لينك التسجيل الصوتي للمقالة علي ساوند كلاود:
https://on.soundcloud.com/xAFuQ
أنا عايزك تجيلي بقي كده وتنسي اللي إنت تعرفه من لعبة Assassin’s Creed عشان النهاردة حنحكي قصة الحشاشين ودي مفيهاش لا Animus Room ومفيهاش فرسان المعبد Knights Templar وأي حد لعب Assassin’s Creed حيبقي فاهم كلامي .. قصة الحشاشين بتبدأ ب3 صحاب كانوا عايشين في مدينة إسمها نيسابور في إيران دلوقتي .. الثلاثة الصحاب دول كانوا عايشين في مجتمع وفي دولة أقرب ما تكون للدول الإسكندافية دلوقتي زي الدانمرك والنرويج والسويد .. أكيد سمعت في الأخبار وعلي Social Media إن الدول الأوروبية دي تقريباً حلت كل مشاكلها وعندهم عدالة إجتماعية لدرجة إن من الملل الشباب هناك مش لاقي حاجة يعملها فبينتحر وأعلي معدل إنتحار علي مستوي العالم موجود في الدول دي .. نيسابور زيها زي مدن كتير عايشة تحت مظلة الدولة العباسية كانت عايشة في رخاء وترف لدرجة إن الشباب مكنش لاقي حاجة يشغل بيها وقته إلا العلم والفلسفة والتفكير في الأسئلة الوجودية زي إحنا عايشين هنا ليه؟ وإحنا إيه اللي جابنا هنا؟.. مدينة زي نيسابور مثلاً كان فيها 6 جامعات وده عدد جامعات ممكن متلاقيهوش في مدن أوروبية كبيرة.
ال3 الصحاب كانت أساميهم (نظام الدين) و(عمر الخيام) و(حسن الصباح) .. فيه منكوا كتير ميز إسم (عمر الخيام) أو عدي عليه الإسم قبل كده .. الرجل ده كان شاعر محترم جداً إتشهر أوي بحاجة إسمها رباعيات (الخيام) .. رباعيات (الخيام) دي عشان تفهمها حاول تفتكر أي بيت شعر من اللي كنت بتحفظهم في درس النصوص في العربي .. مش كنت بتلاقي البيت عبارة عن نصين نص يمين ونص شمال .. أهي رباعيات (الخيام) دي فكرتها إن كل نص فيه 4 كلمات يعني البيت كله علي بعضه 8 كلمات ومن هنا جت كلمة رباعيات (الخيام).
كده إنت عرفت مين هو (عمر الخيام) .. (نظام الدين) ده كان الدحيح اللي فيهم اللي حلم حياته إنه يوصل لمنصب عالي والناس طول ما هو ماشي ترفعله تعظيم سلام وتقول (نظام الدين) راح (نظام الدين) جه .. (حسن الصباح) بقي ده كان البني أدم السوسة اللئيم اللي ميريحكش أبداً .. تعدي الأيام وسنة 465 هجرية اللي هي 1072 ميلادي (نظام الدين) الزهر يلعب معاه ويسافر لمدينة أصفهان الإيرانية عشان يبقي وزير الحاكم بتاع المدينة واللي كان إسمه (ملك شاه) .. اللي حصل إن الصحاب الثلاثة كان بينهم إتفاق إن لو واحد فيهم قب علي وش الدنيا لازم يسحب الإتنين التانيين معاه .. اللي طلبه (عمر الخيام) من صاحبه (نظام الدين) إنه يصرفله بالحب كده مرتب شهري من بيت مال المسلمين بحيث يعيش مفخد مبيعملش حاجة في حياته غير إنه يكتب شعر ويدرس في الطب .. علي فكرة (عمر الخيام) كان دكتور شاطر جداً وهو اللي تولي علاج إبن (ملك شاه) حاكم أصفهان وكان إسمه (سنجر) .. (عمر الخيام) قعد 20 سنة كاملة يعني لحد سنة 485 هجرية يعني لحد سنة 1092 ميلادي كان بياخد مرتبه الشهري لحد ما (نظام الدين) إتقتل زي ما حنشوف كمان شوية .. (حسن الصباح) كان طلبه إنه يفضل جنب (نظام الدين) في الحكومة عشان يتعلم إزاي الحكومات بتشتغل.
