لما بتيجي تتكلم عن التاريخ مع أي حد إتربي في العصر المهبب اللي إحنا عايشين فيه حتلاقي نفسك قدام مشكلتين مش سهل تتعامل معاهم .. أول مشكلة هي ثقافة التقييم Rating Culture إن إحنا بنتعامل مع الناس كلها علي إنها سواق أوبر أو مطعم بنديله تقييم كام نجمة من خمسة .. تاني مشكلة إن غصب عنك عشان إنت معندكش ومحدش علمك حكمة إنك تحط نفسك مكان ناس تانية فإنت بتتعامل مع التاريخ بمسطرة دلوقتي إنك بتتخيل إن اللي حصل من 50 سنة ظروفه كانت هي هي ظروفك دلوقتي وإن اللي يمشي عليك يبقي بالضرورة يمشي عليهم .. المشكلتين دول لما تضربهم في الخلاط مع بعض بتلاقي نفسك قصاد شاب بيبص لتاريخه اللي مليان تعقيد ومتشابك وتفاصيله أكتر من حبكات المسلسلات التركي تلاقيه بمنتهي السطحية إنه شايف الشخصيات التاريخية بمقياس غريب جداً اللي هو ده حلو وده وحش .. تلاقي شاب شايف إن (صلاح الدين الأيوبي) مثلاً وحش عشان الحادثة الشهيرة بتاعته مع أهل الإسكندرية المسيحيين وناسي باقي اللي حصل وحتي حادثة الإسكندرية مش بيبصلها بعين حد عاش وقتها .. ده المطب اللي إحنا غصب عننا حنلاقي نفسنا بنقع فيه لما نيجي نتكلم عن موضوع النهاردة وهو (رمسيس الثاني) .. (رمسيس الثاني) لو مشيت في الشارع سألت الناس هي رأيها إيه فيه فحتلاقي ناس متعرفش عنه غير معركة قادش اللي حصلت سنة 1274 قبل الميلاد وبالتالي شايفينه بطل قومي .. ناس تانية شايفه إن هو فرعون مصر اللي إتحكت قصته في قصة سيدنا (موسي) عليه السلام وبالتالي هو مكانه الدرك الأسفل من النار وفيه ناس مش عارفه عنه غير إن محطة مترو الشهداء متسميه علي اسمه.
(رمسيس الثاني) شخصية مش سهل تتفهم وده لسبب بسيط جداً إنه أكتر حاكم قعد علي الكرسي في تاريخ مصر برقم قياسي هو 66 سنة ورغم كده الحقايق التاريخية المتاحة عنه قليلة بشكل مستفز وده معناه إن فيه حاجات كتير فشخ حصلت له وحصلت للبلد كلها في عهده .. وبالتالي الكلام عن الرجل ده مليان تفاصيل خصوصاً لما تعرف إن (رمسيس الثاني) أساساً يعني لما اتولد عيلته مكنش ليها دعوة بقصة الحكم دي ولا كان حد متخيل إن في يوم من الأيام حيقعد علي الكرسي .. جده (رمسيس الأول) كان وزير فرعون مصر (حورمحب) اللي مات من غير ما يكون له ولاد يورثوا الحكم من بعده وقبل ما يموت هو أختار وزيره (رمسيس الأول) عشان يحكم وراه عشان تبدأ معاه الأسرة ال19 .. معلومة ليك علي الماشي كده (حورمحب) ده أساساً كان وزير الدفاع في عهد (توت عنخ أمون) ووصل للحكم بإنقلاب عسكري بس دي قصة ممكن نحكيها بعدين .. (رمسيس الأول) لما استلم الحكم كان كبير في السن أصلاً ومطولش ومات وجه وراه ابنه (سيتي الأول) اللي هو كمان مات وعنده 40 سنة عشان يجي وراه ابنه (رمسيس الثاني) اللي لما قعد علي الكرسي كان عنده 24 سنة .. باااااس أقف هنا بقي .. إنت تعرف دلوقتي وسط صحابك ومعارفك كام شاب عنده 24 سنة مؤهل إنه يفتح بيت فما بالك إنه يحكم بلد .. لكن .. في نفس الوقت بص علي حياة (رمسيس الثاني) من ناحية تانية .. صحيح هو استلم الحكم وهو عنده 24 سنة بس إذا كان إنت وإنت صغير كانت حياتك ما بين المدرسة والمذاكرة ولو إنت من سعداء الحظ اللي أهلك عندهم الوعي الكافي إنهم يخلوك تلعب رياضة وإنت صغير فإنت عندك تمرينك بليل اللي بيتحشر في يومك .. غير كده إنت بتتربي طفل بريء خالي من الضغوطات أسوأ كوابيسك إنك لما تروح من المدرسة تلاقي مامتك عاملالك سبانخ علي الغدا .. (رمسيس الثاني) طفولته مش كده.
