لينك التسجيل الصوتي للمقالة علي Sound Cloud:
https://soundcloud.com/user-112011687-312727988/fmsvtj6topsl
مفيش حد عنده ضمير و بيخاف ربنا مش حيقول إن إلقاء أميركا القنبلتين النوويتين علي هيروشيما و ناجازاكي دي أسوأ جريمة حرب في تاريخ البني أدمين .. الحقايق لوحدها لما أرصها قدامك حتتخض .. يوم 6 أغسطس 1945 أميركا بترمي القنبلة النووية الأولانية و اللي سموها العيل الصغير Little Boy فوق مدينة هيروشيما عشان الإنفجار لوحده يقتل لحظياً 100,000 بني أدم أغلبهم مدنيين .. بعدها ب3 أيام يوم 9 أغسطس بيتم إلقنبلة التانية و اللي سموها الرجل الطخين Fat Man فوق مدينة ناجازاكي عشان تقتل لحظياً 80,000 بني أدم .. دول غير اللي ماتوا من الغبار النووي .. غير اللي ماتوا من التسمم الإشعاعي .. غير اللي ماتوا من الإرتفاع الرهيب في عدد الإصابات بمرض السرطان في اليابان في الكام سنة اللي بعد الحرب .. الدمار ده كله هو اللي أجبر اليابان إنها يوم 2 سبتمبر تعلن إستسلامها .. لكن .. للأسف النهاردة أنا حعمل الحاجة اللي عادة مبحبش أعملها إني أسأل نفسي السؤال الوجودي بتاع ماذا لو؟
صحيح العنوان بيتكلم عن إلقاء القنبلتين النوويتين علي هيروشيما و ناجازاكي و اللي فعلياً أنهي الحرب العالمية الثانية بس النهاردة أنا مش عايز أتكلم عن تفاصيل العملية .. إحنا جايين نتكلم عن إفرض لو القنبلتين مترموش أصلاً و ده كان إحتمال قائم و الأمريكان كانوا عاملين حسابه .. المؤسسة العسكرية الأميريكية كانت بتحضر نفسها لعملية إنزال بري علي السواحل اليابانية تحت إسم عملية الإنهيار Operation Downfall و ده اللي أنا عايز أتكلم عنه النهاردة.
مهم أوي بالنسبة لي إنك تفهم إني مش بقدم تبرير لقرار الرئيس الأميريكي (هاري ترومان Harry Truman) بإنه يرمي القنبلتين النوويتين علي اليابان .. في أول جملة في المقالة أنا قايل إن دي أبشع جريمة حرب في تاريخ البشر .. حاول تبصلها علي إني بوريك رحمة ربنا بالبني أدمين .. دلوقتي أنا فاهم إنك ممكن تبقي مستغرب فأسمحلي أخدك من إيدك و أعيشك جو شبه بتاع مسلسل The Man in the High Castle اللي هو نعيش سوا واقع إفتراضي محصلش .. تعالوا مع بعض نتخيل إن الأمريكان مرموش القنبلتين النوويتين و قرروا إن اليابان حتستسلم بنفس الطريقة اللي ألمانيا وقعت بيها .. حرب شوارع من بيت لبيت.
