لينك التسجيل الصوتي علي ساوند كلاود:
https://on.soundcloud.com/C9Rru
أنا أفتكر سنة 2008 نزل فيلم أمريكاني اسمه Eagle Eye .. هو فيلم حلو الصراحة ولو إنت متفرجتش عليه أنصحك تشوفه بس مش ححرقهولك متقلقش .. أنا بس عايز أتكلم عن مشهد في بداية الفيلم .. المشهد ده إن الأمريكان كانوا عايزين يغتالوا قيادي من طالبان في أفغانستان فبعتوله طيارة بدون طيار Drone .. وقتها الطيارات بدون طيار دي كانت خيال علمي .. إزاي طيارة تكون بتطير فوق أفغانستان بس الطيار اللي بيسوقها قاعد قدام شاشة كومبيوتر و معاه Joystick زي بتاع Videogames و هو قاعد في أمريكا؟ .. إزاي طيارة يتركب عليها كاميرا تقدر تصور كل اللي واقفين علي الأرض و تفضل تقارن وشوشهم عن طريق برنامج تعرف علي وشوش الناس Facial Recognition Software يعني برنامج متسجل فيه صورة اللي عايزين يموتوه و كل صورة الكاميرا تصورها للناس اللي علي الأرض تقارنها بالصورة المتسجلة؟ .. إيشي خيال يا ناس؟ .. وقتها مكنش فيه بلد في العالم عندها أسطول طيارات بدون طيار غير أميركا .. لكن دلوقتي الوضع إختلف خالص يا (لينا) .. ليبيا بقوا الناس فيها بيضربوا بعض بالطيارات بدون طيار زي ما يكونوا بيلعبوا أتاري .. الصين بقت بتوزع طيارات بدون طيار ولا اللي واقف قبل الفطار بيوزع عصير و تمر علي الناس اللي ماشية في الشارع .. طب خد التقيلة بقي .. فيه طيارة بدون طيار أمريكاني أُسقطت في اليمن بأنظمة دفاع جوي روسي .. شايفين عالم الإحتراف لما يخش في الحروب .. وسط المولد اللي صاحبه غايب ده أنا حابب النهاردة أفهمك هو إيه اللي حصل؟ .. عايزين نفهم هو إزاي أميركا البساط إتسحب من تحت رجليها؟ و الأهم نفهم هو مين دلوقتي بقي بيصنع طيارات بدون طيار؟
بس قبل ما نوصل لخوازيق النهايات خلينا الأول في حلاوة البدايات .. تكنولوجيا الطيارات بدون طيار بدأها الإسرائيليين في الثمانينات و بعد كده الأمريكان خدوا الفكرة و طاروا بيها .. أكيد مش أنا الوحيد اللي شفت الطيارات بدون طيار في فيلم Eagle Eye و قلت لنفسي اوووه مااااي جااااد .. فيه دول كتير ريقها جري و راحت لماما أمريكا تبيعلها الطيارات دي وهنا ظهرت المشكلة اللي إحنا فيها دلوقتي .. الأمريكان في الأول رفضوا بشكل قاطع إنهم يبيعوا تكنولوجيا الطيارات بدون طيار دي لأي حد علي أساس إنهم كانوا عايزين يحتفظوا بالتكنولوجيا دي لنفسهم .. عندك مثلاً الإماراتيين اللي في بداية الألفينات راحوا للأمريكان قالولهم نبغي الطيارات اللي بتطير لوحدها دي و الأمريكان رفضوا .. الإماراتيين يقولولهم يهديك يرضيك و الأمريكان مش عليهم غير كلمة واحدة .. سوري مش للبيع .. لحد ما في 2013 أخيراً يعني الأمريكان تكرموا و وافقوا يدوا الإماراتيين النسخة اللي مش مسلحة من الطيارات بدون طيار بريداتور Predator .. الإماراتيين قالوا للأمريكان وهو إحنا المفروض نعمل إيه بالبتاعة اللي مش بتشيل صواريخ دي .. نفس الموقف هو هو حصل مع الأردنيين اللي برده في 2015 طلبوا يشتروا طيارات بدون طيار و الأمريكان رفضوا .. قدام الناس الأمريكان بيقولوا و الله يا جدعان مش بإيدينا إحنا ماضيين علي إتفاقية اسمها التحكم في تكنولوجيا الصواريخ Missile Technology Control Regime و ماضي معانا عليها 35 دولة و الإتفاقية دي هي اللي بتحكم صفقات بيع الطيارات بدون طيار و الصواريخ بعيدة المدي و اللي بتقول إن مينفعش نبيع طيارات بدون طيار تقدر تشيل صواريخ.