لو بصيت علي تسلسل الأسر الحاكمة لمصر القديمة حتلاحظ حاجة غريبة شوية ومهم تاخد بالك منها .. (رمسيس الثاني) تقريباً أتولد سنة 1304 قبل الميلاد .. مرحلة مملكة مصر الحديثة New Kingdom اللي هو يعتبر ضمن الحكام بتوعها بدأت فعلياً سنة 1570 قبل الميلاد .. ده معناه إن لأكثر من 250 سنة مصر عاشت مرحلة مستقرة جداً في تاريخها مع العلم إن لما (رمسيس الثاني) إتولد مصر القديمة كدولة كان بقالها 1696 سنة عايشة .. اللي أنا عايز أوصله إن البيئة اللي إتربي فيها (رمسيس الثاني) مصر مكانتش بلد رايحة في داهية وكان هو المطلوب منه إنه يعدل الحال المايل .. بالعكس .. (رمسيس الثاني) إتولد في بلد مستقرة أهلها مش خايفين علي أكل عيشهم ولا خايفين علي حياة عيالهم .. بلد تاريخها فيه فترة واحدة بس اللي هي المملكة الحديثة بتاريخ إمبراطوريات زي الإمبراطورية البريطانية مثلاً.
لما جده (رمسيس الأول) مسك الحكم كان هو عنده 11 سنة ومن اليوم ده وهو بيتم إعداده لليوم اللي ممكن يحكم فيه في يوم من الأيام .. إذا كنت إنت بتصحي الصبح تروح المدرسة وتحضر حصص وتتعلم عربي وحساب (رمسيس الثاني) كان بيتعلم فنون القتال وتكتيات الحروب .. إزاي باشارة منه يحرك قواته علي الأرض ودي النقطة اللي إنت محتاج تفهمها إن طفولته وتربيته مختلفة بشكل كبير عن الطريقة اللي إنت إتربيت بيها فبلاش تتخيل إنك تقدر تستوعب بسهولة حياته من غير ما تغمض عينك وتتخيل نفسك مكانه وتعيش عيشته .. بلاش دي .. اللي إحنا نعرفه إن (رمسيس الثاني) إتجوز قبل ما يوصل 24 سنة ومراته الأولانية هي واحدة من أشهر الشخصيات في تاريخ مصر القديمة وهي الملكة (نفرتاري) اللي كانت حقاً وصدقاً سيدة مصر الاولي .. هي كانت القائمة بأعمال وزيرة الخارجية بحيث كل مراسلات (رمسيس الثاني) مع الحكام اللي حولين مصر كانت (نفرتاري) المسئولة عنها .. فضلت المشكلة بين (رمسيس الثاني) و(نفرتاري) بحكم إنهم متجوزين وشغالين مع بعض مش بس إحنا حنتغدي إيه النهاردة إنما هم شايفين مستقبل مصر إزاي .. (نفرتاري) كانت شايفة إن خلينا في حالنا وبلاش نروح نتخانق مع خلق الله .. (رمسيس الثاني) شايف أنا معلش يعني مش بيعلموني يعني إيه حرب من وأنا عندي 10 سنين عشان لما أقعد علي الكرسي مروحش أمسك في رقبة حد والحقيقة إن الحاجة اللي ممكن تبقي حجة موجودة وجاهزة عشان تقوم بسببها الحرب اللي (رمسيس الثاني) نفسه فيها والحاجة دي هي أرض كنعان أو Canan.
