الألمان سقف طموحاتهم لمنتخبهم في اليورو الجايه هي بمنتهي البساطه إنه ميتفضحش .. ده نفس المنتخب اللي خسر 2-1 من شمال مقدونيا اللي هي أساساً بلد لسه مولوده أول إمبارح و متصنفه في المركز 65 علي مستوي العالم .. ده نفس المنتخب اللي إتمسح بكرامته الأرض 6-0 من الإسبان ودي كانت أكبر هزيمة للألمان من سنة 1931 .. الألمان حتي مش مستنيين من منتخبهم إنه يعدي دور المجموعات .. بس ميطلعوش بفضيحة .. النهاردة حنتكلم عن الخمس أسباب اللي في رأيي بتخلي ألمانيا من الدول المرشحة إنها تكسب اليورو الجاية.
السبب الأول هو المدير الفني (يواكيم لوف Joachim Low) .. هو إسمه (يواكيم) بس لسبب ما الألمان بيسموه (يوجي) بس ما علينا مش قضيتنا دلوقتي .. (يوجي لوف) ماشي بعد البطولة دي و انت من حقك تتريق أو تهزقه زي ما انت عايز .. من حقك تقول عليه إنه مدرب مبالغ فيه و من حقك تقول إنه لازم يقعد في البيت و كفاية عليه كده .. هو عارف إن كل العيون حتبقي عليه .. إعلام و صحافة و متفرجين .. محدش حيجيب سيرة اللاعيبه .. كله حيبقي مستني يسن سكاكينه ل(يوجي) وهي دي نقطة قوة المنتخب الألماني في اليورو .. اللاعيبه حتبقي مش تحت الميكروسكوب وده حيديها مساحة تلعب براحتها .. خدامك انا و العربية إن ناس كتير ضحكت لما سمعت خبر إن إدارة ريال مدريد فكرت فيه عشان يمسك الفرقة بعد ما (زين الدين زيدان) مشي و قبل ما يعينوا (كارلو أنشيلوتي Carlo Ancelotti) بس حاول متنساش إن (يوجي) معاه كاس عالم 2014 ودي بطولة مش زي كاس مصر هي .. إنك تكسب كاس العالم دي مش صدفة ولا حظ .. صحيح الحظ بيلعب دور بس انت لازم تبقي شاطر في شغلتك عشان تكسب كاس العالم .. ولإنه شاطر في شغلته فهو قرر إنه يرجع عن الخطوة اللي هو شخصياً إعترف إنها كانت غلطة وده هو السبب الثاني.
السبب الثاني هو عودة الإبن الضال (توماس مولر Thomas Muller) .. الألمان بيسموه راوم-دويتر Raumdeuter .. دي كلمة ألماني ترجمتها للعربي هي مترجم المساحات .. لو مش فاهم معناها إيه فدي عشان تفهمها حاول تفتكر فيلم Next بتاع (نيكولاس كايدج Nicolas Cage) .. في الفيلم ده (نيكولاس) بيجسد دور ساحر بيقدر يشوف دقيقتين في المستقبل .. دي القوة السحرية بتاعة (مولر) .. بطريقة ما هو بيقدر يشوف المستقبل .. بيعرف هي الكورة حتروح فين فتلاقيه هناك يا عشان يجيب جون يا عشان يعمل أسيست .. بعد كاس العالم 2018 (يوجي) قال انا مش عايز (مولر) و حبني جيل جديد لمنتخب ألمانيا بعيد عن الحرس القديم .. شوية و (يوجي) إكتشف حجم غلطته .. الميزة اللي عند (مولر) مينفعش تعلمها لحد .. هو بيتولد بيها .. ده السبب إن الموسم ده مفيش حد عمل أسيستات أكتر من (مولر) في الدوري الألماني.
السبب الثالث هي البدعة اللي عملها (بيب جوارديولا Pep Guardiola) و (توماس توخيل Thomas Tuchel) اللي إسمها False 9 .. الفكرة بمنتهي البساطة إن الفرقة بتلعب من غير راس حربة .. مفيش اللاعيب اللي زي (حسام حسن) أو (عماد متعب) .. مفيش اللي يخلص الفرص في ال18 .. لو انت بتلعب مثلاً يعني 4-2-3-1 فانت بتلعب ب4 لاعيبه خط نص مهاجمين بيشتغلوا مع بعض كلهم عشان يخلقوا فرص و يجيبوا جوان .. الاربعة اللي حتشوفهم في منتخب ألمانيا هم (تيمو فيرنر Temo Werner) و (كاي هافيرتز Kai Havertz) و اللي بيلعبوا في تشيلسي فهم فاهمين الفكرة بتاعة False 9 دي كويس اوي .. ومعاهم (ليروي ساني Leroy Sane) اللي إتعلمها علي إيد (جوارديولا) أيام ما كان معاه في مانشستر سيتي و أخيراً (مولر) اللي هو أساساً فكرة False 9 دي متفصلة عليه .. يووووه نسيت .. ولد الدنابري (سيرج جنابري Serge Gnabry) دلوعة (يوجي لوف) .. إبننا لعب لمنتخب ألمانيا 22 ماتش جاب فيهم 16 جون .. هجوم ما يعلم بيه إلا ربنا.
السبب الرابع هو عشان هي دي العقلية الألمانية يا إبراهيم .. الألمان ميعرفوش حاجة إسمها خوف .. وجودهم في مجموعة الموت لوحده مع المجر و فرنسا و البرتغال حيخليهم يقولوا عليا و علي أعدائي .. أول ماتش ليهم في البطولة حيكون ضد فرنسا بطلة العالم و صدقني لو قلتلك إن الفرنساويين خايفين من الألمان أكتر من ما الألمان خايفين من الفرنساويين .. ونفس الكلام علي البرتغاليين .. محدش عايز يلاعب الألمان خصوصاً لو محدش متخيل إن الألمان يقدروا يعملوا حاجة .. ولو مش مصدقني بص لكاس عالم 2002 في كوريا الجنوبية و اليابان.
السبب الخامس هو اللاعيب اللي لسبب ما محدش بيجيب سيرته .. (ليون جوريتزكا Leon Goretzka) .. كلنا شفنا الكوميكسات اللي طلعت عليه لما (هانسي فليك Hansi Fleck) مسك بايرن ميونيخ و خد بيهم Champions League .. كلنا شفنا صورته وهو بيلعب في شالكه وكان رفيع اللي هو حاجة شبه شخصية (سامح عبدالشكور) اللي قدمها (أحمد راتب) في مسرحية سك علي بناتك و هوبا بسم الله ما شاء الله زي ما يكون قلب علي مصارع من بتوع WWE في بايرن ميونيخ تحت إيد (فليك) .. التحول الرهيب في الفورمة بتاع (جوريتزكا) مش بس في عضلاته و لياقته البدنية إنما في دماغه كمان .. الواد زي ما يكون فجأة كده قرأ كتاب كيف تكون لاعيب خط نص Box-to-Box شاطر و قرر ينفذه .. لو انا جيت سألتك تفتكر مين حيلعب في خط نص ألمانيا فانت غالباً حتقول (جوشوا كيميتش Joshua Kimmich) إرتكاز و جنبه (إليكاي جوندوجان Ilkay Gundogan) من مانشستر سيتي و جنبه (توني كروس Tony Kroos) من ريال مدريد .. حط عليهم (جوريتزكا) و حتلاقي نفسك قصاد خط نص جاحد.
المصدر:
فيديو بعنوان The Case for Germany-Euro Series نشر علي YouTube وده لينك الفيديو:
