لينك التسجيل الصوتي للمقالة علي Sound Cloud:
https://soundcloud.com/user-112011687-312727988/xyqqdau8ezet?si=017c5eb5048a4835946f9b7d37ada123&utm_source=clipboard&utm_medium=text&utm_campaign=social_sharing
إيه اللي يخليك تقول علي حاكم ما إنه كويس؟ .. بمعني أخر إزاي تقيم حاكم؟ .. هل بعدد الكباري والطرق اللي عملها؟ .. هل بعدد المعارك والحروب اللي كسبها؟ .. في تقديري الشخصي فيه طريقتين أو معيارين تستخدمهم مع بعض عشان تقيم أي حاكم والطريقتين دول أنا إتعلمتهم من مهندس شاطر أوي شغال مدير مشاريع وقالي إن الطريقتين دول تقدر تقيم بيهم أي مهندس وأي حاكم عموماً .. الطريقة الأولانية بتتسمي Initiation .. إنك تدي لمهندس ورقة بيضا فاضية وتقوله إعملي منها حاجة .. عمارة .. مكنة .. مش حتفرق .. بس تبقي ورقة فاضية .. مش حتلاقيه يقولك هاتلي حاجة أعمل زيها .. هو بدماغه وبفكره هو يعمل التصميم اللي هو شايفه صح .. الطريقة الثانية هي إنك تمسك التصميم أو المكنة أو العمارة أو أيا كان الحاجة اللي المهندس ده إشتغل عليها وتسأل نفسك هي عمرها الإفتراضي قد إيه؟ .. هل حتشتغل يومين وتبوظ وتضطر تعمل واحدة زيها؟ .. هل حتعطل كتير؟ .. الطريقتين دول هم هم اللي تستخدمهم عشان تقيم أي مهندس وكمان حاكم في الدنيا .. يا تري إنت إستلمت بلد عاملة إزاي وقدرت تخليها إزاي؟ .. بمعني أخر الInitiation بتاعك أو إنت عملت إيه في الورقة البيضا اللي إدتهالك؟ .. ويا تري بعد ما تمشي أو تموت شغلك ده حيفضل قاعد كام سنة؟ .. هل بمجرد ما تموت أو تطلع من الحكم كل حاجة بتتهد؟ .. ولا الناس بعد سنين من رحيلك بتفضل تفتكر أفضالك والأهم إنها تكمل علي شغلك؟
بالطريقتين دول حتلاقي إن عدد الحكام الكويسين اللي عدوا علي تاريخ الحضارة الإسلامية يتعدوا علي الصوابع لإن خلينا نكون صرحاء مع بعض صعب إنك تلاقي بني أدم يجيب سكور حلو في الطريقتين .. بس النهاردة عايزين سوا نستخدم الطريقتين دول إننا نقيم أداء واحد من أهم حكام الحضارة الإسلامية اللي هو (عبدالرحمن الثالث) أو (عبدالرحمن الناصر لدين الله).
المعيار الأول .. يا تري (عبدالرحمن الثالث) إستلم بلد عاملة إزاي؟ وسابها بلد عاملة إزاي؟
قلنا من الجزء اللي فات إن (عبدالرحمن) سنة 912 إستلم خرابة إسمها الأندلس .. فعلياً دولة الأمويين في الأندلس وقتها صفصفت علي يدوبك العاصمة قرطبة وشوية مزارع حوليها .. جري الشريط لحد سنة 917 وحتلاقيه ضم غرناطة وحايين وأسيها وإشبيلية والجزيرة الخضراء وألميريا وفالنسيا .. بسم الله ما شاء الله يعني بس ده مش معناه إن في خلال 5 سنين كان (عبدالرحمن) رجع الأندلس لملكه .. لسه برشلونة وسرقسطة في الشمال .. لسه طليلطلة Toledo في نص الأندلس .. ولسه حتي مدينة مهمة زي باراهوز Badajoz في جنوب الأندلس كلهم ماسكها ناس بيطلعوا لسانهم ل(عبدالرحمن) وبيقولوله لو راجل تعالي .. ومش بس كده .. لسه الممالك المسيحية في شمال الأندلس اللي شامة نفسها علي حساب دولة الأمويين .. يكفي إني أقولك إن سنة 918 إتعمل تحالف بين واحد إسمه (أرودونيو الثاني Ordono II) ملك مملكة ليون وقشتالة Leon & Castille و(سانشو جارسيز Sancho Garcez) ملك مملكة نافار ودول إتنين من ملوك الممالك المسيحية اللي في شمال الأندلس شنوا هجوم علي حصن فالتييرا Valtierra في شمال إسبانيا وحرقوا الجامع اللي كان في الحصن.
