لينك التسجيل الصوتي للمقالة علي Sound Cloud:
https://soundcloud.com/user-112011687-312727988/zitmxwcbjbkw
سوري في العنوان بس انا مش شايف أي وصف تاني للحرب دي اللي مكنش ليها أي ستين لازمة .. دي حرب إستمرت 8 سنين مات فيها أكتر من مليون بني أدم و إتصرف عليها مليارات الدولارات عشان في الأخر واحد بيقول لشعبه موتوا عشان تخشوا الجنة و الثاني بيقول لشعبه موتوا عشان مفيش حد يستحق يعيش غيري .. حرب كم الوحشية و الغضب اللي فيها جاب صدمة للعالم .. اللي العراقيين و الإيرانيين عملوه في بعض متعملش قبل كده في أي حرب بين جارتين ليهم نفس الديانة .. فيه كتير من اللي ححكيه دلوقتي انت ممكن تقول عليا إني بهبد أو ببالغ أصل مستحيل حد عاقل عارف إن فيه حاجة اسمها ربنا يعمل كده بس صدقني لو قلتلك إن الحرب دي بالذات انا شايفها حرب بين ناس الغضب عماهم لدرجة إنهم نسيوا إن فيه حاجة إسمها ربنا .. خليني أبدأ معاك بيمكن أهم سؤال .. هو بالصلاة علي النبي الحرب دي قامت ليه؟
السبب اللي قامت بسببه الحرب و اللي حتلاقيه موجود في أي Search بتعمله علي النت هو الخناقة علي مين له حق السيطرة علي شط العرب .. للناس اللي متعرفش إيه هي شط العرب دي؟ فلو بصيت علي الخريطة حتلاقي إن العراق بلد فيها نهرين اللي هم دجلة و الفرات بحيث إن النهرين دول ماشيين لتحت لحد ما الإتنين بيصبوا في الخليج العربي زي ما نهر النيل كده بيصب في البحر المتوسط .. تحت خالص حتلاقي إن دجله و الفرات بيتقابلوا مع بعض و بيصبوا سوا في الخليج العربي بحيث إن الحته بداية ما النهرين يتقابلوا لحد ما يصبوا في الخليج العربي بتتسمي شط العرب .. الحتة دي بتقع فيها مثلاً مدينة البصرة واحدة من أكبر و أهم المدن العراقية .. وبتقع فيها برده مدينتي عبدان و خورامشهر الإيرانية .. لسنين و سنين و العراق و إيران بيتخانقوا علي مين من حقه المنطقة دي اللي تعتبر معبر ملاحي مهم لإن ميناء البصرة مثلاً يعتبر من أهم الموانيء العراقية و بيجيب فلوس حلوة أوي فالخناقة مش مجرد علي أرض قد ما هي علي فلوس وده مش عيب .. العيب إنك تتخيل إن هو ده السبب ورا حرب دموية بالشكل ده.
إنك تقول إن سبب حرب الخليج الأولي بين العراق و إيران هو مين له حق السيطرة علي شط العرب ده كده زي ما واحدة ترفع قضية خلع من جوزها و يسألوها ليه فتقولك أصله بيشخر .. كان ممكن تستحمله و كان ممكن تركبله البلاستر الطبي اللي بيتحط علي المناخير و كان ممكن تلبس هي سدادات ودن بس هي إختارت الخلع .. تدري ليش؟ .. عشان فيه مصايب تانية تحت مسمي إنه بيشخر .. ممكن يبقي بخيل أو بيضربها أو بيخونها .. ممكن ميكونش بيستحمي أو لسانه طويل .. فالخناقة علي شط العرب دي المبرر اللي الناس بتقوله عشان الحقيقة متتقالش و الحقيقة اللي لازم تعرفها إن الحرب دي قامت بسبب إتنين مش طايقين بعض واحد اسمه (صدام حسين) الله يرحمه و التاني إسمه (روح الله الخوميني) الله يرحمه برده و صدقني لو قلتلك الموضوع ملوش علاقة خالص بإن واحد سني و التاني شيعي.
