فيه خبرين طلعوا فجأة بخصوص سوريا خلوا الناس فعلياً مش فاهمه هو فيه إيه؟ .. الخبر الأولاني هو إن كيس الشيتوس الحجم العائلي اللي بيحكم أميركا قرر إنه يسحب فجأة ومن غير لا إحم ولا دستور كل القوات الأميريكية اللي موجودة في سوريا لإن خلاص سبب وجودهم هناك مبقاش موجود وإن القوات دي معادش ليها لازمة .. بمجرد ما الأمريكان إنسحبوا الأتراك دخلوا .. الوضع علي الأرض فعلياً زي الزفت .. إنت بتتكلم عن أكتر من 120 مدني ماتوا وأكتر من 180,000 بني أدم سابوا بيوتهم وهربوا .. الخبر التاني واللي مرتبط بالخبر الأولاني هو إن عناصر من قوات دلتا فورس Delta Force ودي واحدة من القوات الخاصة جوه القوات المسلحة الأميريكية قدرت تقتل (أبوبكر البغدادي) مؤسس وزعيم تنظيم الدولة الإسلامية في العراق والشام اللي كلنا عارفينه بإسم داعش .. أنا عارف كويس أوي إن الناس الرؤية عندها مش واضحة ومش فاهمة هو إيه اللي حصل؟ وإيه اللي حيحصل؟ والنهاردة ححاول إني أوضح الصورة شوية وده بإني أحاول أجاوب علي 3 أسئلة غالباً بيدوروا جوه دماغ كتير مننا من اللي مهتمين باللي بيحصل في سوريا:
- إيه اللي خلي كيس الشيتوس يقرر فجأة كده إنه يسحب قواته من سوريا؟
- ليه الأتراك دخلوا سوريا أصلاً وإيه مصلحتهم في ده؟
- إيه اللي حيحصل بعد كده؟
خليني أبدأ بالسؤالين الأولاني والثاني اللي هم مرتبطين جداً ببعض ..هو ليه قرار سحب القوات الأميريكية من سوريا طلع فجأة وفعلياً أنا مش بهزر لما بقولك إن حتي المؤسسة العسكرية الأميريكية لما جالها الخبر إفتكرت إن دي إشاعة وإن القرار مش حقيقي وليه الأتراك دخلوا سوريا .. بس قبل ما تفهم هو ليه القرار طلع لازم تفهم هي القوات دي كانت بتعمل إيه أصلاً في سوريا .. بص يا سيد الناس .. الأمريكان كانت ليهم قوات علي الأرض متوزعة في حتت علي طول الحدود بين سوريا وتركيا والقوات دي كانت ليها وظيفتين .. الوظيفة الأولانية إنها تشتغل مع المليشيات المسلحة الكردية عشان يحجموا من وجود داعش .. الوظيفة التانية هي حماية المدنيين الأكراد جوه سوريا من ثلاثي أضواء المسرح اللي بيحاول يخلص منهم اللي هم الأتراك والحكومة السورية وداعش .. بصوا أنا عارف إن الوضع في سوريا معقد وشرحه صعب .. إنك تفهم الوضع في سوريا دلوقتي زي ما أجي أشرح لرجل هو إيه الفرق بين الكونسيلر والفاونديشن أو إني أجي أشرح لبنت إيه هي قاعدة الأوفسايد .. بس خليني اكلمك عن أهم لاعيب في اللعبة بتاعة سوريا دلوقتي اللي هم الأكراد.
الأكراد دول زي الناس اللي بتحب الرز اللي فيه زبيب .. متوزعين في بلاد كتير ومحدش عارف جنس ملتهم إيه .. فيه 30 مليون كردي متوزعين علي العراق وإيران وسوريا والعراق .. هم أكبر شعب علي مستوي العالم من حيث العدد ومش لاقيين بلد تلمهم .. هم علي بعضهم كتير .. 30 مليون ده رقم كبير فشخ .. بس في كل بلد هم عايشين فيها بتلاقيهم أقلية عددية وده بيحطهم في موقف زي الزفت لإن السمعة اللي إتاخدت عن الأكراد إن الناس دي ملهاش عزيز وبتبيعك في أي لحظة وملهاش كلمة .. دي المعلومة اللي في دماغ ناس كتير جنب معلومة إن (صلاح الدين الايوبي) كردي وأنا مش جاي النهاردة أقولك إن ده غلط أو صح .. لو ده رأيك فإنت حر فيه .. بس اللي أنا عايز أقوله ليك إن خلال السنين اللي فاتت رغم إن سياسياً الأكراد فعلياً مكنش ليهم رأي ثابت مبيتغيرش في أي حاجة وإن تحالفاتهم السياسية ملهاش تشبيه أقرب من الهري اللي كان بيحصل في Game of Thrones إلا إن الناس دي الثابت فيهم إن علاقتهم بالأمريكان كانت زي علاقة (تايوين لانيستر Tyrion Lanister) و(برون Bronn) .. محدش فيهم يقدر يستغني عن الثاني.
