الفصل الرابع .. حرب الخليج الأولي:
كده احنا عارفين الاتي .. الشاه حليف أمريكا راح في داهية .. (الخوميني) اللي الأمريكان كانوا بيحموه وهو في فرنسا وهو في العراق وهم اللي طلقوه علي إيران بقي هو اللي في ايده كل حاجة .. طبيعي إن الشاه اللي كان هربان في مصر بعد ما الرئيس (محمد أنور السادات) الله يرحمه عطاله حق اللجوء السياسي كان بيقول للأمريكان يا ناكر خيري بكره تعرف زمني من زمن غيري .. في الوقت ده الأمريكان كانوا بيلعبوا في دماغ (صدام) إنه يضرب إيران والحقيقة هم كانوا بيلعبوا في دماغه وبيقنعوه بكذا نقطة:
- واحد إن مع سيطرة الإسلاميين علي السلطة في إيران فهم عملوا حاجة غريبة جداً إنهم مسكوا المؤسسة العسكرية وأي حد من أول رتبة عميد وانت طالع اتعدم .. خدامك انا والعربية إن مش كل جنرالات المؤسسة العسكرية الإيرانية كانوا عقليات عسكرية فذة وإن كتير منهم بهايم وإن كتير منهم وصلوا للمناصب دي بالواسطة وبالتطبيل بس المؤسسة العسكرية زيها زي أي مكان شغل في الدنيا قايم علي كتاف الأقلية اللي بتوصل لمناصبها بتعبها وشقاها وشطارتها .. لما القيادة العليا للمؤسسة العسكرية اتعدمت عاطل علي باطل فاتاخد في الرجلين الكام جنرال اللي في وقت الجد كانوا قادرين علي انهم ينقذوا البلد ودي كانت الفكرة اللي اتباعت ل(صدام) .. لما تضرب إيران حتلاقي نفسك بتحارب بلد قائد القوات البحرية تباعها كان ضابط برتبة نقيب.
- ثاني نقطة ودي انا قلتها في الاول إن غالبية بترول إيران موجود في منظقة خوزستان اللي هي أولاً المنطقة اللي عايش فيها أغلبية بتتكلم عربي وكمان عايشين علي الحدود الإيرانية العراقية .. اذن الحرب اللي العراق حتعلنها علي إيران مش هدفها علي الاقل قدام الناس ان العراق تحتل إيران .. لا خالص .. الحرب هدفها تحرير الأقلية العربية اللي بتتبع مذهب أهل السنة والجماعة اللي عايشة في إيران من قمع الأغلبية الفارسية الشيعية.
فشل القوات العراقية خلال الشهور الأولانية من الحرب انها تسيطر علي خوزستان كان السبب إن الحرب تتمط من ضربة خاطفة كان متخططلها يبقي اخرها 6 شهور لحرب مكملة معانا 8 سنين ولا اكنها لحمة جملي مش عايزه تستوي ومن أول ما بقي واضح إن الهدف من الحرب وهو إن العراق تسيطر علي حقول النفط في خوزستان بقي مستحيل يتحقق فقرر العراقيين تدمير حقول النفط دي ولمحوا كذا مرة لرغبتهم لوقف اطلاق النار وتفعيل هدنة مع ايران .. الإيرانيين علي الناحية الثانية كان راكبهم العند إن لا تراجع ولا استسلام قبل سقوط بغداد .. يمكن اللي كان مقوي قلب الإيرانيين فكرة إن إيران كمساحة وكعدد سكان أكبر من العراق 3 أضعاف تقريباً فهم بحسبة رجل لرجل يقدروا يهزموا العراق بس المشكلة إن تسليح القوات المسلحة العراقية كان أعلي بكتيير بسبب دعم أمريكا .. دعم أمريكا اللي بقي مع كل سنة بتعدي من الحرب عمال يزيد لحد ما وصلنا إن الأمريكان عطوا العراقيين أسلحة كيماوية واللي العراقيين استخدموها ضد الإيرانيين لحد ما جت سنة 1987 وحصلت كارثة قرية حلبجة.