(حسن الصباح) لانه زي ما قلتلك حرباية ماشي علي الأرض بدأ يوطد علاقته بالناس اللي حول (ملك شاه) .. وقتها الحاجة اللي كانت واكله دماغ الرجالة كانت لعبة الشطرنج .. حاول تتخيل إن كل يوم (حسن الصباح) يعزم حد من الحكومة عنده في البيت ويفضلوا لحد الصبح يلعبوا شطرنج .. وقتها الشطرنج كانت عاملة زي PUPG كده اللي هو مفيش حد مبيلعبهاش .. قعد (حسن الصباح) يتصاحب علي الناس المهمين لحد ما بالحب كده إتعين سكرتير (ملك شاه) اللي هو زمان كان بيتسمي الحاجب يعني هو اللي بيدخل الناس تقابل الحاكم أو هو اللي بيحجب أو يخفي الحاكم عن الناس وعشان كده إتسمي حاجب .. المهم إن في يوم (ملك شاه) جاب (نظام الدين) قدام (حسن الصباح) وطلب منه يعمل جرد كامل لميزانية الحكومة وسأله محتاج وقت قد إيه عشان تخلص الشغلانة دي؟ .. (نظام الدين) قال عشان يدي لنفسه وقت قاله سنتين يا مولاي .. طبعاً أول ما (حسن الصباح) سمع سنتين دي قام لاطم علي وشه وقال يا لهوي سنتين إيه يا رجل إنت ده أنا أخلصلك الشغلانة دي كلها في 40 يوم .. (ملك شاه) وافق بس قال ل(حسن الصباح) يا ويلك يا سواد ليلك لو طلعت بتحور عليا.
بعد 40 يوم بالضبط كان الميزانية كلها مكتوبة وبتتعرض علي (ملك شاه) .. طبعاً محدش كان بيراجع ورا شغل (حسن الصباح) ومحدش كان بينخور وراه ولا حد عارف هي الأرقام دي حقيقية ولا هبد في هبد .. طبعاً (ملك شاه) بص ل(نظام الدين) بصة شايف الشغل يا أبو سنتين إنت .. هنا قامت خناقة من بتوع Game of Thrones بين (نظام الدين) و(حسن الصباح) .. الإتنين اللي كانوا زمان صحاب بس دلوقتي بقوا مش طايقين بعض وبيتأمروا ضد بعض .. يمكن لإن (حسن الصباح) حس إنه بيخسر أو إن نفوذ (نظام الدين) أقوي من نفوذه بس هو قرر إنه يهرب من أصفهان ويروح مصر وهنا القصة حتحلو أوي.
سنة 471 هجرية يعني سنة 1078 ميلادي جه (حسن الصباح) مصر والحقيقة إن سمعته كانت سابقاه .. متفهمش اللي بيحكم مصر وقتها (المستنصر بالله) شاف إيه في (حسن الصباح) بس هو قرر يستضيفه وعرفه علي الناس من الطائفة الإسماعيلية الشيعية اللي عايشين في مصر واللي (حسن الصباح) بينتمي لنفس مذهبهم .. بس يمكن اللي (المستنصر بالله) مكنش يعرفه هو إن (حسن الصباح) مش جاي مصر ياكل ويشرب وينام .. ده بني أدم طموحه ولا طموح اللورد (بيتر بايليش) بتاع Game of Thrones.
(المستنصر بالله) كان له إبنين .. الإبن الكبير (المعتصم بالله) والإبن الصغير (نزار) بس إذا كان (المستنصر بالله) كان هو حاكم مصر قدام الناس وهو اللي قاعد علي الكرسي بس أقوي رجل في البلد واللي فعلاً النامبر وان فيها كان (بدر الجمالي) وزير (المستنصر بالله) .. المشكلة إن (المستنصر بالله) كان في أخر أيامه وكان عايز إبنه الصغير (نزار) هو اللي يمسك حكم مصر من بعده بس (بدر الجمالي) كان عايز (المعتصم بالله) هو اللي يمسك .. (حسن الصباح) تخيل إنه لما يقف في صف (نزار) فهو بكده بيكسب بونط عند (المستنصر بالله) بس هو محسبهاش صح ومقدرش يستوعب مدي نفوذ وسلطة (بدر الجمالي) .. الوزير أمر بإعتقال (حسن الصباح) وحطه تحت الإقامة الجبرية في دمياط عشان يستريح منه ومن مشاكله.
