سايكس – بيكو .. حرب وجهات النظر.

لينك التسجيل الصوتي للجزء الأول من للمقالة علي Sound Cloud:
https://soundcloud.com/user-112011687-312727988/f-f-1

لينك تسجيل الصوتي للجزء الثاني من المقالة علي Sound Cloud:
https://soundcloud.com/user-112011687-312727988/vcsxovowmyg9

سر تعاسة البني أدمين و في نفس الوقت سر تكريم ربنا ليهم عن باقي المخلوقات بما فيهم الملايكة و الجن هي إن كل واحد فينا له وجهة نظر .. بص علي أي مصيبة سودا من المصايب المتلتلة اللي عملها البشر .. كل الحروب و كل الكوارث .. من أول فيروس كورونا لحد الإحتباس الحراري .. حتلاقي وراها إن فيه طرفين و أحيانا أكتر كل واحد فيهم له وجهة نظر مقتنع إنها صح و شايف الباقي يا شوية بهايم مبيفكروش يا شوية خونة أو كفرة ميستحقوش الحياة .. الفكرة دي حتلاقيها هي الأساس اللي حنحكي بيها قصة النهاردة و هي قصة إتفاقية سايكس – بيكو.

للناس اللي متخيلة إن سايكس – بيكو دي أسامي لاعيبه كورة أو أسامي شركات فالحقيقة إن دي أسامي بني أدمين .. سير (مارك سايكس Marc Sykes) وده يبقي دبلوماسي بريطاني و (فرانسوا جورج بيكو Francois Georges Picot) يبقي وزير خارجية فرنسا و الإتنين دول في قعدة صفا بعد غدوة حلوة مسكوا ورقة و قلم و قسموا تركة الدولة العثمانية بين إنجلترا و فرنسا  .. قبل القعدة دي مكنش فيه حاجة إسمها المملكة العربية السعودية و لا المملكة الأردنية الهاشمية و دلوقتي بقوا موجودين بسبب الإتفاقية دي .. كل الحروب و المصايب اللي حصلت و بتحصل في عالمنا العربي سببها الإتفاقية دي  .. القعدة دي قبلها أحداث كتير و بعدها أحداث أكتر و عشان كده خليني أتكلم عن ال3 شخصيات اللي بيتحكموا في مصير الحكاية و ال3 شخصيات دول مش من ضمنهم لا (مارك سايكس) ولا (فرانسوا بيكو) علي فكرة .. من غير كلام كتير يلا نبدأ بأول شخصية في الحكاية بتاعة النهاردة.

الشخصية الأولي: السلطان العثماني (عبدالحميد الثاني) .. مفيش أسهل إنك تلوم غيرك علي مشاكلك:

خليني أبقي واضح إن اه صحيح فيه ناس كتير بتحمل السلطان (عبدالحميد الثاني) الله يرحمه مسئولية كل حاجة غلط حصلت بس انت لازم تفهم إن الدنيا مش بسيطة أوي زي ما انت متخيل كده .. صحيح إن (عبدالحميد الثاني) إتشال من منصبه و إنتهت الدولة العثمانية بشكلها اللي الناس عارفاه سنة 1922 إلا إن مشاكل الدولة العثمانية بدأت تقريباً من القرن ال18 من أول عهد السلطان (أحمد الثالث) سنة 1703 .. من أول الرجل الطيب ده لحد الرجل الغلبان (عبدالحميد الثاني) و حدود الدولة العثمانية عماله تقل .. كل يوم الناس تصحي علي خبر إن فيه حتة من الدولة راحت .. لكن .. خلي بالك إن صحيح الدولة العثمانية بتضعف عسكرياً و سياسياً إلا إن إقتصادياً البلد كانت واقفة علي رجلها بسبب شوية سياسات إصلاحية عملها سلاطين الدولة العثمانية اللي من ضمنهم مثلاً السلطان (عبدالمجيد الأول) اللي عمل فرمان التنظيمات عشان يعمل عمرة كاملة لمرافق الدولة و هو اللي أقر فرمان المساواة بين جميع العثمانيين بغض النظر عن ديانتهم .. دي إصلاحات الي حد كبير تقدر تصنفها علي إنها قرارات تطلع من حكومة علمانية أو ليبرالية مش إسلامية .. طب إيه رأيك بقي إن سنة 1858 في عهد السلطان (عبدالمجيد الأول) برده طلع فرمان بإلغاء تجريم الشذوذ الجنسي .. ده يوريك إن التاريخ أعقد شوية التبسيط الأوفر اللي إحنا متخيلينه بس ما علينا مش دي قضيتنا دلوقتي .. قضيتنا هي الإقتصاد.

الإقتصاد العثماني بدأ فعلاً يروح في ستين داهية بداية من سنة 1828 .. في السنة دي حصلت واحدة من الحروب الكتير بين العثمانيين و الروس .. العثمانيين و الروس كانوا بيحاربوا بعض أكتر ما (مرتضي منصور) بيتخانق مع (محمود الخطيب) .. من سنة 1568 لحد سنة 1914 الإتنين حاربوا بعض 13 مرة و روسيا كسبت 7 منهم .. انا عارف إن دي زي ما تكون إحصائية كام مرة الأهلي و الزمالك لاعبوا بعض في دوري أبطال أفريقيا بس دي أرقام توريك إزاي الحروب دي كلها في وقت قليل كانت فعلياً فاشخة الميزانية للدولتين .. المهم إن سنة 1828 قامت حرب بين البلدين و روسيا كسبتها و بعدها حصلت موجة هجرة جماعية للمواطنين اللي أولاً مسلمين و ثانياً مش عثمانيين من بره الدولة لجوه .. ده خلق ضغط رهيب علي الإقتصاد العثماني لإن الناس دي بقت محتاجة أكل و شرب و محتاجة تشتغل كمان .. شوية و الميزانية بدأت تبوظ و هي دي اللحظة اللي الدولة العثمانية كتبت شهادة وفاتها بإيديها لما قبلت تاخد ديون من دول أوروبا عشان تسد العجز في ميزانيتها.

الشروط اللي دول أوروبا عطت بيها قروض للدولة العثمانية كانت أقل ما يقال يعني إنها قليلة الأدب .. بسم الله الرحمن الرحيم كده المواطن الفرنساوي مثلاً لو عمل مصيبة في شوارع إسطنبول مينفعش يتطبق عليه القانون العثماني .. زود علي كده إن الفرنساويين نفسهم كانوا بيتعمدوا يهيجوا الشارع التركي بإنهم بيدوا للمسيحيين الكاثوليكيين اللي عايشين في الدولة العثمانية الجنسية الفرنسية متفهمش ليه .. كل ده و العثمانيين صابرين و بيقولوا لنفسهم معلش إن كان لك عند الكلب حاجة قوله يا سيدي .. كلها كام سنة و الحال يتصلح و الميزانية تضبط .. هوبا جت سنة 1873 في السنة دي حصلت أزمة مالية عالمية شبه الأزمة بتاعة سنة 2008 كده و الأزمة دي هي اللي جابت الإقتصاد العثماني الأرض لدرجة إن الدولة العثمانية بجلالة قدرها أعلنت إفلاسها سنة 1875.

