الشرق الأوسط عنده مشكلة كبيرة في مياه الشرب ودي حاجة إنت لازم تكون عارفها ده أولاً وفاهم جت منين ده ثانياً بس الأهم إنك النهاردة تحاول تطلع معايا من تحت عباية مصر ونهر النيل وسد النهضة بتاع أثيوبيا .. النهاردة عايزين نبص علي الشرق الأوسط من فوق أو من نظرة طائر محلق علي رأي (عمرو أديب) .. خليني من الأول أقولك المشكلة فين وهي سموزي مضروب في الخلاط من 3 عناصر وهم سوء إدارة الموارد المائية والإسراف في استخدام مياه الشرب والأهم هي التقلبات المناخية بس عشان تفهم الموضوع ببساطة أكتر فهي بحسبة بسيطة جداً وهي إن إحنا كبشر بنستهلك كمية مياه والمفروض إن ربنا بيعوض المياه اللي إحنا بنستخدمها دي بالمطر لما بينزل .. جميل .. يبقي المفروض بالمنطق إحنا كبشر نشوف كل سنة إن شاء الله يعني حينزل مطر قد إيه وبناء عليه نحدد استهلاكنا بناء عليه .. صح؟ .. المشكلة إن ده مبيحصلش.
دول زي إيران والعراق والأردن عندها هسهس اسمه إنها تحقق الإكتفاء الذاتي من المحاصيل الزراعية عشان متستوردوش من بره .. ده جميل جداً وهدف سامي يستحق الإحترام .. المشكلة زي ما بيقول (تشارلز أيسلاند Charles Iceland) مدير معهد الموارد المائية WRI إن الشرق الأوسط ككل بقاله سنين بيعاني من قلة معدلات المطر .. ده معناه إن أنهار زي دجلة والفرات كمية المياه اللي فيها مش حتكفي إنها تروي الأراضي الزراعية وكمان إن الناس تشرب .. طب والحل؟ .. فضيلي يا إبني الأبار الجوفية عشان نروي الأراضي الزراعية دي .. النهاردة عايزين سوا ناخد حالتين نفصفص فيهم براحة وهم إيران والأردن.
بحيرة أورميه .. فيلم رعب عايشه الإيرانيين:
من عشرين سنة دي كانت أكبر بحيرة في الشرق الأوسط .. دي كانت منتجع حضرتك بتروح هناك تقضيلك يومين ترجع بني أدم جديد .. تضربلك غطسين في المياه وحمام في الطينة بتاعتها ولا أحلي جلسة ماساج رباني .. دلوقتي البحيرة دي بقت بركة مياه .. في التسعينات إنت كنت بتتكلم عن بحيرة مساحتها 5,400 كيلومتر مربع يعني أكبر بشوية من بحيرة ناصر اللي مساحتها 5,250 كيلومتر مربع .. دلوقتي بحيرة إورميه مساحتها بقت 2,085 كيلومتر مربع ولو معدل الإنحصار بتاع البحيرة دي كمل علي كده فهي قدامها كام سنة وتختفي خالص .. طب المشكلة فين؟ .. أرجع للنقطة اللي قلتها في المقدمة وهي إن الإيرانيين عشان يرووا محاصيلهم الزراعية فضوا مياه البحيرة من غير ما يقصدوا.
إيران بلد حاول تستوعب المعلومة الجايه دي عنها وهي إن 90% من المياه اللي بتستهلكها البلد كلها كل سنة من مياه الشرب بتروح لري المحاصيل الزراعية .. إنت متخيل؟ .. الناس دي بنت شوية سدود حول المنبع بتاع البحيرة عشان يستفيدوا منها لري المحاصيل الزراعية .. الناس دي لسنين شافت إن معدلات سقوط المطر بتقل يعني في كل سنة كان المفروض يقللوا من المياه اللي هم بيسحبوها من البحيرة لري الأراضي الزراعية بس ده محصلش .. الحكومة مكنتش بتفكر غير في هسهس عايزين ننتج محاصيل زراعية أكتر .. عايزين نحقق الإكتفاء الذاتي من الأكل .. لحد ما صحيوا من النوم في يوم من الأيام لقوا البحيرة خلصت .. المشكلة الأكبر إن بحيرة أورميه من البحيرات اللي بتتصنف إنها Hypersaline يعني نسبة الملوحة فيها عالية فلما المياه اللي فيها بدأت تقل فنسبة تركيز الملح تضاعفت .. تعالي إنت أروي بيها محاصل زراعية حتلاقي الدنيا باظت معاك.
