لينك التسجيل الصوتي علي ساوند كلاود:
https://on.soundcloud.com/tjBaW
لو أنا جيت سألتك تعرف إيه عن أسبرطة Sparta؟ يا تري إجابتك حتكون إيه؟ .. هل حتكون والله أنا معرفش عنهم غير اللي شفته في فيلم 300؟ .. هل حتبقي إنهم ناس عامله فورمة جامدة زحليقة و طول النهار مش لابسين غير بوكسرات و لما الملك يزعق فيهم يقولهم يا رجاله كلهم بيردوا عليه بصوت واحد أهو أهو؟ .. فيلم 300 لما نزل عمل غسيل مخ لينا كلنا .. ده فيلم مبني علي سلسلة قصص مصورة زي رجل المستحيل و ما وراء الطبيعة كده كتبها واحد إسمه (فرانك ميلر Frank Miller) بس لزقت في دماغنا بسبب الفيلم اللي أخرجه (زاك سنايدر Zack Snyder) .. فيه كام جيم تعرفه سمي نفسه Sparta؟ فيه كام مطعم إتسمي بالإسم ده؟ .. كلهم تلاقيهم حاطين لوجو الخوذة المشهورة أوي اللي كان بيلبسها عساكر سبارطة و اللي إسمها بالمناسبة خوذة كورينث Corinthian Helmet و إتسمت بكده علي إسم واحدة من المدن اليونانية إسمها كورينث Corinth .. فيلم 300 حط في دماغنا فكرة إن جنود أسبرطة دول جنود محصلوش قبل كده في التاريخ .. دول ناس مستعدين يموتوا لحد أخر واحد فيهم دفاعاً عن بلدهم .. ناس مُدربه علي أعلي مستوي .. المشكله إن كل ده هبد هبد هبد .. عشان ميجيلكش صدمة نفسية فخليني أفهمك الموضوع براحه .. ممكن نفهم هو إيه اللي صح؟ و إيه اللي غلط في اللي إتقال في فيلم 300؟
اليونان زمان كانت حضارة كبيرة أوي بتتسمي الحضارة الإغريقية .. فكك من إسمها .. إذا كانت مثلاً الحضارة المصرية القديمة كانت قايمة علي فكرة إن فيه حاجة إسمها فرعون و فرعون ده هو الحاكم اللي بيحكم مصر كلها بحيث إن زي ما بتسمع دلوقتي عن حاجة إسمها الشرعية اللي هي المبرر اللي عشانه أهل البلد بيسيبوا حد معين يحكم .. فالشرعية اللي فرعون بيحكم بيها إن والله هو ده اللي موحد مصر ومن غيره المولد ده كله بيتفض .. اليونان كانت مختلفة شوية .. خليني أبسطهالك بتشبيه من الأفلام برده .. فرعون مصر ده كان شبه (ثانوس Thanos) كده اللي هو بني أدم جامد تنين و بيحكم لوحده و كلمته بتمشي علي الكل من شعبه و الناس مستعدة تعمل المستحيل عشان ترضيه .. اليونان كانت شبه الAvengers إن كل مدينة عبارة عن شخصية ليها سلسلة الأفلام المستقلة بتاعتها بس وقت اللزوم بيتجمعوا كلهم في فيلم واحد .. النظام ده كان بيتسمي City State أو المدينة الدولة .. يعني تلاقي إن مدينة زي أسبرطة مثلاً بتحكم نفسها و ليها جيشها و ليها الملك بتاعها عادي جداً زيها زي أثينا و زي كورينث و زي مقدونيا بس المدن دي كلها عايشه في اليونان فلو اليونان إتعرضت لغزو خارجي فالمدن دي كلها بتتحالف مع بعضها لصد التهديد ده وبعد كده إن شاء الله يرجعوا تاني يتخانقوا ويقطعوا هدوم بعض عادي جداً.
كل مدينة أو City State من مدن اليونان كانت ماشيه بدماغ .. زي ما قلتلك حاول تبصلهم علي إنهم شخصيات Avengers يعني مثلاً حاول تتخيل إن أسبرطة هي (ثور Thor) .. الأساطير بتقول إن اللي بني أسبرطة كان رجل برنس في نفسه إسمه (ليكورجوس Lycurgus) .. الرجل ده كان تقريباً مريض نفسي لإنه عمل نظام لطيف أوي سماه أجوجي Agoge واللي يحسسك إنه شخصية من شخصيات البوكيمون بس الأجوجي دي بمنتهي البساطة إني بجيب الطفل وهو لسه عنده 7 سنين اطلع ميتينه تدريب عسكري عشان لما يكبر يبقي محارب مجاش زيه .. رؤية (ليكورجوس) اللي بني بيها مدينته هو إنه كان عايز مدينة مفيهاش فقراء و أغنياء .. هو كان عايز الناس تاكل و تشرب مع بعضها وده النظام اللي هو سماه سيسيتيا Syssitia و تعمل كل حاجة مع بعضها بحيث مع الوقت أهل البلد كلهم يحسوا إنهم عيلة واحدة.