هنا يجي دور (عبدالحميد الثاني) .. الرجل ده إستلم الحكم سنة 1876 و تحت إيده دولة مهزومة عسكرياً .. مفلسة إقتصادياً .. سياسياً ملهاش كلمة علي حد .. و زي أي حاكم بيتحط في موقف إنه أولاً مش مسئول عن المصايب اللي هو ورثها و ثانياً هو مش عارف يحلها إزاي فقال لشعبه عارفين مين اللي ورا كل المشاكل اللي أنتوا فيها؟ .. قالوله مين يا جلالة السلطان؟ .. قالهم الأجانب و المسيحيين اللي الغرب مقوييهم علينا .. عشان كده حصلت مذابح الأرمن .. عشان كده عهد (عبدالحميد الثاني) مرتبط في التاريخ بإنتهاكات كتير حصلت ضد الأقليات الدينية في الدولة العثمانية .. فيه ناس حتقول يا عم ده إفتراء علي الرجل .. إحتمال علي فكرة ميكونش هو اللي إدي الأمر بإن المذابح و التجاوزات دي تحصل بس علي الأقل سياسياً في الشارع العثماني الناس مبقتش تقوله انت السبب في اللي إحنا فيه يا جلالة السلطان.

سنة 1908 الدنيا باظت خالص من إيد (عبدالحميد الثاني) لما قامت ثورة تركيا الفتاة  .. في حالة إنك مش فاهم حاول تتخيل إن (عبدالحميد الثاني) هو الملك (فاروق) الله يرحمه و إن تركيا الفتاة دي هم الضباط الأحرار .. الناس بتوع تركيا الفتاة و دول أغلبهم ضباط صغيرين في الجيش التركي عملوا إنقلاب عسكري عشان يحققوا حاجتين .. أول حاجة إن (عبدالحميد الثاني) يمشي و يجي مكانه أخوه (محمد الخامس) الله يرحمه .. ثاني حاجة إن يتم إعادة العمل بالدستور العثماني اللي (عبدالحميد الثاني) لغاه سنة 1878 زي ما قلتلك ضمن حملته إنه يحمل الأجانب و الأقليات المسيحية في الدولة مسئولية كل المصايب اللي حصلت في السنين اللي فاتت .. الليلة دي كلها إتسمت المشروطية الثانية في حالة إنك قررت تعمل بحث عليها.

تفتكر (عبدالحميد الثاني) يسكت؟ .. يبقي انت متعرفش (عبده) كويس .. يوم 13 إبريل 1909 رجالته اللي في الجيش بيعملوا إنقلاب معاكس أو زي ما انا بسميها الريمونتادا الإنقلابية عشان يلغوا المشروطية الثانية و يرجعوا (عبدالحميد الثاني) يبقي هو تاني سي السيد .. تفتكر العساكر الصغيرين يسكتوا؟ .. يبقي متعرفش الأتراك إزاي دماغهم ناشفة .. يوم 24 إبريل 1909 بيتعمل إنقلاب علي الإنقلاب العكسي أو زي ما انا بسميها الريمونتودا علي الريمونتادا و بيرجع تاني (محمد الخامس) يبقي هو السلطان و تحت منه الضباط بتوع تركيا الفتاة و هنا الثورة اللي قام بيها الضباط العثمانيين إتحطت قدام السؤال اللي بتتسأله أي ثورة و عادة مبتعرفش تجاوبه .. السؤال اللي لما إتحط قدام ثورة يناير 2011 هي كمان معرفتش تجاوبه .. السؤال بتاع ها و بعدين؟ .. طب دلوقتي يا سيدي انا حشتري منك إن (عبدالحميد الثاني) كان رجل مبيفهمش و مبيعرفش يحكم .. طب هل انت حتعرف؟ .. هل حتعرف تحل المشاكل اللي انت شلته بسببها؟

مهم تبقي فاهم إن دلوقتي بيحكم الدولة العثمانية شوية عساكر صغيرين ماسكين دولة مفيهاش فلوس .. حدودها معادش حد بيحترمها و شعبها مش طايق بعضه .. لو (محمد الخامس) عمل أي حاجة ترضي المسلمين فالأقليات المسيحية و اليهودية بتزعل .. لو عمل حاجة ترضي الأقليات المسيحية و اليهودية فالأغلبية المسلمة بتتقمص .. العساكر العثمانيين كانت بدأت تنتشر وسطهم نبرة تركيا أولاً و تحيا تركيا 3 مرات يمكن قبل ما (مصطفي كمال أتاتورك) الله يرحمه يتولد أساساً بس كل ما يقولوا كده العرب مثلاً اللي هم مش أتراك بس عايشين تحت حكم العثمانيين يتضايقوا .. صدقني لو قلتلك إن أصعب حاجة في الدنيا إنك تحكم شعب مش طايق بعضه و بمجرد ما مجتمع إتشرخ بالشكل ده فانت تقدر تقول علي الدولة إنها راحت في ستين داهية.

كل طرف كان شايف من وجهة نظره إنه صح .. أنصار (عبدالحميد الثاني) شايفين إن الشرعية معاه .. الضباط بتوع تركيا الفتاة شايفين إنهم بيحاولوا ينقذوا المركب قبل ما تغرق .. وسط الخناقة دي الأوروبيين كانوا بيسنوا سكاكينهم عشان ينهشوا لحم الدولة العثمانية .. إيطاليا خدت ليبيا .. إنجلترا خدت مصر سنة 1882 .. سنة 1906 إنجلترا خدت شبه جزيرة سيناء .. علي فكرة حتي الأوروبيين كل واحد فيهم كان له وجهة نظر .. الروس كان حلمهم ياخدوا أسطنبول و هضبة الأناضول .. الإنجليز مكانوش بيفكروا في حاجة غير إزاي يمنعوا أي حد يفكر ياخد منهم الهند .. و وسط كل ده يطلع للدولة العثمانية الخازوق اللي جاب أجلها .. البترول.

فكر فيها كده .. السعودية و الكويت و العراق كانوا تحت إيد الدولة العثمانية .. 3 دول فيهم أكبر إحتياطيات النفط في العالم في الوقت اللي السفن بدأت تنتقل من مرحلة إنها تمشي بالفحم إلي إنها تمشي بالبنزين .. ده لوحده يخليك تقول يا سلاااام بشوية تفتيح مخ و الدولة العثمانية تقدر تستغل ده في إنها تبقي أكبر تاجر بترول في العالم و يبقي عندهم مصدر دخل يخلي إقتصادهم يقف علي رجله تاني .. عشان كده قلتلك إن البترول كان الخازوق اللي جاب أجل الدولة العثمانية.

سنة 1914 و دي السنة اللي أولاً أكتشف فيها البترول في شبه الجزيرة العربية و ثانياً قامت فيها الحرب العالمية الأولي فعايزك تعرف إن عدد الجواسيس الأوروبيين و الأمريكان اللي بقوا جوه الدولة العثمانية أكتر من الناس اللي بقي عندها أكونت علي تيك توك .. إنجلترا و أميركا بالذات بقوا بيبعتوا جواسيسهم علي إنهم سياح أو علماء أثار عشان يحددوا أنهي المناطق اللي فيها بترول عشان بمجرد ما الحرب تخلص و الدولة العثمانية تستسلم كل دولة تقول انا عايزة الحتة الفلانية و الفلانية و الفلانية .. ليه؟ .. عشان فيها بترول .. في التاريخ الحكاية دي بتتسمي بالسرقة الكبيرة The Great Loot في حالة برده إنك حبيت تعمل بحث أكتر عنها .. كده انا خلصت كلام عن السلطان (عبدالحميد الثاني) .. فيه ناس شايفاه مظلوم و فيه ناس شايفاه ظالم .. انا شخصياً شايفه ميفرقش حاجة عن أي زعيم ديكتاتوري شعبوي زيه زي (جمال عبدالناصر) الله يرحمه أو (أدولف هتلر) أو حتي (دونالد ترامب) .. الزعيم اللي باني حكمه مش علي أساس شوفوا انا عملت ايه .. هو باني حكمه علي أساس شايفين الخونة اللي عايزين يدمروا حياتنا بيعملوا ايه؟ أدوني تفويض أرميهم كلهم في القبور أو السجون .. و بما إننا خلصنا كلام عن الشخصية الأولانية فجه الوقت نجيب في سيرة تاني شخصية معانا في الحكاية.