إزاي اليابان كانت ممكن تنكد علي الأمريكان عيشتهم؟
صحيح إن الإمبراطورية اليابانية كانت إتداس علي وشها في السنين الأخيرة من الحرب العالمية الثانية بس لو إضطرت اليابان إنها تدافع عن نفسها ضد غزو بري أميريكي فهي قادرة إنها تصمد لسنين و لحد أخر رجل ضمن خطة اليابانيين كانوا مسميينها كيتسيوجو Ketsugo و دي كلمة يابانية معناها الحسم .. العسكريين بيحبوا أوي إسم الحسم ده معرفش ليه .. لما القيادة العسكرية الأميريكية كانت بترسم ملامح عملية الإنهيار و خلينا من هنا و رايح نستخدم الإسم الإنجليزي بتاعها Operation Downfall هم بدأوا يسألوا نفسهم هي اليابان ممكن تدافع عن نفسها إزاي؟
- سنة 1945 سلاح الجو الياباني كان تحت إيده 10,000 طيارة مقاتلة .. صحيح هم معندهمش حتي نص العدد ده من الطيارين المقاتلين بس إنت مش محتاج يبقي معاك طيار محترف عشان تخليه يطلع بالطيارة و يطير بيها جوه أقرب سفينة أو حاملة طائرات أميريكية عشان ينتحر و يموت معاه أكبر عدد من الأمريكان و دي المناورة اللي إتشهرت بإسم الكاميكازي Kamikaze .. حسب التقديرات بتاعة المخابرات الأميريكية فعدد الطيارين المقاتلين اليابانيين المحترفين كانوا يدوبك 4,200 طيار بس لو زودت عليهم الطلبة بتوع الكلية الجوية اللي لسه متخرجوش و الطيارين اللي علي المعاش و أي حد بيعرف يطير بأي طيارة فإنت بتتكلم عن 18,600 طيار .. صحيح أغلبهم مش شاطرين أوي بس زي ما قلتلك يعرف يقلع و ينقيله سفينة حلوة يرمي نفسه فيها.
- مش بس الطيارات .. تقريباً البحرية اليابانية كان عندها نفس العدد من اللانشات السريعة اللي برده ممكن تحط عليها متفجرات و بحار واحد بس يسوقها جوه أقرب سفينة أميريكية و يغرقها .. تعالي إنت رايح فين .. مش بس اللانشات .. البحرية اليابانية كان عندها 6 حاملات طائرات و 4 مدمرات و فرقاطة واحدة .. كان تحت إيدهم برده 600 غواصة منهم 350 غواصة صغيرة و مش مهم يبقي الطاقم بتاعها كله متاح .. إنت بس محتاج إتنين بحارة يتحكموا في الغواصة اللي حتبقي متلغمة و يفرقعوها تحت أقرب حاملة طائرات.
- كده فاضل القوات البرية .. علي حسب حسبة القيادة العسكرية الأميريكية فاليابان كانت تحت إيدها 900,000 جندي نظامي متوزعين علي 65 فرقة قتالية .. صحيح إن مكنش عندهم أسلحة و ذخيرة تكفي غير ل40 فرقة بس لكن مش مشكلة .. مش بس كده .. ممكن اليابان كمان تستدعي قوات الإحتياط و ده حيخلي إجمالي عدد المسلحين اللي بيدافعوا عن اليابان ممكن يوصل 35 مليون بني أدم .. دي مش غلطة مطبعية .. تخيل 35 مليون بني أدم مستعدين يموتوا كلهم ولا إن الأمريكان يحتلوا بلدهم.
فيه نقطة تانية برده حاول متنسهاش إن لحد أغسطس 1945 اليابان كانت لسه ليها قوات في أندونيسيا و الصين و حتت تانية من جنوب شرق أسيا فبلاش تتخيل إن الوضع كان إن الأمريكان محاصرين اليابان و مش عارفين ينزلوا بقواتهم فين لإن ده مكنش الوضع علي الأرض .. النقطة الثالثة اللي ممكن متكونش خطرت علي بالك هي إن لحد يونيو 1945 اليابان كان تحت إيدها 300,000 أسير حرب .. دلوقتي الأسري دول مش بياكلوا و يشربوا و محطوطين في معسكرات بيحرسها عساكر يابانيين؟ .. طب لو الأمريكان بدأوا عملية غزو اليابان مش حيبقي أريح لليابانيين لو أعدموا الأسري دول كلهم و بالتالي وفروا أكلهم و شربهم و الأهم إن العساكر اللي بيحرسوا معسكرات الإعتقال حيبقوا فاضيين إنهم يتوزعوا علي الجبهة للدفاع عن البلد؟
وسط كل ده غالباً بيتسأل السؤال اللي محدش بيحب يعرف إجابته .. يا تري حيموت من رجالتنا كام واحد؟ .. ده السؤال اللي غالباً كان بيدور في دماغ الفريق (سعد الدين الشاذلي) و المشير (محمد الجمسي) الله يرحمهم و هم بيرسموا خطة العبور في حرب أكتوبر 1973 .. الأمريكان قالوا إن غالباً إحنا كل أسبوع حيموتلنا 15,000 عسكري .. ده معناه إن لو غزو اليابان إستمر سنة فإنت بتتكلم عن خساير في الأرواح ضمن القوات الأميريكية حتوصل 720,000 عسكري و ده أقل رقم قصاد إن توقعات الأمريكان لخساير اليابانيين في الأرواح كانت بتتراوح ما بين 1.7-4 مليون بني أدم .. تاني .. دي كانت أقل التوقعات .. المتشائمين أوي كانوا بيقولوا إن عدد الضحايا من المدنيين اليابانيين كان مرشح يبقي 10 مليون بني أدم .. عشان بس تبقي برده في الصورة و مستوعب الرقم .. خلال عملية الإنزال البري في نورماندي لتحرير أوروبا من الإحتلال النازي فمن أول يوم 6 يونيو 1944 و ده اليوم اللي بدأت فيه العملية لحد يوم 25 أغسطس 1944 و ده اليوم اللي الأمريكان دخلوا فيه باريس هم مات ليهم 73,000 عسكري .. في الحرب العالمية الثانية كلها مات حوالي 50 مليون بني أدم .. أرجوك حاول تستوعب الأرقام اللي مكتوبة قدامك قبل ما تكمل قراية.