هنا بقي يجي دور التاجر الصايع اللي قاري السوق و قرر إنه يستفيد اللي هو الصين .. قانوناً الصين مش ماضية علي إتفاقية Missile Technology Control Regime .. الصين راحت لدول المفروض يعني إنهم حلفاء استراتيجين لأميركا زي الإمارات و مصر و الأردن و تركيا و باعتلهم طيارات بدون طيار .. و مش بس الصين .. أنا النهاردة عايز أقف قصاد 3 تجار مسيطرين علي السوق اللي هم الصين و إيران و تركيا .. كل تاجر ماشي بدماغ و بيصنع طيارات بدون طيار عشان يا يبيعها لدول أميركا مكانتش عايزاها يبقي تحت إيدها السلاح ده أو عشان بمنتهي البساطة ينكد علي الأمريكان عيشتهم.
الصين .. البهظ بيه بتاع الطيارات بدون طيارات:
في بيزنس الطيارات بدون طيار الصين تعاملت بجملة إتقالت في فيلم الكيف و بتعبر أوي عن Business Model أو طريقة شغل الصينيين في المجال ده .. الله يرحمه (محمود عبدالعزيز) قال شغل الكيف شهبشة واللي يدوق حلاوته مينساهوش .. سنة 2015 الأردن كانت عايزة تشتري من أميركا طيارات MQ-9 Reaper النسخة الأحدث من MQ-1 Predator و الأمريكان رفضوا زي ما قلت .. الصينيين راحوا للأردنيين قالولهم خدوا طيارات Rainbow CH-4 اللي من تصنيع شركة صيني اسمها Aerospace Long March International .. فعلياً CH-4 مش أحسن من Predator .. هي شبهها بس مفيهاش نفس إمكانياتها .. يعني مثلاً CH-4 مفيهاش حاجة اسمها Satellite Link يعني عشان تتحكم في الطيارة لازم تبقي إنت شايفها بعنيك و ده عيب إتعالج بعد كده في النسخة اللي وراها CH-5 .. بس بمجرد ما الأردنيين داقوا الكيف دخل دماغهم .. بمجرد ما دخل دماغهم مبقاش عندهم مشكلة يشتروا الصيني التعبان ما هو كده كده الأمريكان مش حيبيعولنا البريمو .. معلش أنا حاسس إني قلبت علي تاجر حشيش .. بالنسبة للتسليح فطيارات CH-4 اللي الأردنيين استلموها إتركب فيها صواريخ صيني اسمها AR-1 مضادة للدبابات .. بعد الأردن جه الدور علي العراق .. العراق هي كمان إشترت طيارات CH-4 من الصين و استخدموها بشكل مكثف في حربهم ضد داعش .. علي حسب كلام شركة Aerospace Long March International الصيني اللي زي ما قلتلك بتصنع طيارات CH-4 فالعراقيين استخدموا الطيارات دي في تنفيذ 260 غارة ضد عناصر داعش بنسبة نجاح 100% .. صحيح أنا بقلق من إن حد يقولي إن نسبة نجاح أي حاجة وصلت 100% إياكش حتي يكون بيتكلم عن نسبة نجاح اسم (شيكابالا) في أي بوست علي سوشيال ميديا إنه يعمل خناقة بين الأهلاوية و الزملكاوية بس معلش .. أنا بقلق برده.
