معركة ميدواي .. بداية النهاية لليابان في الحرب العالمية الثانية.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/eohgzwu1jtxf

مفيش معركة من ضمن المعارك اللي حصلت في الحرب العالمية الثانية ينفع تقارنها بمعركة ميدواي .. مع كامل إحترامي للناس اللي حتقولي يا عم طب ستالينجراد ولا العالمين ولا حتي عملية الإنزال البري للحلفاء في نورماندي راحوا فين بس تظل معركة ميدواي حالة خاصة لسبب بسيط جداً و هو إن قبل المعركة دي الحرب بين اليابان و أميركا كانت حماده و بعد المعركة دي سير الحرب بقي حماده تاني خالص .. للناس اللي مش فاهمه أوي انا بتكلم عن إيه و اللي مش ملمة باللي حصل في الحرب العالمية الثانية خليني أحكيلك القصة بسرعة و من الأول لحد ما نوصل ليوم 3 يونيو 1942 و ده اليوم اللي حصلت فيه المعركة دي.

بص يا سيدي .. يوم 7 ديسمبر 1941 أميركا خدت علي قفاها من اليابان .. لحد اليوم ده كان العالم كله رايح في ستين داهية بس الأمريكان كانوا عايشين في مياه البطيخ .. ألمانيا طايحة تلطيش في أوروبا و اليابان زي الطور الهايج في عنبر 9  في أسيا و الأمريكان في حالهم ولا حاطين الموضوع في دماغهم .. كل اللي كانوا بيعملوه هي مجرد دور جدعنة مع بريطانيا إنهم يبعتولها سفن أكل و شرب و أدوية و يوم ما حبوا يرسموا نفسهم علي اليابان طلعوا قرار بمنع تصدير البترول ليهم .. تحس إن وقتها أميركا كانت شاب من المعادي شايف أهل الطالبية بيتعاركوا مع مع أهل شبرا و بيتفرج .. بس كل ده إتغير يوم 7 ديسمبر 1941  في اليوم ده الأمريكان صحيوا علي خبر إن اليابان ضربت الأسطول الأميريكي و هو قاعد بيتشمس في قاعدة بيرل هاربور البحرية في جزيرة هاواي في المحيط الهاديء بس بيرل هاربور كانت مجرد البداية .. زي ما بنقول كده السواد عدي بس اللي جاي أسود.

من يناير لحد يونيو من سنة 1942 و اليابان عماله تدوس علي وش أميركا .. القوات البحرية اليابانية كانت عماله تتقدم و محدش عارف يوقفها عند حدها .. في 6 شهور بس كانوا خدوا بورما اللي هي ميانمار دلوقتي و خدوا أندونيسيا و ماليزيا و الفلبين .. بداية من يونيو و اليابانيين بيقولوا لنفسهم إن جه الوقت إننا نضرب أميركا بالقاضية .. المنطق بتاعهم إننا لازم نستغل قوتنا و إنتصاراتنا اللي ورا بعضها و إن الروح المعنوية للعساكر بتوعنا في السما و نستلم الأسطول الأميريكي في معركة مفتوحة عشان نهزمهم هزيمة تخلينا منشوفش وشهم لحد ما الحرب دي ما تخلص .. لحد دلوقتي منطق اليابانيين مفهوم.

رأس الحربة بتاع القوات البحرية اليابانية كانت حاجة هم بيسموها كيدو- بوتاي Kido Butai و دي كلمة يابانية معناها Strike Group أو مجموعة قتال و دي بمنتهي البساطة إن اليابانيين جابوا العشر حاملات طائرات اللي عندهم قسموهم علي 5 مجموعات يعني كل مجموعة فيها حاملتي طائرات و معاها شوية مدمرات و فرقطات و غواصات .. عادة لما الأسطول الياباني بيطلع في خناقة بياخد معاه مجموعتين يعني 4 حاملات طائرات و الكام سفينة اللي معاها .. هنا الحظ لعب دوره و زي ما المثل بيقول قيراط حظ ولا أربعة و عشرين قيراط مفهومية .. في مايو 1942 يعني يدوبك قبل شهر بس من معركة ميدواي حصلت معركة صغيرة كده تقدر تسميها إن اليابان و أميركا كانوا بيسخنوا للمواجهة الكبيرة و المعركة الصغيرة إسمها معركة بحر كورال أو Battle of Coral Sea .. اليابان كسبت المعركة دي بس مش ده المهم .. المهم إن الأمريكان إتعلموا من المعركة دي 4 حاجات:

• أول حاجة إن أي مواجهة مباشرة بين اليابان و أميركا حتحصل حيبقي عندك حاملة طائرات يابانية قصاد حاملة طائرات أميريكية و الطيارات هي اللي تشتبك مع بعضها في مواجهة جوية أو زي ما بتتسمي Dogfight من غير ما أساساً حاملتي الطائرات يشوفوا بعض .. دي كانت أول مرة حاجة زي دي تحصل بالمناسبة .. زمان كانت المعارك البحرية إن سفن تضرب في سفن لكن دلوقتي انت قصاد واقع جديد و هو إن السفن بعيد عن بعض و مش شايفة بعض بس الطيارات هي اللي بتشتبك في الجو .. من وقتها ولحد دلوقتي و ده واقع المعارك البحرية .. فكرة Strike Group إن يبقي عندك حاملة طائرات جنبها سفن حماية و مدمرات و غواصات رايحين يتعاركوا مع بعض إخترعتها اليابان و لحد دلوقتي القوات البحرية الأميريكية مكملة بيها و ده بقي المنهج اللي ماشية عليه أي قوات بحرية في العالم دلوقتي.
• النقطة الثانية و دي مرتبطة بالأولانية إنك عشان تضرب اليابانيين انت مش محتاج تزود عدد المدافع علي حاملة الطائرات .. لا خالص .. انت محتاج تخليها واسعة و طويلة بما يكفي إنها تقدر تشيل طيارات أكبر و أكتر .. و مش كده وبس .. حسم المعارك البحرية دلوقتي بقي بيعتمد هو انت منقي أنهي طيارات عشان تخليها تطير من علي حاملة الطائرات .. يعني مثلاً اليابانيين كان معاهم طيارة حلوة أوي انا إتكلمت عنها قبل كده اللي هي A6M Zero من تصنيع شركة ميتسوبيشي .. الطيارة دي رائعة لو انت ناوي توقع بيها طيارات بس علي قدها أوي لو انت ناوي تخليها تشيل قنابل ترميها علي سفن .. معركة بحر كورال خلت الأمريكان يفهموا إن سر الخلطة عشان يكسبوا اليابان إن حاملات الطائرات بتاعتها تشيل طيارات من طراز دوجلاس إس بي دي دونتليس  Douglas SBD Dauntless و دي طيارات بتتسمي Diver Bomber يعني طيارات بتطير علي إرتفاعات عالية أوي عشان تنزل فوق دماغ السفينة المعادية ترميها بالقنابل و تغرقها .. في معركة بحر كورال اليابان خسرت حاملتي طائرات اللي هم شوكاكو Shokaku و زوي- كاكو Zuikaku بسبب قنابل رمتها عليهم الطيارات دي.

• الأمريكان في المعركة دي إتأكدوا إنهم فكوا شفرة الإتصالات السرية للقوات البحرية اليابانية اللي كان إسمها JN25 .. من بعد بيرل هاربور و المخابرات الأميريكية بتحاول تفك الشفرة دي و ربنا فتح في صورتهم خلال معركة بحر كورال و إتأكدوا من سير المعارك إن فعلاً الشفرة اللي هم فكوها دي صح .. بعدها عرفوا إن اليابانيين بيخططوا لإحتلال جزيرة ميدواي يوم 3 يونيو 1942  و يمكن لولا المعلومة دي مكنش الأمريكان كسبوا المعركة و كانوا إتداس علي وشهم تاني.
• أهم سلاح في إيد الأمريكان في ميدواي و ما بعدها ملوش علاقة بالطيارات ولا بالسفن .. له علاقة بالهندسة والسلاح ده كان الرادار .. لما إتركب الرادار علي حاملات الطائرات الأميريكية يو إس إس إنتربرايز USS Enterprise و يو إس إس يوركتاون USS Yorktown فده عطي للأمريكان أفضلية انت لا تتخيلها .. مبدأياً الدفاع الجوي لحاملات الطائرات زمان كان بيعتمد إنك تجيب عساكر نظرهم ستة علي ستة تخليهم يقفوا في عز الشمس يشوفوا طيارات العدو فين .. دلوقتي مع الرادارات انت مش بس بقيت تعرف العدو فين إنما انت بقيت تقدر تنظم هجومك عليه من غير ما هو يكون شايفك.

