لينك التسجيل الصوتي للمقالة علي Sound Cloud:
https://soundcloud.com/user-112011687-312727988/n7ehxrcctell?si=5b28159369444f55ba1161b3b017f041&utm_source=clipboard&utm_medium=text&utm_campaign=social_sharing
لما سيدنا (الحسن بن علي بن أبي طالب) إتفق مع سيدنا مع سيدنا (معاوية بن أبي سفيان) رضي الله عنهما بإنهم ينهوا الفتنة الكبري الأولي سنة 661 واللي كان إن يا (معاوية) لو خلاص حتموت ويتقالك يا أمير المؤمنين أحكم إنت يا سيدي وربنا يديلك طولة العمر .. لكن .. بعد عمر طويل إن شاء الله لما تموت لازم تتعمل بيعة جديدة بين المسلمين لإختيار خليفة .. الفكرة إن إختيار الخليفة لازم يكون ببيعة أو تكليف .. إن يا المسلمين يبايعوك زي اللي حصل مع سيدنا (أبوبكر) وسيدنا (عثمان بن عفان) رضي الله عنهما .. أو إن تتكلف بالولاية زي ما سيدنا (أبوبكر) عمل مع سيدنا (عمر بن الخطاب) رضي الله عنه .. لما سيدنا (معاوية) أعلن إن إبنه (يزيد) هو ولي عهده وبالتالي إنتقال السلطة بقي وراثي مش بإختيار المسلمين ثار سيدنا (الحسين بن علي) رضي الله عنه .. قلتها مرة وحرجع أقولها تاني .. المشكلة مش إن (يزيد) وحش .. قد يكون (يزيد) رجل طيب ويتحط علي الجرح يطيب .. المشكلة في المبدأ .. أهم حتة في أي دستور بيحكم أي بلد هو الجزء الخاص بالإنتقال السلمي للسلطة .. دي الحتة اللي بتخلي البلد يا دولة عظمي يا دولة من دول العالم الثالث .. الحكم الوراثي في رأي سيدنا (الحسين) علي الأقل مش من الشرع ومش من الدين وبيودي البلد كلها في ستين داهية .. الحكم الوراثي بيخليك عايش جوه المثل اللي كان بيتقال في مسلسل Game of Thrones لما كان بيتقال كل مرة حد من عيلة التارجاريان بيتولد الألهة بتلعب ملك وكتابة وإنت وحظك بقي .. يا العيل الصغير يطلع ملك عظيم .. أو يكون هو السبب في سقوط البلد كلها .. ده اللي كان شايفه سيدنا (الحسن) ومن بعده سيدنا (الحسين) وده اللي إنت حتشوفه معايا بعنيك في الأندلس.
(عبدالرحمن الأوسط) .. لما حظك يبقي حلو في لعبة الملك وكتابة:
(عبدالرحمن الثاني) أو (عبدالرحمن الأوسط) كان حاكم شاطر في شغله .. هو كان عامل زي عسكري المطافي اللي كل شوية يجري يطفي حريقة في حتة بس (عبدالرحمن) مكنش بيطفي حرايق .. ده كان بيطفي ثورات .. هزيمته للفايكينج في معركة تاي لاتا سنة 844 خلته هو الكبير أوي بتاع الأندلس وده عطاله وقت إنه زي ما إنت كمهندس تبقي شغال في مشروع والجدول الزمني بتاعه مساعدك إنك تحنتف في شغلك .. (عبدالرحمن) فرمط الدولة كلها وخلاها تشتغل زي الساعة:
- كونك سيطرت علي الوضع الداخلي خلاك مش كل شوية تحرك جيشك عشان تطفي ثورة في مدينة ما .. ده معناه إن إنفاقك العسكري نفسه قل .. ده معناه برده إن أولاً فلوس الضرائب اللي بتخشلك بتزيد والأهم إنك بقيت تستخدم الفلوس دي عشان تحسن من حياة الناس مش بتصرفها علي جيشك.