إزاي الخطة بتاعة Operation Downfall إتبنت عشان تواجه كل النكد ده؟
اللي حصل إن فيه تلاتة قعدوا مع بعض عشان يشوفوا حل للمصيبة دي و الثلاثة كانوا الأدميرال (تشيستر نيميتز Chester Nimitz) قائد الأسطول الأميريكي في المحيط الهاديء .. الجنرال (دوجلاس ماك أرثر Douglas MacArthur) قائد القوات البرية الأميريكية في المحيط الهاديء .. الجنرال (جورج مارشال George Marshal) رئيس هيئة الأركان المشتركة للقوات المسلحة الأميريكية .. أقفلي بقي هنا شوية .. عادة إنت لما بيتطلب منك Task أو شغلانة إنت أول مرة تعملها فأول حاجة بتفكر فيها إنك تدور علي شغلانة تانية شبهها عشان تشوف هي بتتعمل إزاي و تبدأ تعمل زيها .. ده ألف باء نقش .. أي حد شغال خصوصاً في الهندسة عارف فكرة النقش دي كويس .. العسكريين كمان بيستخدموا الطريقة دي كتير الحقيقة .. ثلاثي أضواء المسرح (نيميتز) و (ماك أرثر) و (مارشال) كان مطلوب منهم في نوفمبر 1945 يلاقوا طريقة للإجابة عن سؤال كيف تغزو الأراضي اليابانية؟ .. هم أتحطوا قصاد سؤال شبه ده في إبريل 1945 لما الأمريكان حبوا يحتلوا جزيرة أوكيناوا .. صحيح أوكيناوا دي جزيرة بعيدة حوالي 550 كيلومتر من الساحل الياباني بس اليابانيين بيعتبروها حتة من أرضهم .. في إبريل 1945 الأمريكان نفذوا عملية غزو أوكيناوا اللي هم سموها العملية جبل الثلج Operation Iceberg .. يا تري بقي إيه اللي حصل في العملية دي؟
عارف لما برشلونة إتمسح بكرامته الأرض 8-2 من بايرن ميونيخ من كام يوم؟ .. أهو الأمريكان إتهزقوا أكتر .. 3 شهور كاملة و اليابانيين بيدافعوا عن أوكيناوا لحد أخر رجل .. عشان الأمريكان يحتلوا جزيرة واحدة من الجزر اليابانية مات ليهم 50,000 عسكري قصاد إن اليابان خسرت 250,000 و حاول أرجوك كمان مرة إنك تستوعب إن دي أرواح ماتت مش فلوس إتدفعت .. لك أن تتخيل إن الأمريكان خسروا 400 قطعة بحرية ما بين حاملات طائرات و مدمرات و فرقاطات .. الثلاثي (نيميتز) و (ماك أرثر) و (مارشال) كانوا عارفين إن Operation Iceberg دي كانت ماتش ودي قصاد المعجنة اللي حتحصل في Operation Downfall و عشان كده هم قالوا إن العملية حتتقسم علي مرحلتين:
المرحلة الأولانية إسمها العملية أوليمبيك Operation Olympic و دي كانت حتبدأ في نوفمبر 1945 و دي عبارة عن عملية إنزال بري للقوات الأميريكية علي ساحل جزيرة كيوشو Kyushu أقصي جنوب اليابان .. العملية كانت ضخمة و معقدة بشكل إنت ممكن متبقاش قادر تتخيله .. حاول تستوعب إن حيبقي معاك 42 حاملة طائرات و 400 مدمرة و 24 فرقاطة دورهم إنهم يضربوا 35 شط علي طول ساحل جزيرة كيوشو .. في نفس الوقت 14 فرقة من مشاة البحرية حيبقي مطلوب منها إنها بلانشات إنزال تبدأ تسيطر علي ال35 شط .. فوقهم الطيارات الأميريكية حيبقي مطلوب منها ضرب المطارات و الدفاعات اليابانية .. علي فكرة كل القوات دي تبقي الأميريكية بس .. الخطة كانت بتقول كمان إن بريطانيا حتشارك ب18 حاملة طائرات و 4 مدمرات .. بمجرد ما القوات الأميريكية تسيطر علي ال35 شط علي ساحل الجزيرة حيبدأ تنفيذ المرحلة الثانية.
المرحلة الثانية إسمها العملية كورونيت Operation Coronet و دي كان المفروض تبدأ في مارس 1946و دي حتكون عملية إنزال بري برده بس علي ساحل جزيرة هونشو Honshu و دي هدفها إن القوات الأميريكية تخش العاصمة طوكيو .. إذا كنت فاكر إن عملية أوليمبيك جاحدة فدي متجيش حاجة جنب عملية كورونيت .. الخطة بإختصار إن الأمريكان و البريطانيين حيسحبوا كل قواتهم في أوروبا و اللي كانت خلاص أجبرت ألمانيا علي الإستسلام و تنقلهم بسلاحهم بمعداتهم بأكلهم و شربهم بسلاطاتهم و باباغنوجهم عشان يبدأوا عملية إنزال بري قصاد العاصمة طوكيو .. العملية دي كان حيشارك فيها 25 فرقة قتالية و ده لوحده يعتبر ضعف إجمالي عدد القوات الأميريكية في أوروبا .. تاني .. حاول تستوعب الأرقام قبل ما تكمل قراية.
المشكلة اللي كانت بتواجه الأمريكان هي إن ساحل اليابان بسم الله ما شاء الله مفيهوش حتة ينفع تعمل فيها إنزال بري .. عارف دهب؟ .. شفت هي إزاي شريط ضيق من الأرض المسطحة بين البحر و الجبال؟ .. أهو ساحل اليابان كله كده ما عدا سواحل جزيرتي كيوشو و هونشو .. طبيعي إن اليابانيين كمان يكونوا عارفين ده و طبيعي أكتر إنهم يكونوا متوقعين إن الأمريكان لو حبوا يغزوا بلدهم حينزلوا بقواتهم في الجزيرتين دول .. ده لوحده دمر عنصر المفاجأة .. الوضع ده خلي ناس جوه القيادة العسكرية الأميريكية يقترح إن مفيش حل غير إستخدام الأسلحة الكيميائية .. صحيح إن دي حاجة غير قانونية و ضد معاهدة جنيف بس لحد الوقت ده لا اليابان ولا أميركا كانوا مضوا علي إتفاقية جنيف .. زود علي كده إن حصل و اليابان إستخدمت الأسلحة الكيميائية في غزوها للصين .. تقارير المخابرات الأميريكية قالت إن القيادة اليابانية عارفة إنها لو إتضربت بالأسلحة الكيمائية فهي مش حيبقي عندها الإمكانية إنها ترد و ده خلي ضرب اليابان بالكيماوي مطروح و فيه ناس كتير بتأيده.