اللي حصل إن يوم 16 مارس 1988 المخابرات الأمريكية عطت للعراقيين صور بالاقمار الصناعية لدخول القوات الإيرانية لقرية حلبجة الكردية .. العراقيين أول ما استلموا الصور ومن غير ما يتاكدوا من صحتها حتي بعتوا طيارات هليكوبتر ضربت صواريخ شايله اسلحة كيماوية يوميها بليل .. تاني يوم الصبح صور الأقمار الصناعية ورت الناس كلها حجم الكارثة اللي حصلت .. الليلة اللي قبلها القوات الإيرانية انسحبت وأهل البلد رجعوا بيوتهم تاني بس طبعا ً ده حصل من غير ما حد ياخد باله أو يراقب اللي بيحصل لإن زي ما قلتلك العراقيين خدوا كلام الأمريكان علي انه قران نازل من السما وضربوا القرية عشان تبقي واحدة من أبشع جرايم الحرب اللي حصلت في تاريخ البني أدمين .. كارثة حلبجة راح فيها 1700 مواطن عراقي كردي كانت فضيحة كانت ممكن تودي حكومة الرئيس الأمريكاني وقتها (رونالد ريجان) في ستين داهية لإنه هو اللي بعت السلاح الكيماوي ده للعراق وعشان يكفي علي الخبر ماجور بعت مبعوثته الشخصية للشرق الأوسط (جين كيركباتريك) اللي كانت خطتها إنها تلوم الإيرانيين علي اللي حصل علي أساس إن الضربة الكيماوية جت منهم ومش من العراقيين مع إن الإيرانيين مكنش عندهم أصلاً أسلحة كيماوية في الوقت ده .. الغريبة إن الحرب خلصت من غير أي سبب منطقي زي ما هي قامت من غير سبب منطقي .. غلطة كارثية من ضابط دفاع جوي أمريكاني خلته يضرب صاروخ أرض- جو علي طيارة مدنية إيرانية وهي طالعة من مطار طهران وفجأة الإيرانيين طلعوا قالوا أحنا معندناش مشكلة نوافق علي وقف اطلاق نار اللي هو نفس مقترح وقف اطلاق النار اللي (صدام) عرضه ليهم من 7 سنين.
حرب الخليج الأولي كانت مصيبة وحلت فوق دماغ العراق وإيران سوا .. خساير البلدين في الأرواح والمعدات مكنش طبيعية ومنطقية وكان ممكن تبقي أقل من كده بكتير لو كان اللي بيحكموا البلدين سواء (صدام) أو (الخوميني) كان عندهم ذرة احساس بالمسئولية أو خوف من غضب ربنا بس نقول ايه .. العند بيولد الكفر .. 8 سنين راح فيها خيرة شباب بلدين وعشان ايه .. ولا حاجة .. حرب امتدت 8 سنين خلت العراقيين والإيرانيين شوية وحيقفوا علي باب جامع يشحتوا وده يوريك إن مش معني إن ربنا كرمك باحتياطي بترول كفيل إنه يعيشك ملك فخلاص كده إنت بقي ممكن تبعزق فلوسك زي ما انت عايز .. الحرب نفسها كمرتبات وتكاليف ذخيرة وبنزين وعلاج واعادة اعمار كل ده كوم وثمن السلاح اللي اشترته البلدين كوم ثاني .. الأمريكان باعوا للعراقيين سلاح بمليارات وفي نفس الوقت عشان اغلب تسليح ايران كان امريكاني من ايام الشاه فالأمريكان كانوا بيبيعوا قطع الغيار والذخيرة للإيرانيين برده باربع اضعاف سعرها في السوق .. الحكم الرشيد بيبقي حاجة مهمة في ايدك خصوصاً لو انت قصاد بلد ربنا كرمها بموارد طبيعية كويسة.
بسبب انهم فلسوا فالإيرانيين والعراقيين اللي هم أعضاء في منظمة الأوبيك OPEC ودي اختصار Organization of Petroleum Exporting Countries يعني منظمة الدول المصدرة للبترول اللي هم قطر و إيران والأكوادور وفنزويلا و الإمارات العربية المتحدة والعراق و ليبيا و الكويت و الجزائر والمملكة العربية السعودية ونيجيريا و أنجولا .. الدول دي كلها بتقعد مع بعض كل سنة عشان يتفقوا علي هم حينتجوا قد ايه بترول عشان يحافظوا علي سعر برميل البترول عند رقم يخليهم كلهم مبسوطين ويعملولهم قرشين كويسين .. ده كده زي ما تجار الجبنة البراميلي في السوق يبقوا عاملين جروب واتس اب عشان يتحكموا في سعر بيع الكيلو .. المهم .. العراقيين والإيرانيين راحوا لاخواتهم في الاوبيك يطلبوا مساعدة والناس كلها قعدت سوا مع بعض واتفقوا علي حل حلو فشخ .. دلوقتي احنا مش عازين سعر بيع البترول يزيد عشان خاطر منزعلش مننا الأمريكان وفي نفس الوقت مش عايزين نقلل سعر بيع البترول عشان ارباحنا متقلش .. فاحنا حنتفق سوا ان كل الدول في الاوبيك باستثناء العراق وإيران حيقللوا من انتاجهم بحيث إن الانتاج العالمي من البترول ميزيدش وسعر البترول في السوق ميتحركش قصاد إن الإيرانيين والعراقيين يخشلهم قرشين زيادة كل شهر يخليهم يقدروا يقفوا علي رجليهم .. ده كده زي ما تكون دول الاوبيك عملوا جمعية مع بعض والعراقيين والإيرانيين حيقبضوها اول دورين.