الموقع الرسمي بتاعه شركة Aerospace Long March International بيقول إن زباين الشركة منهم مثلاً الجزائر و نيجيريا و الأردن و زامبيا و العراق و السعودية و أثيوبيا و تركمانستان و باكستان و ميانمار .. شركة General Atomics Aeronautical Systems اللي بتصنع Predator و Reaper ياما إتنبح صوتها بإن رفض أميركا إنها تبيع طيارات بدون طيار حتي لدول حليفة ليها بيضيع من إيدها فلوس زي الفل .. تقارير كتير قالت إن الشركة راح من إيدها صفقات كان ممكن يوصل ثمنها 50 مليار دولار و الفلوس دي كلها راحت للصين.
إيران .. إحنا مش عايزين غير إننا نعكنن علي السعوديين:
مفيش حاجة بتحسن مود الإيرانيين غير إنهم يعملوا حاجة تنكد علي السعوديين حياتهم .. كل ما هرمونات الإيرانيين تتلخبط يقوموا معكنيين علي السعوديين و مفيش حاجة بتعكنن علي السعوديين قد إن الحوثيين يضربوا السعودية بسلاح إيراني .. لفترة مش قصيرة و كان السؤال هو إزاي السلاح الإيراني ده بيوصل للحوثيين في اليمن لحد ما في الفترة من نوفمبر 2019 لحد فبراير 2020 و البحرية الأميريكية في الخليج العربي لقطت سفن شراعية اللي بتتسمي داو متحملة سلاح إيراني و بتعدي الخليج العربي عشان توصل لسواحل اليمن .. من ضمن السلاح الإيراني اللي وصل للحوثيين كان الطيارة بدون طيار شاهد 129 اللي تعتبر نسخة طبق الأصل من الطيارة بدون طيار الأمريكاني Predator .. ومش بس اليمن .. الإيرانيين لما بيعملوا طيارة بدون طيار جديدة يبعتوها الأول سوريا تتجرب.
بداية علاقة الإيرانيين بالطيارات بدون طيار كانت سنة 2011 لما إتقال إن الدفاع الجوي الإيراني عرف يشوش علي رادار طيارة بدون طيار أميريكية RQ-170 Sentinel و وقعوها .. لحد دلوقتي الموضوع عادي أهو .. سنة 2014 إيران طلعت و قالت إن بقي عندها طيارة بدون طيار سموها صاعق ولما بصينا عليها لقيناها نسخة طبق الأصل من RQ-170 Sentinel .. ده معناه إن الإيرانيين فكوا الطيارة الأمريكاني و فهموا هي بتتعمل إزاي و بشوية Reverse Engineering أو هندسة عكسية عرفوا يعملوا واحدة زيها .. ومش بس صاعق اللي تعتبر نسخة من RQ-170 Sentinel لإن الإيرانيين عملوا طيارة بدون طيارة شبهها برده اسمها شاهد 171 .. في فبراير 2018 إيران طارت بطيارة شاهد 171 من سوريا فوق المجال الجوي الإسرائيلي و الإسرائيليين وقعوها بصاروخ إتضرب من طيارة هليكوبتر أباتشي Apache.
تكنولوجيا إيران في الطيارات بدون طيار تعتبر بدائية شوية وهي إن الطيارة نفسها تعتبر إنتحارية .. إنت بتبعت الطيارة و بتكون شايلة متفجرات أو صاروخ عشان تطير فوق الهدف بتاعها و توقع نفسها بالمتفجرات اللي فيها عشان تفرقعه .. الطيارة نفسها مبترجعش .. مش زي مثلاً الطيارة بدون طيار الأمريكاني Predator اللي تقدر تضرب أي هدف بصواريخ Hellfire و ترجع سليمة عادي خالص.