رد (عبدالرحمن) كان بعدها بسنتين لما سنة 920 بدأ عملية عسكرية سماها عملية المُعز .. حتلاحظ معايا إن (عبدالرحمن) كان عامل زي قادة الحرب العالمية الثانية إن كل حملة عسكرية يعملها تلاقيه بيسميها إسم سيكسي كده .. المهم إن قوات (عبدالرحمن) عدت إقليم قشتالة Castille وكمان عدت مملكة نافار Navarre في شمال إسبانيا وعبرت نهر إيبرو Ebro اللي يعتبر الحدود بين دولة الأمويين في الأندلس وبين الممالك المسيحية .. يوم 25 يوليو 920 قوات (أرودونيو الثاني) و(سانشو جارسيز) إتمسح بكرامتها الأرض إنتقاماً لحرق المسجد بتاع حصن فالتييرا .. (سانشو جارسيز) قدر ينفد بجلده ورجع تاني يعمل قلق سنة 923 وعمل كذا غارة علي القري اللي المفروض إنها تحت سيطرة دولة الأمويين في الأندلس علي الحدود مع الممالك المسيحية .. سنة 924 (عبدالرحمن) بدأ حملة جديدة سماها عملية قرطبة .. مش بقولك الرجل كان بيعرف ينقي أسامي حملاته العسكرية .. عملية قرطبة كانت ماشية بمبدأ الأرض المحروقة إن أي حتة تبع الممالك المسيحية تقع تحت إيد (عبدالرحمن) بتتسوي بالأرض وبتتحرق بما فيها مدينة بامبلونا Pamplona عاصمة مملكة نافار Navarre وده كان بيشمل كمان كاتدرائية بامبلونا.
(عبدالرحمن) تعامل مع الممالك المسيحية زي ما كان زعيم المافيا الإيطالية الأسطوري (أل كابون Al Capone) بيقول في فيلم The Untouchables .. لو كنت إنت السبب في إن واحد من رجالتي يبات في المستشفي فأنا حكون السبب إن واحد من رجالتك يبات في المشرحة .. عملية قرطبة رغم قسوتها من وجهة نظر ناس إلا إنها حققت المطلوب منها .. مملكة نافار إتعلمت الأدب .. مملكة ليون وقشتالة دخلت في حرب أهلية بعد ما إقليم قشتالة قرر إنه ينفصل ويبقي مملكة مستقلة .. من 924 لحد 928 (عبدالرحمن) فضل ورا حصن بوباسترو لحد ما إنهار و(جعفر بن عمر بن حفصون) إتأسر زي ما حكينا في الجزء اللي فات .. سنة 929 يعني بعد 17 سنة بس من توليه الحكم بقي واضح إن (عبدالرحمن) بقي هو الكبير أوي أوي أوي بتاع الأندلس وده اللي خلاه يوم الجمعة 16 يناير 929 يُعلن نفسه أمير المؤمنين .. أيوه .. (عبدالرحمن) طلع قال إن يا جدعان أنا خليفة المسلمين .. ومش بس كده .. أنا من هنا ورايح إسمي حيبقي عبدالله أمير المؤمنين عبدالرحمن الناصر لدين الله.
اللي عمله (عبدالرحمن) ده مينفعش تعديه بالساهل كده لإنه لما أعلن نفسه خليفة أو أمير المؤمنين فده فعلياً خلي العالم الإسلامي وقتها ماسكه 3 كل واحد فيهم بيقول علي نفسه أمير المؤمنين : عندك الدولة الفاطمية في المغرب .. الدولة العباسية في بغداد اللي برده ماسكها خليفة المسلمين و أمير المؤمنين في بغداد بس خلينا نقول إن الخليفة العباسي في الوقت ده كان أضعف من إنه يسأل الفاطميين والأمويين في الأندلس هو معلش يعني أنا شوال بطاطس قاعد في بغداد؟ مش شايفين إن أنا خليفة ولا خلاص إتعميتوا؟ .. ودلوقتي الأمويين في الأندلس.