فكك من حقيقة إن الأكراد حاربوا مع الأمريكان في حربي الخليج الثانية و الثالثة .. أنا مش جاي أفتح في جرح قديم .. بداية من 2015 لما داعش توحشت وبقت فعلياً كيان مينفعش حد يتجاهله علي الأرض التعاون بين الأمريكان والأكراد وصل لمرحلة إن المليشيات الكردية علي الأرض بقت بتطلب غارات جوية أميريكية علي أهداف هم عايزين يدمروها .. ده Level ثقة زي إنك تبقي راجل متجوز تدي تليفونك لمراتك تصور حاجة وتبقي عارف إنها مش حتفتح الMessenger ولا What’s App بتاعك .. من 2015 لحد 2019 في الوقت اللي الأمريكان قعدوا يذلونا بإنهم هم اللي بيحاربوا في داعش وإن من غيرهم الشرق الأوسط حيروح في ستين داهية فالأمريكان مات ليهم 6 عساكر بس يا حرام .. الأكراد علي الناحية الثانية مات ليهم 11,000 مقاتل .. اللي إنت محتاج تفهمه إن أيا كان رأيك في الأكراد .. سواء كنت شايفهم ملايكة أو شياطين .. إنت حر في رأيك وأنا مش جاي أغيره أنا بس عايزك تفهم إن من غير الأكراد مكنش الأمريكان طلعوا قالوا إن خلاص يا جدعان إحنا خلصنا علي داعش وإن خلاص يا جدعان إحنا خلصنا من (أبوبكر البغدادي).
لحد دلوقتي أنا مجاوبتش علي السؤالين .. ليه كيس الشيتوس قرر فجأة إنه يسلم الأكراد تسليم أهالي؟ .. ليه بعد ما داعش إتهزمت والدنيا بدأت تستقر في سوريا يقرر فجأة إنه ينسحب؟ .. الحقيقة إن من وجهة نظر كيس الشيتوس الموضوع بسيط بس أنتوا اللي مصعبين الموضوع علي نفسكوا:
- هو أنا إيه اللي يقعدني في سوريا؟ .. دي بلد مفيهاش حاجة يتقعد فيها عشانها وبعدين أنا عايز عساكري يرجعوا بلدهم ومش عايز يبقي ليا وجود عسكري في الشرق الأوسط.
- إيه اللي يخليني أقف جنب الأكراد دول ناس معملوش حاجة لينا؟ .. هم حاربوا داعش مش عشان سواد عيونا هم حاربوهم لإن داعش كانت بتشكل تهديد صريح ليهم وإحنا ساعدناهم يحموا نفسهم .. ثم يعني هم الأكراد كانوا حاربوا معانا ضد النازيين في نورماندي عشان أردلهم جميلهم؟
زي ما إنت شايف هو باني قراره علي نقطتين .. نقطة ينفع تتكلم معاه فيها اللي هي النقطة الأولانية ونقطة تانية مش بتطلع غير من بني أدم جاهل فمينفعش تضيع وقتك معاه فيها .. إنك تقول أنا عايز أبطل أنشر قواتي في كل حتة في العالم بما فيها الشرق الأوسط ده كلام جميل مقدرش أقول حاجة عنه .. بس إنك تقولي إني مش حقف مع الأكراد عشان مكانوش واقفين معانا ضد النازيين ده زي ما إنت كده تقول إحنا كمصريين ضد قيام الدولة الفلسطينية عشان زمان الهكسوس إحتلوا مصر ودي ناس كانت عايشة في فلسطين وجم إحتلونا فإحنا مش حنقف مع ناس إحتلونا .. بس حتي لو مشيت ورا كيس الشيتوس لحد الأخر وقلت طب أنا مصدقك في حتة إنك عايز تقلل من وجودك العسكري في الشرق الأوسط فعلي الأرض الوضع مش كده .. أميركا من أول ما هو بقي رئيس زودت عدد قواتها في الشرق الأوسط بحوالي 14,000 عسكري فإنت فعلياً .. سوري في الكلمة .. محوراتي إبن وس&^ .. برده لحد دلوقتي محدش جاوب علي السؤال .. ليه الأمريكان مشيوا فجأة من سوريا؟ .. لإن زي ما قلتلك السؤال الأول والثاني مرتبطين ببعض فاللي حصل بمنتهي البساطة إن إتعملت مكالمة تليفون بين كيس الشيتوس وبين الرئيس التركي (رجب طيب أردوغان) وفي المكالمة دي (أردوغان) طلب من (ترامب) إنه يسيب سوريا والحقيقة إنت محتاج تفهم ليه لإن تاني حضطر لأرجعك للأكراد ولداعش.