تركيا .. المشروع اللي مشي ببركة دعا الوالدين:
علاقة تركيا بالطيارات بدون طيار لما أحكيهالك حتحس إنها مشيت بالواسطة بس رأيي أنا الشخصي إنها مشيت ببركة دعا الوالدين .. عارفك مستغرب بس اسمحلي أفهمك .. سنة 1975 بسبب الغزو التركي لقبرص فالأمريكان فرضوا حظر تصدير سلاح علي تركيا و القرار ده كان السبب إن الأتراك يصحوا الصبح يقولوا إحنا من هنا و رايح مش حنعتمد علي إننا نشتري سلاح من أمريكا .. من هنا و رايح لازم نصنع سلاحنا بنفسنا و من هنا إتولدت شركة صناعة الطيران التركية Turkish Aerospace Industries أو TAI إختصاراً ..دي شركة قطاع عام من ضمن شركات كتير تابعة لوزراة الدفاع التركية إتعملت مخصوص عشان الحكاية دي .. الشركات دي بدأت تشتغل في حاجات خفيفة زي إنها تصنع ذخيرة أو أجهزة راديو .. شوية وبدأت تجرب حظها في مشاريع كبيرة شوية زي الطيارات و الصواريخ الموجهة .. أول خطوة تاخدها تركيا في سكة الطيارات بدون طيار كانت سنة 1996 لما إشترت 6 طيارات بدون طيار GNAT 750 من تصنيع شركة General Atomics الأميريكية .. الطيارات دي استخدمت في العمليات العسكرية ضد جيش العمال الكردستاني عشان تبقي زي ما تقول كده كاميرات مراقبة طايرة في الجو تراقب تحركات المسلحين الأكراد مش أكتر.
سنة 2006 تركيا لبست أحلي خازوق في حياتها لما مضت عقد مع إسرائيل عشان تشتري منها 10 طيارات بدون طيار حيرون Heron .. شوف يا أخي بقي وساخة الإسرائيليين .. يعني أنتوا أساساً بايعين للأتراك نسخة من الطيارات مش مسلحة و قلنا ماشي .. قلتوا عشان نسلم الطيارات دي لتركيا محتاجين 5 سنين و لما الأتراك استلمومهم لقوا إن المحركات و كاميرات التصوير بتاعتهم بايظة فرجعوهم تاني لإسرائيل عشان يتصلحوا و قعدوا هناك سنتين كمان .. هري هري هري .. الأتراك بقي عندهم قناعة بإن لو هم ناويين يدوسوا في سكة الطيارات بدون طيار فالحل مش في إسرائيل اللي أساساً العلاقة بينهم باظت خالص سنه 2010 لما قوات خفر السواحل الإسرائيلية قتلت 9 مواطنين أتراك حاولوا يكسروا الحصار المفروض علي غزة لو تفتكر و بسبب الحادثة دي تركيا قطعت علاقاتها الدبلوماسية مع إسرائيل .. في نفس السنة اللي هي 2010 تركيا قدمت للعالم أول طيارة بدون طيار تصنيع محلي اسمها العنقاء أو Anka من تصنيع شركة TAI .. هي طيارة نسبياً حلوة .. بتقدر تطير 24 ساعة متواصلة علي إرتفاع بيوصل 10,000 متر بس فيها عيب مهم .. هي مش مسلحة .. فضلت الحتة دي بالذات قارفه المؤسسة العسكرية التركية .. هم عايزين طيارة مسلحة بدون طيار بس مينفعش نشتريها من إسرائيل و الأمريكان مش حيرضوا يدوهالنا.