الفاطميين أنا عارف إن معلوماتنا عنهم ضعيفة شوية يعني غير إن هم اللي دخلوا لمصر الكنافة والقطايف ودي في رأيي أهم إنجازاتهم لإن فعلياً هم ملهمش إنجازات تانية .. الفاطميين شيعة وعشان نبقي دقيقين أكتر هم من الطائفة الإسماعيلية وده معناه إنهم شايفين إن مينفعش أمير المؤمنين ميبقاش من نسل سيدنا (علي بن أبي طالب) رضي الله عنه وعشان كده هم سموا نفسهم فاطميين علي إسم ستنا (فاطمة الزهراء) رضي الله عنها زوجة سيدنا (علي) .. وجود الفاطميين في المغرب أساساً حصل بالصدفة لإن الموضوع بدأ بشوية دعاة من الطائفة الإسماعيلية جم المغرب ينشروا التشيع ومتفهمش ليه البربر أو الأمازيغ دخل دماغهم الموضوع أوي .. سنة 909 جيش البربر سيطر علي مدينة القيروان عاصمة ولاية المغرب واللي كان بيحكمها ناس إسمهم الأغالبة ودول كانوا بيحكموا المغرب بالنيابة عن العباسيين .. سنة 909 قائد الفاطميين في المغرب (المهدي بالله) أعلن نفسه أمير المؤمنين يعني خليفة المسلمين .. سنة 921 (المهدي بالله) أسس مدينة المهدية علي ساحل تونس علي البحر المتوسط.
كان واضح إن الخناقة بين الأمويين في الأندلس والفاطميين في المغرب جاية جاية بس هي مسألة وقت .. الفاطميين بنوا ترسانة بحرية محترمة جداً في مدينة المهدية اللي بقت عاصمتهم في تونس وده أجبر (عبدالرحمن) إنه هو كمان يؤسس قوات بحرية تقدر تقف الند بالند ضد الفاطميين .. الخوف أو خلينا نقول إن عشان الأمويين كانوا عارفين إن الخناقة جاية جاية فعملوا كذا برج مراقبة علي طول ساحل إسبانيا علي البحر المتوسط .. بس لحد ما الماتش اللي كلنا مستنيينه ده يحصل (عبدالرحمن) كمل في حملاته لإخضاع باقي الأندلس لحكمه .. سنة 929 مدينة ميريدا Merida إنضمت لحكمه .. سنة 930 باراخوز وبيها الدور جه عليهم .. سنة 932 بعد سنتين من الحصار ومجاعة قتلت عدد كبير من السكان طليلطلة حصلتهم .. سنة 935 الممالك المسيحية كانت إتداس علي وشها لدرجة إن مملكة ليون اللي يمكن أهم مملكة فيهم مضت إتفاق سلام مع (عبدالرحمن) تعهدت فيه إن يا نحلة لا تقرصيني ولا عايز عسل منك .. سنة 937 سرقسطة إتحرقت وقالت إحنا أسفين يا (عبدالرحمن) بعد ما خلاص الممالك المسيحية قالت ليهم إن إحنا مش حنقدر نساعدكوا بأي حاجة.
بس متفتكرش إن الحياة مشيت مكسب مكسب مكسب زي ما يكون (عبدالرحمن) مهكر اللعبة .. سنة 939 هو قاد بنفسه حملة عسكرية جديدة سماها عملية القهر عشان يخلص من الممالك المسيحية في شمال إسبانيا .. الرجل ده بيختار أسامي عالمية للحملات العسكرية بتاعته .. المهم إن الحملة دي إنتهت بهزيمة صعبة أوي لقوات (عبدالرحمن) ضد تحالف من ممالك نافار وليون وقشتالة يوم 19 يوليو 939 والمعركة دي معروفة بإسم معركة سمانكاس Battle of Simancas وإتسمت كده عشان المعركة دي حصلت بره أسوار مدينة سيمانكاس .. من نتايج المعركة دي إن أولاً الممالك المسيحية فضلت عايشة قارفة دولة الأمويين في اللأندلس في عيشتها وإن (عبدالرحمن) من بعدها مطلعش يقود الجيش بنفسه في ولا حملة عسكرية لحد ما مات.