- مجرد إنك بقيت بتحكم دولة مستقرة خلي يبقي عندك إمكانية إنك تقول لنفسك طب ما يلا نعمل أسطول .. نعمل أسطول يبقي لازم يبقي عندنا ترسانة بحرية .. ده معناه إن المهندسين بتوعك بقوا بيتعلموا كل يوم حاجة جديدة وده لوحده بفلوس.
- زمان كان الجامع مش معمول عشان الناس تصلي فيه وخلاص .. الجامع زمان كان مركز بحثي متكامل .. الجامع كان الناس بتصلي فيه .. الجامع كان فيه جامعة ومركز بحوث .. لما (عبدالرحمن) بني جامع في مدينة إشبيلية وبني جامع تاني في مدينة حايين في جنوب إسبانيا فهو فعلياً كان بيبني جامعات مش مجرد مكان الناس تصلي فيه .. ده السبب إن الأندلس في عهده نطت نطة علمية محصلتش .. أكيد سمعت عن (عباس بن فرناس) اللي كل الفرارجية لسبب ما بيسموا محل الفراخ بتاعهم علي إسمه .. (عباس بن فرناس) كان (ليوناردو دافنشي) قبل ما (ليوناردو دافنشي) يتولد .. كان دكتور وكيميائي ومهندس وموسيقار .. وده الرجل اللي طلع علي قمة برج قرطبة وفرد جناحات من الخشب من تصميمه وطار من فوقه وعملك فيها بيلعب Assassin’s Creed عشان يثبت إن البشر يقدروا يطيروا.
- (عبدالرحمن) حط فلوس كتير في تطوير البنية التحتيىة .. عمل وزارة للمالية .. عمل بنك مركزي إن الناس اللي معاها فلوس تقدر تحط ذهبها وفضتها وفلوسها فيه بدل ما هي محطوطة في بيوتهم.
- (عبدالرحمن) خد نموذج الحكومة بتاع الدولة العباسية وبدأ يطبقه عنده .. بقي عنده منصب إسمه الحاجب ولما تشوف Job Description بتاع الرجل ده تلاقيه حاجة شبه رئيس الوزراء كده .. بقي عنده سكرتير لكل حاجة .. يعني الري والبنية التحتية بقي ليها سكرتير هو اللي مسئول عنها .. التعليم بقي له سكرتير مسئول عنه .. ومع ده كله عمل مجلس مستشارين عشان يساعدوه يحكم.
- (عبدالرحمن) بقي فاضي بقي .. قالك طب ما نعمل حاجة شبه وزارة الخارجية كده ويبقي لينا سفارات في دول تانية .. الرجل ده كان له سفير عند الإمبراطورية الرومانية المقدسة اللي هي ألمانيا دلوقتي .. كان له سفير عند الإمبراطورية البيزنطية اللي هي تركيا دلوقتي .. والأهم إن كان له سفير عند الدولة العباسية اللي هم المفروض أعداءه .
بس ده مش معناه إن الدنيا مشيت زبادي خلاط مع (عبدالرحمن) .. أكيد أي حاكم في الدنيا بيطلعله خازوق يقرفه في عيشته والخازوق بتاع (عبدالرحمن) كان إسمه (يولوجيوس Eulogius) .. (يولوجيوس) كان قسيس عايش في قرطبة اللي هي عاصمة الأندلس .. مهم تبقي فاهم إن Concept بتاع الحكم في الأندلس كان إن والله إحنا كمسلمين بنحكم البلد معندناش أي مشكلة إنك تبقي مسيحي أو يهودي طالما إنت بتدفع الضرائب اللي عليك وبتصلي في الكنيسة أو المعبد المخصص ليك .. غير كده إنت صاحبي وحبيبي وكفاءة .. (يولوجيوس) مكنش عاجبه الكلام ده .. هو كان شايف إن المسيحيين الكاثوليك