كان دايماً الهسهس في دماغ أي حد يقعد علي الكرسي في مصر هو إن أنا مينفعش أقول لنفسي إن أمني القومي بدايته هو حدود مصر .. ده اسمه كلام فاضي .. لو فيه حد قرر يمد إيده عليا وأنا فضلت مستني ساكت لحد ما يخش حدودي يبقي أنا كده خسرت الحرب من قبل ما تبدأ .. تأمين حدود مصر مش بيبدأ بإني أحمي سيناء .. لا خالص .. تأمين حدود مصر بيبدأ من الحتة اللي إنت دلوقتي عارفها باسم فلسطين واللي كانت زمان بتتسمي كنعان .. دي الحقيقة اللي فراعنة مصر كانوا عارفينها كويس واشتغلوا عليها كتير لحد ما جه (أخناتون) .. (أخناتون) واللي ممكن نتكلم عن قصته وقت تاني بسبب إصلاحاته الدينية وبسبب إن البلد دخلت في حرب أهلية في المرحلة اللي التاريخ بيسميها ملوك تل العمارنة فتقدر تقول إن أرض كنعان نفوذنا فيها مبقاش زي الأول وده خلي أكبر منافس لمصر وقتها اللي هي الإمبراطورية الحيثية Hittite Empire اللي هي دلوقتي مكانها تركيا تمد إيدها ليها وتاخدها مننا .. لما جه (رمسيس الأول) قعد علي الكرسي بدأ الوضع ده يتغير ومصر رجعت تاني تاخد كنعان بحيث بداية الحدود الفاصلة بين مصر وبين الحيثيين هي مدينة اسمها قادش Kadesh اللي دلوقتي مكانها سوريا .. مهم تبقي فاهم نقطة إن فيه مصطلح في السياسة الخارجية بيتسمي دايرة النفوذ Sphere of Influence اللي هو صحيح وفق القانون الدولي كل بلد ليها حدودها وليها مياهها الإقليمية بس فيه دول ربنا خلقها كعبها عالي علي اللي جنبها .. لو حنتكلم علي دلوقتي فزي مثلاً روسيا والدول اللي حوليها اللي كانت زمان جزء من الإتحاد السوفيتي .. لو حنتكلم علي مصر القديمة مثلا وبسبب نفوذ حكام مصر القديمة ده فكل حاكم من بتوع الدول الصغيرة اللي حوليها كل ما يصحوا الصبح لازم يرموا التماسي لأحسن فرعون مصر يفتكر إنه ناسي .. ده كان واحد من أسباب إن (رمسيس الثاني) راح يعمل قلق في قادش.