تقدر تقول إن (ليكورجوس) عملنا النسخة الأولانية خالص من الإشتراكية .. في نفس الوقت يخلق جواهم فكرة رفض الجبن .. لو حصلت حرب وإنت خفت أو هربت من خدمة وطنك فإنت كأنك حكمت علي نفسك إنك تسيب البلد كلها و تمشي لإن محدش حيعبرك و أهل البلد حيشوفوك بني أدم متستحقش تعيش .. حط كل ده جنب بعضه تلاقي نفسك قدام مدينة قدمت للعالم كله قوات مشاة علي أعلي مستوي من التدريب و الكفاءة .. بس ده مش معناه إنهم مش بني أدمين مبيغلطوش و مبيخافوش و الأهم إنهم بني أدمين بيتداس علي وشهم في معارك عادي جداً زيهم زي أي حد .. إذا كان النموذج اللي (ليكورجوس) حطه كان عايز شعب زي ما قلتلك أقرب للإشتراكية دلوقتي يعني شعب أخر حاجة يفكر فيها هي الفلوس إذا بيهم كذا مرة في تاريخهم يقبلوا علي نفسهم رشوة حتي من أعداء لليونان زي الفرس .. خليني النهاردة أحاول أنسفلك الفكرة اللي إتزرعت في دماغك عن سبارطة بإني أخد3 أمثلة مشهورين أوي .. المثال الأول هو معركة ثيرموبولي Thermopylae اللي إتحكت أحداثها في فيلم 300 .. المثال الثاني هو الحرب الأهلية اليونانية أو الحرب البيلوبونيسية Peloponnesian War اللي كانت بين سبارطة و أثينا .. المثال التالت هو معركة ليوكترا Battle of Leuctra واللي كانت نهاية مدينة أسبرطة.
هو إيه اللي حصل بالضبط في معركة ثيرموبولي؟
زي ما فيلم 300 قال .. سنة 480 قبل الميلاد فيه 300 عسكري من صفوة مقاتلي أسبرطة اللي كانوا بيتسموا سبارطاي-طاي هوبليتاي Spartaitai Hoplitai .. برده فكك من الإسم .. قدروا إنهم يصدوا تقدم جيش فارسي مكون من 120,000 مقاتل .. الفيلم هبد 3 هبدات من العيار التقيل أوي الحقيقة :
- الأولانية إنه قالك الجيش الفارسي كان قوامه مليون مقاتل مع إن الحقيقة إنهم كانوا 120,000 بس .. هم صحيح أكتر بكتير من 300 بس في نفس الوقت أقل بكتير من المليون اللي بتتقال.
- الهبدة التانية إنه حسسك إن ال300 مقاتل بتوع أسبرطة بس هم اللي كانوا بيحاربوا مع إن الحقيقة إن ال300 مقاتل دول كانوا بيقودوا مجموعة وصلت 7000 مقاتل من مدن يونانية تانية و فوقهم كمان 300 مقاتل تانيين بيتسموا هيلوتس Helots ودول تقدر تسميهم عساكر الخدمة.