كل ده ليه؟ .. ده إسمه إسراف وسوء استخدام للموارد المائية .. ده الجزء اللي البشر مسئولين عنه ومتنساش تحط شوية البهارات بتاعة التغيرات المناخية .. دلوقتي الشرق الأوسط بيعيش أسوأ فترة جفاف في الخمسين سنة اللي فاتوا وده بسبب إرتفاع درجة حرارة الأرض .. حيجي حد يقولك طب ما كل كام سنة كده بتيجي سيول تعوض المياه اللي ناقصة حقولك غشيم مش فاهم حاجة .. معني إن درجة حرارة الأرض زادت إن معدل البخر هو كمان حيزيد .. مش حتفرق إذا كانت السيول جابتلك شوية مطرة زيادة ما هي حتتبخر .. نقطة كمان وهي إن السيول مشكلتها إن محدش بيعرف يستفيد بيها أوي لإن لو كنا بنستفاد بيها كانت دول زي الصين وألمانيا وبلجيكا لما بتحصل فيها سيول بيزغرطوا .. ده مبيحصلش .. إنك تستفيد من السيول كأنك بتقول لحد أنا عايز أخش سباق جري 100 متر وأكسبه عشان كده حجيب عربية تخبطني وتزقني كام متر فأستغل المسافة اللي أنا طرتها في الجو دي عشان أقوم وأكمل جري وأكسب السباق .. المشكلة إن الخبطة حتوديك المستشفي مش حتخليك تكمل سباق .. بناء علي تقارير طالعة من وزارة البيئة الإيرانية ف30% من نقص مياه بحيرة أورميه سببه التغيرات المناخية.
الأردن .. تسعة أعشار مشاكل الشرق الأوسط سببها إسرائيل:
عشان تفهم مشكلة الأردن إيه حاول تستوعب المعلومة الجايه دي .. في المتوسط المواطن الأردني بيعيش علي 40 لتر مياه في اليوم شامل أكله وشربه واستحمامه وغسيل هدومه وسلطاته وبابا غنوجه وعشان بس تتحط في الصورة عايزك تعرف إن في المتوسط المواطن الأمريكاني بيعيش علي 400 لتر مياه في اليوم .. الأردن بلد منسوب المياه فيها بيقل فعلياً بمعدل مرعب اللي هو متر في السنة وزي ما عملنا في إيران لما فهمنا هي المشكلة فين بالضبط فاحنا برده لازم نعمل ده مع الأردن واللي مشكلتها عبارة عن برده سموزي من 3 حاجات في بعض .. اللاجئين السوريين وإسرائيل وطبعاً التقلبات المناخية.
بناء علي كلام (بشار بطاينة) اللي تقدر تقول عليه وزير الموارد المائية الأردني فاللاجئين السوريين اللي استقبلتهم الأردن خلال السنين بتاعة الحرب الأهلية السورية بيكلفوا وزارة المورد المائية الأردنية 600 مليون دولار في السنة .. عارف إن ده رقم مبالغ فيه بس بما إن مفيش حد طلع قال إن ده هبد فخلينا نعتبره حقيقة مؤقتاً .. السبب الثاني ورا أزمة المياه في الأردن إن زي ما مصر بتاخد مياه الشرب بتاعتها من نهر النيل اللي بتستفيد منه دول تانية فبرده الأردن عايشة علي نهر إسمه نهر الأردن .. المشكلة إن نهر الأردن ده بيخدم إسرائيل والضفة الغربية وسوريا ولبنان ومعاهم الأردن .. طبعاً كل بلد فيهم بانيه سدود علي النهر وكل بلد ماسكة في حصتها وبتحاول تسرق شوية مياه زيادة خصوصاً إسرائيل .. كل فترة كده الأردنيين والإسرائيليين يمسكوا في خناق بعض اللي هو حاجة شبه الخناقة بينا وبين أثيوبيا بالضبط.
الحل الإسرائيليين بقوا شاطرين فيه أوي هو تكنولوجيا تحلية مياه البحر .. تقريباً كل إحتياجات إسرائيل من مياه الشرب بتيجي من التكنولوجيا دي وعشان الأردن عندها نقص حاد في مياه الشرب فمش بتلاقي حل غير إنها تشتري مياه من إسرائيل .. المشكلة مش في كده .. المشكلة إن تحلية مياه البحر تكنولوجيا بتحتاج طاقة كتير فشخ ومحطات تحلية المياه بتاعة إسرائيل مش شغالة بالطاقة المتجددة .. ده معناه إن الإسرائيليين بيحرقوا بنزين وغاز طبيعي عشان يلاقوا مياه يشربوها .. العوادم بتاعة إحتراق البنزين ده بتطلع للهواء وبتسبب في الأخر لإرتفاع درجة حرارة الارض اللي هو بيسّمع مع الأردنين إن الجفاف عندهم يزيد ومعدلات المطر عندهم تقل زيادة أكتر ما هي قليلة.
المصدر:
- مقالة بعنوان The Middle East is running out of water, and parts of it are becoming uninhabitable نشرت في موقع وكالة أنباء CNN وده لينك المقالة الأصلية:
https://edition.cnn.com/2021/08/22/middleeast/middle-east-climate-water-shortage-iran-urmia-intl/index.html
