فيلم Angel has Fallen مش من الأفلام الكويسة .. في رأيي حتي هو أقل فيلم من حيث المستوي في سلسلة has Fallen كلها .. بس الفيلم ده فيه مشهد بيوريك إن تكنولوجيا الحروب داخلة علي مرحلة غريبة جداً و المشهد ده هو محاولة إغتيال الرئيس الأميريكي بسرب من الطيارات بدون طيار Unmanned Aerial Vehicles و اللي بتتسمي يا UAVSs أو Drones كل واحدة فيهم متركب عليها عبوة ناسفة و بتنزل علي الهدف بتاعها تفجره .. في مقالة قبل كده كنت إتكلمت عن Drone شبه كده اسمها KUB-UAV بتصنعها شركة كلاشينكوف جروب Klashinkov Group الروسية بس اللي أنا عايز أتكلم عنه النهاردة هو إني أبص لفكرة الطيارات بدون طيار من فوق اللي هو نظرة طائر محلق علي رأي (عمرو أديب).
زمان كان بيتبص لDrones دي علي إنها حاجة معقدة بتتشاف في أفلام الخيال العلمي و مفيش غير الجيوش المتطورة اللي معاها فلوس هي اللي تقدر تستخدمها .. دلوقتي أي حد يقدر يطلب أوردر من علي أمازون عشان يبقي تحت إيده Drone بسهولة أوي ممكن تحولها لعبوة ناسفة طايرة في الهوا .. إنت دلوقتي في عصر إن مش بس الأمريكان اللي معاهم تكنولوجيا توجيه الصواريخ بGPS .. إنت في عصر إن عناصر تنظيم القاعدة مثلاً يقدروا يعملوا غارة علي قاعدة جوية في أي حتة بسرب طيارات بدون طيار لا و كمان بيبقوا متوجههين بGPS .. كون إن أي حد بقي معاه Drones مخلي إن مثلاً حركة حماس مش كل ما إسرائيل تقرر تنكد علي عيلة في القطاع بإنها تقتل حد من عيالها في غارة جوية إنهم يفضلوا ساكتين .. حماس كمان ممكن تنكد علي الإسرائيليين و تبعتلهم طيارة بدون طيار بصاروخ صحيح صغير بس أهي عكننة بعكننة .. عشان تفهم أنا عايز أقول إيه لازم أديلك كذا مثال مختلفين عن بعض عن إزاي الطيارات بدون طيار فعلياً بتخلينا نعيد كتابة منهج الحروب الحديثة و كل مثال حتطلع منه بحاجة مختلفة.
الأتراك و الأكراد .. حتعورني حعورك و حبوظلك منظرك:
القوات المسلحة التركية حالياً في مواجهة محدش عارف حتخلص علي إيه مع الأكراد سواء جوه تركيا أو في سوريا أو حتي في العراق .. كان زمان الأتراك بس متخانقين مع حزب العمال الكردستاني بس دلوقتي هم تقريباً متعاركين مع الأكراد كلهم و بغض النظر هي الخناقة دي ليه و إيه أسبابها بس اللي أنا عايزك تكون عارفه إن بداية من يوم 9 أكتوبر 2019 و ده اليوم اللي (دونالد ترامب) قرر يسحب فيه القوات الأميريكية من سوريا و إتكلمنا عن الموضوع ده قبل كده و الأتراك مصعدين من شغل قواتهم المسلحة في شمال سوريا عشان يعملوا منطقة عازلة علي طول الحدود التركية السورية .. كان زمان الأتراك لما يحبوا يخشوا حتة معينة بيبعتوا قواتهم البرية و معاها غطاء جوي و غالباً القوات التركية دي بتتعرض لكمين و بيموت فيه عساكر كتير .. خلال العشر سنين اللي فاتوا و الأتراك بقوا بيستخدموا أسلوب جديد شوية و هو إنهم يعتمدوا علي الطيارات بدون طيار الأول لاستطلاع المنطقة اللي هم عايزين يخشوها .. لو الطيارات دي لقت مسلحين أكراد فيا إما الطيارة بدون طيار بتعلم عليهم بشعاع ليزر عشان طيارة مقاتلة من طراز F-16 Fighting Falcon اللي تعتبر العمود الفقري لسلاح الجو التركي و إتكلمنا في ده قبل كده مثلاً تضربهم بصاروخ أو إن الطيارة اللي بدون طيار نفسها تبقي مسلحة بصواريخ و تضرب هي المسلحين الأكراد .. بعد ما سلاح الجو التركي يأمن المنطقة ساعتها القوات البرية بتخش.
