عين جالوت .. لما قوة مبتقفش تواجه جسم غير قابل للحركة.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/fbvaaaetmjye

أحياناً التاريخ بيحط ناس في حرب مع ناس في الظروف العادية عمرهم ما كانوا حيحاربوا بعض أصلاً بس متفهمش الظروف إتهيأت إزاي عشان المواجهة دي تحصل .. مثال علي كده كانت موقعة نهر طالاس اللي كانت بين أسرة (تانج Tang) الصينية وبين العباسيين في المنطقة اللي هي دلوقتي دولة قيرغيستان وحصلت سنة 751 .. بس النهاردة إحنا حنتكلم عن موقعة تانية شبهها هي موقعة عين جالوت اللي حصلت سنة 1260 واللي كانت بين جحافل جيوش المغول اللي مكنش حد عارف يوقفهم ضد جيش المماليك المصري.

علي إيدك الشمال الإمبراطورية المغولية:

سنة 1206 يعني قبل 54 سنة بس من موقعة عين جالوت كان فيه بني أدم شاب عايش في منطقة منغوليا اللي هي دلوقتي جنوب روسيا إسمه (تيموجين Temujin) أعلن نفسه قائد علي كل المغول وسمي نفسه (جنكيز خان) .. من سنة 1206 ودي السنة اللي هو بقي فيها ملك لحد سنة 1227 و دي السنة اللي هو مات فيها قدر يوسع ملكه من سيبيريا في روسيا علي المحيط الهاديء لحد بحر قزوين في إيران .. الرجل ده خلال 21 سنة بس أخضع وسط أسيا كله لحكمه .. بعد ما (تيموجين) أو (جنكيز خان) مات رجالته قسموا المملكة بتاعته لأربع خانات Khanate .. اه أنا عارف كلمة خانة في الحساب عندنا جت من كلمه خانة اللي جزء من المملكة في اللغة المغولية بس ما علينا دلوقت .. المملكة بتاعة (جنكيز خان) إتقسمت لأربع خانات بين عياله حتلاقيهم عندك في صورة علي الخريطة كل جزء متلون بلون مختلف:

• الحتة المتلونة باللون البرتقالي ودي إسمها Chagati Khanate أو أرض المغول نفسها أو المكان اللي هم إتولدوا فيه وبدأوا يتوسعوا منه ودي مسكها واحد إسمه (تولي خان).
• الحتة المتلونة باللون الأخضر ودي زي ما إسمها مكتوب عندك Khanate of The Great Khan ودي تبقي الجزء من الصين اللي كان تحت سيطرة المغول اللي هي دلوقتي منطقة يوان واللي المغول سموها مملكة الخان الأعظم ودي كان ماسكها واحد إسمه (أوقطاي خان) ومن الإسم فواضح إن (أوقطاي خان) هو الخان الأعظم.
• الحتة المتلونة باللون الموف أو Ikhnate ودي تبقي وسط أسيا وبلاد فارس اللي هي إيران دلوقتي والمغول سموها خانة الخانات ودي مسكها واحد إسمه (جغطاي خان).
• أخر حتة وهي المتلونة باللون الأصفر ودي تبقي هي الجزء من روسيا وبولندا والمجر اللي كان تحت سيطرة المغول واللي سموها خانة الجحافل الذهببية أو قبائل الذهب Khanate of the Golden Horde ودي كانت تحت حكم (جوجي خان).