الأول خليني أنسفلك خالص نظرية إن الحرب دي قامت بسبب شط العرب لإن مش ده السبب .. سنة 1975 (صدام حسين) وصل لإتفاق مع اللي بيحكم إيران وقتها الشاه (محمد رضا بهلوي) الله يرحمه علي إن الخناقة بتاعة شط العرب دي تتقفل و إتعرفت بإتفاقيه الجزائر لإنها إتمضت برعاية الرئيس الجزائري (هواري بومدين) الله يرحمه و الموضوع فعلاً إتقفل لحد سنة 1979 ودي السنة اللي قامت فيها الثورة الإسلامية الإيرانية .. الثورة دي أطاحت بحكم الشاه و جابت يحكم إيران أكتر بني أدم (صدام حسين) بيكرهه في حياته .. (روح الله الخوميني).
مهم تكون فاهم إن الكيميا بين (صدام حسين) و (محمد رضا بهلوي) كانت حلوة أوي لسبب وهو إن الإتنين علمانيين .. الإتنين إشتركوا بإن ليهم نفس الرأي في الدين وهو إن الدين ده أخره معاك الجامع .. الدين ده يقولك تصلي إزاي؟ و تصوم إزاي؟ غير كده متستخدموش في حاجة .. ده السبب اللي خلي (محمد رضا بهلوي) ينفي (روح الله الخوميني) في الستينات بره إيران لإن (الخوميني) كان شايف إن الدين هو اللي لازم يحكم .. الوضع في إيران وقتها كان نسخة بالكربون من وضع مصر مثلاً أيام لما الدولة كانت في حالة حرب مع الجماعات الإسلامية اللي هو أي حد مربي دقنه بيترمي في المعتقل و محدش بيعرفله طريق بس يمكن الفرق إن إحنا سنه وهم شيعة .. (الخوميني) لما إتنفي بره إيران راح قعد في مدينة النجف العراقية .. وهو هناك فضل يسخن في الشيعة العراقيين و يقولهم إنكوا أنتوا الأغلبية السكانية ليه سايبين رجل مفتري لا و كمان سني زي (صدام) يحكمكم؟ .. شوف يا أخي تدابير ربنا .. سنة 1978 (صدام) بيطرد (الخميني) بره العراق لإنه زهق منه ومن مشاكله .. بعدها بسنة (الخوميني) بيرجع إيران يعمل ثورة تطير الشاه .
كان فيه إتفاق ممضي عشان أزمة شط العرب تتحل و كان ممكن (صدام) يروح الأمم المتحدة يرميه في وشهم و يقولهم مش مشكلتي إن الشاه مشي انا معايا ورق سليم بس هو معملش كده .. الإتنين سواء (صدام) أو (الخوميني) كانوا بيتلككوا علي خناقة و الإتنين خدوا شط العرب حجة .. العركة بدأت بإشتباكات متقطعة و شوية ضرب نار .. كان ممكن (صدام) يستني و يصبر و يروح للأمم المتحدة يقولهم شايفين النظام الإيراني الإرهابي بيعمل إيه؟ .. كان ممكن يعمل زي (عادل إمام) في فيلم الواحد محروس بتاع الوزير لما قعد يصرخ صباعي دم .. بس ده محصلش .. يوم 22 سبتمبر 1980 قرر (صدام) إن القوات المسلحة العراقية تبدأ غزوها للأراضي الإيرانية .. هنا انت محتاج تستهدي بالله كده و تاخد نفسك و تحاول تاخد جولة في دماغ (صدام) و تفهم هو كان بيفكر إزاي؟
بالورقة و القلم إيران كانت تدوس علي وش العراق في أي حرب .. إيران مساحتها 3 أضعاف مساحة العراق و عدد سكانها كمان حوالي 3 أضعاف العراق .. الإيرانيين كتير و العراقيين عددهم الي حد ما علي قدهم .. بس في المقابل القوات المسلحة العراقية كانت أكتر بكتير من الإيرانية .. الجيش العراقي كان فيه 200,000 جندي نظامي تحت إيدهم 7,000 مدرعة و 1,400 مدفع ميداني .. إيران مكنش عندها نص التسليح ده .. دي نقطة .. نقطة تانية وهي إن (صدام) حسبها علي إن الإتحاد السوفيتي واقف في ظهره وفي نفس الوقت إيران أو النظام الإسلامي الإيراني متخانق خناقة لرب السما مع أميركا و عشان تفهم سبب الخناقة دي أنصحك تتفرج علي فيلم إسمه Argo بس ده مش موضوعنا دلوقتي .. (صدام) حسبته إنه لو هو ضرب الإيرانيين فالسوفييت و الأمريكان حيقفوا في ظهره و ساعتها نصره علي الإيرانيين حيبقي مجرد مسألة وقت بس زي ما حتفهم كمان شوية (صدام) خد أحلي خازوق في حياته من الأمريكان.
