بيب جوارديولا .. دروس من حياة استاذ (ونيس) بتاع كرة القدم.

لينك التسجيل الصوتي علي ساوند كلاود:
https://on.soundcloud.com/1pHzW5yJr7D8Tw82tq

أهم حاجة تحطها في دماغك أول ما تيجي تفتح سيرة (بيب جوارديولا Pep Guardiola) إن ورا الكلام عن قد إيه هو عبقري و ورا الكلام عن هل هو اللي عمل (ليونيل ميسي Lionel Messi) ولا هل (ميسي) هو اللي عمل (جوارديولا) .. ورا الكلام عن هل (جوارديولا) بيفهم فعلاً ولا هو بيشتري النجاح بالفلوس اللي بيصرفها علي شراء أحسن اللاعيبه في العالم .. ورا كل الهري ده كله فهو يبقي ابن عامل بناء بسيط .. ده يبقي الابن الثالث من أربع ولاد ربنا رزق بيهم واحد اسمه (فالينتي جوارديولا Valenti Guardiola) و مراته (دولورس سالا Dolors Sala) واللي كان شغال عامل بناء بسيط عايش في مدينة برشلونة اللي بتقع في إقليم اسمه كاتالونيا في إسبانيا .. (جوارديولا) متولدش لعيلة معاها فلوس و مكنش حيلته حاجة بس انت تقدر تقول إنه متربي كويس .. حاول عشان تقربها أوي لدماغك تخيل الفرق بين (حازم إمام) و (محمد أبوتريكه) .. مش حتكلم عن مين فيهم أحسن من التاني أنا بس بتكلم إن واحد فيهم إتولد لعيلة من أساطير كرة القدم في مصر اللي هو (حازم) و بين واحد مكنش حيلته أي حاجة زي (أبوتريكه) .. مش معني كلامي إن (حازم) مشتغلش ومتعبش كتير عشان يوصل للمكانة اللي هو فيها .. اللي بقوله إنك قبل ما تفتح بقك و تتكلم مع زمايلك و تتخانق علي مين أحسن Playmaker في تاريخ مصر حط في دماغك المعلومة دي.

بمجرد ما فهمت إنك لما تيجي تتكلم عن (جوارديولا) فانت بتتكلم عن شاب فقير بس متربي كويس فانت محتاج تفهم إن الحظ لعب معاه مش إن ربنا إداله فلوس إنما إن ربنا بعتله اتنين يعلموه كل حاجة هو يعرفها عن كرة القدم .. أحياناً الرزق بيبقي استاذ يشوفك و يحس إنك بني أدم بتفهم و متربي فيبدأ يشتغل عليك عشان يطلع أحسن ما فيك .. الاتنين اللي فعلاً رسموا دماغ (جوارديولا) هم (يوهان كرويف Johan Cruyff) و (مارسيلو بييلسا Marcelo Bielsa) .. الدحيحة أوي أو النيردز بتوع كرة القدم هم اللي حيكونوا عارفين مين الاتنين دول .. بس تعالي نفترض إنك بني أدم طبيعي و مش عارف مين هو (يوهان كرويف) اللي لو جيت قلتلك اسمه تحس إني بقولك اسم مرهم حساسية.

عشان تفهم مين هو (كرويف) حاول تتخيل حرفنة (محمود الخطيب) و دماغ (مانويل جوزيه Manuel Jose) في التدريب و إضربهم في الخلاط مع بعض .. مش حضيع وقت كتير أوصفلك قد إيه (كرويف) كان سافل خش علي YouTube و شوف بنفسك .. هو أساساً لاعيب كرة قدم هولندي و لعب في برشلونة بس لما بطل كرة و بقي مدير فني هو كان بيفكر في حاجة مختلفة شوية .. يجري إيه لو عملنا أكاديمية ناشئين تفضل تعلم العيال الصغيرة طريقة اللعب بتاعة برشلونة لحد ما اللاعيبه دول يكبروا و يلعبوا في الفرقة الأولي و يكونوا خلاص شربوا طريقة اللعب و حفظوها صم .. الفكرة دي بقت أكاديمية لا ماسيا La Masia و اللي عملها كان (كرويف) و اللي سنة 1984 دخلها (جوارديولا) و هو عنده 13 سنة و من أول يوم و هو مفيش في دماغه إلا حاجة واحدة هي إنه يبقي أساسي في تشكيلة الفرقة الأولي لبرشلونة.

