لو فعلاً عايز تفهم يعني إيه حروب حديثة بص علي مسلسل الإختيار .. مش بهزر و الله دي الحقيقة .. الحروب الحديثة إنك تبعت قوات برية بتسليح خفيف عشان تنفذ مهمات قتالية و تكون مدعومة بطيارات إستطلاع و طيارات هليوكوبتر و يا سلام بقي لو تحت إيدك طيارات بدون طيار Drones .. الحروب الحديثة قايمة علي الثقة المتبادلة بين العسكري و بين البندقية الألية بتاعته .. انت عايز العسكري بتاعك يبقي عارف إن بندقيته حتسعفه وقت ما يحتاجها .. الحروب الحديثة مش بتاعة الغواصات ولا الطيارات المقاتلة ولا الدبابات وعشان كده النهاردة حنتكلم شوية عن أحسن 5 بنادق ألية في السوق عشان نتعلم هي الفروقات بينهم وليه هم بيتصنفوا علي إنهم الأفضل.
البندقية الألية الأمريكاني M4 Carbine:
بداية حكاية البندقية دي غريبة شوية .. هي أساساً يعني من تصنيع شركة أمريكاني إسمها كولت Colt وهي إتصنعت عشان وقت ما إتعملت الإمارات العربية المتحدة كانت طالبة يتعملها بندقية ألية مخصوص بمواصفات خاصة شوية و من هنا إتولدت البندقية M4 Carbine ومن ساعتها و العساكر الأمريكان وقعوا في غرامها .. الإماراتيين كانوا عايزين بندقية محندقة لانهم كانوا شايفين البنادق الأمريكاني كبيرة أوي فالحل كان إنهم يعملوا بندقية الكعب بتاعها بيتني و كمان تكون أقصر.. ده خلي M4 Carbine مثالية جداً لعناصر القوات الخاصة اللي كتير من الوقت بيكونوا قاعدين جوه طيارة هليكوبتر أو جوه مدرعة .. حتي وهم مثلا بيطلعوا علي سلم عمارة بتبقي سهل إنك تتحرك بيها .. صحيح ده خلي العساكر يضحوا بشوية حاجات من ضمنها إن سرعة الطلقة وهي طالعه بتكون أبطأ و كمان مدي ضرب النار قل شوية بس مش مشكلة قصاد المميزات اللي انت أخدتها.
كشكل هي صعب تميزها عن بنت عمها البندقية M16A2 بس خليني أغششك و أقولك إن الفرق بينهم هو إن M4 Carbine أقصر سيكا بحوالي 14 سنتيمتر .. زيها برده زي بنت عمها البندقية M16A2 بيتركبلها خزنة بتشيل 30 طلقة عيار 5.56 مليمتر و تقدر تضرب بيها طلقة طلقة يعني Semi-Automatic و تقدر تضرب 3 طلقات 3 طلقات .. إتعمل منها نسخة جديدة إسمها M4A1 يمكن المختلف فيها هي إنها بتستحمل تضرب نار بشكل مستمر و كمان إتزودلها أوبشن إنك ممكن تضرب نار Automatic مش بس 3 طلقات 3 طلقات.
البندقية الألي الإنجليزي SA80A2:
البندقية الأساسية اللي في إيد أي عسكري بريطاني .. فكرة إنك تحط الخزنة و ميكانيزم ضرب النار ورا الزناد مش قدامه ده بيسموه Bullpup-Configuration و بيكون السبب ورا إن البندقية طولها بيكون أقصر .. زيها زي M4 Carbine بتستخدم طلقات عيار 5.56 مليمتر و عايزك تعرف إنك تقدر تركب خزنة الذخيرة بتاعة M4 Carbine فيها و حتشتغل عادي جداً.
من ضمن القصص الغريبة للبندقية دي إن النسخة الأولانية منها SA80A1 لما نزلت ناس كتير إشتكت منها فالإنجليز جابوا شركة هيكلر أند كوخ Heckler & Koch الألمانية عشان يبصوا عليها و يقولوا إزاي يعالجوا المشاكل دي .. الكلام ده كان سنة 2002 .. بعدها بخمس سنين إتولدت SA80A2 و من ساعتها و العساكر الإنجليز طايرين بيها و ده يوريك إن لو عندك حاجة بايظة إديها لحد ألماني يصلحالك.