الإتفاق كان إن كل واحد من الخانات الأربعة شغلته إنه يوسع الجزء بتاعه من المملكة بحيث إن الأربعة بيشتغلوا مع بعض بس كبيرهم هو الخان الأعظم (أوقطاي خان) وكلمته تمشي علي الكل لو حصلت خناقة بين الإخوات الأربعة .. المغول عموماً كانوا مؤمنين بنبوءة بتقول إن حيجي اليوم اللي أحفاد (جنكيز خان) حيحكموا العالم كله فكل واحد فيهم كان عايز يحقق النبوءة دي .. سنة 1251 مات (أوقطاي خان) وجه من بعده إبن أخته (مونجكي خان) اللي بقي هو الخان الأعظم .. أول حاجة عملها إنه جاب أخوه (هولاكو) خلاه هو المسئول عن الجزء من المملكة اللي إسمه خانة الخانات أو Ikhnate واللي بفكرك إنه متلون باللون الموف وإنه بلاد فارس ووسط أسيا وكلفه بمهمة واحدة سهلة وبسيطة إنه مش عايز ولا مدينة ولا مملكة إسلامية تفضل موجودة في الشرق الأوسط ولا شمال أفريقيا .. هنا إنت محتاج تفهم إن (مونجكي خان) مكنش عايز (هولاكو) بس يسيطر علي الأراضي الإسلامية .. ده كان عايز يمحي الإسلام من الوجود.

سنة 1256 يعني بعد أربع سنين من توليه قيادة خانة الخانات بدأ (هولاكو) ينفذ خطة أخوه وإختار أول هدف له وهي قلعة الموت أو قلعة عش النسر زي ما أحياناً بتتسمي والقلعة دي تبقي أخر الحصون اللي تحت إيد الحشاشين .. يوم 15 ديسمبر 1256 كان أخر يوم للحشاشين علي الأرض لما (هولاكو) قتلهم كلهم يوم ما إقتحم القلعة .. السنة اللي وراها بدأ المغول هجومهم علي قلب الدولة العباسية وحاصروا بغداد اللي كانت عاصمة الدولة من 29 يناير لحد 10 فبراير سنة 1258 .. وقتها يا عيني خليفة المسلمين (المستنصر بالله) كان متخيل إن المسلمين لما يشوفوا الخليفة متحاصر فهم كلهم حيشيلوا سلاحهم ويجوا جري علي بغداد لإنقاذها بس طبعاً ده محصلش وكلهم مشوا بمبدأ يعني هو إنت كنت فين يا خليفة المسلمين والصليبيين عمالين يدبحوا ويقتلوا فينا بقالهم 300 سنة وإنت قاعد تتفرج.

هنا إنت محتاج تقف شوية قدام اللي حصل .. حاول تتخيل إن مثلاً الصين دخلت في حرب مفتوحة مع أميركا والقوات الصينية دخلت العاصمة واشنطن ودمرتها وحرقتها وقتلوا أكتر من نص اللي عايشين فيها ودخلوا البيت الأبيض جابوا الرئيس الأميريكي لفوه في سجاد مكتبه ورموه في الشارع وقعدوا يضربوا فيه لحد ما مات لإن ده اللي حصل في بغداد .. إنت متخيل حجم الصدمة اللي حيحس بيها الغرب إن أميركا أقوي إمبراطوريات العالم يجي عليها اليوم اللي تتذل وتتهان بالشكل ده .. ده كان اللي المغول كانوا عايزين المسلمين يحسوا به .. الصدمة واليأس إن مفيش أمل لمقاومة المغول .. أي حد حيقف قدامهم حيحصل فيه زي ما حصل في بغداد وإذا كانت بغداد بكل ثروتها وقوتها مقدرتش تقاوم إحنا إزاي متخيلين إننا نقدر؟

بعد كده المغول بدأوا يتحركوا بإتجاه سوريا .. إذا كانت بغداد مستحملتش تصمد قدام المغول أكتر من 13 يوم فمدينة حلب مستحملتش أسبوع بعد ما المغول دخلوها قتلوا جزء محترم من اللي عايشين فيها .. طبعاً دمشق شافت ده فإستسلمت للمغول من غير أي مقاومة وبكده مفاضلش قدام (هولاكو) غير مصر عشان فعلاً يخلص مهمته اللي إتطلبت منه من أخوه.

علي إيدك اليمين دولة المماليك المصرية:

في الوقت اللي المغول عمالين يوسعوا في ملكهم ومشغولين باللي هم بيعملوه كانت الممالك الإسلامية طالع عنيها وعين اللي خلفوها في الحرب مع الصليبيين .. مراجعة سريعة كده إن سنة 1169 أعلن (صلاح الدين الأيوبي) نفسه ملك علي مصر وأسس الدولة الأيوبية وهو واللي جم من بعده كان العمود الفقري لجيشهم هم حاجة إسمهم المماليك .. المماليك دول إسمهم جه من كلمة مملوك يعني ملكك يعني ده عبد بيتباع من وهو صغير وبيجي من أي حتة في العالم يعني إنت ممكن تلاقي مملوك بيتباع في مصر وهو أساساً جاي من تركيا أو شرق أوروبا .. بإختصار المماليك دول كانوا عاملين زي منتخب فرنسا دلوقتي كده اللي هو كل واحد فيهم أصله من دولة ما جم كلهم وخدوا الجنسية الفرنسية وبقوا بيمثلوا منتخب فرنسا .. المماليك من وهم صغيرين كانوا بيتعلموا كل حاجة في فنون القتال لحد ما لما بيكبروا وبيبقوا عاملين زي القوات الخاصة دلوقتي .. إنك تبقي مملوك يعني فارس في الجيش كان شرف كبير أوي لدرجة إن عائلات مصرية كتير كانت بتبيع عيالها كعبيد عشان ينضموا للمماليك.

سنة 1250 يعني تقريباً في نفس الوقت اللي (مونجكي خان) بقي هو الخان الأعظم وجاب أخوه (هولاكو) عشان يكلفه بإنهاء وجود الإسلام خالص من أرض العرب كانت فيه واحدة إسمها (عصمت الدين أم خليل) اللي إحنا كلنا عارفينها بإسم (شجرة الدر) وهي تبقي أرملة (الملك الصالح نجم الدين أيوب) أخر حكام الأيوبيين وبقت هي ملكة مصر وإختارت تتجوز مملوك إسمه (عز الدين أيبك) عشان يبقي هو سلطان مصر وبكده بدأ حكم المماليك .. جري الشريط 10 سنين لحد سنة 1260 ودي السنة اللي المغول بعتوا فيها رسولهم لمصر عشان يحذرهم من الغزو كان اللي قاعد علي عرش مصر وقتها السلطان (سيف الدين قطز) اللي كان ودي حاجة من سخرية القدر عبد وقع في إيد رجالة (جغطاي خان) وباعوه لحد ما جه مصر وبقي مملوك .. (هولاكو) بعت إتنين رسل لمصر ومعاهم رسالة طويلة عريضة إنت ممكن تقرأها بترجمتها للغة العربية الفصحي لو حبيت علي أي موقع بس هنا حنحاول نترجملك فكرتها بالعامية عشان بس تستوعب طريقة الكلام اللي المغول كانوا بيتكلموا بيها مع (قطز) وقد إيه هم كانوا شايفين المسلمين كلهم بنفس الطريقة اللي النازيين كانوا بيبصوا بيها لليهود اللي هي شوية ناس لا تستحق الحياة .. رسالة (هولاكو) ل(قطز) كانت بتقول الأتي:

“إلي (قطز) المملوك اللي هرب من تحت إيدينا (هم كانوا عارفين كويس إن (قطز) وهو صغير كان عبد إتباع علي إيد رجالة (جغطاي خان) لما مملكة خوارزم وقعت في إيدهم) .. إنت لازم تبص علي اللي حصل للي قبلك وتتعظ منهم وبكل أدب تسلملنا بلدك .. إنت أكيد سمعت عن إزاي إحنا جامدين فشخ وطهرنا الأرض من الوسخين أمثالك .. إحنا مبيقفش قدامنا حد ومبنعملش حساب حد ولو وقفت قدامنا حنخلص عليك إنت واللي يتشددلك .. بس حتي لو هربت حتروح فين يا حسرة؟ حتهرب مننا فين؟ خيولنا أسرع من خيولك .. سهامنا أحمي من سهامك .. سيوفنا أجمد من سيوفك .. قلوبنا مبتخفش من حد وجنودنا عددهم زي رمل البحر”