(حسن الصباح) مقعدتش كتير في دمياط .. هو خد مركب رايحة الشام وهرب و(بدر الجمالي) سابه يهرب بمشاكله بعقده النفسية بره مصر .. لما (المستنصر بالله) مات وإبنه الكبير (المعتصم بالله) مسك حكم مصر زي ما (بدر الجمالي) كان عايز قتل أخوه (نزار) ودي كانت الشرارة اللي ولعت (حسن الصباح) .. مهم أوي تكون فاهم إن الشخصيات اللي زي (حسن الصباح) الغلاوية اللي بتعمل مشاكل كتير اللي عندها طموح إنها تشوف الدنيا بتولع محتاجين قضية يتلفوا عليها .. بص لشخصية زي الجوكر مثلاً في فيلمThe Dark Knight .. الشرارة اللي ولعته كانت وجود باتمان نفسه .. هو سرق البنك وسيطر علي المافيا في مدينة جوثام وحرق فلوسهم مش عشان إنه عايز هو اللي يمسك الجريمة مكانهم .. هو عمل كده عشان باتمان عطاله القضية اللي هو طول عمره مستنيها .. برده (حسن الصباح) موت (نزار) كان هو القضية اللي شالها علي كتفه بيلف مدن الشام والعراق وإيران علي رجليه بهدومه السودا وملامح وشه اللي كلها شر عشان يقول للناس دم (نزار) في رقبتكوا.
متفهمش إزاي بس موت (نزار) طلع الكاريزما دي كلها من (حسن الصباح) .. الرجل كان بيعرف يتكلم ولا (أدولف هتلر) في زمانه .. علي فكرة هو عمل نفس اللعبة اللي لعبها (هتلر) ولعبها (جمال عبدالناصر) الله يرحمه ولعبها وحيلعبها أي ديكتاتور .. هو بص للناس اللي بتعاني في حياتها اليومية وطالع عينها في الفقر والجوع والمرض وعرف إن الناس دي محتاجة أكتر من إن حد يساعدها محتاجين حد يلوموه علي الوضع اللي هم فيه .. (حسن الصباح) عمل ده .. هو شاورلهم علي (بدر الدين الجمالي) وكل الحكام اللي قاعدين علي الكراسي في العالم الإسلامي كله وقالهم (نزار) ده كان ممكن ينقذكوا من بطش وظلم وجبروت وفساد الحكام دول كلهم بس أنتوا سبتوه يتقتل وعشان كده حكامكوا بيفتروا عليكوا وهم السبب في اللي أنتوا فيه.
كم الغل والحقد اللي جوه (حسن الصباح) خلاه يفضل يمشي علي رجله من سوريا للعراق لحد الحدود الإيرانية الأفغانية دلوقتي يفضل يدعوا الناس إنها تنضم له لحد ما قابل قلعة مبنية من الحجارة كان الناس بيسموها قلعة الموت أو شاه دز .. جنب القلعة هو لقي كهف خده مقر له وفضل قاعد فيه .. منطق (حسن الصباح) اللي إنت محتاج تفهمه إن (نزار) هو الخليفة الشرعي للمسلمين ولإنه خليفه المسلمين فهو معصوم من الخطأ وهو هنا قصده إن الخليفة ده حاجة زي بابا الفاتيكان كده اللي هو حد بيحكم بتكليف إلهي ومبيغلطش ومبيتحاسبش وكلمته تمشي علي أطخن طخين .. بس (نزار) مات وبناء عليه هو بصفته نائب (نزار) فهو كمان معصوم زيه .. لما إنت تبقي حاكم منطقة وتلاقي حد مجنون عمال يقول إنه هو الخليفة الشرعي للمسلمين وإنه معصوم وإن أتباعه لازم يسمعوا كلامه فإنت لازم الفار يبدأ يلعب في عبك .. حاكم المنطقة اللي هي دلوقتي أفغانستان وزمان كان إسمها خراسان كان إسمه (علي بن المهدي) وهو قال خليني أتكلم مع (حسن الصباح) يمكن أوصل معاه لحل.