الشخصية الثانية: الشريف (حسين بن علي) .. في السياسة أهم حاجة ختم النسر من مدام (عفاف) في الدور الرابع:

كده انت بقي عندك إلي حد ما فكرة عن الوضع اللي كانت فيه الدولة العثمانية لما قامت الحرب العالمية الأولي و عرفت الدور اللي لعبته الشخصية الأولي في الحكاية اللي هو السطان (عبدالحميد الثاني) .. دلوقتي جه الوقت نعرفك علي الشخصية الثانية .. (حسين بن علي) الله يرحمه شريف مكة المكرمة .. الرجل ده كان عنده كذا مشكلة الحقيقة .. هو رجل تقدر تقول عليه دقة قديمة .. هو رجل محافظ و تقليدي بشكل كبير .. ده في حد ذاته مش عيب .. عشان تفهمه أكتر ده جدك الكبير في السن اللي لحد دلوقتي مش عايز يمسك موبايل Smartphone .. تاني حاجة إن اللي عينه كان السلطان (عبدالحميد الثاني) فإلي حد ما برده ولاءه كان ليه و هو شاف بعنيه إزاي الرجل ده إترمي من الشباك عشان يجي مكانه سلطان يعتبر شخشيخة في إيد شوية عساكر صغيرين .. تالت حاجة إنه مكنش عاجبه الإصلاحات اللي بيعملها (محمد الخامس) .. يعني إيه ندي للست حقوقها؟ و يعني حريات شخصية؟ و يعني إيه نلغي تجارة العبيد؟ و يعني إيه مساواة في الحقوق و الواجبات؟ و الكلام الفاضي بتاع الإصلاحات الليبرالية ده .. عندنا الستات بتاكل لما الرجاله بتموت .. بس يمكن أكبر مشكلة في دماغ (حسين بن علي) كانت إصرار (محمد الخامس) إنه يخلص مشروع خط السكه الحديد اللي بيربط بين دمشق و مكة المكرمة.

قدام الناس المبرر اللي إتقال إن و الله المشروع ده معمول عشان خدمة حجاج بيت الله الحرام .. بس في دماغ (حسين بن علي) كان فيه هسهس إن خط السكة الحديد ده معمول عشان لو هو فكر يستقل أو ميدفعش الضرائب فتاني يوم يلاقي الجيش العثماني كله علي باب بيته .. لما الحرب العالمية الأولي قامت قرر (حسين بن علي) إنه ياخد ال Risk .. هنا مش بتكلم عن Risk أو مخاطرة إنك تسيب الكارير بتاعك في هندسه و تروح تفتح عربية فول .. لا انا بتكلم عن ريسك حياة أو موت .. (حسين بن علي) قرر إنه يرتكب الخيانة العظمي و يبعت للإنجليز يقولهم إنه مستعد يقف معاهم ضد الدولة العثمانية في مقابل إنهم يخلوه يعمل دولة مستقلة للعرب في شبه الجزيرة.

ال Offer اللي (حسين بن علي) بعته للمندوب السامي البريطاني في مصر هو كان شايفه مينفعش الإنجليز يشوفوه و ريقهم ميجريش .. الجوابات اللي هو بعتها كانت فيه خطة بالتفصيل لإيه بالضبط اللي المفروض يتعمل .. العثمانيين لما الحرب قامت خدوا كتير من الشباب من شبه الجزيرة العربية نقلوهم للدفاع عن سوريا و حطوهم في مدينة الإسكندرونة علي البحر المتوسط و دي مدينة جنوب تركيا يدوبك كام ساعة بالعربية من سوريا .. (حسين) قال للإنجليز لو أنتوا عملتوا عملية إنزال بري علي ساحل الإسكندرونة فرجالتي وسط القوات العثمانية مستعدين يعملوا تمرد مسلح ويساعدوكوا تشقوا طريقكوا لحد أسطنبول .. انت مستوعب (حسين بن علي) كان متخيل إنه بيقول إيه للإنجليز؟ .. هو كان متخيل إنه بيقولهم إن هو معاه مفتاح أسطنبول و ده لوحده حيخلي الإنجليز يحققوله كل طلباته .. (حسين بن علي) كان متخيل إن كلها يومين و الإنجليز حيجروا لحد باب بيته يسألوه شبيك لبيك .. بس بتعدي الأيام و الإنجليز مجوش .. شهور و سنين .. الحرب بدأت سنة 1914 و دلوقتي بقينا في أغسطس 1915 و لسه مفيش رد.

اللي خلي (حسين بن علي) يحس إن فعلاً جواباته اللي هو بعتها للإنجليز إترمت  في الزبالة هو إن فعلاً الإنجليز نفذوا عملية إنزال بري زي ما هو طلب بس مش في الإسكندرونة إنما في شبه جزيرة جاليبولي في تركيا يوم 20 أغسطس 1915 .. عملية الإنزال البري في جاليبولي كانت كارثة عسكرية بكل المقاييس للإنجليز و وسط ما هم بيلموا في الجثث بتاعة قتلاهم بيلاقوا ضابط عثماني بيسلم نفسه و بيقول إنه ضابط عربي مش تركي بس اللي هو قاله كان غريب لدرجة إن الإنجليز حطوه علي مركب و ودوه لمقر عمليات القوات الإنجليزية في القاهرة.

يوم 10 سبتمبر 1915 الضابط العربي العثماني بيقعد في أوضة مع 3 ضباط مخابرات إنجليز في القاهرة منهم ضابط قصير و رفيع تحس لو نفخت فيه حيطير إسمه (تي إي لورينس T.E. Lawrence) .. الضابط العثماني قال إنه عضو ضمن تنظيم سري من الضباط العرب في الجيش العثماني و إن .. خلي بالك بقي من الحتة الجاية .. إنه هو و اللي معاه كانوا معسكرين في الإسكندرونة و مستنيين الإنجليز لما يعملوا الإنزال البري بتاعهم و هم كانوا مجهزين كل حاجة عشان يعملوا تمرد علي الضباط العثمانيين و يساعدوا الإنجليز يوصلوا لحد أسطنبول بس كل حاجة باظت .. (لورينس) بصله و قاله لا إستني ثانية واحدة .. هو يعني إيه كل حاجة باظت؟ .. الضابط قاله إن الإنجليز مجوش و اللي حصل إن الإنزال البري إتعمل في جاليبولي و كتير من الضباط العرب زمايله ماتوا خلاص .. ساعتها (لورينس) كان شوية و حيضرب نفسه بالجزمة.