بالنسبه لداعش ناس كتير بتنسي إن داعش دي إختصار الدولة الإسلامية في العراق والشام .. يعني دي مشكلة مقسومه نصين .. العراق والشام .. كل نص لازم يتحل لوحده بس مش ده اللي حصل .. داعش بدأت تظهر قدام الناس بداية من 2014 وتوسعت بشكل كبير لحد ما بقت بتسيطر علي مناطق جوه العراق وجوه سوريا .. الأمريكان قالوا لنفسهم النص السوري من داعش خلي (بشار الأسد) يتفشخ معاه وملناش دعوة به مؤقتاً .. مشكلتهم كلها كانت في النص العراقي من داعش .. قبل سنة 2014 كان الأمريكان سحبوا كل قواتهم البرية من جوه العراق ولإن مش بعد ما إنسحبوا مينفعش يرجعوا تاني لإن ساعتها ده حيبقي إنتحار سياسي للرئيس الأميريكي وقتها (باراك أوباما) فالحل اللي الأمريكان عملوه كان مختلف شوية .. هم قالوا خلي القوات المسلحة العراقية والمليشيات الشيعية هي اللي تشيل الليلة وإحنا بس حنوفرلهم تدريب وسلاح وغطاء جوي .. الطريقة دي كان ليها كذا نتيجة .. أولاً داعش إتهزمت في العراق من غير ما الأمريكان يتعرضوا لخساير في الأرواح وده من وجهة نظرهم حاجة حلوة .. العراقيين نفسهم بصوا لحرب داعش علي إنها هزيمة لداعش علي إيد العراقيين لوحدهم .. حرب هم اللي دافعوا بيها عن بلدهم من غير ما حد يساعدهم أو يحارب بالنيابة عنهم فده خلق جوه العراق حالة وحدة بين المواطنين .. إحنا مواطنين عراقيين سواء سُنة أو شيعة أو أكراد في الهم سوا فلازم ننسي خلافاتنا دلوقتي ودي حاجة الأمريكان بصولها وقالوا حلو أوي .. بعد ما داعش إتهزمت الشعب العراقي اللي بقي متوحد مع بعضه وجه غضبه ناحية الحكومة العراقية اللي مش عارفة تدير الليلة وده يفسرلك ليه فيه مظاهرات وأعمال عنف كتير في العراق دلوقتي بيشارك فيها سُنة وشيعة مع بعض .. حرب داعش خلت البني أدم العراقي ميشوفش أخوه السُني أو الشيعي أو الكردي ويكرهه ويحاول يخلص منه .. كلهم بقوا شايفين إنهم في مركب واحدة .. هل الأمريكان كان قصدهم ده يحصل؟ بالتأكيد لا .. هم حبوا يشيلوا من دماغهم صداع المواجهة مع داعش وصدروها للعراقيين .. أي حاجة تانية غير كده هم مكانوش عاملين حسابها .. كلامي برده مش معناه إن الإحتلال الأميريكي للعراق كان حاجة كويسة .. المشكلة إن إذا كانت طريقة الحل دي نفعت عشان تحل المسألة بتاعة النص العراقي من داعش فده مش معناه إن الحل ده حينفع يتطبق هو هو في سوريا .. ودي الغلطة اللي الأمريكان وقعوا فيها.