الناس كلها مش بس دول الاوبيك بصوا للاتفاق ده علي انه بداية جديدة بين العراقيين و الإيرانيين ومش بس كده دول كمان بصولها علي انه يمكن يبقي بداية الصلح الكبير بين اهل السٌنة والجماعة وبين الشيعة .. بعد 8 سنين من الحرب وملايين الشباب اللي ماتت يمكن جه الوقت إن الطرفين يبصوا لنفسهم في المراية ويقولوا ان مفيش اي معني للي بيحصل .. حتفضل العراق فيها كربلاء والكوفة .. حيفضل الشيعة عايشين في العراق .. حيفضل الشيعة يجوا يحجوا ويعملوا عمرة كل سنة في السعودية .. معاك إن مرارة الحرب والموت لسه مسيطرة علي عقول ناس كتير بس فيه امل في بكره .. امل جاي من المصلحة بس هو يعني ايه الدافع ورا السلام وحتي ايه الدافع ورا الحرب غير الجري ورا المصلحة .. جري الشريط كام شهر والناس كلها الحقيقة مش بس دول الاوبيك بقوا بيهرشوا في شعرهم .. فيه حاجة غلط بتحصل .. الاتفاق اللي اتمضي كان المفروض يترتب عليه ان الانتاج العالمي من البترول يفضل ثابت وبناء عليه سعر برميل البترول يفضل ثابت بس اللي بيحصل مش كده .. سعر برميل البترول في النازل .. فيه حد بيغش .. فيه حد مش سالك .. فيه حد من دول الاوبيك اللي المفروض تقلل من انتاجها مبتعملش كده .. ياتري مين.
الفصل الخامس .. المتهم هو الكويت:
العراقيين حيبدأوا يلاحظوا حاجة وهي إن الانتاج الكويتي من النفط مش بيقل زي ما كان المفروض يحصل .. حتسالني هم وصلوا للاستنتاج ده ازاي .. اللي حصل إن علي طول الحدود بين العراق والكويت فيه حقول بترول .. حقول البترول دي فيها بترول تحت الارض والبترول ده المفروض إن ملكيته مشتركة بين العراقيين والكويتين فالاتنين قعدوا مع بعض واتفقوا علي إن اول كل سنة حيتفقوا يا تري كل واحد حينتج كام مليون برميل بترول من الحقول المشتركة دي علي اساس انك تقدر تحسب هو يا تري بير البترول ده فيه كام متر مكعب نفط حيصفصفوا علي كام مليون برميل بترول .. اللي حصل إن العراقيين بدأوا يلاحظوا حاجة وهي إن مخزون البترول في الحقول المشتركة بينهم وبين الكوايته بيقل بمعدل اسرع من الطبيعي لو كان الكوايته بينتجوا الكمية اللي هم كانوا متفقين عليها مع العراقيين .. يمكن عشان العراقيين كانوا عارفين إن محدش حيصدق كلمتهم لو اتحطت قصاد كلمة الكوايته فالعراق طلبت فريق تحقيق من الأمم المتحدة عشان يجي يحقق بنفسه في اللي بيحصل .. فريق التحقيق بتاع الامم المتحدة مش بس اثبت إن فعلاً الكويت مش بتقلل من انتاجها زي ما هي اتفقت مع دول الاوبيك انما كمان الكويت بنت منصات بترول Oil Rigs في الصحراء جوه الأراضي الكويتية بس مش تحتها ابار بترول جوه الكويت انما اللي حصل إن المنصات دي اتحفر ليها انابيت بترول تحت الارض دخلت جوه الاراضي العراقية وبدات تشفط بترول من ابار بترول جوه العراق .. لو حتصدق كلام العراقيين فالكوايته سرقوا بترول منهم بيتقدر ثمنه حوالي 2.4 مليار دولار.
علي الناحية الثانية انت مهم برده تبص للموضوع من وجهة نظر الكوايته .. لما حرب الخليج الأولي قامت سنة 1980 بالغزو العراقي لإيران فالكوايته كانوا بيتفرجوا زينا زيهم .. هم شافوا إن الحرب دي هم ملهمش دعوة بيها وطول ما هم بيتفرجوا بس ومش بيشاركوا محدش حيقولهم حاجة لحد ما بعد سنتين من الحرب تهديدات إيران للدول العربية في الخليج مبقتش بتميز ما بين مين بيضرب ومين بيتفرج .. بداية من سنة 1982 لحد سنة 1988 ودي السنة اللي الحرب خلصت فيها الكويت كانت دفعت من جيبها 14 مليار دولار كمساعدات للعراق .. من وجهة نظر الكوايته هو انا دافع الفلوس دي كلها ومش حترجعلي وقلنا ماشي لكن كمان اضحي بفلوس ارباح البترول بتاعتي لحد ما العراق وإيران تسدد ديونها .. طب وانا مالي .. هو الحقيقة الكويت برده عندها منطق بس يمكن موقف الكويت كنت ححترمه لو كانت الكويت طلعت في المؤتمر بتاع الأوبيك اللي اتفقوا فيه علي مساعدة العراق وإيران وكانت قالت لا الكلام ده مش جاي معايا سكة .. المشكلة إن الكويت حطت جزمة في بقها ووافقت وعطت كلمتها ودلوقتي بترجع فيها.