علي الناحية الثانية الحياة مش زبادي خلاط أوي كده .. شاه إيران كان حبيب الأمريكان و كانوا مش بيبخلوا عليه بأي سلاح هو عايزه .. الرجل كان من أوائل الناس اللي إستلم من أميركا مقاتلات F-14 Tomcat من تصنيع شركة Grumman الأميريكية و اللي كانت في الثمانينات حاجه كده شبه الF-35 Lightening II دلوقتي و دي الطيارة اللي إتصورت في فيلم Top Gun بتاع (توم كروز Tom Cruise) بالمناسبة .. لما الثورة الإسلامية أطاحت بالشاه الطيارات دي كلها بقت في إيد النظام الإيراني .. إذا كانت القوات البرية العراقية جامدة زحليقة مقارنة بالإيرانية فسلاح الجو الإيراني كان فاجر وقتها .. الحل اللي وصلتله الشلة اللي حول (صدام) هو نفس الحل اللي إسرائيل ضربتنا به في النكسة وهو نفس اللي عملته مصر في حرب أكتوبر 1973 اللي هو ضربة جوية تضرب المطارات الإيرانية و الطيارات اللي فيها وهي علي الأرض .. يوم 22 سبتمبر 1980 طيارات ميج ثلاثة و عشرين MiG-23 و سوخوي عشرين Su-20 ومعاها قاذفات توبيلوف إثنين و عشرين Tu-22 وكل دول علي فكرة طيارات سوفيتية إخترقت المجال الجوي الإيراني و ضربوا علي الأقل 12 مطار عسكري إيراني من ضمنهم مطار يدوبك بره العاصمة طهران .. بعد الضربة الجوية بدأ الغزو البري العراقي للأراضي الإيرانية علي 3 دفعات بطول ال600 كيلومتر اللي هم الحدود البرية بين العراق و إيران .. ايه الفكرة ورا كده؟ .. (صدام) كان عايز قواته البرية تستولي علي أكبر مساحة ممكنة من الأرض غرب إيران بحيث ان لما المواطن الإيراني يصحي الصبح يلاقي إن (الخوميني) إيران بتروح منه يقوم نازل الشارع يثور عليه قال يعني كده هو حيخلص منه .. عمرك شفت إستهبال أو حد بيفكر بمخ طفولي أكتر من كده؟
المشكلة إن الغارات الجوية العراقية معملتش حاجة لإن الطيارات الأمريكاني اللي تحت ايد إيران كانت مستخبيه جوه الدشم بتاعتها و محصلهاش حاجة .. تاني يوم بدأ الرد الإيراني في العملية اللي إتعرفت باسم كمان 99 أو Operation Kaman 99 .. في العملية دي 160طيارة من طرازات F-4 Phantom و F-5 Tigers و F-14 Tomcat ضربوا 11 مطار عراقي من ضمنهم قاعدة الموثينة الجوية الكبيرة أوي و من ضمنها كمان مطار بغداد الدولي .. الغارة الجوية الإيرانية كانت كارثة بكل المقاييس .. مطارات حربية عراقية كتير طلعت بره الخدمة لمده شهور و القدرة القتالية لسلاح الجو العراقي إتخسف بيها الأرض .. ده كان وضع الحرب الجوية .. الوضع علي الأرض بقي كان مزري .. لا مزري إيه .. الوضع كان زي الخرا.