البندقية الألي الفرنساوي FAMAS:
انا ممكن اكتبلك اسمها بالكامل بالفرنساوي بس هو إختصاره يبقي FAMAS يعني البندقية الألية اللي طلعت من مصنع الأسلحة في مدينة سانت إيتيان .. هي من تصنيع شركة سلاح إسمها GIAT ومن السبعينات و البندقية دي هي السلاح الرسمي في إيد أي عسكري فرنساوي .. زيها زي اختها SA80A2 التصميم بتاعها Bullpup-Configuration يعني الخزنة و ميكانيزم ضرب النار ورا الزناد .. و زيها زي أغلب البنادق اللي بتتصنع في أوروبا و أميركا بتستخدم طلقات عيار 5.56 مليمتر بس الخزنة بتاعتها بتشيل 25 طلقة بس .. بص هي بندقية غريبة أصلا .. شكلها غريب خصوصا حتة المقبض الكبير اوفر ده .. فكرة إن البندقية بتنزل Standard وفيها حامل ثنائي Bipod .. ميكانيزم خروج المظروف تقدر تعكسه زي ما انت عايز وعشان كده انت ممكن تستخدمها بسهولة سواء انت أيمن أو أشول و يمكن عشان كده قيادة القوات المسلحة الفرنساوي بدأت تطلعها بره الخدمة و تدخل مكانها البندقية الجايه.
البندقية الألي الألماني HK416:
البندقية دي تعتبر الUpgrade بتاع M4 Carbine .. هي من تصنيع شركة السلاح الألمانية Heckler & Koch و عشان كده البندقية إتسمت HK اللي هي الحروف الأولي من الإسمين .. يمكن الفرق بينها و بين M4 إنها أطول سيكا فده بيخلي متسخنش بسرعة و مدي ضرب النار بتاعها أعلي .. فعلياً لو حطتلك الإثنين قدامك انت ممكن تتلخبط بينهم و زود علي كده إنهم بيستخدموا نفس خزنة الذخيرة و نفس الطلقات عيار 5.56 مليمتر .. قوات مشاة البحرية الأمريكاني U.S. Marine Corps واخدينها البندقية الرسمية للعساكر بتاعتهم بس بيسموها M27 عشان بس لو شفت الإسمين تعرف إن M27 هي هي HK416.
البندقية الألية الروسية AK-74M:
عشان بس محدش يتلخبط .. زمان كان إسمها AK-47 اللي إحنا كنا بنقول عليها كلاشينكوف .. البندقية دي إسطورية بكل ما تحمله الكلمة من معني .. فضلت البندقية دي هي السلاح الرسمي في إيد العساكر السوفييت لحد ما في السبعينات نزلت نسخة جديدة منها إسمها AK-74M .. إيه الفرق بين الإتنين؟ .. فروقات كتير بس يمكن أهم فرق هو عيار الطلقات .. زمان AK-47 كانت بتستخدم طلقات عيار 7.62 مليمتر بس دلوقتي بنادق AK-74M بتستخدم طلقات عيار 5.45 مليمتر .. البندقية الجديدة إتسحلت في أفغانستان و الشيشان و تقريباً كل المعارك و الحروب اللي دخلتها روسيا من السبعينات و انت طالع .. بداية من 2015 بدأ الروس يدخلوا شوية أوبشنز إضافية في البندقية دي كانت بتتعمل في البنادق الأمريكاني زي فكرة المجري اللي فوق الماسورة اللي موجود في M4 Carbine عشان يتركب عليه إكسسوارات البندقية من توجيه الليزر أو الكشاف.
المصادر:
مقالة بعنوان Super Shooters: Meet the 5 Most Dangerous Rifles on the Planet Today نشرت في مجلة The National Interest وده لينك المقالة الأصلية:
https://nationalinterest.org/blog/reboot/super-shooters-meet-5-most-dangerous-rifles-planet-today-173936
مقالة بعنوان The M4 Carbine: The Gun the U.S. Army Can’t Do Without نشرت في مجلة The National Interest وده لينك المقالة الأصلية:
https://nationalinterest.org/blog/the-buzz/the-m4-carbine-the-gun-the-us-army-cant-do-without-19494
مقالة بعنوان The SA80A2 Upgraded Rifles نشرت علي موقع Small Arms Review وده لينك المقالة الأصلية:
http://www.smallarmsreview.com/display.article.cfm?idarticles=1478