العراق خدت نتايج التحقيق بتاعة اللجنة اللي جاية من الامم المتحدة وخبطت علي باب الكوايته عشان تقولهم بس يابابا بس الكوايته سابوهم يخبطوا .. الحكومة الكويتية مردتش علي اي رسالة او جواب او طلب اتبعت من الحكومة العراقية .. العراق راحت الامم المتحدة ومسمعتش غير صوت صرصور الحقل .. (صدام حسين) طلب تجيله سفيرة أمريكا في بغداد (أبريل جلاسبي) وفي الاجتماع ده هو حط قدامها كل الأدلة اللي معاه اللي بتثبت إن الكويت بتسرق بترول العراق وهي بمنتهي الهدوء قالتله ايوه حصل احنا عرفنا وشايفين إن الكويت غلطانه وانت عندك حق .. (صدام) قالها إنه لازم يعمل حاجة عشان خاطر اللي بيحصل ده مخلي العراق مش عارفه تقف علي رجليها فهي ردت عليه بنفس البرود وقالتله إن الموقف الرسمي لحكومة الولايات المتحدة إنها لن تتدخل في الطريقة اللي الدول العربية بتتعامل مع بعضها .. اقف بقي هنا .. أنهي بني أدم عاقل في الدنيا حيسمع الجملة دي يقوم مترجمها في دماغه إن الموقف الرسمي لحكومة الولايات المتحدة إنها مش بتمانع إن العراق تغزو الكويت برياً .. ده بالضبط كده لما تكون متخانق مع اخوك وتروح تشتكي لابوك يقوم قايلك روحوا حلوا مشاكلوا مع بعض بعيد عني فانت تاخد الجملة دي وتترجمها في مخك بإن ابوك عطالك اذن انك تطلع شخصية ديكيستر Dexter اللي جواك وتروح تقتل اخوك وتسيح جثته في الحمض .. وحتي كمان التشبيه ده مش صح أوي لإنك لما رحت تشتكي لابوك معرفتش تلاقيه فرحت لواحد صاحبه وهو اللي قالك حلوا مشاكلكوا بعيد عن ابوك لإن خلينا نكون صرحاء مع بعض إن جملة الموقف الرسمي لحكومة الولايات المتحدة تفرق كتير فشخ بين انها تطلع من بق رئيس الجمهورية وبين انها تطلع من بق سفيرة.
المهم إن (صدام) اعتبر الجملة دي اعلان موافقة أمريكا علي غزو الكويت لإن ده اللي حصل فعلاً يوم 2 أغسطس 1990 وخلال 24 ساعة كانت القوات المسلحة الكويتية انسحبت من الكويت والحرس الجمهوري العراقي سيطر علي البلد وزي ما (أبريل جلاسبي) قالت طلع الرئيس الأمريكي وقتها (جورج بوش الأب) يقول إن الولايات المتحدة متضايقه من اللي حصل بس حتاخد وقتها في الرد واتخاذ قرار مناسب بعد ما نكون درسنا الوضع كويس .. تاني يوم رئيسة وزراء بريطانيا (مارجريت ثاتشر) بترفع سماعة التليفون علي الرئيس الأمريكاني وبتقوله انا جايه ازورك انت فين بكره .. قالها انا في مدينة اسبن في ولاية كولورادو قالتله حجيلك .. بعد يومين من المباحثات ما بينهم بيطلع (جورج بوش الأب) في المؤتمر الصحفي مع (مارجريت ثاتشر) وبيعكس رأيه 180 درجة .. فجأة (صدام حسين) بقي النسخة العربية من (أدولف هتلر) ولازم نحمي العالم منه .. هو قال نحمي العالم منه بس من جواه هو كان قاصد يحمي السعودية منه.
الحقيقة إن العلاقة التوكسيك اللي ما بين السعودية وأمريكا يمكن ناس كتير متعرفش إن سببها في الأصل خالص هو الألمان .. في الشهور الأخيرة من الحرب العالمية الثانية الألمان نفذوا خطة هجوم مضاد كاسحة ضد الأمريكان والخطة كانت مرسومة حلو ومتنفذة كويس لحد ما عطلت في الأخر بسبب نقص امدادات البنزين للجبهة .. الأمريكان شافوا بنفسهم عساكرهم وهم بيتحط عليهم في معركة البالج في بلجيكا ولولا زي ما قلتلك إن بنزين الألمان خلص لكان العساكر الأمريكان اتكنسوا من أوروبا زي ما الست والدتك كده بتكنس التراب وهي بتنظف الشقة .. الدرس ده هو اللي علم الأمريكان يمكن أهم درس اتعلموه وهو إن بقاءهم علي الساحة كقوة عظمي مرتبط بإن دايماً وتحت أي ظرف إن أمريكا ميجيش اليوم اللي متلاقيش فيه بترول .. الدرس ده كان مسمع أوي معاهم لدرجة إن في يناير 1945 يعني حتي قبل ما الحرب تخلص رسمياً رئيس أمريكا وقتها (فرانكلين دي روزفيلت) خد طيارته وجه مصر وركب مركب ودته علي قناة السويس وهناك قابل الملك (عبدالعزيز ال سعود) الله يرحمه عشان يتفقوا علي اتفاق هو الأساس اللي العلاقة بين البلدين مكملة عليه لحد دلوقتي .. النفط مقابل الأمان .. طول ما العائلة المالكة السعودية سايبة شركة أرامكو Aramco تشتغل براحتها وطول ما البترول السعودي مش بيتقفل المحبس بتاعه فأمريكا حتضمن إن العائلة المالكة حتفضل قاعدة علي الكرسي .. في حالة تعرض المملكة لهجوم خارجي أو حتي إن الشعب السعودي ثار علي العائلة المالكة فالقوات المسلحة الأمريكية حتتدخل فوراً لإنقاذ العائلة المالكة وضمان بقاءها في السلطة.