علاقة (كرويف) و (جوارديولا) هي استاذ بتلميذه .. أول مرة يشوفوا بعض كانت لما كان (كرويف) بيمرن الفرقة الأولي فحضر ماتش لفرقة الناشئين وعشان برشلونة بيلعبوا بطريقة ثابتة مبتتغيرش اللي هي 4-3-3 فكان (جوارديولا) بيلعب في خط النص ناحية اليمين .. المهم بين الشوطين (كرويف) راح للمدير الفني بتاع فرقة الناشئين وعرض عليه فكرة إن (جوارديولا) يلعب إرتكاز صريح ومن ساعتها و(جوارديولا) هو الإرتكاز الاساسي لفرقة برشلونة لحد ما إعتزل .. إمتي أخر مرة سمعت عن مدير فني لفرقة كرة قدم أو أي مدير في أي حتة في العالم إياكش حتي شركة استشارات هندسية بياخد شاب شغال تحت إيده يعزمه علي الغدا عشان يتكلموا في الشغل وإزاي يطور من فكره ويعلمه كل حاجة هو يعرفها .. (كرويف) كان بياخد (جوارديولا) بعد ما الموسم يخلص يعزمه علي العشا في مطعم مشهور أوي مش بس في برشلونة إنما في العالم اسمه El Bulli لمجرد إنهم يتكلموا في كل حاجة حصلت طول الموسم كإتنين صحاب .. عايزك تتخيل بس إن حد كبير في مجاله زي (كرويف) يفضل بالساعات يتكلم مع لاعيب تحت إيده عن أفكارهم إزاي كرة القدم لازم تتلعب.

تاني حد (جوارديولا) إتعلم منه كتير أوي هو مدير فني أرجنتيني اسمه (مارسيلو بييلسا) .. عشان تفهم في جملة واحدة يطلع مين (مارسيلو بييلسا) ده فخليني أقولك إن الاسم اللي طلع عنه واللي العالم كله عارفه به هو El Loco يعني المجنون بالأسباني .. مشكلة (مارسيلو بييلسا) إنه من أكتر الناس اللي غيرت الطريقة اللي إحنا بنتفرج بيها علي كرة القدم بس للأسف مخدش بطولات كتير .. أخر فرقة دربها كانت فرقة اسمها ليدز يونايتد بتلعب في الدوري الممتاز الإنجليزي ويمكن من أكتر القصص اللي بتتحكي عنه لما الرجل إتفرم في الإعلام الإنجليزي بسبب فضيحة اتسمت SpyGate أو فضيحة التجسس إنه كان بيبعت واحد معاه نظارة معظمة يفضل يتفرج علي تدريبات الفرق التانية اللي حيلاعبها .. مش بقولك مجنون .. يمكن أهم درس اتعلمه (جوارديولا) من (مارسيلو بييلسا) إن كرة القدم دي فكرة وإنت كمدير فني لازم تؤمن بيها وتحارب عشانها .. انت ممكن مثلاً يكون ليك فكر دفاعي إن لازم الفرقة بتاعتك تدافع وتلعب علي المرتدات .. مش عيب علي فكرة وفيه واحد اسمه (مارشيلو ليبي Marcelo Lippi) كسب كأس العالم مع منتخب إيطاليا في 2006 بإنه يركن الأوتوبيس ويلعب علي المرتدات .. الفكرة إنك تبدأ تطور من لاعيبتك عشان ينفذوا فكرك ده.