فعلاً (علي بن المهدي) راح ل(حسن الصباح) في الكهف وإتكلم معاه وقاله إنت لازم تمشي من هنا لإنك قاعد جنب قلعة الموت ودي قلعة إستراتيجية .. (حسن الصباح) عرض عليه إنه يأجر منه أوضة في القلعة دفع فيها ثمن ما يعادل سلخة بقرة يعني جلد بقرة لما تتسلخ عشان الأوضة دي حعيش فيها وأريحك مني ومن مشاكلي .. (علي بن المهدي) إتبسط جداً بالOffer ده لإن معني كده إن (حسن الصباح) حيفضل قاعد في القلعة مش حيطلع منها وتقريباً حيحبسه فيها بمعني إن (حسن الصباح) مش بس أجر أوضة يعيش فيها ده أجر الزنزانة بتاعة سجنه اللي هو دخله طواعية ومن غير ما حد يقبض عليه .. يدوبك هو أسبوع واحد عدي ووصل ل(علي بن المهدي) خبر إن (حسن الصباح) أعلن نفسه قائد لقلعة الموت وحتي العساكر اللي المفروض إنهم بيحموا القلعة وولاءهم ل(علي بن المهدي) باعوه وإنضموا ل(حسن الصباح) ومحدش عرف يقوله إنت بتعمل إيه .. الرجل خد القلعة وضع يد.
في المرحلة دي إنت لازم تفهم السحر اللي كان بيطلع من بق (حسن الصباح) .. إزاي الرجل ده كان بيقنع الناس تنضم له؟ .. الحقيقة إن المبدأ الأساسي لدعوته كان مركز علي الأغبياء والجهلة اللي مبيقروش .. (حسن الصباح) مكنش بيروح لشخص متعلم فاهم أصول دينه وعنده مباديء الفقه .. لا هو كان بيروح للجهلة اللي مش عارفين حاجة ويبدأ يصطادهم .. هو مكنش بيدور علي الناس اللي كانت ماشية بمبدأ فهمني دي جت إزاي؟ .. هو كان بيدور علي الناس اللي عايشة بمبدأ هذا ما وجدنا عليه أباؤنا وأجدادنا .. مع الوقت دعوته مكنتش إنه الخليفة الشرعي للمسلمين إنما بقت إنه نبي الله (والعياذ بالله) .. لما جت سنة 480 هجرية يعني 1087 ميلادي كانت أفكار (حسن الصباح) أو زي ما بقت تتسمي النزارية نسبة الي (نزار) بتنتشر زي السرطان .. أتباعه بيزيدوا يوم عن يوم واللي الحقيقة أنا شايف إن ده سببه حاجتين: أول حاجة إنه إستغل الفساد العام اللي بقي منتشر في كل حتة في العالم الإسلامي ويشاور علي الحكام والمؤسسات الحاكمة ويقول للناس شايفين دول أهم هم دول السبب في كل اللي إنتوا فيه .. تاني حاجة وهي دعوته كانت مبنية علي System ميخرش المياه وتقريباً هو الأساس اللي فكرة تجنيد الجواسيس اللي أجهزة المخابرات في العالم كلها بتستخدمها إتعلمتها منه .. الSystem بتاع التجنيد أو الRecruitment اللي كان (حسن الصباح) بيستخدمه مبني علي 7 خطوات بيتعملوا ورا بعض:
- أول خطوة هي التفرس .. إن لو أنا واحد من رجاله (حسن الصباح) فأنا لازم أفتح عيني كويس أوي علي الناس اللي أعرفها وأبدأ أشوف مين فيهم من الشخصيات اللي بتحب إن حد تاني يمشيها .. فيه بني أدمين معدومي الشخصية بيحبوا فكرة إن يتقالهم يعملوا إيه؟ وميعملوش إيه؟ .. النوع ده هو اللي رجالة (حسن الصباح) كانوا بيصطادوه عشان ينضم للنزارية.
- تاني خطوة هي التأنيس .. إني لو أخترت حد أبدأ أتعرف عليه وأعزمه علي الأكل وأتصاحب عليه ولإن الأكل الحلو هو أساس الصحوبية الناجحة فمرة مع مرة كلام بيجيب كلام وغالباً بحاول إن أغلب كلامنا يبقي حول قد إيه الوضع في البلد زي الزفت وإن الفساد بقي في كل حتة.