هنا يجي دور اللي أمه دعياله (سلجوق بيرقدار Selcuk Bayraktar) .. الواد ده سنة 2005 كان عنده 26 سنة معاه بكاليريوس هندسة كهرباء من تركيا و معاه ماجستير هندسة كهربية من جامعة بنسلفانيا في أميركا و بيحضر دكتوراه في معهد MIT .. في الوقت ده كتير من زمايل (سلجوق) سواء الأتراك أو حتي مش أتراك اللي بيدرسوا في أميركا شغالين لحساب شركات أميريكية في كذا مجال من ضمنهم الأسلحة و أكتر سلاح الناس وقتها كانت بتتكلم عنه هو الطيارات بدون طيار .. رسالة الدكتوراه بتاعته كانت برنامج كومبيوتر Algorithm عشان يهبط بالطيارة بدون طيار علي أرض مش ممهدة زي مثلاً سفح جبل .. (سلجوق) في السنة دي بني Model لطيارة بدون طيار و سافر تركيا عشان يعرضه علي مسئولين وزارة الدفاع .. في Presentation بتاعته قالهم إن دلوقتي شركات زي بوينج Boeing و لوكهيد مارتن Lockheed Martin بيدوسوا أوي في مجال الطيارات بدون طيار ولو تركيا حبت تخش المجال ده فخلال سنتين بس حتبقي من أهم مصنعي Drones في العالم .. المسئولين الأتراك زي أي مسئولين مش عايزين وجع دماغ قالوله الله ينور يا هندسة بس سيبلنا رقم تليفونك و إن شاء الله حنكلمك .. سنة 2007 (سلجوق) لغي رسالة الدكتوراه بتاعته و قرر يرجع تاني تركيا .. أبوه هو كمان كان مهندس و سنة 1984 كان عمل شركة اسمها بيرقدار ماكينا Bayraktar Makina شغالة في تصنيع قطع غيار السيارات لإن وقتها الحكومة التركية كان عندها حلم إن في يوم من الأيام حتصنع أول عربية تصنيع محلي في تركيا و عشان تصنع عربية أكيد محتاج قطع غيار .. لما (سلجوق) رجع تركيا قرر يغير البيزنس بتاع شركة أبوه من تصنيع قطع غيار العربيات لتصميم و تصنيع الطيارات بدون طيار.
سنة 2015 الدنيا بدأت تندع لما (سلجوق) عرض علي المؤسسة العسكرية التركية الحل للمشكلة اللي هم فيها .. الحل كان طيارة بدون طيار هو صممها بنفسه و سماها علي اسمه TB2 .. هو اللي حصل إن سنة 2007 شركته خدت مناقصة إنها تبيع للجيش التركي 19 طيارة بدون طيار للمراقبة الجوية بس هو فعلياً باس إيد المؤسسة العسكرية إنها تسيبه ينضم للقوات اللي حتستلم الطيارات بتاعته عشان يشوف هم بيستخدموها إزاي و إيه المشاكل اللي بتواجههم .. سنة 2015 هو جرب طيارته الجديدة TB2 و اللي ركب فيها صاروخ موجه بالليزر تصنيع محلي تركي و قدر يضرب بيه هدف علي بعد 4 كيلومتر .. لسه المؤسسة العسكرية حتقوله طب برافو سيبلنا رقم تليفونك و حنكلمك زي ما عملوها معاه زمان قام رازعهم واحدة أنا إتجوزت البنت الصغيرة للرئيس التركي (رجب طيب أردوغان) .. في السنة دي (سلجوق) بقي الأب الروحي لمشروع الطيارات بدون طيار التركي.
حالياً طيارات TB2 تعتبر العمود الفقري لأسطول الطيارات بدون طيار التركي .. الطيارة الواحدة بتقدر تطير 24 ساعة متواصلة علي إرتفاع 7200 متر و لمسافة بتوصل 150 كيلومتر .. بتقدر تشيل حمولة بتوصل 60 كيلوجرام .. حالياً تركيا عندها 75 طيارة منها بيطيروا في الشهر أكتر من 6000 ساعة و ده اللي أنا محتاج أقف قدامه شوية .. هو أسطول الطيارات بدون طيار التركي ده بيهبب إيه في عيشته .. أنا مش مواطن تركي عشان دمي يتحرق أوي علي فكرة الخصوصية و التجسس و إن الطيارات دي بتصور خلق الله بدون وجه حق .. دي قضية داخلية الأتراك أحرار فيها و أنا مليش سلطة أتكلم .. لكن اللي أنا لازم أتكلم فيه هو إني لما أسمع من مصادر رسمية تركية إن خلال الفترة من يناير لحد إبريل 2018 يعني في 4 شهور بس الطيارات بدون طيار التركية قتلت 449 بني أدم في غارات جوية إتنفذت في شمال العراق و سوريا يبقي لازم نسأل هو فيه إيه؟ .. تاني .. الأتراك جوه بلدهم هم أحرار .. من 2016 لحد دلوقتي أسطول الطيارات بدون طيار التركي مسئول عن مقتل أكتر من 400 بني أدم من الأكراد مقتولين جوه الأراضي التركية .. و مش بس سوريا و العراق اللي الطيارات بدون التركية شغالة فيها الله ينور .. فيه كمان ليبيا.