هم السكان الأصليين للأندلس وبناء عليه الناس دي من حقها تصلي وتعبد ربها زي ما هي عايزة وقت ما هي عايزة .. ده حط (يولوجيوس) علي الرادار بتاع الحكومة بإنه رجل بتاع مشاكل .. (يولوجيوس) أثبت إنه مش بس بتاع مشاكل ده خازوق لما أقنع 48 بني أدم إنهم ينتحروا في قلب العاصمة قرطبة كإعلان رفض للسياسة الدينية ل(عبدالرحمن) .. حاول بس تتخيل الكارثة .. حاول تتخيل إن مثلاً قسيس قبطي مكنش عاجبه إن القداس لازم يتعمل جوه الكنيسة وكان شايف إن من حق الأقباط يعملوا القداس في الشارع فأقنع 48 بني أدم إنهم ينتحروا في ميدان التحرير .. إنت متخيل حجم القلق اللي حيحصل في البلد؟
(عبدالرحمن) برده كان رجل عاقل .. هو طلب يعمل مؤتمر ديني للمسيحيين في مدينة إشبيلية والمؤتمر خلص علي إن قادة الكنيسة الكاثوليكية في الأندلس قالوا إن مينفعش ده يتكرر تاني .. (عبدالرحمن) كان بسهولة أوي ممكن يقرر يعدم (يولوجيوس) بس هو قال كفاية دم لحد كده ونفاه بره الأندلس وراح قعد في حتة إسمها بامبلونا Pamplona في شمال إسبانيا فوق خالص عند الممالك المسيحية اللي هناك .. سنة 859 (يولوجيوس) رجع تاني قرطبة ورجعت ريما لعادتها القديمة بس المرة دي (عبدالرحمن) كان خلقه بقي ضيق بصراحة وقرر إعدامه عشان يخلص.
زي ما إنت شايف حظ الأندلس كان حلو في لعبة الملك والكتابة بتاعة الحكم الوراثي لما (عبدالرحمن الاوسط) مسك الحكم .. 30 سنة من الإستقرار والنمو كانوا زي الفل الحقيقة بس زي ما الهضبة قال .. دوام الحال من المحال وكلام كتير يتقال .. سنة 852 بيتوفي (عبدالرحمن الثاني) وبيجي مكانه إبنه (محمد الأول) .. فيه تريند حتبدأ تلاحظه معايا وإن كل ما يجي حاكم جديد للأندلس لازم الناس الأول تعمله إختبارات زي إختبارات أكاديمية الكورة كده .. الناس اللي بتحب Star Trek ممكن يكونوا عارفين إن في قصة الأفلام والمسلسلات بتاعة السلسلة دي فيه كوكب إسمه كلينون عايش فيه شعب غريب شوية مبدأهم في الحياة في التعامل مع حكامهم إن أنا مش فارق معايا إنت مين وأبوك مين .. اللي يفرق معايا إني أعرف إنت حتنهار بعد ما أعمل كام ثورة عليك .. لازم أي حاكم يقعد علي الكرسي كام مدينة في الأندلس تثور .. ليه؟ متفهمش .. غالباً اللي بيثوروا دول مش عارفين هم بيعملوا كده ليه أصلاً .. لسه (محمد) بيقول يا فتاح يا علم يا رزاق يا كريم لقي إن أهل مدينة طليطلة اللي هي Toledo ثارو عليه .. ومش بس كده .. دول طلبوا مساعدة الملك (أرودونيو الأول) بتاع الممالك المسيحية اللي فوق في شمال إسبانيا .. سنة 855 (محمد) هزم الميكس بتاع أهل طليلطية وجيش (أرودونيو الأول) .. شوية ومدينة ميريدا هي كمان ثارت عليه .. شوية والفايكينج جم تاني .. (محمد) فعلياً كان حاكم كويس ويمكن لولا ده مكنتش الأندلس عرفت تقف علي رجليها.