انت مدرب دفاعي .. حلو .. إبدأ علم لاعيبتك إزاي يدافعوا صح .. اشتغل عليهم .. علمهم يعني إيه هجمة مرتدة .. يعني إيه الكرة تجري بسرعة ويعني إيه تتحول من الدفاع للهجوم في لمح البصر .. الناس اللي كانت محظوظة بما يكفي إنها تسمع محاضرات (مارسيلو بييلسا) اللي كان بيقولها في أكاديمية La Masia لما يعزموه فيها فهو دايماً بيقول إنك عشان تعرف إذا كنت مدير فني كويس أو لا أو عشان تعرف انت لاعيب كورة كويس أو لا قبل ما تروح تنام بليل إسأل نفسك سؤال واحد .. لو انت لاعيب والمدير الفني بتاعك كلمك في عز الليل إنك تلبس هدومك وتيجي تتمرن دلوقتي حتقوم أو لا .. لو كانت إجابتك لا فإعرف إنك لاعيب فاشل وحتفضل لاعيب فاشل .. لاعيب كرة القدم اللي عايز التاريخ يفضل فاكره لازم ميفوتش فرصة إنه يلعب كورة حتي لو ده معناه إنه يصحي من عز نومه يروح يتمرن.

يمكن اللي عايزك تطلع به من المقالة دي هي شوية دروس انت ممكن تتعلمها من إنك تدرس شخصية زي (جوارديولا) .. مش شرط علي فكرة تكون بتحبه أو من دراويشه عشان تتعلم منه .. انت محتاج تكون موضوعي ومحايد عشان تعرف إن حتي لو كنت بتكره الرجل ده فانت ممكن تتعلم منه حاجة:

الدرس الأول .. مفيش حد شاطر في شغله مبيشتغلش بجد:

أهم درس أنا عايزك تطلع منه انت شخصياً من المقالة دي هي إن الناس الحريفة أوي في شغلها سواء بتتكلم عن لاعيب كورة أو مهندس أو دكتور أو حتي صنايعي فدايماً بيكونوا ناس بتشتغل بجد .. بيكونوا ناس بتتعب عشان تتعلم وفعلاً بيسحلوا نفسهم شغل بس مش عشان الناس إنما عشان نفسهم .. عشان يتعلموا ويبقوا أحسن ناس في مجالهم .. يُحكي أن لما  (جوارديولا) كان بيدرب برشلونة كان تحت إيده لاعيب سويدي اسمه (إيدور جوديونسون Eidur Gudjohnson) .. للي منكوا لسه صغير مش قديم في الفرجة علي كرة القدم زي حالاتي أول ما سمع اسم (جوديونسون) تخيل إنه اسم شامبو بس ده كان لاعيب مهاجم بس كان احتياطي بيقعد علي الدكة أكتر ما بيلعب .. المهم إن (جوديونسون) مرة حكي إنه راح يقابل (جوارديولا) يسأله هو مطلوب منه إيه يعمله عشان يبقي أساسي فكان رد (جوارديولا) عليه .. حياتك .. إنك ميبقاش حاجة في حياتك بتفكر فيها إلا إني عايز أبقي أساسي في فرقتي .. بنام وأصحي وأكل وأتمرن عشان أبقي أساسي .. ساعتها بس حتوصل .. واحد من أكتر الناس اللي تعرف (جوارديولا) شخصياً كان المساعد بتاعه في برشلونة وبايرن ميونيخ وفي أول موسم له في مانشستر سيتي اسمه (مانويل إيستيارتي Manuel Estiarte) بيحكي عنه إن (جوارديولا) من الشخصيات اللي بتفكر في شغلها طول الوقت اللي هو انت ممكن تكون بتكلمه عن رأيه في أكله معينة أو في فيلم معين وتلاقيه سرحان مش معاك .. دماغه دايماً في شغله .. فكرة جديدة جاتله .. إيه اللي يحصل لو (ليوني ميسي) لعبته رأس حربة بدل جناح .. ليه (فيليب لام Philip Lahm) ميلعبش ارتكاز بدل ما هو باك يمين .