طب بدل النكد ده كله هل كان فيه بدايل غير إستخدام القنبلة النووية؟
الحقيقة كان فيه إقتراحين بس الإتنين إترفضوا .. الإقتراح الأول كان إن الإتحاد السوفيتي يشارك في الغزو البري لليابان بس الإقتراح ده مشكلته في كذا حاجة .. مبدأياً السوفييت مكنش عندهم قوات كافية للمشاركة في غزو اليابان لإن أغلب جيشهم كان بيحارب الألمان و القيادة السوفيتية كانت طمعانة في التورتة بتاعة ألمانيا و مكنش فارق معاهم أوي إن الأمريكان يعزموهم علي غدوة سوشي زي ما بنقول .. حتي لو السوفييت قالوا و ماله فالبحرية السوفيتية وقتها كانت تقريباً شوية لانشات .. لا كان عندهم مدمرات ولا حاملات طائرات و لا سفن إنزال عشان تنفذ عملية برمائية عملاقه زي دي .. فوق ده كله إن سنة 1905 اليابانيين داسوا علي وش السوفييت في حرب مقعدتش كتير بس الحرب دي سابت أثر في نفسية الروس إن بالنسبة ليهم أريحلهم يستحملوا ضرب النازيين ولا إنهم يخشوا في حرب تاني مع اليابانيين.
الإقتراح التاني كان طب ما نحاصر اليابانيين لحد ما يموتوا من الجوع .. ده كان رأي إتقال فعلاً علي فكرة .. مشكلة الحل ده إنك لو فكرت فيه غير إنه حل غير أخلاقي إلا إنه حيعمل مشاكل أكتر ما حيحل .. دلوقتي لو حاصرت اليابان وقفلت عليهم المياه و النور .. جميل .. أغلب الأكل اللي موجود في البلد حيروح للعساكر و المدنيين حيموتوا من الجوع فلو ربنا نفخ في صورتك و دخلت اليابان فعلاً فإعمل حسابك إنك حتكع فلوس عشان توفر أكل و علاج للملايين اللي حيكونوا بيعانوا من المجاعة و الإقتصاد الياباني نفسه حيكون محتاج يتبني من الصفر .. الحل ده كمان حيبدأ يخلق جوه اليابانيين الجعانين إحساس إني أموت بالرصاص أحسن ما أموت من الجوع .. انا بكلمك هنا عن الأساس اللي النفس البشرية ربنا خلقها بيه .. مش بكلمك عن الروح الوطنية و إن إزاي كلنا نعيش عشان خاطر الوطن و إن الأغاني الوطنية اليابانية وقتها كانت بتقول مش مشكلة نضحي ب100 مليون روح عشان خاطر الإمبراطور .. الجوع حيخليك تقول لنفسك يلا خلينا نخلص و أموت برصاص الأمريكان أصل الموت أرحم و أريح من الحياة.
عارف إنك إحتمال تبقي مش قادر تستوعب الفكرة أو الإحساس اللي أنا بحاول أوصله ليك بس إنت مهم تفهم كويس أوي إن العقلية العسكرية اليابانية وقتها كانت معندهاش أي مشكلة تقبل إنها تتعرض لخساير فادحة في الأرواح عشان خاطر الدفاع عن بلدهم .. فيه جزيرة إسمها جزيرة سايبان Saipan و الجزيرة دي قامت فيها معركة تعتبر من أشهر معارك التاريخ مش بس الحرب العالمية الثانية .. المعركة دي مشهورة لكذا سبب الحقيقة من ضمنها إن دي الحرب اللي بقي واضح بعدها إن اليابان خسرت الحرب العالمية الثانية .. سبب ثاني لشهرة المعركة دي إن القوات اليابانية لما عرفت إن خلاص الهزيمة بقت محتومة بقوا بينتحروا .. إنت ممكن تلاقي عسكري ياباني يا إما بيرمي نفسه علي العساكر الأمريكان و يفجر نفسه عشان يقتل أكبر عدد من الأمريكان معاه .. أو تلاقي ضابط ياباني مسك سيف كاتانا اللي هو السيف القصير بتاع الساموراي و إنتحر .. أو تلاقي طيار ياباني خد طيارته و رمي نفسه جوه سفينة أميريكية .. 97% من القوات اليابانية اللي كانت بتدافع عن سايبان ماتت في المعركة دي و ده رقم مش طبيعي.