السبب ورا إن القوة العسكرية العراقية اللي كانت مسئولة عن دخول الكويت كانت الحرس الجمهوري هي إنها كانت مش بس تعتبر قوات الصفوة جوه المؤسسة العسكرية العراقية ومش بس إن الخبرة اللي هم خدوها في ال8 سنين بتوع حرب الخليج الأولي كانت بتخليهم علي مستوي عالي من الكفاءة القتالية .. كل ده علي عيني وعلي راسي .. الفكرة إنها كانت قوات ملتزمة جداً بالأوامر .. (صدام) رؤيته للدنيا إنه كان عايز الكويت تبقي جزء من التراب العراقي وعشان ده يحصل مينفعش القوات العراقية لما تخش الكويت تقتل وتغتصب وتسرق .. انت عايز قوات علي درجة عالية من ضبط النفس وده اللي الحرس الجمهوري بيقدر يقدمه .. بمجرد ما القوات العراقية سيطرت علي الكويت اتقال للعائلة المالكة الكويتية لموا هدومكوا وامشوا من البلد .. اٌعلن رسمياً إن الكويت بقت الولاية ال19 للعراق .. كل المواطنين الكويتين اللي جوه الكويت وقت الغزو بقوا بالتبعية مواطنين عراقيين واي مواطن عربي عايش في الكويت وقت الغزو من حقة يقدم طلب للحصول علي الجنسية العراقية .. وعشان (صدام) بيضحي النهاردة فبعد شوية القرار اتعدل ان اي مواطن حتي لو مش عربي وقاعد في الكويت من حقه يقدم علي الجنسية العراقية .. القرارات دي انت ممكن تستغربها بس لازم تفهم انك بتتكلم علي ان في الوقت ده تلتين التعداد السكاني للكويت كانوا ناس من بره الكويت فهو كان شايف إنه بكده حيضمن ولاء الشارع الكويتي اللي هو مينفعش يتقال عليه شارع كويتي لإن اغلبه مغتربين.
بعد كده طلع قرار الرئيس (جورج بوش الأب) بإن أمريكا بدأت عملية درع الصحراء Desert Shield وهي بمنتهي البساطة عملية عسكرية الهدف منها هو حماية السعودية من غزو عراقي محتمل بعد ما نجح العراقيين انهم ياخدوا الكويت وضع يد .. موقف أمريكا من اللي حصل الناس شافته علي حسب هي قاعدة في مدرجات مين .. الناس اللي علي الله حكايتها ومش دايسه أوي في حتة السياسة الخارجية كانوا شايفين اللي حصل رد فعل منطقي .. ناس تانية استغربت التحول المفاجيء من بلد رئيسها طلع يقول أول ما الغزو حصل ملناش دعوة يا (محيي) وبعد ما (مارجريت ثاتشر) قعدت معاه يومين الله أعلم عملت فيهم ايه معاه طلع يقول حدوسكوا بدباباتي يا شوية رعاع .. بس فيه مدرجات الدرجة الثالثة بقي .. مدرجات الناس اللي فاهمة الدنيا ودول اللي احنا عايزين نبص للي حصل من شباك بيتهم والناس دي بتقول حاجتين مهمين فشخ:
- لنفترض جدلاً إن (صدام) فعلاً كان عايز يخش السعودية .. دلوقتي انت دخلت الكويت في يوم وعلي فكرة السبب اللي خلي غزو الكويت ياخد يوم كامل مش أقل من كده هو إن القوات المسلحة الكويتية ارتبكت فشخ واحتاجت ساعات طويلة عشان تنسحب للحدود السعودية والا غزو الكويت كان مرشح يكسر الرقم القياسي لأسرع حرب في التاريخ والمسجل باسم الغزو النازي للدانمرك في الحرب العالمية الثانية واللي احتاج ساعتين بس عشان يخلص وكان ضحاياه مواطن دانمركي ومدرعة ألمانية .. المهم إن لو (صدام) عايز يخش السعودية فعايز أقولك إن الحرس الجمهوري العراقي كان قادر إنه يحتل الساحل السعودي بالكامل علي الخليج العربي من أول الكويت لحد سلطنة عمان في أقل من اسبوعين ومكنش حد حيقدر يقوله سلامات يا ام احمد .. بس ده محصلش ومكنش حيحصل .. ده معناه إن لما (جورج بوش الأب) طلع يقول إنه حامي حمي المملكة العربية السعودية فهو كان بيدعي إنه بيحمي المملكة من خطر مكنش موجود أصلاً.