بس عشان (قطز) هو كمان بني أدم جاحد مبيخفش من حد قام أمر بإنهم يجيبوا الإتنين رسل دول قسموهم نصين زي ما إنت بتقسم البطيخة نصين كده وعلق رقابيهم علي باب زويلة اللي هو واحد من أبواب القاهرة عشان الناس كلها تشوفهم .. طبعاً لما (هولاكو) عرف باللي حصل كان بيطلع دخان من ودانه من كتر الغيظ وكان ناوي ياخد جيشه تاني يوم ويطلع علي مصر يعلم (قطز) الأدب بس لحسن حظنا جاله خبر إن أخوه (مونجكي خان) الخان الأعظم مات .. مهم تكون عارف إن (هولاكو) مكنش عايز يبقي هو الخان الأعظم ومكنش مهتم بالمنصب بس هو كان عايز أخوه (كوبالي) هو اللي يمسك الحكم .. المشكلة إن واحد من الخانات الأربعة اللي هو (أريك بوكي) وده يبقي إبن (تولي خان) إبن (جنكيز خان) واللي كان نصيبه من مملكة أبوه إنه مسك أرض المغول الأصلية كان عايز يبقي هو الخان الأعظم.

عشان أنا عارف إنك تهت فخليني أفهمك كالأتي .. أحفاد (جنكيز خان) بقت بينهم خناقة علي مين يبقي هو الخان الأعظم بحيث (هولاكو) كان واقف في صف أخوه (كوبالي) ضد إبن عمه (أريك بوكي) .. اللي حصل إن (هولاكو) خد أغلب جيشه وساب دمشق وراح أذربيجان عشان يحضر المجلس الإستشاري اللي حيتعمل بين عيلة (جنكيز خان) عشان يختاروا مين حيبقي الخان الأعظم .. سبب إنه خد معظم جيشه هو إنه كان عايز يرسم نفسه جامد في ظهر أخوه عشان لو (أريك بوكي) حب يلعب بديله ويستخدم دراعه ف(هولاكو) حيبقي جاهز عشان يعرفه وضعه .. فجأة المغول في سوريا بقوا تحت قيادة رجل إسمه (كتبغا) اللي مبقاش تحت إيده إلا 20,000 مقاتل وظيفتهم إنهم يفضلوا علي وضعهم لحد ما إن شاء الله (هولاكو) يرجع عشان يكمل حملته .. (قطز) لما عرف ده خد بعضه وإتقدم علي سوريا لإنه كان عارف إن فرصة زي دي مش حتتكرر تاني.

جزء من اللعبة كان مين يقدر يقنع الصلبيين إنهم يقفوا معاه .. المغول بعتوا رسل للصيلبيين عرضوا عليهم إنهم يتحالفوا معاهم ضد المماليك والمماليك عملوا نفس الكلام بعتوا رسل للصليبين عرضوا عليهم إنهم يتحالفوا معاهم ضد المغول .. الصليبيين قالوا لنفسهم العدو اللي نعرفه أحسن من اللي منعرفوش ده غير إنهم كانوا عارفين إن المغول ملهمش كلمة فقالوا إنهم حيقفوا علي الحياد وإن ملهمش علاقة بالخناقة دي بس من تحت الطرابيزة إتفقوا مع المماليك إنهم حيسمحوا ليهم إنهم يعبروا بجيشهم جوه الأراضي اللي تحت سيطرتهم.