التكتيك ده بدأ يخلي أعداد الضحايا اللي بتقع في القوات المسلحة التركية بيقل جامد .. تحت إيد الأتراك 3 أنواع مختلفة من الطيارات اللي بدون طيار .. النوع الأول هو Mini Drones و دي الطيارات الصغيرة اللي بتستخدم للاستطلاع و التصوير الجوي و دي بتبقي شبه اللي إنت بتقدر تشتريهم من Amazon كده .. النوع الثاني هو Drone أكبر شوية اسمها أنقرة-إس Ankra-S و دي معمولة للاستطلاع .. النوع الثالث اسمه بيرقدار Bayraktar TB-2 و دي الDrone الوحيدة اللي تقدر تشيل صواريخ تحت إيد سلاح الجو التركي.
علي الناحية الثانية الأكراد نفسهم مش ساكتين .. مش بس هم بيلجأوا إنهم يحرقوا كاوتش عشان الدخان يخفي تحركاتهم من كاميرات المراقبة بتاعة الطيارات بدون طيار التركية إنما كمان هم نفسم بيستخدموا Drones بنفس الطريقة اللي إنت شفتها في فيلم Angel has Fallen بس بشكل بدائي حبتين .. إذا كان في الفيلم كل Drone كان عليها كومبيوتر فيه برنامج Facial Recognition Software عشان يميز وشوش ضباط حماية الرئيس فالDrones اللي تحت إيد الأكراد حاجة علي الله حكايتها أوي بيتلزق فيها عبوة ناسفة و بيطيروها عشان تقع فوق القوات التركية .. الأتراك شايفين بعنيهم قدرات الأكراد في استخدام Drones و هي بتزيد يوم عن يوم .. صحيح إن Drones اللي تحت إيد الأكراد متجيش حاجة قصاد إمكانيات الطيارات التركية بس تظل الطيارات دي بتشكل تهديد صريح للقوات التركية .. سواء الأكراد أو الأتراك يقدروا يعوروا بعض جامد عن طريق نفس السلاح و هو الطيارات بدون طيار.
الحوثيين و السعودية .. حطلعلك في كل حتة حتي في بنطلونك:
في سبتمبر 2019 فعلياً مشهد محاولة الإغتيال للرئيس الأميريكي في فيلم Angel has Fallen حصل هو هو بس في منشأة بقيق النفطية السعودية .. 25 طيارة بدون طيار طاروا من اليمن و إنفجروا جوه المنشأة النفطية في عملية تحسها مسروقة من فيلم خيال علمي من بتوع هولييود و أدت إلي أن حوالي 7% من الإنتاج العالمي للنفط وقف و لك أن تتخيل حجم الخساير في الفلوس اللي إتعرضت ليها السعودية بسبب الهجوم ده .. تبقي مشكلة اليمن إن كل أطراف الصراع تحت إيدهم طيارات بدون طيار سواء كنت بتتكلم عن السعوديين أو الإماراتيين أو الأمريكان أو حتي الحوثيين و ده واحد من الأسباب اللي مخليه القوات المسلحة السعودية مش عارفه تسيطر علي اليمن بجانب أسباب تانية إتكلمت عنها في مقالة قبل كده .. أول مرة الحوثيين يستخدموا طيارات بدون طيار كان في 2016 و كانت للتجسس بس .. شوية بشوية بدأوا يطوروا من استخدامها لحد ما وصلوا لمرحلة إنهم بقوا يضربوا بيها منشات نفطية سعودية .. لو سألت الحوثيين هو أنتوا ضربتوا منشأة بقيق النفطية دي إزاي حيقولولك و هم فخورين بنفسهم أوي إنهم عملوا كده بطيارة بدون طيار هم اللي عاملينها مسميينها قاصف واحد Qasef-1 و الحقيقة هم عندهم حق .. بس لما تيجي تمسك الطيارة دي تذاكرها تلاقيها نسخة طبق الأصل من طيارة بدون طيار إيرانية اسمها أبابيل Ababil-T .. عارف إن فيه ناس رأيها إن إيران هي اللي عطت الطيارات دي للحوثيين و دي تهمة تقريباً ثابتة عليهم بس صدقوني ده مش موضوعنا دلوقتي.