الخناقة مع الفاطميين اللي الناس كلها كانت متوقعاها ومستنياها حصلت سنة 955 .. الحقيقة إن الماتش ده كان قبليه شوية تسخين كده يعني الإتنين مضربوش بعض من غير لا إحم ولا دستور .. (عبدالرحمن) كان عايز يعمل حاجة بيسموها منطقة عازلة أو Buffer Zone بينه وبين الفاطميين وده اللي خلاه سنة 931 ياخد مدينة سايوتا المغربية ودي المدينة اللي بتطل علي مضيق جبل طارق .. سنة 951 (عبدالرحمن) خد مدينة طنجة المغربية .. مجرد ما طنجة وقعت في إيد دولة الأمويين في الأندلس والحرب بين الخلافة الأموية والخلافة الفاطمية بقت حرب باردة بتتلعب في المغرب .. كل دولة بقي ليها شوية قبائل من البربر أو الأمازيغ موالية ليها وبيدولها فلوس وسلاح عشان يضربوا بعض .. حاجة كده شبة أميركا والإتحاد السوفيتي .. سنة 955 الحرب الباردة دي قلبت بحرب بحق وحقيقي.
في السنة دي الأسطول الفاطمي عمل غارة جرئية جداً علي ميناء ألميريا علي ساحل البحر المتوسط ودمروا جزء محترم من أسطول الأمويين .. رد الأمويين كان سريع لما (عبدالرحمن) بعت واحد من أهم جنرالاته وكان إسمه (غالب بن عبدالرحمن الناصري) عشان يروح هو ووحدة خاصة من الجيش ويتم إنزالها علي شاطيء تونس خلف خطوط العدو ورجع تاني علي متن اللي فاضل من أسطول الأمويين للأندلس .. عملية عسكرية من اللي بتسمع عنهم في الحرب العالمية الثانية وده يوريك قد إيه دولة الأمويين في الأندلس فعلياً كانت سابقة عصرها خصوصاً تحت حكم (عبدالرحمن الثالث) .. الحرب بين الأمويين والفاطميين تقدر تقول إتحسمت لصالح الأمويين لإن سنة 969 الفاطميين دخلوا مصر ونقلوا عاصمتهم من مدينة المهدية التونسية للقاهرة.
زي ما إنت شايف إن (عبدالرحمن) إستلم خرابة وحولها لخلافة .. إستلم بلد يدوبك العاصمة قرطبة وكام مزرعة حوليها وسابها دولة ماسكة نفسها إسمها بقي علي كل لسان .. مش بس النجاح العسكري إنما كمان إقتصادياً أداء دولة الأمويين في الأندلس كان فوق الممتاز .. الإقتصاد بقي واقف علي رجله لدرجة إن العملة الرسمية إتحطت علي Gold Standard وكنا شرحنا الفكرة دي في مقالة تاريخ الفلوس وبكده إقتصادياً كانت دولة الأندلس سابقه أوروبا بأكتر من 300 سنة .. دولة الأمويين في الأندلس كان عندها الدرهم وده العملة الفضية وكان عندهم كمان الدينار ودي كانت العملة الذهبية .. الحقيقة إنك تقدر تلخص إزاي (عبدالرحمن) حقق كل ده في الكام نقطة الجايين:
- الحاكم اللي بيفهم بيكون مقتنع إنه مش بيحكم لوحده .. إنت بتحتاج طقم مستشارين خايفين علي مصلحة البلد ويقدروا يوصلوا ليك الصورة كاملة من غير ما يطبلولك .. سنة 941 (عبدالرحمن) كان عمل مجلس مستشارين فيه 16 بني أدم منهم يهود ومسيحيين وفيه منهم ناس تمردوا علي حكم (عبدالرحمن) في بداية حكمه بس عجبته دماغهم زي مثلاً (جعفر بن عمر بن حفصون) .. ده زي لما تلاقي الرئيس (عبدالفتاح السيسي) جاب ناس من جماعة الإخوان المسلمين ضمن مستشارينه عشان دماغهم حلوة .. ده طبعاً مش حيحصل وده يوريك الفرق بين دماغ حاكم والثاني.
- في نفس الوقت التعيينات في المناصب الكبيرة بتتعمل بحساب .. لو أنا إتعينت حاكم مدينة زي غرناطة مثلاً فأنا مش بفضل في منصبي كتير لإن القعدة الكتير علي الكراسي هي السبب في الثورات.