يوم 3 سبتمبر 1260 الجيشين قابلوا بعض في عين جالوت في فلسطين .. علي إيدك الشمال المغول كانت نقطة قوتهم إن عندهم سلاح خيالة فاجر مخسرش معركة قبل كده وبالتالي ثقتهم في نفسهم عالية لدرجة إنك ممكن تقول إنهم كانوا واخدين قلم في نفسهم وبفكرك إن عددهم كان 20,000 فارس .. علي إيدك اليمين المماليك مكنش تحت إيدهم غير تقريباً 20,000 هم كمان ومكانوش يقدروا يجمعوا غيرهم وعشان كده (قطز) قرر هو اللي يخرج للمغول بره مصر بدل ما يستناهم لحد ما هم يجوله بس يمكن الفرق إن المماليك زي ما قلتلك كانوا القوات الخاصة بتوع الجيش فإنت تقدر تقول إن جيش (قطز) كان 20,000 ضابط قوات خاصة ضد 20,000 برده بس متوزعين علي شوية مشاة وخيالة ورماة سهام وكده.

فيه نقطة بتتقال في كتب التاريخ إن عين جالوت كانت أول مرة تستخدم فيها القنابل اليدوية المصنوعة من البارود .. هي مكنتش بتنفجر زي القنابل اليدوية بتاعة دلوقتي بس كانت بتطلع صوت بيخوف الخيل بس فيه رأي تاني إن إستخدام المماليك للبارود مكنش إختراع أول مرة المغول يشوفوه لإن المغول دخلوا حروب كتير ضد الصينيين وفي الحروب دي الصينيين إستخدموا البارود لإنهم هم اللي إخترعوه .. إزاي أصلا فكرة البارود وصلت للمماليك دي ممكن نتكلم فيها وقت تاني.

خطة (قطز) كانت أبسط من البساطة بس (كتبغا) لإنه كان جنرال علي قده وإمكانياته مش عالية أوي غلط ولبس في الفخ زي الأهبل .. الخطة كانت إنه حيبعت (بيبرس) علي رأس شوية فرسان عشان يفضلوا يرموا سهامهم من بعيد علي المغول وكل ما المغول يهجموا عليهم الفرسان دول يهربوا اللي هو إنت تعرفها بإسم الكر والفر .. المهم إن الفكرة كانت إن (بيبرس) يخلي المغول يجروا وراه لحد ما يدخلهم مضيق ضيق بين جبلين وأول ما يدخلوا يلاقوا نفسهم متحاصرين من 3 جهات .. يوم كامل والمعركة شغالة لحد تاني يوم الصبح والمغول مش راضيين ينسحبوا لحد ما أخيراً أخر حبة فرسان فاضلين إنسحبوا .. قول علي (كتبغا) زي ما إنت عايز بس الحق يقال إن الرجل شجاع ومنسحبش وفضل يقاتل لحد ما إتأسر ولما إتأسر إتكلم مع (قطز) وحذره من إنه يتغر من اللي حصل في اليوم ده لإن بمجرد ما (هولاكو) يعرف حيجي بجيشه عشان يعلمك درس عمرك ما حتنساه .. (قطز) سابه يخلص كلامه وفي الأخر أمر بإعدامه .. مش بقولك كان رجل فاجر.

طبعاً انا مش محتاج أفكرك بإن (بيبرس) تأمر علي (قطز) وقتله بعد المعركة ما خلصت بس ده مش موضوعنا .. اللي عايزين نتكلم عنه هو اللي حصل بعد كده .. لازم تكون فاهم إن فعلياً المماليك مكنش حيلتهم غير ال20,000 فارس اللي شاركوا في المعركة وكتير منهم أُستشهد بس علي الناحية الثانية الوجود العسكري للمغول كله في الشام مفضلش منه حد .. الأهم من كل ده إن سمعة المغول إتهزت .. فجأة مبقوش الجيش الذي لا يقهر .. فجأة بقوا بني أدمين عاديين بيتعوروا وبينزفوا وبيموتوا .. بس إياك تتخيل إن المغول لموا هدومهم ومشيوا ومرجعوش تاني لإن ده محصلش.