ليبيا .. تركيا و الإمارات بيلعبوا مونوبولي هناك:
الوضع السياسي في ليبيا فشخ المنطق و محدش فاهمه و مش ححاول أصدعك بإني أفهمولك دلوقتي بتفاصيله بس الموضوع بإختصار إن بقالنا أربع سنين البلد مقسومة نصين .. النص الشرقي و ده اللي ماسكه واحد اسمه (خليفة حفتر) و حكومته قاعدة في بنغازي و اللي واقف وراه الإماراتيين .. نص غربي ماسكه واحد اسمه (فايز سراج) و ده اللي الأمم المتحدة معترفه به بإنه هو رئيس ليبيا و اللي مدعوم من تركيا .. في إبريل 2019 الأخ (خليفة حفتر) قال لقواته إتحركوا بإتجاه العاصمة طرابلس عشان يخلص من حكومة (فايز سراج) و كان تحت إيده طيارات بدون طيار صيني اسمها Wing Loong II الإمارتيين هم اللي عطوهاله .. ده خلي الأتراك بسرعة يبعتوا طيارات Bayraktar TB-2 لقوات (فايز سراج) عشان يلحقوه و فعلاً قدروا يصدوا هجوم قوات (خليفة حفتر) في مدينة غريان و أجبروهم يرجعوا تاني لبني غازي .. اللي يضحك إن ليبيا من 2011 و هي المفروض يعني متوقع عليها عقوبة منع إستيراد أي أسلحة من بره بأمر قرار طالع من الأمم المتحدة .. قانوناً لا الإماراتيين ولا الأتراك من حقهم يعملوا اللي هم بيعملوه .. تدري ليش؟ .. عشان الإتنين هامهم مصلحتهم و ده اللي أنا عايز أتكلم فيه دلوقتي .. المصلحة.
هنا يجي دور إني أكلمك عن السبب إني إخترت موضوع الطيارات بدون طيار عشان أتكلم عنه و هو إني أحاول أفهمك إزاي الناس دي كلها معاها السلاح ده؟ .. إزاي الأكراد و الأتراك و إزاي الحوثيين و السعوديين معاهم Drones؟ .. هم جابوا الطيارات دي كلها منين؟
زمان مكنش فيه حد بيصنع Drones غير الأمريكان و هم اللي كانوا محتكرين السوق و ده غير إن الأمريكان نفسهم حاجتهم غالية .. يعني مثلاً الطيارة بدون طيار Reaper بتتباع ب16 مليون دولار مع إني لو حبيت أشتري طيارة F-16 حدفع فيها 14-18 مليون دولار .. شوية و دول تانية دخلت في اللعبة بس إذا كان عشان أميركا تبيع سلاح لبلد تانية فده بياخد وقت و بيحتاج تصاريح و موافقة من الكونجرس و حوار و روتين و شكليات كتير ففيه دول تانية بتبيع السلاح و بتورده زي ما إنت بتشتري حاجة من سوق دوت كوم كده و من أمثلة الدول دي هي الصين .. يعني مثلاً الصين بتصنع طيارة بدون طيار اسمها وينج لونج اتنين Wing Loong II بتتباع ب1-2 مليون دولار .. عندك تركيا اللي بدأت تصنع Drones بتاعتها من 2010 بعد ما كانت معتمدة علي إنها تشتريهم من إسرائيل و خصوصاً الطيارة حيرون Heron و علي فكرة الطيارة بتاعتهم Bayraktar TB-2 بتتباع ب6 مليون دولار و اللي في يناير 2019 مضت عقد مع أوكرانيا عشان تشتري 6 طيارات منها ب69 مليون دولار .. إسرائيل يمكن أكتر بلد في الشرق الأوسط دايسة في بيزنس تصنيع Drones و اللي دخلته من الستينات و حالياً وصلوا إن كل وحدة قتالية في جيش الدفاع الإسرائيلي