(عمر بن حفصون) و(عبدالله بن محمد) .. أصل هي المصايب مش بتيجي لوحدها:
أحيانا بحس إن المصايب بينهم وبين بعضيهم كده عاملين جروب واتس اب عشان يتفقوا يهلوا كلهم مع بعض .. المصايب كانت بتتجمع فوق دماغ الأندلس ومحدش خد باله إلا بعد فوات الأوان ودايماً المصايب بتيجي علي إيد ناس إنت مش متخيل إنهم يطلعوا بلاوي أوي كده .. يعني مثلاً .. سنة 850 إتولد في مدينة مالاجا جنوب إسبانيا عيل إسمه (عمر بن حفصون) .. (عمر) كان بني أدم عصبي وزيه زي أي بني أدم عصبي بتلاقيه دخل في خناقة وأعصابه فلتت وعمل مصيبة .. في خناقة من خناقاته قتل حد من جيرانه وإضطر إنه يسيب بيته ويهرب يعيش في الجبال وتحول للنسخة الأندلسي من (إبراهيم الأبيض) .. لما حس إن الدنيا بتخنق عليه قرر يسيب الأندلس وراح عاش في المغرب .. وهو في المغرب إشتغل خياط بس زي ما إنت عارف اللي جرب يعيش في السكة البطالة بيبقي صعب عليها يسيبها .. أي حد إتفرج علي أفلام أجنبي كتير عارف إن أول ما يتفرج علي فيلم يلاقي البطل بتاعه في أول مشهد خارج من السجن فغالباً يعني الفيلم حيخلص بإن يا البطل يموت أو يخش السجن التاني عشان رجع لنفس السكة البطالة .. المهم (عمر بن حفصون) رجع تاني الأندلس بس إذا كان هو ساب الأندلس وهو (إبراهيم الأبيض) فلما رجع كان (عبدالملك زرزور).
فيه ناس في التاريخ زي (عمر بن حفصون) وزي (حسن الصباح) مؤسس الطائفة النزارية واللي إنت عارفها بإسمها السيكسي أكتر اللي هو الحشاشين تحسهم غاشين من نفس الورقة .. الورقة بتقول إن أسهل طريقة إنك تلم حوليك ناس إنك متحاولش تحل مشاكلهم .. أسهل طريقة إنك تروح للناس تقولهم عارفين مشاكلكم دي كلها مين السبب فيها؟ الحاكم اللي قاعد علي الكرسي هناك ده .. حطوني مكانه وكل مشاكلكوا حتتحل .. طبعاً هو لا بيحل ولا نيلة بس مش هي دي القضية .. القضية إن (عمر بن حفصون) بص للناس وقالهم إن (محمد بن عبدالرحمن) هو السبب في كل مشاكلكم .. حطوني علي الكرسي وملكوش دعوة .. بداية إن الناس تبدأ تاخد بالها من (عمر بن حفصون) لما عرف هو ورجالته يسيطروا علي قلعة بوباسترو Bobastro جنوب إسبانيا يدوبك كام ساعة بالعربية من مالاجا المدينة اللي هو إتولد فيها .. سنة 886 (محمد بن الرحمن) بيتوفي وبيجي وراه إبنه (المنذر) اللي حكم يدوبك سنتين من 886 لحد 888 عشان يجي بعد كده الكارثة اللي تجسدت في بني أدم .. (عبدالله بن محمد بن عبدالرحمن).
بص يا إبن الحلال يا اللي بتقرأ اللي أنا بكتبه .. إنت عشان تبقي حاكم كويس مش لازم يبقي معاك IQ محصلش قبل كده .. مش لازم تبقي لواء في الجيش .. مش لازم تبقي مهندس ومش لازم تبقي إسكندراني .. يكفي إني أقولك إن واحد من أهم رؤساء أميركا في تاريخها كان (هاري ترومان Harry Truman) اللي مسك الحكم وقت الحرب العالمية الثانية وهو اللي قاد أميركا للنصر في الحرب وكان هو صاحب قرار ضرب اليابان بالقنبلة النووية .. (هاري ترومان) كان النائب بتاع الرئيس (فرانكلين روزفيلت Franklin D. Roosevelt) واللي كان بعيد عنك كان عنده شلل أطفال وده خلاه بما إنه رئيس دولة بس عايش بكرسي متحرك محتاج يبقي النائب بتاعه زي ما تقول كده شخص هُزق .. شخص لا يُعتمد عليه .. وإلا في أقرب فرصة حينقلب علي الرئيس ويقول أدي أخرة الشعب اللي يجيب رئيس علي كرسي متحرك .. (هاري ترومان) كان يُقال إنه عبيط لدرجة إنه مكنش بيعمل حاجتين في نفس الوقت .. كان يُقال إنه لما يمشي وهو بيشرب سيجارة يتكعبل .. بس سبحان الله لما (فرانكلين روزفيلت) مات فجأة وهو في الحكم و جه وراه (هاري ترومان) زي ما يكون سوبرمان اللي كان متنكر في هيئة (كلارك كينت Clark Kent) .. فجأة إكتشفنا إن (هاري ترومان) ده رجل عاقل وراسي ويقدر يحكم .. مش لإنه عبقري .. لإنه سوي نفسياً ودي أهم حاجة لازم تبقي عندك كبني أدم عشان تبقي حاكم كويس .. تبقي سوي نفسياً .. أبوك وأمك ربوك كويس .. مش بتتقمص من أقل كلمة .. مش إنطوائي .. مش حقودي .. مش كل ما حد ينصحك تزعق وتتهمه بإنه بيغير منك .. كل الصفات دي مكنتش موجودة في (عبدالله) وده ماشي مع التريند بتاع إن لسبب ما حكام الأندلس مكانوش بيعرفوا يربوا عيالهم.