- لحد اللحظة دي من التاريخ الوجود العسكري الأمريكي في الشرق الأوسط كان متمثل فيما يسمي قوة الانتشار السريع Rapid Deployment Force أو RDF .. ايه البتاعة دي .. دي قوة عسكرية أمريكية بدات تتوزع في في جزيرة دييجو جارسيا ودي واحدة من الجزر البريطانية اللي في المحيط الهندي يدوبك بعد ما الثورة الإسلامية في إيران ولعت .. قوة RDF دي مكنتش قوة كبيرة تقدر تصد الهجوم الخيالي اللي كان العراقيين حينفذوه ضد السعودية بس لو كان الهجوم ده حصل كانت قوة RDF اتحركت من جزيرة دييجو جارسيا واحتلت مدينة مسقط عاصمة سلطنة عمان بحيث مسقط حتبقي مقر عمليات القوات الأمريكية .. أنا ليه بقول الكلام ده .. تخيل معايا إن فعلاً (صدام) كان عايز يخش السعودية .. وتخيل معايا إن الحرس الجمهوري العراقي فعلاً دخل الساحل الشرقي للمملكة علي طول الخليج العربي .. لو كان الحرس الجمهوري العراقي وصل لمدينة مسقط وخدها فكده Game Over مبروك علي (صدام حسين) شبه الجزيرة العربية بالكامل .. ساعتها الساحل الشرقي للمملكة معاه .. الكويت معاه .. سلطنة عمان معاه .. الاحتياطي النفطي السعودي كله معاه .. كان ساعتها ممكن يفاوض الأمريكان .. حاخد الكويت وحنسحب من السعودية وسلطنة عمان وإلا حفرقع كل منصات البترول اللي في السعودية وحرجع العالم كله للعصر الحجري .. مفيش بنزينه فيكي يا أمريكا ولا أوروبا حيبقي فيها نقطة بترول .. حظر تصدير البترول اللي خلاكوا تترعشوا من البرد بعد حرب أكتوبر 1973 حيبقي ولا حاجة قصاد اللي حيحصل فيكوا.
كان ممكن (صدام) يبدأ زحفه علي مسقط يدوبك بعد دخوله الكويت بس ده محصلش .. كان ممكن (صدام) يتحرك علي مسقط بعد ما (جورج بوش الأب) أعلن بدء عملية درع الصحراء بس ده محصلش .. كان ممكن يعمل ده اول ما بدأت العملية اللي استمرت 5 شهور لنقل القوات الأمريكية لحد السعودية .. 5 شهور وهو بيتفرج لحد ما العملية اتحولت من درع الصحراء لعاصفة الصحراء Desert Storm .. خلال 5 أسابيع بس الأمريكان رموا فوق العراق صواريخ وقنابل القدرة التدميرية بتاعتها قد كل القنابل اللي رمتها أمريكا في الحرب العالمية الثانية بما فيها القنبلتين النوويتين علي هيروشيما وناجازكي .. الغزو البري بدأ وخلص في 5 أيام ومن الحاجات الغريبة إن مع اول يوم للغزو البري الحكومة العراقية اعلنت استسلامها واعلنت موافقتها علي الانسحاب من الكويت .. الرد الأمريكاني كان لا مفيش الكلام ده انتوا كان المفروض تعملوا ده من بدري .. (صدام حسين) بعت جواب ل(ميخائيل جورباتشوف) رئيس الإتحاد السوفيتي يطلب منه إنه يتدخل ويبلغ الأمريكان برغبة العراقيين انهم يستسلموا و (جورباتشوف) وصل الرسالة دي ل(جورج بوش الأب) والرجل برده رفض إنه يتراجع .. (صدام) طلب من (جورباتشوف) يبعت ل(جورج بوش الأب) تاني وبرده الرد كان لا.
رفض الأمريكان لاستسلام العراق خلي (صدام) يطلع قراره الكارثي لقواته انها تنسحب من الكويت بشكل عشوائي .. اللي يلاقي حاجه باربع عجلات يركبها وياخد الطريق السريع اللي بيربط بين مدينة الكويت وبين مدينة البصرة وربنا معاه عشان الطيارات الأمريكاني تاخد الطريق رايح جاي قصف بالقنابل الحارقة عشان يبقي واحد من أبشع مظاهر الحروب الحديثة.
