لو إنت لعبت PUBG أو كنت من الشرفاء اللي لعبوا Call of Duty في سايبر أو حتي دخلت الجيش فإنت عارف كويس إن زي ما فيه في مصر الأهلاوية و الزملكاوية ففيه برده الناس اللي شايفه إن البندقية الكلاشينكوف هي أحسن إختراع بعد الكهرباء قصاد إن فيه ناس تانية شايفه إن عيلة البنادق الأمريكاني زي M-16 هي أحسن إختراع بعد الفيروز أناناس .. الحقيقة إن أنا النهاردة مش جاي أدلي بدلوي في الخناقة دي .. النهاردة جايين نقولك إن سواء الكلاشينكوف أو M-16 ليهم أصل محدش وسط أنصارهم عايز يجيب سيرته عشان ميبقاش شكلهم وحش إنهم خدوا فكرة من الألمان النازيين الوحشين المتوحشين العنصريين و الأصل ده هو البندقية الألية الألمانية StG-44.
خلينا الأول نبدأ نفهمك المشكلة فين .. زمان وقت الحرب العالمية الثانية لو إنت كنت عسكري في القوات المسلحة الألمانية فإنت بيتحط قدامك بندقيتين إنت و حظك بقي نصيبك يوقعك تمسك مين فيهم .. الخيار الأولاني كان بندقية إسمها كارارا-بينير Karabiner و فيه ناس تانية بتسميها 98k و دي كانت بندقية إتبنت علي نفس الفكرة اللي إتعملت منها البنادق الManual اللي بتضرب طلقة طلقة اللي كان العساكر الألمان بيستخدموها في الحرب العالمية الأولي بس هي إتعمل عليها تعديلات كتير بحيث بقي وزنها حوالي 7 كيلوجرام و فيها خزنة داخلية بتشيل 5 طلقات و أقصي مدي دقيق ليها للنشان كان 600 متر .. الخيار الثاني كان مدفع رشاش خفيف من عيلة MP و كان بينزل منه 3 موديلات اللي هم MP-38 و MP-40 و MP-41 و ده كان مدفع رشاش الكعب بتاعه بيتني و لإنه مدفع رشاش خفيف فكان وزنه أخره 4 كيلوجرام و بيتحطله خزنة ذخيرة بتشيل 32 طلقة بحيث أقصي مدي دقيق للنشان كان يدوبك 200 متر.
كل ده جميل بس فين المشكلة برده؟ .. المشكلة إن الألمان كانوا متخيلين إن إحتياجات العسكري في الحرب العالمية الثانية حتبقي هي هي إحتياجاته في الحرب العالمية الأولي .. محتاج بندقية بتضرب طلقة طلقة دقيقة في نشانها لو حتجيب عسكري من مسافة بعيدة و في حالة الإشتباك القريب لو إنت بتطهر خنادق أو بيت مثلاً بتحتاج مدفع رشاش خفيف بيضرب طلقات كتير بس مش محتاج الطلقة بتاعته تبقي قوية .. لما الحرب العالمية الثانية قامت الألمان إتصدموا إنهم كانوا غلطانين .. هم لقوا نفسهم محتاجين حاجة وسط بين 98K و بين MP .. صحيح البندقية 98k طلقتها و القبر بس هي برده بتضرب طلقة طلقة و مش كافية إنها تصد جحافل الجيوش السوفيتية اللي طايحة في الألمان زي الطور الهايج .. صحيح برده المدفع الرشاش MP بيضرب طلقات كتير عيار 9 مليمتر بس أديك لسه قايل دي طلقات عيار 9 مليمتر يعني حاجة كده شبه المسدسات الخرز اللي العيال الصغيرة بتلعب بيها في العيد .. طب و الحل؟
لازم تبقي فاهم إن دول مشكلتين في بعض مش مشكلة واحدة .. إنت عندك مشكلة إنك تلاقي الطلقة المناسبة و بعد كده عندك مشكلة إن تصمم بندقية ألية تنفع تستخدم الطلقة اللي إنت إخترتها .. أول مشكلة الألمان لقوها محلولة .. قبل الحرب ما تبدأ هم كان عندهم طلقة ملقوش ليها لازمة بس أهي مرمية في المخازن .. الطلقة دي كانت عيار 7.92×33 مليمتر .. طب ليه إترمت في المخازن؟ .. عشان الطلقة دي صحيح ليها نفس قطر الطلقة عيار 7.92×57 مليمتر اللي بتستخدم في البندقية 98k بس زي ما إنت أكيد خدت بالك طول الطلقة أقصر بحوالي 24 مليمتر .. ده معناه إن دي طلقة بتستخدم نص كمية البارود تقريباً و دي حاجة كويسة بس مدي طيرانها مش كبير و دي حاجة برده كويسة لإن الطلقة دي بقت مثالية جداً لو إنت ناوي تعمل بندقية ألية بتضرب نار بشكل أوتوماتيك .. طب ما كده جميل لقينا الطلقة و ده حل المشكلة الأولانية و دلوقتي جه وقت نحل المشكلة الثانية .. فين البندقية؟
سنة 1942 يعني قبل ما الحرب العالمية الثانية تخلص ب3 سنين فيه مهندس ألماني فشيخ إسمه (هيوجو شمايسر Hugo Schmeisser) صمم بندقية ألية هو سماها هاينل Haenel و إداها رقم MKb42 لو شفتها حتحس إنها جدة البندقية الكلاشينكوف .. المقبض كان شبه مقبض المسدس .. الكعب كان من الخشب .. بتشيل خزنة ذخيرة جواها 30 طلقة .. بس هي كانت تقيلة الحقيقة وزنها حوالي 5 كيلوجرام .. بعد شوية تعديلات إحتاجت حوالي سنة البندقية دي دخلت الخدمة سنة 1943 تحت إسم MP-43 و بعد كده إتعاد تسميتها سنة 1944 و بقي إسمها شتروم-جير أربعة و أربعين أو Strumgewehr-44 و دي كلمة ألماني معناها سلاح العاصفة و يقال إن (أدولف هتلر) بنفسه هو اللي سماها الإسم ده .. لما الحرب العالمية الثانية خلصت كانت ألمانيا أنتجت 425,977 قطعة من البندقية الألية StG-44 و ده في حد ذاته معجزة إن بلد ظروفها الإقتصادية متدمرة و متحاصرة من ناحيتين تقدر تنتج العدد ده من بندقية ألية معقدة في تصنيعها.
بعد الحرب العالمية الثانية (ميخائيل كلاشينكوف Mikhail Kalashnikov) العسكري السوفيتي طلعلنا تحفتة الفنية AK-47 اللي تصميمها إتبني علي البندقية StG-44 و من بعدها دول كتير خدت نفس الفكرة و طبقتها علي البنادق الألية بتاعتها .. الأمريكان عملوا بيها البندقية M-4 Carbine .. الإنجليز عملوا بيها البندقية SA80 .. الصينيين عملوا بيها بندقيتهم QBZ-95 .. و كل ده إتبني علي الأصل النازي بس محدش بيجيب سيرة الموضوع ده عشان إنت عارف بقي إن ده موضوع حساس و كده.
المصدر:
مقالة بعنوان Study This Picture: Every Modern Assault Rifle is Traced Back to This نشرت في مجلة The National Interest و ده لينك المقالة الأصلية:
https://nationalinterest.org/blog/reboot/study-picture-every-modern-assault-rifle-traced-back-189633