الخناقة بين الأتراك و القطريين من ناحية و بين الثلاثي الإمارات و مصر و السعودية من ناحية تانية بخصوص ليبيا حاجة تبصلها و تضرب كف علي كف .. قانوناً فالأمم المتحدة فارضة حظر تصدير أسلحة لليبيا .. يعني علمياً مينفعش حد يبعت سلاح لليبيا .. عملياً بقي فيه مهرجان السلاح للجميع هناك .. القطريين و الأتراك واقفين في صف حكومة الوفاق الوطني اللي قاعدة في العاصمة طرابلس و ماسكها واحد اسمها (فايز السراج) و المُعترف بيها دولياً .. الإماراتيين و إحنا و السعوديين واقفين ورا الجنرال (خليفة حفتر) اللي قاعد في مدينة بنغازي .. الأتراك يبعتوا لحكومة الوفاق الوطني طيارات بدون طيار اسمها TB2 من عندهم .. و الإماراتيين يبعتوا ل(خليفة حفتر) طيارات بدون طيار صيني من طراز Wing Loong .. الحرب دي حتخلص علي إيه؟ الله أعلم و ببقي بفتي لو قلتلك إن عندي إجابة.
اللي أنا عرضته النهاردة هي تجارب 3 دول مختلفة مع الطيارات بدون طيار .. دول شافت إن السوق جعان والأمريكان مش عايزين يدخلوه فليه لا ندوس فيه إحنا .. 3 دول تجاربهم مختلفة خالص عن بعض .. 3 دول قرروا إنهم يكتبوا هم مصيرهم بنفسهم سواء بقي إنت معاهم ولا ضدهم في سياساتهم دي حاجة ممكن نتكلم عنها بعدين مش دلوقتي .. بس المهم إن الدول دي قررت إنها تصرف و تجرب و تصنع .. يمكن في يوم من الأيام نتعلم منهم.
المصادر:
- مقالة بعنوان The U.S. Risks Losing the Drone-War Arms Race نشرت في مجلة The National Review وده لينك المقالة الأصلية:
https://www.nationalreview.com/2020/05/drone-war-arms-race-united-states-risks-losing/ - مقالة بعنوان Why is Iran Bragging about ‘Replicating’ an Israeli Missile? نشرت في جريدة The Jerusalem Post وده لينك المقالة الأصلية:
https://www.jpost.com/middle-east/iran-news/why-is-iran-bragging-about-replicating-an-israeli-missile-625276 - مقالة بعنوان Who Has What: Countries with Armed Drones نشرت علي موقع New America وده لينك المقالة الأصلية:
https://www.newamerica.org/international-security/reports/world-drones/who-has-what-countries-with-armed-drones/ - مقالة بعنوان China Has Already Won the Drone Wars نشرت في مجلة Foreign Policy وده لينك المقالة الأصلية:
https://foreignpolicy.com/2018/05/10/china-trump-middle-east-drone-wars/ - مقالة بعنوان Besieged Airbase Shows Turkey Turning the Tide in Libya’s War نشرت في مجلة Bloomberg وده لينك المقالة الأصلية:
https://www.bloomberg.com/news/articles/2020-04-17/besieged-airbase-shows-turkey-turning-the-tide-in-libya-s-war - مقالة بعنوان The Second Drone Age: How Turkey Defied the U.S. and Became a Killer Drone Power نشرت في مجلة The Intercept وده لينك المقالة الأصلية:
https://theintercept.com/2019/05/14/turkey-second-drone-age/
