مبيعات السلاح الإسرائيلية ..  اللي يزعل من الأصول مترباش عليها.

مش عيب إنك تتعلم من عدوك .. يمكن في الوضع الغريب اللي إحنا فيه دلوقتي مبقاش فاضل غيري و إتنين بس علي حدود موريتانيا مع المغرب اللي لسه مقتنعين إن إسرائيل هي العدو الأزلي لينا مش بس كمصريين إنما كعرب بس حتي ده لا يمنع الحقيقة اللي أنا حطيتها قدامك في الأول خالص .. مش عيب إنك تتعلم من عدوك .. اليهود عموماً فيهم ميزة حلوة إنهم بياعين شاطرين و السمعة المتاخدة عنهم إنهم مسيطرين علي بيزنس البنوك في العالم مش جاية من فراغ حتي لو مبالغ في صحتها بس تظل قدرة اليهود علي بيع أي حاجة من أول الحلويات لحد الأفكار محدش يقدر ينافسهم فيها ومن ضمن الحاجات اللي هم بيعرفوا يبيعوا كويس هو السلاح .. و مش أي سلاح .. السلاح اللي هم مصنعينه.

الحاجة اللي ناس كتير مش بتاخد بالها منها إن من أول النكسة سنة 1967 و إنت طالع و الإسرائيليين قدامهم ملعب كبير أوي يجربوا فيه أي سلاح هم يعملوه .. سواء بتتكلم عن شبه جزيرة سيناء أو الضفة الغربية أو قطاع غزة أو هضبة الجولان أو حتي جنوب لبنان .. ملعب تجرب فيه أي تكنولوجيا جديدة إنت تعملها من أول توجيه الصواريخ للمراقبة لحد تكنولوجيا إختراق الموبايلات و يمكن أكبر مثال علي ده هو منظومة القبة الحديدية Iron Dome للدفاع الجوي اللي كل ما يحبوا يجربوها يقوموا مخترعين خناقة مع حركة حماس عشان يضربوا قطاع غزة تقوم تنظيمات المقاومة المسلحة ترد بإنهم يضربوا صواريخ بلدي تصنيع محلي عشان الإسرائيليين يقولوا للعالم شايفين الإرهابيين اللي بيستهدفوا المدنيين .. ده بالضبط زي ما تحب تخلي مراتك تتعلم الطبيخ تقوم منزلها تساعد في مائدة رحمن في شهر رمضان فأكيد هي بقالها 30 يوم مفحوتة في المطبخ فحتتعلم حاجة .. و هي دي الفكرة .. السلاح الإسرائيلي بيتباع علي إنه سلاح متجرب في ميدان معارك .. صحيح هي معركة قصاد مدنيين عزل بس مش مهم .. دلوقتي إنت قصاد بلد بتتصنف علي إنها من العشرة الكبار ضمن الدول اللي بتصنع سلاح علي مستوي العالم .. بلد بقي يتقال عليها إن لو فيه سلاح بيطير أو بيراقب حد أو بيفرقع في حد يبقي أكيد حتلاقيه في إسرائيل.

النقطة الأولانية .. عايزين نفهم هي إسرائيل بتبيع سلاح بكام؟

بناء علي كلام إدارة التعاون الدفاعي الدولي International Defense Cooperation Directorate و دي إدارة جوه وزارة الدفاع الإسرائيلية و اللي الإسرائيليين بيقولوا عليها إختصاراً سيبات SIBAT فسنة 2022 كانت سنة بيزنس السلاح الإسرائيلي كل الشهد فيها لإنه حقق مبيعات وصلت 12.5 مليار دولار و ده رقم يخليك تهرش في شعرك .. السنة اللي قبليها اللي هي 2021 بيزنس السلاح الإسرائيلي جاب 11.4 مليار دولار .. ليه الأرقام دي مهمة؟ .. عشان خلال الفترة من 2011 لحد 2016 البيزنس ده مبيعاته نطت من 5.6  بقت 7.5 مليار دولار .. يعني خلال أقل من عشر سنين تقريباً الناس دي باعت سلاح جابلهم ضعف الفلوس .. بناء علي كلام الجنرال (يائير كولاس Yair Kulas) رئيس إدارة SIBAT فإنت بتتكلم عن بيزنس عرف خلال 5 سنين بس إنه يزود مبيعاته بنسبة 65%.