معركة قادش .. أنا اتعادلت بس قررت أعتبر نفسي كسبان:
العركة اللي (رمسيس الثاني) نفسه فيها مع الحيثيين كانت حتحصل لو هو خد منهم مدينة قادش .. إن خلال فترة قليلة الوجود العسكري المصري في كنعان يبدأ يزيد خلي الفار يلعب في عب الحيثيين وده خلي الملك بتاعهم (مواتالي الثاني) ياخد رجالته ويتحرك بإتجاه قادش عشان يشوف إيه اللي بيحصل ده .. اللي يمكن (رمسيس الثاني) مكنش يعرفه إن مش هو بس اللي كان نفسه الخناقة دي تحصل .. (مواتالي الثاني) هو كمان مكنش قاعد علي بعضه مستني العركة ولما عرف إن (رمسيس الثاني) شخصياً موجود في كنعان فهو مكنش محتاج يضرب الودع عشان يعرف هو موجود ليه .. (مواتالي الثاني) بعت اتنين فرسان كأنهم فريق استطلاع عشان يتجسسوا علي تحركات جيش (رمسيس الثاني) وكان متعمد إن الاتنين فرسان دول يتمسكوا عشان لما المصريين يستجوبوهم هم الاتنين يقولولهم إن جيش الحيثيين علي بعد 100 كيلومتر لسه من قادش يعني المدينة مفيهاش غير حامية صغيرة بس هي اللي بتحميها .. المعلومة دي واللي كانت فشنك خلت ريق (رمسيس الثاني) يجري اللي قرر يقسم قواته نصين .. نص حيبقي مسئول عن تعطيل الجيش بتاع الحيثيين لما يقرب من قادش .. نص تاني بقيادته هو شخصياً حيروح لقادش عشان يحاصرها عشان يلاقي نفسه لبس أحلي خازوق في حياته.
الحق يتقال إن (رمسيس الثاني) عرف يمسك نفسه .. صحيح إن هجومه علي مدينة قادش فشل لإنه إكتشف إن فيه قوة محترمة بتحميها بس هو عرف يأسر منهم كام عسكري أكدوله إن قوات (مواتالي الثاني) مش علي بعد 100 كيلومتر ولا حاجة دي مستخبية ورا المدينة .. وقبل ما (رمسيس الثاني) يقول أحيه عرف إن النص الاولاني من جيشه اللي هو بعته عشان قال إيه يوقف قوات (مواتالي الثاني) تقدر تقول تعيش إنت .. وفي اللحظة اللي كان المنطق والعقل بيقولوا إن (رمسيس الثاني) لازم ينحسب عشان ينقذ مش بس جيشه إنما نفسه إذا بيه بيؤمر بهجوم كاسح عشان التاريخ يشوف أكبر اشتباك بالعربات الحربية محصلش إنه إتعاد تاني بالشكل ده .. فوق 4200 عربة حربية Chariot بيجروا ورا بعض قدام أسوار مدينة قادش عشان الملحمة دي تخلص من غير ما حد يقدر يقول إني إنتصرت .. لا الحيثيين عرفوا يطردوا المصريين بره كنعان ولا المصريين عرفوا ياخدوا قادش ودي أغرب حاجة في القصة إن بعد قادش (رمسيس الثاني) قرر ينسحب وقرر كمان إنه إنتصر في قادش ودي كانت الرواية الرسمية اللي اتكتبت علي كل المعابد وكل البرديات.
بعد 15 سنة (نفرتاري) بتثبت إن ميجبهاش غير نسوانها لما هي اللي عرفت تحقق اللي جوزها معرفش يوصله لما خلته يمضي مع ابن (مواتالي الثاني) واللي كان اسمه (مورشيلي الثالث) أول إتفاقية سلام معروفة تتمضي بين بلدين .. إتفاقية سلام لما تقراها تحس إن اللي كاتبها إتنين رؤساء دول في عصرنا ده .. الإتفاقية مش بس كانت إتفاقية سلام إنما كانت إتفاقية عدم إعتداء ومش بس كده .. دي كانت إتفاقية تحالف استراتيجي بين مصر وبين الإمبراطورية الحيثية إن لو حصل وبلد فيهم تعرضت لإعتداء خارجي فالتانية لازم تيجي تلحقها .. إتفاقية سلام لازم تبقي مستوعب إزاي كانت سابقة عصرها إن بلدين كبار يبقي عندهم فريقين من الدبلوماسيين والمترجمين عشان يكتبوا إتفاقية بلغتين مختلفتين ولازم يبقوا متؤكدين إن النص باللغتين له نفس المعني .. يمكن عشان كده الإتفاقية دي فيه نسخة منها متعلقه علي جدران مبني الأمم المتحدة في مدينة نيويورك عشان توريك إن البشر زي ما عندهم الرغبة إنهم يسيحوا دم بعض فهم برده عندهم القدرة إنهم يقعدوا مع بعض ويتفقوا علي حل يرضي جميع الأطراف.