اللي الضابط العثماني مكنش يعرفه إن (لورينس) شخصياً راح طلب من اللورد (وينستون تشرشل Winston Churchill) قائد القوات الإنجليزية إن فعلاً عملية الإنزال البري تحصل في الإسكندرونة مش في جاليبولي بس (تشرشل) رفض .. ليه يا عم (تشرشل)؟ .. أصل الفرنساويين حاطين عينهم علي سوريا بعد ما الحرب تخلص فلو إحنا نزلنا بقواتنا في الإسكندرونة اللي هي يدوبك ساعة بالعربية من سوريا فممكن الفرنساويين يفتكروا إننا بنلعب بديلنا و حناخد سوريا منهم .. اللي الضابط العربي العثماني قاله بعد كده خلي (لورينس) شوية حيقوم يبوسه .. هو قاله إن الشريف (حسين بن علي) مستعد إنه يقود القبائل العربية في تمرد مفتوح ضد العثمانيين تحت شرط و الشرط ده إن الإنجليز يضمنوله إنه حيحكم دولة تشمل شبه الجزيرة العربية و العراق و سوريا.

خيانة عظمي .. انت قررت تساعد الإنجليز في مقابل إنهم يدوك دولة مستقلة بس انت عمرك ما سألت نفسك هو يا تري إيه اللي حيخلي الإنجليز ينفذوا وعدهم؟ .. لو فكرت فيها شوية حتلاقي إن (حسين بن علي) هو أكتر واحد حيدفع الثمن غالي أوي لو خسر .. هو اللي حيرفع السلاح ضد العثمانيين .. هو اللي حيتهم بالخيانة العظمي .. هو اللي حيتعدم لو ثورته فشلت و هو برده اللي حيتعلق من علي حبل المشنقو لو ثورته نجحت و الإنجليز باعوه .. كان المفروض إنه ياخد ضمانات أكتر .. كان لازم يبقي معاه ورقة ممضية و مختومة بختم النسر من مدام (عفاف) في الدور الرابع عشان يخلي الإنجليز مجبرين يلتزموا بكلمتهم .. كون إن مفيش ورق مش بس زي ما حنشوف كمان شوية خلي الإنجليز يقولوا ل(حسين بن علي) ملكش عندنا حاجة إنما كمان خلاهم يشوهوا صورته أكتر ما هي متشوهه بإنه هو اللي باع فلسطين .. المفروض إنه إتفق مع الإنجليز علي إنه حيقوم بثورة علي العثمانيين في مقابل إن الإنجليز يدوله دولة مستقلة تشمل اللي دلوقتي انت عارفهم بإنهم شبه الجزيرة العربية و العراق و سوريا .. طب و فلسطين؟ .. أنصار (حسين بن علي) بيقولوا ان هو كان قصده علي الشام اللي هي سوريا و فلسطين و لبنان .. الإنجليز بيقولوا يمين طلاق تلاتة ما حصل .. مين الصح؟ .. مين الغلط؟ .. طالما مفيش ورق يبقي مستحيل نعرف .. و هنا يجي دور سايكس – بيكو.

ميزة التعامل مع الأوروبيين إنك لو قلتلهم السلام عليكم و ردوا عليك بعليكم السلام بيمضوك عليها عشان يثبتوا للناس كلها إنهم بيحترموا حقوق المسلمين .. هي طبيعة الأوروبيين كده .. يمضيك علي أتفه حقوقك و يقول للناس شايفين انا متسامح و بدي للناس حقوقها إزاي و هو فعلياً بيفشخك في أفكارك .. لما (مارك سايكس) و (فرانسوا بيكو) قعدوا مع بعض يقسموا الشرق الأوسط هم فعلياً مكانوش فاهمين أي حاجة .. هم كانوا حقاً و صدقاً بيهبدوا هبد عابر للقارات .. لا هم بيتكلموا عربي .. ولا هم فاهمين الفرق بين السنة و الشيعة و الدروز  ميعرفوش يعني إيه أكراد.. هم مش فاهمين أي حاجه خالص .. كل اللي هم فكروا فيه إن فرنسا عايزة بترول سوريا و إنجلترا عايزة بترول العراق .. طب و فلسطين؟ .. إحنا الإتنين عايزنها فخليها مؤقتاً تحت حكم دولي لحد ما نشوفلها صرفة .. بس الميزة إنهم مضوا ورق .. الإنجليز قالوا ل(حسين بن علي) حنديك سوريا و العراق بس لما قعدوا مع الفرنساويين خدوا هم العراق و أدولهم سوريا .. هم فعلياً ضحكوا علي (حسين بن علي) بس أرجع تاني أقولك مش مهم .. المهم هو الورق .. يوم 16 مايو 1916 بتتمضي إتفاقية سايكس – بيكو عشان (حسين بن علي) ياخد أحلي خازوق في حياته بس هو يا عيني مكنش يعرف .. كل اللي هو كان بيفكر فيه إن أول طلقة في التمرد العربي ضد الحكم العثماني إتضربت يوم 10 يونيو 1916 و الغريب إن اللي ضربها كان (حسين بن علي) شخصياً من بندقيته علي معسكر حماية مكة المكرمة بتاع القوات العثمانية اللي بتحمي المدينة.

(حسين بن علي) كان له 3 عيال اللي هم (علي) و (عبدالله) و (فيصل) و كل واحد فيهم خد شوية رجاله ببنادق و بقي مطلوب منه إنه يروح في حتة .. تقدر تقول إن فعلياً (حسين) مخلفش إلا رجل واحد و إتنين عيال .. الرجل كان (فيصل) .. (فيصل) كان رجل بيفهم .. هو طموح زي أبوه بس بيفهم .. لسانه الحلو خلي رجالته عندها ولاء شبه مطلق ليه .. كونه كان قريب أوي من (تي إي لورينس) .. فاكره اللي كان ضابط المخابرات البريطاني اللي حكيت عنه من شوية .. علاقته القوية ب(لورينس) خلت إن القوات اللي تحت إيده تبقي مسلحة بشكل أقوي بكتير من القوات اللي تحت إيد إخواته .. سنتين و (فيصل) عمال يزحف بقواته شبر شبر من جوه شبه الجزيرة العربية لحد الشام .. واحدة واحدة و حلم (حسين بن علي) بيتحقق لحد ما جت سنة 1917 و كل حاجة إتكشفت .. هنا بقي هات فشارك و بيبسيك و تعالي إتسلي معايا.

سمعت عن وعد بلفور قبل كده؟ .. أكيد سمعت عنه .. اللي حصل إن وزير الخارجية البريطاني (أرثر بالفور Arthur Balfour) طلع قال من غير لا إحم ولا دستور إن حكومة بريطانيا واقفة ورا حق اليهود بإن يبقي ليهم دولة مستقلة في فلسطين .. باااااااس ..أقفلي بقي هنا عشان تفهم هو فيه إيه .. سنة 1917 الوضع في الحرب العالمية الأولي كان زي الزفت .. إنجلترا مش عارفه تكسب الحرب و الألمان فاشخين الفرنساويين .. الروس قامت عندهم الثورة البلشفية و الثوار بعد ما أطاحوا بالملكية أعلنوا إنسحاب روسيا من الحرب بعد ما كانت واقفة جنب الإنجليز .. الأمل الوحيد للإنجليز كان إن الأمريكان يخشوا الحرب بس الأمريكان رافضين .. الإنجليز سألوا نفسهم طب إيه اللي ممكن يقنع أميركا تخش الحرب؟ .. قالك بسيطة اللوبي اليهودي هناك اللي بيدي فلوس لأعضاء الكونجرس يضغطوا علي البرلمان و اللي هو كمان حيضعط علي الرئيس عشان يخلي أميركا تخش الحرب .. طب و هو اللوبي اليهودي عايز إيه في المقابل؟ .. عايزين دولة ليهم في فلسطين.

اللي الإنجليز مكانوش عارفينه إن حلم إنشاء دولة لليهود في فلسطين مكنش حلم بيحلم بيه كل اليهود أوي يعني  .. ده مش زي حلم إن مصر توصل كاس العالم .. عادي فيه ناس ملهاش في الكورة ولا يفرق معاها أوي .. انا لو يهودي أمريكاني عايش في أميركا و مبسوط إيه اللي يوديني بلد معرفش عنها حاجة؟ .. اللي الإنجليز مكانوش فاهمينه إن حلم الدولة اليهودية ده مكنش معشش غير في دماغ حد زي (حاييم وايزمان Chaim Weizmann) هو و شلته بتوع الحركة الصهيونية .. كل ده كوم و اللي عمله الروس كوم تاني.

الروس اللي هم دلوقتي بيحكمهم البلاشفة اللي هم الشيوعيين يعني كانوا زي ما تقول كده شوية غشمة .. ناس من كتر شرب الفودكا مبقوش داريانيين بالدنيا ..  حاول تتخيل إن الروس كانوا شبه شخصية الزعيم في المسرحية بتاعة (عادل إمام) لما كان بيقول الإمبريالية من الأمبرة و التوسعية من التوسع .. هم شافوا إن وعد بلفور ده ما هو إلا محاولة من الإمبريالية العالمية لبسط نفوذها في الشرق الأوسط عن طريق تمكين الحركة الصهيونية من فلسطين .. فيقوم يعملوا إيه بقي؟ ..  قاموا ناشرين كل الوثائق السرية اللي في كانت في خزنة المخابرات الروسية بما فيها نسخة من إتفاقيه سايكس – بيكو اللي الإنجليز و الفرنساويين بعتوها لقيصر روسيا علي أساس إنهم كلهم كانوا متحالفين سوا في الحرب العالمية الأولي و خلي بالك إن (حسين بن علي) مكنش يعرف إنها إتكتبت ولا يعرف عنها حاجة.

منظر الإنجليز قدام (حسين بن علي) كان زي الزفت .. هو بقي عارف إنهم كدابين ولاد كلب .. هم بقوا عارفين إنه مش حيصدق ليهم كلمة بعد كده بس فعلياً الطرفين كانوا قطعوا شوط كبير سوا و مينفعش يفضوها سيرة دلوقتي .. يوم 3 أكتوبر 1918 (فيصل) بيخش دمشق و ده خلاه يفتكر إن كده في إيده حاجة يلوي بيها دراع الإنجليز .. الوعد اللي إتقال ل(حسين بن علي) إن بعد الحرب ما تخلص إن شاء الله حنقعد مع بعضينا كلنا و نتفق مين حياخد إيه .. القعدة دي حصلت فعلاً في مؤتمر فرساي 1919 و اللي إستمر سنة كاملة و وراها مؤتمر لوزان سنة 1920 .. سنة و الدول الأوروبية المنتصرة في الحرب العالمية الأولي اللي هم إنجلترا و فرنسا و إيطاليا و معاهم أميركا بيقسموا مع بعض تورتة الدولة العثمانية .. (فيصل) حضر الإجتماع مع (تي إي لورينس) علي أمل إنه يطلع من المؤتمر و معاه الدولة اللي الإنجليز وعدوا بيها أبوه .. اللي خرج بيه (فيصل) هو إنه إتأكد من المقولة اللي انا دايماً بقولها .. المستغطي بالإستعمار عريان.

مؤتمر فرساي ده كان عشان تفهمه يعني حاول تتخيل إني جبت (حمو بيكا) و (حسن شاكوش) و (فيجو الدخلاوي) قلتلهم أقعدوا مع بعض حلوا مشكلة سد النهضة .. انا مش بقول إن الثلاثة أغبياء لا سمح الله .. الثلاثة شاطرين جداً في شغلهم اللي هم عمايل المهرجانات .. انا شخصياً فيه منكوا بيعتبروني من النخبة المثقفة و الحقيقة انا معرفش أنتوا جبتوا الثقة دي فيا منين بس ده لا يمنع حقيقة إني مبعرفش أعمل مهرجان .. بس إنك تجيب تلاتة زي دول تقولهم حلولي أزمة سد النهضة فانت حتلاقي كمية هبد و فتي عمرك ما شفتها في حياتك .. هو ده اللي حصل في فرساي .. الإنجليز و الفرنساويين و الطليان و الأمريكان ميعرفوش هي إيه الشام؟ .. إيه الفرق بين السنة و الشيعة؟ .. هم مين الأكراد؟ .. كل دي أسئلة وجودية محدش فكر إنه يسألها لنفسه .. اللي حضروا المؤتمر ده دخلوه وهم في دماغهم حاجة واحدة بس .. البترول .. هم كانوا عايزين يقسموا الشرق الأوسط بحيث كل دولة من الدول الأوروبية تاخد حتة فيها بترول .. غير كده كلها شكليات .. ده اللي شافه (فيصل) بعنيه .. ولا واحد كان عايز يتكلم معاه ..مفيش حد كان عايز يسمعه .. طب الوعد بالدولة العربية اللي الإنجليز وعدوه لأبويا؟ .. إتقاله إن شاء الله حنشوفلك حتة فاضية تحكمها .. طب والتضحيات و الناس اللي ماتت .. ده أبويا يروح فيها .. حتي لما (فيصل) تنازل و قال إنه مستعد يقبل بوجود دولة لليهود في فلسطين محدش برده سمعه .. (فيصل) ملقاش قدامه غير حل واحد .. لوي الدراع.

(فيصل) رجع سوريا و قدر يجمع القبائل العربية هناك علي إنها تقبله كملك .. صحيح في القعدة معاهم هم مرمطوا بكرامته الأرض بسبب إنه قبل علي نفسه إنه يدي لليهود دولة مستقلة في فلسطين بس الموضوع عدي .. القعدة خلصت بإن الدول اللي انت عارفها دلوقتي بإنها سوريا و الأردن و لبنان و فلسطين حتبقي مملكة واحدة عربية هي المملكة السورية و إن الملك بتاعها هو (فيصل) .. في نفس الوقت تقريباً في فرساي إتفاقية سايكس – بيكو كانت بتترسم علي الحدود عشان كل دولة تاخد نصيبها تحت ما يسمي بإفتكاسة جديدة لانج إسمها نظام الإنتداب Mandate System.