- عشان ولاء العساكر دايماً بيكون للجنرالات اللي فوقيهم علي طول فده خلي الجيش الأندلسي ميكس غريب حبتين .. إنت ممكن تلاقي قائد الكتيبة من أصل عربي بس العساكر من الصقالبة .. الصقالبة دول هم العبيد سواء البربر أو الأوروبيين اللي إتأسروا وإتباعوا كعبيد بس دخلوا الإسلام وبقوا ضمن القوات المسلحة .. علي فكرة (غالب عبدالرحمن الناصري) الجنرال الأهم في القوات المسلحة الأموية في الأندلس كان من الصقالبة .. يعني كان عبد إتباع في سوق العبيد ودخل الإسلام وإنضم للقوات المسلحة وفضل يترقي لحد ما وصل لرتبة لواء .. مش كده وبس .. (غالب) كان بيموت في (عبدالرحمن) لدرجة إنه إعتبره أبوه .. إسم (غالب بن عبدالرحمن) مش عشان أبو (غالب) إسمه (عبدالرحمن) إنما علي إسم الخليفة (عبدالرحمن الناصر لدين الله).
- الحكومة نفسها كانت أربع وزارات .. وزارة الداخلية ودي مش الداخلية بتاعتنا يعني الأمن والمباحث وكده إنما كانت الوزارة المسئولة عن المشاريع الداخلية في البلد .. وزارة الولايات الحدودية .. وزارة الإتصالات ودي المسئولة عن نقل الأوامر من الخليفة لموظفي الدولة .. وزارة الشكاوي وشئون الرعية .. المذهب المالكي بقي هو المذهب الرسمي للدولة الأموية في الأندلس .. حتي إنتقال السلطة كان عامل حسابه .. من بدري وهو نقي إبنه (الحكم الثاني) عشان يحكم من بعده وخده تحت جناحه وعلمه كل حاجة.
يوم 15 أكتوبر 961 توفي (عبدالرحمن الناصر لدين الله) بعد خمسين سنة من الحكم .. تفتكر لو حنقيم حكمه بناء علي المعيار الأول بس بتاع هو الحاكم إستلم البلد عاملة إزاي و سابها وضعها إيه حتقيمه إزاي؟ .. خلينا نكون واقعيين إن الرجل ده لو إنت متديتوش الإمتياز تبقي مفتري وده حيخلينا نروح للمعيار الثاني لإن هو ده اللي حيدينا رؤية واضحة لتقييم حكم (عبدالرحمن الثالث).
المعيارالثاني .. يا تري البلد فضلت ماسكة نفسها قد إيه بعد ما مات؟
(الحكم الثاني) إبن (عبدالرحمن) ده اللي فعلاً يتقال عليه أمه داعياله .. إنت مسكت الحكم في وقت مثالي .. الإقتصاد ماسك نفسه .. البلد سياسياً مستقرة .. أعداء الخلافة الأموية في الأندلس مرعوبين منها .. ده خلي (الحكم) يبقي فاضي إنه يهتم بالحاجة اللي غالباً حكام العرب بيكرهوها أكتر من كلمة إنتخابات نزيهة .. العلم .. يقال إن مكتبة (الحكم الثاني) الشخصية كان فيها 100,000 كتاب في الوقت اللي أجحد دير فيكي يا أوروبا لو لقيت فيه 300 كتاب أصحاب الدير بيقولوا يا أرض إتهدي ما عليكي قدي ومن ده تقيس مدي التفوق العلمي والثقافي للخلافة الأموية في الأندلس بس فضلت فيه مشكلة .. (الحكم) مكنش بيخلف بس ربنا رزقه بطفل وهو عنده 46 سنة .. هي المشكلة مش في إنك ربنا يرزقك بطفل وإنت كبير في السن لإنها نعمة من نعم ربنا يديهالك وقت ما هو يحب وياخدها منك وقت ما يحب بس هي الفكرة إن المسلمين وقتها إبتلوا نفسهم ببلوة إسمها الحكم الوراثي .. البلوة دي خلت إن (الحكم) للأسف مكنش قدامه وقت كتير إنه يعلم إبنه (هشام) كل اللي هو يعرفه زي ما أبوه (عبدالرحمن) علمه كل حاجة .. سنة 974 قدر ربك النافذ وصل وتوفي (الحكم) بسكتة قلبية مفاجئة وده كان معناه إن (هشام) اللي وقتها كان يا عنده 11 يا عنده 14 سنة علي حسب إنت بتقرأ لمين من المؤرخين بس أيا كان هو كان عنده كام سنة هو كان قاصر وبالتالي مينفعش يحكم .. في المواقف اللي زي دي بتبقي فرصة ذهبية لنوع معين من الناس .. النوع اللي بيبقي عنده القدرة إنه يركب الموجة .. واللي ركب الموجة وقتها كان بني أدم من أكتر الشخصيات الإنتهازية اللي ممكن تقرأ عنها في تاريخ البني أدمين .. (محمد بن أبي عامر).
