لينك التسجيل الصوتي علي ساوند كلاود:
https://on.soundcloud.com/cYvWd
من فترة إتكلمت عن سد النهضة .. إنت ممكن تقرأ المقالة براحتك بس في حالة إنك مش فاضي تقرأها فخلينا نديلك ملخص سريع أوي عشان بس تبقي مستوعب الموضوع .. سد النهضة أو Grand Ethiopian Renaissance Dam و إختصاراً الأثيوبيين بيسموه GERD ده سد هم عايزين يعملوه علي النيل الأزرق .. هي الحقيقة المشكلة في حجمه .. السد ده كبير .. كبير أوي .. السد ده المفروض إنه يولد 6,000 جيجاوات كهرباء .. عشان بس أحطك في الصورة السد العالي بينتج 1,600 جيجاوات بس .. السد ده المفروض برده إنه يعمل وراه بحيرة صناعية بتشيل 70 مليار متر مكعب مياه .. عارف دول قد إيه؟ .. ده تقريباً 50% من من كمية المياه السنوية اللي بتعدي في نهر النيل .. أظن بدأت تفهم المشكلة فين .. في المقالة اللي إتكتبت عن سد النهضة أنا شرحت الموضوع من وجهة نظر الأثيوبيين .. ليه هم عايزين يعملوا سد النهضة؟.. إيه مشاكله و ليه إتأخر في التنفيذ؟ .. النهاردة أنا عايز أبص للموضوع من وجهة نظرنا إحنا .. في المقالة دي أنا عايز أحاول أجاوب علي سؤالين:
- ليه مصر مش عايزه السد يتعمل؟
- إيه الحلول اللي ممكن تتعمل عشان الأزمة دي تعدي علي خير؟
خلينا نبدأ بالسؤال الأولاني .. ليه مصر مش عايزه السد يتعمل؟
الحقيقة إن مصر بانيه موقفها علي حاجتين و الحاجتين دول مرتبطين ببعض .. الحاجة الأولانية هي Specs أو الأرقام بتاعة السد نفسه .. مصر 80% من المياه العذبة اللي بتجيلها بتيجي من النيل الأزرق اللي الأخت أثيوبيا عايزة تبني السد عليه و المفروض يعني إن أثيوبيا تبدأ تملا البحيرة الصناعية اللي ورا السد بداية من يوليو 2020 .. معني إن السد ياكل من حصة مصر من المياه ده بيتعارض مع الحاجة الثانية اللي مصر بانيه عليها إعتراضها علي سد النهضة و هي ما يسمي إتفاقيات مياه النيل و دي حكاية غريبة عايزة تتحكالك بشوية تفصيل لإن الإتفاقيات دي هي أساس المصيبة اللي إحنا فيها دلوقتي .. زمان لما بريطانيا بدأت تتوسع في أفريقيا و تحتل في بلادها بداية من مصر كان من أهم أهداف الإستعمار البريطاني إنه يسيطر علي منابع نهر النيل و ده مفهوم .. اللي مش مفهوم هو الهبد اللي الإنجليز هبدوه.
أول هبدة كانت بتوقيع الإتفاقية الأنجلو- أثيوبية سنة 1902 .. الإتفاقية دي كانت المفروض إنها لترسيم الحدود بين أثيوبيا و السودان .. المنطق بيقول إن مين اللي يمضيها؟ شطور أثيوبيا و السودان .. بس مش ده اللي حصل .. السودان كانت تحت الإحتلال البريطاني و عشان كده الإنجليز مضوا الإتفاقية دي مع الأثيوبيين بالنيابة عن السودانيين و خلوا الأثيوبيين يمضوا بإنهم عمرهم ما حيفكروا يبنوا أي سد علي النيل الأزرق ممكن يعيق حركة المياه مهما كانت الظروف و المبررات إلا بعد موافقة المندوب السامي البريطاني للسودان و ده يبقي مندوب التاج البريطاني في السودان و اللي بيحكم السودان بإسم الإحتلال البريطاني.