الفكرة إن مثلاً بلد زي سوريا حتبقي تحت الإنتداب الفرنسي .. يعني إيه الكلام ده؟ .. يعني حيبقي فيه حكومة محلية ماسكها مواطنين سوريين بس الحكومة دي تقدر تقول عروسة ماريونيت في إيد الإحتلال الفرنسي بحيث إن الوضع حيفضل كده لحد ما إن شاء الله يعني السوريين يبقوا جاهزين يحكموا نفسهم اللي هو حاجة مش حتحصل أصلاً بس أهم حاجة ميتقالش عليه إستعمار .. إستعمار أو Colonialism  دي كلمة وحشة .. إنما إنتداب Mandate دي كلمة سيكسي .. زي ما حضرتك شايف كده إن الخناقة بين (فيصل) في طرف و إنجلترا و فرنسا في طرف تاني بقت أمر واقع .. في مارس 1920 بيعلن تأسيس المملكة العربية السورية و إن الملك بتاعها هو (فيصل) .. بص بقي الحتة الجاية دي .. إعلان قيام المملكة قال إن أهل سوريا مستعدين يدافعوا عن بلدهم ضد أي غزو فرنساوي.

زي ما حضرتك شايف فالمواجهة بين (فيصل) و بين أوروبا بقت حتحصل حتحصل هو بس السؤال كان إمتي .. في الوقت اللي (فيصل) قاعد فيه علي عرش سوريا كان الإنجليز و الفرنساويين بيهبدوا هبد ما يعلم به إلا ربنا .. هبد مكمل معانا و فاشخ عالمنا العربي لحد دلوقتي .. إتفاقيه سايكس – بيكو بعد ما كانت في عرف المهندسين متسلمة Design دلوقتي دخلت في مرحلة Shop Drawing .. عايزك تعرف إن التقسيمة اللي انا حقولها دلوقتي كل دولة إتعملت بيها قامت بعد كده حرب بسببها و خليني أفهمك قصدي:

• فلسطين بقت تحت الإنتداب البريطاني .. و مش بس كده .. إتقال إن شاء الله يعني حيبقي فيه دولة لليهود هناك و بكده إتحطت بذرة حرب 1948 و نكسة يونيو 1967 و نصر أكتوبر 1973 و حرب لبنان و أي حرب كانت إسرائيل طرف فيها .. الأردن بقت برده تحت الإنتداب البريطاني.
• فرنسا قالت إنها عايزها سوريا و لبنان و هي اللي فصلتهم دولتين بعد ما كانوا حاجة واحدة .. مش بس كده .. فرنسا أصرت إن إنجلترا تبيع (فيصل) و تقول إن مملكته بتاعة سوريا العربية دي مش شرعية و إن سوريا تبقي من حق فرنسا .. يوم 24 يوليو 1920 القوات الفرنسية بتدخل دمشق و طردوا (فيصل) مش بس بره سوريا .. بره المنطقة العربية كلها .. فرنسا قالت إن (فيصل) يتنفي لإنجلترا و ميرجعش بلده تاني أبداً.
• و الأن ياتي دور الدولة سريعة التحضير .. العراق .. قبل سايكس بيكو مكنش فيه حاجة إسمها عراق .. كان فيه 3 ولايات عثمانية مختلفين عن بعض و لإنهم مختلفين عن بعض فكانوا مفصولين عن بعض .. الإمارات الثلاثة كانوا البصرة و دي كانت إمارة قايمة علي التجارة بإعتبار إنها بتطل علي شط العرب والخليج العربي .. بغداد و دي كانت في النص و دي إمارة كانت قايمة بشكل شبه كلي علي الزراعة و لإن ليها حدود مع إيران فكانت أقرب الولايات العراقية لإيران .. الموصل في الشمال و دي ولاية إقتصادها معتمد علي البترول و علي فكرة الموصل لسنين و سنين كان بيتبصلها علي إنها ولاية تبع سوريا بس الإنجليز قالوا إن بما إن الفرنساويين حياخدوا سوريا و سوريا فيها بترول فإحنا عايزين الموصل عشان البترول اللي فيها .. و زي ما انت بتعمل الإندومي في خمس دقايق إتولدت دولة العراق و عشان كده ميلادها جاب معاه مصايب .. أولاً الاكراد بعد ما كان ليهم إقليمهم اللي عايشين فيه إتقسموا علي 4 دول اللي هم العراق و سوريا و تركيا و إيران .. الأكراد من يوم و ليلة بقوا بيشكلوا 20% من تعداد سكان العراق الي هو العراقيين بقوا بيقولولهم أنتوا إيه اللي جابكوا هنا .. مش بس كده .. بسبب إن العراق عندها بغداد و الموصل فطبيعي إن دي دولة بتنتج كتير فشخ فعايزة يبقي ليها موانيء كتير عشان تصدر .. بس العراق ملهاش إلا ساحل ضيق علي الخليج العربي .. أومال الموانيء راحت فين؟ .. خدتها الكويت ضمن التقسيمة العقيمة بتاعة الدول العربية .. و من هنا إتحطت بذرة حرب الخليج الثانية.

الهبد و العك بتاع سايكس بيكو فتح باب جهنم في وش الانجليز و الفرنساويين وده حيخلينا نقابل الشخصيه الثالثه في الحكايه بتاعتنا .. هو شخص احنا سمعنا عنه كتير بس عمرنا ما تخيلنا ان الرجل ده يكون هو السبب في اننا عايشين في الدول العربيه بتاعتنا وهو السبب ان حدود دولنا هي اللي احنا شايفينها دلوقتي .. الرجل ده يبقي (وينستون تشرشل) .. (تشرشل) كتير مننا عارفه بانه كان رئيس وزراء انجلترا وقت الحرب العالميه الثانيه .. اللي منكوا شاف فيلم The Darkest Hour شافه و اكيد اعجب بدماغه و مش لانه بيفهم .. لا .. الرجل ده دماغه كانت ناشفه بشكل شنيع وده اللي حنشوفه دلوقتي.

الشخصية الثالثة: (وينستون تشرشل) .. الأخ اللي ورا خد حتة .. المدام اللي قدام خدت حتة:  

فعلياً الدنيا ولعت بسبب إتفاقية سايكس بيكو .. مش لإن الناس كانت ضدها … عشان الناس كانت عايزة نصيبها .. اللي حصل إن (سعد باشا  زغلول) راح يقابل المندوب السامي البريطاني في مصر و قاله لو سمحت يعني إحنا عايزين نحضر مؤتمر فرساي و نتفاوض معاكوا عشان تنسحبوا من مصر .. الإنجليز قبضوا علي (سعد زغلول) و نفوه و بدأت ثورة 1919 اللي أستشهد فيها 800 مواطن مصري .. مش دي الحريقة الوحيدة .. في الجزيرة العربية الوضع كان زي الزفت .. الشريف (حسين بن علي) مكنش هو الشخص الوحيد اللي عنده طموح .. هو طلعله خازوق إسمه (عبدالعزيز بن سعود) .. في الوقت اللي إبن (حسين بن علي) اللي هو (فيصل) بيتطرد من سوريا علي إيد الفرنساويين كان هو مش عارف يعمل إيه ضد (عبدالعزيز) اللي كان هو كمان عايز يعمل دولة مستقلة ليه برده في الجزيرة العربية برده .. محتار انا فاهم فإسمحلي أفهمك.

