يلحق ففيه أمير إسمه (رودريك Roderic) عمل إنقلاب عسكري وأعلن نفسه ملك علي القوط عافية كده .. طبعاً ده كان السبب إن دولة القوط تخش في حرب أهلية .. وطبعاً أول واحد عرف الخبر ده كان (طارق بن زياد).
المصادر:
- فيديو بعنوان The Journey to al-Andalus – The Muslim conquest of North Africa وده لينك الفيديو علي YouTube:|
https://youtube.com/watch?v=aYkn2KfYvFw&feature=share&fbclid=IwAR2_7I75SQ_IOv7yV0Qifu3ajnzS41oLSkHYSct1aCl4r2gfSYudBzX51HE - فيديو بعنوان The conquest of Hispania – The Moors pf Andalusia – EP 3 P 1 WOTW وده لينك الفيديو علي YouTube:
https://youtube.com/watch?v=rr-6omka00Y&feature=share&fbclid=IwAR0MTPrbFY1jNXY9kxXTLQI_0qAmEsCEOilnOm6dOT1tWctzTYiu3z2Es9w