(عبدالله) حكم الأندلس من 888 لحد 912 يعني قعد في الكرسي 24 سنة حصل فيهم 30 ثورة .. كل ثورة بتحتاج إن (عبدالله) ياخد جيشه ويروح يطفيها .. كل ثورة بتقوم بتكلف ميزانية الدولة ملايين .. بعد 30 ثورة ففعلياً الميزانية إتداس علي وشها .. يكفي إني أقولك إن سنة 889 يعني يدوبك بعد سنة من توليه الحكم مدينة إشبيلية قالتلك أنا مش معترفه ب(عبدالله) ده كحاكم .. سنة 891 (عمر بن حفصون) اللي هو كمان بقي تحت إيده قلعة مستقلة عن حكم (عبدالله) جه بجيشه للعاصمة قرطبة وحاول ياخدها بس إتهزم .. 24 سنة الدولة بتفك من بعضها و(عبدالله) مش معانا أصلاً .. مش بس إشبيلية اللي إستقلت .. طليطلة إستقلت .. سرقسطة إستقلت .. الممالك المسيحية في شمال إسبانيا بقت واخدة وضعها لدرجة إنهم نقلوا العاصمة بتاعتهم من أوفييدو فوق خالص في الشمال لمدينة ليون تحت شوية وده يوريك قد إيه الناس دي مبقتش بتخاف من دولة الأمويين في الأندلس .. كل ده كوم وإن سنة 909 أُعلنت دولة الفاطميين في المغرب .. كل اللي كان (عبدالله) بيفكر فيه إن أكيد فيه مؤامرة بتتعمل ضدي .. بسبب البارانويا أو الخوف المزمن اللي هو معيش نفسه فيه خطط ونفذ عملية إغتيال إخواته الإتنين .. مش بس كده .. (عبدالله) أقنع عيل من عياله إنه يقتل أخوه .. وبعد كده أعدمهم هم الإتنين .. (عبدالله) كان معزول عن اللي بيحصل لدرجة إنه كان له كوبري مخصوص ليه بيوصله من قصره لحد الحتة اللي بيصلي فيها في مسجد قرطبة الكبير عشان ميحتكش بحد وميتكلمش مع حد من شعبه في الشارع .. بإختصار شديد (عبدالله) كان إبتلاء من ربنا .. إبتلاء ربنا رفعه لما يوم 16 أكتوبر 912 مات وجه مكانه حفيده (عبدالرحمن) اللي التاريخ فاكره بإسم (عبدالرحمن الثالث) أو (عبدالرحمن الناصر لدين الله) واللي في رأيي واحد من أهم حكام الحضارة الإسلامية.