الإنجليز ناس بتحب يبقي معاها إستبن .. لازم فيه خطة إحتياطي في حالة إن الأولانية فشلت .. لما (حسين بن علي) عرض عليهم إنه يثور علي العثمانيين هما كانوا عاملين حسابهم إن فيه إحتمال إنه يفشل و هنا يجي دور (عبدالعزيز بن سعود) .. هو كان الإستبن .. تسألني طب هو إشمعني إختاروا (حسين بن علي) عشان يبقي هو الأساس و (عبدالعزيز) يبقي الإستبن؟ .. الفكرة كلها في الدماغ .. (حسين) رجل دقة قديمة بس مش متشدد زي الوهابيين اللي واقفين ورا (عبدالعزيز) .. عشان أقربهالك أوي تخيل إن وقت ثورة يناير مثلاً الأمريكان كانوا عايزين يخلصوا من (حسني مبارك) الله يرحمه و كان قدامهم إختيار ما بين (حازم صلاح أبو اسماعيل) و بين (حمدين صباحي) مثلاً .. (حمدين) إشتراكي صرف دماغه مبتاكلش عيش مع الرأسمالية بس أهو التعامل معاه أرحم من حد إسلامي في نظر الأمريكان متشدد .. أتمني تكون الفكرة وصلتلك .. الإتنين سواء (حسين) أو (عبدالعزيز) كانوا متصاحبين علي الإنجليز .. الإتنين بياخدوا سلاح منهم .. بس في الأواخر الإنجليز بدأوا يقولوا لنفسهم طب ما يمكن إحنا كنا غلطانين و (عبدالعزيز) كان أحسن؟ .. الإنجليز قالوا لنفسهم إن (حسين) و عياله عاملين صداع و مش عايز يسكت و عايز حقه .. طب ما يمكن (عبدالعزيز) يرضي بقليله و يبقي مريح؟

الإنجليز بقوا مش عارفين يقفوا مع مين ضد مين .. كل يوم بيعدي و رصيد (حسين) عندهم بيخلص .. فاكر دولة الأردن اللي الإنجليز عملوها و قالوا عايزينها؟ .. بمجرد ما الفرنساويين طردوا (فيصل) من سوريا فأخوه (عبدالله) خد رجالته وراح خد الأردن وضع يد من الإنجليز .. فاكر فلسطين؟ طب فاكر لما قلت إن وفق إتفاقية سايكس بيكو الإنجليز قالوا إن اليهود حيبقي ليهم دولة مستقلة؟ .. أهو تقوم أعمال عنف في القدس ضد اليهود لإن العرب شافوا إن فيه مؤامرة بتحصل ضدهم .. وسط كل الهم ده تقوم الحرب الأهلية التركية .. انت فاكر إن المصايب خلصت؟ .. العراق هي كمان دخلت في تمرد مفتوح ضد الإنجليز  أستشهد فيه 10,000 مواطن عراقي لحد ما التمرد إنتهي بسبب القصف الجوي للطيارات الإنجليزية فوق المدن العراقية .. الدنيا باظت باااااظت خااااااالص.

هنا يجي دور (تشرشل) .. الرجل ده إتعين وزير الإستعمار و أيوه ده كان منصب في الحكومة الإنجليزية زمان و بدأ يشوف هو حيعمل إيه في المصايب دي كلها .. (تشرشل) كان عارف إنه لازم يبقي تحت إيده فريق أولاً فاهم هو بيعمل إيه و ثانياً الناس كلها عارفاه و فيهم ناس مشاهير عشان لما يقولوا كلمة الناس تسمع كلامهم من غير جدال .. هو إعتمد علي واحدة ست إسمها (جيرترود بيل Gertrude Bell) و دي تبقي عالمة أثار و دي واحدة من الناس اللي فعلياً فاهمة يعني إيه شرق أوسط و يعني إيه إسلام  .. و لإنها واحدة ست و إحتمال كبير محدش ياخد كلامها جد ف(تشرشل) كان محتاج نجم الشباك و اللي تجسد في (تي إي لورينس) اللي وقتها كانت الناس كلها عارفاه بإسم (لورينس العرب) .. اللي حصل إن كان فيه فريق من المخرجين كانوا موجودين وقت ما (لورينس) كان بيساعد (حسين بن علي) و عياله في ثورتهم ضد العثمانيين و الفريق ده عمل فيلم تسجيلي سموه الحملة الصليبية الأخيرة The Last Crusade  .. خدت بالك من الإسم .. المهم إنهم طلعوا فيه (لورينس) زي ما تقول كده ميكس بين (جيمس بوند) و (وليام والاس) .. الناس صدقت و (لورينس) نفسه لعب الدور صح مع إن دوره في الثورة العربية علي العثمانيين مكنش عبقري أوي يعني.

المهم .. يوم 12 مارس 1921 (تشرشل) بيجمع الفريق بتاعه و كانوا 40 بني أدم من ضمنهم (جيرترود بيل) و (لورينس) في فندق من فنادق القاهرة و بقي مطلوب منهم يحلوا المصايب دي كلها .. 18 يوم و الفريق ده شغال لحد ما في الأخر بقوا جاهزين يعرضوا الحلول بتاعتهم علي (تشرشل):

• فلسطين حتفضل تحت الإنتداب البريطاني .. حيتقال إن إنجلترا حترعي إن يتعمل وطن لليهود بس ده مش دولة يعني إنجلترا مش حتقسم فلسطين دولتين و حتبقي دولة واحدة عايش فيها يهود كتير.
• علي عكس مطالب الجمعية الصهيونية فالأردن حتنفصل عن فلسطين و حتبقي دولة مستقلة و برده تحت الإنتداب البريطاني بس اللي حيحكمها يبقي (عبدالله بن حسين بن علي) اللي هو أساساً زي ما قتلك خدها وضع يد خلاص.
• فرنسا حتاخد سوريا و لبنان و أي إختلافات عقائدية أو عرقية بين الناس اللي عايشة هناك حتبقي مشكلة الفرنساويين و هم يبقوا يحلوها بطريقتهم.
• الشريف (حسين بن علي) حيبقي هو ملك الحجاز يعني الشريط اللي بيطل علي البحر الأحمر بما فيها مكة المكرمة و المدينة المنورة بس ده بشرط إنه يوافق يمضي علي إتفاقية سايكس بيكو و إبنه (علي) حيكون هو ولي العهد بتاعه ..  (عبدالعزيز بن سعود) حيتم الإعتراف بيه كملك للجزيرة العربية اللي هي السعودية كلها من غير الحجاز.
• العراق حتحكمها حكومة محلية و حيبقي من حق العراق إنها تأسس جيش مستقل عن الإحتلال الإنجلزي و اللي حيحكم العراق هو (فيصل بن حسين بن علي)  كمكافاة ليه و تعويض علي لما الإنجليز باعوه و الفرنساويين طردوه .. العراق زي ما قلتلك كانت دولة سريعة التحضير لدرجة إن مكنش ليها علم ولا نشيد وطني و في حفل إعلان (فيصل) ملك إتعزف النشيد الوطني البريطاني.

