الطيارة الصينية J-20 أول طيارة من طيارات الجيل الخامس اللي تعملها الصين .. شكلها حلو أنا عارف بس أنا مش جاي النهاردة لا أتكلم عن شكلها ولا عن أتكلم عن إمكانياتها .. أنا عايزك تبص علي الصورة بتاعتها وتاخد بالك من حتة معينة قدام خالص تحت قمرة القيادة بتاعة الطيار .. فيه حتة تحسها إزاز أو بلاستيك شفاف تحت قمرة القيادة بالضبط .. شفتها؟ .. البتاعة دي إسمها Electro-Optical Targeting System وإختصاراً بتتسمي ETOS .. هي بمنتهي البساطة شوية حساسات Sensors محطوطين جنب بعض بحيث الطيار يقدر يبقي قدامه معلومات عن موقع طيارته وموقع القوات المعادية اللي المفروض إنه حيضربها .. البتاعة دي اللي إخترعتها وصنعتها كانت شركة لوكهيد مارتين Lockheed Martin ودي الشركة الأمريكاني اللي بتصنع طيارات F-35 اللي هي كمان من طيارات الجيل الخامس .. مش كده وبس .. ETOS بتتركب في نفس المكان ده هو هو بالضبط في F-35 .. طبيعي هنا إنك تسأل نفسك لا معلش ثانية واحدة .. إزاي الصين خدت البتاعة دي ركبتها علي الطيارات بتاعتها؟
اللي حصل إن سنة 2013 فيه واحد إسمه (إيدوارد سنودين Edward Snowden) أنا إتكلمت عنه قبل كده سرب تقارير مخابرات سرية قالت إن سنة 2007 المخابرات الصينية قدرت تعمل عليه Hack علي سيرفرات شركة Lockheed Martin عشان يسرقوا تفاصيل التصميمات بتاعة ETOS .. في 2017 المخابرات الصينية عملت نفس الحركة دي تاني بس سرقوا تعديلات في التصميم بتاعة ETOS من الكومبيوترات بتاعة مهندسين أستراليين شغالين علي مشروع النسخ من طيارات F-35 اللي حيستلمها سلاح الجو الأسترالي .. ETOS كفكرة مش جديدة لإن طيارات قديمة زي Eurofighter Typhoon وحتي سوخوي سبعة و خمسين Su-57 الروسية بيتركب عليها حاجة شبهه إسمها Infrared Tracking System وإختصاراً بيتسمي IRTS .. لو سألت الأمريكان عن الفرق بين ETOS بتاعهم وبين اللي متركب علي J-20 حيقولوك أولاً ده مسروق وثانياً لو بصيت لأبعاده حتلاقيه أصغر من ETOS اللي متركب علي F-35 وبما إنه أصغر يبقي أكيد أضعف .. طبعاً ده إسمه هبد بس أنا مقدرش أنقلك رد الصينيين لإن الصينيين مش بيردوا ولا عايزين يقولوا أساساً إمكانيات J-20 دي إيه.
نقطة السرية بتاعة إمكانيات الطيارة J-20 فاتحة الباب للهبيده إن كل واحد يقول اللي عنده .. يعني مثلاً عندك المحركات بتاعة الطيارة ناس تقولك دي نفس المحركين AL-31F اللي حتلاقيهم في طيارات سوخوي سبعة و عشرين Su-27 الروسي ودي محركات أخرها تديلك سرعة 2.3 ماخ .. ناس تانية تقولك لا الصينيين مركبين فيها محركات تصنيع محلي إسمها WS-10B والسبب في ده إن الصين معندهاش محركات AL-31F بالعدد اللي يكفي وكمان هم لسه شغالين علي النسخة الجديدة من المحركات اللي هم عاملينها WS-15 بس لسه مدخلوهاش الخدمة .. دي هبداية في حتة الموتور بس .. هبداية تانية في حتة هل فعلاً الطيارة J-20 بتقدر تختفي من الرادارات المعادية ولا لا؟ .. الصينيين اللي بيطلع منهم إن الشكل الخارجي بتاع J-20 يعتبر نسخة طبق الأصل من الطيارة F-22 Raptor الأمريكاني .. الهنود علي الناحية الثانية بيقولوا علي فكرة بقي إحنا بنقدر نتعقب الطيارة J-20 عشان إحنا عندنا طيارات Su-30MKI روسي فيها رادار متطور شوية إسمه Phazotron Zhuk-AE بيقدر يلقط الطيارة J-20 الصيني .. هل الصينيين عندهم حق؟ الله أعلم .. هل الهنود كدابين؟ برده الله أعلم.
المصدر:
- مقالة بعنوان China’s J-20 stealth fighter is built on stolen F-35 technology نشرت في مجلة The National Interest وده لينك المقالة الأصلية:
s://nationalinterest.org/blog/buzz/chinas-j-20-stealth-fighter-built-stolen-f-35-technology-89586
