فعلياً و الله و دي شهادة لله يعني نادر أوي تلاقي بلد تقف جنب بلد في وقت زنقتها زي ما السعودية وقفت جنب باكستان في السبعينات .. المفروض يعني باكستان تشيل الهلال و النجمة في علمها و تحط مكانهم صورة الملك (فيصل) الله يرحمه .. المشكلة إن زي ما السعوديين بقي ليهم تصور تاني خالص عن علاقتهم مع باكستان فبرده الباكستانيين بقي ليهم تصور تاني خالص عن مستقبلهم كدولة .. فعلياً و مش ببالغ لو قلتلك إن باكستان إترمت في حضن الصين.
فيه دول كتير ريقها جري و راحت لماما أمريكا تبيعلها الطيارات دي و هنا ظهرت المشكلة اللي إحنا فيها دلوقتي .. الأمريكان في الأول رفضوا بشكل قاطع إنهم يبيعوا تكنولوجيا الطيارات بدون طيار دي لأي حد علي أساس إنهم كانوا عايزين يحتفظوا بالتكنولوجيا دي لنفسهم.
القصة دي بدأت في نوفمبر 2011 أيام ثورات الربيع العربي لو تفتكر .. بعد ثورات و مليونيات و مصادمات و إعتصامات وخناقات قرر الديكتاتور اليمني (علي عبدالله صالح) الله يرحمه إنه يسيب الحكم خالص و يتنحي و اللي يمسك مكانه هو النائب بتاعه (عبدربه منصور هادي) .. حركة كده زي حركة تنحي الرئيس (محمد حسني مبارك) الله يرحمه بس بدل ما (مبارك) إتحاكم في مصر ف(علي عبدالله صالح) قعد في السعودية مأنتخ و مفخد و ساب (عبدربه منصور هادي) يشيل الليلة.