جزء مهم من الشرعية اللي واخداها إسرائيل عشان تبيع سلاح للي هي عايزاه هي إن محدش ماسك عليها ذلة .. بمعني .. معاك و خدامك أنا و العربية إن لحد ما حنفية الفلوس اللي فتحتها أميركا في أوكرانيا دي غرقت الدنيا كانت إسرائيل هي أكتر بلد في العالم بتاخد فلوس من أميركا علي شكل مساعدات عسكرية بس فيه نقطة .. سنة 1981 كم الفلوس اللي كانت إسرائيل بتاخدها من أميركا ضمن برنامج المعونة العسكرية كانت حوالي 10% من إجمالي الدخل القومي الإسرائيلي يعني كان رقم محترم يخلي الإسرائيليين يفكروا ألف مرة قبل ما يضايقوا الأمريكان .. سنة 2020 المبلغ اللي بتاخده إسرائيل من أميركا كل سنة اللي هو 4 مليار دولار بقي يدوبك 1% بس من إجمالي الدخل القومي الإسرائيلي .. بمعني أخر إن أميركا مبقتش تصرف علي إسرائيل زي زمان فده خلي الإسرائيليين يعتبروا نفسهم مش ملزمين يستأذنوا الأمريكان قبل ما يبيعوا سلاح لحد .. يا سيدي حار و نار في جتتهم بس الفكرة إنك تبقي فاهم ليه؟ .. أكيد يعني السلاح الإسرائيلي ده مش بيجي معاه عصاية (هاري بوتر) ولا الرجل الشمال بتاعة (ليونيل ميسي) .. إيه السر ورا النطة دي؟ .. الحقيقة إنك لو سألت الناس بتاعة SIBAT فهم عندهم نظرية بتقول إن فيه سببين ورا ده:

• أول سبب هو الواقع الجديد اللي خلقه الغزو الروسي لأوكرانيا إن كل الدول الأوروبية اللي جيران روسيا لازم يلحقوا نفسهم ويشتروا سلاح يأمنوا بيه نفسهم في حالة إن الروس هبت في دماغهم و قرروا يضربوهم.
• ثاني سبب هو إن دول عربية كتير أهمها دول الخليج بقت بتجري ورا إنها تشتري سلاح إسرائيلي بعد ما كتير من الدول دي طبعت علاقاتها الدبلوماسية مع إسرائيل .. حاول تفتكر إن سنة 2020 دول الإمارات العربية المتحدة و البحرين و المغرب مضت إتفاقية سلام غريبة جداً مع إسرائيل سموها إتفاقيات إبراهيم Abraham Accords قال يعني الدول الثلاثة قبل كده ضربوا ولو طلقة واحدة توحد ربنا علي إسرائيل بس يدوبك من بعد توقيع الإتفاقية دي مبيعات السلاح الإسرائيلية للدول الثلاثة نطت من 7% بقت 24% من إجمالي مبيعات السلاح الإسرائيلية.

الأرقام بتاعة SIBAT بتقدر تكملك الصورة بتاعة هو مين إشتري سلاح من إسرائيل:

• لو جيت تشوف أنهي أكتر منطقة في العالم إشترت سلاح من إسرائيل حتلاقيها منطقة أسيا و الدول اللي علي المحيط الهاديء و اللي أكتر من 30% من مبيعات السلاح الإسرائيلية راحتلهم .. يجي وراهم أوروبا اللي 29% من مبيعات السلاح الإسرائيلية كانت ليهم.
• لو إنت شاطر في الحساب فإنت فيه عندك 24% راحوا للدول العربية الثلاثة اللي هم الإمارات و البحرين و المغرب .. فيه 30% راحوا لأسيا .. فيه 29% راحوا لأوروبا .. كده فاضل 17% .. منهم 11% راحوا لدول أميركا الشمالية اللي هم أميركا و كندا و المكسيك .. و عندك 6% راحوا لدول أفريقيا و أميركا الجنوبية.

النقطة الثانية .. إزاي إسرائيل حققت النجاح ده في صناعة السلاح بتاعتها؟

بس الأرقام لوحدها مش حتقدر تفهمك ليه؟ .. إيه اللي بيخلي السلاح الإسرائيلي زي الفلافل المحشية السخنة اللي عليها سمسم و ريحتها بتخلي ريقك يجري .. الفكرة هي زي ما الناس بتاعة SIBAT قالت .. الواقع الجديد اللي خلقه الغزو الروسي لأوكرانيا .. دي حرب ورت ناس كتير إن الدنيا بدأت تتغير و إن المدرسة القديمة في التسليح و تكتيكات الحروب ممكن ميبقاش ليها مكان خلاص .. دي حرب ورتنا إن الطيارات بدون طيار Drones و كمان أنظمة الدفاع الجوي اللي بتقدر توقعها هي المستقبل .. ده يفسرلك ليه 25%  يعني الكوبشة الكبيرة من مبيعات السلاح الإسرائيلية كانت طيارات بدون طيار اللي فيه ناس بتسميها UAV اللي هي إختصار Unmanned Air Vehicles و علي فكرة سنة 2021 مبيعات إسرائيل من Drones كانت يدوبك 9% من إجمالي مبيعات السلاح بتاعتها فإنت متخيل إزاي الحرب في أوكرانيا خلت ناس كتير تجري علي مين بيصنع Drones و اللي كانوا الحقيقة يتعدوا علي الصوابع ومن ضمنهم الإسرائيليين .. تاني أكبر حاجة باعتها إسرائيل كانت الصواريخ و أنظمة الدفاع الجوي و كانت حوالي 19% من إجمالي المبيعات .. الرادارات و أنظمة الحرب الأليكترونية كانت 13% من إجمالي السلاح اللي باعته إسرائيل .. عايز أقولك إن فيه مفاوضات دلوقتي بين إسرائيل و ألمانيا عشان ألمانيا تشتري صواريخ Arrow 3 المضادة للصواريخ الباليستية و فيه كلام علي إن الصفقة دي ثمنها حيوصل 4.3 مليار دولار.

بس أرجع و أقولك ده الكلام اللي طالع من SIBAT يعني الكلام اللي طالع من بق الإسرائيليين و اللي طبيعي محدش فيهم حيقول حاجة وحشة عن نفسه بس الحقيقة أعقد سيكا من كده .. الحقيقة إن صناعة السلاح الإسرائيلية بتشمشم ورا أي تهديد جديد للأمن القومي لزباينهم عشان يجروا يسدوه بتكنولوجيا عسكرية تتباع بفلوس .. خد مثلاً عندك الإتحاد الأوروبي .. دول ناس كانوا مقضيينها مناحة بسبب التهديد اللي كان بيشكله تنظيم الدولة الإسلامية للعراق و الشام اللي يمكن إنت عارفه أكتر باسمه الدارج داعش أو ISIS .. بعد ما العراقيين لوحدهم من غير مساعدة حد خلصوا علي داعش طلع التهديد الجديد اللي هو الهجرة الغير شرعية و اللي كان عامل صداع في راس الأوروبيين لدرجة إنهم عملوا كيان جديد سموه فرونتيكس Frontex تقدر تقول إنه مباحث الجوازات و الهجرة بتاعة الإتحاد الأوروبي و مقرها في العاصمة البولندية وارسو عشان يلاقوا حل للكابوس ده من وجهة نظرهم و هنا بيجي دور الإسرائيليين .. الإسرائيليين راحولهم بحل هو طيارات بدون طيار حيرون Heron و هيرميس Hermes اللي حتفضل طايرة 24 ساعة فوق سواحل أوروبا علي البحر المتوسط عشان تخلي الناس بتوع Frontex قدامهم بث مباشر للسواحل بتاعتهم .. بسبب النجاح اللي حققته الطيارات بدون طيار دي فكيان زي Frontex تحول من مشروع تجريبي ميزانيته 6 مليون يورو سنة 2006 لمؤسسة إتصرف عليها سنة 2020 حوالي 460 مليون يورو ضمن مشروع محطوط لصرف 34.9 مليار يورو خلال الفترة من 2021 لحد سنة 2027.

علي الناحية الثانية فيه الوش التاني من الشريط اللي محدش بيتكلم عنه و هي إن زي ما إبليس مبيسبش حد غير لما يوسوله فبرده إسرائيل معندهاش مشكلة تبيع سلاح لأي حد .. باعوا سلاح لنظام التفرقة العنصرية في جنوب أفريقيا .. باعوا سلاح لأندونيسيا وقت ما كان ماسكهم الديكتاتور (محمد سوهارتو) .. باعوا سلاح لرومانيا وقت ما كان ماسكهم الديكتاتور (نيكولاي تشاوتشيسكو Nicolae Ceausescu) .. باعوا سلاح لتشيلي وقت ما كان بيحكمهم الديكتاتور (أوجستو بينوشي Augusto Pinochet) .. باعوا سلاح لشاة إيران (محمد رضا بهلوي) .. باعوا سلاح لباراجواي عشان الديكتاتور (ألفريدو سترويسنر Alfredo Stroessner) يخلص علي أي حد يفكر يقول لا .. تقريباً مفيش ديكتاتور قتل شعبه الإسرائيليين مباعلوهوش سلاح .. و زي ما قلت كله سلاح متجرب و أثبت كفاءة علي شعوب مستضعفة مش قادرة تدافع عن نفسها سواء الفلسطنيين أو السوريين أو اللبنانيين .. سلاح إتجرب في ناس علي باب الله إتباع عشان يقتل ناس تانية علي الله حكايتها و ده يبقي سر نجاح صناعة السلاح الإسرائيلية .. ده يفسرلك ليه محدش جوه المؤسسة العسكرية الإسرائيلية إشتكي من إرتفاع تكاليف إحتلالهم للأراضي الفلسطينية أو حصارهم لقطاع غزه .. عشان المصاريف دي جايبه همها في صفقات سلاح بتتباع .. يا مؤمن دي بلد من 2007 و البرلمان بتاعها محصلش إنه مرة واحدة يتيمة حتي يعترض علي صفقة سلاح تعملها الخكومة.

تبقي أهم نقطة عايزك تفهمها إن سبب أساسي في نجاح صناعة السلاح الإسرائيلية هو إن بيديرها كيان واحد اللي هو وزارة الدفاع و عشان تفهم الدور اللي بتلعبه وزارة الدفاع هناك في البيزنس ده تعالي نمسك منتج الإسرائيليين فرحانين بنفسهم أوي إنهم عملوه و كنا جبنا سيرته قبل كده وهو برنامج بيجاسوس Pegasus و ده برنامج بيقدر يعمل Hack علي أي موبايل أو كومبيوتر و اللي عملت البرنامج ده هي شركة قطاع خاص إسرائيلية اسمها NSO:

• المادة الخام ورا قطاع البرمجيات و التجسس الأليكتروني و كل الكلام المجعلص زي Hacking و Cyber Security و Data Mining و Analytical Software بتيجي من حاجة اسمها وكالة الأمن القومي الأميريكية National Security Agency و اللي يمكن إنت عدي عليك اسمها المختصر NSA .. ده جهاز مخابرات أميريكي متخصص في تكنولوجيا التجسس .. ده كلاوي الجينياص بتاع المخابرات الأميريكية و اللي بحكم القانون مٌجبر إنه كل ما يعملوا حاجة جديدة يدوها للإسرائيليين اللي هم كمان عندهم كيان متخصص في الكلام ده اسمه Unit 8200.
• كم التكنولوجيا و الشغل اللي بيتحط قدام Unit 8200 بيكون أكبر من قدرتهم علي استيعابه عشان كده الشغل ده بيروح لشركات صغيرة من الباطن بتتسمي Startups عشان هي تبدأ تطور من المادة الخام اللي بتيجي من NSA تعمل منها برامج تجسس جاهزة ينفع Unit 8200 تستخدمها علي طول .. ده معناه إن كل Startups دول مبيشتغلوش غير بأمر مباشر و تحت رقابة و عين المؤسسة العسكرية الإسرائيلية و من ضمن الشركات دي هي NSO اللي عملت برنامج Pegasus.
• لو بلد زي الإمارات حبت تشتري برنامج Pegasus فرغم إن شركة NSO هي اللي عاملاه يعني المنطق بيقول إن الإمارات تتعامل مباشرة مع الشركة إلا إن اللي بيحصل إن الإمارات بتقعد مع ممثل من وزارة الدفاع لإن صحيح علي الورق NSO هي المالكة لبرنامج Pegasus بس كلنا عارفين مين هو المعلم (عبدالملك زرزور) بتاع البيزنس.

بسبب إن زي ما إنت شايف مفيش بربع جنيه رقابة قضائية أو تشريعية علي صفقات السلاح اللي بتعملها إسرائيل فالصفقات دي أحياناً كتير بتؤدي لمصايب لإن محدش في إسرائيل بيسأل نفسه هو يا تري التكنولوجيا اللي بنبيعها دي حيتعمل بيها إيه؟ .. السؤال اللي بيتسأل هو المشتري معاه فلوس يدفع ولا لا .. و بما إننا بنتكلم عن برنامج Pegasus فخلينا نكمل في المصيبة اللي بيع تكنولوجيا زي دي عملتها:

سنة 2011 الحكومة المكسيكية اللي كانت دايخة لشوشتها في حرب مفتوحة مع عصابات تهريب المخدرات راحت إشترت برنامج Pegasus ده من إسرائيل .. فجأة مباحث مكافحة المخدرات في المكسيك بقي تحت إيدها أداة بتخليهم يتنصتوا علي أي مكالمة تليفون و يقروا أي رسالة علي الواتس يبعتها أي إتنين تجار مخدرات لبعض .. سيل المعلومات ده هو اللي خلي المكسيكيين سنة 2016 يقدروا يقبضوا علي زعيم تنظيم سينولاCartel  Sinaloa لتهريب المخدرات اللي معروف باسم (إل تشابو El Chapo) .. شوية و خبر إن مباحث مكافحة المخدرات في المكسيك بتستخدم برنامج Pegasus إتسرب للإعلام و من ساعتها و عينك ما تشوف إلا النور .. تجار المخدرات في المكسيك بقي عندهم حالة هلع من إن أي مكالمة تليفون أو أي رسالة بيبعتوها بقي سهل تتلقط و تتسجل فبقوا بيقتلوا في بعض و بقوا بيستهدفوا الصحفيين اللي هم شاكين فيهم إنهم جواسيس لحساب مباحث مكافحة المخدرات .. ده في الوقت اللي المكسيك و دي معلومة ممكن تصدمك هي أكتر بلد في العالم شعبها بيشرب حاجة ساقعة خصوصاً الكوكاكولا فكانت فيه حملة ضخمة جداً بتدعوا إن الحكومة تفرض ضرائب زيادة علي شركات الحاجة الساقعة عشان الشعب المكسيكي بقي أكتر شعوب الأرض عنده مرض السكر فقامت الحكومة المكسيكية مستخدمة برنامج Pegasus ده عشان تتجسس علي المعارضة .. يعني الحكومة اللي إشترت تكنولوجيا كان المفروض تستخدم ضد عصابات تهريب المخدرات بس لما حست إن الكرسي بيتسحب منها بقت بتستخدم التكنولوجيا دي ضد شعبها .. السؤال دلوقتي .. دي مشكلة مين؟