تاني هبدة و دي بقي الهبدة العابرة للقارات كانت الإتفاقية الأنجلو- مصرية سنة 1929 .. كان المفروض إن دي إتفاقية تحديد مين حياخد كمية مياه قد إيه من النيل؟ و كان المفروض إن الإتفاقية دي تتم بين مصر و السودان و كينيا و أوغندا و دولة اسمها تانجانيكا اللي إنت دلوقتي عارفها باسم تنزانيا .. يعني دي إتفاقية المفروض إنها بين دول منبع النيل و بين دول المصب .. دي أهم إتفاقية و لازم تتكتب بحرفنة عشان كل الدول حقها تاخده بما يرضي الله .. بس بما إن الإحتلال ميعرفش حاجة إسمها بما يرضي الله فالإتفاقية دي إتمضت بين مصر و بين بريطانيا بحيث إن بريطانيا مضت بالنيابة عن السودان و كينيا و أوغندا و تانجانيكا .. الإتفاقية دي قالت إن مصر ليها نصيب الأسد من مياه النيل .. الإتفاقية قالت إن نصيب مصر من مياه النيل كل سنة 48 مليار متر مكعب و يجي وراها السودان ب4 مليار متر مكعب و مش بس كده .. الإتفاقية قالت إن لو أي دولة من دول المنبع حبت تبني أي سد فلازم تاخد موافقة مصر الأول.
تالت هبدة و دي الهبدة المسئولة عن المشكلة اللي إحنا فيه دلوقتي هي إتفاقية سنة 1959 بين مصر و السودان عشان البلدين يشوفوا الدنيا حتمشي إزاي لما مصر تبني السد العالي .. الإتفاقية دي هي اللي حددت بالضبط نصيب كل دولة قد إيه من مياه النيل؟ و إتحطت علي أساس الإتفاقية الأنجلو- مصرية بتاعة سنة 1929 .. زي ما قلتلك مصر كان حيبقي ليها نصيب الأسد ب66% من مياه النيل اللي هم تقريباً 55.5 مليار متر مكعب من أصل 84 مليار متر مكعب بيعدوا فيه كل سنة .. السودان نصيبها 22% اللي هم حوالي 18.5 مليار متر مكعب .. إتساب 12% من مياه النيل لعملية التبخر الطبيعي اللي هم تقريباً 10 مليار متر مكعب .. لو إنت شاطر في الحساب فإنت أكيد عينك لقطت الخازوق .. لو حسبت النسب حتلاقي إن الإتفاقية سابت 2% بس من مياه النيل لدول المنبع .. إنت متخيل .. حط نفسك مكان دولة زي أثيوبيا .. 85% من مياه النيل جايه من أثيوبيا و في الأخر عايز تقولها إن نصيبك إنتي و دول المنبع التانيين 2% بس من مياه النيل.
هنا بقي حتلاقي نفسك قصاد الحقيقة المرة و هي إن الإنجليز دول كانوا شوية هبيدة مش فاهمين أي حاجة و كانوا مش بيفكروا غير في مصلحتهم و بس و لبسوا الدول كلها في الحيط .. عشان تشوف ده بعنيك تعالي ناخدهم إتفاقية إتفاقية:
جت أثيوبيا قالت إن إتفاقية 1902 إتمضت مع بريطانيا كممثل عن السودان و الإتفاقية قالت إن مش من حق أثيوبيا إنها تعمل أي مبني (اللي هو سد يعني) حيترتب عليه إنه يعوق سريان مياه النيل للسودان بس بما إن سد النهضة مش حيمنع مياه النيل إنها توصل للسودان إنما حيسحب حبة منها و يخزنها عنده فده لا يعتبر خرق للإتفاقية .. مصر بتقول لا بقي .. لما بريطانيا إحتلت مصر كانت مصر و السودان دولة واحدة .. و لما الجلاء البريطاني عن مصر حصل كانت مصر و السودان دولة واحدة .. ده معناه إن إتفاقية 1902 لو حنطبقها دلوقتي فلازم أثيوبيا تاخد موافقة مصر قبل ما تبني السد.