(محمد بن أبي عامر) من مواليد 938 في مدينة الجزيرة الخضراء في أقصي جنوب إسبانيا اللي هي المدينة اللي أول ما تعدي مضيق جبل طارق تلاقيها في وشك .. لما كبر شوية سافر العاصمة قرطبة عشان يتعلم القانون ويبقي محامي .. متفهمش القدر عملها إزاي بس يشاء ربك إن (محمد) يتعرف علي واحدة ست إسمها (صُبح) .. الأخت (صُبح) دي لأجل النصيب يعني تبقي مراة الخليفة (الحكم) وأم ولي العهد (هشام) .. عشان إحنا دلوقتي حنخش في حتة أعراض ودي ناس ماتت ومش عايزين نشيل ذنوب علي الفاضي فخلينا نحكي القصة في صورتها اللي مش للكبار فقط لإن الله أعلم بنوايا البشر .. خلينا نبقي متفقين إن علاقة (صُبح) و(محمد) كانت قوية لدرجة إنه بقي المحامي بتاعها ومدير أعمالها وده لوحده خلي (محمد بن أبي عامر) فعلياً يبقي من ضمن البلاط الملكي .. لما (الحكم) كان في السلطة هو بعت أهم جنرالاته (غالب بن عبدالرحمن الناصري) واللي كان أهم جنرالات أبوه للمغرب في حملة عسكرية وبعت معاه (محمد بن أبي عامر) .. كون (محمد) هو المحامي ومدير أعمال مراة الخليفة فده في حد ذاته سبب في إن الخليفة يبعته المغرب يشوف البيزنس اللي ممكن يجيب فلوس للبلد في المغرب .. في السنين اللي قضاها في المغرب (محمد) عمل حاجتين .. أول حاجة إنه صرف فلوس بالهبل عشان يشتري ولاء القبائل الأمازيغية في المغرب لإنه كان عارف إن عاجلاً أم أجلاً هو حيحتاج ليهم .. ثاني حاجة إنه فضل يشاغل بنت الجنرال (غالب) لحد ما وقعت فيه وإتجوزوا .. لحد ما جه اليوم اللي (الحكم) توفي فيه.
اللي حصل بعد كده يوريك قد أيه أهمية الدعاية في الحكم .. إزاي ان اللي أهم من إنك تبقي شاطر إنك تبان كأنك شاطر ومخلص في شغلك مع إنك بهيم مش فاهم حاجة .. بمجرد ما (الحكم) مات ولإن (محمد) كان عارف إن (هشام) قاصر يعني أكيد فيه ناس حتحاول تركب الموجة فهو قرر يقلب الطرابيزة علي الكل بدري بدري .. هو إخترع إن فيه مؤامرة بتتعمل للإنقلاب علي (هشام) ولبس فيها كل الناس اللي هو شايفهم إحتمال يبقوا منافسين ليه .. ولإنه يعرف أم الخليفة اللي هي (صُبح) من زمان فكلمته كانت مسموعة عندها .. وعشان ميتقالش عليه إنه حيسرق الحكم هو أصر إن اللي يقعد علي الكرسي (هشام) رغم إنه قاصر بس مش مهم .. الكرسي حق (هشام) الشرعي ومينفعش حد يسرقه منه .. طبعاً أمه بتسمع الكلام ده وبتقول لنفسها واااااو إنت إزاي رجل كده .. طبعاً دور المرجلة لسه مخلصش .. لما الممالك المسيحية سمعت إن فيه خليفة صغير في السن وبتاع هاجموا الأندلس .. هنا (محمد) إستدعي جيش الأمازيغ اللي هو فضل يجند فيهم سنين في المغرب وجابهم الأندلس وهو اللي إنتصر علي جيش الممالك المسيحية .. بعدها فعلياً ده اللي حصل .. (محمد) حط (هشام) في قصر وحاوطة بالحريم وكل متاع الحياة الدنيا وقاله زي ما قال (عمرو دياب) .. خلينا نتبسط .. بلا حكم بلا بتاع ومتشغلش بالك بحاجة .. فعلياً (محمد) حبس (هشام) في القصر الملكي .. لا (هشام) بيطلع ولا حد بيخشله وبقي (محمد بن أبي عامر) هو الحاكم الفعلي للأندلس بعد ما سمي نفسه (المنصور) .. صحيح قدام الناس مش هو الخليفة .. الخليفة لسه (هشام) .. بس (محمد) هو اللي بيحكم.