صحيح إن القوات البرية العراقية حققت تقدم محترم في الأيام الأولي للحرب لحد ما وصلوا لمدينة خوزستان الإيرانية بس مع الوقت تقدمهم بقي بيتقاس بالسنتيمتر مش بالكيلومتر لحد ما التقدم ده وقف خالص مع صلابة المقاومة الإيرانية .. شوية و الحرب قلبت علي حاجة شبه حروب الخنادق بتاعة الحرب العالمية الأولي اللي هو جيشين حافرين خندقين قصاد بعض و راصينهم عساكر و مدافع رشاشة و لا ده عارف يتقدم ولا ده عارف ياخد من التاني لا حق ولا باطل .. لما الطرفين بدأوا يستخدموا السلاح الكيماوي ضد بعض الحرب فعلاً قلبت زيها زي معارك فردان و سوم اللي كانت في الحرب العالمية الأولي .. عشان تفهم انا قصدي إبقي إتفرج علي فيلم Wonder Woman .. و زيها زي المعارك دي أرقام الضحايا بقت عماله تزيد يوم عن يوم بشكل مستفز بس أرقام الضحايا بدأت تنط جامد لما اليأس وصل بالإيرانيين إنهم بقوا بيرموا نفسهم قدام رصاص القوات العراقية .. متفهمش مين جوه القيادة العسكرية الإيرانية اللي تقريباً إنعدمت من قلبه الرحمة لما قالك طب ليه لا نضرب العراقيين بأمواج بشرية من جنودنا اللي مستعدين يموتوا عشان خاطر المرشد الأعلي للثورة الإسلامية.
الفكرة بمنتهي البساطة إنك حتجيب متطوعين شباب إيرانيين الحماس الديني واخدهم شوية و سميهم الباسيج Basij .. فكك من إسمهم .. هات انت العيال دي قسمهم فرق كل فرقة 1000 بني أدم .. لما الألف بني أدم دول يبدأوا يجروا بإتجاه الخطوط الدفاعية العراقية و العراقيين يبدأوا يضربوا عليهم نار بيتقسموا لمجموعات كل مجموعة من 20 بحيث كل مجموعة بتجري علي هدف معين وليكن مثلاً مدفع ميداني محمي بكياس رملة و حوله عساكر عراقيين .. تعالي انت واحد من العشرين فدائي دول إرمي نفسك علي المدفع و فجر نفسك وسط العساكر اللي بتحميه .. بمجرد ما مجموعة من الباسيج دول قدروا يخلقوا ثغرة في الدفاعات العراقية بتلاقي القوات البرية النظامية الإيرانية جاهزة إنها تستغلها و تتقدم بإتجاهها بسرعة .. الخساير الرهيبة اللي العراقيين إتعرضوا ليها بسبب هجمات الأمواج البشرية دي أجبرت (صدام) إنه يسحب قواته للحدود بينه وبين إيران سنة 1982.