ما بعد قادش .. التحول من جنرال لمقاول أنفار:
مفيش معبد فيكي يا مصر بعد ما (رمسيس الثاني) رجع بالسلامة من قادش إلا وقال إن زعيم الأمة فرعون مصر قد إنتصر في قادش وعشان كده إحنا إخترناه ومهم تبقي فاهم نقطة إن بالنسبة للمصريين القدماء لما كلمة تتحط علي جدران معبد فده زي ما تقول كده مينفعش تعترض علي كلام ربنا ولا علي سنة سيدنا النبي (عليه الصلاة والسلام) .. الكلام لما بيتحط علي معبد بيبقي له قدسية عند المصريين وده الحقيقة بيحط (رمسيس الثاني) قصاد مشكلة عويصة بالنسبة له .. هو أنا جاي هنا أعمل إيه؟ .. بالنسبة له هو كان نفسه يبقي قائد عسكري التاريخ يفتكر إنتصاراته بس بعد معركة قادش هو بقي عارف إن خلاص كده مصر ممكن تفضل سنين وسنين مترفعش السلاح علي حد .. طب والعمل؟ .. حفضل كده من غير لا شغلة ولا مشغلة .. المشكلة التانية إن دايماً معروف إن معدل أعمار فراعنة مصر مش كبير .. الكرسي زي ما يكون بيخسف من عمر اللي بيقعد عليه .. أبوه مثلاً (سيتي الأول) مات صغير وهو عنده 40 سنة فمن وجهة نظر (رمسيس الثاني) أنا دلوقتي مش حعرف أعمل الحاجة اللي كان نفسي فيها ومش بس كده أنا مقداميش وقت طويل أعيشه .. رغبته إن التاريخ يفضل فاكر اسمه خلته مفيش حاجة شاغله وقته ولا تفكيره قد إنه يحط اسمه علي كل حاجة .. حرفياً كل حاجة.
- الأول هو بدأ يخلص كل المشاريع اللي أبوه (سيتي الأول) اشتغل عليها ومات قبل ما تخلص بس كل مبني بيخلص كان بيخلي البنايين يحطوا اسمه في خرطوشة علي باب المبني سواء كان معبد أو قصر عشان يتقال إن صحيح المبني ده بدأ بناءه في عهد (سيتي الأول) بس أفتتح في عهد ابنه (رمسيس الثاني).
- بعد كده بدأ مشروع نقل العاصمة من طيبة اللي هي الأقصر دلوقتي لمدينة تانية علي الضفة التانية من نهر النيل سماها بر-رمسيس Di-Ramesses .. هي الحقيقة مكنتش عاصمة قد ما كانت قاعدة عسكرية هو بدأ يكبر فيها .. دي نفس القاعدة العسكرية اللي إنطلقت منها حملته لقادش وطلعت منها حملته للسيطرة علي بلاد النوبة.
- المرحلة اللي بعد كده هي المعابد اللي هو بناها لنفسه عشان الناس تعبده بصفته إله زي معبد الرامسيوم اللي هو سماه قصر المليون سنة علي أساس إن من عظمته الناس حتفضل تزوره لمده مليون سنة واتبني معاه في نفس التوقيت معبد أبوسمبل .. الغريبة إن المعابد دي مش بس مجدت في إنتصاره في قادش إنما خلدت اسمه كإله وفي مراته (نفرتاري) باعتبارها الملكة الأم .. تخيل كده حضرتك للحظة إنك مكان (رمسيس الثاني) .. إنت بتصحي الصبح تخش المعبد بتاعك اللي إنت بانيه عشان تعبد نفسك وتصلي لنفسك ومش بعيد تدبحلك أضحية عشان تتقرب من نفسك .. ليفل الوحش في تعظيم الذات.