شوف أنا مش مشكلتي في اللي عمله (محمد بن أبي عامر) .. الحق يتقال إن الرجل كان حاكم قوي بس هو يمكن مشكلته إن كان عنده هسهس إسمه التفوق العسكري لدولة الأمويين في الأندلس .. الناس كانت بتصحي الصبح تسأل نفسها يا تري حنحارب مين النهاردة .. (محمد) حكم الأندلس 20 سنة بسم الله ما شاء الله عمل فيهم 50 حملة عسكرية .. هو طبعاً علي عيني وراسي والمؤرخين العرب لو تسألهم حيقولولك (محمد) ده رجل جدع وياريت حكام العرب كلهم زيه وكل حاجة بس 50 حملة عسكرية في 20 سنة كتير أوفر .. ده عبء علي الميزانية .. طبعاً كان بيموتله عساكر فكان بيعوضهم إنهم بيجيب عبيد من أوروبا أو يجيب مقاتلين من الأمازيغ اللي زي ما قلنا إسمهم الصقالبة وده خلاهم مع الوقت عددهم عمال يزيد وبوظ التوزيع السكاني للأندلس والكارثة اللي كان ناس كتير متوقعاها حصلت سنة 1002 بموت (محمد بن أبي عامر) وجه مكانه إبنه (عبدالملك المظفر) .. (عبدالملك) مشي علي نفس الخط بتاع أبوه بس من غير ما يشغل دماغه .. صحيح (هشام) هو الخليفة الشرعي بس (عبدالملك) زيه زي أبوه هو اللي بيمشي الدنيا .. كل ما يصحي الصبح يروح يحارب في الممالك المسيحية .. طب ليه؟ .. إيه خطتك؟ .. هل فيه إستراتيجية واضحة إنت بانيها عشان تاخد الأرض بتاعتهم؟ .. الإجابة كانت لا و لا و لا .. هي الحرب لمجرد الحرب .. تاني .. المؤرخين العرب شايلين (عبدالملك) فوق راسهم ودي حاجة أنا متفهمها جداً بس أنا مهم أسأل طب وبعدين؟ الهدف من الحروب دي كلها إيه؟ .. 6 سنين من الحكم شبه إنك تفضل عايش جوه لعبة Total War لحد ما توفي (عبدالملك) فجأة سنة 1008 وجه مكانه اللي هد كل حاجة بناها (عبدالرحمن الناصر لدين الله) .. (عبدالرحمن شنجول).
(عبدالرحمن شنجول) كان الأخ الغير شقيق ل(عبدالملك) .. في أول يوم ليه راح للخليفة الأموي الشرعي (هشام) مضاه علي ورق تنازل الحكم .. طبعاً دي كانت حركة في منتهي الغباء اللي في الدنيا يعني .. بعدها بكام يوم (عبدالرحمن) خد جيشه وقالك أما أروح أتسلي شوية علي الممالك المسيحية في الشمال ويدوبك هو خرج من العاصمة قرطبة من هنا والعائلة المالكة من الأمويين عملوا إنقلاب عسكري عشان يرجعوا (هشام) للحكم ومن غير أي مقدمات الأندلس دخلت في حرب أهلية .. كل الأخطاء اللي إنت كنت شايفها هابلة وعملها الحكام اللي جم من بعد (عبدالرحمن الناصر لدين الله) بدأت تطلع علي السطح .. الإهتمام الأوفر بالحملات العسكرية علي الممالك المسيحية لأكتر من 26 سنة ورا بعض خلي الأندلس بلد أهلها فعلياً مش عارفين يتكلموا مع بعض .. أسهل حاجة بالنسبة ليهم إنهم يرفعوا السلاح علي بعض .. التفاوض ده للعيال التوتو إنما إحنا بندبح علي طول .. الأفورة في الإعتماد علي الصقالبة في القوات المسلحة خلاهم محدش عارف يسيطر عليهم في غياب حاكم قوي كلمته مسموعة .. حرب أهلية مات فيها (عبدالرحمن شنغول) .. حرب أهلية أثبتت إن شرا العبد مش زي ربايته لما الصقالبة تحالفوا مع مملكة قشتالة المسيحية وهاجموا العاصمة قرطبة سنة 1009 وسنة 1013 وفي المرتين كانت مذبحة .
