لينك التسجيل الصوتي للمقالة علي Sound Cloud:
https://soundcloud.com/user-112011687-312727988/vaesu41yecpy
مفيش بندقية ألية أجمع الناس من مختلف دياناتهم و جنسياتهم و أراءهم السياسية علي إنها زي الفل و تسلم إيد اللي عملها أكتر من البندقية كلاشينكوف أو زي ما بتتسمي في دول كتير AK-47 .. حاول تتخيل إن البندقية دي زي الهامبرجر كده .. انت ممكن تكون شخص إنف في أكلك .. ممكن تكون بني أدم لا بتاكل الكوارع ولا بتقرب من لحمة الراس و بتقرف من السمك .. بس إنك تطلب ساندوتش بيج تايستي كومبو بالبطاطس المحمرة و بيبسي من ماكدونالدز فده علي قلبك زي العسل .. الكلاشينكوف كده برده .. دي بندقية لو انت إرهابي في داعش مبتكرهش في حياتك قد الغرب حتحبها .. لو انت إرهابي أمريكاني أبيض شايف إن المسلمين ميستحقوش يعيشوا فانت برده حتحبها .. لو انت إشتراكي حتحبها .. لو انت تاجر مخدرات حتحبها .. انا أحياناً لما بفكر في نجاح البندقية دي بسأل نفسي إزاي بندقية ألية إتصنعت عشان تبقي السلاح الرسمي للقوات المسلحة السوفيتية إنتهي بيها الحال إن بقي فيه منها 75 مليون قطعة في السوق علي مستوي العالم أنتجتهم مصانع سلاح في أكتر من 100 دولة .. إيه اللي يخلي سلاح ينجح النجاح الرهيب ده؟ .. هل هو عبقرية التصميم؟ .. سهولة التصنيع؟ .. طمع دول في إنها تجيب فلوس و معندهاش مشكلة تبيع سلاح لأي حد معاه يدفع؟ .. النهاردة حنحاول نجاوب علي سؤال إزاي الكلاشينكوف بقي الماكدونالدز بتاع البنادق الألية؟
عشان تبدأ تفهم سر نجاح الكلاشينكوف لازم أخدك في رحلة سريعة أوي جوه الدماغ الرجل اللي صممه (ميخائيل كلاشينكوف Mikhail Kalashnikov) .. الرجل ده كان عسكري في سلاح المدرعات السوفيتي في الحرب العالمية الثانية و تجربته في الحرب خلته يفهم حاجة كويس أوي .. الألمان بيفهموا فشخ و بما إنهم عملوا حاجة فإحنا لازم نقلدهم .. الألمان في الحرب قالوا إن مستقبل الحروب البرية إنك تدي للعسكري بندقية بتستخدم طلقة عيارها متوسط .. إيه الفكرة؟ .. زمان وقت الحرب العالمية الثانية كان أغلب العساكر سواء الألمان أو غيرهم بيبقوا ماسكين بندقية يا إما Manual يعني بتضرب طلقة تقوم شادد الأجزاء عشان تطلع المظروف و بعد كده تضرب طلقة تانية أو بنادق نص ألي Semi-Automatic يعني بندقية متركب فيها خزنة ذخيرة فيها 8 طلقات حضرتك لازم تضغط علي الزناد 8 مرات عشان مع كل ضغطة زناد تضرب طلقة.
في الحالتين سواء البندقية اللي معاك Manual أو Semi-Automatic فانت كنت بتضرب طلقات عيارها كبير يعني طلقة حجمها كبير .. ده معناه إن رد فعل الطلقة هو كمان كبير .. ده معناه برده إنك تنسي خالص إنك تفكر تخلي البندقية دي تضرب بشكل أوتوماتيكي يعني طول ما انت ضاغط علي الزناد الطلقات بتطلع و ده لسبب بسيط جداً و هو إن رد فعل البندقية حيبقي جامد لدرجة إن العسكري مش حيعرف يسيطر عليها و حتي لو بقدرة قادر جبت شخصية (هالك Hulk) عشان يضرب نار بالبندقية فرد فعلها الأوفر حيخلي التنشين بيها شبه مستحيل ..الألمان قالوا إن لو إحنا عملنا بندقية بتستخدم طلقات متوسطة ده معناه إن رد فعل البندقية حيبقي أخف .. التنشين بيها حيبقي أسهل .. العسكري حيقدر يشيل كمية ذخيرة أكبر .. و الأهم من كل ده إنها فتحت عيون المهندسين الألمان علي فكرة إن ليه لا نعمل بندقية بتضرب نار أوتوماتيك؟ .. طول ما انت ضاغط علي الزناد الطلقات بتطلع.
الألمان مشيوا في السكة دي و قدروا يعملوا الطلقة المتوسطة في الحجم اللي هم بيدوروا عليها .. كانت طلقة عيار 7.92 مليمتر سموها كورز Kurz و إستخدموها مع بندقية ألية إسمها صعب شوية اللي هو ماشين- كاراباينر إتنين و أربعين Maschinekarabiner 42 .. بعد كده البندقية دي إتسمت الإسم اللي علق مع الناس أوي اللي هو شتروم- جيفير Strumgewehr أو StG44 .. دي كانت بندقية ثورة في كل حاجة .. بندقية بتضرب نار بمعدل أسرع من المدفع الرشاش المتعدد و بتستخدم طلقة أكبر من طلقة المدفع الرشاش المتعدد بس كوزن البندقية أخف بكتير من المدفع الرشاش .. لما البندقية دي دخلت الخدمة في المراحل الأخيرة من الحرب العالمية الثانية العساكر السوفييت جالهم حالة إحباط منها .. كانت بالضبط إنك تروح لحد مش بياكل في حياته غير سندويتشات فول و فلافل و تفتح عينيه علي ساندويتش الهامبرجر بتاع بافلو برجر .. في الوقت ده العساكر السوفييت مكنش معاهم يحاربوا بيه غير بندقيتين ملهمش تالت .. بندقية ألية تافهة إسمها PPSh بتستخدم طلقات هي هي بتاعة المسدسات فتقريباً كانت عامله زي المسدس الخرز اللي العيال الصغيرة بتلعب به في العيد و اللي لعبوا Call of Duty حيبقوا عارفين البندقية دي كويس .. البندقية الثانية هي بندقية Manual إسمها موسين- ناجانت Mosin-Nagant.
هنا بقي يجي دور (ميخائيل كلاشينكوف) .. الرجل ده شاف إن السوفييت محتاجين يقلدوا الألمان و زي ما المثل بيقول ليه تتعب أكتر بدل ما ممكن تتعب أقل فكل اللي الأخ (كلاشينكوف) عمله هو إنه خد البندقية الألمانية StG44 غير في شكلها شوية و سماها AK-47 .. بس التعديلات اللي هو عملها علي التصميم الألماني هي فعلاً اللي خلت البندقية الكلاشينكوف أسطورية بالشكل ده.
هو شاف بنفسه إزاي إن العساكر الروس مش متعلمين و حتي اللي بيشتغلوا في مصانع السلاح هم كمان مش متعلمين .. ده معناه إنك مش عايز تصمم بندقية محتاجة مهندسين معاهم ماجستير و دكتوراه عشان يصنعوها و يفكوها و يركبوها .. انت عايز تصمم حاجة مش بتعطل و سهلة في تصنيعها و ينفع عسكري روسي مش متعلم مبيفهمش الألف من كوز الدرة يستخدمها من غير ما يشغل مخه كتير .. البندقية الكلاشينكوف تعتبر درس مهم أوي في تصنيع السلاح .. عشان تكسب حرب انت مش بس محتاج تدرب العساكر بتوعك علي إزاي يقتلوا العدو .. ده الجزء السهل علي فكرة .. الجزء الصعب هو إنك تدي العساكر بتوعك سلاح Cost-Efficient يعني سلاح تصنيعه مش واقف عليك بخسارة .. كل تحديث جديد بينزل علي البندقية الكلاشينكوف خصوصاً لما عيلة AKM نزلت كان الهدف منه هو إنهم يقللوا من تكلفة التصنيع أكتر و أكتر.
لما الحرب العالمية الثانية خلصت و العالم صحي لقي إن بقي فيه قوتين عظمتين جداد هم الإتحاد السوفيتي و أميركا فعرفنا إن إحنا دخلنا مرحلة جديدة من تاريخنا كبشر اللي هي مرحلة الحرب الباردة .. دي حرب بمنتهي البساطة كانت حول إزاي السوفييت يغفلوا الأمريكان و إزاي الأمريكان يلسعوا السوفييت علي قفاهم؟ .. واحدة من أكتر الحاجات اللي كان السوفييت بيعملوها عشان يغفلوا الأمريكان هي إنهم يدوروا علي بلد بيحكمها حد مصاحب الأمريكان و يبدأوا يشوفوا المعارضة الإشتراكية عنده يدوهم سلاح و خصوصاً البندقية كلاشينكوف و يدوهم فلوس عشان يخشوا في تمرد مفتوح ضد الحاكم لحد ما المعارضة الإشتراكية توصل للحكم و تترمي في أحضان السوفييت .. البندقية الكلاشينكوف بقت هي الأداة في إيد السوفييت لنشر نفوذهم و سيطرتهم علي العالم و خليني أديلك مثالين علي السياسة دي اللي هم فيتنام و دولة تانية في أميركا الجنوبية إسمها السلفادور.