(جوارديولا) له أسلوب ثابت مبيتغيرش في الشغل .. قبل أي ماتش ب3 أيام كان بيحبس نفسه في مكتبه يتفرج بالساعات علي فيديوهات للفرقة الثانية اللي حيلاعبها .. يفضل يتفرج علي ماتشاتهم يحللها لحد ما يلاقي نقطة ضعف معينة ساعتها الشغل بيبدأ .. خلال الأيام اللي قبل الماتش الفرقة بتتمرن علي تقسيمة يعني يلعبوا 11 ضد 11 بحيث يتدربوا علي كل صغيرة وكبيرة في إزاي يستغلوا نقطة الضعف اللي (جوارديولا) شافها في الفرقة اللي هم حيلاعبوها .. (خافيير ماسكيرانو Javier Mascherano) قلب الدفاع الأرجنتيني اللي كان بيلعب في فرقة برشلونة تحت إيد (جوارديولا) في نهائي Champions League ضد مانشستر يونايتد سنة 2011 واللي برشلونة كسب الماتش ده 3-1 .. المهم إنه بيحكي إن قبل الماتش بكذا يوم (جوارديولا) لم الفرقة وإدالهم محاضرة في إزاي يكسبوا مانشستر يونايتد وبدأ يقولهم الماتش حيتلعب إزاي ومانشستر حيلعب إزاي وإزاي يستغلوا نقاط الضعف في الفرقة .. لما الماتش إتلعب (ماسكيرانو) بيقول إنه كان بيلعب الماتش وعنده إحساس إنه شاف ده قبل كده .. جاله إحساس إن علي فكرة أنا إتحكالي إن ده حيحصل في المحاضرة اللي قبل الماتش.

الدرس الثاني .. إتعلم من الكل بس متغيرش مبادئك:

درس كمان وهو إنك اتعلم من كل الناس بس متغيرش مبادئك .. من أكتر التشبيهات اللي بتوصف دماغ  (جوارديولا) هي إنه عامل زي السفنجة ممكن يقعد مع أي حد يتكلم معاه يتعلم منه .. هو معندوش أي اعتراض إنه يقضي ساعات يتكلم مع حد زي (إيدي جونز Eddie Jones) مدرب منتخب إنجلترا للرجبي أو (جاري كسباروف Garry Kasparov) أسطورة الشطرنج الروسي لمجرد إنه يتعلم منهم .. يمكن هو بيعوض النقص اللي عنده إنه متعلمش في مدارس ومعهوش شهادة من جامعة .. الله أعلم .. بس الفكرة إنك تعيش علي فلسفة أو اعتقاد معين وتؤمن به وتدافع عنه بس بلاش تبقي دماغك ناشفة .. مع إن الدماغ الناشفة دي أكتر إتهام بيتقال علي (جوارديولا) .. ده رجل رأيه في الكرة بسيط أوي وأسهل مما تتخيل .. هو رجل شايف إن أهم حاجة في كرة القدم هي الكرة .. انت بتتكلم عن فرقتين كل فرقة فيها 11 لاعيب عشان في الأخر الكرة تخش جوه الجون .. عشان كده بما إن الكرة هي أهم حاجة في اللعبة فلازم الفرقة بتاعته تفضل الكرة معاها .. بس خلي بالك .. الكرة لو فضلت معاك أكتر من اللازم حتحرقك .. الكرة تجري بين زمايلك .. انت متجريش .. الكرة هي اللي تجري .. العب السهل الممتنع .. بس لو حصل والكرة اتقطعت منك متهمدتش إلا لما تجيبها تاني.

