البندقية اللي قدامك دي من أكتر البنادق الألية المستخدمة علي مستوي العالم و في نفس الوقت هي من أكتر البنادق الألية اللي محدش عارف عنها أي حاجة .. دي تبقي البندقية الرسمية للقوات المسلحة الصينية .. مفيش عسكري فيكي يا صين إلا و معاه البندقية دي .. ده رقم واحد .. رقم إتنين بقي إن كل حاجة في البندقية دي غريبة .. إسمها غريب .. إسمها QBZ-95-1 .. شكلها غريب .. التصميم بتاعها بيتسمي Bullpup يعني إنت حطيت خزنة الذخيرة و الميكانيزم اللي الطلقة بتطلع به من الخزنة لحد ما تتضرب من البندقية ورا الزناد و علي فكرة الميكانيزم ده هو هو اللي موجود في البندقية كلاشينكوف AK-47 .. ده معناه برده إن بقي عندك بندقية ألية إلي حد كبير قصيرة لإن طولها كلها علي بعضها 75 سنتيمتر و ده بيخليها أقصر من بندقية ألية زي M16A4 الأميريكية و أطول بحاجة بسيطة من البندقية M4A1 Carbine .. عيار الطلقات اللي هي بتستخدمه غريب اللي هو 5.8 مليمتر .. الروس كل البنادق الألية الجديدة بتاعتهم دلوقتي بتتصنع بعيار 5.45 مليمتر و الأمريكان طول عمرهم بيستخدموا طلقات عيار 5.56 مليمتر فليه بقي الصينيين عملوا عيار طلقات جديد خاص بيهم دي نقطة عليها جدل و خناق كتير فخليها مش موضوعنا دلوقتي .. البندقية بتضرب نار بمعدل 650 طلقة في الدقيقة و ده رقم محترم أوي بس يمكن فكرة إن الناشنكاه متركب فوق المقبض بتاعها اللي شبه مقبض شنط Laptop ده بيصعب عليك شوية إنك تركب عليها إكسسوارات زي التوجيه بالليزر و كده بس مش مستحيل و بتتركب عادي.
مهم بس أخدك في رحلة سريعة أوي عن إزاي الصين فكرت أصلاً تعمل البندقية دي .. بص يا سيدي .. لسنين و سنين و العقيدة القتالية الصينية مبنية علي فكرتين .. إحنا بلد (سوري في الكلمة) واسعة فشخ .. كمان إحنا بلد (سوري في الكلمة تاني) عددنا كتير فشخ .. يبقي بسيطة .. أي حد يفكر يغزونا إحنا نسيبه يخش جوه عندنا حبة حلوين لحد ما يوصل لمرحلة إنه بقي صعب عليه ينسحب و ساعتها نستلمه معارك برية و حروب عصابات لحد ما نخلص عليه .. ده الفكر اللي الصين فضلت تدافع بيه عن نفسها لسنين لحد ما جت سنة 1991 و شافوا بعنيهم اللي حصل في العراق في حرب الخليج الثانية .. هم شافوا العراق بتستخدم نفس الفكر بتاعهم .. سيب الأمريكان يدخلوا بري و بمجرد ما ينزلوا علي أرضنا حنصطادهم .. شافوا العراق و هي معتمدة بشكل أساسي علي تسليح روسي زيهم زي الصين .. بس الأمريكان دخلوا العراق أسهل ما أي رجل بيفتح برطمان الصلصة .. اللي حصل في العراق خلي الصينيين يقفوا يبصوا لنفسهم في المراية و يقولوا لنفسهم زي ما (هند صبري) كانت بتقول في فيلم الفيل الأزرق .. أوعي تنامي يا صين .. الصين قررت إنها تمشي في سكة تصنيع سلاحها بناء علي فكر جديد لانج .. اللي حيفكر يهوب ناحيتي حقطعله رجله و البندقية الألية اللي قدامك دي أكبر تجسيد للفكر ده.
العسكري الصيني الواحد بيشيل البندقية QBZ-95-1 و معاه 10 خزن ذخيرة كل خزنة فيها 30 طلقة يعني بتتكلم عن العسكري الواحد شايل معاه 300 طلقة .. العسكري بيستلم البندقية و معاها سونكي و 6 قنابل يدوية .. كل 9 عساكر مع بعض بيبقوا فصيلة بحيث كل فصيله بيبقي فيها إتنين عساكر كل واحد فيهم شايل بندقية خاصه شوية من QBZ-95-1 .. أولاً البندقية بيتركب فيها قاذفة قنابل Grenade Launcher عيار 35 مليمتر بحيث إن العسكري الواحد بيبقي معاه 15 قنبلة من النوعية اللي بتتضرب من البندقية غير ال6 قنابل يدوية بتوعه .. ثانياً في حالة إن الإتنين عساكر بيغطوا إنسحاب أو هجوم زمايلهم فبيبقي معاهم خزنة ذخيرة مخصوص فيها 75 طلقة و بيركب في البندقية مُثبت زي مُثبت الكاميرا كده عشان يعرف ينشن .. دي كانت لمحة بسيطة عن واحدة من يمكن أهم البنادق الألية في العالم اللي عشان لو شفتها و إنت بتلعب PUBG تبقي فاهم مين دي و بتعمل إيه و إتعملت ليه.
المصدر:
مقالة بعنوان Meet China’s Deadly QBZ-95-1: One of the World’s Best Assault Rifles? .. نشرت في مجلة National Interest و ده لينك المقالة الأصلية:
http://://nationalinterest.org/blog/buzz/meet-chinas-deadly-qbz-95-1-one-worlds-best-assault-rifles-41042