(عبدالرحمن الثالث) .. الزهر لعب وإتبدلت الأحوال:
أبو (عبدالرحمن) كان (محمد) إبن (عبدالله) .. (محمد) إتعدم علي إيد أبوه لما إبنه كان لسه يدوبك عنده 20 يوم بس لسبب ما (عبدالله) إختار من زمان إن حفيده (عبدالرحمن) هو اللي حيجي يحكم من بعده .. بس هو فيه نقطة .. لما (عبدالرحمن) مسك الحكم لو كنت نزلت الشارع سألت الناس توقعاتكوا إيه للمستقبل فكانت الإجابة غالباً حتكون إن دي أخر أيام بنو أمية في الحكم .. الإقتصاد واقع .. الأندلس بقت يدوبك العاصمة قرطبة وشوية الضواحي اللي حوليها .. الجيش تقريباً مش موجود .. الإحساس العام في الشارع إن خلاص الأندلس ماتت وبالتالي مفيش حد بيكون طمعان يحكم خرابة .. (عبدالرحمن) فعلياً مكنش فيه حد بيتأمر عليه لإن مفيش حد كان عايز يتأمر عليه .. أصل معلش يعني الأندلس مبقتش أملة .. نقطة تانية وهي إن (عبدالرحمن) أصلاً مكنش بني أدم عادي .. زي ما قلتلك هو أساساً ملحقش يشوف أبوه بس أمه كانت ست مسيحية وجدته كانت أميرة من إقليم الباسك شمال إسبانيا .. هو ورث من أبوه ملامحة العربية بس ورث من أمه عينيه الزرقا وشعره الأشقر .. كان يُقال إنه بسم الله ما شاء الله كان أمور أوي .. خدها مني قاعدة ومتراجعش ورايا .. لو لقيت رجل أمور أوي كده فإنت يا حتلاقيه عيل متدلع بيقضي وقته قدام المراية زي البنات وحتلاقيه مش مؤهل إنه يشيل مسئولية .. أو العكس تماماً .. حتلاقيه إنه عارف إنه أمور وبناء عليه ده مخلي ثقته في نفسه عالية حبتين وغالباً ده بيكون راجع لتربية أمه.
كون (عبدالرحمن) أمه مسيحية فده علمه من وهو صغير إنك ممكن تلاقي حد مسيحي وشاطر في شغله وتعتمد عليه وتستفيد منه عادي جداً .. (عبدالرحمن) من وهو صغير إتزرع فيه حته إن الدين مش معيار تبني عليه طريقة تعاملك مع البني أدمين .. في نفس الوقت (عبدالرحمن) كان متأثر أوي بشغل جده الكبير (عبدالرحمن الثاني) أو (عبدالرحمن الأوسط) .. زي ما شرحت إن (عبدالرحمن الأوسط) كان بيراضي المحترم وبيدوس علي وش قليل الأدب .. (عبدالرحمن الثالث) مشي علي نفس المبدأ .. تسمع الكلام تبقي صاحبي وحبيبي وحغرقك هدايا وبرستيج .. تقل أدبك حسففك التراب .. بس الحتة الزيادة اللي كانت عند (عبدالرحمن) هي إنه كان بيذاكر .. بيذاكر كويس أوي .. يُقال إن (عبدالرحمن) كان محضر نفسه لليوم اللي حيمسك فيه الحكم من زمان أوي يمكن من قبل ما جده يموت بسنين وده خلاه يحط خطة فضل يشتغل عليها لسنين وسنين لحد ما جه وقت التنفيذ.
خطوة رقم واحد .. إعرف حبايبك من عدوينك .. (عبدالرحمن) طلب إن كل أمراء وحكام المدن اللي تبع الدولة الأموية في الأندلس إنها تبعتله جوابات تقسم فيها بالولاء ليه .. صحيح إن فيه أمراء بعتوا جواب الولاء ده علي أساس إن الكلام معليهوش ضرايب بس هي الفكرة إن فيه أمراء مرضيتش تبعت أصلاً فإنت من اليوم الأول كحاكم للأندلس بقي عندك رؤية مين عدوك ومين مش حقول حبايبك بس علي الأقل اللي مش مستنيين أول فرصة عشان يثوروا عليك.