لما العراقيين إنسحبوا هما قالوا يلا نتفق علي وقف إطلاق النار و كفاية كده بس الإيرانيين رفضوا و قالوا لنفسهم اللي قالته شخصية V في فيلم V for Vendetta لما قال بعد ما العساكر بتوع (كريدي) خلصوا خزن رصاصاتهم فيه .. My Turn .. الإيرانيين بدأوا غزوهم للعراق و حاصروا مدينة البصرة في واحدة من أكبر المعارك البرية من بعد الحرب العالمية الثانية .. لما (صدام) شاف الحرب بتروح منه مترددش إنه ينافس الإيرانيين في مستوي السفالة و نزل عنهم كمان .. هو قرر يجبر إيران إنها تقبل وقف إطلاق النار بإنه بدأ يتعمد إستهداف المدنيين .. سلاح الجو العراقي يشوف طيارة مدنية إيرانية يقوم موقعها .. يشوفوا قطر متحمل ركاب يقوموا ضاربينه .. يوم 1 أكتوبر 1986 سلاح الجو العراقي ضرب طيارة مدنية طراز بوينج 737 مليانه مدنيين وهي لسه في مدرج الإقلاع في مطار شيراز الإيراني .. في نفس الشهر العراقيين ضربوا 60 مدينة إيراني بصواريخ سكود Scud بعيدة المدي و في واحد من الضربات دي مات 65 طفل إيراني لما صاروخ عراقي نسف المدرسة الإبتدائي بتاعتهم .. إيران ردت بإنها هي كمان بقت بتستهدف المدن العراقية .. جنون الحرب دي وصل لمرحلة إن الشيطان نفسه بقي بيجيب فشار و حاجة ساقعة و عمال يتفرج لما (صدام) قرر سنة 1983 إنه يشن حرب ملهاش أي ستين لازمة برده ضد الأكراد اللي عايشين في شمال العراق .. ضرب (صدام) في الأكراد وصل لمرحلة من القذارة محصلتش قبل كده لما ضرب مدينة حلفجة الكردية سنة 1988 بالكيماوي و قتل 5000 بني أدم من شعبه منهم ستات و أطفال.
(صدام) كان فرحان أوي إن الأمريكان في ظهره .. يقولهم عايز سلاح يقولوله خد .. عايز ذخيرة .. خد .. عايز معلومات عن تحركات الإيرانيين .. صور الأقمار الصناعية تبقي عنده .. كل ده هو متخيل إن الأمريكان عايزين اليوم اللي إيران فيه تخسر الحرب أصل ده اللي قاله (رونالد ريجان Ronald Reagan) رئيس أميركا وقتها بعظمة لسانه .. اللي مكنش (صدام) عارفه ولا إحنا الحقيقة وقتها إن الأمريكان كانوا بياخدوا فلوس من الإيرانيين اللي كان معاهم فلوس كتير بسبب بيع البترول و يدولهم بالفلوس ده سلاح .. يقوم الأمريكان واخدين الفلوس الإيراني دي يدوها للمتمردين المواليين ليهم في نيكاراجوا ضد الحكومة الشيوعية هناك .. الفضيحة دي لما إتعرفت بقي اسمها إيران-كونترا و ممكن أبقي أتكلم عن تفاصيلها بعدين بس لك أن تتخيل كم الصدمة اللي مش بس (صدام) إنما العالم كله كان فيها .. عشان كده انا من أكتر الناس اللي مقتنعة بمقولة إن اللي متغطي بأميركا عريان.
في المرحلة دي من الحرب فعلاً (صدام) كان محبط .. هو عايز الحرب تخلص بس الإيرانيين مش راضيين أصلهم دلوقتي محاصرين البصرة ولو وقعت في إيدهم يبقي كده هم كسبوا الحرب .. كان متخيل إن الأمريكان في ظهره بس إكتشف إنهم إدوله أكبر خازوق في حياته .. السوفييت عايشيين في اللالاند .. الحل الوحيد اللي (صدام) شافه ممكن ينهي الحرب هو إن العالم يتدخل و عشان العالم يتدخل لازم تضربه في أكتر حاجة بتوجعه وهي الفلوس .. العراقيين بقوا كل ما يشوفوا سفينة متحمله ببترول عليها علم إيران ماشية في الخليج العربي يضربوها .. الإيرانيين بقوا بيردوا بإنهم كل ما يشوفوا مركب شحن عليها علم العراق برده يضربوها .. شوية و الإيرانيين بقوا بيضربوا أي سفينة شايلة بترول و عليها أعلام العراق أو الكويت أو السعودية .. انت بتتكلم علي إن لعب العيال ده كلف العالم 500 سفينة شحن أغلبهم شايلين بترول .. لعب العيال وصل لمرحلة من السخافة إن طيارتين ميراج Mirage عراقيين ضربوا صاروخين إيكسوسيت Exocet ودي صواريخ مضادة للسفن فرنسية الصنع و كمان الطيارة الميراج دي فرنساوي علي سفينة ماشية في الخليج العربي بحيث الطيارين العراقيين كانوا متخيلين إنها سفينة شحن إيرانية بس إكتشفوا بعدين إنها مدمرة أميريكية إسمها ستارك USS Stark و ده أدي لمقتل 40 بحار من الطاقم بتاعها و أميركا قبلت الإعتذار الرسمي اللي قدمته العراق بس برده لعب العيال بين العراق و إيران كمل.