زي ما حصل بين السوفييت و الألمان في الحرب العالمية الثانية فنفس الموقف هو هو بكل تفاصيله حصل بين الأمريكان و بين السوفييت في فييتنام .. مش بقولك جمعية و دايرة .. الأمريكان دخلوا حرب فيتنام و هم معاهم بنادق تقيلة بتضرب نص ألي أو Semi-Automatic إسمها M-14 .. فجأة لقوا الفيتناميين مطلعين عنيهم ببنادق كلاشينكوف .. و زي ما السوفييت لقوا إن الألمان عندهم حق لما صنعوا البندقية StG44 فالأمريكان برده قالوا إن السوفييت عندهم حق لما صنعوا الكلاشينكوف و قلدوهم و عملوا البندقية AR-15 اللي بعد كده إتسمت M-16 .. إذا كان السوفييت عطوا للفيتناميين بنادق كلاشينكوف عشان كانوا بيحاربوا بيها الأمريكان و دي حاجة انا شخصياً فاهمها بس اللي عمله السوفييت في السلفادور كان قليل الأدب بصراحة.
السلفادور دولة كان بيحكمها حاكم مفتري مختلفناش بس ولاءه كان لأميركا و مصاحب الأمريكان و عنده معارضة إشتراكية متمردة بتحاول تنغص عليه عيشته و مش عارفه .. فجأة الحكومة هناك لقت إن المعارضة الإشتراكية هوبا بقي معاها بنادق كلاشينكوف و خساير القوات الحكومية عماله تزيد يوم عن يوم .. شوية تحقيق و شوية تدوير و الحكومة إكتشفت إن فيه شبكة تهريب كاملة عاملها السوفييت عشان يجيبوا البنادق الكلاشينكوف اللي بتتصنع في كوريا الشمالية و ألمانيا الشرقية و يوغوسلافيا يشحنوها علي السلفادور و الذخيرة بقي بتاعتها بتتهرب من كوبا .. هل تفتكر الأمريكان يسكتوا علي تغفيل السوفييت ليهم؟ .. جه الغزو السوفيتي لأفغانستان عشان يدي للأمريكان و السعوديين فرصة إنهم يلسعوا السوفييت علي قفاهم .. السعوديين كانوا بيشتروا بفلوسهم بنادق كلاشينكوف مستعملة و يدوها لوكالة المخابرات المركزية الأميريكية CIA عشان تهربها للمجاهدين الأفغان و فجأة السلاح اللي السوفييت صنعوه عشان عساكرهم يمسكوه بقي في إيد الناس اللي العساكر السوفييت بيحاربوهم .. تاني جمعية و دايره يابا .. و لإن القدر دمه أخف من دم (محمد هنيدي) فيخلص الغزو السوفيتي لأفغانستان و بنادق الكلاشينكوف اللي فضلت في إيد المجاهدين الأفغان تروح لإيد تنظيم طالبان اللي سيطر علي البلد .. جري الشريط كمان شوية و أميركا دخلت أفغانستان و السلاح اللي السعوديين و الأمريكان إشتروه من السوق السودا عشان خاطر المجاهدين الأفغان يترفع عليهم شخصياً.
الكلاشينكوف بقي سلاح رسمي لأي حد عايز يعمل أي حاجة .. بقي فعلياً زيه زي ماكدونالدز بتلاقيه في كل حتة .. مقاتلي طالبان شايلينه .. تجار المخدرات في المكسيك شايلينه .. العساكر المصريين اللي انت بتشوفهم في الشارع بيأمنوا الكماين شايلينه .. لو انت تاجر سلاح فانت أسهلك بكتير تهرب شحنة بنادق كلاشينكوف لأي تنظيم إرهابي من إنك تهربلهم المواد الأساسية لعمل القنابل زي TNT أو C4 .. أي مكان فيه حرب أهلية حتلاقي فيه الكلاشينكوف .. ليبيا .. أوكرانيا .. مالي .. سوريا .. و غيرها كتير .. حتي الأمريكان .. الأمريكان لما إتقالهم إن ضباط الشرطة الأفغان محتاجين سلاح يشيلوه قالوا لنفسهم إحنا مش حندي للأفغان سلاح أميريكاني زي بنادق M16 أو M4 Carbine إنما وزارة الدفاع الأميريكية راحت المجر إشترت بنادق كلاشينكوف مستعملة و إدتها للعساكر الأفغان و لإنها بنادق مستعملة فكل عسكري بقي له بندقيتين تلاتة يبدل فيهم .. أصلهم جايين برخص التراب .. ده خلي العساكر و الضباط الأفغان يسترزقوا منهم و بقوا بيبيعوا البنادق دي في السوق السودا.
(ميخائيل كلاشينكوف) لما عمل البندقية دي كان كل همه إنه يعمل سلاح في إيد عساكر ولاد بلده عشان يحررهم من الغزو الألماني و بعد كده عشان يهزم أميركا .. بس السلاح ده إنتشر في كل حتة .. و دي تجسيد لمقولة انا مقتنع بيها جداً إن الطريق لجهنم مليان بالنوايا الطيبة.
المصدر:
مقالة بعنوان AK-47 Fact: There are 75,000,000 of these Deadly Rifles Around the World نشرت في مجلة The National Interest و ده لينك المقالة الأصلية:
https://nationalinterest.org/blog/buzz/ak-47-fact-there-are-75000000-these-deadly-rifles-around-world-71361
