الحقيقة إن أنا بحب أفلام الخيال العلمي .. ناس كتير مش بتحبها عشان تفاصيلها كتير بس الحقيقة هو سر جمالها في تفاصيلها .. فيه فيلم أنا مش بسيب فرصة إني أشوفه إسمه Star Trek و في الفيلم ده فيه مشهد إن شخصية (سبوك) اللي هو يمكن أذكي حد في الفيلم بيحاول يستوعب موقف إن قدامه عدو مٌصر إنه يهاجمه ولا (سبوك) عارف هو مين الأخ ده ولا عارف هو عايز إيه منه .. وسط كل الحيرة و الخبط و الرزع (سبوك) قال جملة عجبتني أوي .. هو قال إنك لو إستبعدت المستحيلات فاللي حيفضل قدامك هي الحقيقة مهما كانت غريبة .. أنا كنت فاكرها جملة عبقرية كتبها السيناريست بتاع الفيلم بس إكتشفت بعدين إنه خدها زي ما هي من رواية Sign of the Four اللي كتبها الروائي (أرثر كونان دويل) و دي واحدة من الروايات اللي بتحكي قصة شخصية (شيرلوك هولمز) .. الحقيقة إن الجملة دي و خليني أعيدهالك تاني .. لو إستبعدت المستحيلات فاللي حيفضل قدامك هي الحقيقة مهما كانت غريبة .. هي أكتر حاجة حتخليك تفهم هو إيه بالضبط اللي بيحصل في أوكرانيا .. الجملة دي لو طبقتها علي الغزو الروسي لأوكرانيا حتلاقي نفسك قدام الحقيقة الغريبة دي .. روسيا حتكسب الحرب إن لم يكن كسبتها فعلاً.
واحد من أهم الدروس اللي محتاج تعرفها في السياسة الخارجية هي إن سهل أوي إنك تبدأ حرب .. الصعب فشخ إنك تنهيها بالنتيجة اللي ترضيك .. خليني أحاول أبقي محايد قدر الإمكان و أقولك إن صحيح روسيا هي اللي ضربت أول طلقة في الحرب دي فده معناه إن روسيا هي اللي بدأت الحرب و ده اللي بيقوله الأوكرانيين بس علي الناحية الثانية برده الروس بيقولوا إن الأوكرانيين هم اللي بدأوا الحرب لما قالوا عايزين ننضم لحلف شمال الأطلنطي NATO .. خليني برده أكمل في سكة الحياد دي و أقولك إن لو كان الروس كانوا حاطين في دماغهم تارجيت معين يحققوه من الحرب دي فالنتايج اللي هم وصلوا ليها لحد دلوقتي أقل بكتير من اللي هم كانوا عايزينه .. نفس الكلام علي الأوكرانيين .. هم كانوا متخيلين إنهم جامدين زحليقة و نهاية الإمبراطورية الروسية حتكون علي إيديهم بس الوضع علي الأرض بيقول عكس كده .. و ده حيودينا للجملة اللي كررتها في المقدمة مرتين و حككرها تاني دلوقتي .. لو إستبعدت المستحيلات فاللي حيفضل قدامك هي الحقيقة مهما كانت غريبة .. عشان تفهم هي الحرب دي حتخلص علي إيه لازم أنا و إنت دلوقتي نبدأ مع بعض رحلة مسلية أوي و هي رحلة إستبعاد المستحيلات.
المستحيل رقم واحد .. أوكرانيا تقول إحنا أسفين يا (صلاح):
الفكرة بمنتهي البساطة إن روسيا تطلع من الماتش ده معاها الثلاثة بونط .. إنت عايز روسيا توصل لمرحلة إنها تضم أوكرانيا للكيان الكبير اللي إسمه روسيا الإتحادية اللي هو إنت تعمل عملية عسكرية تدمر بيها المؤسسة العسكرية الأوكرانية و تطيح بحكومة (فلاديمير زيلينسكي) و يا إما تقتله يا تعدمه يا تسجنه يا تنفيه يا توديه في أي داهية و تحط مكانه حكومة موالية لموسكو بحيث يبقي عندك إختيارين .. الإختيار الأول إنك تقول إن أوكرانيا بقت ولاية روسية أو علي الأقل تبقي دولة صحيح مستقلة بس رئيسها مش بيقول إنه حيتغدي النهاردة فراخ ولا لحمة إلا لما ياخد موافقة (فلاديمير بوتين) الأول زي مثلاً بيلاروسيا أو الشيشان.