من الحاجات الغريبة إن الثلاثي (تشيستر نيميتز) و (دوجلاس ماك أرثر) و (جورج مارشال) و هم بيحطوا ملامح خطة Operation Downfall مكنش حد فيهم يعرف حاجة عن مشروع مانهاتن و ده كان الإسم الكودي بتاع مشروع القنبلة النووية .. حتي لما إتقالهم إن فيه حاجة إسمها قنبلة نووية فهم مكانوش متخيلين و مستوعبين أوي يعني إيه قنبلة نووية لدرجة إنهم إفتكروها قنبلة عادية بس كبيرة حبتين فطلبوا إن يتعمل 7 قنابل نووية عشان تترمي فوق التحصينات اليابانية بس إلقاء القنبلتين علي هيروشيما و ناجازاكي غيروا كل حاجة.
أنا مش عايزك تطلع من المقالة دي و إنت حاسس إني بقولك إن إلقاء القنبلتين النوويتين علي هيروشيما و ناجازاكي كان أحسن من إن أميركا تكمل في خطة الغزو البري لليابان .. مش ده المقصود .. المقصود إنك تحاول تتخيل وضع ماذا لو؟ .. يمكن ساعتها تقدر رحمة ربنا بالناس .. أكدب عليك لو قلتلك أنا عارف إيه الصح و إيه الغلط .. هل لو انا مكان (هاري ترومان) كنت ضربت اليابان بالنووي؟ .. صدقني معنديش إجابة للسؤال ده و لو إنت مقرر ياريت تقولي قرارك إيه؟
المصادر:
- مقالة بعنوان The atomic bombings of Japan were tragic; a ground invasion would have been even worse نشرت في موقع Military History Now و ده لينك المقالة الأصلية:
https://militaryhistorynow.com/2020/07/10/atomic-reckoning-hiroshima-and-nagasaki-were-appalling-tragedies-an-invasion-of-japan-would-have-been-worse/ - مقالة بعنوان Operation Downfall-The campaign to conquer Japan would have dwarfed the D-Day landing نشرت في موقع Military History Now و ده لينك المقالة الأصلية:
https://militaryhistorynow.com/2013/11/06/the-campaign-to-conquer-japan-would-have-dwarfed-the-d-day-landings/ - مقالة بعنوان Operation Downfall: How America would have invaded Japan (It would have been hell) نشرت في مجلة The National Interest و ده لينك المقالة الأصلية:
https://nationalinterest.org/blog/buzz/operation-downfall-how-america-would-have-invaded-japan-it-would-have-been-hell-28112 - مقالة بعنوان Operation Downfall نشرت في موقع History Learning Site و ده لينك المقالة الأصلية:
https://www.historylearningsite.co.uk/world-war-two/the-pacific-war-1941-to-1945/operation-downfall/
الرجاء التثبت من عدد حاملات الطائرات المشاركة..42 امريكية و 18 بريطانية ..لا اعتقد ان الرقم صحيح ..معركة ميدواي لا يتجاوز فيها 20 حاملة امريكية و يبانية معا .و شكرا
مش عارف اقولك اي بصراحة ناقص تكتب قصيدة شعر فى امريكا على القاء القنابل دى اسمها جريمة حرب فاهم قواعد الحروب اصلا ومنين بتقول 35 مليون يابانى عندهم استعداد يموتوا ويحربو ومنين بتقول الاسلحة تكفى 40 فى المائة فقط لا ورسملى خطط ضرب باللنشات والزوارق والطائرات على اساس انها ناجحة وليس ان الحرب لها ظروفه المتغيرة دائما واما انك تقول ما انا قلت دى ابشع جريمة فهذا عذر اقبح من ذنب
هي بس الفكرة إن أول جملة كتبتها في المقالة هي إن اللي حصل أبشع جريمة حرب في التاريخ اللي أنا وإنت المفترض إننا متفقين علي ده .. أول سطر في الفقرة الثالثة قلت فيها إن المقالة دي مش تبرير لقرار (ترومان) رمي القنبلتين النوويتين علي اليابان .. وأخيراً أنا قلت في كلامي إن الأمريكان حسبوا الخساير المتوقعة في صفوفهم ولما لقوها كتير فده كان مبررهم ورا إلقاء القنبلتين.