فيها عسكري متخصص معاه Drone و شايل تابليت .. إيران بتصنع Drones .. و دلوقتي السعودية في طريقها إنها تصنعها لإن في 2017 هم مضوا إتفاق مع الصين عشان الصين تبني مصنع طيارات بدون طيار يقدر ينتج 300 طيارة Wing Loong II .. أي حد دلوقتي يقدر يشتري Drone و برخص التراب و ده اللي خالق مشكلة في الشرق الأوسط .. صحيح إن القوات المسلحة للدول بتاعة الشرق الأوسط لسه مش معتمدة بشكل كبير عليهم و يمكن مصر مثلاً أكبر مثال علي ده لإن القوات المسلحة بتاعتنا شايفاهم رجس من عمل الشيطان إلا إن البيزنس بيكبر يوم عن يوم .. مش كده و بس .. ده بيزنس مكافحة Drones هو كمان بيكبر يوم عن يوم.
خد بلد زي إسرائيل مثلاً .. إنت بتتكلم عن إن 10% من إجمالي صادرات إسرائيل من السلاح كل سنة بتكون طيارات بدون طيار و أكبر شركتين إسرائيلتين في البيزنس ده هم البيت Elbit Systems Ltd و رافايل Rafael Advanced Defence Systems .. أهو 17% من الفلوس اللي بتيجي للشركات دي بتتصرف علي تكنولوجيا رصد الطيارات بدون طيار .. يحكي أن الإنجليز إتعرضوا لموقف غريب أوي إن مطار جاتويك Gatwick اللي يعتبر تاني أهم مطار عندهم إتوقف العمل فيه لمدة 36 ساعة عشان إتلقطت كذا طيارة بدون طيار محدش عارف هي جت منين بتحوم فوق المطار و ده اللي خلاهم ياخدوا من شركة البيت Elbit Systems الإسرائيلية بطارية صواريخ إعتراضية من منظومة Iron Dome و اللي إتكلمت عنها قبل كده عشان يصطادوا بيها الطيارات دي .. شركة تانية يمكن مش معروفة أوي بره إسرائيل اسمها سكاي- لوك Skylock بتبيع نظام عبارة عن رادار صغير بيتحط في شنطة شبه شنطة اللاب توب بيعمل قبة نص قطرها 3.5 كيلومتر بحيث لو لقط أي Drone طايرة جوه القبة دي بيشوش عليها و بيوقعها .. كان زمان المنطق اللي بيحكم الحروب هو إن اللي يسيطر علي السماء حيسيطر علي الأرض .. لسنين و دول العالم بتصرف دم قلبها عشان يبقي عندها سلاح جو فشيخ بس دلوقتي و واحدة واحدة المنطق ده بيتغير.
المصادر:
- مقالة بعنوان The drone wars are already here نشرت في مجلة Bloomberg وده لينك المقالة الاصلية:
ttps://www.bloomberg.com/news/articles/2019-10-30/the-drones-wars-are-here-and-they-re-escalating - مقالة بعنوان Israeli anti-drone technology brings an end to Gatwick airport chaos نشرت في جريدة The Jerusalem Post وده لينك المقالة الاصلية:
ps://www.jpost.com/International/Israeli-anti-drone-technology-brings-an-end-to-Gatwick-Airport-chaos-575054 - مقالة بعنوان Middle East drones signal end to era of fast jet air supremacy نشرت في جريدة The Guardian وده لينك المقالة الاصلية:
ttps://www.theguardian.com/world/2019/sep/16/middle-east-drones-signal-end-to-era-of-fast-jet-air-supremacy