بلاش دي .. دول المنبع اللي هي أوغندا و كينيا و تنزانيا قالت إنهم مش هم اللي مضوا علي الإتفاقية الأنجلو- مصرية بتاعة سنة 1929 لإن البريطانيين مضوا بالنيابة عنهم و بالتالي مصر تبل الإتفاقية دي و تشرب ميتها و نفس الكلام علي إتفاقية سنة 1959 .. أثيوبيا هي كمان قالت إن محدش قالها إمضي لا علي إتفاقية 1929 ولا إتفاقية 1959 و بالتالي الكلام اللي فيهم هي مش مُلزمة إنها تنفذه .. مصر من ناحيتها بقت عامله زي شخصية التاجر في فيلم سلام يا صاحبي اللي (بركات) و (مرزوق) اللي جسدهم (سعيد صالح) الله يرحمه و (عادل إمام) لما باعوله عربية ملهاش ملف و هو بقي مش عارف ياخد حقه .. اللي طالع عليها إنها تقول يعني أشوف حقي بيضيع و أسكت؟ .. منطق مصر إنها ماضية علي 3 إتفاقيات .. يعني أعمل إيه بالإتفاقيات اللي معايا؟
طب والحل؟ .. هل الأزمة دي ملهاش مخرج؟
خليني أقولك إن الكلام مش جايب نتيجة أو إسمحلي أبقي دقيق أكتر بإن طريقة الكلام المتبعة دلوقتي مش جايبة نتيجة .. من نوفمبر 2019 أثيوبيا و مصر و السودان كل شوية يعملوا إجتماعات يا ثنائية يا ثلاثية و بتكون برعاية أميركا و البنك الدولي و في كل مرة بنمسك في خناق بعض و مش بنوصل لحاجة .. علي فكرة الكلام اللي مش بيجيب همه ده شغال من زمان مش من دلوقتي .. سنة 1999 إتعملت إتفاقية إسمها إتفاقية حوض النيل و إسمها بالإنجليزي Nile River Basin Cooperative Framework و إختصاراً بتتسمي CFA و دي إتفاقية إتمضت بين العشر دول اللي بيتسموا دول حوض المنبع .. هي فعلياً الإتفاقية دي مقالتش حاجة غير إن الدول دي عايزة تمضي إتفاقية جديدة لإعادة ترسيم حصة مياه النيل لإن مش منطقي إن إتفاقية 1959 تقول إن 10 دول يبقي نصيبهم 2% بس من مياه النيل و مصر نصيبها يبقي 66% .. مصر مرضتش إنها تمضي علي الإتفاقية دي علي فكرة.
سنة 2015 أثيوبيا و مصر و السودان مضوا إتفاقية سموها إعلان مباديء سد النهضة و اللي بالإنجليزي إسمها Agreement on Declaration of Principles on Ethiopia’s Grand Ethiopian Renaissance Dam و إختصاراً بتتسمي DoP و الإتفاقية دي تختلف عن إتفاقية CFA في إنها لما إتمضت عملت مشكلتين كبار جداً بين مصر و أثيوبيا.
المشكلة الأولانية إن الإتفاقية قالت إن مياه النيل لازم تتوزع بما يرضي الله بس الغريب إن مصر مأصرتش إن إتفاقية DoP يتقال فيها نصاً إن توزيع مياه النيل لازم ياخد في إعتباره الإتفاقيات القديمة اللي إتمضت وقت الإحتلال البريطاني و هنا إنت محتاج فعلياً إنك تقول يا سبحان الله .. النقطة دي بالذات هي اللي الأثيوبيين ماسكين فيها بإيديهم و سنانهم .. نقول كمان .. مصر و السودان مضوا علي إتفاقية DoP من غير ما يطلبوا إن يتقال نصاً فيها إن تقسيم حصص مياه النيل لازم ياخد في إعتباره الإتفاقيات اللي إتمضت وقت الإحتلال البريطاني .. ده معناه بالضرورة (علي الأقل من وجهة نظر الأثيوبيين) إن مصر بتقول إن الإتفاقيات دي تبلوها و تشربوا ميتها .. مصر من ناحيتها بتقول عليا الطلاق ما حصل و إن مش معني إني مضيت علي إتفاقية DoP إني بكده بلغي العمل بإتفاقيات تقسيم مياه النيل اللي إتمضت وقت الإحتلال البريطاني.