- ثالث خطوة هي التشكيك .. أبدأ أكسر كل المعتقدات اللي إنت مؤمن بيها وأقنعك بأفكاري وكله تحت مسمي الإصلاح .. أصل مين مبيحبش الإصلاح وإن البلد حالها يتحسن؟
- رابع خطوة هي التعليق .. بعد ما أكلتك وشربتك وإتكلمت معاك وإستريحتلي أسيبك كام يوم لا حس ولا خبر عشان تحس إنك مشتاقلي ومتقدرش تستغني عني.
- خامس خطوة هي الربط .. أبدأ أعرفك يعني إيه النزارية؟ وإحنا بنعمل إيه؟ ومؤمنين بإيه؟ ومسيبكش إلا وإنت أقسمت بالولاء والطاعة.
- سادس خطوة هي التدليس .. أبدأ أقنعك بإن النزارية هي الصح وأي حاجة تانية غلط .. النزارية عايزة مصلحة إيران ومصلحة بلاد الإسلام كلها .. والأهم إني أقنعك إن إحنا كتير أوي بس خايفين نقول .. إنت لو مشيت في الشارع حتلاقي كتير أوي مؤمنين بأفكارنا زيك بالضبط بس خايفين من الحكام المفتريين اللي لو شموا خبر حيموتونا.
- سابع خطوة هي التأسيس .. إني أخليك مؤمن بالنزارية ومطيع لكلام (حسن الصباح) وممكن تعمل أي حاجة عشانه حتي إنك تقتل أو تتقتل.
طيب بعد ما حد معين إنضم خلاص للنزارية وبقي من رجاله (حسن الصباح) إيه اللي بيحصل بعد كده؟ .. الرجل قسم رجالته رتب زي بالضبط رتب الجيش بحيث إن الرتب دي كانت كالأتي:
- الرتبة الأولي هي سيدنا اللي هو (حسن الصباح) نفسه وتقدر تسميه القائد الأعلي للنزارية أو بابا النزارية لو حبيت أو المرشد الأعلي للنزارية.
- المرتبة الثانية هم كبار الدعاة ودول مجلس القيادة.
- المرتبة التالتة هم الدعاة.
- المرتبة الرابعة هم الرفاق.
- المرتبة الخامسة هم الفداوية ودول خلي بالك منهم أوي.
- المرتبة السادسة هم اللاصقون.
- المرتبة السابعة هم العاديون.
الفداوية دول أو الفدائيين هم دول يبقوا الAssassins اللي إنت بتلعب بيهم في لعبة Assassin’s Creed .. دول الجناح العسكري للنزارية ودول الناس اللي دورها عمليات القتل والإغتيال .. هم أهم ناس في النزارية واللي ليهم معاملة خاصة جداً بس يمكن أهم حاجة بتميزهم إن كل واحد فيهم لما بيروح ينفذ عملية إغتيال كان بيبقي معاه ورقة والورقة دي شهادة ملكية لقصر في الجنة ماضي عليها (حسن الصباح) شخصياً .. نيجي بقي لأهم سؤال .. هم ليه الفداوية إتعرفوا في كتب التاريخ بالحشاشين وليه إتسموا Assassins؟
عشان الفداوية دول يقتلوا بدم بارد ويقعدوا يتشعلقوا علي الحيطان زي البرص وينطوا فوق أسطح البيوت زي ما كنت بتلعب وبتشوفهم حتي في الفيلم اللي زي الزفت Assassin’s Creed فالناس دول مكانوش فعلياً بيحسوا بأي ألم .. الناس دول كانوا علي طول وبشكل مستمر تحت تأثير مادة مخدرة إسمها القنب الهندي أو Cannabis Sativa ودي تبقي المادة الخام اللي بيتصنع منها الماريجوانا والبانجو والحشيش ومن هنا إتسموا حشاشين واللي إتحرفت للغة الإنجليزية لكلمة Assassin.