إيران هددت بإنها حتقفل مضيق هرمز قدام حركة الملاحة البحرية .. ردت أميركا بإنها بعتت حاملة طائرات للخليج العربي عشان تأمن حركة سير السفن و ده كان السبب إن السفن الحربية الإيرانية و الأميريكية ضربوا نار علي بعض في أكتر من مرة .. لما جه مارس 1988 الوضع عموماً كان زي الزفت لكل الأطراف:
- خليني أبدأ بالإيرانيين .. حلمهم بإنهم ياخدوا البصرة إتبخر لما قواتهم اللي بتحاصر المدينة إتعرضت لهزيمة صعبة أوي الحقيقة انت عارفها باسم معركة تحرير الفاو .. العقوبات الإقتصادية اللي الأمريكان كانوا فارضينها عليهم كانت بتسببلهم خساير رهيبة في الفلوس .. إستراتيجية الأمواج البشرية اللي خلتهم يجبروا العراقيين علي الإنسحاب كلفتهم خساير مفجعة في الأرواح وفي نفس الوقت خلت شباب كتير في إيران يهرب من الخدمة الإجبارية في الجيش لإنه شايف إنها حرب ملهاش أي لازمة متستحقش إنه يموت عشانها .. فوق ده كله إن فضل الخوف إن ممكن أميركا تتهور و تدخل الحرب في صف العراق عامل هسهس في دماغ القيادة الإيرانية.
- العراقيين وضعهم كان أحسن شوية من الإيرانيين بس زي الزفت برده .. انت بقالك سنين عمال تصرف مليارات الدولارات شهرياً .. فيه قوات إيرانية جوه أرضك كانت محاصره واحدة من أهم المدن بتاعتك .. انت مش بس بتواجه إيران إنما كمان دخلت نفسك في مواجهة ملهاش لازمة ولا كان وقتها مع الأكراد.
(صدام) قال لنفسه إنه لو ضرب إيران بشوية صواريخ سكود حلوين مع تهديد بشوية زعيق إنه حيضرب طهران بالكيماوي فده حيخلي الإيرانيين يقبلوا وقف إطلاق النار .. يوم 20 يوليو 1988 إيران وافقت علي مشروع قرار الأمم المتحدة رقم 598 و اللي بيقول إن حيحصل وقف فوري لإطلاق النار و الطرفين حينسحبوا بره حدود بعض لحد ما يرجعوا لوضع ما قبل بداية الحرب .. مش (صدام) يهدي بقي و يمشي في سكة مفاوضات وقف إطلاق النار .. لا ميبقاش بني أدم براس جحش لو عمل كده .. يوم 26 يوليو (صدام) بعت ناس اسمهم مجاهدي خلق عشان ينفذوا عمليات إرهابية جوه إيران .. للناس اللي متعرفش مين هم مجاهدي خلق دول فدي ناس إيرانيين أتولودوا في إيران بس مبيكرهوش حد في حياتهم قد (الخوميني) وشلته .. الناس دول هربوا من إيران وقعدوا في العراق و العراقيين أدولهم سلاح و فلوس و طلقوهم جوه إيران قال إيه شوية ناس بسلاح حتقدر توقع نظام (الخوميني) .. طبعاً الحرس الثوري الإيراني قدر يحبط هجمات مجاهدي خلق و الإيرانيين خدوها حجة عشان يقولوا وقف إطلاق النار ده باطل و رجعوا تاني يضربوا السفن العراقية في الخليج العربي .. (صدام) رد إنه رجع تاني يضرب المدن الإيرانية بالصواريخ و هددهم إنه حيضربهم بالكيماوي .. فضل لعب العيال ده شغال لحد ما في 20 أغسطس 1988 وصلت أول مجموعة من قوات حفظ السلام الدولية التابعة للأمم المتحدة لشط العرب و فعلياً إتوقف ضرب النار بين العراقيين و الإيرانيين.