دي مش بس مشكلة إتفاقية DoP .. فيه مشكلة تانية مُتعلقة بمعاد و تفاصيل ملي الخزان بتاع سد النهضة .. المبدأ رقم خمسة من الإتفاقية بيقول إن حتتعمل لجنة دولية من الخبراء International Panel of Experts أو IPoE إختصاراً و اللجنة دي حتتكون من 10 بني أدمين .. العشرة دول حيتقسموا كالأتي .. مصر و أثيوبيا و السودان كل بلد حتبعت إتنين خبراء يعني بتتكلم عن 6 خبراء و كده يبقي فاضل أربع خبراء حنجيبهم من بره .. اللجنة دي حتحط توصيات بإن إزاي سد النهضة ده يتملي و التوصيات دي مصر و أثيوبيا و السودان حيمضوا عليها و دي تبقي خريطة الطريق اللي الكل راضي بيها .. جميل .. اللجنة دي لما إجتمعت قالت إن لازم تتعمل دراستين .. الدراسة الأولانية هي Hydrological Modelling اللي هو نحسب أثيوبيا عشان تولد كهرباء كام جيجاوات حتحتاج كام مليار متر مكعب مياه يبقوا في الخزان؟ .. الدراسة الثانية و دي المهمة هو تأثير الحسبة بتاعة Hydrological Modeling دي علي مصر و السودان .. طبعاً كان السؤال اللي إتسأل طب هو مين اللي حيعمل الدراستين دول؟ .. الدول الثلاثة اللي هم مصر و أثيوبيا و السودان إتفقوا علي إنهم يجيبوا شركتين فرنساوي واحدة إسمها BRLi Group و الثانية اسمها Artelia هم اللي يعملوا الدراستين .. لسه حنقول هيييييه الدول الثلاثة مسكوا في خناق بعض و مهم أوي تفهم ليه و معلش هي حسبة هندسية و فيها شوية معادلات بس إستحملني.
دلوقتي الحسبة بتاعة Hydrological Modelling دي حتتعمل عشان يقولوا لو مثلاً أثيوبيا محتاجة 6,000 جيجاوات كهرباء زي ما هم عايزين فحيحسبوا هي محتاجة كام مليار متر مكعب مياه لازم يبقوا في السد؟ .. جميل .. مصر قالت إن الحسبة دي تتعمل علي حسب تقسيمة حصة مصر من مياه النيل اللي إتعملت بناء علي إتفاقية 1959 .. ده معناه إن حصة أثيوبيا من مياه النيل أقل من 2% .. ده معناه إن عشان أثيوبيا تملي السد بتاعها بكمية مياه تكفي Target اللي هي حاطاه لنفسها فإنت قدامك بالميت 15 سنة و يمكن أكتر .. أثيوبيا سمعت ده و رقعت بالصوت .. وجهة نظرها معلش يعني أنا مش طرف في إتفاقية 1959 و ممضتش عليها أصلاً فليه ألتزم بيها؟
بعدها مصر إقترحت حاجتين .. الحاجة الأولانية هي إن البنك الدولي يخش كوسيط في المفاوضات .. الحاجة الثانية هي إنهم يزحلقوا السودان بره المفاوضات و إن اللي يقعدوا مع بعض هم مصر و أثيوبيا بس .. هو أنا الحقيقة مش عارف ليه مصر إقترحت إنها تطلع السودان بره المفاوضات بس مش حيفرق كتير إنك تفسر ده لإن أثيوبيا رفضت المقترحين .. شوية و الدول الثلاثة إتفقوا علي إنهم يعملوا مجموعة بحث علمية مستقلة National Independent Scientific Research Group أو NISRG عشان المجموعة دي تحاول توصل لإجابة سؤال 64 الف ريال .. هو تأثير ملي سد النهضة علي مصر و السودان حيبقي عامل إزاي بالضبط؟
لسه اللجنة بتاعة NISRG حتقول يا رحمن يا رحيم قامت مصر مقدمة إقتراح جديد لأثيوبيا عشان تملي سد النهضة .. الإقتراح كان إن أثيوبيا تملي سد النهضة خلال سبع سنين بحيث كل سنة أثيوبيا تضمن إن نهر النيل يمشي فيه بالميت خالص 40 مليار متر مكعب .. ال40 مليار متر مكعب مياه دول إتحسبوا علي أساس إن إرتفاع المياه في السد العالي يفضل فوق حاجز 165 متر .. مش بس كده .. لما سد النهضة يتملي إن شاء الله فأثيوبيا لازم تتعهد بإنها تفتح المحبس عشان تسيب يمشي في نهر النيل متوسط كمية المياه اللي بتجري فيه كل سنة اللي هم 49 مليار متر مكعب .. خدت بالك .. مصر كأنها بتقول لأثيوبيا خدي إنتي كل سنة 9 مليار متر مكعب كل سنة إملي بيهم السد بتاعك عشان لما تضرب التسعة مليار دولار في سبع سنين ديولك 63 مليار متر مكعب .. مصر كمان إقترحت إن يبقي ليها مكتب في موقع السد عشان يبقي عينها علي اللي بيحصل برده .. أثيوبيا رفضت الإقتراح ده علي أساس إن سبع سنين كتير أوي عشان يملوا الخزان و ثانياً إن إقتراح مصر بيخليها برده ماسكه في حصتها من مياه النيل اللي إتقال عليها في الإتفاقيات القديمة من أيام الإحتلال.