معركة بحر كورال زي ما قلتلك خلت الأمريكان يستوعبوا إن عشان تكسب اليابان مش بس لازم يبقي عندك حاملات طائرات كتير انت محتاج يبقي عندك طيارين شاطرين (سوري في الكلمة) فشخ و عشان الطيار يبقي شاطر لازم يبقي سنه الي حد ما كبير .. لك أن تتخيل إن قائد أسراب القتال علي حاملة الطائرات USS Enterprise مثلاً كان إسمه (وايد ماكلوسكي Wade McClusky) و كان عنده 40 سنة وقت المعركة .. تحت منه كان قادة أسراب كانوا زمايله في الكلية فبرده سنهم كان كبير مش صغير .. الطيارين اللي تحت منهم أغلبهم كانوا في أواخر العشرينات .. خبرة الطيارين الأمريكان هي اللي حسمت المعركة دي و دي حاجة انت مهم تكون فاهمها كويس .. في ميدواي اليابان فعلياً إتداس علي وشها .. هي دخلت المعركة بأربع حاملات طائرات كلهم غرقوا .. الأمريكان هم كمان خسروا حاملة طائرات من الثلاثة اللي دخلوا بيهم المعركة اللي هي USS Yorktown و كمان خسروا المدمرة يو إس إس هامان USS Hamman .. حقاً و صدقاً مش حتلاقي معركة بحرية في التاريخ كان ليها تأثير كبير زي معركة ميدواي .. ممكن مثلاً تحطها جنب معركة أكتيوم البحرية اللي بسببها مصر بقت ولاية رومانية و ممكن تحطها جنب معركة أبوقير البحرية اللي بسببها الحملة الفرنسية علي مصر باظت بس فعلياً اليابان مفاقتش من تأثير معركة ميدواي.

ميدواي كان ليها نتايج كتير أوي ممكن نكتب كتب فيها بعدين بس يمكن انا عايز أقف قدام نقطة مهمة أوي و هي الوقت .. ميدواي عطت لأميركا أغلي 18 شهر في تاريخها .. ميدواي خلصت في يونيو 1942 و من الشهر ده لحد نوفمبر 1943 أميركا إستغلت الشهور دي عشان تخلص إنتاج أحدث موديلات حاملات الطائرات بتاعتها اللي هي سمتها إيسيكس Essex-Class و تاني نقطة إنها عطت للأمريكان فرصة إنهم يحطوا خطة و يدربوا عساكرهم علي إستراتيجة جديدة ضد اليابان و الإستراتيجية دي انا بسميها نطي نطة يا دبدوبة بس انت ممكن تقرأها بإسم Island Hoping .. اللي الأمريكان بقوا يعملوه إنه بما إن السكة من أول بيرل هاربور لحد اليابان هي محيط واسع فيه شوية جزر فإحنا حننقي أقرب جزيرة لينا و ننط ليها بقواتنا و بأسطولنا و بطياراتنا و بدباباتنا .. نسيطر علي الجزيرة و نطرد اليابانيين منها نقوم منقيين جزيرة تانية ننط ليها و هكذا .. الإستراتيجية دي بدأت بجزيرة إسمها تاراوا و إنتهت بنزول القوات الأميريكية في جزيرة أوكيناوا اليابانية سنة 1945.

المصدر:
مقالة بعنوان The Battle of Midway: 10 Things You Might Not Know About the Pacific’s War Turning Point .. نشرت في مجلة Military History Now و ده لينك المقالة الأصلية:
https://militaryhistorynow.com/2019/05/16/the-battle-of-midway-10-things-you-might-not-know-about-the-pacific-wars-turning-point/