يمكن اللي انا عايز اختم بيه إن قصة الغزو العراقي للكويت انت ممكن تبصلها من كذا شباك علي حسب انت قاعد فين .. فيه ناس شايفه إنها كانت خطوة متهورة من (صدام) حتي لو كان عنده حق في حتة إن الكويت كانت بتسرق بتروله بس الغزو مكنش هو الحل المناسب .. ناس تانية شافوا إن العراقيين عموماً و(صدام) خصوصاً هو شيطان علي الأرض .. النسخة الجديدة المعاصرة من فرعون سيدنا (موسي) عليه السلام .. وزي ما فرعون مصر قرر يقتل أطفال بني إسرائيل بعد ما الكاهن بتاعه تنبأ له إن فيه طفل اتولد في بني إسرائيل حيقود ثورة عليه ومكنش يعرف إن الطفل المقصود ده كان بيتربي في القصر الملكي كابن متبني للفرعون شخصياً فبرده واحدة من أشهر الإتهامات اللي اتوجهت للقوات العراقية اللي غزت الكويت انها كانت بتقتل الاطفال في الحضانات وده الاتهام اللي بعد كده عرفنا إن قالته أميرة في العائلة المالكة الكويتية واللي اعترفت في مذكراتها انها كذبة وإن اللي قالها تروج للكذبة دي كانت المخابرات الأمريكية .. ناس تانية ممكن تقول إن صحيح العائلة المالكة الكويتية كانت مستبدة بالحكم وصحيح (صدام) كان ديكتاتور يعني انيل من ستي الا سيدي بس في نفس الوقت في سنة 1990 كانت نسبة الستات في البرلمان العراقي 34% قصاد 2% في الكونجرس الأمريكي .. محدش قال إن الغزو العراقي للكويت نقل الحريات فيها لمستوي مش مسبوق بس في نفس الوقت مينفعش اصلا إن حد يبرر احتلال العراق بإنه حملة لنشر الحريات وحماية حقوق الاقليات والستات.
حرب الخليج الثانية او حرب تحرير الكويت سميها زي ما تسميها سابت لينا تجربة مرعبة ودروس مستفادة يتكتب فيها مجلدات عن كل حاجة غلط ممكن البشر يعملوها في الأزمات .. واحد من الدروس المستفادة المهمة الحقيقة إن محدش بيهتم بالعساكر ولا بمعاناتهم ولا بتضحياتهم .. وزارة الدفاع الأمريكية قررت تجرب في عساكرها قبل ما تجرب في العساكر العراقيين كل ما لذ وطاب من الأسلحة الجديدة والتكنولوجيات اللي محدش كان يسمع عنها قبل كده .. يعني مثلاً .. حضرتك عارف الميكرويف صح .. طبعا انت مش محتاج افهمك هو ليه المايكرويف له باب وبيتقفل كويس وانت بتشغله .. محدش فينا عايز يجرب ايه اللي ممكن يحصل لايدك لو دخلتها جوه الميكروييف وهو شغال .. اهو الأمريكان في حرب الخليج الثانية استخدموا اجهزة اتصالات بتشتغل بالميكروييف وكتير من عساكر سلاح الإشارة جاتلهم حروق من استخدام اجهزة الاتصالات دي .. عشان الأمريكان كانوا خايفين من ترسانة الأسلحة الكيماوية اللي تحت ايد العراق اللي اصلا الأمريكان هم اللي عطوها للعراقيين عشان يضربوا بيها الإيرانيين في حرب الخليج الأولي فمتفهمش مين وافق علي إن كل العساكر الأمريكان اللي راحوا العراق ياخدوا تطعيم ضد الانتراكس واللي كان تطعيم مش واخد موافقة وزارة الصحة الأمريكية واللي ثبت بعد ما اتجرب في العساكر إن 80-100 الف عسكري جاتلهم مضاعفات سموها متلازمة حرب الخليج اللي تقدر تلخص اعراضها في إن جهازك المناعي بيروح في داهية .. طبعا ده غير البدعة اللي اسمها دانة المدفعية المطلية باليورانيوم المستنفذ رغم ان في الثمانينات وزارة الدفاع الأمريكية طلعت قرار حاسم بإن مش حيجي اليوم اللي نسنتخدم اليوارنيوم المستنفذ في أي ساحة قتال عليها عساكر أمريكان ورغم كده هي هي نفس الوزارة اللي كان علي قلبها زي العسل تجرب السلاح ده في عساكرها عشان كتير منهم يجليهم تسمم اشعاعي .. الاستخدام المفرط لليورانيوم المستنفذ كان السبب إن خلال السنين اللي بعد الحرب ما خلصت نسب الإصابة بالسرطان بين العراقيين ضربت في السما في العراق وخصوصا في الجزء الجنوبي من البلد واللي اثبت ده كانت الدراسات اللي عملها الناس بتاعة منظمة أطباء بلا حدود اللي طلعت تقرير قالت فيه إن بسبب اليورانيوم المستنفذ العراق شافت حالة طبية جديدة لانج وهي اصابة الاف الاطفال البنات بسرطان الثدي.