بدل ما كان الأمريكان معتمدين علي الحكومة العراقية والمليشيات الشيعية في الحرب ضد داعش فالأمريكان إعتمدوا علي الأكراد في سوريا ودي كانت غلطة .. في العراق داعش كانت تهديد واضح وصريح لاستقرار بلد عايش فيها سُنة وشيعة وأكراد ومسيحيين .. بسهولة أوي إنت ممكن توحد الطوايف والديانات دي كلها ضد هدف مشترك عايز يموتهم كلهم وده اللي حصل فعلاً .. في سوريا صحيح داعش بتمثل تهديد واضح وصريح للسُنة والشيعة والمسيحيين اللي فيها بس في نفس الوقت سوريا فيها (بشار الأسد) والروس والايرانيين وحزب الله وليلة كبيرة أوي سعادتك .. لما أنتوا كأمريكان تختاروا الأكراد عشان يحاربوا داعش بالنيابة عنكوا فأنتوا كل اللي عملتوه هو أنكوا ريحتوا الفريق بتاع (بشار) والإيرانيين وحزب الله وبعد ما داعش تتهزم الأكراد حيبقوا أضعف من إنهم يكملوا الحرب الأهلية وساعتها أنتوا عطيتوا سوريا كلها علي طبق من دهب ل(بشار) وإيران وحزب الله .. كان المفروض إن الأمريكان يسيبوا الروس والإيرانيين هم اللي يتعاملوا مع داعش مش الأكراد بس ده محصلش .. المشكلة الأكبر كانت بين الأتراك والأكراد .. لسنين وسنين والأتراك عندهم خازوق مش عارفين يعملوا فيه إيه إسمه حزب العمال الكردستاني أو PKK .. من غير ما أدخلك في حوارات كتير فالناس دي هم جزء من الأكراد اللي عايشين جوه تركيا وشايفين إن الحل الوحيد إن تتعمل دولة ليهم جوه تركيا هو السلاح .. حزب العمال الكردستاني مش حزب سياسي .. دي ناس مش بتلعب سياسة ويمكن عشان كده حتي وزارة الخارجية الأميريكية بتعتبرهم تنظيم إرهابي .. المشكلة إن (أردوغان) راسه وألف سيف إن المليشيات الكردية السورية هي اللي واقفه ورا حزب العمال الكردستاني وإنه لازم يخلص منهم أو إنه يعمل منطقة عازلة علي طول الحدود التركية السورية بحيث إنه يطرد الأكراد بره المنطقة العازلة دي وبالتالي يضمن إنهم ميهوبوش ناحية الحدود بتاعته تاني.
اللي إحنا متؤكدين منه إن في المكالمة اللي دارت بين (ترامب) و(أردوغان) في أكتوبر 2019 (أردوغان) طلب من (ترامب) إنه يسيب سوريا عشان الأتراك يدخلوها ويعملوا المنطقة العازلة علي طول الحدود بينهم وبين سوريا و(ترامب) وافق وده القرار اللي جاب صدمة للأمريكان نفسهم .. في ليلة إنسحاب الأمريكان من سوريا (ترامب) بعت جواب ل(أردوغان) قاله فيها بلاش تخش سوريا وبلاش تقلبها مذبحة وختم جوابه بإنه قاله بلاش تفرد عضلاتك علي الأكراد وبلاش تبقي عبيط وأنا مش بهزر هو كتبله نصاً في الجواب Don’t be a tough guy, don’t be a fool .. (أردوغان) خد الجواب قطعه وفي ليلتها طلع قرار بداية العمليات العسكرية ضد الأكراد .. قرار كيس الشيتوس إنه يسحب قواته من سوريا إتقابل جوه أميركا بميكس بين إنت عبيط يلا علي ا#ا هو فيه إيه .. حتي أنصاره جوه الحزب الجمهوري مش عاجبهم اللي حصل لإن أولاً القرار طلع فجأة ومن غير أي مقدمات وإتنفذ باستعجال زي بالضبط لما تبقي في حفلة في الأوبرا مثلاً وتخش الحمام تعمل بيبي وتكتشف إن السيفون مش شغال فبتقرر تسيب الحمام بأقصي سرعة من غير ما تقول لحد عشان متتفضحش وتسيب اللي أمه داعيه عليه يخش الحمام وراك يتعامل مع خراك .. ثانياً إن أي حد بيفهم حيقول هو معلش مش الأكراد دول قابضين علي مسلحين كانوا في داعش .. الأكراد قابضين علي 10,000 مسلح من بتوع داعش .. طب هم الناس دي لما يلاقوا الأتراك بيهجموا عليهم مش حيسيبوا السجون اللي بتوع داعش محطوطين فيها ويجروا يدافعوا عن أهاليهم .. وده اللي حصل فعلاً .. فيه عدد مش معروف من بتوع داعش اللي كانوا مسجونين تحت إيد الأكراد هربوا ودي مصيبة سودا والمفروض إن كيان بحجم مؤسسة الرئاسة الأميريكية يكون عندها إحساس بالمسئولية إن اللي حصل ده غلط وإحنا شغالين علي علاجه بس حتي ده محصلش.
(ترامب) بيُصر علي إن مئات المعتقلين بتوع داعش اللي هربوا إتقبض عليهم تاني بس وزارة الخارجية الأميريكية طلعت قالت إن الكلام ده هبد .. لا إحنا عارفين هم بالضبط كام إرهابي هرب ولا حتي عارفين هم فين .. بلاش دي .. زي ما قلتلك سمعة الأكراد وسطنا مش قد كده وبمجرد ما الأتراك دخلوا سوريا فكان متوقع إن كتير من السوريين السُنة يقفوا في صف الأتراك وإتكونت مليشيات مسلحة من السوريين السُنة عشان تحارب الأكراد بالنيابة عن الأتراك ولإن دي مليشيات مش عساكر لابسين يونيفورم ماشيين بأوامر وتعليمات ومحكومين بالإتفاقيات الدولية لمعاملة الأسري فطبيعي تطلع تقارير صحفية إن المليشيات دي إرتكبت جرايم حرب ضد الأكراد .. تاني أنا مش بدافع عن الأكراد ولا بقولك إنهم ملايكة بس في نفس الوقت الوضع في سوريا زي الخره ولو إنت في إيدك إنك تعمل حاجات تحمي أرواح وتمنع سفك دماء يبقي الصح إنك تمشي فيها .. لكن يطلع كيس الشيتوس في مؤتمر شعبي إنتخابي يقولك أصلي أنا زيي زي الميس بتاعة الحضانة لما بتلاقي طفلين ماسكين في خناق بعض فسبتهم يضربوا في بعض وشوية كده وحتدخل أسلكهم وأصالحهم علي بعض .. ده مش منطق حد بيفهم .. ده منطق حد متخلف عقلياً وحيلبسنا كلنا في الحيط.
هنا يجي دور إني أقولك إيه اللي حيحصل بعد كده والحقيقة إن بغض النظر عن الدم والموت والدمار بس أنا لازم أقول إن اللعبة بقت مسلية فشخ .. دلوقتي اللي ماسك السكينة عمال يوزع في التورتة هم الروس .. الوضع دلوقتي هو إن (فلاديمير بوتين) واقف مع (أردوغان) وبيتفقوا مع بعض مين ياخد إيه من سوريا .. الأكراد بعد ما إتباعوا من الأمريكان ملقوش قدامهم غير إنهم يقفوا مع (بشار الأسد) عشان يحميهم من الأتراك .. الكسبان من قرار كيس الشيتوس إنه يمشي من سوريا لحد دلوقتي هم (أردوغان) و(بشار) و(بوتين) وداعش .. قرار واحد غلط لبس أميركا في الحيط ودمر سمعتها وسط حلفاءها وخسرها كتير أوي .. محدش قال إن سوريا التعامل معاها سهل .. (باراك أوباما) عك وهبد بما فيه الكفاية بس مش المطلوب إنك تطلع قرار صح ومفيهوش غلطة بس اللي حصل إن (ترامب) طلع قرار مفيهوش حاجة صح.
الرسالة اللي أنا حابب أوصلها لأي بلد أو أي رئيس أو أي حاكم بيعتبر الأمريكان في ظهره وشايف إن (ترامب) حيحميه إن إنسي .. اللي (ترامب) عايزك تفهمه إن لو حصل وإنت إتخانقت مثلاً مع الروس أو الصينيين أو الإيرانيين فإنت فعلياً حتشيل أوبح والأمريكان مش حينفعوك ولا حيقفوا معاك إلا إذا إنت دفعت كاش ومقدم وعلي الطرابيزة .. (ترامب) حول القوات المسلحة الأميريكية من أداة لفرض نفوذ أميركا علي العالم لمجرد شركة حراسات خاصة بتشتغل لما تدفعلها فلوس .. يا حكام العرب .. قلناها زمان وحنقولها تاني .. اللي متغطي باميركا عريان.
المصادر:
- حلقة من برنامج Last Week Tonight with John Oliver بيتذاع علي قناه HBO وده لينك الحلقة علي YouTube لو حبيت تتفرج عليها:
https://www.youtube.com/watch?v=2u_pZ-SgACk - مقالة بعنوان Trump’s Syria trifecta: A win for Putin, a loss for the Kurds and lots of uncertainty for our allies نشرت في جريدة The New York Times وده لينك المقالة الأصلية:
https://www.nytimes.com/2019/10/22/opinion/trump-syria-turkey.html