لما الحرب خلصت إيران و العراق لقوا نفسهم في وضع زي الزفت .. إيران معدش فاضل عندها سلاح و إقتصادياً هم شبه فلسوا و سياسياً محدش بقي راضي يتكلم معاهم .. بس علي الأرض هم شافوا إنهم إتعرضوا لغزو من جارتهم و صدوا الغزو ده و قدروا يحافظوا علي بقاء النظام فالإيرانيين عشان يحسسوا نفسهم أن الالافات اللي ماتوا دول مراحوش هدر وإن الملايين اللي إتصرفت دي مترتمتش في الزبالة فأقنعوا نفسهم إنهم يا عيني إنتصروا .. (صدام) علي الناحية الثانية بقي عامل زي الرجل اللي مراته فضحته إنه مبيعرفش يعمل حاجة في السرير و بقي ماشي يتخانق مع خلق الله علي أساس إنه كده بيرجع ثقته في نفسه و بيوري العالم إنه رجل أوي .. صحيح (صدام) دخل الحرب و وراه الإتحاد السوفيتي و أميركا بس هو خرج من الحرب العالم كله بيقول عليه إنه قتال قتله بسبب المذابح اللي عملها في الأكراد .. العراق دخلت الحرب وهي خامس أقوي قوات مسلحة في العالم و خرجت منها دولة مديونة لشوشتها لجيرانها الخلايجة لإن الإقتصاد العراقي كان معتمد علي بيع البترول بس لما العراق و إيران قعدوا يضربوا سفن نقل البترول بتاعة بعض فده أدي إن سعر البترول يقل جامد لإن السعودية زودت من إنتاجها بشكل كبير عشان تعوض النقص اللي حصل في سوق البترول.
بس إذا كان الجيش العراقي بيحارب عشان كان خايف من (صدام) فالجيش الإيراني كان مستعد يموت عشان ينول رضا (الخوميني) .. إنك تقنع طفل إيراني عنده 13 سنة يشيل سلاح عشان يموت في حرب هو مش فاهم قامت ليه؟ ولا حتفيده بحاجة ده يثبت إن النظام الإسلامي الإيراني أبدع في غسيل مخ شعبه عشان يمشيهم زي ما هو عايز .. وفي نفس الوقت إن (صدام) يحس إنه مش قادر علي الحمار (اللي هو إيران) فيروح يتشطر علي البردعة (اللي هم الأكراد) ده يوريك إنه قد إيه كان بني أدم فعلياً مش فاهم هو بيعمل إيه .. خطة ضرب إيران لوحدها مليانة ثغرات تكتيكية تخليك تسأل نفسك هو مين الحمار اللي حط الخطة دي؟ .. حرب الخليج الأولي أو الحرب العراقية الإيرانية دي درس قاسي أوي في إزاي العند بيولد الكفر و ياريتنا بنتعلم.
المصدر:
مقالة بعنوان The Iran-Iraq War- 10 Facts About the Deadliest Conflict of the Conflict of the 1980s .. نشرت في موقع Military History Now وده لينك المقالة الأصلية:
ps://militaryhistorynow.com/2019/03/26/the-iran-iraq-war-10-essential-facts-about-the-first-persian-gulf-conflict/
شكرا جزيلا على مقالاتك الممتعة و المفيدة.