خطوة رقم إتنين .. شوف دايرة نفوذك ووسعها .. ده اللي عمله الأمريكان لما إحتلوا العراق إنهم عملوا المنطقة الخضراء أو Green Zone في بغداد ودي منطقة نفوذهم وبدأوا يوسعوها واحدة واحدة .. (عبدالرحمن) طلب من الأمراء اللي أقسموا ليه بالولاء إن كل واحد يبعتله قوات من مدينته عشان تبقي نواة الجيش الموحد للأندلس .. القوات دي سنة 913 يعني بعد سنة من توليه الحكم سيطرت علي مدن غرناطة وحايين وأسيها .. المدن الثلاثة كانوا ضمن دايرة نفوذ العاصمة قرطبة وفي نفس الوقت قريبين من مركز قوة (عمر بن حفصون) في قلعة بوباسترو.
خطوة رقم ثلاثة .. ضم المدن اللي إستقلت بس إختار التوقيت الصح .. البداية كانت مع إشبيلية اللي سنة 913 برده الحظ خدم (عبدالرحمن) إن الحاكم بتاع إشبيلية واللي خلاها تنفصل عن حكم الأمويين في الأندلس وكان إسمه (إبراهيم بن الحجاج) مات .. لما (عبدالرحمن) حاصر إشبيلية أهلها بعتوا جواب ل(عمر بن حفصون) عشان يجي يلحقهم .. في ديسمبر 913 إشبيلية إستسلمت ل(عبدالرحمن) بعد حصار مقعدتش كام شهر وقوات (عمر بن حفصون) إتهزمت.
خطوة رقم أربعة .. هاتولي الكلب اللي إسمه (عمر بن حفصون) ده .. سنة 914 مالاجا إنضمت لحكم (عبدالرحمن) وفضلت قواته تتقدم زي القطر لحد ما وصل لمدينة ألجاسيراس Algeciras وده الإسم الإنجليزي ليها والإسم العربي هو الجزيرة الخضراء .. الجزيرة الخضراء كانت الميناء الأساسي للأندلس وكانت الميناء اللي أغلب الإمدادات والسلاح والأكل اللي بيجي لقوات (عمر بن حفصون) من المغرب بتوصل له عن طريقه .. (عبدالرحمن) لما وصل الميناء إتقاله إن فيه كذا سفينة متحملة أكل وسلاح جم من المغرب وكان المفروض إن (عمر بن حفصون) يجي يستلمهم .. تفتكر (عبدالرحمن) يعمل إيه؟ .. ولع في السفن كلها .. سنة 916 (عمر بن حفصون) بعت جواب ل(عبدالرحمن) يترجاه إنه يرضي إن الحرب اللي بينهم دي تخلص .. أرجع أسألك .. تفتكر (عبدالرحمن) يعمل إيه؟ .. لك أن تتخيل إن (عبدالرحمن) وافق علي وقف إطلاق النار وطلع عفو عن (عمر بن حفصون) اللي مات السنة اللي وراها علي طول 917 .
سنة 917 مدينة فالنسيا الساحلية بقت تحت إيده .. سنة 922 مدينة ألميريا أو العامرية هي كمان بقت تحت إيده .. سنة 923 قوات (عبدالرحمن) حاصرت قلعة بوباسترو اللي كانت معقل (عمر بن حفصون) واللي صحيح مات بس إبنه (جعفر) كمل وراه .. القلعة فضلت متحاصرة من 923 لحد 927 وأخيراً يوم 17 يناير 928 بوباسترو وقعت في إيد (عبدالرحمن) .. والغريبة مش في كده .. لما (جعفر) إتأسر متقتلش ولا إتسجن .. لا خالص .. (عبدالرحمن) عينه قائد في الجيش .. طبيعي إنك تسأل لية؟ .. الإجابة بمنتهي البساطة أصل معلش يعني القائد اللي يستحمل حصار السنين دي كلها تبقي غبي لو مستفدتش منه.
المصادر:
- فيديو بعنوان History of Islamic Spain under the Umayyad of Al Andalus – WOTW EP4 P4 وده لينك الفيديو علي YouTube:
https://www.youtube.com/watch?v=qPwOhhBLYhw - فيديو بعنوان The history of Abd Al Rahman III – The greatest ruler of Islamic Spain WOTW EP5 P1 وده لينك الفيديو علي YouTube:
https://www.youtube.com/watch?v=z5xJp9QM_vc