بس يمكن الحياة كانت ماشيه كويس في أول 25 سنة من حكم (رمسيس الثاني) لحد ما مراته (نفرتاري) ماتت .. بعد ما دفنها في مقبرة في وادي الملوك يقال إنها سابت فراغ كبير في حياته إحتاج إنه يملاه ب200 ست .. أيوه زي ما سمعت .. (رمسيس) بعد (نفرتاري) ما ماتت أتجوز 200 بنت من ضمنهم بنتين من ملوك الحيثيين عشان تبقي قصاد رجل مخلف حوالي 100 طفل معترف بيه .. معلومة ليك علي الماشي برده .. (نفرتاري) وهي بتكتب إتفاقية السلام مع الحيثيين حطت شرط غريب جداً هو إن لا يجوز تحت أي مسمي إن أميرة مصرية تسيب بلدها وتروح تتجوز ملك الحيثييين بس ينفع أي أميرة من الحيثيين تيجي مصر عشان تبقي عروسة (رمسيس الثاني) أو أي فرعون يجي من بعده .. الرجل كان مخلف بنات وولاد كتير لدرجة إنه مكنش لاقي عرسان لبناته فاتجوز بنتين من بناته .. لو قلنا إنه خلف 100 طفل منهم 50 ولد فإنت قصاد المفروض يعني وفق اللي إحنا عارفينه وحافظينه من التاريخ إننا قصاد ماتش مصارعة ولا بتوع Hell in the Cell .. هو الحقيقة إن ده محصلش لسبب وهو إن (رمسيس الثاني) بمنتهي البساطة مكنش بيموت .. يعني مثلاً .. أكبر عياله اللي الابن البكري بتاعه اللي خلفه من (نفرتاري) والناس كلها كانت شايفه إنه حيبقي ولي العهد بتاع ابوه مات يدوبك سنة بعد ما أمه ماتت .. ابنه الثاني فضل ولي عهد مستني أبوه يموت لمدة 25 سنة ولما جت السنة الخمسين ل(رمسيس الثاني) في الحكم بدل ما هو اللي يموت ابنه اللي مات .. ابنه الثالث كان مات اصلا من فترة فده خلي بعد ما (رمسيس الثاني) قعد خمسين سنة يحكم بقينا قدام حقيقة إن ولي عهده هو ابنه الرابع (خعمواس Khaemweset) اللي كان أساساً كاهن وكان واهب حياته للتاريخ ويمكن هو كان أول عالم أثريات في تاريخ مصر وعلي فكرة هو كان اللي ورا إن لأسباب غير منطقية أحياناً كنا بنلاقي اسم (رمسيس الثاني) محطوط علي معالم أثرية المفروض إنه ميكونش له علاقة بيها بس هو كان بيحط اسم ابوه عليها.
من ضمن الحاجات الغريبة اللي خلت المؤرخين وعلماء الأثار يهرشوا في شعرهم مثلاً إننا مكناش نعرف إن (خعمواس) بدأ مشروع لإعادة ترميم أهرامات الجيزة عشان يرجعها لمنظرها القديم وكمان يحط عليها التاتش بتاعته بإنه حط اسم أبوه (رمسيس الثاني) علي حجر الهرم الأكبر اللي هو صباح اللخبطة اللي في الدنيا لو إنت عالم مصريات ولقيت العك ده إن اسم ملك من الأسرة 19 محطوط علي هرم اتبني في عهد الأسرة الرابعة .. عايز أقولك إن لعب (خعمواس) وبحثه في التاريخ لإن زي ما قلتلك هو يعتبر أول عالم مصريات فقصة المومياء أساساً جايه منه لإن كتير من شغله بقينا نعرف عنه من عصر البطالمة اللي اخترعوا قصة المومياء وكان بطلها هو (خعمواس).