و شكرا على اسلوبك الحضاري في الترحم على كل من ورد ذكره في المقال و توفي لان الميت لا تجوز عليه الا الرحمة. و هذا اسلوب محترم بدل اسلوب التجحيم و الدعاء على الميت بالهلاك في جهنم و هو موضة العصر للاسف مع أن الجنة و النار بيد رب العالمين وحده .
برايي الشخصي اسباب الحرب ليست مجرد شخصين يكرهان بعضهما لدرجة الزج في بلديهما في حرب طاحنة . هناك اختلافات ايدلوجية بين النظامين بالتاكيد كما تفضلت ، و لكن هناك أسباب متجذرة تعود للعداء التاريخي بين العرب و الفرس ، و كانت الشرارة التي أشعلت الحريق محاولة إيران تصدير الثورة الإسلامية للبلدان العربية المجاورة و على رأسها العراق و هذا ما يبرر وقوف كل الدول العربية باستثناء سوريا ضد إيران و مع العراق خلال الحرب.
و الدليل على ذلك هو ما حدث من سيطرة إيرانية على شكل المد الشيعي على العراق و امتدادها لسوريا و لبنان و اليمن بعد انهيار نظام صدام حسين. و طبعا المد الشيعي كان و لا يزال غطاء للنزعة القومية الإيرانية و الحقد التاريخي على العرب منذ انهيار الدولة الساسانية على يد الفاتحين العرب الذين كان ينظر لهم الفرس نظرة دونية.
ملاحظة أخرى ان من أسباب عدم قدرة إيران على حسم الحرب مع العراق رغم التفوق البشري و في الامكانات العسكرية لإيران قيام نظام الخميني بإعدام و البطش بعدد كبير من القيادات العسكرية الإيرانية الكفؤة و الموجودة من ايام نظام الشاه.
و اذا كان هناك حماسا دينيا لدى الإيرانيين لخوض الحرب المقدسة ، فيجب الإقرار بأنه كان هناك حسا وطنيا تفجر لدى العراقيين و وحدهم على اختلاف مكوناتهم خلال الحرب و قدموا من خلاله التضحيات الكبيرة لبلدهم و ليس مجرد الخوف من شخص واحد.
اما عن وضع الطرفين بعد الحرب فأعتقد ان الكفة كانت ترجح لصالح العراق من حيث وضع الحيش العراقي الذي خرج من الحرب كجيش كبير قوي بترسانة عسكرية جبارة و بخبرة عالية و لا ننسى أن معارك تحرير الفاو بواسطة القوات العراقية كانت و لا تزال تشكل انجازات عسكرية تدرس في الكليات الحربية حتى الآن.
و الدليل على رجوح كفة العراق العسكرية بعد الحرب ان امريكا التي كانت تطبق سياسة الاحتواء المزدوج للبلدبن خلال الحرب بدات بالعمل على تدمير الطرف الذي خرج قويا من الحرب و هو العراق و ترسانته العسكرية . و باقي القصة معروفة من البدء بعمل الحظر على الأسلحة على العراق و مرورا بحرب الخليج الثانية و حصار العراق و تجويعه لأكثر من عشر سنوات و انتهاء باحتلال العراق عام 2003. .
بالتأكيد لا نتغنى بالأخطاء التي ارتكبت من القيادة العراقية من حيث إمكانية تجنب الحرب التي تم جر الطرفين لها أو بالانتهاكات التي تمت خلال الحرب ( و هي من جانب الطرفين بكل الاحوال ) ، و لكن محاولة تناول الصورة كاملة لمشهد الحرب العراقية الإيرانية التي اهلكت الآلاف من الجانبين ضروري من باب الوفاء لالاف الضحايا التي سقطت.
اعتذر عن الإطالة مع ملاحظة أخيرة. لم يكن الخازوق الأكبر الذي ضربته أمريكا لصدام في هذه الحرب . بل في تشجيعه على اجتياح الكويت و من ثم الانقلاب عليه 😊.
و كل الاحترام و التقدير و بانتظار المزيد من مقالاتك القيمة .
مع المحبة