يوم 31 مارس 1921 (تشرشل) بيزور القدس بعد ما أعلن في الجرايد الخطة بتاعته و اللي حطها الأربعين بني أدم و اللي هو سماهم بنفسه بعد كده الأربعين حرامي و دي حقيقة علي فكرة .. (تشرشل) كان رجل قليش قديم و بيحب القلشة الحلوة  .. هو كان فاكر إن خطته دي حتخليه زي (علي بابا) اللي بشطارته عرف يجيب التايهة .. هو كان فاكر إنه هو أبو العريف و اللي الأربعين حرامي بتوعه حيعرفوا يحلوا مشكلة سايكس – بيكو .. الرجل راح يزور القدس و هو متخيل إن الناس حتستقبله كأنه هو أحسن إختراع حصل للعرب بعد إختراع الكنافة النابلسية .. هو كان متخيل إن اللي عمله الأربعين حرامي بتوعه إنهم أدوا لكل الأطراف اللي هم عايزينه .. كان متخيل إن أهل القدس حيستقبلوه بالورود بس لقي إن الناس حتاكله .. هو بدأ يحس إن فيه مشكلة  .. أكيد فيه حاجة هو معملش حسابها و الحقيقه إن اه فيه .. المشكلة إن (تشرشل) و الأربعين حرامي بتوعه تعاملوا مع المشكلة كأنها مشكلة فلوس بس .. كل طرف ياخد حتة يفرح بيها .. هو مكنش عامل حسابه إن المشكلة عائلية و عقائدية و داخل فيها إعتبارات كتير فشخ.

خد عندك فلسطين .. سواء الفلسطينيين أو الصهاينة كانوا شايفين إن مصلحتهم إن هم و الأردن يفضلوا دولة واحدة علي أساس إن الأردن فيها أنهار و فيها مياه عذبة فحيبقي ليهم فرصة أحسن إنهم يعيشوا حياة أفضل .. في نفس الوقت الفلسطينيين كانوا متضايقين إن (تشرشل) قال إن وعد بلفور لازم يتنفذ و إن الصهاينة حيبقي ليهم دولتهم .. خطة (تشرشل) قالت إن فلسطين حيبقي فيه حتة منها حتتعمل فيها مستطونات لليهود .. محدش قال إن حيبقي لليهود دولة مستقلة .. ده مكنش في خطة (تشرشل) الحق يتقال .. هو كان متخيل إنه لما يدي اليهود حتة خرابة مقطوعة يقوموا هم عشان انت عارف اليهود شاطرين في البيزنس يستوردوا تكنولوجيا ري متقدمة من بره و يبدأوا يعملوا طفرة إقتصادية في فلسطين و الفلوس تجري في إيد العرب و اليهود و يعيشوا مع بعض زي الدقيق و السمنة في العجين .. حقاً و صدقاً الرجل ده كان بيفكر التفكير الطفولي البريء ده .. طبعاً مشكلة فلسطين فرقعت في وشنا كلنا و إن شاء الله نحكي بالتفصيل في مقالة تانية إزاي دولة أسرائيل أعلنت.

دي كانت فلسطين .. خد عندك شبه الجزيرة العربية .. (عبدالعزيز بن سعود) شاف إن الإنجليز حاوطوه من كل حتة ب(حسين) و عياله و ده خلاه مقداموش حل غير إنه يهاجم الأردن اللي كانت تحت إيد (عبدالله) و كمان هاجم مملكة الحجاز بتاعة (حسين) و إبنه (علي) .. إذا كان الإنجليز لحقوا (عبدالله) ف(عبدالعزيز) سنة 1925 أنهي وجود مملكة الحجاز لما دخل مكة المكرمة و المدينة المنورة و سنة 1934 أعلن تأسيس المملكة العربية السعودية.

الدنيا فضلت تغلي علي نار هادية .. يمكن جائحة الإنفلونزا الإسبانية سنة 1918 و وراها الحرب العالمية الثانية خلت الدنيا تهدي مؤقتاً بس بمجرد ما الحرب العالمية الثانية خلصت النار ولعت تاني .. الأردن خدت إستقلالها من بريطانيا سنة 1946 .. حرب فلسطين قامت سنة 1948 .. سنة 1951 كان الملك (عبدالله) أغتيل و هو رايح يصلي الجمعة في القدس علي إيد واحد فلسطيني كان متخيل إن (عبدالله) طابخها مع الإنجليز عشان يعلنوا قيام دولة إسرائيل .. سنة 1958 حصل إنقلاب عسكري علي الملكية في العراق و يمكن برده في مقالة تانية بعد كده ممكن نمسك تاريخ الإنقلابات العسكرية في العراق لإنه فعلياً مسلي جداً.

انا كده خلصت (بفتح الصاد) و خلصت (بكسر الصاد) .. انا عارف كويس إني مغطتش كل تفاصيل الفترة المهمة دي من تاريخنا كعرب .. عارف كويس إن تاريخ إعلان دولة إسرائيل لوحده محتاج سلسلة مقالات بس يمكن الهدف من المقالة دي هي إن انا أبني عليها عشان بعد كده نقدر نفتح كلام في كذا سكة .. من المؤسف حقيقي إن الفترة دي من تاريخنا محدش بيهتم بيها في مناهج التاريخ بتاعتنا .. فترة صعبة كلها قيل و قال و نظريات مؤامرة بس انا حابب أختم كلامي بإني أتكلم عن اللي انا إستفدته الحقيقة.

اللي انا إستفدته إن فعلياً زي ما عم (ضياء) قال .. كله رايح .. انا مش بهزر انا بتكلم جد .. خد عندك (حسين بن علي) مثلاً .. انت تأمرت و قررت تخون الدولة العثمانية و حطيت إيدك في إيد الأجانب علي أمل إنهم يدولك حتة من التورتة و انت و عيالك خدتوا أحلي خازوق في حياتكوا .. تفتكر فيه كام واحد مات في قوات (حسين بن علي) و عياله؟ .. الناس دي ماتت ليه؟ .. الناس دي ماتت علي الفاضي .. دمها راح هدر .. عشان كده بقولك كله رايح .. متسمعش كلام السياسيين علي إنه كلام نازل من السما .. انا متؤكد إن (حسين بن علي) و مش بس هو (عبدالعزيز بن سعود) هو كمان ملوا دماغ رجالتهم بإن ثورتهم علي العثمانيين هي بداية حريتهم و أديك شايف .. متشلش سلاح قصاد مسلم زيك عشان سياسي هو غالباً مش فاهم هو بيعمل إيه و مش مستوعب نتايج أفعاله و بيقولك إقتل أخوك المسلم عشان خاطر حريتك أو أمنك القومي .. متصدقش .. أوعي .. صدقني لما تقف قدام ربنا و يسألك انت ليه قتلت أخوك المسلم مينفعش تقوله أصل الحاكم بتاعي قالي إحنا بنحارب عشان خاطر دولتنا المستقلة .. الدول اللي بتقوم علي دم المسلمين غالباً بتكون نهايتها سودا حتي إسأل (حسين بن علي) الله يرحمه.

المصادر:

فيديو بعنوان Dividing the Middle East – The Great Loot – Extra History – #1 وده اللينك بتاعه علي YouTube:
https://www.youtube.com/watch?v=f2L6L37GGAY&t=180s

فيديو بعنوان Diving the Middle East – The Arab Revolt – Extra History – #2 وده اللينك بتاعه علي YouTube:
https://www.youtube.com/watch?v=jJCq5p8HCZo

فيديو بعنوان Dividing the Middle East – Drawing Lines – Extra History – #3 وده اللينك بتاعه علي YouTube:
https://www.youtube.com/watch?v=0VoV_RQZDls

فيديو بعنوان Dividing the Middle East – Three Kings – Extra History – #4 وده اللينك بتاعه علي YouTube:
https://www.youtube.com/watch?v=WU9TrSOnXkU

فيديو بعنوان Dividing the Middle East – Setting the Board – Extra History – #5 وده اللينك بتاعه علي YouTube:
https://www.youtube.com/watch?v=1zZ1A8sphjA&t=456s