- الهبدة الثالثة إنه قالك إن ال300 مقاتل بتوع أسبرطة ماتوا عشان إحنا نعيش .. هو قالك إنهم ماتوا عشان يدوا فرصة لباقي مدن اليونان إنها تصد الزحف الفارسي مع إن الحقيقة مش كده .. الحقيقة إن المعركة دي كل اللي هي عملته إنها عطلت الفرس 3 أيام بس في الأخر وصلوا لحد أثينا و حرقوها كلها .. دي نقطة .. نقطة تانية وهي إن خساير أسبرطة مكنتش ضخمة زي ما الفيلم حسسك .. صحيح إن خساير أسبرطة وصلت 298 مقاتل من أصل 300 وده بيشكل يدوبك 4% من إجمالي تعداد القوات المسلحة بتاعة أسبرطة .. مدينة تانية زي طيبة مثلاً ودي كانت متحالفة مع أسبرطة خسرت 700 مقاتل ودول يبقوا جيل كامل من الشباب و تقدر تقول إن معركة واحدة خلصت علي كل أفراد القوات المسلحه بتاعة دولة .. يبقي مين خسايره كانت أكتر؟
تطلع إيه بقي الحرب الأهلية اليونانية أو الحرب البيلوبونيسية Peloponnesian War دي؟
دي حرب قعدت 27 سنة و بدايتها هي إن يُحكي أن جه واحد إسمه (كليومينيس الأول Cleomenes I) بقي ملك أسبرطة .. أهلاً و سهلاً يا سيدي .. في الوقت ده كان بيحكم أثينا واحد تاني إسمه (هيبياس Hippias) .. أهلاً و سهلاً برده .. الفكرة إن (هيبياس) ده كان ديكتاتور بيحكم بلد اللي هي أثينا هي اللي طلعلتنا مفهوم الديموقراطية .. حاول تتخيله إن جه واحد زي (صدام حسين) الله يرحمه كده حكم بلد زي أميركا .. المهم إن الأخ (كليومينيس الاول) طلع في يوم قال إنه شاف رؤيا وهو نايم إنه بيدخل أثينا فكان ده في رأيه سبب كافي جداً إنه يعلن الحرب علي جارته أثينا .. المشكلة إن أثينا في الوقت ده كانت من أوائل الناس اللي بدأت تطبق فكرة إن القوات المسلحة تتقسم لأفرع رئيسية بحيث إن في الحروب الأفرع الرئيسية دي بتشتغل مع بعضها .. زمان كانت الجيوش عبارة عن قوات برية بس .. أثينا بدأت تدخل فكرة إن الجيش يبقي قوات برية و خيالة و بتساعدهم قوات بحرية كمان .. الفكرة دي عملت نقلة كبيرة أوي في إزاي البشر كانوا بيبصوا للحروب بس في نفس الوقت ناس تانية زي أسبرطة دماغهم كانت ناشفة أوي ومش عايزين يقبلوا فكرة إن ممكن قوات مسلحة تضم قوات خيالة.
المهم .. سلاح الفرسان بتاع أثينا مش حكون ببالغ لو قلت إنه داس علي وش جيش أسبرطة لدرجة إن قائد قوات أسبرطة وكان إسمه (أنكيمولوس Anchimolus) مات في المعارك .. الدنيا مخلصتش لحد كده .. شوية و (كليومينيس الأول) رجع تاني يهاجم أثينا بجيش أكبر وقدر فعلاً إنه يدخل المدينة بس هو لقي نفسه لبس خازوق محترم الحقيقة .. الحرب الأولانية أضعفت أوي من قوة (هيبياس) و اللي بفكرك إنه ديكتاتور علي شعب إخترع مفهوم الديموقراطية فالشعب قام عليه و اللي بقي بيحكم أثينا هي حكومة منتخبة .. لما (كليومينيس الأول) دخل أثينا شال الحكومة المنتخبة دي و حط مكانها واحد صاحبه من أثينا إسمه (إيساجوراس Isagoras) يعني الأثينيين شافوا إن (إيساجوراس) ده خاين و عميل هو و الأثينيين اللي باعوا بلدهم و وقفوا وراه .. بس طبعاً الدنيا فرقعت في وشه .. قامت ثورة في أثينا وكان (كليومينيس الأول) في المدينة .. الثوار حاصروا (كليومينيس الأول) و رجالته في معبد الأكروبولوس و بعد مفاوضات إتفقوا علي إن أهل أثينا يسيبوه يروح بلده أسبرطة بس (إيساجوراس) و رجالته إتحكم عليهم بالإعدام.
لما (كليومينيس الأول) رجع سبارطه مش يتقي الله و يتهد .. لا ده لم حلفاءه و حالف مية يمين ليخلي أثينا تدفع الثمن غالي .. في ليلة الزحف علي أثينا قررت مدينة كورينث و اللي كانت واحدة من المدن اللي متحالفة مع أسبرطة إنها تنسحب من التحالف بحجة إنهم فجأة شافوا إن أثينا معملتش حاجة غلط و طبعاً إنسحاب كورينث المفاجيء ده عمل إنقسام جوه الجيش الإسبارطي و اللي بسببه الغزو كله إتلغي .. إنت متخيل يعني إيه بلد كانت مستعدة إنها بكره الصبح حتبعت جيش عشان تغزو به دولة تانية و يوميها بليل تلغي الموضوع .. مش سفرية للساحل هي .. سنة 425 قبل الميلاد حصلت المعركة اللي هزت سمعة أسبرطة وسط اليونان و المعركة دي هي بيلوس و سفيتكريا Pylos & Sphacteria .. في المعركة دي 120 مقاتل من صفوة محاربي أسبرطة اللي زي ما قلت إسمهم سبارطا-طاي هوبلي-طاي Spartaitai Hoplitai و دول اللي إنت شفتهم في فيلم 300 إتحاصروا علي جزيرة و الأثينيين إستلموهم بالرماح من علي أسطح السفن .. المشكلة إن المحاربين بتوع أسبرطة إستسلموا وهي دي المصيبة .. فجأة الكلام بقي الله الله الله طب ما أنتوا بتستسلموا عادي أهو أومال إيه بقي يا رجاله و أهو أهو أهو اللي بتصدعونا بيها دي.
سنة 406 قبل الميلاد حصلت المعركة البحرية قبل الأخيرة في الحرب بين أسبرطة و أثينا اللي هي معركة أرجينوز Arginusae واللي الأثينيين كسبوها بفرق كبير لدرجة إن أسبرطة طلبت الصلح .. صحيح أسبرطة كسبت الحرب الأهلية بس كان إيه الثمن؟ .. أسبرطة كسبت الحرب لما إرتكبت الخيانة العظمي في حق اليونان لما تحالفت مع ملك الفرس (داريوس الثاني Darius II) و الرجل بعتلهم فلوس و مستشارين عسكريين عشان أسبرطة تقدر أخيراً بعد 7 هزايم بحرية متتالية إنها تكسب القوات البحرية الأثينية في معركة أيجوزبوتامي Battle of Aegospotami سنة 405 قبل الميلاد .. السنة اللي وراها علي طول شوية العساكر اللي كانوا فاضلين من أثينا إتجمعوا مع بعض و إدوا أسبرطة علي قفاها في معركة إسمها فيلي و منوشيا Phyle & Munichia .. سنة 403 قبل الميلاد أسبرطة خدت حقها تاني بمعركة بيراوس Battle of Piraeus بس بعد سنين من الحرب و إستنزاف الموارد بشكل كبير أوي خصوصاً علي مدينة أسبرطة فالطرفين لجأوا للصلح .. 27 سنة بيحاربوا في بعض عشان في الأخر يقولوا لبعض الصلح خير .. طب ما كان من الأول يا ولاد التيييييت.
إزاي مدينة أسبرطة إنتهت؟
سنة 371 قبل الميلاد كانت نهاية أسبرطة باللي حصل في معركة ليوكترا .. اللي حصل إن أسبرطة إتخانقت مع مدينة طيبة و قررت أسبرطة إنها تعلم طيبة الأدب فبعتتلها جيش أكبر بحوالي الضعف من قوات طيبة بس هنا تفتيح المخ أثبت إنه بيجيب نتيجة و نشفان الدماغ بيودي في داهية .. اللي كان بيقود قوات طيبة واحد إسمه (أبامينوناندس Epaminondas) وده بني أدم دماغه شغالة شوية .. دلوقتي فكر الناس بتوع أسبرطة اللي مبيتغيرش إن قوات الصفوة بتاعتهم يرصوها يمين الجيش فهو عمل حاجة لطيفة أوي .. هو رص المشاة بتوعه كلهم شمال جيشه بحيث يقفوا قدام صفوة أسبرطة و يوقفوهم في حين إنه خط الخيالة بتوعه علي اليمين بحيث يلفوا من ورا ظهر صفوة قوات أسبرطة .. سهلة و بسيطة خالص و مفقوسة يعني بس جابت نتيجة و قوات أسبرطة تقريباً مفضلش منهم حد بما فيهم الملك (كليومبروتس الأول Cleombrotus I) وحتي قوات الإحتياط لما شافت ده بعنيها جريت و إنسحبت.
أظن اللي أنا عايز أوصله ليك إن أسبرطة مكانتش الحاجة الوااااو اللي إنت متخيلها .. محدش قال إنهم كانوا جبناء ولا إنهم مبيعرفوش يحاربوا .. بالعكس هم كانوا أشرس قوات برية في تاريخ الحروب القديمة بس يمكن رفضهم أي فكر جديد في الحروب و دماغهم الناشفة كلفهم كتير أوي .. دي ناس مكنش عندهم أي مشكلة إنهم يتحالفوا مع الفرس ضد أهل بلدهم .. عايز تتفرج علي 300 و تعجب بتصويره و أداء الممثلين اللي فيه براحتك بس بلاش تاخد الأحداث بتاعة الفيلم كحقايق مسلم بيها.
المصدر:
مقالة بعنوان The Myth of Sparta-Were Ancient Greece’s Greatest Warriors Overrated? .. نشرت في موقع Military History Now وده لينك المقالة الأصلية:
https://militaryhistorynow.com/2019/03/03/the-myth-of-sparta-were-ancient-greeces-greatest-warriors-really-all-that-great/