طبعاً زي ما إنت شايف كل دي أحلام و أماني .. من اليوم الأول لضرب النار في فبراير 2022 و القوات المسلحة الروسية معندهاش الإمكانية إنها تحقق التارجيت ده ولا حتي بعد كل الشهور دي من بداية الحرب .. و عشان خاطري بلاش الحماس ياخدك و تقولي إزاي تقول كده علي القوات المسلحة الروسية العظمي قال يعني إنت إتولدت في حواري سان بطرسبرج .. الروس نفسهم مقتنعين ده .. هو ده تمامهم و مش حيعرفوا يقدموا أكتر من كده.
المستحيل رقم إتنين .. الأوكرانيين حيعملوا في الروس زي ما الروس عملوا في النازيين:
في السيناريو ده مش بس الأوكرانيين عرفوا يجبروا الروس علي الإنسحاب .. دول كمان خدوا الأراضي بتاعتهم اللي الروس خدوها غصب في 2014 .. يعني عشان بس تبقي فاهم .. زي ما الروس عرفوا يقلبوا الطرابيزة علي النازيين بعد معركة ستالينجراد و بدأوا الCounter-Attack اللي خلاهم بعد كده يدخلوا برلين فالأوكرانيين حيصدوا الهجوم الروسي و ينفذوا هجمة مرتدة تخليهم يرجعوا ليهم إقليم الدونباس الحدودي بينهم و بين روسيا و كمان يرجعوا شبه جزيرة القرم .. ساعتها جمهورية أوكرانيا المستقلة حيبقي من حقها إنها تنضم لNATO أو الإتحاد الأوروبي زي ما هي عايزه.
زي السيناريو الأولاني فهنا برده دي كلها طموحات و أماني .. صحيح الغرب نفسه يصحي علي الخبر ده بس خلينا نبقي صرحاء مع بعض .. القوات المسلحة الروسية أداءها في الغزو مكنش أحسن حاجة في الدنيا و إرتكبوا أخطاء ما يعلم بيها إلا ربنا .. هم فشلوا في دخول العاصمة كييف و الأوكرانيين أجبروهم علي الإنسحاب من شمال أوكرانيا بس في نفس الوقت القوات المسلحة الروسية تقدر تحافظ علي الأراضي اللي هي خدتها غصب من أوكرانيا في الشرق خصوصاً إقليم الدونباس و شبه جزيرة القرم .. بإختصار شديد أوكرانيا مش حتعرف تعمل مع روسيا زي ما عملنا مع إسرائيل بعد حرب أكتوبر 1973 اللي هو الدونباس رجعت كاملة لينا و أوكرانيا اليوم في عيد .. ده مش حيحصل.
المستحيل رقم ثلاثة .. أوكرانيا تجبر روسيا علي الإنسحاب لحدود ما قبل 24 فبراير:
حاول تفهم إن اللي أنا بقوله إننا وصلنا لمرحلة إن الMinimum Requirements أو الحد الأدني من أحلام الأوكرانيين إنهم يطلعوا الروس بره أرضهم و يرجعوا تاني لحدود ما قبل يوم 24 فبراير 2022 بقي من المستحيلات إنه يحصل .. إنت متخيل؟ .. عشان بس أقربهالك .. تخيل إن بعد نكسة يونيو1967 إسرائيل مش بس بقي تحت إيدها شبه جزيرة سيناء بالكامل إنما كمان خدت مدن القناة الثلاثة اللي هم بورسعيد و السويس و الإسماعيلية .. تقوم تخيل تقوم حرب أكتوبر 1973 و يبقي أقصي طموحاتنا إننا بس يا عيني نرجع مدن القناة الثلاثة لينا بس سيناء حتفضل تحت إيد الإسرائيليين .. بمعني إن إقليم الدونباس و شبه جزيرة القرم و حتة حلوة من شرق أوكرانيا خلاص بقت تحت سيطرة الروس و ده بقي وضع قائم علي الأرض.
حاول تبقي مستوعب نقطة إن بعد الفلوس اللي إتصرفت و بعد العقوبات و بعد شعارات مش عايزين الغاز الروسي و بعد ما يا عيني الروس لقوا نفسهم معندهمش فروع ماكدونالدز و كينتاكي و بعد كميات السلاح الفشيخة اللي راحت أوكرانيا .. بعد كل ده .. الحقيقة اللي واضحة للناس كلها إن القوات المسلحة الأوكرانية فعلياً عاجزة إنها تسترد الأراضي اللي الروس خدوها غصب في شرق البلد .. صحيح الروس حاولوا ياخدوا شمال أوكرانيا و فشلوا .. خدامك إن الأوكرانيين دافعوا عن العاصمة بتاعتهم كييف زي ما كان فرقة (شون دايش) الله يمسيه بالخير بيرص دفاع فرقة بيرنلي .. بس خلينا نبقي صرحاء مع نفسنا إن من اليوم الأول للغزو و الروس كانوا معتبرين شرق أوكرانيا هو الأولية ليهم ولو كييف وقعت يبقي خير و بركة.