لو إنت رجل عندك بيزنس إنك بتبيع سكاكين مطبخ فالمفروض إن السكاكين بتاعتك دي معمولة عشان الناس تستخدمها في المطبخ .. صحيح ممكن ست كفرانة من جوزها تقتله و تقطعه حتت و تعبي جثته في كياس زبالة سودا و تدفنه في أي خرابة و سلاح الجريمة حيبقي السكاكين بتاعتك بس إنت كرجل بتبيع سكاكين ملكش دعوة .. ده المنطق ورا البيع و الشراء .. أنا ببيع منتج علي أمل إن الزباين بتوعي ميستخدمهوش في الشر و الجريمة .. أجانص العربيات بيبيع عربيات عشان ناس تشتغل عليها أوبر و كريم و تكسب من عرق جبينها و في نفس الوقت بيبيع عربيات تجار المخدرات بيستخدموها عشان يهربوا فيها هروين .. بس في نفس الوقت شركات تصنيع التكنولوجيا و خصوصاً NSO مينفعش تتحاسب بنفس المسطرة .. شركة NSO مش بتبيع سبح .. دي شركة بتبيع برنامج بيقدر يتجسس علي مكالمات .. ده برنامج مش معمول عشان يتباع لأي ست شاكة إن جوزها بيخونها .. ده برنامج معمول مخصوص عشان حكومات تتجسس علي بني أدمين .. ممكن البني أدم ده يبقي مجرم فعلاً و ممكن البني أدم ده يبقي ناشط سياسي .. في الحالة الأولانية استخدام الحكومة لبرنامج Pegasus حيبقي منطقي و مفهوم و مبرر بس في الحالة الثانية حيبقي جريمة .. ده السبب اللي حد زي (جيريمي فليمينج Jeremy Fleming) المدير السابق لحاجة اسمها GCHQ و دي تبقي النسخة بتاعة NSA بس في بريطانيا و بالمناسبة يعني GCHQ إختصار Government Communications Headquarters شايف إن شركة زي PSO مينفعش بأي حال من الأحوال تبيع تكنولوجيا زي Pegasus لأي كيان أجنبي لإن محدش عارف ممكن سلاح زي ده يستخدم إزاي.

اللي أنا عايز أختم بيه إن بيزنس صناعة السلاح في إسرائيل قائم علي فكرة بسيطة و سهلة و هي إننا بنجرب السلاح ده في ناس غلابة مش قادرة تدافع عن نفسها و بنبيعه لناس عايز تفتري علي خلق الله .. فلسفة وسخة بس بتجيبلهم فلوس .. مش معني إني قلت في المقدمة إن مش عيب نتعلم من عدونا إنك تاخد ده كأني بقولك لازم نقلدهم .. بالعكس .. إنت المفروض تفضحهم و في نفس الوقت تاخد الحلو من طريقتهم و هي إزاي إنت كبلد يبقي عندك منظومة ما إن يبقي عندك المهندسين و الفنيين بتوعك اللي بيصنعولك تكنولوجيا تستخدمها و تكون متفصلة علي مقاسك .. بس لو حبيت تبيعها لازم تمشي بما يرضي الله عشان ربنا يباركلك في شغلك مش إن أي حد معاه فلوس ريقك يجري و توافق تبيعله و إنت عارف إنه شيطان.

المصادر:

• مقالة بعنوان Israel arms sales doubled in a decade, hit new record of $12.5 billion in 2022 نشرت في جريدة The Times of Israel و ده لينك المقالة الأصلية:
  https://www.timesofisrael.com/israeli-arms-sales-doubled-in-a-decade-hit-new-record-of-12-5-billion-in-2022/
• مقالة بعنوان The Harvard of anti-terrorism: How Israel’s military-industrial complex feeds the global arms trade نشرت في موقع The Conversation و ده لينك المقالة الأصلية:
  https://theconversation.com/the-harvard-of-anti-terrorism-how-israels-military-industrial-complex-feeds-the-global-arms-trade-204758