لما تبقي عندك فكرة انت مؤمن بيها وتبدأ تشتغل عليها بشكل مستمر إنك تصحي تشتغل تنام تصحي تشتغل تنام علي إنك تطورها وتعالج مشاكلها حتلاقي نفسك مع الوقت زيك زي (جوارديولا) .. زيك زي السير (أليكس فيرجسون Alex Ferguson) .. زيك زي (كرويف) .. زيك زي (ماوريسيو بوتشتينو Mauricio Pochettino) .. دي ناس إكتشفت طريقة جديدة إنك تكسب ماتشات .. إحتمال الطريقة دي متكونش أحسن طريقة .. بس علي الأقل هي طريقة جديدة .. زي لما إنت كProgrammer تكتب Code جديد محدش فكر فيه قبلك .. ممكن ميكونش Code يحل كل مشاكل الCybersecurity اللي في الدنيا بس هو Code جديد ومختلف .. خليك مؤمن بفكرتك وحارب عشانها حتي لو الكل قالك إيه الهبل اللي إنت بتعمله ده .. زي ما فيه مديرين فنيين مؤمنين بفكرة ركن الأوتوبيس ف(جوارديولا) مؤمن بشكل لا تتخيله بالاستحواذ علي الكرة.

الدرس الثالث .. متخليش شغلك ينسيك إن فيه حاجة اسمها عيلة:

ناس كتير من اللي بيتقال عليك مدمنين شغل Workaholic بيدفعوا الثمن غالي أوي إن حياتهم الشخصية بتدمر خصوصاً لو كانوا متجوزين ومخلفين .. يٌحكي إنه أيام ما كان بيدرب برشلونة كان مشغول لشوشته بيستعد للماتش الجاي للفرقة قصاد خيتافي في الدوري لدرجة إنه نسي يحضر حفلة موسيقية بتعملها بنته في المدرسة ولما اكتشف جاله إحساس رهيب بالذنب .. يمكن عشان كده لما قرر يسيب برشلونة بعد 6 سنين قعد سنة كاملة في البيت لمجرد إنه يحسس عيلته وعياله إنه معاهم ومش ناسيهم .. صحيح إنه يدوبك بعد 4 شهور بس من أجازته دي بدأ مفاوضاته مع بايرن ميونيخ وده يخليك تقول لنفسك ما هو اللي فيه داء عمره ما بيغيره أو يقول لنفسه يعني هي عادتك ولا حتشتريها بس مش مهم .. إتعلم من الدرس ده وخلاص.

الدرس الرابع .. متضحيش بمبادئك عشان الناس تحبك:

أبقي بخدع نفسي وبضحك عليك لو قلتلك فكك من الناس .. أي حد فينا بيحب إحساس إن الناس تحبه وتجري وراه .. المشكلة إنك تحس إن عشان ده يحصل فانت لازم تغير من شخصيتك .. وعلي فكرة تكبير الدماغ .. أو بلاش تكبير الدماغ خليني أقول الثقة بالنفس هي أهم حاجة انت محتاج تطورها عشان توصل للمرحلة دي .. عشان إنت توصل للمرحلة دي مش حتيجي من يوم وليلة و حتحتاج وقت وتدريب .. (جوارديولا) نفسه بيحكي إنه كان زمان بيزعل أوي لو لاعيب زي (صامويل إيتو Samuel Eto’o) أو (تيري هنري Thierry Henry) بصله بصة وحشة .. دلوقتي خلاص جتته نحست وتقدر تقول إنه اتعلم إن مفيش لاعيب كويس بيقبل فكرة إنه يقعد علي دكه الإحتياطي .. زي ما انت كده لو مهندس شاطر بتزعل لو مديرك محطكش مع الفريق اللي حيمسك مشروع جديد وتقيل داخل الشركة .. الفكرة إنك انت كمدير تكون فاهم إن عاجلاً أو أجلاً فيه حد من الشاطرين حيقعد دكة فانت مطلوب منك وانت بتنقي مين يشتغل معاك نقي الشخصيات السوية اللي بتحب الخير لبعض وعارفين في الأخر إن مصلحة الشغل أهم من مشاعر حد فيهم .. دي بتيجي بقي من انت وشطارتك في التعيينات إنك بعينك تلقط الشخصيات الكويسة .. بس خلي بالك .. لو انت مدير وقربت أوي من الناس اللي تحت منك وأقنعت نفسك إنك بتدير فريق بيتعامل مع بعضه كإنه عيلة فخليك عارف إن برده عاجلاً أم أجلاً حتجرحوا بعض.