فيه نظريات كتير اتقالت واتشرحت عشان تفسر ليه الأمريكان قرروا يغيروا رأيهم بخصوص غزو الكويت .. ايه اللي حصل بين (مارجريت ثاتشر) وبين (جورج بوش الأب) خلاه بدل ما كان بيعتبر (صدام) صديق لأمريكا هوبا بقي عدو أزلي .. فيه ناس رأيها إن السبب في ده هو البترول بس مش بالشكل اللي انت متخيله .. سنة 1990 لو جيت تحسب هو يا تري نسبة البترول اللي بتستورده أمريكا من الكويت والعراق قد ايه من اجمالي البترول اللي هي بتجيبه من بره حتلاقي إن النسبة يدوبك 5% .. يعني لنفترض جدلاً إن فجأة حنفية البترول الكويتي والعراقي بطلت تصدر لأمريكا فده مش حيشكل أزمة كبيرة للإقتصاد الأمريكاني اللي 90% من بتروله جاي من السعودية .. سيطرة الأمريكان علي بترول العراق والكويت حيخليهم يتحكموا في محبس البترول اللي بيروح لأوروبا والصين اللي كان اغلب البترول الكويتي والعراقي بيروحلهم .. فيه نظرية تانية بتقول إن الأمريكان ضربوا العراق عشان يصالحوا السعوديين اللي كانوا قلقانين من إن (صدام) تكبر في دماغه ويضربهم .. نظرية تالتة بتقول إن السبب هو إسرائيل اللي كانت بتعتبر (صدام حسين) تهديد واضح وصريح لأمنها القومي .. نظرية رابعة ودي الحقيقة هي المحببة إلي قلبي بتقول إن السبب هو ما يسمي متلازمة فيتنام.
الدول الكبيرة مينفعش تعيش من غير حرب كل كام سنة وده لأسباب كتير الحقيقة .. الحروب اللي علي الضيق بتحفز الإقتصاد .. بترفع الروح المعنوية للشعب .. بتخلي الدولة تختبر بشكل مباشر الأسلحة الجديدة اللي هي بتصنعها .. بس أحيانا العيار بيفلت .. أحيانا حرب الناس بتتخيل إنها حتبقي محندقة تقلب بمدعكة وقصة حزينة .. حرب فيتنام كانت كده .. حرب الأمريكان تخليلوا إنها حتخلص في كام شهر بس مطت منهم سنين وكانت السبب في موت 3 مليون فيتنامي قصاد 58 ألف عسكري أمريكاني .. حرب الناس كلها شايفه إنها انتهت بهزيمة الإمبراطورية الأمريكية ودي كانت صدمة نفسية خلت ادارة الرئيس (رونالد ريجان) في السر يكلف وزارة الدفاع إنها تتصرف وتخترع حرب جديدة صغيرة مع أي حد بس تكون حرب مضمونة عشان مينفعش دولة في حجم أمريكا يبقي عدد الناس اللي مؤيدة لأي تدخل عسكري للبلد حول العالم يبقي زي عدد الناس اللي بتحب البصارة .. في إبريل 1975 حرب فيتنام بتخلص .. في أغسطس 1982 أمريكا بتغزو العاصمة اللبنانية بيروت عشان أولاً يساعدوا الغزو الصهيوني للبنان والثاني إن القوات الأمريكية في بيروت تبقي رادع لتقدم القوات الصهيونية للمدينة عشان الأمريكان مكانوش عايزين لبنان كلها تقع في ايد إسرائيل .. التدخل العسكري الأمريكاني في بيروت كان المفروض يبقي الحرب اللي علي الضيق اللي كانوا بيدوروا عليها لحد لحد ما الخطة باظت منهم يوم 23 أكتوبر 1983 لما حصل تفجير انتحاري في مقر قيادة عمليات القوات الأمريكية في بيروت أدي لمقتل 307 عسكري من قوات مشاة البحرية الأمريكية.
كارثة التفجير الانتحاري في بيروت خلت الأمريكان يدوروا علي مكان تاني يخربوه .. في نفس الشهر يوم 25 أكتوبر 1983 وقبل حتي ما دم العساكر الأمريكان اللي ماتوا في بيروت ينشف كان (رونالد ريجان) اخترع خناقة ملهاش معني مع بلد في أمريكا الوسطي اسمها جرانادا .. ولما الخناقة دي مجابتش النتيجة اللي هو عايزها لإن ناس كتير مكنتش عارفه أصلاً هي جرانادا دي فين بيجي ديسمبر 1989 وأمريكا بتخترع برده خناقه مع بلد غلبانه تانية والمرة دي الدور كان علي باناما .. العراق كانت هي الإجابة عن سؤال يا تري ازاي أمريكا تنسي الإيكس بتاعتها .. فيتنام .. العراق كانت الحل ورا مشكلة ازاي أمريكا تجرب أسلحتها الجديدة.
المصادر:
- محاضرة القاها الدكتور (روي كاساجراندا) في جامعة اوستن بعنوان Iraq: Genocide and Dreams يعني العراق: الإبادة العرقية والأحلام وده لينك المحاضرة علي YouTube:
(2527) Genocide and Dreams: Iraq – YouTube - محاضرة القاها الدكتور (روي كاساجراندا) في جامعة اوستن Roy Cassagranda on The U S & Iraq – A Lecture by The Austin School وده لينك المحاضرة علي YouTube:
(2554) Roy Cassagranda on The U S & Iraq – A Lecture by The Austin School – YouTube - مقالة بعنوان Why did Iraq invade Kuwait in 1990? نشرت في موقع WorldAtlas وده لينك المقالة الأصلية:
Why Did Iraq Invade Kuwait In 1990? - مقالة بعنوان The 1990/1 Gulf War نشرت في موقع ThoughtCo وده لينك المقالة الأصلية:
Operation Desert Storm – Gulf War Summary