(حسن الصباح) لإنه إتولد وإتربي في نيسابور زي ما قلت في البداية فهو درس حاجات كتير زيه زي كتير من الشباب وكان من ضمن اللي درسه بإستفاضة هو الكيمياء فهو كان عارف إيه هو القنب الهندي؟ وبيستخدم في إيه؟ والمعلومة دي في العصر ده عامله بالضبط زي ما تبقي دلوقتي معاك دكتوراة في الأسلحة البيولوجية .. زمان كانت خواص نبات القنب الهندي ده من الأسرار الحربية وكان (حسن الصباح) بيخلي الفداوية بالذات يتعاطوا كمية حشيش مش طبيعية لدرجة إنه (سوري في الكلمة) بيفشخهم في أفكارهم فعلاً .. إنت بتبقي واحد من الفداوية و(حسن الصباح) بيقولك روح أقتل مثلاً القاضي الفلاني فإنت من ساعة ما بتاخد الأمر لحد ما بتنفذ الإغتيال لحد ما بتهرب إنت مش معانا في الدنيا .. إنت بتبقي عايش كأنك حرفياً بتلعب Video Game.
(حسن الصباح) خلي إيران بركة دم .. الإغتيالات كانت نازلة ترف فوق دماغهم .. أي حد (حسن الصباح) كان بيعتبره بيشكل تهديد لحلمه إنه يحكم إيران وباقي البلاد الإسلامية كان بيتقتل .. المشكلة مش في كده بس .. الفكرة مش إن الفداوية كانوا أقوياء وبيتنططوا فوق أسطح البيوت ولا إنهم متعصبين وشايفين نفسهم عندهم حق .. كل ده عادي .. اللي مش عادي إن الواحد فيهم لما كان بيروح ينفذ عملية إغتيال كان بيبقي مش حاسس بنفسه .. هو بيبقي تقريباً غايب عن الوعي بسبب كم الحشيش اللي بياخده وكتير منهم لما كانوا بيلاقوا نفسهم حيتمسكوا كانوا بينتحروا .. حتي اللي إتمسك قبل ما ينتحر بيبقي معروف هو جاي منين ومش محتاج حد يعذبه .. هو فداوي من الفداوية بتوع (حسن الصباح) اللي قاعد في قلعة الموت .. الناس كلها كانت عارفه والناس كلها مش عارفه تعمل حاجة .. من ضمن ضحايا إغتيالات الفداوية كانوا (نظام الدين) اللي كان صاحب (حسن الصباح) وإتربوا سوا .. من ضحاياهم برده (ملك شاه) حاكم نيسابور .. من بعده جه إبنه (سنجر) اللي يدوبك بعد كام يوم من توليه الحكم جاتله رسالة من (حسن الصباح) قاله فيها كل رجالتك اللي حوليك شغالين لحسابي .. بعدها بكام يوم (سنجر) صحي من نومه لقي فيه خنجر مغروز في المخدة اللي جنب راسه.
دي كانت بداية قصة الحشاشين بس إن شاء الله في مقالات جاية ممكن نحكي إزاي إنتهوا بعد ما قلعتهم إتدمرت علي إيد (هولاكو) وإزاي رجعوا تاني علي إيد واحد إسمه (أغا خان) .. أنا بس حابب أختم بإني أفهمك شوية إختلافات جوهرية بين حقيقة الفداوية وبين اللي إنت كنت بتشوفه في Assassin’s Creed .. مبدأياً كده الفداوية مكنش ليهم زي موحد يعني الHoodie اللي إنت بتشوفهم لابسينهم والطقم الأبيض السيكسي أوي ده كل ده فنكوش .. الناس دول كانوا مطلوب منهم إنهم يندمجوا بين الناس عشان يستخبوا وسطهم وبالتالي فكرة إنهم يلبسوا Uniform موحد دي مش منطقية .. ثاني حاجة هم معندهمش الخنجر الصغير اللي بيتركب تحت الكم ده .. الفداوية كان معروف عنهم إتقانهم المطلق لفنون القتال وإستخدام كل الأسلحة اللي كانت متاحة ليهم في العصر ده بس الخنجر الكيوت ده مكنش عندهم الحقيقة.
المصدر:
- رواية قلعة السفاحين العدد 22 من سلسلة روايات فانتازيا واللي كان بيكتبها دكتور (أحمد خالد توفيق) الله يرحمه وده لينك الرواية PDF للي حابب يقراها:
https://book-pdf.com/rewayat/%D9%82%D9%84%D8%B9%D8%A9-%D8%A7%D9%84%D8%B3%D9%81%D8%A7%D8%AD%D9%8A%D9%86-%D8%B3%D9%84%D8%B3%D9%84%D8%A9-%D9%81%D8%A7%D9%86%D8%AA%D8%A7%D8%B2%D9%8A%D8%A7-22-%D8%A3/