(رمسيس الثاني) فضل يحكم 66 سنة ومات وهو في التسعينات من عمره ولما مات كان ولي عهده اللي لسه عايش كان ابنه ال13 وكان اسمه (مرنبتاح) .. عارف (مرنبتاح) كان عنده كام سنة لما قعد علي الكرسي؟ .. سبعين سنة .. بعد وفاة (رمسيس الثاني) الأسرة 19 معاشتش غير 24 سنة وإنتهت بس ده ميمنعش إن (رمسيس الثاني) ساب وراه إرث كبير أوي .. إنت قصاد ملك فيه وراه 9 بعد ما قعدوا علي الكرسي قرروا يسموا نفسهم (رمسيس) بسببه .. قصاد بني أدم تحول لإله فضلت الناس تعبده لحد بعد وفاته بألف سنة لحد عصر دولة البطالمة .. ده الملك اللي اتسمي ملك الملوك وده لقب ديني إتحط ليه لوحده .. لو جيت تقول لنفسك أنا حختار التوب فايف من ملوك مصر القديمة فطبيعي إن (رمسيس الثاني) يكون حاجز اسمه وسط الخمسة.
نيجي بقي للحتة اللي عايز أختم بيها هي هل (رمسيس الثاني) هو فرعون مصر في قصة سيدنا (موسي) عليه السلام والإجابة بمنتهي البساطة هي لا .. ليه؟ .. بص يا سيدي:
- صحيح ومعاك إن إحنا تحت إيدنا الجثة المحنطة بتاعته والغريبة إن لما التابوت بتاعه لقيناه كان مدفون وسط شوية تانيين من ملوك مصر .. عرفنا إن كل التوابيت اللي الملوك التانيين مدفونين فيها كانت توابيت مستعملة إلا التابوت بتاع (رمسيس الثاني) كان جديد .. فضل اللغز ده محير علماء أثار كتير لحد ما أكتشفنا السر ورا ده إن (رمسيس الثاني) كان مدفون أصلاً في مقبرة تانية بس بسبب الإضطرابات السياسية اللي حصلت في مرحلة متأخرة من مصر القديمة فطلع قرار بنقل توابيت ملوك مصر من وادي الملوك لمقبرة تانية مجمعة.
- صحيح برده ومعاك إننا لما لقينا جثه (رمسيس الثاني) في المقبرة المجمعة دي كانت من غير أي ذهب ولا مجوهرات ولا العز والجاه اللي شفناه في مقبرة (توت عنخ أمون) مثلاً والسر ورا ده إن برده في مرحلة متأخرة من مصر القديمة طلع قرار بإزالة الدهب من كل المقابر وإسالته لتمويل مصاريف البلد.
- أساساً أول ذكر لبني إسرائيل في المعابد المصرية كانت في عهد ابنه (مرنبتاح) مش في عهد (رمسيس الثاني) أصلاً.
المصادر:
- فيديو بعنوان Ramesses the Great: The Battle of Kadesh-Egyptian History-Part 01-Extra History نشرت علي YouTube وده لينك الفيديو الأصلي:
https://www.youtube.com/watch?v=4BFh0kTOjBA&t=54s - فيديو بعنوان Ramesses the Great: Reign of the God-King-Egyptian History-Part 02-Extra History نشرت علي YouTube وده لينك الفيديو الأصلي:
https://www.youtube.com/watch?v=lA0MXYMXpe8&t=3s
- فيديو بعنوان Was Ramesses II The Greatest Pharoah of Ancient Egypt?-Dan Snow’s History Hit نشر علي YouTube وده لينك الفيديو الأصلي:
https://www.youtube.com/watch?v=xTJtijObwqw
