الحقيقة إن اللي كانوا متوقعين إن روسيا تاخد حبوب الشجاعة و تغزوا أوكرانيا مكانوش كتير و أنا منهم .. بس يمكن اللي أقل منهم هم اللي كانوا متوقعين إن أداء القوات المسلحة الروسية في الحرب يبقي بالشكل اللي زي الزفت ده .. الحرب دي في أولها إتقال إنها حتخلص في كام يوم لما الدبابات الروسية تخش شوارع العاصمة الأوكرانية كييف و تقبض علي الرئيس الأوكراني (فلاديمير زيلينسكي) .. دلوقتي الأيام إتحولت أسابيع و الأسابيع بقت شهور و القوات الروسية مش بتتقدم ولا كأنها مزنوقة في زحمة كوبري أكتوبر .. بس اللي أنا عايز أقف قدامه النهاردة هو نقطة محددة و هي لما إتقال يلا نعمل منطقة حظر طيران فوق أوكرانيا أو No Fly Zone و أول ناس إعترضت علي الفكرة دي كان الأمريكان و الأوروبيين و يمكن ده اللي زعل الأوكرانيين و حسسهم إن ملهمش ظهر في خناقتهم مع روسيا .. بس إنت محتاج تفهم معايا هي ليه الفكرة دي إترفضت.
دلوقتي الفكرة بتاعة No Fly Zone بمنتهي البساطة عاملة زي شخصية (وائل) في فيلم الناظر صلاح الدين لما كان بيزعق في زمايله في المدرسة محدش حيتعلم هنا .. في حالة No Fly Zone إنت بتقول محدش حيطير هنا .. ده معناه إن مطلوب منك يبقي عندك أسراب طيارات بتأمن سماء أوكرانيا عشان أي طيارة روسي تخترق المجال الجوي الأوكراني تتضرب .. ده معناه إيه؟ .. معناه إن بطاريات الدفاع الجوي الروسية سواء S-300 أو S-400 حيبقي من حقها هي كمان إنها لو شافت طيارة مقاتلة أميريكية أو أوروبية طايرة فوق سماء أوكرانيا حيبقي من حقها إنها توقعها .. وهي دي المشكلة.
لو جيت تبص علي الدول الأعضاء في حلف شمال الأطلنطي NATO و تعد هم كلهم علي بعضهم شاكب راكب تحت إيدهم كام طيارة مقاتلة حتلاقي عندهم 1,900 طيارة .. رقم كبير صح؟ .. من المولد ده كله فيه 100 طيارة بس بتنتمي للجيل الخامس اللي هم بمعني أخر طيارات F-35 Lightening II و الباقي أغلبه طيارات جيل رابع .. معني كلمة طيارة جيل رابع إنها طيارة حلوة و زي الفل بس سهل أوي تتلقط بالرادارات أو بمعني أخر حيبقي سهل علي بطاريات الدفاع الجوي الروسي إنها توقعها و الكلام ده شامل طيارات إيوروفايتر تايفون Eurofighter Typhoon الأوروبية و طيارات رافال Rafale الفرنساوي .. المشكلة دي مش حتلاقيها لو إستخدمت طيارات F-35 بس هي المشكلة زي ما قلتلك إن الغرب محيلتوش غير 100 طيارة بس حالياً.