عين جالوت كانت سنة 1260 وبعدها بسنتين يعني سنة 1262 رجع (هولاكو) تاني علي رأس جيشه عشان ينتقم من (بيبرس) للي حصل ل(كتبغا) وكان خلاص حيشن هجومه علي بغداد لما فجأة حصلت حرب أهلية وسط المغول لإن قائد خانة الجحافل الذهبية (بيكري خان) إعتنق الإسلام وأعلن الحرب علي (هولاكو) عشان ينتقم منه علي اللي هو عمله من مذابح لما دخل بغداد .. الحرب الأهلية دي فضلت مكملة لحد سنة 1281 يعني دخلت في حوالي 20 سنة وفي السنة دي المغول حاولوا يهاجموا القاهرة وفشلوا .. حاولوا تاني سنة 1299 وفشلوا .. حاولوا تالت سنة 1300 وفشلوا .. حاولوا رابع سنة 1303 وفشلوا .. حاولوا خامس سنة 1312 وفشلوا برده .. الحرب بين المماليك والمغول كانت فعلاً إسطورية ويمكن أقوي من حروب الأيوبيين ضد الصليبين وإستمرت لحد ما سنة 1323 إتوقعت معاهدة صلح بينهم .. اه إحنا زي ما قريت كده قعدنا مع المغول علي طرابيزة واحدة وإتفاوضنا معاهم علي معاهدة صلح.

تفتكر ليه المغول معرفوش يهزموا المماليك؟ هل تفتكر إن الخناقات الداخلية بينهم هي السبب؟ هل تفتكر الحرب الأهلية اللي ولعت فجأة بين (هولاكو) وبين (بيكري خان) هي اللي أنقذت (بيبرس)؟ هل تفتكر لإن المماليك كانوا جامدين فشخ؟ ما عادي ما الصينيين كانوا يمكن أجمد من المماليك وبرده معرفوش يقفوا قدام المغول .. فيه رأي عاجبني أنا شخصياً بيقول إن البيئة هي اللي هزمت المغول.

فكر فيها كده .. دلوقتي في القوات الجوية الحديثة كل طيار مقاتل لازم يبقي تحت إيده ما بين 3 ل5 طيارات يعني لو عندك مثلاً في قواتك الجوية 300 طيار مقاتل مدربين علي الطيران بمقاتلات F-16 Fighting Falcon فلازم يبقي تحت إيدك 1500 طيارة مقاتلة .. نفس الكلام مع سلاح الفرسان .. لازم كل فارس يبقي تحت إيده 5 حصنة فلو إنت مثلاً (كتبغا) ورحت تحارب المماليك ب20,000 فارس فإنت مُطالب يبقي تحت إيدك 100,000 حصان تسافر بيهم من دمشق لحد القاهرة .. تخيل 100,000 حصان ده غير الفرسان محتاج تأكلهم وتشربهم وتعالجهم كل دي فلوس وموارد مكنتش تحت إيد المغول لإن دمشق بعيدة أوي عن مراكز خطوط الإمداد بتاعتهم في حين إن المماليك عندهم نهر النيل ويدوبك المسافة بين مصر لحد فلسطين مش بعيدة فالمماليك بسهولة يقدروا يوفروا الإمدادات اللي هم محتاجينها لحرب طويلة ضد المغول .. أيا كان رأيك بلاش تحصر المواجهة بين المماليك والمغول علي إنها بدأت وخلصت في عين جالوت .. بعد عين جالوت حصلت معارك يمكن أكبر وأهم منها بكتير بس هي اللي إتشهرت فيهم ويمكن في وقت تاني نبقي نتكلم عنهم.

المصدر:

• مقالة نشرت في Website اسمه Thought Co.com اسمها موقعة عين جالوت The Battle of Ayn Jalut وده لينك المقالة الأصلية:
  https://www.thoughtco.com/the-battle-of-ayn-jalut-195788