من فترة كنت إتكلمت عن مشكلة غريبة أوي تخص طيارات إيوروفايتر تايفوون Eurofightier Typhoon اللي تحت إيد سلاح الجو الألماني و اللي بسبب إن فيه قطعة غيار مش متوفرة ففيه بس 10 طيارات من أصل 128 طيارة ينفع تخش حرب بكره الصبح .. حزر فزر مين عنده مشكلة شبه دي؟ .. بناء علي تقرير بيتكتب من مارس 2018 طلع من مكتب المفتش العام لوزارة الدفاع الأميريكية فالقوات البحرية عندها مصيبة سودا مستنيه تفرقع في وشهم من سنة 1995 و المشكلة دي متحلتش لحد دلوقتي و بتتمثل في أسطول طيارات F/A-18E/F Super Hornet و دي تبقي العمود الفقري لأساطيل الطيارات المقاتلة اللي بتخدم من علي حاملات الطائرات و اللي بتتبع قيادة القوات البحرية مش القوات الجوية و اللي بالمناسبة إنت شفتها في فيلم Top Gun:Maverick.. فاضل إنك تعرف هي المشكلة بالصلاة علي النبي فين؟
متفهمش ليه بس قيادة سلاح البحرية طلبت و بدون أي مبرر إن أسطول طيارات Super Hornet يوصل لمستوي 80% من الكفاءة القتالية علي أواخر سنة 2019 .. ده معناه إن لو مثلاً القوات البحرية تحت إيدها 100 طيارة فهم عايزين إن علي أخر سنة 2019 يكون 80 طيارة منهم جاهزين يخشوا حرب بكره الصبح .. حلو .. لما جم يقيموا الوضع لقوا إن لحد يوليو 2019 حوالي 50% بس من أصل 546 طيارة Super Hornet اللي تحت إيد القوات البحرية ينفعوا يطيروا في حرب بكره الصبح .. طب و الباقي؟ .. مركونين في العنابر عشان ناقصهم قطع غيار لسه مجاتش .. علي فكرة الوضع أسوأ من كده .. عشان مهندسي القوات البحرية يوصلوا أساساً لنسبة 50% دي إضطروا وسط النقص في قطع الغيار إنهم يفكوا طيارات F/A-18 اللي تعتبر النسخ الأقدم من طيارات Super Hornet و اللي يا إتحطت في متاحف يا إترمت في مستودعات الخردة عشان ياخدوا منها قطع غيار ينفع يستخدموها .. ده معناه إن فيه طيارات Super Hornet في الخدمة حالياً و إتصنفت بإنها جاهزة للقتال بس محطوط فيها قطع غيار قديمة .. لا تخرج قبل ان تقول سبحان الله و برده تقول الجيش قالك إتصرف.
كل ده سببه إيه؟ .. السبب بمنتهي البساطة إن مش معني إن فيه جنرال بنسر و دبورتين متعين قائد الإدارة الفلانية لتطوير الحاجه العلانية إن معني كده إنه بني أدم بيفهم .. لا خالص .. أحياناً كتير ناس بهايم بتتحط في موضع سلطة و ده بيخليهم يهبدوا و الهبد بيودي في داهية .. القوات البحرية الأميريكية ماسكها ناس فيه منهم شوية بهايم هوايتهم المفضلة يبعزقوا فلوس علي برامج تسليح ملهاش أي معني بس الأسلحة اللي شغاله زي الفل مبيرضوش يوفرولها فلوس الصيانة و قطع الغيار بحجة إن والله الميزانية معًجزة شوية السنة دي .. من أمثلة الفشل ده مشروع المدمرة DDG-1000 Zumwalt اللي بعد ما سلاح البحرية صرف دم قلبه عشان ينتج 3 نسخ منها المشروع كله إتلغي .. مثال تاني كان مشروع فرقاطات المياه الساحلية Littoral Combat Ship و ده برده نوع جديد من السفن الحربية إتلغي بعد ما إتصرف عليه 30 مليار دولار .. الفلوس دي كانت ممكن تتصرف علي صيانة أسطول طيارات Super Hornet بس ده محصلش.
فيه ناس تانية رأيها إن والله إنت ظالم قيادة سلاح البحرية .. المشكلة إن الناس دي إتقالها إن سلاح البحرية حيستلم طيارات F-35C اللي حتبدأ تحل محل أسطول طيارات Super Hornet خلال الفترة من 2010-2012 و ده خلاهم ميمضوش عقود شراء قطع غيار للطيارات و اللي كان المفروض إنهم يشتروها في التسعينات و الألفينات بحجة ليه أدفع عشان أشتري قطع غيار طيارات كده كده حطلعها بره الخدمة كمان كام سنة؟ .. طبعاً لما تسليم طيارات F-35C إتأخر القوات البحرية لبست أحلي خازوق في حياتها.
حتي لما قيادة القوات البحرية بدأت تعالج المشكلة لقوا نفسهم قدام سلسة خوازيق مبتخلصش .. عندك مثلاً إن من ضمن قطع الغيار المطلوبة شاشة العرض الرئيسية في التابلوه قدام الطيار و اللي للأسف وقت ما الطيارة إتصنعت كانت بتتعمل من نوع زجاج دلوقتي مبقاش فيه حد بيصنعه .. سنة 2018 القوات البحرية إتكلمت مع المقاول اللي كان بيوفر قطعة الغيار دي و قالهم إن معندوش في المخازن بتاعته غير 68 شاشة بس و ده خلي مفيش حل غير إن القوات البحرية تتصرف و تصنع هي شاشات جديدة و الله أعلم ده حيخلص إمتي؟ .. مثال تاني هو الأريال بتاع الإتصالات Communication Antenna اللي بتصنعها شركة واحدة بس و الشركة دي نقلت المصنع بتاعها من ولاية ماساشوسيتس لولاية بنسلفانيا و الشركة واخده ده سبب إنهم يتأخروا في تسليم قطعة الغيار سنة كاملة علي الأقل .. قطعة غيار تالتة اللي هي الموتور اللي بيتحكم في الزعنفة الخلفية للطيارة مشكلته إن الشركة اللي بتصنعه فجأة إتطلب منها كم ضخم جداً فعشان تنتجهم و تختبرهم فده حياخد وقت .. فوق ده كله إن القوات البحرية متقدرش هي اللي تنتج قطع الغيار دي لإن عقود الصيانة اللي هم ماضيينها مع الشركات بتمنعهم من ده .. ده بيخليني فعلياً لو أنا مكان اللي ماسك ملف صيانة أسطول طيارات Super Hornet فمفيش علي لساني غير جملة واحدة .. يا حوستي السودا يانا يا أما.
المصدر:
مقالة بعنوان The US Navy doesn’t have enough spare parts to keep its fighter jets in the air نشرت في موقع Quartz وده لينك المقالة الأصلية:
https://qz.com/1754793/us-navy-lacks-enough-spare-parts-to-keep-fighter-jets-in-air/