تعالي نتخيل إن (عبدالرحمن الناصر لدين الله) بعد وفاته جينا رجعناه يعيش تاني ووريناه حال الأندلس .. الرجل ده حكم خمسين سنة نقل بلده من خرابة لقوة عظمي .. إلا إن بعد خمسين سنة من وفاته القوة العظمي دي رجعت خرابة تاني .. تفتكر حيحس بأيه؟ .. تفتكر حيقول إيه؟ .. الخلافة الأموية اللي هو بدأها سنة 929 إنتهت سنة 1031 وبقت الحاجة اللي إنت عارفها دلوقتي بإسم ممالك الطوائف .. تفتكر تتعلم إيه من قصة الأندلس لحد دلوقتي؟ .. إيه أهم درس في مباديء الحكم من وجهة نظرك؟ .. في رأيي الشخصي إن قصة الأندلس لحد دلوقتي علمتني أنا شخصياً كذا درس:
- الحاكم مينفعش يسيب ودنه للناس اللي حوليه .. مجرد إنك توصل لمرحلة إن فيه حد أيا كان هو مين وأيا كانت درجة ثقتك فيه يقدر يتحكم في مين يقابلك وإيه هي المعلومات اللي توصلك يبقي إنت كده بدأت تركب الزحليقة الي مزبلة التاريخ .. الحكم زيه زي أي شغلانة .. يا تعملها بما يرضي الله عشان ربنا يباركلك في القرشين اللي بتاخدهم أخر كل شهر يا تسيبها وروح شوفلك شغلانة تانية.
- الحكم الوراثي إبتلاء من ربنا .. يوم عن يوم بتأكد إن أسيادنا (الحسن) و(الحسين) رضي الله عنهم كانوا شايفين حاجة محدش غيرهم كان شايفها وهي إن الحكم الوراثي ده لا من الشرع ولا من الدين .. الحكم يا بالتكليف يا بالمبايعة .. الناس هي اللي تختار اللي يحكمها .. إنما الحكم الوراثي ده زي ما إنك تلعب ملك وكتابة بمستقبل البلد كلها .. متفتكرش إن الفاطميين اللي كانوا بيستغلوا إسم ستنا (فاطمة) رضي الله عنها دول فاهمين النقطة دي برده لإن هم كمان كانوا شايفين إن الحكم لازم يبقي وراثي من نسل سيدنا (علي) اللي هو أساساً لو كان عايش وسمع الكلام ده كان تبرأ منهم.
- أهم حاجة تبقي مبسوط .. هل تعلم إن (عبدالرحمن الناصر لدين الله) كان بيكتب مذكراته؟ .. بعد وفاته بسنين لقوا المذكرات دي وإكتشفوا إنه كاتب فيها إن بعد خمسين سنة من الحكم .. بعد خمسين سنة من الإنجازات .. خمسين سنة وهو بيكتب إسمه في التاريخ لقوا إنه هو شخصياً كبني أدم إسمه (عبدالرحمن) محسش في حياته إنه فعلاً مبسوط إلا في 14 يوم بس من الخمسين سنة دول .. إنت متخيل؟ .. (عبدالرحمن) كتب في مذكراته إنه صحيح كانت الناس تتمناله الرضا يرضي بس هو مكنش مبسوط .. 14 يوم سعادة من 50 سنة .. لا حول ولا قوة الا بالله.
المصادر:
- فيديو بعنوان The rise of Abd Al Rahman III – The history of Islamic Spain WOTW EP 5 P2 وده لينك الفيديو علي YouTube:
https://www.youtube.com/watch?v=hLmIUAjNF0s&list=PLpA6sZxl1jJsTcycljzLBqCZw6Ps2hg2-&index=11 - فيديو بعنوان The legacy of Abd Al Rahman & the history of Almanzor – Moorish Spain WOTW EP 5 P3 وده لينك الفيديو علي YouTube:
https://www.youtube.com/watch?v=WHo17T8R8zo&list=PLpA6sZxl1jJsTcycljzLBqCZw6Ps2hg2-&index=12 - فيديو بعنوان The fall of the Umayyad Caliphate of Cordoba – WOTW EP 5 P4 وده لينك الفيديو علي YouTube:
https://www.youtube.com/watch?v=QRa3gliik9I&list=PLpA6sZxl1jJsTcycljzLBqCZw6Ps2hg2-&index=13