(جوارديولا ) إتعلم الدرس ده بالطريقة المؤلمة أوي في برشلونة .. هو كان بيتعامل مع اللاعيبه اللي تحت منه كأنهم صحاب بس إكتشف إنه لما بيقوم بدوره كمدير فني ويقعد حد فيهم دكة فاللاعيب بياخد ده علي إنه إهانة شخصية له .. لما (جوارديولا) قرر يروح بايرن ميونيخ فهو استغل فرق الثقافات إنه إلي حد ما يبعد مشاعره إنها تتدخل في قراراته زي ما إنت كده برده تروح تشتغل في الخليج فتلاقي إن فرق الثقافات بينك وبينهم بيخليك في حالك إلي حد ما ملكش صحاب من أهل البلد وإن كان الناس خدت بالها إنه كان قريب أوي من إتنين لاعيبه بالذات في فرقة بايرن اللي هم (فيليب لام) و(جوشوا كيميتش Joshua Kimmich) .. في مانشستر سيتي الوضع إختلف شوية .. اللاعيبه بتتعامل معاه علي إنه أبوهم خصوصاً إنك لو بصيت علي معدل أعمار فرقة السيتي حتلاقيه صغير إلي حد كبير.

إتعلم من (جوارديولا) خصوصاً لو إنت بقيت مدير ماسك فريق تحت منك إنك تاخد قراراتك من غير ما تدخل مشاعرك في الموضوع .. هو مشي (جو هارت Joe Hart) واحد من أحسن حراس المرمي في تاريخ إنجلترا مش لإنه مش بيحبه إنما لمجرد إن طريقة لعبه مش ماشية مع الإسلوب اللي (جوارديولا) بيلعب به .. الموضوع مش Personal أو شخصي ده شغل .. إدي فرصة للي تحت منك إنهم يتحسنوا بس لو ده محصلش مشيهم .. هو جه السيتي لقي إن إتنين لاعيبه زي (يحيي توريه Yaya Toure) و (سمير نصري) لياقتهم البدنية شبه لياقتك كده لما تبطل تلعب كورة 5 شهور وتروح انت وزمايلك تحجزوا ساعة تلعبوا كورة فتلاقي نفسك شحرت من أول سبرينت .. هو إداهم فرصة إنهم يتحسنوا عشان يبقوا ضمن الفريق بتاعه ولما ده محصلش مشاهم .. بس في نفس الوقت انت محتاج تدي لمشاعرك مساحة إنها تمشيك .. مفيش مديرين كتير في الدنيا ممكن يسمحوا لحد شغال تحتهم إنه ياخد أجازة مفتوحة عشان يبقي مع مراته وابنه اللي لسه مولود بس تعبان فكان محطوط في الحضانة بين الحياة والموت خصوصاً لو في وقت تسليمات .. مش حتلاقي ناس كتير تعمل اللي عمله (جوارديولا) مع (ديفيد سيلفا David Silva) لما قاله في اجتماع قدام الفرقة في الوقت اللي تحتاج فيه تسافر تبقي مع عيلتك قولي والفرقة حتتعامل ومتقلقش من حاجة.

الدرس الخامس و يمكن أهم درس .. دورك كمدير إنك تطلع أحسن ما عند اللي شغالين تحتك:

لما (جوارديولا) كان بيدرب برشلونة وفي أول إجتماع له مع الفرقة قعد يشرحلهم دماغه وهم حيلعبوا إزاي وإيه المطلوب منهم .. بعد الإجتماع وهو قاعد في مكتبه لقي (فيكتور فالديز Victor Valdes) حارس المرمي بيخبط عليه بيقوله ممكن أتكلم معاك شوية ف(جوارديولا) رد عليه إن بابه علي طول مفتوحله .. (فالديز) قاله إنه معجب بكلامه وإن الفرقة لازم تبقي معاها الكورة والكلام مية فل بس فيه مشكلة بسيطة وهي إن الكلام ده كله حيبقي هبد لو قلبين الدفاع بتوع الفرقة معرفوش يستلموا الكرة ويباصوها صح .. (جوارديولا) قاله متقلقش أنا مش حيبقي قدامي لا شغلة ولا مشغلة إلا إني أمرن قلبين الدفاع إنهم يستلموا صح ويباصوا صح .. بس خلاص ده كان الحوار .. (فالديز) نفسه بعد كده قال أنا لما (جوارديولا) استلم الفرقة مكنتش أعرف حاجة عن تكتيكات كرة القدم بس بعد 4 سنين معاه أنا بقي عندي استعداد أحضر دكتوراه .. الفكرة كلها إنك تشرح للي تحت منك إنت عايز منهم إيه وتفضل تمرنهم وتمرنهم وتمرنهم لحد ما يوصلوا للمستوي اللي إنت ترضي عنه .. موقف تاني حصل مع (جوارديولا) أول ما استلم برشلونة إن (تشافي Xavi) اللي كان وقتها فعلاً عنده أزمة ثقة في نفسه إنت لا تتخيلها لدرجة إنه فكر يعتزل قعد مع (جوارديولا) و إتكلم معاه ف(جوارديولا) أقنعه إنه يكمل لما قاله أنا مش شايف الفرقة بتلعب بالطريقة اللي أنا عايزهم يلعبوا بيها من غيرك .. خلال 20 ثانية بس كان (تشافي) عنده استعداد ينزل ياكل النجيلة لمجرد إن حد رجعله ثقته في نفسه تاني.

مع (فيليب لام) الوضع مختلف .. هو خد واحد من أحسن الباكات اليمين في العالم و خلاه يلعب إرتكاز .. هو تشبيه مش في محله بس لمجرد التقريب هو خلاه شبه (أحمد فتحي) كده و علي فكرة منتخب ألمانيا خد بطولة كأس العالم 2014 و كان (لام) وقتها كابتن الفرقة و أغلب ماتشات المنتخب لعبها كإرتكاز .. فيه لاعيبه تستحق إنك تطلع تقول قدام الناس إنها بتفهم و دماغها شغالة و (جوارديولا) وصف (لام) قبل كده إنه أكتر لاعيب بيشغل دماغه هو دربه في حياته .. لما راح السيتي خلي (رحيم ستيرلينج Raheem Sterling) من شخصية الناس بتتريق عليها و بتطلع عليها كومكسات للاعيب أساسي مش بس في فرقته إنما كمان في منتخب بلده .. (جوارديولا) له في الفرق اللي دربها علامات و العلامات دي مش بطولات قد ما هي لاعيبه قدمت أحسن ما عندها تحت إيده .. هو كان فيه حد سمع قبل كده عن اسم (سيرجيو بوسكيتس Sergio Busquets)؟ هل عمرك شفت (ديفيد سيلفا) بيقدم مستوي أعلي من اللي هو بيقدمه مع السيتي تحت إيد (جوارديولا)؟ .. أمثلة غيرهم كتير للاعيبه فعلاً إتحسنت تحت إيده و ده في رأيي أكبر إنجازاته.

المصدر:

• مقالة بعنوان Pep Guardiola: The Man City Manager Described as Football’s Che Guevara .. نشرت في موقع هيئة الإذاعة البريطانية BBC و ده لينك المقالة الأصلية:
  http://www.bbc.com/sport/football/43486412