المشكلة دي حالياً بتتعالج .. من دلوقتي و لحد سنة 2040 دول NATO بتخطط يبقي تحت إيدها 400 طيارة F-35 .. أنا لو سبتلك العنوان ده كده و مشيت حبقي ظلمتك لإن المشكلة مش مشكلة فلوس .. أنا ممكن أقولك إن خلال العشرين سنة الجاية دول NATO حيبقي عندها عدد طيارات جيل خامس تخليها تكسب أي حرب تخشها بعد كده بس برده لو أنا عملت كده حبقي برتكب جريمة لإني موضحتلكش الصورة كاملة .. قصاد إن إنت يبقي معاك فلوس تشتري العدد ده من طيارات F-35 فإنت قدامك مشكلتين تانيين مش بيتحلوا بالفلوس:
أول مشكلة هي الذخيرة .. الطيارة F-35 بتستخدم نوع صواريخ و ذخيرة بيتحط تحت مظلة حاجة كبيرة إسمها الذخيرة الموجهة بدقة Precision-Guided Munitions و إختصارا بتتسمي PGM زي مثلاً الصواريخ الموجهة باللليزر و القنابل الموجهة بالGPS .. مشكلة الذخيرة دي إنها غالية و مش سهل تنتجها .. عشان كده دول الحلف لقت نفسها لبست في الحيط لما مثلاً في عملية التدخل العسكري في ليبيا القوات الجوية الفرنساوية و الإيطالية إكتشفت إنها في أول أسبوع من الحرب إستنفذت أغلب مخزونها من الذخيرة دي .. ليه؟ .. كانوا كل ما يشوفوا هدف شكله حلو و حيسمع في الأخبار يضربوه عشان تصحي الصبح تلاقي خبر علي قناة الجزيرة إن القصر الفلاني اللي كان بيملكه (معمر القذافي) الله يرحمه إتدمر في غارة جوية .. لو الأوروبيين كانوا وافقوا يعملوا منطقة حظر طيران فوق أوكرانيا فكان ممكن يلاقوا نفسهم بيطلعوا طيارات فاضية من كتر ما هم حيخلصوا مخزونهم من الذخيرة دي في أول كام يوم من العمليات.
ثاني مشكلة هي التدريب .. الأمريكان بيحبوا يسموا عملية ضرب بطاريات الدفاع الجوي للعدو إسم سيكسي أوي اللي هو Suppression of Enemy Air-Defenses و إختصاراً بيسموها SEAD .. جميل .. المفروض إن كل طيار مقاتل بيطير بطيارة F-35 يبقي جامد زحليقة في عمليات SEAD دي عشان يبقي أشطر كتكوت بيطير في الجو .. لو حضرتك طيار مقاتل في القوات الجوية الأميريكية فإنت كل كام شهر بتروح ولاية نيفادا عشان تاخدلك كورس مكثف إسمه Red Flag أو العلم الأحمر و البنات ليهم ترجمة تانية خالص للإسم ده و في الكورس ده حضرتك بتتعلم فيه و بتتمرن علي كل ما له علاقة بضرب بطاريات الدفاع الجوي المعادية .. طب فين المشكلة؟ .. المشكلة إن لايحة القوات الجوية الأميريكية بتقول إن الطيارين الأجانب اللي يحق ليهم المشاركة في التدريبات دي هم الطيارين البريطانيين بس .. ده معناه إن لو حتي دول NATO وافقت تعمل منظقة حظر طيران فوق أوكرانيا فمفيش غير الأمريكان و البريطانيين بس هم اللي حيبقوا مؤهلين يقوموا بالدور ده.
فيه برده مشاكل تانية ممكن تحطها جنب أخواتهم اللي جبت سيرتهم النهاردة .. عندك مثلاً إن الطيارة F-35 نفسها مش أحسن حاجة في الدنيا و فيها مشاكل كتير أنا شخصياً إتنبح صوتي في الكلام عنها هنا .. عندك كمان إن سعر الطيارة معدي 100 مليون دولار فحتبقي مصيبة سوادا لو بطارية صواريخ S-400 روسية وقعت واحدة .. فيه كمان إن كتير من دول NATO إشترت عدد قليل أوي من طيارات F-35 عشان بس ميتقالش عليهم إن مش في دماغهم حماية مصالح الحلف و بالتالي الدول دي لو حبت تشارك في العمليات العسكرية في أوكرانيا مش حيبقي متاح ليها غير إنها تبعت عدد يتعد علي الصوابع من الطيارات زي مثلاً هولندا اللي حتشتري 43 طيارة بس أو بلجيكا اللي حتشتري 34 طيارة أو الدانمرك اللي عشان محدش يحسدها قالت إنها حتشتري 27 طيارة .. يمكن اللي أنا عايز أقوله إن لو كتبت مقالة عنوانها إن دول حلف شمال الأطلنطي حيبقي عندهم 400 طيارة F-35 فلو إنت مش فاهم أوي التفاصيل ممكن تغلط و تتخيل إن ده رقم كبير .. الحقيقة مش كده خالص .
المصدر:
مقالة بعنوان When 400 F-35s Might Not Be Enough نشرت في مجلة Forbes و ده لينك المقالة الأصلية:
https://www.forbes.com/sites/davidaxe/2020/11/07/when-400-f-35s-might-not-be-enough/?sh=4ac8a2d86962