عشان الأزمة دي تعدي علي خير أنا مش شايف غير أربع حلول و الحقيقة إن كل حل بيجي بمشاكله:
- الحل الأول هو التفاوض بحيث إن الأساس يكون إتفاقية حوض النيل CFA .. الحل ده مشكلته إن أولاً لازم مصر و السودان يوافقوا يمضوا علي الإتفاقية أصلاً .. مش بس كده .. لازم أثيوبيا هي كمان توافق علي إن عملية مليء سد النهضة و التحكم في السد ميبقاش تحت إيدها إنما يبقي تحت إيد لجنة من دول حوض النيل و معاهم مصر و السودان .. عشان بس تتفهم الحل ده .. الحل ده بيقول إن مصر و السودان حيضحوا بنصيب الأسد اللي ليهم في مياه النيل قصاد إن أثيوبيا تفقد سلطتها علي السد بتاعها.
- الحل الثاني هو إن جهات من بره تتوسط عشان تحل الأزمة زي أميركا أو البنك الدولي و مشكلة الحل ده إن لو مثلاً الإتحاد الأوروبي تدخل فحتلاقيه بيحابي لمصر لإن مصلحة الإتحاد الأوروبي مع مصر أكبر من مصلحته مع أثيوبيا .. فلو لقيت حد بينادي بالحل ده فخليك عارف إنه بيهري لإن إذا كانت مصر حتقبله فأكيد أثيوبيا حترفضه.
- الحل الثالث هو التحكيم الدولي و ده الحل اللي أنا شخصياً مش عايز أروحله لإن ساعتها مصر حتبني حجتها القانونية علي الإتفاقيات القديمة اللي إتمضت وقت الإستعمار البريطاني و بنسبة كبيرة الحجة دي حتترفض في أي محكمة دولية.
- الحل الرابع هو الحل العسكري و ده حل أي حد بينادي بيه فعلياً مش فاهم هو بيتكلم عن إيه و عشان كده حطيته الحل الرابع و اللي المفروض مكنش يتحط بس أنا قلته عشان متؤكد إن ناس كتير حتسألني عليه .. الحل ده ياريت تنسوه و محدش يجيب سيرته.
فعلياً من الأربع حلول اللي أنا حطيتهم الحل الأول هو الأقرب للتنفيذ .. الحل العسكري له تاريخ أسود معانا .. ناس كتير متعرفش إن مصر دخلت حرب مع أثيوبيا قبل كده عشان السيطرة علي مياه النيل برده و الحرب دي إحنا خسرناها .. حالياً القوات المسلحة المصرية لا عندها الإمكانيات ولا التسليح و لا المبرر القانوني حتي إنها تشن حرب ضد أثيوبيا .. فتاني .. الحل الأمثل هو التفاوض .. الأثيوبيين عايزين يملوا السد بس مستكترين مدة السبع سنين .. ممكن نخليهم يقبلوها في مقابل إن نقدملهم إحنا حاجة قصادها .. أكيد فيه حاجة ممكن نقدمهالهم إياكش حتي نديلهم ألف دبابة M1A1 من اللي ماليين المخازن بتاعتنا .. لو الأثيوبيين قبلوا بشرط السبع سنين فالمشكلة حتتحل و لو مبدأياً .. بس يارب اللي يتفاوض يعرف يفهم هم عايزين إيه في المقابل و نقدمه.
المصادر:
- مقالة بعنوان Colonial-Era Treaties are to Blame for the Unresolved Dispute over Ethiopia’s Dam نشرت في مجلة The Conversation وده لينك المقالة الأصلية:
https://theconversation.com/colonial-era-treaties-are-to-blame-for-the-unresolved-dispute-over-ethiopias-dam-133538 - مقالة بعنوان Grand Nile Compromise: a Sisyphean Task? نشرت في جريدة Ethiopia Insight وده لينك المقالة الأصلية:
https://www.ethiopia-insight.com/2019/10/29/grand-nile-compromise-a-sisyphean-task/