ده الحقيقة بيحطنا قدام السؤال المهم .. طب بعد ما إستبعدنا كل المستحيلات فإيه بقي الحقيقة اللي قدامنا؟
الحقيقة بإختصار إن أوكرانيا حتبقي عاملة زي البنت اللي إتجوزت في بيت عيلة .. لا هي حرة قرارها و جوزها تبقي حرة فيه تغسله و تكويه براحتها .. ولا عمرها أهل جوزها حيعتبروها واحدة منهم بل بالعكس حتفضل طول حياتها شايفينها غريبة عليهم .. ده حيبقي وضع أوكرانيا .. دولة مش عارفة هي إيه في الدنيا .. بلد لا هي عارفه تاخد قرارها و تنضم للإتحاد الأوروبي أو NATO .. ولا هي بلد راضية بكامل إرادتها إنها تبقي جزء من الإمبراطورية الروسية .. و دي الحقيقة الغريبة .. ليه غريبة؟ .. عشان لما تستهدي بالله و تبصلها براحة حتلاحظ إن دي حرب محدش كسبها:
- من وجهة نظر الأوكرانيين فهم من اليوم الأول للغزو ولو جيت سألتهم إيه اللي لو حصل حتقولوا إن إحنا مبسوطين حيقولولك إن مش بس نصد الهجوم الروسي .. و مش بس نجبر روسيا علي الإنسحاب .. إنما كمان نرجع شبه جزيرة القرم و إقليم الدونباس اللي الروس خدوهم مننا غصب سنة 2014 .. فدلوقتي لما تيجي تقولهم إن مش بس إنتوا مش عارفين ترجعوا القرم و الدونباس ده كمان فيه حتت تانية من شرق أوكرانيا ضاعت عليكوا يبقي أكيد الناس دي خسرت الحرب .. تاني .. بص لنص الكوباية المليان إن كييف موقعتش .. لسه لحد دلوقتي فيه الكيان اللي كلنا عارفينه بإسم أوكرانيا .. بس صعب تبص لنص الكوباية المليان و إنت كنت داخل الحرب بسقف توقعات عالي أوي و دلوقتي السقف ده وقع فوق دماغك.
- من وجهة نظر الروس فهم دخلوا الحرب دي بثقة رهيبة زي ما يكون الأهلي بيلاعب فرقة بلدية المحلة اللي هو بصباع رجله حيدوس علي وشهم بس ده محصلش .. الروس دخلوا الحرب ولو كنت سألتهم من أول يوم إيه اللي لو حصل حتكونوا مبسوطين حيقولولك إن أوكرانيا ترجع تاني جزء من التراب الروسي زي ما كده السودان ترجع تاني لمصر و نبقي دولة واحدة .. جري الشريط كام شهر و سقف التوقعات هو كمان إتطربق فوق دماغ الروس و بقوا مطلوب منهم يبقوا راضيين بإن أوكرانيا مبقتش تقدر تنضم لا لحلف شمال الأطلنطي ولا للإتحاد الأوروبي .. صحيح روسيا كسبت الحرب بس مش أوي .. هم حيطلعوا يقولوا قدام الناس إنتصرنا إنتصرنا إنتصرنا بس بينهم و بين نفسهم عارفين إنهم محققوش كل اللي هم عايزينه من الحرب دي.
يمكن اللي أنا عايز أختم بيه إن دي حرب مش زي حروب كتير عدت علينا قبل كده .. دي حرب الإقتصاد و الإعلام كان ليه دور مؤثر فيها يمكن زيه زي القنابل و الصواريخ .. دي حرب وجهات نظر .. بس يمكن برده دي حرب محدش عرف يكسبها و يحسمها لصالحه بالكامل و دي حاجة غريبة الحقيقة لإن يمكن أقرب مثال لحرب حصلت و إنتهت بنصر كامل لطرف من الأطراف اللي هو الحرب خلصت بإستسلام حد كانت الحرب العالمية الثانية .. إحنا بقالنا 77 سنة محدش عارف يحسم حرب .. غريبة صح؟
المصدر:
- مقالة بعنوان The unpalatable truth in Ukraine نشرت في مجلة The Hill و ده لينك المقالة الأصلية:
https://thehill.com/opinion/international/3509458-the-unpalatable-truth-in-ukraine/
